ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນລະດູຮ້ອນເດືອນກໍລະກົດ, ພໍດີແມ່ນລະດູການເຮັດນາ. ທ້າວ ເຟີງຈ້ຽນເຫວີຍ ທີ່ຕາກແດດຈົນຜິວດຳກ່ຳກຳລັງຂັບລົດໄຖນາ ໄຖນາຢູ່, ນົກຍາງຂາວບິນຜ່ານທ້ອງຟ້າເປັນຝູງໆ, ທັງໝົດ ເຫຼົ່ານີ້ຄືພາບ “ໄຖ່ນາໃນລະດູຮ້ອນ” ທີ່ມີຊີວິດຊີວາທີ່ສຸດ.
ທ້າວ ເຟີງຈ້ຽນເຫວີຍ ປີນີ້ອາຍຸໄດ້ 35 ປີ, ລາວໄດ້ລາອອກຈາກອາຊີບ “ຄໍເສື້ອຂາວ” (ຫຼື ພະນັກງານທີ່ເຮັດວຽກດ້ວຍສະໝອງ), ແລ້ວກັບເມືອບ້ານເກີດຂອງຕົນ ທີ່ບ້ານໂຈປູ້, ເມືອງ ນານຫຼັງ, ນະຄອນຈົ່ງຊ່ານ, ແຂວງກວາງຕຸ້ງ ເພື່ອເຮັດນາຈົນກາຍເປັນ “ຊາວນາລຸ້ນໃໝ່” ຜູ້ໜຶ່ງ, ເບິ່ງຄືວ່າບຶດດຽວ ແຕ່ເວລາໄດ້ຜ່ານໄປ 9ປີແລ້ວ. ຕອນທຳອິດ, ລາວ ແລະ ພໍ່ ມີນາພຽງແຕ່ສອງສາມເຮັກຕາເທົ່ານັ້ນ, ແຕ່ມາຮອດດຽວນີ້ ໄດ້ເພີ່ມຂຶ້ນຮອດ 11 ເຮັກຕາແລ້ວ, ໜຶ່ງເຮັກຕາສາມາດໃຫ້ຜົນຜະລິດໄດ້ປະມານ 7.500 ກິໂລ.
ນອກຈາກການປູກເຂົ້າແລ້ວ, ທ້າວ ເຟີງຈ້ຽນເຫວີຍ ຍັງໄດ້ເຮັດຫຼາຍໂຄງການສຳລັບ ນັກທ່ອງທ່ຽວເຊັ່ນ: ຕຶກເບັດ ຫາກຸ້ງ ເຮັດບາບີຄິວ ແລະອື່ນໆ, ເຊິ່ງສາມາດດຶງດູດນັກທ່ອງທ່ຽວທີ່ມາຈາກເຂດສາມຫຼ່ຽມປາກແມ່ນ້ຳຈູ່ຈ່ຽງໄດ້ຈຳນວນບໍ່ໜ້ອຍ.
ທ້າວ ເຟີງຈ້ຽນເຫວີຍ ເວົ້າວ່າ: “ການເຮັດໄຮ່ໄຖນາເຮັດໃຫ້ຂ້າພະເຈົ້າຮູ້ສຶກດີໃຈຫຼາຍ.” ລາວໄດ້ເຮັດກະສິກຳແບບປະສົມຄື: “ປູກເຂົ້າ ແລະ ລ້ຽງກຸ້ງຢູ່ໃນນາ”, “ປູກເຂົ້າແລະ ລ້ຽງເປັດ ຢູ່ໃນນາ”, ລາວໄດ້ປູກເຂົ້າປອດສານພິດ ເຊິ່ງຂາຍໄດ້ລາຄາດີຫຼາຍໃນຕະຫຼາດ. ປີໜຶ່ງມີລາຍໄດ້ເຖິງ 1 ແສນກວ່າຢວນ.
