ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຄຳປາໄສຂອງທ່ານສີຈິ້ນຜິງ
ໃນພິທີສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 100 ປີ
(ວັນທີ 1 ກໍລະກົດປີ 2021)
ບັນດາສະຫາຍ ແລະເພື່ອນມິດ:
ມື້ນີ້ແມ່ນມື້ສຳຄັນຍິ່ງໃຫຍ່ ແລະສະຫງ່າງາມໃນປະຫວັດສາດຂອງພັກກອມມູນິດຈີນ ແລະຊົນຊາດຈີນ. ພວກເຮົາໂຮມຊຸມນຸມກັນນະທີ່ນີ້, ຮ່ວມກັບບັນດາສະຫາຍໃນທົ່ວພັກ ແລະປະຊາຊົນບັນດາເຜົ່າໃນທົ່ວປະເທດ, ເພື່ອສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 100 ປີ, ທົບທວນຄືນຂະບວນການສູ້ຊົນທີ່ສະຫງ່າລາສີຕະຫຼອດໄລຍະ 100 ປີຂອງພັກກອມມູນິດຈີນ, ຈ້ອງເບິ່ງອະນາຄົດອັນສົດໃສຂອງການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.
ກ່ອນອື່ນ, ຂ້າພະເຈົ້າຂໍຕາງໜ້າໃຫ້ຄະນະກຳມະການສູນກາງພັກສະແດງຄວາມຊົມເຊີຍຢ່າງອົບອຸ່ນຕໍ່ສະມາຊິກພັກກອມມູນິດຈີນທຸກຖ້ວນໜ້າໃນປາງບຸນນີ້!
ນະທີ່ນີ້, ຂ້າພະເຈົ້າຂໍຕາງໜ້າໃຫ້ພັກ ແລະປະຊາຊົນປະກາດຢ່າງໜັກແໜ້ນວ່າ: ໂດຍຜ່ານການສູ້ຊົນຢ່າງຕໍ່ເນື່ອງຂອງທົ່ວພັກ ແລະປະຊາຊົນບັນດາເຜົ່າໃນທົ່ວປະເທດ, ພວກເຮົາໄດ້ບັນລຸເປົ້າໝາຍສູ້ຊົນ 100 ປີປະການທີໜຶ່ງ ຄື: ສ້າງສັງຄົມທີ່ອິ່ມໜຳສຳລານໃຫ້ສຳເລັດຮອບດ້ານຢູ່ຜືນແຜ່ນດິນຈີນ, ໄດ້ແກ້ໄຂບັນຫາທຸກຍາກເດັດຖານທີ່ມີລັກສະນະປະຫວັດສາດ, ພວກເຮົາພວມກ້າວໄປສູ່ເປົ້າໝາຍສູ້ຊົນ 100 ປີປະການທີສອງ ຄື: ສ້າງປະເທດສັງຄົມນິຍົມທີ່ທັນສະໄໝເຂັ້ມແຂງໃຫ້ສຳເລັດຢ່າງຮອບດ້ານຢ່າງສະຫງ່າຜ່າເຜີຍ. ນີ້ແມ່ນກຽດສະຫງ່າອັນຍິ່ງໃຫຍ່ຂອງປະຊາຊາດຈີນ! ນີ້ແມ່ນກຽດສະຫງ່າອັນຍິ່ງໃຫຍ່ຂອງປະຊາຊົນຈີນ! ນີ້ແມ່ນກຽດສະຫງ່າອັນຍິ່ງໃຫຍ່ຂອງພັກກອມມູນິດຈີນ!
ບັນດາສະຫາຍ ແລະເພື່ອນມິດ:
ປະຊາຊາດຈີນແມ່ນປະຊາຊາດທີ່ຍິ່ງໃຫຍ່ໃນໂລກ, ມີອະລິຍະທຳປະຫວັດ ສາດຫຼາຍກວ່າ 5000 ປີ, ປະຊາຊາດຈີນໄດ້ປະກອບສ່ວນອັນສຳຄັນເຂົ້າໃນຂະບວນການສ້າງຄວາມກ້າວໜ້າດ້ານອະລິຍະທຳຂອງມວນມະນຸດ. ພາຍຫຼັງເກີດສົງຄາມຢາຟິ່ນໃນປີ 1840, ຈີນຄ່ອຍໆກາຍເປັນສັງຄົມເຄິ່ງຫົວເມືອງຂຶ້ນ ແລະເຄິ່ງສັກດິນາ, ປະເທດໄດ້ຮັບຄວາມອັບອາຍ, ປະຊາຊົນໄດ້ຮັບຄວາມເດືອດຮ້ອນ ແລະອະລິຍະທຳກໍໄດ້ຮັບຄວາມມືດມົນ, ປະຊາຊາດຈີນໄດ້ປະສົບໄພອັນຕະລາຍທີ່ບໍ່ເຄີຍມີມາກ່ອນ. ນັບຈາກນັ້ນມາ, ການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນໄດ້ກາຍເປັນຄວາມໃຝ່ຝັນອັນຍິ່ງໃຫຍ່ທີ່ສຸດຂອງປະຊາ ຊົນ ແລະປະຊາຊາດຈີນ.
ເພື່ອກູ້ຊາດ, ປະຊາຊົນຈີນໄດ້ລຸກຮືຂຶ້ນຕໍ່ສູ້, ຜູ້ຮັກຊາດໄດ້ເຄື່ອນໄຫວຢ່າງຫ້າວຫັນເພື່ອປຸກລະດົມຂົນຂວາຍ, ດຳເນີນ “ຂະບວນການລຸກຂອງຮືຊາວນາໄທ້ພິງທ່ຽນກົວ”, “ການປະຕິວັດ 100 ວີນປີ 1898”, ຂະບວນການຢີ້ເຮີທວນ ແລະການປະຕິວັດປີ 1911, ແຜນການກູ້ຊາດຕ່າງໆໄດ້ປະກົດຂຶ້ນໃນໄລຍະປະຫວັດສາດຢ່າງຕໍ່ເນື່ອງ, ແຕ່ກໍສິ້ນສຸດລົງດ້ວຍຄວາມປະລາໄຊ. ຈີນຕ້ອງໄດ້ຊອກຫາແນວຄິດທິດສະດີໃໝ່ໃນນຳພາຂະບວນການກູ້ຊາດຢ່າງຮີບດ່ວນ, ຕ້ອງການມີອົງການຈັດຕັ້ງໃໝ່ເພື່ອເຕົ້າໂຮມກຳລັງການປະຕິວັດຢ່າງຮີບດ່ວນ.
ໄຊຊະນະຂອງການປະຕິວັດເດືອນຕຸລາຣັດເຊຍໄດ້ນຳເອົາລັດທິມາກ-ເລນີນ ມາສູ່ປະເທດຈີນ. ທ່າມກາງການສະດຸ້ງຕື່ນຢ່າງຍິ່ງໃຫຍ່ຂອງປະຊາຊົນ ແລະປະຊາຊາດຈີນ, ທ່າມກາງກາປະສານສົມທົບກັນລະຫວ່າງລັດທິມາກ-ເລນີນກັບຂະບວນການກຳມະກອນຂອງຈີນ, ພັກກອມມູນິດຈີນໄດ້ກຳເນີດເກີດຂຶ້ນ. ຈີນສາມາດສ້າງຕັ້ງພັກກອມມູນິດຈີນ, ນີ້ແມ່ນເຫດການອັນຍິ່ງໃຫຍ່ທີ່ພິກແຜ່ນດິນປີ້ນແຜ່ນຟ້າໄດ້ປ່ຽນແປງທິດທາງ ແລະຂະບວນການພັດທະນາະຂອງປະຊາຊາດຈີນຫຼັງປະຫວັດສາດສະໄໝໃໝ່ (ປີ 1840-1949) ຢ່າງເລິກເຊິ່ງ, ໄດ້ປ່ຽນແປງອະນາຄົດ ແລະຊາຕາກຳຂອງປະຊາຊົນ ແລະປະຊາຊາດຈີນໄດ້ຢ່າງເລິກເຊິ່ງ, ໄດ້ປ່ຽນແປງທ່າອ່ຽງ ແລະສະພາບການພັດທະນາຂອງໂລກຢ່າງເລິກເຊິ່ງ.
ເມື່ອພັກກອມມູນິດຈີນໄດ້ກຳເນີດເກີດຂຶ້ນກໍໄດ້ຖືເອົາການສ້າງຄວາມຜາສຸກໃຫ້ປະຊາຊົນຈີນ ແລະການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນເປັນອຸດົມການແຕ່ຫົວທີ ແລະພາລະກຳຂອງຕົນ. ໃນໄລຍະ 100 ປີຜ່ານມາ, ພັກກອມມູນິດຈີນໄດ້ເຕົ້າໂຮມຄວາມສາມັກຄີນຳພາປຊາຊົນຈີນດຳເນີນການຕໍ່ສູ້, ເສຍສະຫຼະ ແລະປະດິດສ້າງ, ທັງໝົດນັ້ນກໍເພື່ອບັນລຸການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.
ເພື່ອບັນລຸເປົ້າໝາຍການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ, ພັກກອມມູນິດຈີນໄດ້ເຕົ້າໂຮມຄວາມສາມັກຄີແລະນຳພາປະຊາຊົນຈີນຕໍ່ສູ້ຢ່າງອົງອາດກ້າຫານ ບໍ່ຍອມຈຳນົນ, ໄດ້ສ້າງຜົນສຳເລັດອັນຍິ່ງໃຫຍ່ໃນການປະຕິວັດປະຊາທິປະໄຕໃໝ່. ພວກເຮົາໄດ້ຜ່ານຜ່າສົງຄາມປາບປາມຂຸນເສິກພາກເໜຶອ, ສົງຄາມປະຕິວັດທີ່ດິນ, ສົງຄາມຕໍ່ຕ້ານຟາຊິດຍີ່ປຸ່ນ, ສົງຄາມປົດປ່ອຍຊາດ, ໃຊ້ການປະຕິວັດດ້ວຍກຳລັງອາວຸດເພື່ອຕໍ່ຕ້ານກຳລັງປະກອບອາວຸດຕ້ານການປະຕິວັດ, ໄດ້ໂຄ່ນລົ້ມ “ 3 ໜ່ວຍພູໃຫຍ່ “ ຄື ຈັກກະພັດນິຍົມ, ລັດທິສັກດິນາແລະລັດທິທຶນນິຍົມອາຍາສິດ, ໄດ້ສະຖາປະນາສາທາລະນະລັດປະຊາຊົນຈີນທີ່ ປະຊາຊົນເປັນເຈົ້າຂອງປະເທດຊາດແລະເປັນເຈົ້າຕົນເອງ, ໄດ້ບັນລຸຄວາມເປັນເອກະລາດແຫ່ງຊາດແລະການປົດປ່ອຍປະຊາຊົນ. ໄຊຊະນະຂອງການປະຕິວັດປະຊາທິປະໄຕໃໝ່ໄດ້ເປັນການສິ້ນສຸດປະຫວັດສາດສັງຄົມຈີນເກົ່າແບບເຄິ່ງຫົວເມືອງຂຶ້ນແລະເຄິ່ງສັກດິນາໄດ້ຢ່າງສິ້ນເຊີງ, ໄດ້ສິ້ນສຸດສະພາບການແຕກແຍກຄວາມສາມັກຄີຂອງປະເທດຈີນເກົ່າໄດ້ຢ່າງສິ້ນເຊີງ, ໄດ້ຍົກເລີກສົນທິສັນຍາບໍ່ເປັນທຳທີ່ພວກຈັກກະພັດບັງຄັບໃຫ້ຈີນລົງນາມ ແລະຍົກເລີກສິດອຳນາດພິເສດທຸກຢ່າງຂອງພວກຈັກກະພັດຢູ່ຈີນໄດ້ຢ່າງສິ້ນເຊີງ, ອັນໄດ້ສ້າງເງື່ອນໄຂພື້ນຖານທາງສັງຄົມໃຫ້ແກ່ການບັນລຸເປົ້າໝາຍການຟື້ນຟູຄວາມຈະເລີນຮຸ່ງເຮືອງອັນຍິ່ງຊາດຂອງປະຊາຊາດຈີນ. ພັກກອມມູນິດຈີນແລະປະຊາຊົນຈີນໄດ້ບຸກບືນສູ້ຊົນຢ່າງອົງອາດກ້າຫານແລະໄດ້ປະກາດຕໍ່ຊາວໂລກຢ່າງໜັກແໜ້ນວ່າ: ປະຊາຊົນຈີນໄດ້ລຸກຢືນຂຶ້ນແລ້ວ, ຍຸກສະໄໝທີ່ປະຊາຊາດຈີນຖືກປະເທດອື່ນກົດຂີ່ຂົ່ມເຫັງຕາມລຳພັງໃຈນັ້ນໄດ້ຜ່ານພົ້ນໄປໂດຍບໍ່ມີວັນກັບຄືນມາອີກແລ້ວ!
