ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຢູ່ເມືອງຊິ່ນຮວ້າ, ແຂວງຮູນານ, ປະເທດຈີນ ມີຫໍລະນຶກໂລເຊີ້ງຈ້ຽວແຫ່ງໜຶ່ງ ເຊິ່ງສ້າງຂຶ້ນເພື່ອລະນຶກເຖິງທ້າວ ໂລເຊີ້ງຈ້ຽວ ນັກຮົບອາສາສະໝັກປະຊາຊົນຈີນທີ່ເສຍສະຫຼະຊີວິດເພື່ອກອບກູ້ຊີວິດເດັກນ້ອຍເກົາຫຼີທີ່ຕົກນ້ຳໃນໄລຍະສົງຄາມຊ່ວຍເຫລືອເກົາຫຼີຕ້ານການຮຸກຮານຂອງອາເມຣິກາ.
ທ້າວ ໂລເຊີ້ງຈ້ຽວ ເກີດຢູ່ໃນຄອບຄົວຊາວນາທີ່ທຸກຍາກທີ່ເມືອງຊິ່ນຮວ້າໃນປີ 1931. ໃນປີ 1949, ຕອນທີ່ລາວອາຍຸໄດ້ 18 ປີ ກໍ່ໄດ້ເຂົ້າເປັນທະຫານໃນກອງທັບປົດປ່ອຍປະຊາຊົນຈີນດ້ວຍອຸດົມການອັນບໍລິສຸດຜຸດຜ່ອງເພື່ອປ້ອງກັນປະເທດຊາດ. ປີ 1950, ໂດຍຕອບສະໜອງຕາມຄວາມຮຽກຮ້ອງຂອງພັກ ແລະ ລັດຖະບານຈີນ, ລາວໄດ້ເຂົ້າຮ່ວມສົງຄາມຊ່ວຍເຫລືອເກົາຫຼີຕ້ານການຮຸກຮານຂອງອາເມຣິກາ, ໂດຍກຽມພ້ອມຢູ່ທຸກເວລາເພື່ອເສຍສະຫຼະທຸກສິ່ງຢ່າງຂອງຕົນເພື່ອສັນຕິພາບແລະຄວາມສະຫງົບຂອງປະຊາຊົນເກົາຫຼີ. ລາວສູ້ຮົບຢ່າງອົງອາດກ້າຫານ, ໄດ້ຮັບການຍ້ອງຍໍຫຼາຍຄັ້ງຫລາຍເທື່ອ.
ຢູ່ເກົາຫຼີ ທ້າວ ໂລເຊີ້ງຈ້ຽວ ໄດ້ເຫັນກັບຕາເຖິງການກໍ່ໂທດກຳຂອງພວກຈັກກະພັດອາເມຣິກາທີ່ມີຕໍ່ປະຊາຊົນເກົາຫຼີ, ລາວຈຶ່ງມີຄວາມອີນດູສົງສານປະຊາຊົນເກົາຫຼີຢ່າງເລິກເຊິ່ງ. ມິດຕະພາບຄວາມຮັກແພງອັນເລິກເຊິ່ງຂອງປະຊາຊົນເກົາຫຼີທີ່ມີຕໍ່ກອງທັບອາສາສະໝັກຈີນ ຍິ່ງເຮັດໃຫ້ ໂລເຊີ້ງຈ້ຽວ ຊາບຊຶ້ງໃຈຫຼາຍ. ມີເທື່ອໜຶ່ງ, ກອງທະຫານໄດ້ເຄື່ອນທັບໃນຕອນກາງຄືນທີ່ຝົນຕົກໜັກປົນໝາກເຫັບ, ຄວາມມືດຈົນບໍ່ເຫັນຮອດມື, ແຕ່ມີແມ່ເຖົ້າຊາວເກົາຫຼີຄົນໜຶ່ງ ໄດ້ແຂ່ງຝົນຢືນຢູ່ຂ້າງທາງ, ຈັບໂຄມໄຟເຍືອງທາງໃຫ້ນົກຮົບທັງຫຼາຍ, ທັງເຕືອນນັກຮົບໃຫ້ລະວັງຂຸມຂີ້ຕົມ. ໂລເຊີ້ງຈ້ຽວ ຄຶດວ່າ ມີແຕ່ການກະທຳຕົວຈິງທີ່ຕໍ່ສູ້ກັບສັດຕູ ແລະສ້າງຄຸນງາມຄວາມດີເທົ່ານັ້ນ ຈຶ່ງສາມາດຕອບແທນຄວາມຮັກແພງອັນເລິກເຊິ່ງຂອງປະຊາຊົນເກົາຫຼີໄດ້. ນອກຈາກເຮັດຫລອນໜ້າທີ່ຂອງຕົນແລ້ວ, ລາວຍັງໄດ້ສົ່ງອາຫານໃຫ້ນັກຮົບແລະຊ່ວຍຊີວິດຄົນເຈັບຢູ່ແນວໜ້າທ່າມກາງແປວໄຟສົງຄາມເລື້ອຍໆ. ມີມື້ໜຶ່ງ, ບ້ານເທິງພູດອຍຢູ່ຂ້າງປ້ອມເຝົ້າສັງເກດຂອງກອງຮ້ອຍຕົນ ໄດ້ຖືກເຮືອບິນທະຫານອາເມຣິກາຖິ້ມລະເບີດໃສ່, ລາວໄດ້ແລ່ນແຂ່ງໝື້ລະເບີດ ແລະ ຄວັນໄຟທີ່ກຳລັງລຸກແຮງ ຟ້າວເຂົ້າໄປຊ່ວຍຊີວິດແມ່ເຖົ້າ ແລະ ເດັກນ້ອຍຊາວເກົາຫຼີສອງຄົນ.
