ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຢູ່ແຂວງຮູນານປະເທດຈີນ, ມີສະຖານທີ່ແຫ່ງໜຶ່ງຢູ່ສ່ວນເລິກຂອງເຂດພູດອຍ ແຕ່ມີທິວທັດທຳມະຊາດສວຍງາມຫຼາຍ, ສະຖານທີ່ແຫ່ງນີ້ກໍຄືເມືອງປົກຄອງຕົນເອງເຜົ່າມົ້ງເຊີງປູ້, ມັນຫ່າງຈາກນະຄອນຫຼວງປັກກິ່ງ 1.800 ກວ່າກິໂລແມັດ. ເຈົ້າເມືອງເຊີງປູ້ ຊື່ວ່າ ທ່ານ ລີວຊູ່ຈິ່ນ, ຜູ້ທີ່ສຸຂຸມຮອບຄອບຄົນໜຶ່ງທີ່ເກີດຫຼັງປີ 1980. ທ່ານ ລີວຊູ່ຈວິ່ນ ແມ່ນພະນັກງານຈາກກະຊວງການຄ້າຈີນທີ່ລົງກໍ່ສ້າງຮາກຖານຢູ່ແຫ່ງນີ້, ທ່ານໜຸ່ມແໜ້ນດີ, ແຂງແຮງດີ, ທັງມີສະຕິປັນຍາ ສະຫລາດຫລັກແຫລມ, ເມື່ອມາສ້າງຮາກຖານຢູ່ເມືອງເຊີງປູ້ໄດ້ສອງປີປາຍ ທ່ານກໍ່ໄດ້ໄປທັດສະນະ ສຶກສາຢູ່ທຸກບ້ານທຸກຕາແສງຂອງເມືອງນີ້ ຈົນວ່າລື້ງກັບຊາວບ້ານທັງຫຼາຍເປັນຢ່າງດີ.
ແຕ່ສອງສາມມື້ຜ່ານມາ, ທ່ານ ລີວຊູ່ຈິ່ນ ພັດກັງວົນນຳເລື່ອງໜຶ່ງທີ່ສຸດ, ເລື່ອງນັ້ນແມ່ນຫຍັງຮູ້ບໍ? ນັ້ນກໍຄື ການຊ່ວຍເຫຼືອຊາວບ້ານທັງຫຼາຍໃຫ້ພົ້ນອອກຈາກຄວາມທຸກຍາກ ແລະ ສ້າງຄວາມຮັ່ງມີຂຶ້ນ, ທ່ານ ລີວຊູ່ຈວິ່ນ ໄດ້ພະຍາຍາມຄຶດຫາວິທີເຊີນນາງ ເວີ່ຍຫຢາ ນັກໂຄສະນາຂາຍສິນຄ້າທາງອິນເຕີເນັດທີ່ມີຊື່ສຽງໂດ່ງດັງຢູ່ຈີນ ໃຫ້ມາຊ່ວຍຊາວບ້ານເມືອງເຊີງປູ້ຂາຍເຄື່ອງ. ທີມງານຂອງນາງ ເວີ່ຍຫຢາ ເຫັນດີມາຕາມຄຳເຊີນ ເຊິ່ງແມ່ນເລື່ອງບໍ່ງ່າຍປານໃດ! ຕອນທຳອິດ ລີວຊູ່ຈີ່ນ ມີຄວາມໝັ້ນໃຈຫຼາຍ, ໂດຍໄດ້ແນະນຳສິນຄ້າທີ່ດີໆຈຳນວນໜຶ່ງຂອງເມືອງ ເຊີງປູ້ໃຫ້ກັບທີມງານຂອງນາງເວີ່ຍຫຢາຮູ້, ພໍແຕ່ເລີ່ມຕົ້ນ ທີມງານຂອງນາງ ເວີ່ຍຫຢາ ກໍປະຕິເສດສິນຄ້າຢ່າງໜຶ່ງທີ່ທ່ານ ລິວຊູ່ຈວິ່ນ ຄິດວ່າດີທີ່ສຸດ. ກ່ອນ ໜ້ານີ້ ທ່ານ ລີວຊູ່ຈວິ່ນ ໄດ້ສຸມຄວາມພະຍາຍາມຫຼາຍທີ່ສຸດໃນການຜະລິດສິນຄ້າຊະນິດນີ້ ຈົນຄິດວ່າ ຢາກຈະອາໄສສິນຄ້າຊະນິດນີ້ເພື່ອຂະຫຍາຍຕະຫຼາດໄປທົ່ວປະເທດໄດ໋!.
