ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 3 ພະຈິກນີ້, ພິທີມອບລາງວັນວິທະຍາສາດ-ເຕັກໂນໂລຊີ ແຫ່ງຊາດຈີນສູງສຸດປະຈຳປີ 2020 ໄດ້ຈັດຂຶ້ນຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ. ນີ້ແມ່ນງານມະໂຫລານປະຈຳປີໃນວົງການວິທະຍາສາດ-ເຕັກໂນ ໂລຊີຈີນ, ສ່ວນລາງວັນວິທະຍາສາດ-ເຕັກໂນໂລຊີແຫ່ງຊາດຈີນສູງສຸດທີ່ມອບໃນພິທີດັ່ງກ່າວແມ່ນກຽດຕິຍົດອັນສູງສົ່ງໃນວົງການວິທະຍາສາດຈີນ. ມື້ນີ້ ພວກເຮົາຈະເລົ່າເລື່ອງລາວຂອງທ່ານວາງຕ້າຈົ່ງ ນັກວິທະຍາສາດຜູ້ມີຊື່ສຽງໃນຂົງເຂດພະລັງງານນິວເຄລຍສາກົນ, ບຸກຄົນຜູ້ຄົ້ນຄວ້າເຕັກນິກເຕົາປະຕິກອນທີ່ຫຼຸດຄວາມຮ້ອນດ້ວຍອາກາດໃນອຸນຫະພູມສູງ (high temperature gas cooled reactor) ຜູ້ດຽວຂອງຈີນ ເຊິ່ງເປັນໜຶ່ງໃນບັນດານັກວິທະຍາສາດທີ່ໄດ້ຮັບລາງວັນດັ່ງກ່າວສູ່ຟັງ.
ພະລັງງານນິວເຄລຍແມ່ນພະລັງງານສະອາດທີ່ມີຈຳນວນມະຫາສານ, ມີອະນາຄົດອັນກວ້າງຂວາງ. ແຕ່ວ່າ ຈາກອຸບັດເຫດຂອງເຕົາປະຕິກອນໂຮງໄຟຟ້ານິວເຄລຍທີ່ເກາະ Three Mile ປະເທດອາເມຣິກາ, ມາຮອດອຸບັດເຫດນິວເຄລຍຂອງໂຮງໄຟຟ້າເຊີໂນບີນ ແລະ ໂຮງໄຟຟ້ານິວເຄລຍຟຸຄຸຊິມະ, ບັນຫາຄວາມປອດໄພດ້ານນິວເຄລຍ ເປັນອຸປະສັກຕົ້ນຕໍໃນດ້ານການນຳໃຊ້ພະລັງງານນິວເຄລຍໂດຍສັນຕິມາໂດຍຕະຫຼອດ.
ທ່ານວາງຕ້າຈົ່ງ ບັນດິດຂອງສະຖາບັນວິທະຍາສາດຈີນ ໄດ້ນຳພາຄະນະນັກວິທະຍາສາດ ບຸກເບີກເຕັກນິກສຳຄັນ ດ້ວຍການສ້າງເຕົາປະຕິກອນທົດລອງ ຕະຫຼອດຮອດການສ້າງໂຄງການສາທິດ, ດ້ວຍຄວາມພະຍາຍາມຢ່າງບໍ່ລົດລະແລະການປະດິດສ້າງດ້ວຍຕົນເອງ, ໃນທີ່ສຸດ ກໍ່ໄດ້ບຸກທະລຸບັນຫາຍາກລະດັບໂລກດັ່ງກ່າວ, ທັງໄດ້ບັນລຸການພັດທະນາແບບກ້າວກະໂດດໃນດ້ານເຕັກນິກພະລັງງານນິວເຄລຍທີ່ກ້າວໜ້າຂອງຈີນ. ສະນັ້ນ ທ່ານຈຶ່ງຖືກເອີ້ນວ່າ ເປັນ “ຜູ້ນຳພາໃຫ້ເຕົາປະຕິກອນມີຄວາມປອດໄພໃນໂຕມັນເອງ”.
