ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 25 ກໍລະກົດປີ 2021, ຢູ່ສະໜາມຍົກນ້ຳໜັກຂອງງານກິລາໂອລິມປິກໂຕກຽວ ກຳລັງມີການແຂ່ງຂັນຊີງຫລຽນຄຳຍົກນ້ຳໜັກລຸ້ນ 67 ກິໂລເພດຊາຍ ລະຫວ່າງທ້າວ ເຊີ້ນລີ້ຈວີ່ນ ນັກກິລາຈີນ ກັບທ້າວ ລູອິສ ຈາເວີ ມົສແຄວຣາ ໂລຊາໂນ ນັກກິລາຂອງໂກລົມບີ.
ເມື່ອການແຂ່ງຂັນໃນທ່າສະແນັດເລີ່ມຂຶ້ນ, ທ້າວ ເຊີ້ນລີ້ຈວີ່ນ ຂຶ້ນເວທີກ່ອນ, ລາວສາມາດຍົກນ້ຳໜັກໄດ້ 145 ກິໂລແບບງ່າຍໆ. ຄູ່ແຂ່ງຂັນຕົ້ນຕໍຂອງເຊີ້ນລີ້ຈວີ່ນແມ່ນທ້າວ ມົສແຄວຣາ, ລາວໄດ້ຂຶ້ນເວທີຕາມຫຼັງເຊີ້ນລີ້ຈວີ່ນ ແລະ ສາມາດຍົກນ້ຳໜັກເທື່ອທຳອິດໄດ້ 148 ກິໂລ ເຊິ່ງຍົກໄດ້ຫລາຍກວ່າ ເຊີ້ນລີ້ຈວີ່ນ 3 ກິໂລ. ຄູເຝິກແລະທ່ານໝໍຂອງທີມຊາດໂກລົມບີ ກໍ່ພາກັນຕົບມືດັງສະໜັ່ນດ້ວຍຄວາມປິຕິຊົມຊື່ນ.
ຍ້ອນຜະເຊີນກັບຄວາມກົດດັນຢ່າງແຮງ, ທ້າວ ເຊີ້ນລີ້ຈວີ່ນ ບໍ່ສາມາດຜ່ານການຍົກນ້ຳໜັກໃນເທື່ອທີສອງ ແລະ ທີສາມໄດ້. ສ່ວນທ້າວ ມົສແຄວຣາ ພັດສາມາດຍົກໄດ້ເຖິງ 151 ກິໂລໃນການຍົກເທື່ອທີສອງ ເຊິ່ງລື່ນກາຍເຊີ້ນລີ້ຈວີ່ນ 6 ກິໂລ. ເວລານີ້, ຄູເຝິກ ແລະ ທ່ານໝໍຂອງທີມຊາດໂກລົມບີ ແຮ່ງຕົບມືດັງຂຶ້ນກວ່າເກົ່າ, ເບິ່ງແລ້ວຄືວ່າ ນັກຍົກນ້ຳໜັກໂກລົມບີ ຈະເປັນຜູ້ຄວ້າເອົາຫຼຽນຄຳໄດ້ແນ່ນອນ.
ທ້າວ ເຊີ້ນລີ້ຈວີ່ນ ປີນີ້ອາຍຸໄດ້ 28 ປີແລ້ວ, ເກີດຢູ່ເມືອງອ່ານຮວ້າແຂວງຮູນານທາງພາກກາງຕອນໃຕ້ຂອງຈີນ, ພໍ່ຂອງລາວເປັນຄົນທັງສູງທັງກ້າມໃຫຍ່, ແມ່ນຄົນທີ່ແຂງແຮງຫຼາຍທີ່ໃຜໆໃນບໍລິເວນເຮືອນໃກ້ຄຽງຮູ້ດີ. ປີ 2003, ທີມຍົກນ້ຳໜັກຂອງໂຮງຮຽນກິລາເດັກນ້ອຍເຍົາວະຊົນທ້ອງຖິ່ນໄດ້ຮັບສະໝັກນັກຮຽນໃໝ່, ເຊີ້ນລີ້ຈວີ່ນທີ່ມີອາຍຸໄດ້ 10 ປີໃນຄາວນັ້ນ ເປັນຄົນທີ່ມີພະລະກຳລັງຫລາຍ ຈຶ່ງຖືກຄູເຝິກຮັບເຂົ້າທີມຍົກນ້ຳໜັກ.