ວັນທີ 2 ມັງກອນປີ 1952, ທ້າວ ໂຊຍຢີງ ແລະໝູ່ເດັກນ້ອຍຊາວເກົາຫຼີ 4 ຄົນ ໄດ້ຫຼິ້ນສະກີຢູ່ເທິງນ້ຳກ້າມຕາມທຳມະຊາດ, ແຕ່ໂຊຍຢີງບໍ່ທັນລະວັງ ຈຶ່ງຕົກລົງຂຸມນ້ຳກ້າມທີ່ເລິກ 2,7 ແມັດ. ເມື່ອໄດ້ຍິນສຽງຮ້ອງຂໍຄວາມຊ່ວຍເຫຼືອ ທ້າວ ໂລເຊີ້ງຈ້ຽວ ທີ່ກຳລັງຝຶກໂຍນລູກລະເບີດຢູ່ແຄມແມ່ນ້ຳນັ້ນ ທັງແລ່ນທັງແກ້ເສື້ອກັນໜາວອອກ ແລະ ໂດດລົງຂຸມນ້ຳກ້າມທັນທີ.ເຖິງວ່າລາວສາມາດຊູໃຫ້ ໂຊຍຢີງ ພົ້ນຂຶ້ນໜ້ານ້ຳກ້າມໄດ້ຫຼາຍເທື່ອ, ແຕ່ຍ້ອນໜ້ານ້ຳກ້າມບາງໂພດ, ເມື່ອຍົກຂຶ້ນໄດ້ແລ້ວ ນ້ຳກ້າມກໍ່ແຕກແຫງ ແລ້ວກໍ່ຕົກລົງໄປອີກ. ສຸດທ້າຍ ລາວຈຶ່ງດຳນ້ຳລົງໄປອີກ, ອອກແຮງສຸດຂີດໃຊ້ຫົວແລະບ່າໄຫຼ່ດັນ ທ.ໂຊຍຢີງ ໃຫ້ພົ້ນຂຶ້ນໜ້ານ້ຳເພື່ອໃຫ້ລາວລອດຊີວິດ, ແຕ່ໜ້າເສົ້າໃນຕອນນັ້ນ ໂລເຊີ້ງຈ້ຽວ ພັດເສຍຊີວິດຍ້ອນໝົດແຮງ, ເວລານັ້ນ ລາວຫາກໍ່ມີອາຍຸໄດ້ພຽງ 21 ປີເທົ່ານັ້ນ. ສ.ປ.ປ.ເກົາຫຼີໄດ້ມອບຫຼຽນໄຊທຸງຊາດລະດັບ 1 ແລະ ຫຼຽນກຽດຕິຍົດນັກຮົບລະດັບ 1 ໃຫ້ລາວ. ທ່ານພົນເອກ ກິມອິນຊຸງ ຜູ້ບັນຊາການສູງສຸດກອງທັບເກົາຫຼີໄດ້ຂຽນຄຳຈາລຶກຍ້ອງຍໍຢູ່ເທິງອະນຸສາວະລີໂລເຊີ້ງຈ້ຽວວ່າ: “ນ້ຳໃຈລັດທິສາກົນຂອງໂລເຊີ້ງຈ້ຽວຈະຢູ່ຮ່ວມກັບປະຊາຊົນເກົາຫຼີຊົ່ວນິລັນດອນ”.