ເພື່ອບັນລຸເປົ້າໝາຍການຟື້ນຟູຄວາມຈຸເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ,ພັກກອມມູນິດຈີນໄດ້ເຕົ້າໂຮມຄວາມສາມັກຄີແລະນຳພາປະຊາຊົນຈີນ ເພິ່ງຕົນເອງ ກຸ້ມຕົນເອງ, ບຸກບືນສູ້ຊົນ, ໄດ້ສ້າງຜົນສຳເລັດອັນຍິ່ງໃຫຍ່ໃຫ້ກັບການປະຕິວັດແລະການສ້າງສັງຄົມນິຍົມ. ພວກເຮົາໄດ້ດຳເນີນການປະຕິວັດສັງຄົມນິຍົມ, ໄດ້ດັບສູນລະບອບສັກດິນາທີ່ກົດຂີ່ຂູດຮີດມາເປັນເວລາດົນນານໄດ້ຫຼາຍພັນປີຢູ່ຈີນ, ໄດ້ສ້າງຕັ້ງລະບອບພື້ນຖານສັງຄົມນິຍົມ, ຊຸກຍູ້ການສ້າງສັງຄົມນິຍົມ, ໄດ້ເອົາຊະນະການມ້າງເພທຳລາຍເພື່ອຫວັງໂຄ່ນລົ້ມແລະ ທ້າທາຍເກາະຜິດດ້ວຍກຳລັງອາວຸດຂອງພວກຈັກກະພັດນິຍົມແລະພວກມະຫາອຳນາດນິຍົມ, ໄດ້ບັນລຸການປ່ຽນແປງທາງສັງຄົມທີ່ກວ້າງຂວາງແລະເລິກເຊິ່ງທີ່ສຸດໃນປະຫວັດສາດຂອງປະຊາຊາດຈີນ, ໄດ້ບັນລຸການພັດທະນາແບບກ້າວກະໂດດຂັ້ນທີ່ຍິ່ງໃຫຍ່ຈາກປະເທດໃຫຍ່ໃນທິດຕາເວັນອອກທີ່ທຸກຍາກທີ່ມີປະຊາກອນຢ່າງຫຼວງຫຼາຍກ້າວໄປສູ່ສັງຄົມນິຍົມ, ໄດ້ສ້າງເງື່ອນໄຂພື້ນຖານທາງການເມືອງແລະພື້ນຖານດ້ານລະບອບໃຫ້ແກ່ການບັນລຸເປົ້າໝາຍການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ. ພັກກອມມູນິດຈີນແລະປະຊາຊົນຈີນໄດ້ບຸກບືນສູ້ຊົນຢ່າງອົງອາດກ້າຫານແລະໄດ້ປະກາດຕໍ່ຊາວໂລກຢ່າງໜັກແໜ້ນວ່າ: ປະຊາຊົນຈີນບໍ່ພຽງແຕ່ຮູ້ວິທີທຳມ້າງໂລກເກົ່າ ຍັງຮູ້ຈັກວິທີກໍ່ສ້າງໂລກໃໝ່, ມີແຕ່ສັງຄົມນິຍົມເທົ່ານັ້ນຈິ່ງຈະສາມາດກູ້ຊາດຈີນໄດ້, ມີແຕ່ສັງຄົມນິຍົມທີ່ມີສີສັນພິເສດຂອງຈີນເທົ່ານັ້ນຈິ່ງຈະສາມາດພັດທະນາຈີນໄດ້!
ເພື່ອບັນລຸເປົ້າໝາຍການຟື້ນຟູຄວາມຈຸເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ,ພັກກອມມູນິດຈີນໄດ້ເຕົ້າໂຮມຄວາມສາມັກຄີແລະນຳພາປະຊາຊົນຈີນ ປົດປ່ອຍແນວຄິດ, ບຸກບືນກ້າວໄປໜ້າ, ໄດ້ສ້າງຜົນສຳເລັດອັນຍິ່ງໃຫຍ່ໃນການປະຕິຮູບ,ເປີດປະຕູສູ່ພາຍນອກ ແລະການສ້າງສັງຄົມນິຍົມທີ່ທັນສະໄໝ.ພວກເຮົາໄດ້ບັນລຸບາດລ້ຽວອັນຍິ່ງໃຫຍ່ທີ່ມີຄວາມໝາຍເລິກເຊິ່ງຍາວນານໃນປະຫວັດສາດຂອງພັກນັບແຕ່ສະຖາປະນາສປຈີນເປັນຕົ້ນມາ, ໄດ້ກຳນົດແນວທາງພື້ນຖານໃນໄລຍະເບື້ອງຕົ້ນຂອງສັງຄົມນິຍົມ, ຊຸກຍູ້ການປະຕິຮູບແລະເປີດປະຕູສູ່ພາຍນອກຢ່າງເດັດດ່ຽວໜຽວແໜ້ນ, ເອົາຊະນະຄວາມສ່ຽງແລະສິ່ງທ້າທາຍທີ່ມາຈາກທຸກທິດທາງ, ໄດ້ສ້າງຕັ້ງ, ຍຶດໝັ້ນ, ປົກປ້ອງ ແລະພັດທະນາສັງຄົມນິຍົມທີ່ມີສີສັນພິເສດຂອງຈີນ, ໄດ້ບັນລຸການຫັນປ່ຽນທີ່ມີລັກສະນະປະຫວັດສາດຈາກໂຄງປະກອບເສດຖະກິດແຜນການລວມສູນໃນລະດັບສູງໄປສູ່ໂຄງປະກອບເສດຖະກິດຕະຫຼາດສັງຄົມນິຍົມທີ່ເຕັມໄປດ້ວຍຄວາມມີຊີວິດຊີວາ,ຈາກການປິດປະຕູແລະເຄິ່ງປິດປະຕູສູ່ການເປີດປະຕູຢ່າງຮອບດ້ານ, ໄດ້ບັນລຸການບຸກທະລຸທີ່ມີລັກສະນະປະຫວັດສາດຈາກສະພາບກຳລັງການຜະລິດທີ່ຫຼ້າຫຼັງໂດຍທຽບຖານສູ່ປະເທດທີ່ມີເສດຖະກິດໃຫຍ່ເປັນອັນອັບສອງຂອງໂລກ, ໄດ້ບັນລຸການພັດທະນາແບບກ້າວກະໂດດຂັ້ນທີ່ມີລັກສະນະປະຫວັດສາດຈາກສະພາບ ທີ່ປະຊາຊົນກິນບໍ່ອີ່ມນຸ່ງບໍ່ອຸ່ນສູ່ຄວາມອີ່ມໜຳສຳລານໂດຍລວມແລະມຸ້ງໜ້າໄປສູ່ຄວາມອີ່ມໜຳສຳລານຮອບດ້ານ, ໄດ້ສ້າງເງື່ອນໄຂຮັບປະກັນດ້ານລະບຽບການທີ່ເຕັມໄປດ້ວຍຄວາມມີຊີວິດຊີວາແລະເງື່ນໄຂດ້ານວັດຖຸເພື່ອການພັດທະນາຢ່າງວ່ອງໄວໃຫ້ແກ່ການບັນລຸເປົ້າໝາຍການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ. ພັກກອມມູນິດຈີນແລະປະຊາຊົນຈີນໄດ້ບຸກບືນສູ້ຊົນຢ່າງອົງອາດກ້າຫານແລະໄດ້ປະກາດຕໍ່ຊາວໂລກຢ່າງໜັກແໜ້ນວ່າ: ການປະຕິຮູບແລະເປີດປະຕູສູ່ພາຍນອກແມ່ນມາດຕະການທີ່ເປັນຂໍກຸນແຈຕັດສິນອະນາຄົດແລະຊາຕາກຳຂອງຈີນໃນຍຸກປັດຈຸບັນ, ຈີນໄດ້ກ້າວໄປທ່ວງທັນກັບຍຸກສະໄໝດ້ວຍບາດກ້າວໃຫຍ່!
ເພື່ອບັນລຸເປົ້າໝາຍການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ, ພັກກອມມູນິດຈີນໄດ້ເຕົ້າໂຮມຄວາມສາມັກຄີ ແລະ ນຳພາປະຊາຊົນຈີນ, ເຊື່ອໝັ້ນຕົນເອງ ສ້າງຄວາມເຂັ້ມແຂງດ້ວຍຕົນເອງ, ປະດິດສ້າງໃໝ່ບົນພື້ນຖານທີ່ຍຶດໝັ້ນທິດທາງການເມືອງອັນຖືກຕ້ອງ, ເຊື່ອມໂຍງການຕໍ່ສູ້ທີ່ຍິ່ງໃຫຍ່ ໂຄງການທີ່ຍິ່ງໃຫຍ່, ພາລະກິດທີ່ຍິ່ງໃຫຍ່ ແລະ ຄວາມໃຝ່ຝັນທີ່ຍິ່ງໃຫຍ່ໃຫ້ເປັນເອກະພາບກັນ, ໄດ້ສ້າງຜົນສຳເລັດອັນຍິ່ງໃຫຍ່ໃຫ້ກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່. ນັບແຕ່ກອງປະຊຸມໃຫຍ່ຂອງພັກອມມູນິດຈີນຄັ້ງທີ 18 ເປັນຕົ້ນມາ, ສັງຄົມນິຍົມທີ່ມີສີສັນພິເສດຂອງຈີນໄດ້ເຂົ້າສູ່ຍຸກໃໝ່, ພວກເຮົາໄດ້ຍຶດໝັ້ນ ແລະ ເພີ່ມທະວີການນຳພາຂອງພັກຢ່າງຮອບດ້ານ, ຊຸກຍູ້ແຜນຍຸດທະສາດລວມ “ 5 ສ້າງເປັນອັນໜຶ່ງອັນດຽວກັນ”ຢ່າງເປັນເອກະພາບກັນ, ຊຸກຍູ້ແຜນຍຸດທະສາດ “4 ຮອບດ້ານ” ຢ່າງມີການປະສານສົມທົບກັນ, ຍຶດໝັ້ນ ແລະ ປັບປຸງລະບອບສັງຄົມນິຍົມທີ່ມີສີສັນພິເສດຂອງຈີນໃຫ້ສົມບູນຂຶ້ນ, ຊຸກຍູ້ການຫັນເປັນທັນສະໄໝດ້ານລະບົບ ແລະ ຄວາມສາມາດການປົກຄອງບໍລິຫານປະເທດ, ຍຶດໝັ້ນການຄຸ້ມຄອງພັກຕາມລະບຽບການ, ໄດ້ສ້າງລະບົບກົດລະບຽບພາຍໃນພັກທີ່ອ່າວສົມບູນ, ໄດ້ເອົາຊະນະຄວາມສ່ຽງ ແລະ ສິ່ງທ້າທາຍທີ່ໜັກໜ່ວງຕ່າງໆ, ໄດ້ບັນລຸເປົ້າໝາຍສູ້ຊົນຮ້ອຍປີປະການທີໜຶ່ງ, ໄດ້ກຳນົດແຜນຍຸດທະສາດເພື່ອບັນລຸເປົ້າໝາຍສູ້ຊົນຮ້ອຍປີ ປະການທີ 2 ຢ່າງຈະແຈ້ງ, ພາລະກິດຂອງພັກ ແລະ ລັດໄດ້ຮັບຜົນສຳເລັດເປັນຄັ້ງປະຫວັດສາດ, ເກີດມີການປ່ຽນແປງຄັ້ງປະຫວັດສາດ, ໄດ້ສ້າງສິ່ງຮັບປະກັນດ້ານລະບຽບການທີ່ສົມບູນກວ່າເກົ່າ, ສ້າງພື້ນຖານວັດຖຸທີ່ໜັກແໜ້ນກວ່າເກົ່າ, ສ້າງພະລັງໃຈທີ່ເປັນເຈົ້າການກວ່າເກົ່າໃຫ້ແກ່ການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ. ພັກກອມມູນິດຈີນ ແລະ ປະຊາຊົນຈີນໄດ້ບຸກບືນສູ້ຊົນຢ່າງອົງອາດກ້າຫານ ແລະໄດ້ປະກາດຢ່າງໜັກແໜ້ນຕໍ່ຊາວໂລກວ່າ, ປະຊາຊາດຈີນໄດ້ພັດທະນາແບບກ້າວກະໂດດຈາກການລຸກຢືນຂຶ້ນ ຮັ່ງມີຂຶ້ນ ຈົນຮອດເຂັ້ມແຂງຂຶ້ນ, ການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນໄດ້ເຂົ້າສູ່ຂະບວນການປະຫວັດສາດທີ່ບໍ່ສາມາດຕ່າວປີ້ນໄດ້.
