ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ນັບແຕ່ໄດ້ຄົ້ນຄວ້າຜະລິດວັກຊີນໂຄວິດ-19 ອອກມາແລ້ວ, ປະເທດຕ່າງໆລ້ວນແຕ່ຫວັງຢ່າງຍິ່ງວ່າຈະໄດ້ສັກວັກຊີນໃຫ້ປະຊາຊົນປະເທດຕົນໂດຍໄວ. ເຖິງວ່າອົງການອະນາໄມໂລກ ແລະ ປະເທດຈຳນວນໜຶ່ງໄດ້ຮຽກຮ້ອງມາໂດຍຕະຫຼອດ ໂດຍຢາກໃຫ້ແບ່ງປັນວັກຊີນຢ່າງຍຸດຕິທຳ, ແຕ່ອາເມຣິກາ ແລະ ອັງກິດພັດເຮັດເສີຍເມີຍຕໍ່ສຽງຮຽກຮ້ອງເຫຼົ່ານີ້, ບົນພື້ນຖານທີ່ໄດ້ສະສົມວັກຊີນ ເພື່ອຕອບສະໜອງຕາມຄວາມຕ້ອງການຂອງປະຊາຊົນພາຍໃນປະເທດຕົນແລ້ວ, ຍັງໄດ້ກັກຕຸນວັກຊີນເປັນຈຳນວນຫຼວງຫຼາຍຕື່ມອີກ. ທ່ານນາງເຈນ ປະສາກີ ໂຄສົກທຳນຽບຂາວອາເມຣິກາກ່າວວ່າ: ອາເມຣິກາຈະຮັບປະກັນໃຫ້ປະຊາຊົນປະເທດຕົນສັກວັກຊີນໃຫ້ສຳເລັດກ່ອນໝູ່, ນີ້ກໍໝາຍຄວາມວ່າ: ອາເມຣິກາຢາກຜ່ານຈາກລັດທິຊາດນິຍົມດ້ານວັກຊີນ ເພື່ອຟື້ນຟູການພັດທະນາເສດຖະກິດແລະສັງຄົມຂອງປະເທດຕົນແຊງໜ້າປະເທດອື່ນ.
ໃນໄລຍະທີ່ບັນຫາກ່ຽວກັບລັດທິຊາດນິຍົມດ້ານວັກຊີນຫາກໍ່ພົ້ນເດັ່ນຂຶ້ນ, ຜູ້ຊ່ຽວຊານສາທາລະນະສຸກກໍໄດ້ອອກມາເຕືອນວ່າ: ຖ້າສືບຕໍ່ເຮັດແບບນີ້, ຈະສ້າງຜົນກະທົບທາງລົບຫຼາຍຢ່າງ ເຊັ່ນ: ດ້ານໜຶ່ງ, ຖ້າພະຍາດໂຄວິດ-19 ໄດ້ແຜ່ລະບາດຢ່າງກວ້າງຂວາງ, ຈະເຮັດໃຫ້ເກີດການກາຍພັນຂອງເຊື້ອພະຍາດ, ເຊື້ອພະຍາດກາຍພັນໃໝ່ແຮ່ງຫຼາຍ, ວັກຊີນກໍຈະມີປະສິດທິຜົນໜ້ອຍລົງ; ອີກດ້ານໜຶ່ງ, ປະເທດທີ່ມີລາຍໄດ້ຕ່ຳຈະບໍ່ໄດ້ຮັບວັກຊີນ ເຊິ່ງຈະນຳເອົາຜົນເສຍຫາຍຢ່າງໜັກໜ່ວງມາໃຫ້ແກ່ປະເທດຕ່າງໆໃນໂລກ ເຊິ່ງລວມທັງປະເທດຮັ່ງມີ. ໃນຂະນະດຽວກັນ, ການຜູກຂາດດ້ານວັກຊີນອາດຈະເຮັດໃຫ້ຜູ້ເສຍຊີວິດຍ້ອນເປັນພະຍາດໂຄວິດ-19 ເພີ່ມຂຶ້ນເປັນທະວີຄູນ.
