ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກົມການເມືອງສູນກາງພັກກອມມູນິດຈີນໄດ້ຈັດກອງປະຊຸມໃນວັນທີ 30 ກໍລະກົດນີ້, ເພື່ອຄົ້ນຄວ້າສະພາບເສດຖະກິດໃນປັດຈຸບັນ ແລະຈັດວາງແຜນການວຽກງານເສດຖະກິດໃນຫົກເດືອນທ້າຍປີນີ້. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເປັນປະທານຂອງກອງປະຊຸມຄັ້ງນີ້.
ທີ່ປະຊຸມເຫັນວ່າ: ນັບແຕ່ຕົ້ນປີນີ້ມາ, ເສດຖະກິດຈີນໄດ້ສືບຕໍ່ຟື້ນຟູຢ່າງໝັ້ນທ່ຽງ, ມາດຕະການປະຕິຮູບແລະເປີດປະຕູສູ່ພາຍນອກໄດ້ມີຄວາມເຂັ້ມແຂງຫຼາຍຂຶ້ນ, ຊີວິດການເປັນຢູ່ຂອງປະຊາຊົນໄດ້ມີການຮັບປະກັນຢ່າງມີປະສິດທິຜົນ, ການພັດທະນາດ້ວຍຄຸນນະພາບສູງໄດ້ຮັບຜົນສຳເລັດອັນໃໝ່, ສະພາບສັງຄົມໄດ້ຮັກສາຄວາມໝັ້ນຄົງໂດຍລວມ. ຄັນຢາກເຮັດວຽກງານເສດຖະກິດໃນຫົກເດືອນທ້າຍປີນີ້ໃຫ້ດີ, ຄວນຮັກສານະໂຍບາຍມະຫາພາກໃຫ້ມີລັກສະນະຕໍ່ເນື່ອງ,ໝັ້ນທ່ຽງແລະຍືນຍົງ, ຄວນຍົກສູງປະສິດທິພາບຂອງນະໂຍບາຍການເງິນທີ່ຕັ້ງໜ້າ, ໃນການປະຕິບັດນະໂຍບາຍເງິນຕາທີ່ໝັ້ນທ່ຽງ ຄວນຮັກສາສະພາບຄ່ອງຂອງເງິນຕາໃຫ້ມີຄວາມພຽງພໍຢ່າງສົມເຫດສົມຜົນ, ເຮັດໃຫ້ອັດຕາແລກປ່ຽນເງິນຢວນຈີນສາມາດຮັກສາຄວາມໝັ້ນທ່ຽງໄດ້ໂດຍພື້ນຖານໃນລະດັບດຸນດ່ຽງແລະສົມເຫດສົມຜົນ.
ທີ່ປະຊຸມໄດ້ວາງຂໍ້ຮຽກຮ້ອງຕ່າງໆ ເຊິ່ງລວມທັງການເພີ່ມຄວາມເຂັ້ມແຂງໃນການດຳເນີນການປະຕິຮູບ, ຍຶດໝັ້ນໃນການເປີດປະຕູສູ່ພາຍນອກໃນລະດັບສູງ, ຍຶດໝັ້ນໃນການຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ພັດທະນາດ້ວຍຄຸນນະພາບສູງ, ປະຕິບັດວຽກງານກ່ຽວກັບການເຮັດໃຫ້ການລະບາຍກາກບອນດີອົກຊິດເຖິງຈຸດສູງສຸດແລະການປອດການປ່ອຍກາກບອນດີອົກຊິດໃຫ້ເປັນເອກະພາບກັນແລະເປັນລະບຽບ. ວາງແຜນການດຳເນີນງານກ່ຽວກັບການບັນລຸເປົ້າໝາຍໃຫ້ການລະບາຍກາກບອນດີອົກຊິດເຖິງຈຸດສູງສຸດກ່ອນປີ2030 ໂດຍໄວ ແລະອື່ນໆ. ໃນຂະນະດຽວກັນ, ທີ່ປະຊຸມຍັງໄດ້ເນັ້ນໜັກວ່າຕ້ອງຮັບປະກັນຊີວິດການເປັນຢູ່ຂອງປະຊາຊົນແລະການຜະລິດຢ່າງປອດໄພໃຫ້ດີ, ປະຕິບັດການປ້ອງກັນແລະຄວບຄຸມພະຍາດໂຄວິດ-19 ໃຫ້ມີປະສິດທິຜົນຢ່າງບໍ່ລົດລະ, ສືບຕໍ່ຊຸກຍູ້ວຽກງານສັກວັກຊີນໃຫ້ປະຊາຊົນ ເປັນຕົ້ນ.
ຄຳເຫັນ
0