ໃນໄລຍະ 100 ປີທີ່ຜ່ານມາ, ພັກກອມມູນິດຈີນໄດ້ເຕົ້າໂຮມສາມັກຄີ ແລະ ນຳພາປະຊາຊົນຈີນດ້ວຍຄວາມອົງອາດກ້າຫານແບບ “ມີຜູ້ຄົນທີ່ຍິນດີເສຍສະຫຼະເພື່ອອຸດົມການສູງສົ່ງຫຼາຍປານນີ້ ຈຶ່ງສາມາດປ່ຽນແປງໂລກເກົ່າໃຫ້ເປັນໂລກໃໝ່ອ່ຽມ”, ໄດ້ຂຽນປະຫວັດສາດໜ້າໃໝ່ທີ່ສະຫງ່າຜ່າເຜີຍທີ່ສຸດໃນປະຫວັດສາດຫຼາຍພັນປີຂອງປະຊາຊົນຈີນ. ໃນໄລຍະ 100 ປີທີ່ຜ່ານມາ, ເສັ້ນທາງອັນຍິ່ງໃຫຍ່ທີ່ໄດ້ບຸກເບີກໄວ້ ພາລະກິດອັນຍິ່ງໃຫຍ່ທີ່ໄດ້ສ້າງຂຶ້ນ, ຜົນສຳເລັດອັນຍິ່ງໃຫຍ່ທີ່ຍາດມາໄດ້, ຈະຖືກບັນທຶກໄວ້ໃນປະຫວັດສາດແຫ່ງການພັດທະນາຂອງປະຊາຊາດຈີນ ກໍຄືປະຫວັດສາດການພັດທະນາຂອງອະລິຍະທຳມະນຸດຢ່າງແນ່ນອນ.
ບັນດາສະຫາຍ ແລະເພື່ອນມິດ!
ເມື່ອ 100 ປີກ່ອນ, ບັນດາຜູ້ນຳໜ້າຂອງພັກກອມມູນິດຈີນໄດ້ສ້າງຕັ້ງພັກກອມມູນິດຈີນຂຶ້ນມາ, ສ້າງຈິດໃຈສ້າງຕັ້ງພັກອັນຍິ່ງໃຫຍ່ ຄື: ຍຶດໝັ້ນໃນສັດຈະທຳ, ຍຶດໝັ້ນອຸດົມການ, ປະຕິບັດຕາມອຸດົມການແຕ່ຫົວທີ, ແບກຫາບພາລະກຳ, ບໍ່ຢ້ານກົວຕໍ່ການເສຍສະຫຼະ, ຕໍ່ສູ້ຢ່າງກ້າຫານ, ຈົງຮັກພັກດີຕໍ່ພັກ ແລະບໍ່ເຮັດໃຫ້ປະຊາຊົນຜິດຫວັງ, ນີ້ກໍແມ່ນແຫຼ່ງກຳລັງແຮງດ້ານຈິດໃຈຂອງພັກກອມມູນິດຈີນ.
ໃນໄລຍະ 100 ປີທີ່ຜ່ານມາ, ພັກກອມມູນິດຈີນໄດ້ເຊີດຊູ ແລະເສີມຂະຫຍາຍຈິດໃຈສ້າງຕັ້ງພັກທີ່ຍິ່ງໃຫຍ່, ແລະໄດ້ສ້າງຈິດໃຈຂອງຊາວພັກກອມມູນິດຈີນຢ່າງເປັນລະບົບໃນການຕໍ່ສູ້ຍືດເຍື້ອຍາວນານ, ແລະໄດ້ຝຶກຝົນຫຼໍ່ຫຼອມຄຸນທາດການເມືອງທີ່ພົ້ນເດັ່ນ. ປະຫວັດສາດເຄື່ອນໄປຢ່າງບໍ່ຢຸດຢັ້ງ, ຈິດໃຈເຫຼົ່ານີ້ໄດ້ສືບທອດໄປທຸກເຊັ່ນຄົນ. ພວກເຮົາຄວນສືບຕໍ່ເຊີດຊູມູນເຊື້ອທີ່ມີກຽດສະຫງ່າ, ສືບທອດນ້ຳໃຈປະຕິວັດ, ສືບທອດ ແລະ ເສີມຂະຫຍາຍຈິດໃຈສ້າງຕັ້ງພັກທີ່ຍິ່ງໃຫຍ່ຕະຫຼອດໄປ!
ບັນດາສະຫາຍ ແລະ ເພື່ອນມິດ!
ໃນໄລຍະ 100 ປີທີ່ຜ່ານມາ, ຜົນສຳເລັດທຸກຢ່າງທີ່ພວກເຮົາຍາດມາໄດ້, ແມ່ນຜົນສຳເລັດຈາກຄວາມສາມັກຄີ ແລະ ການສູ້ຊົນຂອງຊາວພັກກອມມູນິດຈີນ ປະຊາຊົນຈີນ ແລະ ປະຊາຊາດຈີນ. ຊາວພັກກອມມູນິດຈີນທີ່ມີສະຫາຍເໝົາເຈີຕຸ່ງ, ສະຫາຍເຕີ້ງສ້ຽວຜິງ, ສະຫາຍຈ່ຽງເຈີໝິນ, ສະຫາຍຫູຈິນທ່າວເປັນຕົວແທນສຳຄັນຕົ້ນຕໍນັ້ນ, ໄດ້ສ້າງຄຸນງາມຄວາມດີອັນຍິ່ງໃຫຍ່ເປັນຄັ້ງປະຫວັດສາດໃຫ້ແກ່ການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ! ພວກເຮົາຂໍສະແດງຄວາມເຄົາລົບນັບຖືຢ່າງສູງຕໍ່ພວກເພິ່ນ!
ເນື່ອງໃນໂອກາດນີ້, ພວກເຮົາຂໍສະແດງຄວາມອາໄລອາວອນຢ່າງສຸດຊຶ້ງເຖິງນັກປະຕິວັດລຸ້ນອາວຸໂສ ເຊັ່ນ, ສະຫາຍເໝົາເຈີຕຸ່ງ, ສະຫາຍໂຈ່ເອີ່ນໄຫຼ, ສະຫາຍລິວຊ້າວສີ, ສະຫາຍຈູ່ເຕີ, ສະຫາຍເຕີ້ງສ້ຽວຜິງ, ສະຫາຍເສີນຢຸນ ແລະສະຫາຍອື່ນໆທີ່ໄດ້ປະກອບສ່ວນອັນສຳຄັນເຂົ້າໃນການປະຕິວັດ ການສ້າງສາພັດທະນາ ແລະ ການປະຕິຮູບປະເທດຈີນ, ກໍຄືການສ້າງຕັ້ງ ປັບປຸງ ແລະການພັດທະນາພັກກອມມູນິດຈີນ, ຂໍສະແດງຄວາມອາໄລອາວອນຢ່າງສຸດຊຶ້ງເຖິງນັກປະຕິວັດລຸ້ນອາວຸໂສທີ່ໄດ້ເສຍສະຫຼະຊີວິດຢ່າງກ້າຫານເພື່ອສະຖາປະນາ ປົກປັກຮັກສາ ແລະ ສ້າງສາພັດທະນາສປຈີນ, ຂໍສະແດງຄວາມອາໄລອາວອນຢ່າງສຸດຊຶ້ງຕໍ່ນັກປະຕິວັດທີ່ໄດ້ເສຍສະຫຼະຊີວິດເພື່ອການປະຕິຮູບ ເປີດປະຕູສູ່ພາຍນອກ ແລະ ການສ້າງສາສັງຄົມນິຍົມທີ່ທັນສະໄໝ, ຂໍສະແດງຄວາມອາໄລອາວອນຢ່າງສຸດຊຶ້ງຕໍ່ວິລະບຸລຸດທຸກໆທ່ານທີ່ໄດ້ບຸກບືນສູ້ຊົນຢ່າງທໍລະຫົດອົດທົນເພື່ອຄວາມເປັນເອກະລາດແຫ່ງຊາດ ແລະ ການປົດປ່ອຍປະຊາຊົນໃນສະໄໝໃໝ່. ຄຸນງາມຄວາມດີຂອງພວກເພິ່ນເພື່ອປະເທດຊາດ ແລະ ປະຊາຊາດຈີນນັ້ນຈະຖືກບັນທຶກໄວ້ໃນປະຫວັດສາດຕະຫຼອດໄປ! ຈິດໃຈອັນສູງສົ່ງຂອງພວກເພິ່ນຈະຖືກຈື່ຈຳໄວ້ໃນຈິດໃຈຂອງປະຊາຊົນຈີນຕະຫຼອດກາລະນານ!
