ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 25 ຕຸລາ ປີ 1971, ກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 26 ໄດ້ຮັບຮອງມະຕິ 2758 ໂດຍໄດ້ຕົກລົງຟື້ນຟູທີ່ນັ່ງຂອງ ສປ ຈີນທີ່ຖືກຕ້ອງຕາມກົດໝາຍຢູ່ອົງການສະຫະປະຊາຊາດ.
ໃນກອງປະຊຸມດັ່ງກ່າວ, ທ່ານສຽວກວ້ານຮວາ, ຮອງລັດຖະມົນຕີກະຊວງການຕ່າງປະເທດຈີນໃນເວລານັ້ນ ໄດ້ປະກາດວ່າ: “ພວກເຮົາມີຈຸດຢືນຄື: ບໍ່ວ່າວຽກງານຂອງປະເທດໃດ ຕ້ອງຄຸ້ມຄອງໂດຍປະເທດນັ້ນ, ວຽກງານຂອງໂລກ ຕ້ອງຄຸ້ມຄອງໂດຍບັນດາປະເທດໃນໂລກ, ວຽກງານຂອງອົງການສະຫະປະຊາຊາດ ຕ້ອງຄຸ້ມຄອງໂດຍບັນດາປະເທດສະມາຊິກຂອງອົງການສະຫະປະຊາຊາດ.” ຈີນໄດ້ສະແດງຈຸດຢືນຂອງຕົນຕໍ່ໂລກຢ່າງຈະແຈ້ງ ກ່ຽວກັບການຮັກສາລັດທິຫຼາຍຝ່າຍ ແລະການຮັກສາຄວາມຍຸຕິທໍາ ແລະຄວາມເປັນທໍາຂອງສາກົນ.
ໜັງສືພິມຟຣອງຊົວ (France Soir) ສະບັບວັນທີ 26 ຕຸລາ ປີ 1971 ໄດ້ລົງພິມບົດຄວາມທີ່ພາດຫົວຂໍ້ວ່າ: “ອາເມຣິກາປະສົບຄວາມຫຼົ້ມເຫຼວ ຢູ່ອົງການສະຫະປະຊາຊາດຢ່າງໜັກໜ່ວງ ແລະ ເປັນການປະກາດໄຊຊະນະຂອງ ປັກກິ່ງ” ໂດຍໄດ້ລະບຸວ່າ: ອົງການສະຫະປະຊາຊາດໄດ້ຟື້ນຟູທີ່ນັ່ງຂອງ ສປ ຈີນທີ່ຖືກຕ້ອງຕາມກົດໝາຍຢູ່ອົງການສະຫະປະຊາຊາດ ເປັນການເປີດຍຸກສະໄໝໃໝ່.
ໃນໄລຍະເວລາເຄິ່ງສະຕະວັດພາຍຫຼັງໄດ້ຟື້ນຟູທີ່ນັ່ງທີ່ຖືກຕ້ອງຕາມກົດ
ໝາຍຢູ່ອົງການສະຫະປະຊາຊາດແລ້ວ, ຈີນໄດ້ຕັ້ງໜ້າເຂົ້າຮ່ວມການເຄື່ອນໄຫວຂອງອົງການສະຫະປະຊາຊາດໃນຂົງເຂດການຮັກສາສັນຕິພາບ, ການພັດທະນາ, ສິດທິມະນຸດ, ການອະນຸລັກສິ່ງແວດລ້ອມ ແລະອື່ນໆ, ປະຕິບັດຕາມລັດທິຫຼາຍຝ່າຍ ແລະຮັກສາຍຸຕິທໍາ ແລະຄວາມເປັນທໍາດ້ວຍການກະທໍາຕົວຈິງ.
