ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 15 ກັນຍານີ້, ງານມະຫາກຳກິລາແຫ່ງຊາດຈີນທີ່ຈັດຂຶ້ນ 4 ປີເທື່ອໜຶ່ງ ໄດ້ໄຂຂຶ້ນຢູ່ນະຄອນຊີ່ອ່ານເຊິ່ງເປັນເມືອງບູຮານຂອງຈີນ, ປີນີ້ແມ່ນງານກິລາຄັ້ງທີ 14.
ນັບແຕ່ຈັດງານມະຫາກຳກິລາແຫ່ງຊາດຈີນຄັ້ງທີ 1 ເມື່ອປີ 1959 ຈົນມາຮອດປັດຈຸບັນ, ງານມະຫາກຳກິລາແຫ່ງຊາດ ມີປະຫວັດສາດມາໄດ້ 62 ປີແລ້ວ,ໃນໄລຍະນີ້ ງານມະຫາກຳກິລາແຫ່ງຊາດຈີນໄດ້ພັດທະນາຢ່າງຟົດຟື້ນ ໄປພ້ອມກັບພາລະກິດກິລາຂອງປະເທດສປຈີນທີ່ເຕີບໃຫຍ່ຢ່າງບໍ່ຢຸດຢັ້ງ.
ແຕ່ເລື່ອງໜຶ່ງທີ່ຫຼາຍໆທ່ານຄົງຈະບໍ່ຮູ້ນັ້ນກໍ່ແມ່ນ: ໃນ 62 ປີກ່ອນ, ມີນັກກິລາຄົນໜຶ່ງໄດ້ທຳລາຍສະຖິຕິຂອງຈີນໃນລາຍການແລ່ນຂ້າມຮົ້ວ 400 ແມັດໃນງານກິລາແຫ່ງຊາດຈີນຄັ້ງທຳອິດ. ປັດຈຸບັນ, ນັກກິລາເກັ່ງຄົນນີ້ໄດ້ກາຍເປັນຜູ້ຊ່ຽວຊານພະແນກພາຍໃນດ້ານລະບົບຫາຍໃຈຂອງຈີນ, ທັງເປັນບັນດິດຂອງສະຖາບັນວິທະຍາສາດຈີນ ພ້ອມທັງເປັນຜູ້ນຳໜ້າໃນການຕໍ່ຕ້ານພະຍາດ SARS ແລະພະຍາດໂຄວິດ-19 ຂອງຈີນ. ເພິ່ນຜູ້ນີ້ກໍ່ແມ່ນທ່ານຈົ່ງນານສ່ານ.
ວັນທີ 13 ກັນຍາ 1959, ນັກກິລາໄດ້ຍ່າງເຂົ້າສະໜາມໃນພິທີໄຂງານກິລາແຫ່ງຊາດຈີນຄັ້ງທຳອິດທີ່ຈັດຂຶ້ນຢູ່ນະຄອນຫລວງປັກກິ່ງ
ປີ 1955, ທ່ານຈົ່ງນານສ່ານໄດ້ເສັງເຂົ້າວິທະຍາໄລແພດສາດປັກກິ່ງ, ກໍ່ຄືວິທະຍາໄລແພດສາດຂອງມະຫາວິທະຍາໄລປັກກິ່ງໃນປັດຈຸບັນ. ຍ້ອນຄະແນນດີເດັ່ນໃນດ້ານກິລາ, ທ່ານຈົ່ງນານສ່ານຈຶ່ງຖືກສົ່ງໄປເຂົ້າຮ່ວມການຝຶກຊ້ອມໃນ ທີມນັກກິລານະຄອນຫຼວງປັກກິ່ງໃນປີ 1958 ເພື່ອກະກຽມເຂົ້າຮ່ວມງານກິລາແຫ່ງຊາດຈີນຄັ້ງທຳອິດ. ຫຼັງຈາກນັ້ນ 1 ປີ, ໃນການແຂ່ງຂັນແລ່ນຂ້າມຮົ້ວ 400 ແມັດເພດຊາຍຮອບຄັດເລືອກຂອງງານກິລາແຫ່ງຊາດຈີນຄັ້ງທຳອິດ, ທ່ານຈົ່ງນານສ່ານ ເຖິງຈະບໍ່ແມ່ນນັກກິລາອາຊີບ, ແຕ່ພັດໄດ້ທຳລາຍສະຖິຕິລະດັບຊາດໃນລາຍການແລ່ນຂ້າມຮົ້ວ 400 ແມັດດ້ວຍສະຖິຕິ 54 ວິນາທີ 2 ລິບດາ. ຈົນຮອດປັດຈຸບັນ, ຢູ່ວິທະຍາໄລແພດສາດຂອງມະຫາວິທະຍາໄລປັກກິ່ງ ຍັງມີສະຖິຕິດ້ານກິລາຫຼາຍລາຍການທີ່ທ່ານຈົ່ງນານສ່ານສ້າງໄວ້ນັ້ນ ຍັງບໍ່ທັນມີໃຜທຳລາຍໄດ້ເທື່ອ.