ຫຼັງຈາກໄດ້ຮູ້ວ່າ ຕົນເອງໄດ້ຮັບລາງວັນວິທະຍາສາດ-ເຕັກໂນໂລຊີແຫ່ງຊາດສູງສຸດແລ້ວ, ທ່ານວາງຕ້າຈົ່ງກ່າວວ່າ: ກຽດຕິຍົດດັ່ງກ່າວນີ້ແມ່ນເປັນຂອງໂຄງການ “ເລກ200” ຂອງໝົດທຸກຄົນທີ່ໄດ້ບຸກບືນເພື່ອຄວາມກ້າວໜ້າ ເຖິງຈະ ຜະເຊີນກັບຄວາມຫຍຸ້ງຍາກແຕ່ກໍ່ໄດ້ຮ່ວມຈິດຮ່ວມໃຈກັນຜ່ານຜ່າຄວາມຫຍຸ້ງຍາກ, ທັງເປັນຂອງຜູ້ເຮັດວຽກງານວິທະຍາສາດເຕັກນິກທີ່ຮັກຊາດໝົດທຸກຄົນ ທີ່ໄດ້ອຸ ທິດຕົນ ແລະ ພະຍາຍາມບຸກບືນສູ້ຊົນ. ໂຄງການ “ເລກ 200” ດັ່ງກ່າວນີ້ ກໍເປັນຈຸດເລີ່ມຕົ້ນຂອງພາລະກິດດ້ານນິວເຄລຍຂອງທ່ານວາງຕ້າຈົ່ງ.
ປີ 1956, ເພື່ອພັດທະນາພາລະກິດດ້ານພະລັງງານນິວເຄລຍຂອງຈີນ, ມະຫາວິທະຍາໄລຊິ່ງຮວາ ໄດ້ສ້າງຕັ້ງຄະນະຟິຊິກສາດ-ໂຍທາທິການ ແລະ ໄດ້ ເລືອກເອົານັກສຶກສາທີ່ຮຽນເກັ່ງຈຳນວນໜຶ່ງຈາກຄະນະອື່ນໆ ໃຫ້ເຂົ້າມາຮຽນຢູ່ຄະ ນະນີ້, ໃນນັ້ນກໍມີທ່ານວາງຕ້າຈົ່ງທີ່ກຳລັງຮຽນຢູ່ຄະນະກົນຈັກປີທີສອງ.
ປີ 1960, ໄດ້ເລີ່ມລົງມືສ້າງສູນຄົ້ນຄວ້າພະລັງງານປະລະມານູຂອງມະຫາວິທະຍາໄລຊິ່ງຮວາ ທີ່ເປັນໂຄງການ “ເລກ 200”, ຈາກນັ້ນ, “ເລກ 200” ຈຶ່ງໄດ້ ກາຍເປັນຄຳແທນນາມຂອງສະຖາບັນຄົ້ນຄວ້າເຕັກນິກພະລັງງານນິວເຄລຍ ແລະ ພະລັງງານໃໝ່ຂອງມະຫາວິທະຍາໄລຊິ່ງຮວາ.
ປີ 1985, ທ່ານວາງຕ້າຈົ່ງໄດ້ຂຶ້ນຮັບຕຳແໜ່ງເປັນຜູ້ອຳນວຍການໃຫຍ່ສະຖາ ບັນດັ່ງກ່າວ, ວຽກທຳອິດພາຍຫຼັງເພິ່ນຂຶ້ນຮັບຕຳແໜ່ງແລ້ວກໍ່ແມ່ນເປັນຫົວໜ້ານຳພາການຄົ້ນຄວ້າພັດທະນາເຕົາປະຕິກອນນິວເຄລຍອຸນຫະພູມຕ່ຳ. ເວລານັ້ນ, ເພິ່ນໄດ້ເຈາະຈົງເອົາໃຈໃສ່ການຍົກສູງລະດັບຄວາມປອດໄພ.
ທ່ານວາງຕ້າຈົ່ງເວົ້າວ່າ: “ເວລານັ້ນ ພວກເຮົາໄດ້ພົບບັນຫາທຳອິດກໍ່ແມ່ນຕ້ອງເລືອກວິທີທາງ ແລະ ແຜນການເຕັກນິກທີ່ຖືກຕ້ອງ, ໂດຍຜ່ານການວິໄຈແລະ ຄົ້ນຄວ້າພິຈາລະນາມາເປັນເວລາໜຶ່ງປີປາຍ, ພວກເຮົາຈຶ່ງຕັດສິນໃຈເລືອກເອົາເຕົາປະຕິກອນນິວເຄລຍທີ່ມີໂຄງສ້າງເນື້ອດຽວກັນ. ມັນເປັນເຕົາປະຕິກອນທີ່ກ້າວໜ້າ, ຂ້າພະເຈົ້າຖືກໃຈລະດັບຄວາມປອດໄພທີ່ມີຢູ່ໃນໂຕມັນເອງ.”