ບ້ານໂຈປູ້ມີປະຫວັດສາດຍາວນານ, ເປັນບ້ານເກີດຂອງບັນພະບຸລຸດດຣ. ຊູນຢັດຊຽນ. ທ່ານ ລິນຊີ້ງປ່ຽວ ເລຂາຄະນະພັກບ້ານໂຈປູ້ໄດ້ແນະນຳໃຫ້ຮູ້ວ່າ: ແຕ່ກ່ອນຢູ່ບ້ານໂຈປູ້ມີປະຊາຊົນທີ່ອາໄສຢູ່ບ້ານເປັນປະຈຳ 2 ພັນກວ່າຄົນ. ໃນໄລຍະຕົ້ນຂອງການປະຕິຮູບ ແລະ ເປີດປະຕູສູ່ພາຍນອກ, ຊາວໜຸ່ມຈຳນວນບໍ່ໜ້ອຍ ໄດ້ອອກຈາກບ້ານໄປເຮັດທຸລະກິດ ຫຼື ເຮັດວຽກຢູ່ຕ່າງຖິ່ນ, ສະນັ້ນ ໃນບ້ານແຫ່ງນີ້ຈຶ່ງເຫຼືອແຕ່ 1 ພັນກວ່າຄົນ.
ແຕ່ໃນຊຸມປີມໍ່ໆມານີ້, ພາຍໃຕ້ການສະໜັບສະໜູນຈາກຍຸດທະສາດການສ້າງຊົນນະບົດໃຫ້ຈະເລີນຮຸ່ງເຮືອງ, ຢູ່ເມືອງນານຫຼັງນະຄອນຈົ່ງຊ່ານ ເລີ່ມມີຊາວໜຸ່ມນັບມື້ນັບຫຼາຍຂຶ້ນ ກັບເມືອບ້ານເກີດເພື່ອເພີ່ມພະລັງແຮງໃໝ່ເຂົ້າໃນການພັດທະນາບ້ານເກີດຂອງຕົນໃຫ້ມີຊີວິດຊີວາ.
ຢູ່ແຄມທົ່ງນາທີ່ບ້ານໂຈປູ້, ມີຫໍສະໝຸດທີ່ເຮັດດ້ວຍແກ້ວຫຼັງໜຶ່ງ ເປັນພາບທີ່ສະດຸດຕາ ໃນຍາມທີ່ແສງຕາເວັນສາດສ່ອງ. ຫໍສະໝຸດແຫ່ງນີ້ສ້າງຂຶ້ນໂດຍອີງຕາມຫົວຄິດຂອງທ້າວ ຊູຍເຈ່ຍເຈ ຊາວໜຸ່ມທີ່ກັບມາຈາກຕ່າງປະເທດຜູ້ເກີດຫຼັງປີ 1995.
ທ້າວ ຊູຍເຈ່ຍເຈ ເວົ້າວ່າ: “ຂ້າພະເຈົ້າເຕີບໃຫຍ່ຂຶ້ນຢູ່ບ້ານນີ້, ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງວ່າ ການເຂົ້າຮຽນຂອງເດັກນ້ອຍໃນຊົນນະບົດ ບໍ່ແມ່ນເລື່ອງງ່າຍ, ສະນັ້ນ ຕົນເອງຈຶ່ງຫວັງຢາກສ້າງພື້ນທີ່ສາທາລະນະສຳລັບເຂົາເຈົ້າໄດ້ອ່ານໜັງສື.”
ທ້າຍເດືອນພະຈິກປີ 2019, ພໍແຕ່ຫໍສະໝຸດທີ່ເຮັດດ້ວຍແກ້ວຫຼັງນີ້ຫາກໍ່ເປີດບໍລິການ ກໍ່ມີຄົນເຂົ້າມາໃຊ້ບໍລິການຈົນເຕັມໝົດ. ນອກຈາກເດັກນ້ອຍຂອງບ້ານນີ້ແລ້ວ, ຍັງມີນັກທ່ອງທ່ຽວຕ່າງແຂວງທີ່ເດີນທາງມາທ່ຽວຍ້ອນໄດ້ຍິນຊື່ສຽງຂອງຫໍສະໝຸດ. ຕໍ່ມາທ້າວ ຊູຍເຈ່ຍເຈ ຍັງໄດ້ເປີດຫ້ອງອ່ານປຶ້ມ ແລະ ຮ້ານອາຫານຫຼັງໃໝ່, ນອກນີ້ຍັງໄດ້ຮົບເໝົາໂຄງການກໍ່ສ້າງ “ຫ້ອງຮຽນ 430” ຂອງອົງການປົກຄອງເມືອງ ໂດຍມີນັກສຶກສາທີ່ພັກລະດູຮ້ອນແລ້ວກັບເມືອຢາມບ້ານເປັນຜູ້ຊ່ວຍສອນເດັກນ້ອຍຫລັງເລີກຮຽນໃນຕອນແລງ 4:30
ທ້າວ ຊູຍເຈ່ຍເຈ ເວົ້າວ່າ: “ເວົ້າສຳລັບຂ້າພະເຈົ້າແລ້ວ, ມັນບໍ່ພຽງແຕ່ເປັນວຽກງານເທົ່ານັ້ນ, ຍັງແມ່ນຄວາມປາຖະໜາຂອງພວກເຮົາທີ່ຢາກສ້າງບ້ານໃຫ້ສວຍງາມ.”