ຜະລິດຕະພັນທີ່ລີວຊູ່ຈວິ່ນໃຫ້ຄວາມສຳຄັນທີ່ສຸດນັ້ນກໍ່ແມ່ນ ໄກ່ລາດຈ້ານໂຕ້ ທີ່ມີຊື່ສຽງທີ່ສຸດຂອງເມືອງເຊີງປູ້. ໄກ່ຊະນິດນີ້ລ້ຽງຢູ່ບ້ານຈິ່ນທົງຊ່ານ, ເຊິ່ງເປັນບ້ານທີ່ມີພູມສັນຖານເປັນພູກວ້າງໃຫຍ່, ສ່ວນດິນນາດິນສວນພັດບໍ່ຫຼາຍ, ຊາວຊ້ານໄດ້ລ້ຽງໄກ່ລາດໃນຈຳນວນຫຼວງຫຼາຍຕາມສະພາບຕົວຈິງຂອງບ້ານຕົນ ພາຍໃຕ້ການນຳພາຂອງອົງການປົກຄອງທ້ອງຖິ່ນ. ໄກ່ຈ້ານໂຕ້ຊະນິດນີ້ ມີຮູບຮ່າງໃຫຍ່, ແຂງແຮງດີ, ຊີ້ນໄກ່ທັງແໜ້ນ ທັງບໍ່ຄ່ອຍມີໄຂມັນ, ກິນແລ້ວສາມາດໃຫ້ໂປຼຕີນທີ່ມີຄຸນນະພາບສູງແກ່ຮ່າງກາຍຄົນເຮົາ, ທັງບໍ່ຕ້ອງເປັນຫ່ວງວ່າກິນແລ້ວ ຮ່າງ ກາຍຈະໄດ້ຮັບໄຂມັນຫຼາຍ, ມັນຈຶ່ງສອດຄ່ອງກັບຄວາມນິຍົມຂອງຄົນຈີນ ໃນຍຸກ ປະຈຸບັນ ທີ່ສະແຫວງຫາອາຫານການກິນທີ່ມີປະໂຫຍດຕໍ່ສຸຂະພາບຫລາຍທີ່ສຸດ.
ເພື່ອສົ່ງໄກ່ຈ້ານໂຕ້ຊະນິດນີ້ໄປຂາຍຢູ່ນອກເຂດພູດອຍຜ່ານທາງອິນເຕີເນັດ, ທ່ານ ລີວຊູ່ຈວິ່ນ ໄດ້ພະຍາຍາມຄຶດຫາວິທີຈົນສຸດຄວາມສາມາດ. ດ້ານໜຶ່ງ ເພິ່ນໄດ້ພາພະນັກງານປະຈຳບ້ານໄປຫາທຸກຄອບຄົວ ເພື່ອປຸກລະດົມຂົນຂວາຍ ໃຫ້ ເຂົາເຈົ້າລ້ຽງໄກ່, ອີກດ້ານໜຶ່ງໄດ້ເຊີນບໍລິສັດກໍ່ສ້າງມາສ້າງໂຮງງານປຸງແຕ່ງແຊ່ເຢັນຢູ່ບ້ານຈິ່ງທົງຊ່ານ, ພ້ອມທັງເຈລະຈາ ແລະ ເຊັນສັນຍາກັບບໍລິສັດສົ່ງສິນຄ້າ ດ່ວນຢູ່ທ້ອງຖິ່ນ ເພື່ອຫຼຸດຄ່າຂົນສົ່ງໃຫ້ແກ່ຊາວບ້ານ. ທ່ານລີວຊູ່ຈວິ່ນມີແນວຄິດດີໆຄືຈັ່ງຊີ້: ຂ້າໄກ່ ແລະ ແຊ່ເຢັນໂລດ, ຜ່ານຕ່ອງໂສ້ຈໍລະຈອນສິນຄ້າຂອງບໍລິສັດສົ່ງສິນຄ້າດ່ວນ ແລ້ວສົ່ງໄປໃຫ້ຮອດມືຜູ້ຊື້ທີ່ຢູ່ແຫ່ງຕ່າງໆທົ່ວປະເທດ. ປັດຈຸບັນມີເງື່ອນໄຂອຳນວຍຄວາມສະດວກພ້ອມໝົດແລ້ວ, ຂໍແຕ່ວ່າ ມີທີມງານໄອໂດທີ່ມີຊື່ສຽງຊ່ວຍໂຄສະນາຂາຍໄກ່ກໍໄດ້ແລ້ວ.
