ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານທີ່ຕິດຕາມຂ່າວຈາກປະເທດຈີນອາດຈະຮູ້ແລ້ວເນາະວ່າ: ໃນເວລາ 6:56 ຂອງວັນທີ 16 ຕຸລາ ປີ 2021 ນີ້, ຍານອະວະກາດບັນທຸກຄົນ “ເຊີນໂຈ່ວ 13” ໄດ້ສົ່ງນັກບິນອະວະກາດຈີນ 3 ທ່ານ ຄື: ທ່ານໄຈຈື້ກ່າງ, ທ່ານນາງວາງຢ້າພີງ ແລະ ທ່ານເຢ້ກວ່າງຟູ້ ຂຶ້ນສູ່ອະວະກາດຢ່າງສຳເລັດຜົນ, ທັງໄດ້ເຊື່ອມຕໍ່ກັບສະຖານີອະວະກາດ “ທ່ຽນເຮີ” ຢ່າງອັດຕະໂນມັດ ແລະ ວ່ອງໄວ.
ຫຼັງຈາກນັ້ນ, ນັກບິນອະວະກາດ 3 ທ່ານ ໄດ້ອອກຈາກຍານອະວະກາດບັນທຸກຄົນ “ເຊີນໂຈ່ວ 13” ເຂົ້າໄປໃນຍານອະວະກາດ “ທ່ຽນເຮີ” ເພື່ອປະຕິບັດພາລະກິດຕາມແຜນການ. ໃນໄລຍະໂຄຈອນຕາມວົງໂຄຈອນ, ຈຸນັກບິນ ອະວະ ກາດດັ່ງກ່າວ ຈະດຳເນີນການທົດລອງທາງວິທະຍາສາດ-ເຕັກໂນໂລຊີໃນອະວະກາດຫຼາຍຢ່າງ.
ໃນການປະຕິບັດພາລະກິດຄັ້ງນີ້, ນັກບິນອະວະກາດທັງ 3 ທ່ານ ຈະພັກ ແລະ ເຮັດວຽກຢູ່ສະຖານີອະວະກາດຕາມວົງໂຄຈອນເປັນເວລາ 6 ເດືອນ, ສ່ວນທ່ານນາງວາງຢ້າພີງ ໄດ້ກາຍເປັນຜູ້ຍິງຄົນທຳອິດທີ່ໄປປະຈຳຢູ່ສະຖານີອະວະກາດຈີນ, ຍັງຈະກາຍເປັນນັກບິນອະວະກາດຍິງຄົນທຳອິດທີ່ອອກນອກຍານ ອະວະກາດຂອງຈີນ.
ທ່ານ ນາງວາງຢ້າພີງເກີດໃນປີ 1980 ຢູ່ບ້ານຈ່າງເກີ້ຈ່ວງທີ່ຖືກເອີ້ນວ່າ “ບ້ານແຫ່ງໝາກເຊີຣີ” ຂອງນະຄອນຢ່ຽນໄທ, ແຂວງຊ່ານຕົ່ງ. ໃນເວລາຍັງນ້ອຍນາງກໍມັກຫຼິ້ນກິລາ, ເມື່ອອາຍຸໄດ້ 6 ປີກໍ່ເຂົ້າຮ່ວມການແຂ່ງຂັນແລ່ນເຕັ້ນເຊືອກໄປພ້ອມ 60 ແມັດໂດຍໄດ້ເປັນທີໜຶ່ງ; ເລີ່ມແຕ່ອາຍຸ 7 ປີ ນາງກໍ່ເລີ່ມເຂົ້າຮ່ວມການແຂ່ງຂັນແລ່ນທົນ 800 ແມັດ, 1.500ແມັດ ແລະ ອື່ນໆ. ເດັກນ້ອຍບາງຄົນແລ່ນແລ້ວ ຫາຍໃຈໂຟໆ, ບາງຄົນກໍ່ຮູ້ສຶກແໜ້ນເອິກຫາຍໃຈຍາກ, ແຕ່ນາງພັດບໍ່ເມື່ອຍປານໃດ. ອາຈານກິລາຂອງນາງຢູ່ໃນໂຮງຮຽນປະຖົມຈຶ່ງຕີລາຄາວ່າ: ນາງມີພອນສະຫວັນໃນດ້ານກິລາ, ທັງມີນິດໄສບໍ່ຍອມຄົນ, ແຂ່ງຂັນເທື່ອໃດ ກໍຢາກເປັນທີໜຶ່ງໂລດ.