ທ້າວ ໂລເຈ່ຍຮາວ ແມ່ນຊາວໜຸ່ມຜູ້ເກີດຫຼັງຊຸມປີ 2000 ທີ່ຮຽນການອອກແບບສິ່ງພິມຢູ່ມະຫາວິທະຍາໄລກະສິກຳຮວານານ, ລາວກັບເມືອບ້ານໂຈປູ້ໃນເດືອນມິຖຸນາປີກາຍ, ພ້ອມກັບເອື້ອຍຄີງທີ່ຮຽນອອກແບບເຊັ່ນດຽວກັນນັ້ນ ເປີດ “ຮ້ານກາເຟຕົ້ນໄມ້” ຮ້ານໜຶ່ງ.
ຮອດລະດູທ່ອງທ່ຽວ, ຮ້ານກາເຟນ້ອຍໆແຫ່ງນີ້ສາມາດຂາຍກາເຟໄດ້ເຖິງສອງສາມຮ້ອຍຈອກຕໍ່ມື້. ຈາກອົງການປົກຄອງເມືອງຈົນຮອດຄະນະບ້ານ ລ້ວນແຕ່ໄດ້ໃຫ້ການສະໜັບສະໜູນຊາວໜຸ່ມຜູ້ສ້າງທຸລະກິດດ້ວຍຕົນເອງ, ຕົ້ນທຶນເປີດຮ້ານກາເຟຂອງເຂົາເຈົ້າຕ່ຳຫຼາຍເມື່ອທຽບໃສ່ຢູ່ເມືອງໃຫຍ່.
ທ້າວ ໂລເຈ່ຍຮາວ ເວົ້າວ່າ: “ການມີຫົວຄິດປະດິດສ້າງຫຼາຍຢ່າງ ແມ່ນມາຈາກເວລາທີ່ ພວກເຮົາລົມກັນ. ຊາວໜຸ່ມທີ່ຮ່ວມເຮັດທຸລະກິດຢູ່ບ້ານໄດ້ສ້າງບັນຍາກາດ ແລະ ໃຫ້ກຳລັງໃຈກັນ.”
ເພື່ອເປັນການຕອບບຸນແທນຄຸນບ້ານເກີດ, ສອງເອື້ອຍນ້ອງ ໄດ້ນຳໃຊ້ທ່າແຮງຂອງຕົນ, ໄດ້ອອກແບບປຶ້ມຮູບພາບໂຄສະນາໃຫ້ກັບບ້ານ ເພື່ອໃຫ້ຄົນນັບມື້ນັບຫລາຍຮູ້ຊື່ສຽງຂອງບ້ານເກີດ.
ແຕ່ກ່ອນ, ໜ່ວຍພັກຮາກຖານແມ່ນອ່ອນແອບໍ່ໜັກແໜ້ນ, ສະມາຊິກພັກສ່ວນຫຼາຍເປັນຜູ້ມີອາຍຸສູງ. ປັດຈຸບັນ, ມີຊາວໜຸ່ມນັບມື້ນັບຫຼາຍພວມກາຍເປັນກຳລັງຫຼັກແຫຼ່ງໃນການຄຸ້ມຄອງບ້ານ. ທ້າວ ເຟີງຈ້ຽນເຫວີຍ ໄດ້ເຂົ້າເປັນສະມາຊິກພັກໃນປີກາຍນີ້, ສ່ວນປີນີ້ ທ້າວ ຊູຍເຈ່ຍເຈ ກໍໄດ້ຍື່ນໃບຄຳຮ້ອງຂໍເຂົ້າເປັນສະມາຊິກພັກກອມມູນິດເຊັ່ນກັນ.