ແຕ່ເມື່ອທີມງານເວີ່ຍຫຢາຫາກໍ່ຟັງການອະທິບາຍຂອງທ່ານລີວຊູ່ຈວິ່ນ ກໍບອກ ວ່າ: ສິນຄ້າແຊ່ເຢັນຂາຍບໍ່ໄດ້. ທ່ານລີວຊູ່ຈວິ່ນ ຈຶ່ງອ້າປາກຄ້າງໂລດ. ເວລານີ້ ທີມງານບອກຕື່ມວ່າ: ຖ້າເຮັດສຸກແລ້ວອາດຈະຂາຍໄດ້.
ຫຼັງປະຊຸມແລ້ວ, ລີວຊູ່ຈວີ່ນ ໄດ້ຄຶດເຖິງຄຳເວົ້າທີ່ວ່າ “ເຮັດສຸກແລ້ວອາດຂາຍໄດ້” ຄິດແລ້ວຄິດອີກ, ຄຶດໄປຄຶດມາຫລາຍລົບຫລາຍຕ່າວ ຈຶ່ງຄຶດໄດ້ວິທີໜຶ່ງໃນທີ່ສຸດ. ພໍດີເພິ່ນຄຶດອອກວ່າ ຢູ່ໃນເມືອງ ມີໂຮງງານປຸງແຕ່ງໄກ່ສຸກແຫ່ງໜຶ່ງ, ກໍສາມາດສົ່ງໄກ່ຈ້ານໂຕ້ຂອງບ້ານຈິ່ນທົງຊ່ານໄປໃຫ້ໂຮງງານດັ່ງກ່າວ, ເມື່ອປຸງແຕ່ງສຸກແລ້ວເອົາໄປຂາຍຜ່ານທາງເນັດກໍໄດ້. ຕໍ່ມາ ພາຍໃຕ້ການປະສານງານຂອງ ທ່ານ ລີວຊູ່ຈວິ່ນ ແລະການໂຄສະນາຂອງພະນັກງານຄົນອື່ນໆໃນເມືອງ, ຄອບຄົວລ້ຽງໄກ່ລາດ ໂຮງງານປຸງແຕ່ງ ແລະ ທີມງານໂຄສະນາຂອງເວີ່ຍຫຢາລ້ວນແຕ່ຍອມຮັບແຜນການປ່ຽນໄກ່ຈ້ານໂຕ້ເປັນໄກ່ສຸກ.
ບໍ່ດົນ, ເມືອງເຊີງປູ້ກໍໄດ້ສ້າງຫ້ອງສະຕູດີໂອເພື່ອຖ່າຍທອດສົດທາງອິນເຕີເນັດໃຫ້ທີມງານເວີ່ຍຫຢາ, ສ່ວນນາງເວີ່ຍຫຢາກໍບໍ່ໄດ້ເຮັດໃຫ້ທຸກຄົນຜິດຫວັງ, ນາງໄດ້ມາຊ່ວຍໂຄສະນາສິນຄ້າພິເສດຂອງເມືອງເຊີງປູ້ຫຼາຍສິບຊະນິດ, ແນ່ນອນ ຕ້ອງລວມມີໄກ່ຈ້ານໂຕ້ຫຼາຍພັນໂຕຂອງບ້ານຈິ່ນທົງຊ່ານ. ໃນເວລາ ຖ່າຍທອດສົດນັ້ນ ຜູ້ຕາງໜ້າຊາວບ້ານທີ່ຢືນຢູ່ດ້ານນອກຂອງຫ້ອງສະຕູດີໂອ ກໍ່ສາມາດເບິ່ງການຖ່າຍທອດສົດຜ່ານໂທລະສັບມືຖືຢ່າງຕື່ນເຕັ້ນ.