ໃນຂົງເຂດການຮັກສາສັນຕິພາບ,ຈີນເປັນປະເທດທີ່ໄດ້ສົ່ງຈໍານວນເຈົ້າໜ້າທີ່ຮັກສາສັນຕິພາບຫຼາຍທີ່ສຸດໃນບັນດາປະເທດສະມາຊິກຖາວອນຂອງສະພາຄວາມໝັ້ນຄົງ ອົງການສະຫະປະຊາຊາດ, ເປັນປະເທດທີ່ຈ່າຍເງິນອຸດໜູນຕາມການແບ່ງສ່ວນ ເພື່ອຮັກສາສັນຕິພາບຫຼາຍ ເປັນອັນດັບສອງຂອງໂລກ; ໃນບັນຫານິວເຄລຍຂອງ ສປປ ເກົາຫຼີ ແລະບັນຫານິວເຄລຍຂອງອີຣານ, ຈີນໄດ້ເສີມຂະຫຍາຍທ່າແຮງຂອງຕົນ, ປະສານງານກັບຝ່າຍຕ່າງໆຢ່າງຕັ້ງໜ້າ, ຮັກສາສັນຕິພາບ ແລະຄວາມໝັ້ນຄົງຂອງພາກພື້ນ; ໃນຂົງເຂດການຊ່ວຍເຫຼືອຫຼຸດຜ່ອນຄວາມທຸກຍາກ, ຈີນໄດ້ບັນລຸເປົ້າໝາຍທີ່ເຮັດໃຫ້ປະຊາກອນຈີນຜູ້ທຸກຍາກຕາມມາດຕະຖານໃນປັດຈຸບັນ ສາມາດຫຼຸດພົ້ນອອກຈາກຄວາມທຸກຍາກທັງໝົດ ກ່ອນເວລາກໍານົດ 10 ປີ ເຊິ່ງໄດ້ປະກອບສ່ວນເຂົ້າໃນວຽກງານການຫຼຸດຜ່ອນຄວາມທຸກຍາກຂອງໂລກກວມຫຼາຍກວ່າ 70%; ໃນຂົງເຂດການພັດທະນາ, ຈີນໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ເປັນການແບ່ງປັນໂອກາດການພັດທະນາໃຫ້ກັບປະເທດອື່ນໆ; ໃນດ້ານການຮັບມືກັບການປ່ຽນແປງຂອງດິນຟ້າອາກາດ, ຈີນໄດ້ວາງເປົ້າໝາຍ “ການລະບາຍກາກບອນດິອອກຊິດໃຫ້ເຖິງລະດັບສູງສຸດໃນປີ 2030” ແລະ “ບັນລຸເປົ້າໝາຍການປອດການລະບາຍກາກບອນດິອອກຊິດໃນປີ 2060” ພ້ອມທັງໄດ້ສຸມຄວາມພະຍາຍາມຢ່າງບໍ່ລົດລະ ເພື່ອບັນລຸເປົ້າໝາຍດັ່ງກ່າວ; ໃນຂະນະທີ່ພະຍາດໂຄວິດ-19 ແຜ່ລະບາດໃນຂອບເຂດທົ່ວໂລກ, ຈີນໄດ້ຖືເອົາວັກຊິນໂຄວິດ-19 ເປັນຜະລິດຕະພັນສາທາລະນະ ແລະສະໜອງໃຫ້ແກ່ປະເທດກຳລັງພັດທະນາ ເຊິ່ງໄດ້ສະແດງໃຫ້ເຫັນເຖິງຄວາມຮັບຜິດຊອບຂອງຈີນ.
ໃນພິທີລະນຶກການຟື້ນຟູທີ່ນັ່ງຂອງ ສປ ຈີນທີ່ຖືກຕ້ອງຕາມກົດໝາຍຢູ່ອົງການສະຫະປະຊາຊາດຄົບຮອບ 50 ປີ, ທ່ານສີຈິ້ນຜິງ, ປະທານປະເທດຈີນໄດ້ກ່າວຄຳປາໄສທີ່ສຳຄັນ ໂດຍກ່າວເນັ້ນວ່າ: “ພວກເຮົາຄວນປົກປ້ອງຄວາມສັກສິດ ແລະຖານະຂອງອົງການສະຫະປະຊາຊາດ, ຮ່ວມກັນປະຕິບັດຕາມລັດທິຫຼາຍຝ່າຍຢ່າງແທ້ຈິງ.”
ເຄິ່ງສະຕະວັດໄດ້ຜ່ານໄປແລ້ວ, ປັດຈຸບັນ, ຈີນໄດ້ກາຍເປັນກຳລັງແກນກາງໃນການຮັກສາຄວາມຍຸຕິທຳ ແລະສັນຕິພາບຂອງໂລກ. ເມື່ອໂລກກຳລັງຢືນຢູ່ທາງແບ່ງຂອງປະຫວັດສາດອີກຄັ້ງໜຶ່ງ, ຈີນຈະຍຶດໝັ້ນໃນລັດທິຫຼາຍຝ່າຍ ແລະອຸດົມການແຕ່ຫົວທີໃນການຮັກສາຄວາມຍຸຕິທຳ ແລະຄວາມເປັນທຳຂອງໂລກ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດໃຫ້ກ້າວໄປໜ້າຢ່າງບໍ່ຢຸດຢັ້ງ.
ຄຳເຫັນ
0