ທ່ານຈົ່ງນານຊ່ານໄດ້ທຳລາຍສະຖິຕິແລ່ນຂ້າມຮົ້ວ 400 ແມັດທົ່ວປະເທດຈີນ
ທ່ານຈົ່ງນານສ່ານບອກໃຫ້ຮູ້ວ່າ: “ຄວາມໄວສູງສຸດໃນການແລ່ນ 100 ແມັດຂອງຂ້າພະເຈົ້າແມ່ນ 11 ວິນາທີ 2 ລິບດາ, ໃນປີ 1959.” ນ້ຳໜັກຫລາຍທີ່ສຸດທີ່ເພິ່ນເຄີຍຍົກຂຶ້ນແມ່ນ 100 ກິໂລ, ສ່ວນນ້ຳໜັກໃນທ່ານອນ ເພິ່ນຍົກໄດ້ແມ່ນ 70 ກິໂລ. ເພິ່ນກ່າວຕື່ມວ່າ “ບໍ່ເຄີຍທົດລອງວ່ານ້ຳໜັກສູງສຸດທີ່ຕົນສາມາດຍົກຂຶ້ນໄດ້ນັ້ນແມ່ນເທົ່າໃດ ເພາະໃນເວລານັ້ນ ການຝຶກຊ້ອມຍົກນ້ຳໜັກ ຕົ້ນຕໍກໍ່ເພື່ອເພີ່ມກຳລັງແຮງເພື່ອເຂົ້າຮ່ວມກິລາປະເພດແລ່ນແລະລານ.”
ພາຍຫລັງງານກິລາແຫ່ງຊາດສິ້ນສຸດລົງ, ທ່ານຈົ່ງນານສ່ານ ໄດ້ມີໂອກາດ ກາຍເປັນນັກກິລາອາຊີບ, ແຕ່ຫລັງຈາກໄດ້ພິຈາລະນາຫລາຍລົບຫລາຍຕ່າວ ແລ້ວ, ເພິ່ນໄດ້ເລືອກກັບຄືນສູ່ຂົງເຂດແພດສາດ, ທ່ານເວົ້າວ່າ: ຂ້າພະເຈົ້າຮູ້ສຶກ ວ່າຫຸ່ນຕົນເອງບໍ່ດີພໍ, ສຸຂະພາບກໍບໍ່ປານໃດ, ຢ່າງເກັ່ງກໍຮອດແຕ່ລະດັບອາຊີເທົ່ານັ້ນ, ບໍ່ສາມາດທັນຮອດລະດັບໂລກໄດ້, ເປັນນັກກິລາອາຊີບຈະບໍ່ມີອະນາຄົດ. ເຖິງວ່າບໍ່ໄດ້ເປັນນັກກິລາອາຊີບ, ແຕ່ການຫລິ້ນກິລາ ໄດ້ນຳເອົາຜົນປະໂຫຍດ ແລະການປ່ຽນແປງມາໃຫ້ກັບທ່ານຈົ່ງນານສ່ານ ແລະໄດ້ຢູ່ກັບເພິ່ນຕະຫລອດຊີວິດ.