ເມື່ອເວລາຜ່ານໄປ 50 ປີ, ຈິດໃຈເສຍສະຫຼະຊີວິດຕົນເອງເພື່ອຊ່ວຍກອບກູ້ຊີວິດຄົນອື່ນແບບນີ້ ໄດ້ສືບຕໍ່ຜັນຂະຫຍາຍຢູ່ປະເທດຈີນໃໝ່ຢ່າງຕໍ່ເນື່ອງ.
ທ້າວໂຈ່ວໂປ່ ເກີດໃນປີ 1987, ເປັນຊາວກຳແພງນະຄອນຈຸ່ງກິ່ງ. ໃນທ້າຍປີ 2016 ລາວມີອາຍຸໄດ້ 19 ປີ, ໄດ້ເຂົ້າເປັນທະຫານກອງທັບປົດປ່ອຍປະຊາຊົນຈີນ, ຕໍ່ມາເປັນທະຫານສັງກັດກອງທະຫານປ້ອງກັນນະຄອນຫຼວງປັກກິ່ງ.
ຕອນບ່າຍວັນທີ 14 ກຸມພາປີ 2008, ອາກາດໜາວເຢັນຫຼາຍ. ທ້າວໂຈ່ວໂປ່ ແລະ ທ້າວລີວປິ່ງເຮີງ ໝູ່ຮ່ວມຮົບນຳກັນ ໄດ້ປະຕິບັດໜ້າທີ່ປ້ອງກັນຄວາມປອດໄພຢູ່ນອກກຳແພງສະໜາມຝຶກແອບຕາມຄຳສັ່ງ. ຢູ່ຂ້າງສະໜາມ ມີສະໃຫຍ່ແຫ່ງໜຶ່ງ, ທ້າວ ຈ່າງກົວຊວ້ຍ ແລະ ທ້າວກ່າວຮ້າວ ນັກຮຽນມ.3 ຂອງບ້ານຊວີຊິ່ນ ກຳລັງພາກັນຫຼິ້ນຢູ່ເທິງໜ້ານ້ຳກ້າມ, ແຕ່ນ້ຳກ້າມພັດແຕກແຫງກະທັນຫັນ, ເຮັດໃຫ້ສອງຄົນຕົກລົງນ້ຳທັນທີ.
ເມື່ອໄດ້ຍິນສຽງຮ້ອງຂໍຄວາມຊ່ວຍເຫຼືອ, ທ້າວ ໂຈ່ວໂປ່ ແລະ ທ້າວ ລີວປີ່ງເຮີງ ກໍ່ໄດ້ແລ່ນໄປສູ່ບ່ອນເກີດເຫດ ແລະໂດດລົງຂຸມນ້ຳກ້າມໂດຍບໍ່ຄຶດເຖິງຄວາມປອດໄພຂອງຕົນ. ໃນເວລາເຂົາເຈົ້າສອງຄົນຊູຈ່າງກົວຊວ້ຍໃຫ້ພົ້ນໜ້ານ້ຳໄດ້ແລ້ວ, ແຕ່ໜ້ານ້ຳກ້າມພັດແຕກ ແລະ ພັງລົງອີກ ເດັກນ້ອຍກໍ່ຕົກລົງນ້ຳອີກ. ຕອນນີ້ ຄວາມເຢັນຂອງນ້ຳປານເອົາມີດແທງກະດູກ, ໂຈ່ວໂປ່ແລະ ລີວປິ່ງເຮີງ ອອກແຮງສຸດຂີດຫຼາຍເທື່ອ ຈຶ່ງສາມາດຊູໃຫ້ ຈ່າງກົວຊວ້ຍ ຂຶ້ນຈາກຂຸມນ້ຳກ້າມໄດ້. ເວລານັ້ນ ໂຈ່ວໂປ່ໄດ້ສະມັກນ້ຳຢ່າງແຮງ. ລີວປີ່ງເຮີງ ເຫັນແບບນັ້ນ, ກໍ່ຟ້າວໃຊ້ມືຊ້າຍຊູທ້າວກ່າວຮ້າວ, ໃຊ້ມືຂວາຈັບເສື້ອໂຈ່ວໂປ່. ແຕ່ ໂຈ່ວໂປ່ ຫລຸດຈາກມືຂອງ ລີວປີ່ງເຮີງ ແລະເວົ້າວ່າ: “ບໍ່ຕ້ອງຫ່ວງເຮົາ, ຊ່ວຍເດັກນ້ອຍກ່ອນ..”