ປະຊາຊົນເປັນຜູ້ສ້າງປະຫວັດສາດ, ແມ່ນວິລະຊົນທີ່ແທ້ຈິງ. ຂ້າພະເຈົ້າຂໍຕາງໜ້າໃຫ້ຄະນະກຳມະການສູນກາງພັກ, ສະແດງຄວາມເຄົາລົບນັບຖືອັນສູງສົ່ງຕໍ່ກຳມະກອນ, ຊາວກະສິກອນແລະປັນຍາຊົນທັງຫຼາຍໃນທົ່ວປະເທດ, ບັນດາພັກຝ່າຍປະຊາທິປະໄຕ, ບຸກຄົນທີ່ບໍ່ສັງກັດພັກຝ່າຍໃດ, ບັນດາອົງການຈັດຕັ້ງຂອງປະຊາຊົນ, ບຸກຄົນຮັກຊາດໃນວົງການຕ່າງໆ, ຜູ້ບັນຊາການແລະທະຫານຂອງກອງທັບປົດປ່ອຍປະຊາຊົນ, ນາຍແລະພົນທະຫານຂອງກອງຕຳຫຼວດປະກອບອາວຸດ, ຕຳຫຼວດປ້ອງກັນຄວາມສະຫງົບ, ຜູ້ບັນຊາການ ແລະຕຳຫຼວດກອງ ດັບເພີງແລະກູ້ໄພ, ຜູ້ອອກແຮງງານສັງຄົມນິຍົມທຸກຖ້ວນໜ້າແລະສະມາຊິກຂອງແນວໂຮມເອກະພາບທັງຫຼາຍ! ຂໍສະແດງຄວາມຢື້ຢາມຖາມຂ່າວອັນອົບອຸ່ນເຖິງພີ່ນ້ອງຮ່ວມຊາດເຂດບໍລິຫານພິເສດຮົງກົງ, ເຂດບໍລິຫານພິເສດມາກາວ ແລະພີ່ນ້ອງຮ່ວມຊາດໄຕ້ຫວັນ ພ້ອມດ້ວຍຊາວຈີນຕ່າງດ້າວທັງຫຼາຍ! ຂໍສະແດງຄວາມຂອບອົກຂອບໃຈຢ່າງຈິງໃຈນຳປະຊາຊົນແລະເພື່ອນມິດບັນດາປະເທດທີ່ປະຕິບັດຕໍ່ປະຊາຊົນຈີນດ້ວຍໄມຕີຈິດມິດຕະພາບທີ່ໄດ້ເອົາໃຈໃສ່ແລະໃຫ້ການສະໜັບສະໜູນພາລະກິດປະຕິວັດ, ການສ້າງສາແລະການປະຕິຮູບຂອງຈີນ!
ບັນດາສະຫາຍແລະເພື່ອນມິດ!
ອຸດົມການແຕ່ຫົວທີເກີດຂຶ້ນອ່າວງ່າຍ, ແຕ່ການຍຶດໝັ້ນອຸດົມການແຕ່ຫົວທີຢ່າງສະເໝີຕົ້ນສະເໝີປາຍນັ້ນແມ່ນເຮັດໄດ້ຍາກຫຼາຍ. ການຖືເອົາປະຫວັດສາດເປັນແວ່ນແຍງ ຈະສາມາດຮັບຮູ້ໄດ້ເຖິງສາເຫດຂອງການລົ້ມສະຫຼາຍແລະຄວາມຈະເລີນຮຸ່ງເຮືອງຂອງປະເທດໄດ້. ພວກເຮົາຕ້ອງສ່ອງເບິ່ງສະພາບຄວາມເປັນຈິງແລະຈ້ອງເບິ່ງອະນາຄົດຈາກປະຫວັດສາດ, ໃນການສູ້ຊົນເປັນເວລາ 100 ປີຂອງພັກກອມມູນິດຈີນ, ພວກເຮົາຕ້ອງຮັບຮູ້ຢ່າງຈະແຈ້ງວ່າ: ເປັນຫຍັງພວກເຮົາຈິ່ງສາມາດເຮັດສຳເລັດໄດ້, ໃນອະນາຄົດພວກເຮົາຄວນເຮັດແນວໃດຈຶ່ງຈະສາມາດໄດ້ຮັບຜົນສຳເລັດອີກຕື່ມ ເພື່ອມີຄວາມໝັ້ນໃຈຫຼາຍກວ່າເກົ່າ, ມີຄວາມຕື່ນຕົວໃນການຈື່ຈຳອຸດົມການແຕ່ຫົວທີແລະພາລະກຳຢ່າງໜັກແໜ້ນກວ່າເກົ່າ ແລະບຸກເບີກອະນາຄົດທີ່ດີງາມໃນຂະບວນການອອກເດີນທາງຄັ້ງໃໝ່.
——ການຖືປະຫວັດສາດເປັນແວ່ນແຍງ, ບຸກເບີກອະນາຄົດ, ຕ້ອງຍຶດໝັ້ນການນຳພາທີ່ເຂັ້ມແຂງຂອງພັກກອມມູນິດຈີນ. ເຮັດວຽກຂອງປະເທດຈີນໃຫ້ດີ, ຂໍກຸນແຈຂຶ້ນຢູ່ກັບພັກ. ປະຫວັດສາດຈີນສະໄໝໃໝ່ 180 ກວ່າປີມານີ້, ປະຫວັດສາດ 100 ປີທີ່ສ້າງຕັ້ງພັກກອມມູນິດຈີນເປັນຕົ້ນມາ ແລະປະຫວັດສາດ 70 ກວ່າປີ ທີ່ສະຖາປະນາ ສປ ຈີນ ເປັນຕົ້ນມາລ້ວນແຕ່ໄດ້ພິສູດໃຫ້ເຫັນຢ່າງເຕັມສ່ວນວ່າ: ບໍ່ມີພັກກອມມູນິດຈີນ ກໍບໍ່ມີປະເທດຈີນໃໝ່, ບໍ່ມີພັກກອມມູນິດຈີນ ກໍບໍ່ມີການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ. ປະຫວັດສາດ ແລະປະຊາຊົນໄດ້ເລືອກພັກກອມມູນິດຈີນແລ້ວ. ການນຳພາຂອງພັກກອມມູນິດຈີນແມ່ນລັກສະນະທາດແທ້ທີ່ສຸດຂອງສັງຄົມນິຍົມທີ່ມີສີສັນພິເສດຂອງຈີນ, ແມ່ນທ່າແຮງໃຫຍ່ທີ່ສຸດຂອງລະບອບສັງຄົມນິຍົມທີ່ມີສີສັນພິເສດຂອງຈີນ, ແມ່ນພື້ນຖານແລະສາຍເລືອດຂອງພັກແລະປະເທດຊາດ, ພົວພັນໂດຍກົງກັບຜົນປະໂຫຍດ ແລະຊາຕາກຳຂອງປະຊາຊົນບັນດາເຜົ່າໃນທົ່ວປະເທດ.
ໃນຂະບວນການອອກເດີນທາງໃໝ່, ພວກເຮົາຕ້ອງຍຶດໝັ້ນການນຳພາຂອງພັກ ຢ່າງຮອບດ້ານ, ປັບປຸງບູລະນະການນຳພາຂອງພັກຢ່າງບໍ່ຢຸດຢັ້ງ, ເພີ່ມທະວີ “4 ສະຕິ” (ສະຕິການເມືອງ, ສະຕິເພື່ອຜົນປະໂຫຍດສ່ວນລວມ, ສະຕິແກນນຳ ແລະສະຕິເປັນເອກະພາບກັບສູນກາງ), ຍຶດໝັ້ນ “4 ຄວາມໝັ້ນໃຈ” ຕົນເອງ (ມີຄວາມໝັ້ນໃຈຕົນເອງດ້ານເສັ້ນທາງສັງຄົມນິຍົມທີ່ມີສີສັນພິເສດຂອງຈີນ, ມີ ຄວາມໝັ້ນໃຈຕົນເອງດ້ານທິດສະດີ, ມີຄວາມໝັ້ນໃຈຕົນເອງດ້ານລະບອບ ແລະມີຄວາມໝັ້ນໃຈຕົນເອງດ້ານວັດທະນະທຳ), ປະຕິບັດ “2 ປົກປ້ອງ” (ປົກປ້ອງຖານະແກນກາງຂອງທ່ານເລຂາທິການໃຫຍ່ສີຈິ້ນຜິງໃນຄະນະກຳມະການສູນກາງພັກແລະໃນທົ່ວພັກຢ່າງເດັດດ່ຽວ ແລະປົກປ້ອງອຳນາດອິດທິພົນແລະການນຳພາລວມສູນຢ່າງເປັນເອກະພາບຂອງຄະນະກຳມະການສູນກາງພັກ), ຕ້ອງຈື່ຈຳຢ່າງໜັກແໜັ້ນກ່ຽວກັບສິ່ງສຳຄັນຂອງປະເທດຊາດ, ຕ້ອງຍົກສູງລະດັບການປົກຄອງປະເທດຕາມຫຼັກວິທະຍາສາດ, ປະຊາທິປະໄຕ ແລະຕາມກົດໝາຍຂອງພັກຢ່າງບໍ່ຢຸດຢັ້ງ, ເສີມຂະຫຍາຍບົດບາດແກນນຳຂອງພັກໃນການຄຸ້ມຄອງສະພາບການລວມ ແລະປະສານງານທຸກຝ່າຍ!
——ຖືປະຫວັດສາດເປັນແວ່ນແຍງ, ບຸກເບີກອະນາຄົດ, ຕ້ອງສາມັກຄີແລະນຳພາປະຊາຊົນຈີນສູ້ຊົນເພື່ອຊີວິດການເປັນຢູ່ທີ່ດີງາມຢ່າງບໍ່ຢຸດຢັ້ງ. ປະເທດຊາດກໍແມ່ນປະຊາຊົນ, ປະຊາຊົນກໍແມ່ນປະເທດຊາດ, ການສ້າງຕັ້ງປະເທດຮັກສາປະເທດຊາດກໍແມ່ນຮັກສາຄວາມສັດທາຂອງປະຊາຊົນ. ຮາກຖານຂອງພັກກອມມູນິດຈີນຂຶ້ນຢູ່ກັບປະຊາຊົນ, ສາຍເລືອດຂຶ້ນຢູ່ກັບປະຊາຊົນ, ກຳລັງກໍມາຈາກປະຊາຊົນ. ພັກກອມມູນິດຈີນເປັນຕົວແທນໃຫ້ແກ່ຜົນປະໂຫຍດພື້ນຖານຂອງປະຊາຊົນຈີນຈຳນວນຫຼວງຫຼາຍທີ່ສຸດຢ່າງສະເໝີຕົ້ນສະເໝີປາຍ, ຮ່ວມທຸກຮ່ວມສຸກກັບປະຊາຊົນ, ຮ່ວມເປັນຮ່ວມຕາຍກັບປະຊາຊົນ, ບໍ່ມີຜົນປະໂຫຍດພິເສດສ່ວນຕົວແຕ່ຢ່າງໃດ ແລະບໍ່ເຄີຍເປັນຕົວແທນໃຫ້ແກ່ຜົນປະໂຫຍດຂອງກຸ່ມຜົນປະໂຫຍດໃດ, ກຸ່ມອິດທິກຳລັງໃດ ແລະຊັ້ນຄົນອຳນາດພິເສດໃດ. ກົນອຸບາຍທຸກຮູບແບບທີ່ຢາກແບ່ງແຍກ ແລະເຮັດໃຫ້ພັກກອມມູນິດຈີນແລະປະຊາຊົນຈີນເປັນປໍລະປັກກັນນັ້ນ ຈະບໍ່ປະສົບຜົນສຳເລັດເດັດຂາດ! ຊາວພັກກອມມູນິດຈີນ 95 ລ້ານກວ່າຄົນຈະບໍ່ຍອມຮັບ! ປະຊາຊົນຈີນ 1,4 ຕື້ກວ່າຄົນກໍຈະບໍ່ຍອມຮັບເຊັ່ນກັນ!