ໃນສາຍຕາຂອງແມ່, ວາງຢ້າພີງແມ່ນລູກສາວທີ່ຮູ້ໃຈພໍ່ແມ່ທີ່ສຸດ, ຕອນອາຍຸໄດ້ 7-8 ປີ ນາງກໍ່ສາມາດຊ່ວຍພໍ່ແມ່ເຮັດໄຮ່ໄຖນາແລ້ວ, ທັງເປັນຄົນທີ່ດຸໝັ່ນ ຂະຫຍັນພຽນໃນການຮ່ຳຮຽນ ແລະ ກໍ່ໄດ້ຄະແນນດີຫຼາຍ, ນາງເຄີຍເປັນຜູ້ຊ່ວຍຄູ ດ້ານການຮຽນ.
ໃນເວລາຈົບໂຮງຮຽນມັດທະຍົມຕົ້ນ, ພໍ່ແມ່ຢາກໃຫ້ນາງ ວາງຢ້າພີງ ເສັງເຂົ້າວິທະຍາໄລສ້າງຄູ, ແຕ່ນາງພັດລັກໄປສະເໜີຊື່ເພື່ອສອບເສັງເຂົ້າໂຮງຮຽນມັດທະຍົມປາຍ. ກໍຍ້ອນການຕັດສິນໃຈທີ່ກ້າຫານເທື່ອນີ້, ເຮັດໃຫ້ວາງຢ້າພີງໄດ້ພໍໍ້ໂອກາດທີ່ລັດຖະບານຈີນປະກາດຮັບສະໝັກນັກບິນຜູ້ຍິງຊຸດທີ 7 ໃນເວລາພໍດີລາວຮຽນຈົບຈາກໂຮງຮຽນມັດທະຍົມປາຍ.
ເວລານັ້ນ, 8 ປີໃດ ລັດຖະບານຈີນຈຶ່ງຈະຮັບສະໝັກນັກບິນເພດຍິງກຸ່ມໜຶ່ງ. ໃນຫ້ອງຮຽນຂອງວາງຢ້າພີງທີ່ໂຮງຮຽນມັດທະຍົມປາຍ, ມີນັກຮຽນຍິງ 20 ຄົນ, ມີແຕ່ວາງຢ້າພີງຄົນດຽວບໍ່ໃສ່ແວ່ນຕາ. ໝູ່ຮ່ວມຮຽນຈຶ່ງສະເໜີວ່າ: “ເຈົ້າໄປລອງເບິ່ງແມ້, ອາດຈະຖືກເລືອກກໍເປັນໄດ້ໄດ.” ປີ 1997, ວາງຢ້າພີງມີອາຍຸໄດ້ 17 ປີ, ລາວໄດ້ໄປເຂົ້າຮ່ວມການຄັດເລືອກນັກບິນຂອງກອງທັບອາກາດ, ລາວ ກໍຄິດບໍ່ເຖິງເລີຍວ່າ: ຕົນເອງຈະສາມາດຜ່ານການກວດສຸຂະພາບ ແລະ ຮ່າງກາຍທຸກຢ່າງໄດ້ຢ່າງສະດວກ ແລະເປັນເລື້ອງໂຊກດີຫຼາຍທີ່ໄດ້ກາຍເປັນນັກບິນຍິງຄົນໜຶ່ງໃນຊຸດທີ 7 ຂອງຈີນ.