ຊີວິດການເປັນຢູ່ໃນໂຮງຮຽນກິລາລຳບາກຫຼາຍ, ແຕ່ເຊີ້ນລີ້ຈວີ່ນພັດເປັນຄົນທີ່ອົດທົນຕໍ່ຄວາມລຳບາກໄດ້ເປັນພິເສດ. ໃນຍາມເຝິກຊ້ອມແຕ່ລະມື້ ລາວຈະໄປຮອດໄວກວ່າໝູ່ ແລະ ເລີກຊ້າກວ່າຄົນອື່ນ. ແຕ່ລະມື້ຕ້ອງເຝິກຍົກນ້ຳໜັກຂຶ້ນລົງຫຼາຍຮ້ອຍເທື່ອ, ການຝຶກແບບນີ້ ທັງບໍ່ມ່ວນ ທັງເມື່ອຍຫຼາຍແທ້ໆ, ແຕ່ເຊີ້ນລີ້ຈວີ່ນພັດບໍ່ເບື່ອແມ່ນແຕ່ໜ້ອຍດຽວ, ຮູ້ແຕ່ວ່າພະຍາຍາມຝຶກຈົນສຸດຄວາມສາມາດເພື່ອໃຫ້ໄດ້ຄະແນນດີ.
ການທຸ້ມເທເຫື່ອແຮງຢູ່ບ່ອນໃດ ຜົນສຳເລັດກໍຕ້ອງເກີດຂຶ້ນຢູ່ບ່ອນນັ້ນ. ປີ 2010, ເຊີ້ນລີ້ຈວີ່ນທີ່ມີອາຍຸໄດ້ 17 ປີໃນຄາວນັ້ນ ໄດ້ແຊັມໃນງານແຂ່ງຂັນຍົກນ້ຳໜັກຊາວໜຸ່ມໂລກ; ປີ 2013 ເຊີ້ນລີ້ຈວີ່ນໄດ້ແຊັມອີກໃນງານແຂ່ງຂັນຍົກນ້ຳໜັກໂລກ; ປີ 2015, ເຊີ້ນລີ້ຈວີ່ນສາມາດຮັກສາແຊັມໃນລາຍການແຂ່ງຂັນຍົກນ້ຳໜັກໂລກ ທັງສາມາດທຸບສະຖິຕິໂລກໃນລາຍ ການນີ້ໄດ້ອີກ.
ປີ 2016, ຍ້ອນຄວ້າແຊັມໄດ້ຫຼາຍລາຍການ, ທ້າວ ເຊີ້ນລີ້ຈວີ່ນ ໄດ້ເຂົ້າຮ່ວມລາຍການແຂ່ງຂັນຍົກນ້ຳໜັກໃນງານກິລາໂອລິມປິກຣີໂອເດີຈາເນໂຣທີ່ປະເທດບຣາຊີນ. ເມື່ອຮອດມື້ຊີງແຊັມມາເຖິງ, ຊາວບ້ານທັງຫຼາຍພາກັນນັ່ງຢູ່ໜ້າຈໍໂທລະພາບຂອງຄອບຄົວເຊີ້ນຢ່າງໃຈຈົດ ໃຈຈໍ່ເພື່ອເບິ່ງການຄວ້າແຊັມຂອງເຊີ້ນລີ້ຈວີ່ນ.
ແຕ່ໜ້າເສຍດາຍ ເຊີ້ນລີ້ຈວີ່ນພັດຍົກນ້ຳໜັກບໍ່ຜ່ານຍ້ອນອາການບາດເຈັບ. ເມື່ອຊາວບ້ານທັງນ້ອຍໃຫຍ່ຍິງຊາຍທີ່ພາກັນນັ່ງເບິ່ງການຖ່າຍທອດສົດທາງໂທລະພາບເຫັນຕອນນີ້ແລ້ວ ໃຜໆກໍປາກບໍ່ອອກ. ເວລານັ້ນ ໂທລະສັບມືຖືຂອງແມ່ເຊີ້ນລີ້ຈວິ່ນດັງຂຶ້ນ, ລາວບອກກັບແມ່ດ້ວຍສຽງເບົາໆປານຍຸງບິນຜ່ານວ່າ: “ຂໍໂທດ, ຂໍໂທດເດີແມ່..”
ຈາກຣີໂອເດີ ຈາເນໂຣ ເດີນທາງກັບຄືນປະເທດແລ້ວ, ເຊີ້ນລີ້ຈວີ່ນ ໄດ້ຕັ້ງໜ້າເຝິກຊ້ອມຢ່າງໜັກເພື່ອເປົ້າໝາຍຍາດເອົາຫຼຽນຄຳໂອລິມປິກທີ່ຄວນເປັນຂອງຕົນເອງນັ້ນ ໃນງານກິລາໂອລິມປິກໂຕກຽວ 2020.
ເມື່ອຮອດວັນທີ 25 ກໍລະກົດປີ 2021 ຢູ່ສະໜາມຍົກນ້ຳໜັກຂອງງານກິລາໂອລິມປິກໂຕກຽວ, ການຊີງແຊັມລຸ້ນ 67 ກິໂລເພດຊາຍ, ທ້າວ ເຊີ້ນລີ້ຈວີ່ນ ໄດ້ຕາມຫລັງຄູ່ແຂ່ງຂັນເຖິງ 6 ກິໂລນັ້ນ ໄດ້ຜະເຊີນກັບສິ່ງທ້າທາຍອີກຄັ້ງໜຶ່ງສຳລັບຄວາມຝັນຫຼຽນຄຳງານກິລາໂອລິມປິກ.
