ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 17 ພຶດສະພານີ້, ໃນເວລາຕອບຄຳຖາມກ່ຽວກັບຍີ່ປຸ່ນປ່ອຍນ້ຳປົນເປື້ອນລັງສີນິວເຄຼຍລົງສູ່ທະເລ, ທ່ານຈ້າວລີ້ຈ່ຽນ, ໂຄສົກກະຊວງການຕ່າງປະເທດຈີນກ່າວວ່າ, ລັດຖະບານຍີ່ປຸ່ນໄດ້ເຮັດແບບປິດຫູປິດຕາ ແລະເສີຍເມີຍ ຕໍ່ສຽງປະທ້ວງຈາກລັດຖະບານຂອງຫຼາຍປະເທດ, ອົງການຈັດຕັ້ງສາກົນ, ອົງການອະນຸລັກສິ່ງແວດລ້ອມແລະປະຊາຊົນຂອງປະເທດຕ່າງໆ, ຍັງບໍ່ທັນສະແດງທ່າທີຄວາມຮັບຜິດຊອບຕໍ່ຄວາມເປັນຫ່ວງຢ່າງແຮງກ້າຂອງປະຊາຄົມໂລກເທື່ອ.
ຕາມຂ່າວລາຍງານວ່າ, ກ່ອນໜ້ານີ້, ລັດຖະມົນຕີກະຊວງທະເລແລະຜະລິດຕະພັນທະເລ ສ.ເກົາຫຼີ ໄດ້ສົ່ງເອກະສານໄປຍັງເລຂາທິການໃຫຍ່ອົງການວຽກງານມະຫາສະໝຸດສາກົນ ຫຼື IMO ໂດຍລະບຸວ່າ, ຍີ່ປຸ່ນຕົກລົງປ່ອຍນ້ຳປົນເປື້ອນລັງສີຈາກໂຮງໄຟຟ້າພະລັງງານນິວເຄຼຍຟຸຄຸຊິມາລົງທະເລແຕ່ຝ່າຍດຽວ ປາສະຈາກການປຶກສາຫາລືກັບສ.ເກົາຫຼີ, ເຊິ່ງເລື່ອງນີ້ອາດຈະສ້າງຜົນຮ້າຍອັນໃຫຍ່ຫຼວງຕໍ່ຄວາມປອດໄພຂອງປະເທດໃກ້ຄຽງແລະມະຫາສະໝຸດ. ສ.ເກົາຫຼີຈຶ່ງຮຽກຮ້ອງໃຫ້ອົງການວຽກງານມະຫາສະໝຸດສາກົນ ຮ່ວມມືກັບອົງການພະລັງງານປະລະມານູສາກົນ, ພິຈາລະນາຮ່ວມກັນແກ້ໄຂບັນຫານ້ຳປົນເປື້ອນລັງສີນິວເຄຼຍຂອງຍີ່ປຸ່ນດ້ວຍຮູບແບບທີ່ປະຊາຄົມໂລກຍອມຮັບ “ສົນທິສັນຍາລອນດອນວ່າດ້ວຍການຖີ້ມສິ່ງເສດເຫຼືອ” ແລະວັດຖຸປະສົງທີ່ລະບຸໄວ້ໃນອະນຸສັນຍາທີ່ກ່ຽວຂ້ອງ.
ທ່ານຈ້າວລີ້ຈ່ຽນຊີ້ອອກວ່າ, ລັດຖະບານຍີ່ປຸ່ນຄວນມີທ່າທີທີ່ຖືກຕ້ອງຕາມໜ້າທີ່ຄວາມຮັບຜິດຊອບຂອງຕົນ, ບໍ່ຄວນປ່ອຍນ້ຳປົນເປື້ອນລັງສີນິວເຄຼຍລົງສູ່ທະເລ ກ່ອນບໍ່ໄດ້ປຶກສາຫາລືກັບຝ່າຍທີ່ກ່ຽວຂ້ອງແລະອົງການຈັດຕັ້ງສາກົນ.
ຄຳເຫັນ
0