ໃນຂະບວນການອອກເດີນທາງຄັ້ງໃໝ່, ພວກເຮົາຕ້ອງໃກ້ຊິດຕິດແທດ ແລະອາໄສປະຊາຊົນເພື່ອສ້າງປະຫວັດສາດ, ຍຶດໝັ້ນຈຸດປະສົງພື້ນຖານທີ່ຮັບໃຊ້ປະຊາຊົນຢ່າງສຸດໃຈ, ຍຶດໝັ້ນໃນຫຼັກໝັ້ນປະຊາຊົນ, ຈັດຕັ້ງປະຕິບັດແນວທາງປະຊາຊົນຂອງພັກກອມມູນິດຈີນ, ເຄົາລົບນັບຖືຈິດໃຈປະດິດສ້າງໃໝ່ຂອງປະຊາຊົນ, ປະຕິບັດຕາມແນວຄວາມຄິດດ້ານການພັດທະນາທີ່ຖືເອົາປະຊາຊົນເປັນໃຈກາງ. ພັດທະນາປະຊາທິປະໄຕປະຊາຊົນໃນຕະຫລອດຂະບວນການ, ປົກປັກຮັກສາຄວາມເປັນທຳ ແລະຍຸຕິທຳທາງສັງຄົມ, ສຸມໃສ່ແກ້ໄຂບັນຫາການພັດທະນາທີ່ບໍ່ດຸ່ນດ່ຽງກັນ, ບໍ່ຮອບດ້ານ ແລະບັນຫາທີ່ປະຊາຊົນມີຄວາມເດືອດຮ້ອນ, ຫຍຸ້ງຍາກ ແລະມີຄວາມກັງວົນໃຈ, ຊຸກຍູ້ການພັດທະນາຄົນຢ່າງຮອດດ້ານ ແລະຊຸກຍູ້ການສ້າງຄວາມຮັ່ງມີຮ່ວມກັນຂອງທົ່ວປວງຊົນໃຫ້ມີຄວາມຄືບໜ້າຕົວຈິງຢ່າງເຫັນໄດ້ເດັ່ນຊັດກວ່າເກົ່າ.
ຖືເອົາປະຫວັດສາດເປັນແວ່ນແຍງ, ບຸກເບີກອະນາຄົດ,ຈຳເປັນຕ້ອງສືບຕໍ່ຊຸກຍູ້ການພັດທະນາລັດທິມາກໃນແບບຂອງຈີນ. ລັດທິມາກແມ່ນແນວຄິດຊີ້ນຳພື້ນຖານໃນການສ້າງຕັ້ງພັກກອມມູນິດຈີນ ແລະປະເທດຈີນ, ແມ່ນມິ່ງຂວັນ ແລະທຸງນຳໜ້າຂອງພັກກອມມູນິດຈີນ. ພັກກອມມູນິດຈີນໄດ້ຍຶດໝັ້ນໃນຫລັກມູນພື້ນຖານຂອງລັດທິມາກ, ຍຶດໝັ້ນການສະແຫວງຫາສັດຈະຈາກຄວາມເປັນຈິງ, ເດີນທາງຕາມສະພາບຄວາມເປັນຈິງຂອງປະເທດຈີນ, ສຶກສາທ່ວງທ່າຂອງຍຸກສະໄໝ, ກຳແໜ້ນຄວາມເປັນເຈົ້າການຄັ້ງປະຫວັດສາດ, ດຳເນີນການຄົ້ນຄວ້າສະແຫວງຫາຢ່າງຫຍຸ້ງຍາກລຳບາກ, ຊຸກຍູ້ໃຫ້ລັດທິມາກເປັນແບບຂອງຈີນ ແລະຕາມຍຸກສະໄໝ, ເພື່ອຊີ້ນຳນຳພາປະຊາຊົນຈີນໃນການຊຸກຍູ້ການປະຕິວັດທາງສັງຄົມອັນຍິ່ງໃຫຍ່ຢ່າງບໍ່ຢຸດຢັ້ງ. ເປັນຫຍັງພັກກອມມູນິດຈີນຈຶ່ງເຮັດສຳເລັດໜ້າທີ່ໄດ້, ສັງຄົມນິຍົມທີ່ມີສີສັນພະເສດຂອງຈີນມີຫຍັງດີ, ເວົ້າເຖິງກົກເຖິງຮາກແລ້ວກໍຍ້ອນວ່າລັດທິມາກແມ່ນທິດສະດີຊີ້ນຳທີ່ດີ.
ໃນຂະບວນການອອກເດີນທາງຄັ້ງໃໝ່, ພວກເຮົາຕ້ອງຍຶດໝັ້ນລັດທິມາກ-ເລນິນ, ແນວຄິດເໝົາເຈີຕຸ່ງ, ທິດສະດີເຕີ້ງສຽວຜີງ, ແນວຄິດສຳຄັນ “3 ຕົວແທນ” , ທັດສະນະພັດທະນາຕາມຫລັກວິທະຍາສາດ, ຈັດຕັ້ງປະຕິບັດແນວຄິດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ຢ່າງຮອບດ້ານ, ຍຶດໝັ້ນການຖືເອົາຫລັກມູນພື້ນຖານຂອງລັດທິມາກປະສານສົມທົບກັບສະພາບຄວາມເປັນຈິງຂອງຈີນ ແລະວັດທະນະທຳທີ່ເປັນມູນເຊື້ອອັນດີງາມຂອງຊົນຊາດຈີນ, ນຳເອົາລັດທິມາກມາສັງເກດຍຸກສະໄໝ ກຳແໜ້ນຍຸກສະໄໝ ແລະນຳພາຍຸກສະໄໝ, ສືບຕໍ່ພັດທະນາລັດທິມາກໃນແບບຈີນໃນຍຸກສະໄໝປັດຈຸບັນ ແລະລັດທິມາກໃນສະຕະວັດທີ 21.
ຖືເອົາປະຫວັດສາດເປັນແວ່ນແຍງ, ບຸກເບີກອະນາຄົດ,ຈຳເປັນຕ້ອງຍຶດໝັ້ນ ແລະພັດທະນາສັງຄົມນິຍົມທີ່ມີສີສັນພິເສດຂອງຈີນ. ການເດີນຕາມເສັ້ນທາງຂອງຕົນເປັນຈຸດພື້ນຖານທາງດ້ານທິດສະດີ ແລະພຶດຕິກຳທັງໝົດຂອງພັກກອມມູນິດຈີນ, ທັງແມ່ນຂໍ້ສະຫລຸບຂອງປະຫວັດສາດທີ່ພັກກອມມູນິດຈີນໄດ້ຮັບຈາກການນຳພາສູ້ຊົນເປັນເວລາຮ້ອຍປີ. ສັງຄົມນິຍົມທີ່ມີສີສັນພິເສດຂອງຈີນແມ່ນຜົນສຳເລັດພື້ນຖານຂອງພັກ ແລະປະຊາຊົນຈີນທີ່ໄດ້ຜ່ານຜ່າຄວາມຫຍຸ້ງຍາກນາໆປະການ ແລະເສຍສະຫລະຢ່າງຫລວງຫລາຍ, ເປັນເສັ້ນທາງທີ່ຖືກຕ້ອງໃນການຟື້ນຟູຄວາມຈະເລີນຮຸ່ງເຮືອງຄືນໃໝ່ຂອງປະຊາຊາດຈີນ. ພວກເຮົາຍຶດໝັ້ນ ແລະພັດທະນາສັງຄົມນິຍົມທີ່ມີສີສັນພິເສດຂອງຈີນ, ໄດ້ຊຸກຍູ້ຄວາມສີວິໄລດ້ານວັດຖຸ, ຄວາມສີວິໄລດ້ານການເມືອງ, ຄວາມສີວິໄລດ້ານຈິດໃຈ, ຄວາມສີວິໄລທາງສັງຄົມ ແລະຄວາມສີວິໄລດ້ານຊີວະພາບໃຫ້ພັດທະນາແບບປະສານສົມທົບກັນ, ໄດ້ສ້າງເສັ້ນທາງທັນສະໄໝອັນໃໝ່ທີ່ມີສີສັນຂອງຈີນ, ທັງໄດ້ສ້າງຮູບແບບໃໝ່ຂອງຄວາມສີວິໄລຂອງມະນຸດ.
ໃນຂະບວນການອອກເດີນທາງຄັ້ງໃໝ່, ພວກເຮົາຕ້ອງຍຶດໝັ້ນທິດສະດີພື້ນຖານ ແນວທາງພື້ນຖານ ແລະຍຸດທະສາດພື້ນຖານຂອງພັກ, ຊຸ້ກຍູ້ແຜນຍຸດທະສາດລວມ “ການພັດທະນາພາລະກິດ 5 ດ້ານຢ່າງເປັນເອກະພາບກັນ”, ຊຸ້ກຍູ້ແຜນຍຸດທະສາດ “4ຮອບດ້ານ”ໃຫ້ສາມາດປະສານສົມທົບກັນ, ລົງເລິກການປະຕິຮູບ ແລະເປີດປະຕູສູ່ພາຍນອກຢ່າງຮອບດ້ານ, ເລີ່ມຕົ້ນຈາກໄລຍະພັດທະນາອັນໃໝ່, ຈັດຕັ້ງປະຕິບັດແນວຄວາມຄິດດ້ານການພັດທະນາອັນໃໝ່ຢ່າງຄົບຖ້ວນ ຖືກຕ້ອງ ແລະຮອບດ້ານ, ສ້າງໂຄງປະກອບການພັດທະນາອັນໃໝ່, ຊຸກຍູ້ການພັດທະນາທີ່ມີຄຸນນະພາບສູງ, ສົ່ງເສີມຄວາມເປັນເຈົ້າຕົນເອງ ແລະຄວາມເຂັ້ມແຂງດ້ວຍຕົນເອງດ້ານວິທະຍາສາດ-ເຕັກໂນໂລຊີ, ຮັບປະກັນໃຫ້ປະຊາຊົນເປັນເຈົ້າຂອງປະເທດຊາດ, ຍຶດໝັ້ນການປົກຄອງປະເທດຕາມກົດໝາຍ, ຍຶດໝັ້ນລະບົບຄ່ານິຍົມຕົ້ນຕໍສັງຄົມນິຍົມ, ຍຶດໝັ້ນການຮັບປະກັນ ແລະປັບປຸງຊີວິດການເປັນຢູ່ຂອງປະຊາຊົນໃນຂະບວນການພັດທະນາ, ຍຶດໝັ້ນການເຮັດໃຫ້ມະນຸດ ແລະທຳມະຊາດຢູ່ຮ່ວມກັນຢ່າງກົມກຽວ, ຮ່ວມກັນຊຸກຍູ້ໃຫ້ປະຊາຊົນຮັ່ງຂຶ້ນ, ປະເທດເຂັ້ມແຂງ, ດິນແດນສວຍງາມ.
ຊົນຊາດຈີນມີອະລິຍະທຳຫລາກຫລາຍສີສັນທີ່ສ້າງຂຶ້ນໃນຂະບວນວິວັດຂອງປະຫວັດສາດເປັນເວລາ 5 ພັນກວ່າປີ, ພັກກອມມູນິດຈີນມີພຶດຕິກຳສູ້ຊົນເປັນເວລາຮ້ອຍປີ ແລະມີປະສົບການຄຸ້ມຄອງບໍລິຫານ ແລະພັດທະນາປະເທດເປັນເວລາ 70 ກວ່າປີ, ພວກເຮົາໄດ້ຕັ້ງໜ້າຮ່ຳຮຽນ ແລະ ຖອດຖອນບົດຮຽນທີ່ເປັນປະໂຫຍດທີ່ດີທຸກຢ່າງດ້ານອະລິຍະທຳຂອງມະນຸດ, ຍິນດີຮັບຟັງຂໍ້ສະເໜີທີ່ມີຜົນດີ ແລະ ຄຳຕຳໜິຕິຊົມທີ່ມີເຈດຕະນາດີທຸກຢ່າງ, ແຕ່ຈະບໍ່ຍອມໃຫ້ໃຜມາເປັນປະລະມາຈານຊີ້ໄມ້ຊີ້ມືແບບບັງຄັບຢ່າງເດັດຂາດ. ພັກກອມມູນິດຈີນ ແລະປະຊາຊົນຈີນຈະກ້າວເດີນຕໍ່ໄປຢ່າງສະຫງ່າຜ່າເຜີຍຕາມເສັ້ນທາງທີ່ຕົນເອງເລືອກເຟັ້ນ, ກຳແໜ້ນຊາຕາກຳແຫ່ງການພັດທະນາ ແລະ ຄວາມກ້າວໜ້າຂອງປະເທດຈີນໄວ້ໃນກຳມືຂອງຕົນ.
