ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເວັບໄຊກະຊວງການຄ້າຈີນແຈ້ງຂ່າວວ່າ: ວັນທີ 10 ມິຖຸນານີ້, ທ່ານຫວາງເວີນທ່າວ ລັດຖະມົນຕີກະຊວງການຄ້າຈີນໄດ້ສົນທະນາກັບທ່ານນາງກິນາ ເຣມອນໂດ ລັດຖະມົນຕີກະຊວງການຄ້າອາເມຣິກາຜ່ານທາງໂທລະສັບ ໂດຍໄດ້ແລກປ່ຽນຄວາມເຫັນຢ່າງກົງໄປກົງມາແລະຕິດແທດຕົວຈິງກ່ຽວກັບບັນຫາໃນຂົງເຂດການຄ້າແລະບັນຫາທີ່ສອງຝ່າຍມີຄວາມສົນໃຈນຳກັນ. ສອງຝ່າຍເຫັນວ່າ: ການສົນທະນາແລະການແລກປ່ຽນໃນຂົງເຂດການຄ້າລະຫວ່າງຈີນ-ອາເມຣິກາມີຄວາມສຳຄັນຫຼາຍ, ສອງຝ່າຍເຫັນດີຊຸກຍູ້ການຮ່ວມມືດ້ານການຄ້າແລະການລົງທຶນທີ່ຕິດແທດຕົວຈິງໃຫ້ພັດທະນາໄດ້ຢ່າງປອດໄສ, ແກ້ໄຂຄວາມຂັດແຍ້ງຢ່າງສົມເຫດສົມຜົນ. ສອງຝ່າຍເຫັນດີສືບຕໍ່ຮັກສາການຕິດຕໍ່ພົວພັນກັນ. ຕໍ່ກັບເລື່ອງນີ້, ທ່ານກ່າວເຟີ່ງ ໂຄສົກກະຊວງການຄ້າຈີນໄດ້ກ່າວໃນກອງປະຊຸມຖະແຫຼງຂ່າວໃນວັນທີ 10 ມິຖຸນານີ້ວ່າ: ຈີນແລະອາເມຣິກາເປັນສອງອົງກອນເສດຖະກິດໃຫຍ່ແລະສຳຄັນໃນໂລກ, ທາດແທ້ຂອງການພົວພັນດ້ານເສດຖະກິດການຄ້າແມ່ນຕ່າງຝ່າຍຕ່າງໄດ້ຮັບຜົນປະໂຫຍດ. “ສອງຝ່າຍລ້ວນແຕ່ມີຄວາມກັງວົນທີສຳຄັນຂອງຕົນໃນຂົງເຂດເສດຖະກິດການຄ້າ, ແຕ່ຢູ່ບົນພື້ນຖານການເຄົາລົບເຊິ່ງກັນແລະກັນແລະປະຕິບັດຕໍ່ກັນຢ່າງສະເໝີພາບກັນ, ກໍຈະສາມາດຄົ້ນຫາວິທີທີ່ແກ້ໄຂໄດ້ໂດຍຜ່ານການປຶກສາຫາລືກັນ.”
ໃນເວລາຕອບຄຳຖາມຂອງນັກຂ່າວກ່ຽວກັບສະພາຕ່ຳອາເມຣິກາໄດ້ລົງຄະແນນສຽງຮັບຮອງ “ກົດໝາຍວ່າດ້ວຍການປະດິດສ້າງໃໝ່ແລະການແຂ່ງຂັນຂອງອາເມຣິກາປີ 2021”, ທ່ານກ່າວເຟີ່ງກ່າວວ່າ: “ທຸກປະເທດລ້ວນແຕ່ມີໜ້າທີ່ຮັບຜິດຊອບໃນການພັດທະນາອຸດສາຫະກຳຂອງປະເທດຕົນ ແລະເພີ່ມພູນຄູນ ສ້າງຄວາມສຸກໃຫ້ກັບປະຊາຊົນ. ພວກຂ້າພະເຈົ້າມີຄວາມປິຕິຊົມຊື່ນທີ່ເຫັນວ່າ ເສດຖະກິດຂອງປະເທດອື່ນມີການພັດທະນາ ແລະວິທະຍາສາດເຕັກນິກມີຄວາມກ້າວໜ້າ, ແຕ່ພວກຂ້າພະເຈົ້າກໍຄັດຄ້ານການນຳເອົາແຜນການພັດທະນາຂອງຕົນໄປພົວພັນກັບການສະກັດກັ້ນການພັດທະນາຂອງປະເທດອື່ນ, ຫັນບັນຫາເສດຖະກິດເປັນບັນຫາການເມືອງ ແລະເກມຜົນລວມເປັນສູນ.”
ຄຳເຫັນ
0