ຫາກໍມາຮອດປີທີສອງ, ກໍຄືປີ 1986, ອຸບັດເຫດນິວເຄລຍຢ່າງໜັກໜ່ວງທີ່ໂຮງໄຟຟ້າເຊີໂນບີນ ໄດ້ເຮັດໃຫ້ການພັດທະນາພະລັງງານນິວເຄລຍຂອງໂລກຕົກເຂົ້າສູ່ເຫວເລິກຢ່າງໄວວາ, ບັນຫາຄວາມປອດໄພດ້ານນິວເຄລຍ ກໍ່ນັບມື້ນັບພົ້ນເດັ່ນຂຶ້ນ. ແຕ່ອັນນີ້ບໍ່ໄດ້ເຮັດໃຫ້ການຕັດສິນໃຈໃນການຄົ້ນຄວ້າຜະລິດເຕົາປະຕິກອນທີ່ກ້າວໜ້າຂອງທ່ານວາງຕ້າຈົ່ງນັ້ນ ຫວັ່ນໄຫວຄອນແຄນ, ເພິ່ນຕົກລົງຄົ້ນຄວ້າພັດທະນາເຕົາປະຕິກອນທີ່ຫຼຸດຄວາມຮ້ອນດ້ວຍອາກາດໃນອຸນຫະພູມສູງ. ການຕົກລົງຄັ້ງນັ້ນ ໄດ້ເກີດມີຜົນສະທ້ອນອັນສຳຄັນຕໍ່ທິດທາງການພັດທະນາເຕັກນິກເຕົາປະຕິກອນທີ່ຫຼຸດຄວາມຮ້ອນດ້ວຍອາກາດໃນອຸນຫະພູມສູງຂອງຈີນ ກໍຄືຂອງໂລກ, ທັງໄດ້ຊີ້ແຈງວິທີທາງການພັດທະນາເຕັກນິກຂອງຈີນໃນດ້ານເຕົາປະຕິກອນທີ່ຫຼຸດຄວາມຮ້ອນດ້ວຍອາກາດໃນອຸນຫະພູມສູງ ນັບແຕ່ເວລານັ້ນໄປອີກ 30 ປີ.
ເຕົາປະຕິກອນແບບນີ້ ໄດ້ໃຊ້ເຕັກນິກທີ່ຖືເອົາອາກາດເປັນສານຫຼຸດຄວາມ ຮ້ອນ, ມີລັກສະນະພິເສດຫຼາຍຢ່າງ ເຊັ່ນ: ມີຄວາມປອດໄພທີ່ມີຢູ່ໃນໂຕມັນເອງ, ສາມາດອອກແບບ ແລະ ກໍ່ສ້າງໂດຍແບ່ງເປັນຕອນໆ, ສາມາດເກີດຜົນໄດ້ຫຼາຍ ຢ່າງ ແລະອື່ນໆ, ຖືວ່າເປັນຮູບແບບເຕົາປະຕິກອນລຸ້ນທີ 4 ທີ່ມີອະນາຄົດສົດໃສຫຼາຍ, ທັງເປັນລະບົບພະລັງງານນິວເຄລຍລຸ້ນທີ 4 ພຽງລະບົບດຽວທີ່ສາມາດໃຊ້ເຮັດທຸລະກິດໄດ້ຢ່າງເປັນທາງການໃນທ້າຍປີ 2021 ນີ້.
ໂຮງໄຟຟ້ານິວເຄລຍຊືເຕົາວ່ານ ມີຄວາມສາມາດຜະລິດໄຟຟ້າໄດ້ 2 ແສນ ກິໂລວັດ, ຕັ້ງຢູ່ແຂວງຊ່ານຕົ່ງປະເທດຈີນ, ເປັນໂຄງການສາທິດເຕົາປະຕິກອນທີ່ຫຼຸດຄວາມຮ້ອນດ້ວຍອາກາດໃນອຸນຫະພູມສູງ, ທັງເປັນໂຄງການສາທິດທີ່ນຳໃຊ້ເຕັກນິກພະລັງງານນິວເຄລຍລຸ້ນທີ 4 ເຂົ້າໃນການດຳເນີນທຸລະກິດໂຄງການທຳອິດຂອງໂລກ. ໂຄງການນີ້ເລີ່ມລົງມືກໍ່ສ້າງເມື່ອປີ 2012, ຮອດທ້າຍເດືອນກໍລະກົດປີນີ້ ກໍ່ໄດ້ທົດລອງຜະລິດໄຟຟ້າ ແລະ ປັບປຸງຢ່າງຮອບດ້ານ, ຄາດວ່າ, ເມື່ອຮອດທ້າຍປີນີ້ ຈະເລີ່ມຜະລິດໄຟຟ້າປ້ອນເຂົ້າຕາໜ່າງຢ່າງເປັນທາງການ.