ເມື່ອຍ່າງເຂົ້າສູ່ເຂດຊຸມຊົນຫຢົງນີງເມືອງສຽວຫຼານນະຄອນຈົ່ງຊ່ານ, ກໍ່ເຫັນຖະໜົນຫົນທາງ ກວ້າງໃຫຍ່ທັງສະອາດ, ລົດແລ່ນໄປມາບໍ່ຂາດສາຍ, ຕຶກອາຄານເກີດຂຶ້ນຫລາຍປານດອກເຫັດ. ໃນໄລຍະຕົ້ນຂອງການສະຖາປະນາປະເທດຈີນໃໝ່, ທ່ານ ຫຼີຮ້ານຈ່າງ ເລຂາຄະນະພັກຊຸດທຳອິດຂອງເຂດຫຢົງນີງ ກໍໄດ້ນຳພາປະຊາຊົນທົ່ວບ້ານພັດທະນາເສດຖະກິດລວມໝູ່, ຊາວບ້ານກໍ່ເລີ່ມຮັ່ງມີຂຶ້ນ, ໃນຕົ້ນຊຸມປີ 1980 ໝົດບ້ານມີລາຍໄດ້ຫຼາຍກວ່າ 10 ລ້ານຢວນ. ປີນີ້, ເຂດຊຸມຊົນຫຢົງນີງໄດ້ມີຄະນະພັກທີ່ໜຸ່ມກວ່າໝູ່ໃນປະຫວັດສາດ ໃນນັ້ນມີຊາວໜຸ່ມຜູ້ເກີດຫຼັງປີ 1980 ສອງຄົນແລະຊາວໜຸ່ມຜູ້ເກີດຫຼັງປີ 1990 ສອງຄົນ.
ທ່ານ ອູຈື້ຊ່າງ ຮອງເລຂາຄະນະພັກເຂດຊຸມຊົນຫຢົງນີງທີ່ມີອາຍຸ 38 ປີກ່າວວ່າ: “ພວກເຮົາຈະໃຊ້ແນວຄວາມຄິດໃໝ່ ແລະ ທັດສະນະຄະຕິໃໝ່ໃນການຄຸ້ມຄອງ, ເພື່ອໃຫ້ສອດຄ່ອງກັບຍຸກໃໝ່ ແລະ ຮັບມືກັບສິ່ງທ້າທາຍໃໝ່ໃຫ້ໄດ້ດີກວ່າເກົ່າ, ນຳພາເຂດຫຢົງນີງສືບຕໍ່ເດີນຕາມເສັ້ນທາງສ້າງຄວາມຮັ່ງມີພ້ອມກັນ.”
ໃນໄລຍະເລືອກຕັ້ງຄະນະນຳປະຈຳບ້ານຊຸດໃໝ່ໃນປີ 2021, ມີຊາວໜຸ່ມຜູ້ດີເດັ່ນຈຳນວນໜຶ່ງທີ່ມີຄວາມສາມາດ, ມີແນວຄວາມຄິດໃໝ່, ຢາກສ້າງພາລະກິດ ແລະ ມີອາຍຸຕ່ຳກວ່າ 30 ປີໄດ້ຖືກຄັດເລືອກເຂົ້າໃນຄະນະນຳຂອງບ້ານ ແລະ ເຂດຊຸມຊົນ, ເພື່ອສ້າງເປັນກຳລັງແຮງສຳຮອງໃຫ້ແກ່ພາລະກິດການສ້າງຊົນນະບົດໃຫ້ຈະເລີນຮຸ່ງເຮືອງ.
ຜູ້ຮັບຜິດຊອບທີ່ກ່ຽວຂ້ອງຂອງເມືອງນານຫຼັງເວົ້າວ່າ: “ຊາວໜຸ່ມເປັນຄວາມຫວັງຂອງການສ້າງຊົນນະບົດໃຫ້ຈະເລີນຮຸ່ງເຮືອງ.” ເມື່ອຊາວໜຸ່ມກັບຄືນບ້ານເກີດເພື່ອໄປພັດທະນາ, ໄດ້ສ້າງຮູບແບບການພັດທະນາເສດຖະກິດຊົນນະບົດໃຫ້ອຸດົມສົມບູນຂຶ້ນ, ອັນໄດ້ສ້າງຄວາມສີວິໄລໃຫ້ກັບຊົນນະບົດ ກໍຄືທຸກໆຄອບຄົວ.
ຄຳເຫັນ
0