ທ່ານຈົ່ງນານຊ່ານເຄີຍເວົ້າວ່າ: “ການຫຼິ້ນກິລາມີບົດບາດສຳຄັນຕໍ່ຂ້າພະເຈົ້າໃນການເຮັດໃຫ້ສຸຂະພາບແຂງແຮງ. ເມື່ອ 70 ປີກ່ອນກໍ່ມັກແລ່ນອອກກຳລັງກາຍ, ຍາມໜຸ່ມແມ່ນຖືເອົາການແລ່ນເປັນການເຂົ້າຮ່ວມການແຂ່ງຂັນ, ເມື່ອອາຍຸສູງຂຶ້ນແລ້ວ ກໍມັກແລ່ນຊ້າໆເພື່ອຮັກສາສຸຂະພາບ.”
ປັດຈຸບັນ, ທ່ານ ຈົ່ງນານສ່ານ ຍັງສືບຕໍ່ຮັກສາຄວາມຊີນເຄີຍໃນການອອກກຳລັງກາຍ. ທ່ານເວົ້າວ່າ: ການອອກກຳລັງກາຍມັນສຳຄັນຄືກັບການກິນເຂົ້າ. ເມື່ອເລີກການແລ້ວ, ໃນແຕ່ລະອາທິດເພິ່ນມັກອອກກຳລັງກາຍປະມານ 3-4 ມື້, ມື້ລະ 40-50 ນາທີ.
“ສ່ວນຫຼາຍແມ່ນຍ່າງໄວກ່ອນຢູ່ເທິງແປ້ນແລ່ນ, ແລ້ວຈຶ່ງແລ່ນໄວຂຶ້ນ, ລວມທັງໝົດປະມານ 25 ນາທີ ເພື່ອຝຶກກ້າມຂາທັງສອງເບື້ອງ ແລະອະໄວຍະວະພາຍໃນ, ຕໍ່ມາກໍ່ເຮັດທ່າໃຊ້ມືຈັບຄານຍົກໂຕຂຶ້ນ ຫຼື Tricep 20 ເທື່ອ, ທ່າໃຊ້ມືຈັບຄານດຶງໂຕຂຶ້ນ ຫຼື Pull up 10 ເທື່ອ, ທ່າງັດກ້າມທ້ອງ ຫຼື ຊິດອັບ ເພື່ອຝຶກກ້າມເອິກ ແລະ ແຂນສອງເບື້ອງ. ບາງເທື່ອ ໃນໜຶ່ງຫລືສອງອາທິດໃດ ກໍພາຄອບຄົວໄປລອຍນ້ຳເທື່ອໜຶ່ງ.” ເມື່ອໄປເຮັດວຽກຢູ່ຕ່າງຖິ່ນ, ທ່ານກໍ່ມັກຫັດກາຍໃນທ່າໂປ້ມດິນ ແລະ ງັດກ້າມທ້ອງໃນຫ້ອງນອນຂອງໂຮງແຮມ.
ທ່ານຈົ່ງນານຊ່ານເວົ້າວ່າ: “ຍາມນ້ອຍຂ້າພະເຈົ້າມັກເຂົ້າຮ່ວມການແຂ່ງຂັນ ກິລາ, ເວລານັ້ນບໍ່ຮູ້ວ່າການອອກກຳລັງກາຍແມ່ນຫຍັງ, ຂ້າພະເຈົ້າມັກກິລາເກືອບ ທຸກປະເພດ, ຕົວຢ່າງຄື: ລອຍນ້ຳ, ແລ່ນ, ເຕະບານ, ບານບ້ວງ, ແຕ່ເກັ່ງກວ່າໝູ່ແມ່ນການແລ່ນ.”