ວັນທີ 13 ພຶດສະພານີ້, ເວັບໄຊວາລະສານ “ອັດລັງຕິກ” ຂອງອາເມຣິກາໄດ້ພິມບົດຄວາມທີ່ພາດຫົວຂໍ້ວ່າ: “ລັດທິຊາດນິຍົມດ້ານວັກຊີນຂອງອາເມຣິກາຈະບໍ່ປະສົບຜົນສຳເລັດ” ໂດຍໄດ້ລະບຸວ່າ: ອາເມຣິກາຈະຕົກເຂົ້າສູ່ສະພາບຄວາມຫຍຸ້ງຍາກ ຍ້ອນປະຕິບັດລັດທິຊາດນິຍົມດ້ານວັກຊີນ: ເມື່ອປະຊາຊົນອາເມຣິກາໄດ້ສັກວັກຊີນເປັນຈຳນວນຫຼວງຫຼາຍ, ສັງຄົມອາເມຣິກາສາມາດຟື້ນຟູສູ່ຄວາມເປັນປົກກະຕິໄດ້ໂດຍໄວ, ຮອດເວລານັ້ນ, ອາເມຣິກາກໍຈະໂຍະຍານມາດຕະການປ້ອງກັນແລະຄວບຄຸມເທື່ອລະກ້າວ ແລະ ຫວັງຢາກຟື້ນຟູຂະແໜງການທ່ອງທ່ຽວ. ແຕ່ໃນຂະນະດຽວກັນ, ສະພາບການແຜ່ລະບາດຂອງພະຍາດໂຄວິດ-19 ຢູ່ປະເທດພວມພັດທະນາ ທີ່ຖືກລັດທິຊາດນິຍົມດ້ານວັກຊີນສ້າງຜົນກະທົບໃຫ້ຢ່າງໜັກໜ່ວງ ເຊັ່ນ: ບຣາຊິນ, ອິນເດຍເປັນຕົ້ນ ກໍຈະນັບມື້ນັບຮ້າຍແຮງຂຶ້ນ, ເມື່ອເຊື້ອພະຍາດກາຍພັນໄດ້ແຜ່ລະບາດຂະຫຍາຍອອກໄປເລື້ອຍໆ, ຈຳນວນຜູ້ເສຍຊີວິດຍ້ອນເປັນພະຍາດໄດ້ເພີ່ມຂຶ້ນຢ່າງຫຼວງຫຼາຍ, ອາເມຣິກາກໍຈຳເປັນຕ້ອງໃຊ້ມາດຕະການຈຳກັດຕໍ່ນັກທ່ອງທ່ຽວຂອງປະເທດທີ່ມີສະພາບການແຜ່ລະບາດຂອງພະຍາດທີ່ຮ້າຍແຮງເຫຼົ່ານີ້ເຂົ້າປະເທດຕົນ.
ພຶດຕິກຳຕົວຈິງໄດ້ພິສູດໃຫ້ເຫັນແລ້ວວ່າ: ຄວາມເປັນຫ່ວງຂອງຜູ້ຊ່ຽວຊານທາງການແພດໃນເມື່ອກ່ອນ ພວມກາຍເປັນເລື່ອງຈິງ. ຍ້ອນລັດທິຊາດນິຍົມດ້ານວັກຊີນໄດ້ສ້າງ “ຄວາມຫ່າງເຫີນກັນໃນການສ້າງພູມຕ້ານທານ”, ໄດ້ຖ່ວງດຶງບາດກ້າວເດີນໃນການຕ້ານກັບການແຜ່ລະບາດຂອງພະຍາດຂອງໂລກ. ພະຍາດໂຄວິດ-19 ກາຍພັນໃໝ່ຍັງໄດ້ແຜ່ລະບາດຢູ່ປະເທດທີ່ບໍ່ໄດ້ຮັບວັກຊີນທີ່ພຽງພໍ, ໃນຂະນະທີ່ເສດຖະກິດທົ່ວໂລກຟື້ນຄືນຊ້າລົງ, ອາເມຣິກາເອງກໍຈະຜະເຊີນກັບຄວາມສ່ຽງທີ່ນັບມື້ນັບຮ້າຍແຮງ, ນີ້ກໍຍ້ອນວ່າອາເມຣິກາໄດ້ປະຕິບັດລັດທິຊາດນິຍົມດ້ານວັກຊີນນັ້ນເອງ.
ເຊື້ອພະຍາດບໍ່ມີພົມແດນ, ວັກຊີນໃນຖານະທີ່ເປັນອາວຸດທີ່ບັງເກີດຜົນທີ່ສຸດໃນການຕ້ານກັບການແຜ່ລະບາດຂອງພະຍາດ, ບໍ່ຄວນກາຍເປັນເຄື່ອງມືເພື່ອສະແຫວງຫາຜົນປະໂຫຍດຂອງບາງປະເທດ. ບັນດາປະເທດຄວນຮ່ວມມືກັນ, ຕໍ່ຕ້ານ “ລັດທິຊາດນິຍົມດ້ານວັກຊີນ”, ຮ່ວມກັນສ້າງປະຊາຄົມຮ່ວມສາທາລະນະສຸກຂອງມວນມະນຸດ, ຢ່າເຮັດໃຫ້ລັດທິຊາດນິຍົມດ້ານວັກຊີນສົ່ງຜົນຮ້າຍໃຫ້ກັບໂລກຫຼາຍກວ່ານີ້ອີກເລີຍ.
ຄຳເຫັນ
0