ຫຼັງຮູ້ຂ່າວແລ້ວ, ໝູ່ຮ່ວມຮົບແລະປະຊາຊົນທ້ອງຖິ່ນກໍ່ຟ້າວແລ່ນມາ ຊ່ວຍຊີວິດເດັກນ້ອຍສອງຄົນແລະນັກຮົບສອງຄົນ. ເວລານັ້ນ ໂຈ່ວໂປ່ ໄດ້ສະຫຼົບໄປ, ເຖິງວ່າໄດ້ພະຍາຍາມຊ່ວຍກອບກູ້ຊີວິດເຕັມຄວາມສາມາດແລ້ວ ແຕ່ກໍບໍ່ໄດ້ຜົນ, ຈົນລາວເສຍຊີວິດໄປແບບໂຊກບໍ່ຊ່ວຍ. ເດັກນ້ອຍທີ່ຕົກນ້ຳສອງຄົນ ສາມາດຊ່ວຍຊີວິດໄວ້ໄດ້, ແຕ່ທ້າວໂຈ່ວໂປ່ພັດເສຍຊີວິດໃນເວລາທີ່ລາວຫາກໍ່ມີອາຍຸໄດ້ພຽງ 21 ປີ.
ນັກຮົບຜູ້ເສຍສະຫຼະຊີວິດເພື່ອປະຊາຊົນ, ປະຊາຊົນຈະໄວ້ອາໄລຢ່າງສຸດຊື້ງ. ພິທີສົ່ງສະການໂຈ່ວໂປ່ ໄດ້ຈັດຂຶ້ນຢູ່ນະຄອນຫຼວງປັກກິ່ງ, ປະຊາຊົນເກືອບໝື່ນຄົນ ບໍ່ພຽງແຕ່ບໍລິຈາກເງິນໃຫ້ຄອບຄົວຂອງລາວເທົ່ານັ້ນ, ທັງເປັນເຈົ້າການຮ່ວມກັນຈັດພິທີສົ່ງສະການໃຫ້ວິລະຊົນຄົນກ້າ, ພວງມາລາ ຄະຕິຄູ່ ແລະດອກໄມ້ສົດເພື່ອໄວ້ອາໄລທະຫານໂຈ່ວໂປ່ ໄດ້ວາງໄວ້ຕາມທາງທີ່ມີຄວາມຍາວເກືອບ 1 ກິໂລແມັດ. ເມື່ອຮອດຕອນຄ່ຳຍາມບຸນເຂົ້າໜົມບົວລອຍປີນັ້ນ, ປະຊາຊົນ 600 ກວ່າຄົນໄດ້ໄຕ້ທຽນເພື່ອໄວ້ອາໄລໂຈ່ວໂປ່ຢູ່ແຄມສະທີ່ລາວເສຍຊີວິດ.
ນັກຮົບຈີນ ເປັນຜູ້ປົກປ້ອງທີ່ໝັ້ນຄົງເຂັ້ມແຂງກວ່າໝູ່ໃນໃຈຂອງປະຊາຊົນຕະຫຼອດມາ, ທັງເປັນຄົນທີ່ໜ້າຮັກກວ່າໝູ່ໃນສາຍຕາຂອງປະຊາຊົນ! ທ້າວ ໂຈ່ວໂປ່ ໄດ້ເຮັດແທ້ທຳຈິງ ເພື່ອປະຕິບັດຕາມຄຳປະຕິຍານຂອງຕົນທີ່ຂຽນໄວ້ໃນໃບຮ້ອງຂໍເຂົ້າເປັນສະມາຊິກພັກກອມມູນິດຈີນ,ວິລະກຳຂອງລາວ ໄດ້ສ່ອງແສງໃຫ້ເຫັນເຖິງຈິດໃຈສູ້ຮົບທີ່ກ້າເສຍສະຫຼະຊີວິດ ແລະ ຄຸນນະທຳອັນສູງສົ່ງທີ່ໄດ້ປະກອບສ່ວນໂດຍບໍ່ເຫັນແກ່ຕົວຂອງນັກຮົບທີ່ເກີດໃນຊຸມປີ 1980 ຂອງຈີນ,ນີ້ໄດ້ສ່ອງແສງໃຫ້ເຫັນເຖິງຈິດໃຈອຸທິດຕົນເພື່ອປະຊາຊົນໂດຍບໍ່ເອົາຫົວຊານຳຄວາມເປັນຄວາມຕາຍຂອງຕົນ, ນັກຮົບຄົນນີ້ໄດ້ຮັບກຽດຕິຍົດວ່າເປັນ “ຄົນແບບຢ່າງທີ່ກ້າຫານເພື່ອຄວາມເປັນທຳຂອງປະເທດຈີນ”.
ຄຳເຫັນ
0