ສິ່ງທີ່ເຮັດໃຫ້ຄົນທັງຫຼາຍດີໃຈນັ້ນແມ່ນ, ໄກ່ຫຼາຍພັນໂຕຫາກໍໄດ້ຂຶ້ນເນັດ ກໍໄດ້ຂາຍໝົດໃນບາດດຽວ, ແມ່ນແຕ່ໄຂ່ໄກ່ລາດກໍ່ຂາຍໝົດກ້ຽງເຊັ່ນກັນ.
ມື້ນັ້ນ, ນາງເວີ່ຍຫຢາໄດ້ຊ່ວຍຂາຍສິນຄ້າທີ່ມີມູນຄ່າປະມານ 10 ລ້ານຢວນໃຫ້ເມືອງເຊີງປູ້, ຜ່ານການຖ່າຍທອດສົດທີ່ຊີວິດຊີວາ, ຊາວບ້ານຂອງເມືອງເຊີງປູ້ ກໍໄດ້ສຳຜັດກັບພະລັງຂອງການຄ້າຜ່ານອິນເຕີເນັດເປັນຄັ້ງທຳອິດ.
ຫຼັງຈາກທີມງານເວີ່ຍຫຢາໄປແລ້ວ, ຢູ່ທຸກໆບ້ານຂອງເມືອງເຊີງປູ້ ກໍໄດ້ເລີ່ມເຮັດການຄ້າຜ່ານທາງອິນເຕີເນັດ, ແຕ່ລະບ້ານກໍມີໄອໂດຂອງຕົນເອງ, ພວກ ເຂົາເຈົ້າໄດ້ນຸ່ງຊຸດເຜົ່າມົ້ງແລ້ວໂຄສະນາຂາຍເຄື່ອງຜ່ານທາງອິນເຕີເນັດ. ເມື່ອຮອດທ້າຍປີ 2020, ຜະລິດຕະພັນກະສິກຳທີ່ຂາຍທາງອິນເຕີເນັດຂອງເມືອງເຊີງປູ້ຂາຍໄດ້ 100 ລ້ານຢວນ ເຊິ່ງໄດ້ຊຸກຍູ້ໃຫ້ 600 ກວ່າຄອບຄົວມີລາຍໄດ້ເພີ່ມຂຶ້ນ. ໃນທົ່ວເມືອງມີຮ້ານຄ້າ 8 ແຫ່ງທີ່ຂາຍສິນຄ້າໄດ້ຫຼາຍກວ່າໜຶ່ງລ້ານຢວນ.
ທ່ານລີວຊູ່ຈວິ່ນເຄີຍເວົ້າວ່າ: ໃນຖານະເປັນພະນັກງານທີ່ມາຝຶກງານການນຳຢູ່ທ້ອງຖິ່ນ,ຕົນເອງຈະຕ້ອງອອກຈາກເມືອງເຊີງປູ້ບໍ່ໄວກໍຊ້າ. ຄຳບູຮານຈີນກ່າວໄວ້ ວ່າ: “ການທີ່ມອບປາໃຫ້ຄົນອື່ນ ບໍ່ທໍ່ການມອບແຫໃຫ້ຄົນອື່ນ”, ເພິ່ນຢາກໃຊ້ເວລາສັ້ນໆທີ່ຢູ່ເມືອງເຊີງປູ້, ເພື່ອຊ່ວຍເຫຼືອປະຊາຊົນທຳມະດາຂອງເມືອງເຊີງປູ້ໃຫ້ ມີຄວາມຮູ້ທັນກັບຂະບວນການທີ່ທັນສະໄໝໃນການຈຳໜ່າຍສິນຄ້າຜ່ານທາງ ອິນເຕີເນັດ ໂດຍສະເພາະແມ່ນການເຮັດໃຫ້ໄກ່ລາດຈ້ານໂຕ້ ອອກຈາກເຂດ ພູດອຍຜ່ານການຂາຍຜ່ານອິນເຕີເນັດ ແລະ ບັນລຸການພັດທະນາແບບຍືນຍົງ.
ຄຳເຫັນ
0