ໃນໄລຍະ 9 ປີຄື: ແຕ່ປີ 2001-2010, ວາງຢ້າພີງໄດ້ໄປປະຕິບັດໜ້າທີ່ສຳຄັນຫຼາຍຄັ້ງ ເຊັ່ນ: ຂັບເຮືອບິນເຂົ້າຮ່ວມການກູ້ໄພແຜ່ນດິນໄຫວທີ່ນະຄອນເວີ້ນຊ່ວນ, ຂັບເຮືອບິນກຳຈັດເມກຝົນເພື່ອງານກິລາໂອລິມປິກປັກກິ່ງ, ຂັບເຮືອບິນ ເຂົ້າຮ່ວມການຊ້ອມຮົບຂອງກອງທັບ ແລະອື່ນໆ, ໄດ້ຂັບເຮືອບິນເປັນເວລາເກືອບ 1.600 ຊົ່ວໂມງຢ່າງປອດໄພ.
ທ່ານນາງວາງຢ້າພີງເຄີຍເວົ້າວ່າ: ຄວາມຝັນຂອງຕົນທຳອິດກໍ່ຢາກ ເປັນນັກ ບິນ, ພາຍຫຼັງມາແມ່ນຢາກເປັນນັກບິນອະວະກາດ. ນາງເວົ້າວ່າ: “ໃນເວລາອາຍຸ ໄດ້ 23 ປີ, ຂ້າພະເຈົ້າໄດ້ເຫັນທ່ານ ຢາງລີ້ເຫວີຍ ຖືກສົ່ງຂຶ້ນອະວະກາດຜ່ານທາງໂທລະພາບ, ເວລານັ້ນ ຂ້າພະເຈົ້າກໍມີຄວາມຝັນຢາກເປັນນັກບິນອະວະກາດ ເພດຍິງ.” ແຕ່ບໍ່ນຶກບໍ່ຝັນວ່າ, ເວລາຜ່ານໄປ 10 ປີ, ວາງຢ້າພີງໄດ້ຖືກສົ່ງຂຶ້ນອະວະກາດໃນຖານະເປັນນັກບິນອະວະກາດເພດຍິງສົມດັ່ງປາຖະໜາ.
ປີ 2010, ໂດຍຜ່ານການຄັດເລືອກຢ່າງເຂັ້ມງວດ, ວາງຢ້າພີງໄດ້ກາຍເປັນນັກບິນອະວະກາດຜູ້ໜຶ່ງໃນຊຸດທີສອງຂອງຈີນຢ່າງເປັນທາງການ. ສາມີຂອງນາງ ຄືທ່ານ ຈ້າວເພີງ ກໍ່ເປັນນັກບິນຄືກັນ, ລາວເປັນສາມີທີ່ອຸທິດຕົນເຮັດວຽກເຮືອນເກືອບທັງໝົດ ຍົກຕົວຢ່າງ: ຊັກເຄື່ອງ ອະນາໄມເຮືອນ ຈົນເຖິງການຮຽນແຕ່ງກິນ, ອາຫານເຍື່ອງໃດທີ່ເມຍມັກກິນ ລາວກໍຮຽນແຕ່ງໃຫ້ເມຍກິນ, ຄິດວ່າມີມື້ໃດມື້ໜຶ່ງ ສອງຄົນກໍ່ຈະສາມາດບັນລຸຄວາມໄຝ່ຝັນຮ່ວມກັນ ນັ້ນກໍຄື: ໃນອະນາຄົດ ສອງຄົນກໍ່ອາດຈະຂັບຍານອະວະກາດລຳດຽວຮ່ວມກັນ.
ໃນວັນທີ 11 ມິຖຸນາປີ 2013, ຍານອະວະກາດເຊີນໂຈ່ວ 10 ໄດ້ຖືກສົ່ງຂຶ້ນສູ່ອະວະກາດ, ທ່ານນາງ ວາງຢ້າພີງ ເປັນຜູ້ຍິງພຽງຄົນດຽວຂອງຈຸນັກບິນ ອະວະກາດ, ເຂົາເຈົ້າໄດ້ເຮັດຫລ້ອນໜ້າທີ່ທຸກລາຍການເຊິ່ງລວມທັງຈັດລາຍການສິດສອນທາງອະວະກາດ.
