ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 29 ພະຈິກນີ້, ທ່ານລີຊຽນລົງ ນາຍົກລັດຖະມົນຕີສິງກະໂປ ແລະທ່ານອີສເມວ ຊາບຣີນາຍົກລັດຖະມົນຕີມາເລເຊຍທີ່ເດີນທາງຢ້ຽມຢາມສິງກະໂປນັ້ນໄດ້ຮ່ວມກັນເປັນສັກຂີພິຍານໃຫ້ກັບພິທີເປີດແລວທ່ອງທ່ຽວລະຫວ່າງກັນສຳລັບຜູ້ທີ່ໄດ້ສັກວັກຊີນແລ້ວ, ນີ້ຖືວ່າ ສອງປະເທດໄດ້ຟື້ນຟູການເປີດຊາຍແດນລະຫວ່າງກັນຢ່າງເປັນທາງການ.
ຕາມສັນຍາລະຫວ່າງສອງປະເທດສິງກະໂປແລະມາເລເຊຍ, ນັບແຕ່ວັນທີ 29 ພະຈິກນີ້ເປັນຕົ້ນໄປ, ພົນລະເມືອງຂອງສອງປະເທດທີ່ໄດ້ສັກວັກຊີນປ້ອງກັນພະຍາດໂຄວິດ-19 ແລ້ວນັ້ນສາມາດເດີນທາງທາງອາກາດແລະທາງບົກເຂົ້າປະເທດຂອງກັນແລະກັນໄດ້ໂດຍບໍ່ຕ້ອງກັກບໍລິເວນ. ແຕ່ວ່າ, ເພື່ອປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ສາຍພັນໃໝ່ ໂອມິຄຼອນ, ວັນທີ 28 ພະຈິກນີ້, ສິງກະໂປໄດ້ເພີ່ມເງື່ອນໄຂໃໝ່ຕື່ມອີກໂດຍຮຽກຮ້ອງໃຫ້ຕ້ອງກວດຫາເຊື້ອແບບວ່ອງໄວສຳລັບພົນລະເມືອງມາເລເຊຍທີ່ຈະເຂົ້າປະເທດສິງກະໂປຜ່ານດ່ານທາງບົກ.
ພາຍຫຼັງພະຍາດໂຄວິດ-19ໄດ້ແຜ່ລະບາດຢ່າງຂະໜາດໃຫຍ່ຢູ່ມາເລເຊຍ, ລັດຖະບານຈຳເປັນຕ້ອງປິດຊາຍແດນຢ່າງຮອບດ້ານ, ຊາຍແດນທາງບົກລະຫວ່າງສອງປະເທດສິງກະໂປແລະມາເລເຊຍໄດ້ຖືກປິດເປັນການຊົ່ວຄາວ, ພຽງແຕ່ອະນຸຍາດໃຫ້ບຸກຄະລາກອນທີ່ສະໜອງສິນຄ້າຫຼືການບໍລິການອັນຈຳເປັນນັ້ນເຂົ້າອອກເມືອງໄດ້ເທົ່ານັ້ນ. ວັນທີ 8 ພະຈິກປີ2021ນີ້, ໄປຄຽງຄູ່ກັບສະພາບການແຜ່ລະບາດຂອງພະຍາດຢູ່ສອງປະເທດໄດ້ຜ່ອນຄາຍລົງຢ່າງຕໍ່ເນື່ອງ, ອັດຕາການສັກວັກຊີນປ້ອງກັນໂຄວິດ-19ໄດ້ເພີ່ມຂຶ້ນຢ່າງບໍ່ຢຸດຢັ້ງ, ຜູ້ນຳສອງປະເທດສິງກະໂປ-ມາເລເຊຍຈິ່ງເປັນເອກະພາບກັນເຫັນດີນຳໃຊ້ນະໂຍບາຍຍົກເວັ້ນການກັກບໍລິເວນສຳລັບຜູ້ທີ່ໄດ້ສັກວັກຊີນແລ້ວ ເພື່ອຟື້ນຟູການໄປມາຫາສູ່ກັນລະຫວ່າງປະຊາຊົນສອງປະເທດຜ່ານທາງອາກາດແລະທາງບົກ.
ຄຳເຫັນ
0