ໃນດ້ານເຕັກນິກ, ເຕົາປະຕິກອນທີ່ຫຼຸດຄວາມຮ້ອນດ້ວຍອາກາດໃນອຸນຫະ ພູມສູງ ແມ່ນປອດໄພ ແລະ ໄວ້ໃຈໄດ້, ການໃຊ້ມັນເຂົ້າແທນໂຮງຜະລິດໄຟຟ້າດ້ວຍຖ່ານຫີນຂະໜາດກາງແລະຂະໜາດນ້ອຍນັ້ນ ມີຄວາມໝາຍສຳຄັນຕໍ່ການ ແກ້ໄຂຄວາມຂັດແຍ້ງກັນລະຫວ່າງການອະນຸລັກສິ່ງແວດລ້ອມ, ການປະຢັດພະລັງງານ ແລະ ການຫຼຸດການປ່ອຍກາກບອນດີອອກຊິກໃຫ້ໜ້ອຍລົງ ກັບການພັດທະນາເສດຖະກິດ ແລະ ຄວາມໝັ້ນຄົງທາງສັງຄົມ.
ປີ 1994, ນອກຈາກຄົ້ນຄວ້າເຕັກນິກພະລັງງານນິວເຄລຍແລ້ວ, ທ່ານວາງຕ້າຈົ່ງ ຍັງໄດ້ຮັບຕຳແໜ່ງໃໝ່ໆ ນັ້ນກໍຄື: ເປັນອະທິການບໍດີຂອງມະຫາວິທະຍາໄລຊິ່ງຮວາ.
ເວລານັ້ນ, ທ່ານໄດ້ນຳພາຄະນະນຳຂອງໂຮງຮຽນ ສະເໜີແນວຄິດໃໝ່ດ້ານ ການຮຽນການສອນ, ເຈາະຈົງສະໜັບສະໜູນວິຊາຊີວະພາບ ແລະ ວິທະຍາສາດກ່ຽວກັບສິ່ງມີຊີວິດ ທັງເອົາໃຈໃສ່ການພັດທະນາຄົ້ນຄວ້າຂັ້ນພື້ນຖານ.
ບໍ່ວ່າທ່ານຈະເປັນຜູ້ນຳພາໜ່ວຍງານຄົ້ນຄວ້າວິທະຍາສາດ ຫຼືວ່າເປັນ ອະທິ ການບໍດີຂອງມະຫາວິທະຍາໄລ, ທ່ານວາງຕ້າຈົ່ງລ້ວນແຕ່ມີຈິດໃຈທຸ້ມເທໃຫ້ກັບ ໜ້າທີ່ຄວາມຮັບຜິດຊອບທີ່ມີຕໍ່ພາລະກິດຂອງຊາດຢ່າງຫລວງຫລາຍ ແລະ ສະເໝີຕົ້ນສະເໝີປາຍ. ການເບິ່ງກວ້າງມອງໄກ ແລະ ຄຸນນະທຳອັນສູງສົ່ງຂອງເພິ່ນໄດ້ຮັບການຍ້ອງຍໍໃນລະດັບສູງ ຈາກບັນດາອາຈານ ແລະ ນັກສຶກສາອັນໄພສານ ພ້ອມດ້ວຍວົງການໃນຂະແໜງການທີ່ກ່ຽວຂ້ອງ. ນັກສຶກສາໜຸ່ມແໜ້ນໄດ້ເອີ້ນເພິ່ນວ່າ: ທ່ານເປັນຜູ້ອາວຸໂສທີ່ເມດຕາປານີ ແລະ ໜ້າເຄົາລົບນັບຖືຢ່າງແທ້ຈິງ, ທ່ານເປັນຜູ້ນຳພາທີ່ຕິດແທດຕົວຈິງ ແລະ ສຸຂຸມຮອບຄອບ, ເປັນອະທິການ ບໍດີທີ່ສົມກັບຕຳແໜ່ງ ທັງມີຄວາມຮັກແພງຢ່າງກວ້າງຂວາງ, ໃນສາຍຕາຂອງພວກເຂົາເຈົ້າ, ທ່ານອະທິການບໍດີ ວາງຕ້າຈົ່ງ ເປັນແບບຢ່າງທີ່ດີຂອງນັກສຶກສາ ຊີ່ງຮວາທຸກລຸ້ນຕະຫຼອດໄປ.
ຄຳເຫັນ
0