ທ່ານກ່າວວ່າ: ເພື່ອນຮ່ວມຮຽນຂອງຂ້າພະເຈົ້າ ມີຫລາຍຄົນ ໃນເວລາ ມີອາຍຸໄລ່ເລ່ຍກັບຂ້າພະເຈົ້າ, ຫຼືໃນ 10 ປີກ່ອນ, ສຸຂະພາບກໍເລີ່ມອ່ອນເພຍແລ້ວ. ເຂົາເຈົ້າບໍ່ຄືຂ້າພະເຈົ້າ, ທີ່ຖືເອົາການອອກກຳລັງກາຍເປັນສ່ວນໜຶ່ງຂອງຊີວິດ, ເໝືອນດັ່ງການກິນເຂົ້າການນອນ. ການທີ່ສືບຕໍ່ອອກກຳລັງກາຍເປັນເວລາຫລາຍສິບປີ ໄດ້ເຮັດໃຫ້ທ່ານຈົ່ງນານສ່ານມີໜ້າຕາເບິ່ງຄືໜຸ່ມກວ່າອາຍຸຕົວຈິງຫລາຍ, ທັງບໍ່ມີບັນຫາດ້ານສຸຂະພາບທີ່ຜູ້ອາຍຸສູງມັກເປັນ ເຊັ່ນ: ການເບິ່ງເຫັນການຟັງ ມີບັນຫາ, ໄຫວພິບຊ້າລົງ, ຄວາມຊົງຈຳເສື່ອມ, ເຈັບແອວເຈັບຂາ ແລະອື່ນໆ. ຫຸ່ນຂອງເພິ່ນຍັງມີກ້າມທີ່ງາມອີກ ເຊິ່ງເຮັດໃຫ້ຄົນໜຸ່ມທັງຫລາຍເຫັນແລ້ວຕ້ອງ ຍອມແພ້ ແລະ ອິດສາຫຼາຍ.
ທ່ານຈົ່ງນານຊ່ານເວົ້າວ່າ: “ເຖິງວ່າບໍ່ສາມາດເຂົ້າຮ່ວມການແຂ່ງຂັນໄດ້ອີກແລ້ວ, ແຕ່ຂ້າພະເຈົ້າຍັງຮູ້ສຶກວ່າ ອາຍຸສູງ ບໍ່ມີຜົນກະທົບຫຍັງຕໍ່ຂ້າພະເຈົ້າເອງ, ປັດຈຸບັນນີ້ ຂ້າພະເຈົ້າຍັງສາມາດເຮັດວຽກປະຈຳໄດ້ຢູ່, ນີ້ກໍ່ຍ້ອນຍຶດໝັ້ນໃນ ການອອກກຳລັງກາຍ.”
ວຽກງານກິລາເຂັ້ມແຂງ, ປະເທດກໍເຂັ້ມແຂງໄປນຳ. ຫລາຍປີມໍ່ໆມານີ້, ແນວຄິດອອກກຳລັງກາຍທົ່ວປວງຊົນ ໄດ້ເຊື່ອມໂຍງເຂົ້າກັບຊີວິດການເປັນຢູ່ຂອງມວນຊົນຢ່າງເລິກເຊິ່ງ. ງານກິລາແຫ່ງຊາດຈີນໃນປັດຈຸບັນ, ບໍ່ພຽງແຕ່ເປັນເວທີຂອງຜູ້ດີເດັ່ນດ້ານການກິລາເທົ່ານັ້ນ, ຍັງເປັນງານມະຫາກຳດ້ານກິລາຂອງປະຊາຊົນ. ສຳລັບແນວຄິດກ່ຽວກັບການອອກກຳລັງກາຍທົ່ວປວງຊົນ, ທ່ານຈົ່ງນານສ່ານໄດ້ມີຄຳເຫັນວ່າ: “ຊາວໜຸ່ມຄວນເຂົ້າຮ່ວມກິລາທີ່ໃຊ້ເພື່ອການແຂ່ງຂັນຫຼາຍກວ່າ ເຊິ່ງລວມທັງກິລາປະເພດບານ ແລະ ການແລ່ນເປັນຕົ້ນ, ສ່ວນໄວກາງຄົນແລະຜູ້ອາຍຸສູງ ຄວນຍ່າງໄວ, ລອຍນ້ຳແລະມວຍໄທເກັກຈະດີກວ່າ.”
ຄຳເຫັນ
0