ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI:ວັນທີ 16 ພຶດສະພາ 2021ນີ້, ທ່ານຫວາງຢີ້, ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ ຈັດກອງປະຊຸມສະພາຄວາມໝັ້ນຄົງອົງການສປຊແບບເປີດເຜີຍຢ່າງຮີບດ່ວນກ່ຽວກັບບັນຫາການປະທະກັນລະຫວ່າງປາແລັສຕີນກັບອິສຣາແອນ.
ທ່ານຫວາງຢີ້ກ່າວວ່າ, ຈີນກ່າວປະນາມຢ່າງຮຸນແຮງຕໍ່ພຶດຕິກຳຫົວຮຸນແຮງທີ່ມີຕໍ່ປະຊາຊົນສາມັນ, ຮຽກຮ້ອງໃຫ້ສອງຝ່າຍທີ່ປະທະກັນຈົ່ງຢຸດຕິການໃຊ້ຄວາມຮຸນແຮງທາງການທະຫານແລະການເປັນປໍລະປັກກັນໃນທັນທີ, ຢຸດຕິເຊົາການໂຈມຕີທາງອາກາດ, ການໂຈມຕີທາງບົກ, ການຍິງລູກສອນໄຟແລະການກະທຳອື່ນໆທີ່ເຮັດໃຫ້ສະຖານະການຮ້າຍແຮງຂຶ້ນກວ່າເກົ່າ. ໂດຍສະເພາະແມ່ນຝ່າຍອິສຣາແອນຕ້ອງຮັກສາຄວາມອົດທົນອົດກັ້ນໄວ້, ເຄົາລົບມະຕິທີ່ກ່ຽວຂ້ອງຂອງອົງການສະຫະປະຊາຊາດຢ່າງແທ້ຈິງ. ສ່ວນປາແລັສຕີນກໍຕ້ອງຫຼີກເວັ້ນການນຳໃຊ້ມາດຕະການທີ່ອາດຈະເຮັດໃຫ້ສະຖານະການຮ້າຍແຮງຂຶ້ນກວ່າເກົ່າ, ຫຼີກເວັ້ນການສ້າງຄວາມເສຍຫາຍໃຫ້ກັບປະຊາຊົນສາມັນ, ຮ່ວມກັນຊຸກຍູ້ໃຫ້ສະຖານະການຜ່ອນຄາຍລົງ.
ທ່ານຫວາງຢີ້ກ່າວວ່າ, ການແຜ່ລະບາດຂອງພະຍາດໂຄວິດ-19 ບວກກັບການປະທະກັນໄດ້ສ້າງຄວາມວຸ້ນວາຍຫຼາຍຂຶ້ນ, ເຮັດໃຫ້ພາກພື້ນແຫ່ງນີ້ເກີດວິກິດການດ້ານມະນຸດສະທຳຢ່າງໜັກໜ່ວງ, ໂດຍສະເພາະແມ່ນສະພາບການຢູ່ເຂດກາຊາເຊິ່ງເປັນນ້າກັງວົນທີ່ສຸດ. ພວກເຮົາຮຽກຮ້ອງໃຫ້ອິສຣາແອນຈົ່ງປະຕິບັດຕາມພັນທະຂອງສັນຍາສາກົນຢ່າງແທ້ຈິງ, ຍົກເລີກການປິດລ້ອມເຂດກາຊາຢ່າງຮອບດ້ານໂດຍໄວ. ປະຊາຄົມໂລກຕ້ອງໃຫ້ການຊ່ວຍເຫຼືອດ້ານມະນຸດສະທຳແກ່ປາແລັສຕີນຜ່ານຊ່ອງທາງຕ່າງໆ, ເພື່ອປະກອບສ່ວນເຂົ້າໃນການຜ່ອນຄາຍສະຖານະການດ້ານມະນຸດສະທຳຢູ່ປາແລັສຕີນ. ອົງການສະຫະປະຊາຊາດຕ້ອງເສີມຂະຫຍາຍບົດບາດເປັນຜູ້ປະສານງານສາກົນໃນການຊ່ວຍເຫຼືອດ້ານມະນຸດສະທຳຢ່າງຮີບດ່ວນ, ພະຍາຍາມສຸດຂີດເພື່ອຫຼີກເວັ້ນບໍ່ໃຫ້ເກີດໄພພິບັດດ້ານມະນຸດສະທຳທີ່ໜັກໜ່ວງ.
ຄຳເຫັນ
0