ຖືເອົາປະຫວັດສາດເປັນແວ່ນແຍງ, ບຸກເບີກອະນາຄົດ, ຈຳເປັນຕ້ອງເລັ່ງລັດການພັດທະນາວຽກງານການປ້ອງກັນປະເທດ ແລະການສ້າງກອງທັບໃຫ້ທັນສະໄໝ. ຖ້າຢາກສ້າງປະເທດທີ່ເຂັ້ມແຂງຕ້ອງສ້າງກອງທັບທີ່ເຂັ້ມແຂງ, ກອງທັບມີຄວາມເຂັ້ມແຂງ, ປະເທດຈຶ່ງມີຄວາມໝັ້ນຄົງ. ການທີ່ຍຶດໝັ້ນການຖືເອົາພັກເປັນຜູ້ຊີ້ນຳນຳພາກອງທັບ ແລະສ້າງກອງທັບປະຊາຊົນຂອງຕົນນັ້ນ, ເປັນສັດຈະທຳທີ່ພັກກອມມູນິດຈີນຍາດມາໄດ້ທ່າມກາງການເສຍສະຫລະເລືອດເນື້ອ ແລະໝື້ປືນ. ກອງທັບປະຊາຊົນໄດ້ສ້າງຄຸນງາມຄວາມດີອັນສະຫງ່າລາສີເພື່ອພັກແລະປະຊາຊົນ, ແມ່ນເສົາຄ້ຳທີ່ເຂັ້ມແຂງໃນການປົກປັກຮັກສາປະເທດຊາດປະຕິວັດສີແດງ ແລະກຽດສັກສີຂອງຊົນຊາດຈີນ ທັງເປັນກຳລັງເຂັ້ມແຂງໃນການປົກປັກຮັກສາສັນຕິພາບຂອງພາກພື້ນກໍຄືຂອງໂລກ.
ໃນຂະບວນການອອກເດີນທາງຄັ້ງໃໝ່, ພວກເຮົາຕ້ອງຈັດຕັ້ງປະຕິບັດແນວ ຄິດຂອງພັກກອມມູນິດຈີນໃນການສ້າງກອງທັບໃຫ້ເຂັ້ມແຂງໃນຍຸກສະໄໝໃໝ່, ຈັດຕັ້ງປະຕິບັດແນວທາງຍຸດທະສາດການທະຫານໃນຍຸກສະໄໝໃໝ່, ຍຶດໝັ້ນການນຳພາຂອງພັກກອມມູນິດຈີນແບບເດັດຖານທີ່ມີຕໍ່ກອງທັບປະຊາຊົນ, ຍຶດໝັ້ນເດີນຕາມເສັ້ນທາງທີ່ມີສີສັນພິເສດຂອງຈີນໃນການສ້າງກອງທັບໃຫ້ເຂັ້ມແຂງ, ຊຸກຍູ້ການສ້າງກອງທັບດ້ວຍການເມືອງ, ສ້າງກອງທັບໃຫ້ເຂັ້ມແຂງຜ່ານການປະຕິຮູບ, ສ້າງກອງທັບໃຫ້ເຂັ້ມແຂງຜ່ານວິທະຍາສາດ-ເຕັກໂນໂລຊີ, ສ້າງກອງທັບໃຫ້ເຂັ້ມແຂງດ້ວຍບຸກຄະລາກອນ ແລະບໍລິຫານກອງທັບຕາມກົດໝາຍຢ່າງຮອບດ້ານ, ສ້າງກອງທັບປະຊາຊົນໃຫ້ເປັນກອງທັບສຸດຍອດຂອງໂລກ, ປົກປ້ອງອະທິປະໄຕ, ຄວາມໝັ້ນຄົງ ແລະຜົນປະໂຫຍດດ້ານການພັດທະນາຂອງປະເທດຊາດດ້ວຍຄວາມສາມາດທີ່ເຂັ້ມແຂງກວ່າເກົ່າ ແລະດ້ວຍວິທີທີ່ມີປະສິດທິຜົນຫຼາຍກວ່າເກົ່າ.
ຖືປະຫວັດສາດເປັນແວ່ນແຍງ,ບຸກເບີກອະນາຄົດ,ຕ້ອງຊຸກຍູ້ການສ້າປະຊາຄົມຮ່ວມຊາຕາກຳຂອງມວນມະນຸດຢ່າງບໍ່ຢຸດຢັ້ງ. ສັນຕິພາບ,ການຢູ່ຮ່ວມກັນໂດຍສັນຕິ ແລະຄວາມປອງດອງກັນ ແມ່ນແນວຄວາມຄິດທີ່ຊົນຊາດຈີນສະແຫວງຫາແລະສືບທອດກັນມາຕະຫຼອດໄລຍະເວລາ 5 ພັນກວ່າປີຜ່ານມາ,ໃນສາຍເລືອດຂອງຊົນຊາດຈີນບໍ່ມີແຊນທີ່ຮຸກຮານຄົນອື່ນ ແລະຢາກເປັນເຈົ້າອຳນາດຂອງໂລກ.ພັກກອມມູນິດຈີນໄດ້ເອົາໃຈໃສ່ອະນາຄົດ ແລະຊາຕາກຳຂອງມວນມະນຸດ,ຮ່ວມກັບກຳລັງທຸກຝ່າຍທີ່ກ້າວໜ້າເກາະແຂນກັນກ້າວເດີນໄປໜ້າ, ຈີນເປັນຜູ້ສ້າງສັນຕິພາບໂລກ ຜູ້ປະກອບສ່ວນພັດທະນາໂລກ ແລະ ຜູ້ປົກປ້ອງລະບຽບສາກົນຢ່າງສະເໝີຕົ້ນສະເໝີປາຍ.
ໃນຂະບວນການອອກເດີນທາງຄັ້ງໃໝ່,ພວກເຮົາຕ້ອງຊູຄັນທຸງສັນຕິພາບ ການພັດທະນາ ການຮ່ວມມືແລະຕ່າງຝ່າຍຕ່າງໄດ້ຮັບຜົນປະໂຫຍດ,ປະຕິບັດນະໂຍບາຍການຕ່າງປະເທດທີ່ສັນຕິພາບ ເອກະລາດແລະເປັນເຈົ້າຕົນເອງ,ຍຶດໝັ້ນການເດີນຕາມເສັ້ນທາງ ພັດທະນາໂດຍສັນຕິ,ຊຸກຍູ້ການສ້າງສາຍພົວພັນສາກົນແບບໃໝ່,ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ,ຊຸກຍູ້ການສ້າງ“ໜຶ່ງແລວໜຶ່ງເສັ້ນທາງ”ຮ່ວມກັນໃຫ້ມີຄຸນນະພາບສູງ, ສະໜອງໂອກາດໃໝ່ໃຫ້ກັບໂລກດ້ວຍການພັດທະນາໃໝ່ຂອງຈີນ. ພັກກອມມູນິດຈີນຈະສືບຕໍ່ຮ່ວມກັບປະເທດແລະປະຊາຊົນຜູ້ທີ່ຮັກຫອມສັນຕິພາບ,ເສີມຂະຫຍາຍຄ່ານິຍົມຮ່ວມຂອງມວນມະນຸດ ຄື:ສັນຕິພາບ ການພັດທະນາ ທ່ຽງທຳ ເປັນທຳ ປະຊາທິປະໄຕ ແລະເສລີພາບ, ຈະຍຶດໝັ້ນການຮ່ວມມືກັນ ບໍ່ເປັນປໍລະປັກກັນ, ຈະຍຶດໝັ້ນການເປີດປູຕູສູ່ພາຍນອກ ບໍ່ປິດປະຕູ, ຈະຍຶດໝັ້ນໃນຫຼັກການຕ່າງຝ່າຍຕ່າງໄດ້ຮັບຜົນປະໂຫຍດ ບໍ່ດຳເນີນການແຂ່ງຂັນແບບເຈົ້າໄດ້ຂ້ອຍເສຍ, ຄັດຄ້ານລັດທິເຈົ້າອຳນາດ ແລະ ການເມືອງມະຫາອຳນາດ,ຊຸກຍູ້ຂະບວນປະຫວັດສາດໃຫ້ກ້າວໄປໜ້າສູ່ເປົ້າໝາຍທີ່ສະຫວ່າງສະໄຫວ.
ປະຊາຊົນຈີນແມ່ນປະຊາຊົນທີ່ມັກຄວາມເປັນທຳແລະບໍ່ຢ້ານກົວຄວາມຮຸນແຮງ,ຊົນຊາດຈີນແມ່ນຊົນຊາດທີ່ມີຄວາມພາກພູມໃຈຕໍ່ຊົນຊາດຕົນແລະມີຄວາມໝັ້ນໃຈໃນຕົນເອງທີ່ເຂັ້ມແຂງ. ແຕ່ໃດໆມາ ປະຊາຊົນຈີນກໍບໍ່ເຄີຍຂົ່ມເຫັງ ບີບບັງຄັບ ຫຼື ກົດຂີ່ຂູດຮີດປະຊາຊົນປະເທດອື່ນໃຫ້ເປັນຂ້ອຍຂ້າ,ຈັ່ງຊັ້ນ,ໃນອະດີດບໍ່ເຄີຍເຮັດ,ປັດຈຸບັນກໍ່ບໍ່ໄດ້ເຮັດ ແລະອະນາຄົດກໍ່ຈະບໍ່ເຮັດແບບນັ້ນເດັດຂາດ. ໃນເວລາດຽວກັນ,ປະຊາຊົນຈີນກໍ່ມີຄວາມຕັດສິນໃຈຂັ້ນເດັດຂາດທີ່ບໍ່ອະນຸຍາດໃຫ້ອິດທິກຳລັງພາຍນອກໃດໆເຂົ້າມາຂົ່ມເຫັງ ບີບບັງຄັບຫຼືກົດຂີ່ຂູດຮີດພວກເຮົາໃຫ້ເປັນຂ້ອຍຂ້າ,ຜູ້ໃດຄິດເຮັດແນວນີ້, ຍ່ອມຈະໄດ້ຮັບຜົນຮ້າຍຈົນເລືອດນອງຍ້ອນຈິດໃຈຕໍ່ສູ້ແບບກ້າເສຍສະຫຼະເລືອດເນື້ອຂອງປະຊາຊົນຈີນ1,4 ຕື້ກວ່າຄົນ.
