ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເພິ່ນ, ແມ່ນຄົນອັດສະຈັນຕາມການເລົ່າລືກັນໃນປະຫວັດສາດກິລາແລ່ນ ແລະລານຂອງຈີນ. ສະຖິຕິກິລາແລ່ນໄວ 100 ແມັດທົ່ວປະເທດຈີນທີ່ເພິ່ນເຮັດມານັ້ນ ໄດ້ຮັກສາສະຖິຕິໄວ້ໄດ້ເປັນເວລາ 25 ປີ.
ເພິ່ນ, ແມ່ນຄົນອັດສະຈັນຕາມການເລົ່າລືກັນໃນປະຫວັດສາດງານກິລາໂອລິມປິກ. ເຖິງວ່າເພິ່ນບໍ່ເຄີຍໄດ້ຮັບຫລຽນລາງວັນໃນງານກິລາໂອລິມປິກກໍຕາມ, ແຕ່ເພິ່ນພັດເປັນຜູ້ເລີ່ມຕົ້ນປະຫວັດສາດທີ່ປະເທດໜຶ່ງເຂົ້າຮ່ວມງານກິລາໂອລິມປິກ.
ເພິ່ນ, ແມ່ນທ່ານ ລິວຊາງຊຸ່ນ ນັກກິລາແລ່ນໄວຂອງປະເທດຈີນ.
ວັນທີ 30 ກໍລະກົດ ປີ 1932, ກໍຄືມື້ນີ້ໃນ 89 ປີກ່ອນ, ທ່ານ ລິວຊາງຊຸ່ນ ໄດ້ເຂົ້າຮ່ວມງານກິລາໂອລິມປິກຄັ້ງທີ 10 ທີ່ຈັດຂຶ້ນຢູ່ນະຄອນລອສເອັນເຈີລິສປະເທດອາເມຣິກາ, ເຊິ່ງເປັນນັກກິລາຈີນຜູ້ທຳອິດທີ່ເຂົ້າຮ່ວມງານກິລາໂອລິມປິກຢ່າງເປັນທາງການ. ໃນພິທີເປີດ, ທ່ານລິວຊາງຊຸ່ນໄດ້ຊູທຸງຊາດຈີນຂຶ້ນຢ່າງສະຫງ່າງາມ, ຍ່າງເຂົ້າສະໜາມກິລາຮ່ວມກັບນັກກິລາທີ່ມາຈາກ 36 ປະເທດ ທ່າມກາງສາຍຕາຂອງຊາວໂລກ. ທຸງຊາດຈີນໄດ້ປິວສະປັດຢູ່ສະໜາມກິລາສາກົນ, ສຳລັບຈີນແລ້ວເປັນຄັ້ງທຳອິດ, ສຳລັບໂລກແລ້ວກໍມີຈີນເຂົ້າຮ່ວມເປັນຄັ້ງທຳອິດເຊັ່ນກັນ.
ປະເທດຈີນໃນເວລານັ້ນ ຍັງມີສົງຄາມເກີດຂຶ້ນບໍ່ເຊົາ, ເສດຖະກິດຊຸດໂຊມລົງ, ງົບປະມານລັດຖະບານຂາດເຂີນຢ່າງໜັກໜ່ວງ, ສະນັ້ນ, ຈຶ່ງຕັດສິນໃຈບໍ່ເຂົ້າຮ່ວມງານກິລາໂອລິມປິກ. ແຕ່ວົງການຕ່າງໆໃນສັງຄົມຈີນ ໄດ້ຊ່ວຍບໍລິຈາກເງິນຈຳນວນ 1500 ໂດລາເພື່ອສະໜັບສະໜູນທ່ານລິວຊາງຊຸ່ນໄດ້ເຂົ້າຮ່ວມງານກິລາໂອລິມປິກ. ພາຍຫລັງງານກິລາໂອລິມປິກສິ້ນສຸດລົງ, ທ່ານລິວຊາງຊຸ່ນບໍ່ມີເງິນເຫລືອໃນຖົງເລີຍ, ພາຍໃຕ້ການບໍລິຈາກຂອງຊາວຈີນຕ່າງດ້າວທີ່ອາໄສຢູ່ອາເມຣິກາຈຶ່ງສາມາດກັບປະເທດຈີນໄດ້.
ທ່ານລິວຊາງຊຸ່ນໄດ້ເຂົ້າຮ່ວມງານກິລາໂອລິມປິກເປັນ 2 ຄັ້ງ. ຄັ້ງທຳອິດຄືປີ 1932, ທ່ານເດີນທາງເປັນເວລາ 21 ວັນແລ້ວ, ຍັງບໍ່ທັນໄດ້ປັບໂຕໃຫ້ເຂົ້າກັບເວລາທ້ອງຖິ່ນ, ກໍເຂົ້າຮ່ວມການແຂ່ງຂັນເລີຍ, ສະພາບສຸຂະພາບກໍຍັງເພຍຢູ່, ພາຍຫລັງເຂົ້າຮ່ວມການແຂ່ງຂັນແລ່ນ 100 ແມັດ ແລະ 200 ແມັດແລ້ວ, ເພິ່ນບໍ່ສາມາດເຂົ້າຮ່ວມການແຂ່ງຂັນແລ່ນ 400 ແມັດໄດ້. ຄັ້ງທີ 2 ຄືປີ 1936, ທ່ານເດີນທາງທາງທະເລເປັນເວລາ 28 ວັນ, ທ່ານລິວຊາງຊຸ່ນໄດ້ພົບກັບສະພາບການທີ່ຄ້າຍຄືກັນນີ້, ທ່ານບໍ່ສາມາດຜ່ານເຂົ້າຮອບຍ້ອນສະພາບສຸຂະພາບຍັງບໍ່ເຕັມຮ້ອຍ.
ເຖິງວ່າບໍ່ສາມາດຂຶ້ນເວທີຮັບຫລຽນຂອງງານກິລາໂອລິມປິກຈັກເທື່ອກໍຕາມ, ແຕ່ຈິດໃຈທີ່ກ້າເຂົ້າຮ່ວມການແຂ່ງຂັນ ແລະບຸກບືນສູ້ຊົນຂອງທ່ານລິວຊາງຊຸ່ນ ໄດ້ສ່ອງແສງໃຫ້ເຫັນເຖິງມົນສະເໜ່ຂອງງານກິລາໂອລິມປິກ, ທັງສ່ອງແສງໃຫ້ເຫັນເຖິງຄວາມໝາຍທີ່ປະເທດທີ່ນັບມື້ນັບຫລາຍຂຶ້ນເຂົ້າຮ່ວມງານກິລາໂອລິມປິກ.
ຄຳເຫັນ
0