ໃນພາລະກິດການບິນເທື່ອນີ້, ວາງຢ້າພີງໄດ້ເປັນປະທານຈັດລາຍການສິດສອນທາງອະວະກາດ, ໃນວົງໂຄຈອນທີ່ໄກຈາກໜ່ວຍໂລກ 300 ກວ່າກິໂລແມັດ, ນາງວາງຢ້າພີງ ໄດ້ສິດສອນເປັນເວລາ 40 ນາທີໃຫ້ກັບນັກຮຽນ 60 ລ້ານກວ່າຄົນຂອງໂຮງຮຽນ 8 ໝື່ນກວ່າແຫ່ງ. ການສິດສອນທາງອະວະກາດເທື່ອນີ້, ແມ່ນຈີນຈັດກິດຈະກຳຖ່າຍທອດສົດກ່ຽວກັບການສຶກສາໃຫ້ຄວາມຮູ້ທົ່ວໄປດ້ານອະວະກາດສຳລັບຄົນທົ່ວປະເທດຈີນ ກໍຄືທົ່ວໂລກເປັນເທື່ອທຳອິດ, ເຮັດໃຫ້ນາງວາງຢ້າພີງກາຍເປັນອາຈານອະວະກາດຄົນທຳອິດຂອງຈີນ.
ເວລາຜ່ານໄປ 8 ປີ, ນັກບິນອະວະກາດຍິງທີ່ເກີດຫຼັງຊຸມປີ 1980 ກໍ່ໄດ້ຖືກສົ່ງຂຶ້ນສູ່ອະວະກາດເປັນເທື່ອທີສອງ. ກ່ອນອອກເດີນທາງ, ວາງຢ້າພີງແລະລູກສາວທີ່ມີອາຍຸໄດ້ 5 ປີ ຕ່າງກໍໄດ້ມອບໜ້າທີ່ໃຫ້ແກ່ກັນ ຄື: ວາງຢ້າພີງ ຢາກໃຫ້ລູກສາວເບິ່ງແຍງຕົນເອງໃຫ້ດີໆ, ເບິ່ງແຍງພໍ່ເຖົ້າແມ່ເຖົ້າໃຫ້ດີໆ ແລະ ຮຽນໜັງສື ໃຫ້ດີໆ. ສ່ວນລູກສາວຢາກໃຫ້ວາງຢ້າພີງ ເກັບເອົາດວງດາວຈາກອະວະກາດ ມາໃຫ້ລູກສາວ ແລະ ໝູ່ຮ່ວມຮຽນຂອງລາວ, ແຕ່ຕ້ອງເກັບມາຫຼາຍດວງແດ່, ເພາະລູກ ສາວຢາກແບ່ງປັນດວງດາວໃຫ້ໝູ່ຮ່ວມຮຽນຂອງລາວ.
ທ່ານນາງວາງຢ້າພີງເຄີຍເວົ້າວ່າ: “ຍ້ອນມີຄວາມມັກຮັກ ຈຶ່ງສາມາດຍຶດໝັ້ນໄດ້; ຍ້ອນມີຄວາມມັກຮັກ ຈຶ່ງມີຄວາມໝັ້ນໜຽວ; ຍ້ອນມີຄວາມມັກຮັກ ຈຶ່ງເຮັດໃຫ້ຂ້າພະເຈົ້າມີຄວາມອົງອາດກ້າຫານທີ່ສາມາດຜ່ານຜ່າຄວາມຫຍຸ້ງຍາກຕ່າງໆນາໆແລະ ສືບຕໍ່ຍຶດໝັ້ນມາຈົນຮອດປັດຈຸບັນນີ້.” “ຄວາມໄຝ່ຝັນກໍຄືກັບດວງດາວໃນອະວະກາດ, ເບິ່ງແລ້ວຄືຊິໄກແສນໄກ, ແຕ່ທະແນມວ່າພວກເຮົາມີຄວາມພະຍາຍາມແລ້ວ, ກໍຍ່ອມຈະສາມາດບັນລຸເປົ້າໝາຍນັ້ນໄດ້ຢ່າງແນ່ນອນ.”
ຄຳເຫັນ
0