ຖືປະຫວັດສາດເປັນແວ່ນແຍງ,ບຸກເບີກອະນາຄົດ,ຕ້ອງດຳເນີນການຕໍ່ສູ້ທີ່ຍິ່ງໃຫຍ່ທີ່ມີຈຸດພິເສດໃໝ່ດ້ານປະຫວັດສາດຫຼາຍຢ່າງ. ການກ້າຕໍ່ສູ້ ກ້າເອົາໄຊຊະນະ ແມ່ນກຳລັງຈິດໃຈທີ່ເຂັ້ມແຂງຂອງພັກກອມມູນິດຈີນທີ່ບໍ່ມີຝ່າຍໃດສາມາດເອົາຊະນະໄດ້. ຢາກບັນລຸຄວາມໄຝ່ຝັນອັນຍິ່ງໃຫຍ່ໃຫ້ປາກົດເປັນຈິງ ກໍ່ຕ້ອງບຸກບືນສູ້ຊົນຢ່າງອົງອາດກ້າຫານແລະບໍ່ລົດລະ. ປັດຈຸບັນ,ພວກເຮົາພວມຫຍັບເຂົ້າໃກ້ ທັງມີຄວາມໝັ້ນໃຈແລະຄວາມສາມາດຫຼາຍກວ່າເກົ່າເມື່ອປຽບທຽບກັບໄລຍະປະຫວັດສາດທີ່ຜ່ານມາ ທີ່ຈະບັນລຸເປົ້າໝາຍຂອງການເຮັດສຳເລັດໜ້າທີ່ໃນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ,ພ້ອມດຽວກັນນີ້ກໍ່ຕ້ອງກະກຽມໃຫ້ດີດ້ວຍການສຸມຄວາມພະຍາຍາມທີ່ຫຍຸ້ງຍາກລຳບາກກວ່າເກົ່າ.
ໃນຂະບວນການອອກເດີນທາງຄັ້ງໃໝ່,ພວກເຮົາຕ້ອງເພີ່ມທະວີສະຕິລະວັງຕົວ,ຍາມສະໜຸກກໍຕ້ອງຄຳນຶງເຖິງໄພ,ຈັດຕັ້ງປະຕິບັດທັດສະນະຄວາມໝັ້ນຄົງແຫ່ງຊາດໂດຍລວມ,ວາງແຜນຢ່າງເອກະພາບກັນໃນດ້ານການພັດທະນາແລະດ້ານຄວາມໝັ້ນຄົງ,ວາງແຜນຍຸດທະສາດຢ່າງເປັນເອກະພາບກັນເພື່ອຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນໃນສະພາບການປ່ຽນແປງຂອງໂລກທີ່ບໍ່ເຄີຍມີໃນຮອບຮ້ອຍປີຜ່ານມາ, ຮັບຮູ້ຢ່າງເລິກເຊິ່ງຕໍ່ຈຸດພິເສດໃໝ່ແລະຄວາມຮຽກຮ້ອງຕ້ອງການໃໝ່ທີ່ເກີດຂຶ້ນຈາກການປ່ຽນແປງຂອງຄວາມຂັດແຍ້ງຕົ້ນຕໍທີ່ມີຢູ່ໃນສັງຄົມຈີນ,ຮັບຮູ້ຢ່າງເລິກເຊິ່ງຕໍ່ຄວາມຂັດແຍ້ງແລະສິ່ງທ້າທາຍໃໝ່ທ່າມກາງສະພາບແວດລ້ອມສາກົນທີ່ສະຫຼັບສັບຊ້ອນ,ກ້າຕໍ່ສູ້,ຮູ້ວິທີຕໍ່ສູ້,ພົບພູກໍ່ເຮັດເສັ້ນທາງຂ້າມຜ່ານ,ພົບນ້ຳກໍ່ສ້າງຂົວ,ກ້າເອົາຊະນະຄວາມສ່ຽງແລະສິ່ງທ້າທາຍທຸກຢ່າງ!
ຖືເອົາປະຫວັດສາດເປັນແວ່ນແຍງ,ບຸກເບີກອະນາຄົດ,ຕ້ອງເພີ່ມທະວີຄວາມສາມັກຄີຂອງຊົນຊາດຈີນ. ໃນຂະບວນການສູ້ຊົນ100ປີ,ພັກກອມມູນິດຈີນໄດ້ຖືເອົາແນວໂຮມເອກະພາບໄວ້ໃນຖານະສຳຄັນຕະຫຼອດມາ,ໄດ້ປັບປຸງແລະພັດທະນາແນວໂຮມເອກະພາບທີ່ກວ້າງຂວາງກວ່າເກົ່າຢ່າງບໍ່ຢຸດຢັັ້ງ,ເຕົ້າໂຮມຄວາມສາມັກຄີຂອງກຳລັງທຸກຝ່າຍ, ເອົາໃຈໃສ່ປຸກລະດົມປັດໄຈທຸກຢ່າງທີ່ລະດົມໄດ້, ເຕົ້າໂຮມກຳລັງເພື່ອບຸກບືນສູ້ຊົນຮ່ວມກັນໃຫ້ຫຼາຍທີ່ສຸດ. ແນວໂຮມເອກະພາບຮັກຊາດ ແມ່ນເຄັດລັບທີ່ສຳຄັນຂອງພັກກອມມູນິດຈີນໃນການເຕົ້າໂຮມຄວາມສາມັກຄີລູກຫຼານປະຊາຊາດຈີນພາຍໃນແລະຢູ່ໃນໂລກເພື່ອບັນລຸການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ.
ໃນຂະບວນການອອກເດີນທາງຄັ້ງໃໝ່,ພວກເຮົາຕ້ອງຍຶດໝັ້ນຄວາມສາມັກຄີຂະໜາດໃຫຍ່ແລະການປະສານກັນຂະໜາດໃຫຍ່,ຍຶດໝັ້ນການເປັນເອກະພາບກັນລະຫວ່າງຄວາມເປັນອັນໜຶ່ງອັນດຽວກັນແລະຄວາມມີຫຼາກຫຼາຍ,ເພີ່ມທະວີການນຳພາທາງດ້ານການເມືອງແນວຄິດ,ເຕົ້າໂຮມຄວາມຮັບຮູ້ທີ່ເປັນເອກະພາບກັນຢ່າງກວ້າງຂວາງ,ເຕົ້າໂຮມຜູ້ມີຄວາມຮູ້ຄວາມສາມາດທົ່ວໂລກ,ພະຍາຍາມສະແຫວງຫາການສ້າງສະພາບການທີ່ປະຊາຊົນຈີນໃນທົ່ວໂລກຄຶດໃນເລື່ອງດຽວກັນແລະອອກແຮງສູ່ທິດດຽວໃຫ້ປາກົດເປັນຮູບເປັນຮ່າງຂື້ນມາ,ເຕົ້າໂຮມກຳລັງອັນໃຫຍ່ຫຼວງເພື່ອບັນລຸເປົ້າໝາຍໃນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ.
ຖືປະຫວັດສາດເປັນແວ່ນແຍງ,ບຸກເບີກອະນາຄົດ,ຕ້ອງຊຸກຍູ້ໂຄງການໃໝ່ອັນຍິ່ງໃຫຍ່ໃນການກໍ່ສ້າງພັກຢ່າງບໍ່ຢຸດຢັ້ງ. ການກ້າປະຕິວັດຕົນເອງ ເປັນຂີດໝາຍອັນພົ້ນເດັ່ນຂອງພັກກອມມູນິດຈີນທີ່ຕ່າງກັນກັບພັກການເມືອງອື່ນໆ. ພັກກອມມູນິດຈີນພວກເຮົາໄດ້ປະສົບກັບຄວາມຫຍຸ້ງຍາກລຳບາກຕ່າງໆນາໆກໍ່ຍັງມີຊີວິດຊີວາ,ເຫດຜົນທີ່ສຳຄັນທີ່ສຸດກໍ່ແມ່ນພວກເຮົາໄດ້ຍຶດໝັ້ນໃນຫຼັກການໃຫ້ພັກຄຸ້ມຄອງພັກຢ່າງສະເໝີຕົ້ນສະເໝີປາຍ,ປົກຄອງຄຸ້ມຄອງພັກຢ່າງເຄັ່ງຄັດຮອບດ້ານ,ຮັບມືກັບຄວາມສ່ຽງແລະການທົດສອບທີ່ຕົນເອງໄດ້ຜະເຊີນໜ້າໃນໄລຍະປະຫວັດສາດຕ່າງໆຢ່າງບໍ່ຢຸດຢັ້ງ,ຮັບປະກັນໃຫ້ພັກເຮົາສາມາດເດີນໄປໜ້າຢ່າງສະເໝີຕົ້ນສະເໝີປາຍໃນຂະບວນປະຫວັດສາດທີ່ສະພາບການຂອງໂລກມີການປ່ຽນແປງຢ່າງເລິກເຊິ່ງ,ໃນການຮັບມືກັບຄວາມສ່ຽງແລະສິ່ງທ້າທາຍຕ່າງໆນາໆທີ່ມີຢູ່ພາຍໃນປະເທດແລະຕ່າງປະເທດ ຕ້ອງໃຫ້ພັກເຮົາເປັນແກນກາງໃນການນຳພາປະຊາຊົນທົ່ວປະເທດຢ່າງສະເໝີຕົ້ນສະເໝີປາຍ!
ໃນຂະບວນການອອກເດີນທາງຄັ້ງໃໝ່, ພວກເຮົາຕ້ອງຈົດຈຳເຫດຜົນວ່າໃນ “ການຕີເຫຼັກ ຄ້ອນຕີຕົນຕ້ອງແຂງ” ຕ້ອງເພິ່ມທະວີຄວາມຕື່ນຕົວທາງການເມືອງທີ່ວ່າ: ການຄຸ້ມຄອງພັກຢ່າງເຄັ່ງຄັດຮອບດ້ານນັ້ນແມ່ນວຽກງານທີ່ຕ້ອງດຳເນີນຕະຫຼອດໄປ, ຖືເອົາການກໍ່ສ້າງພັກທາງດ້ານການເມືອງເປັນສິ່ງຊີ້ນຳ-ນຳພາ, ສືບຕໍ່ຊຸກຍູ້ໂຄງການໃໝ່ທີ່ຍິ່ງໃຫຍ່ໃນການກໍ່ສ້າງພັກໃນຍຸກສະໄໝໃໝ່, ຮັດແໜ້ນລະບົບການຈັດຕັ້ງຂອງພັກຢ່າງບໍ່ຢຸດຢັ້ງ, ອອກແຮງກໍ່ສ້າງຖັນແຖວພະນັກງານທີ່ມີຄຸນນະພາບສູງທັງມີຄຸນສົມບັດ ແລະ ຄວາມສາມາດສູງ, ເດັດດ່ຽວຊຸກຍູ້ການກໍ່ສ້າງແບບແຜນຂອງພັກ ການປົກຄອງແບບປອດໄສຂາວສະອາດ ແລະ ການຕໍ່ສູ້ຕ້ານການສໍ້ລາດບັງຫຼວງ, ເດັດດ່ຽວຢຸດຢັ້ງທຸກປັດໄຈທີ່ສ້າງຜົນຮ້າຍຕໍ່ລັກສະນະກ້າວໜ້າ ແລະ ຄວາມບໍລິສຸດຂອງພັກ, ດັບສູນເຊື້ອພະຍາດທັງໝົດທີ່ສ້າງຜົນຮ້າຍຕໍ່ຄວາມເຂັ້ມແຂງຂອງພັກ, ຮັບປະກັນໃຫ້ພັກບໍ່ປ່ຽນທາດແທ້, ບໍ່ປ່ຽນສີ ແລະ ບໍ່ປ່ຽໜກິ່ນ, ຮັບປະກັນພັກເປັນແກນນຳທີ່ເຂັ້ມແຂງໃນຂະບວນການປະຫວັດສາດທີ່ຍຶດໝັ້ນ ແລະ ພັດທະນາສັງຄົມນິຍົມທີ່ມີສີສັນພິເສດຂອງຈີນຢ່າງສະເໝີຕົ້ນສະເໝີປາຍ.
ສະຫາຍ ແລະ ເພື່ອນມິດທັງຫຼາຍ!