ໃນການແຂ່ງຂັນຍົກນ້ຳໜັກໃນທ່າຄລີນແອນເຈີກໃນບາດຕໍ່ໄປ, ທ້າວ ມົສແຄວຣາ ຄູ່ແຂ່ງຂັນຕົ້ນຕໍຂອງເຊີ້ນລີ້ຈວີ່ນ ກໍເຮັດໄດ້ດີຄືເກົ່າ, ໃນການຍົກເທື່ອທີສອງ ລາວຍັງສາມາດຍົກໄດ້ຫຼາຍກວ່າເຊີ້ນລີ້ຈວີ່ນ 11 ກິໂລ! ທີມຊາດໂກລົມບີ ເລີ່ມຄຶກຄື້ນ ແລະ ກຽມສະຫຼອງໄຊຊະນະລ່ວງໜ້າແລ້ວ. ເພາະວ່າ ຕາມທຳມະດາແລ້ວ, ນ້ຳໜັກຕາມຫລັງເຖິງ 11 ກິໂລ, ເປັນເລື້ອງຍາກ ທີ່ຈະເອົາຊະນະໄດ້.
ທ້າວ ເຊີ້ນລີ້ຈວີ່ນ ຍັງມີໂອກາດຍົກສອງເທື່ອ, ລາວຈະສາມາດພິກສະຖານະການນີ້ໄດ້ຫຼືບໍ່?
ໃນການຍົກເທື່ອທີສອງ, ທ້າວ ເຊີ້ນລີ້ຈວີ່ນ ຂໍຍົກນ້ຳໜັກ 187 ກິໂລ ເຊິ່ງລາວບໍ່ເຄີຍທົດລອງຍົກຈັກເທື່ອ! ຖ້າວ່າຍົກໄດ້ສຳເລັດ, ກໍ່ຈະສາມາດພິກກັບມາເປັນຝ່າຍຍົກນ້ຳໜັກໄດ້ ຫລາຍກວ່າທ້າວ ມົສແຄວຣາ 1 ກິໂລ!
ເວລານີ້ ສຽງທີ່ເຄີຍຟົດສະໜັ່ນໃນສະໜາມກິລາງຽບລົງທັນທີ. ເຫັນແຕ່ ທ້າວ ເຊີ້ນລີ້ຈວິ່ນ ຍ່າງຂຶ້ນເວທີດ້ວຍບາດກ້າວໜັກແໜ້ນ ແລະຮ້ອງຂຶ້ນຢ່າງແຮງບາດໜຶ່ງ, ແລ້ວຍົກຄານນ້ຳໜັກ ຂຶ້ນຢ່າງໝັ້ນທ່ຽງ. ດອກໄຟຂາວຂອງຄະນະກຳມະການ 3 ດອກໄດ້ຮຸ່ງຂຶ້ນໝົດ, ໝາຍຄວາມວ່າ ການຍົກຂອງລາວສຳເລັດ. ພ້ອມກັນນັ້ນ ກໍເປັນການສ້າງສະຖິຕິໃໝ່ສຳລັບງານກິລາໂອລິມປິກໂຕກຽວ!
ທ້າວ ເຊີ້ນລີ້ຈວີ່ນ ວາງຄານນ້ຳໜັກລົງພື້ນເວທີຢ່າງແຮງ, ແລ້ວຊີ້ນິ້ວມືເບື້ອງຂວາຂຶ້ນຟ້າ, ເພື່ອສະແດງໃຫ້ເຫັນວ່າຕົນເອງມີຄວາມສາມາດເໜືອໝູ່. ເວລານັ້ນ ຄູເຝິກທີມຊາດຈີນກໍແລ່ນຂຶ້ນເວທີອຸ້ມເຊີ້ນລີ້ຈວີ່ນຂຶ້ນທັນທີ.
ຈາກນັ້ນ, ສຽງເພງຊາດຈີນໄດ້ດັງຂຶ້ນຢູ່ສະໜາມກິລາໂອລິມປິກໂຕກຽວ.
ມື້ທີສອງ, ທ້າວ ເຊີ້ນລີ້ຈວີ່ນ ໄດ້ກົດເຂົ້າມິນິບຣອັກຂອງຕົນທີ່ບໍ່ໄດ້ຂຽນຂໍ້ຄວາມຫຍັງມາ ສອງປີແລ້ວ ໂດຍຂຽນປະໂຫຍກໜຶ່ງວ່າ: “ນີ້ແມ່ນນ້ຳໃຈຍົກນ້ຳໜັກຂອງທີມຊາດຈີນ. ສາມາດ ພິກສະຖານະການທີ່ເສຍປຽບມາເປັນແຊັມ, ຊາຕາກຳຂອງຂ້າພະເຈົ້າຂຶ້ນກັບຂ້າພະເຈົ້າເອງ ຫາກບໍ່ແມ່ນຂຶ້ນກັບເທວະດາຟ້າແຖນ!”
ຄຳເຫັນ
0