ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ປີນີ້ແມ່ນປີທີ່ຈີນ ແລະ ອາຊຽນສ້າງການພົວພັນຄູ່ສົນທະນາຢ່າງເປັນທາງການຄົບຮອບ 30 ປີ. ຕອນເຊົ້າວັນທີ 11 ກັນຍານີ້, ໃນກອງປະຊຸມເວທີປຶກສາຫາລືການຮ່ວມມືເສດຖະກິດການຄ້າທີ່ລະນຶກການສ້າງການພົວພັນຄູ່ສົນທະນາຢ່າງເປັນທາງການລະຫວ່າງຈີນ-ອາຊຽນຄົບຮອບ 30 ປີ, ເຈົ້າໜ້າທີ່ກະຊວງການຄ້າຈີນແນະນຳໃຫ້ຮູ້ວ່າ, ໃນ 30 ປີຜ່ານມານີ້, ການພົວພັນລະຫວ່າງຈີນ-ອາຊຽນໄດ້ພັດທະນາຢ່າງວ່ອງໄວ, ກາຍເປັນແບບຢ່າງແຫ່ງການຮ່ວມມືທີ່ມີພະລັງຊີວິດທີ່ສຸດ ປະສົບຜົນສຳເລັດຫຼາຍທີ່ສຸດແລະ ເປັນຫົວຈັກສຳຄັນຂອງການພັດທະນາ ແລະ ຄວາມຈະເລີນຮຸ່ງເຮືອງຂອງພາກພື້ນອາຊີຕາເວັນອອກ.
ໃນກອງປະຊຸມດັ່ງກ່າວ, ທ່ານເຢີນຫົງປິ່ນ ຮອງລັດຖະມົນຕີກະຊວງການຄ້າຈີນໃຫ້ຮູ້ວ່າ, ໃນ 30 ປີຜ່ານມານີ້, ຍອດມູນຄ່າການຄ້າສອງຝ່າຍຈີນ-ອາຊຽນໄດ້ເພີ່ມຂຶ້ນ 85 ເທົ່າ, ກາຍເປັນຄູ່ການຄ້າໃຫຍ່ອັນດັບໜຶ່ງຂອງກັນແລະກັນ. ອາຊຽນແມ່ນຈຸດໝາຍປາຍທາງດ້ານການລົງທຶນ ແລະ ແຫຼ່ງການລົງທຶນໂດຍກົງຂອງຕ່າງປະເທດທີ່ສຳຄັນທີ່ສຸດຂອງຈີນ, ຍອດມູນຄ່າການລົງທຶນຕໍ່ກັນຂອງສອງຝ່າຍນັບລວມແລ້ວຫຼາຍກວ່າ 310 ຕື້ໂດລາສະຫະລັດ, ໄດ້ຮ່ວມມືກັນສ້າງເຂດຮ່ວມມືເສດຖະກິດການຄ້າ 20 ກວ່າເຂດແລ້ວ.
ທ່ານເຢີນຫົງປິ່ນກ່າວຕື່ມວ່າ, ຈີນຍິນດີຮ່ວມກັບອາຊຽນເພີ່ມທະວີການເຊື່ອມຈອດຍຸດທະສາດການພັດທະນາ, ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ຢ່າງມີຄຸນນະພາບສູງ, ຮ່ວມກັນຊຸກຍູ້ການພົວພັນຄູ່ເສດຖະກິດການຄ້າກ້າວຂຶ້ນສູ່ລະດັບສູງກວ່າເກົ່າ. ຈີນຍິນດີຮ່ວມກັບບັນດາປະເທດອາຊຽນ ສືບຕໍ່ສ້າງເຂດການຄ້າເສລີຈີນ-ອາຊຽນ, ຍົກລະດັບຄວາມເສລີ ແລະ ຄວາມສະດວກຂອງການຄ້າ ແລະ ການລົງທຶນ, ຈີນສະໜັບສະໜູນຖານະໃຈກາງຂອງອາຊຽນ, ຍິນດີຮ່ວມກັບອາຊຽນຊຸກຍູ້ໃຫ້ສັນຍາRCEP ມີຜົນສັກສິດ ແລະໄດ້ຮັບການຈັດຕັ້ງປະຕິບັດ ຕາມເວລາກຳນົດ, ເພີ່ມພະລັງຂັບເຄື່ອນອັນໃໝ່ໃຫ້ແກ່ການພັດທະນາເສດຖະກິດຂອງພາກພື້ນ.
ຄຳເຫັນ
0