ພວກເຮົາຕ້ອງຈັດຕັ້ງປະຕິບັດແນວທາງ “ປະເທດດຽວສອງລະບອບ”, “ໃຫ້ຊາວຮົງກົງປົກຄອງຮົງກົງ”, “ໃຫ້ຊາວມາກາວປົກຄອງມາກາວ” ແລະປົກຄອງຕົນເອງໃນລະດັບສູງຢ່າງຮອບດ້ານ ແລະຖືກຕ້ອງ, ຈັດຕັ້ງປະຕິບັດສິດຄຸ້ມຄອງບໍລິຫານຢ່າງຮອບດ້ານຂອງສູນກາງຢູ່ເຂດບໍລິຫານພິເສດຮົງກົງ ແລະມາກາວ, ຈັດຕັ້ງປະຕິບັດກົດໝາຍ ແລະກົນໄກປະຕິບັດງານກ່ຽວກັບການປົກປັກຮັກສາຄວາມໝັ້ນຄົງແຫ່ງຊາດຢູ່ເຂດບໍລິຫານພິເສດ, ຮັກສາອະທິປະໄຕ, ຄວາມໝັ້ນຄົງ ແລະ ຜົນປະໂຫຍດແຫ່ງການພັດທະນາແຫ່ງລັດ, ຮັກສາຄວາມສະຫງົບທາງສັງຄົມດ້ານມະຫາພາກຢູ່ເຂດບໍລິຫານພິເສດ, ຮັກສາຄວາມຈະເລີນຮຸ່ງເຮືອງ ແລະສະຖຽນລະພາບອັນຖາວອນຢູ່ຮົງກົງ ແລະມາກາວ.
ການແກ້ໄຂບັນຫາໄຕ້ຫວັນ ເພື່ອບັນລຸເປົ້າໝາຍທ້ອນໂຮມປະເທດຊາດເປັນເອກະພາບແມ່ນໜ້າທີ່ປະຫວັດສາດອັນເດັດດ່ຽວໜຽວແໜ້ນຂອງພັກກອມມູນິດຈີນ,ແມ່ນຄວາມປາຖະໜາຮ່ວມຂອງປະຊາຊົນທົ່ວປະເທດຈີນ. ຕ້ອງຍຶດໝັ້ນໃນຫຼັກການປະເທດຈີນດຽວ ແລະ ຄວາມຮັບຮູ້ທີ່ເປັນເອກະພາບກັນຂອງເນື້ອໃນຖະແຫຼງການຮ່ວມໃນປີ 1992, ຊຸກຍູ້ຂະບວນການໃຫ້ປະເທດຊາດທ້ອນໂຮມຢ່າງເປັນເອກະພາບໂດຍສັນຕິ. ລູກຫຼານປະຊາຊາດຈີນທັງໝົດ ເຊິ່ງລວມທັງພີ່ນ້ອງຮ່ວມຊາດສອງຝັ່ງຊ່ອງແຄບໄຕ້ຫວັນ, ຕ້ອງຮ່ວມຈິດຮ່ວມໃຈກັນ, ສາມັກຄີກັນຈ້ອງເບິ່ງອະນາຄົດ, ເດັດດ່ຽວທັບມ້າງກົນອຸບາຍທຸກຮູບແບບທີ່ຢາກແບ່ງແຍກໄຕ້ຫວັນເປັນເອກະລາດ, ພ້ອມກັນສ້າງອະນາຄົດດີງາມແລະຈະເລີນຮຸ່ງເຮືອງໃຫ້ກັບປະເທດຊາດ. ຜູ້ໃດກໍຕາມຢ່າປະໝາດການຕັດສິນໃຈອັນເດັດດ່ຽວ ຈິດໃຈອັນເຂັ້ມແຂງ ແລະຄວາມເກັ່ງກ້າສາມາດຂອງປະຊາຊົນຈີນໃນການປົກປັກຮັກສາອະທິປະໄຕ ແລະຜືນແຜ່ນດິນອັນຄົບຖ້ວນຂອງປະເທດຊາດ.
ສະຫາຍ ແລະ ເພື່ອນມິດທັງຫຼາຍ!
ອະນາຄົດຂຶ້ນຢູ່ກັບຊາວໜຸ່ມ, ຄວາມຫວັງມອບໃຫ້ຊາວໜຸ່ມ. 100 ປີກ່ອນ,ຢູ່ປະເທດຈີນທີ່ທັງທຸກຍາກທັງອ່ອນແອ, ຊາວໜຸ່ມກຸ່ມໜຶ່ງໄດ້ຊູທວນໄຟຂອງແນວຄິດລັດທິມາກ, ຊອກຫາເສັ້ນທາງໃຫ້ຊົນຊາດຈີນເພື່ອຟື້ນຟູຄວາມຈະເລີນຮຸ່ງເຮືອງຂອງປະຊາຊົນຈີນດ້ວຍຄວາມທຸກຍາກລຳບາກທີ່ສຸດ. ຜ່ານເວລາ 100 ປີມານີ້, ພາຍໃຕ້ຄັນທຸງຂອງພັກກອມມູນິດຈີນ, ຊາວໜຸ່ມຫຼາຍເຊັ່ນຄົນໄດ້ອຸທິດກຳລັງໜຸ່ມແໜ້ນຂອງຕົນໃຫ້ເຊື່ອມໂຍງເຂົ້າກັບພາກລະກິດຂອງພັກ ແລະ ປະຊາຊົນ, ກາຍເປັນຜູ້ນຳໜ້າພາທາງເພື່ອບັນລຸເປົ້າມາຍໃນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ. ຊາວໜຸ່ມໃນຍຸກສະໄໝໃໝ່ຕ້ອງຖືເອົາການບັນລຸເປົ້າໝາຍໃນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນເປັນໜ້າທີ່ຂອງຕົນ, ເພິ່ມທະວີຄວາມມຸ່ງມາດອັນເດັດດ່ຽວໜຽວແໜ້ນ ແລະ ຄວາມໝັ້ນໃຈໃນຕົນເອງຄົນຈີນ, ບໍ່ເຮັດໃຫ້ຍຸກສະໄໝຜິດຫວັງ, ບໍ່ເຮັດໃຫ້ໄວໜຸ່ມຜິດຫວັງ, ບໍ່ເຮັດໃຫ້ພັກ ແລະ ປະຊາຊົນຜິດຫວັງ!
ສະຫາຍ ແລະ ເພື່ອນມິດທັງຫຼາຍ!
100 ປີກ່ອນ, ໃນເວລາພັກກອມມູນິດຈີນຫາກໍ່ສ້າງຕັ້ງຂຶ້ນມີແຕ່ສະມາຊິກພັກພຽງ 50 ກວ່າຄົນເທົ່ານັ້ນ, ປັດຈຸບັນໄດ້ກາຍເປັນພັກກຳອຳນາດທີ່ມີສະມາຊິກຫຼາຍທີ່ສຸດໃນໂລກ ຄ: 95 ລ້ານກວ່າຄົນ, ສາມາດນຳພາປະເທດໃຫຍ່ທີ່ມີປະຊາກອນ 1,4 ຕື້ຄົນ ແລະ ມິອິດທິພົນຕໍ່ໂລກຫຼາຍທີ່ສຸດ.
100 ປີກ່ອນ, ຢູ່ໃນເວທີໂລກ ຊົນຊາດຈີນທຸກຍາກ ແລະ ອ່ອນແອທີ່ສຸດ. ປັດຈຸບັນ, ຊົນຊາດຈີນໃຫ້ໂລກໄດ້ເຫັນເຖິງຄວາມຊີວິດຊີວາຢ່າງແທ້ຈິງ, ປະເທດຈີນພວມກ້າວໄປສູ່ຄວາມຈະເລີນຮຸ່ງເຮືອງອັນຍິ່ງໃຫຍ່ດ້ວຍບາດກ້າວທີ່ບໍ່ມີໃຜສາມາດຢຸດຢັ້ງໄດ້.
ໃນ 100 ປີທີ່ຜ່ານມາ, ພັກກອມມູນິດຈີນໄດ້ໃຫ້ໃບຄຳຕອບທີ່ດີງາມແກ່ປະຊາຊົນ ແລະ ປະຫວັດສາດ. ປັດຈຸບັນ, ພັກກອມມູນິດຈີນກໍ່ໄດ້ສືບຕໍ່ເຕົ້າໂຮມສາມັກຄີ ແລະ ນຳພາປະຊາຊົນຈີນເດີນຜ່ານການທົດສອບຂອງໄລຍະທາງເພື່ອບັນລຸເປົ້າໝາຍສູ້ຊົນຮ້ອຍປີປະການທີສອງ.
ສະມາຊິກພັກກອມມູນິດຈີນທັງຫຼາຍ! ຄະນະກຳມະການສູນກາງພັກໄດ້ມີຂໍ້ສະເໜີຮຽກຮ້ອງໃຫ້ທຸກທ່ານ ຕ້ອງຈື່ຈຳອຸດົມການແຕ່ຫົວທີ, ເດັດດ່ຽວຍຶດໝັ້ນອຸດົມການ, ປະຕິບັດຕາມຈຸດປະສົງຂອງພັກ, ສືບຕໍ່ຮັດແໜ້ນສາຍພົວພັນກັບປະຊາຊົນແບບກາຍອີນຊີຕະຫຼອດໄປ, ຄິດນຳປະຊາຊົນ ເຮັດວຽກຮ່ວມກັບປະຊາຊົນຕະຫຼອດໄປ, ຮ່ວມຈິດຮ່ວມໃຈ ຮ່ວມທຸກຮ່ວມສຸກ, ສືບຕໍ່ປະຕິບັດໜ້າທີ່ຢ່າງບໍ່ລົດລະເພື່ອເຮັດໃຫ້ຄວາມມຸ່ງຫວັງຂອງປະຊາຊົນທີ່ຢາກມີຊີວິດການເປັນຢູ່ທີ່ດີງາມປາກົດຜົນເປັນຈິງ, ພະຍາຍາມສ້າງກຽດຕິຍົດໃຫ້ຫຼາຍກວ່າເກົ່າເພື່ອພັກ ແລະ ປະຊາຊົນ.
ສະຫາຍ ແລະ ເພື່ອນມິດທັງຫຼາຍ!
ພັກກອມມູນິດຈີນມີອຸດົມການສ້າງພາລະກິດອັນຍິ່ງໃຫຍ່ຖາວອນຂອງຊົນຊາດຈີນ, ເວລາຮ້ອຍປີພໍດີແມ່ນໄລຍະທີ່ດີງາມ! ເມື່ອຄິດອະດີດ ແລະ ຈ້ອງເບິ່ງອະນາຄົດ ສາມາດເຫັນໄດ້ວ່າ, ເມື່ອມີການນຳພາທີ່ໝັ້ນໜຽວຂອງພັກກອມມູນິດຈີນ ແລະ ມີຄວາມສາມັກຄີທີ່ສະໜິດແໜ້ນຂອງປະຊາຊົນບັນດາເຜົ່າທົ່ວປະເທດຈີນແລ້ວ ເປົ້າໝາຍທີ່ສ້າງປະເທດສັງຄົມນິຍົມທີ່ທັນສະໄໝຮອບດ້ານນັ້ນກໍ່ຍ່ອມຈະບັນລຸຜົນເປັນຈິງໄດ້, ຄວາມໃຝ່ຝັນເພື່ອບັນລຸເປົ້າໝາຍໃນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນກໍ່ຍ່ອມຈະບັນລຸຜົນເປັນຈິ່ງໄດ້!
ພັກກອມມູນິດຈີນທີ່ຖືກຕ້ອງ, ມີກຽດສະຫງ່າ ແລະ ຍິ່ງໃຫຍ່ໝັ້ນຍືນ!
ປະຊາຊົນຈີນວິລະຊົນທີ່ມີກຽດສະຫງ່າ ແລະ ຍິ່ງໃຫຍ່ໝັ້ນຍືນ!
ຄຳເຫັນ
0