ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 29 ພະຈິກນີ້, ທ່ານຫວ່າງເວີນປິ່ນ ໂຄສົກກະຊວງການຕ່າງປະເທດຈີນໄດ້ແນະນຳສະພາບການກ່ຽວກັບຂໍ້ລິເລີ່ມພັດທະນາທົ່ວໂລກໃນກອງປະຊຸມຖະແຫລງຂ່າວປະຈຳໂດຍກ່າວວ່າ: ຂໍ້ລິເລີ່ມພັດທະນາທົ່ວໂລກໄດ້ຍຶດຖືເປີດປະຕູ, ໂອບເອື້ອອາລີ, ໂປ່ງໃສ, ຍິນດີຕ້ອນຮັບຄູ່ຮ່ວມມືທີ່ມີຄວາມຄິດ ແລະອຸດົມການຄືກັນນັ້ນເຂົ້າຮ່ວມ, ຮ່ວມກັນເຕົ້າໂຮມພະລັງແຮງອັນເຂັ້ມແຂງເພື່ອຈັດຕັ້ງປະຕິບັດວາລະການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດ.
ທ່ານຫວ່າງເວີນປິ່ນແນະນຳວ່າ: ສອງເດືອນທີ່ຜ່ານມາ, ປະຊາຄົມໂລກໄດ້ຕັ້ງໜ້າສະໜັບສະໜູນຂໍ້ລິເລີ່ມດັ່ງກ່າວ, ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດກ່າວວ່າ: ຂໍ້ລິເລີ່ມພັດທະນາທົ່ວໂລກມີຄວາມໝາຍສຳຄັນທີ່ຕັ້ງໜ້າໃນການຊຸກຍູ້ການພັດທະນາແບບຍືນຍົງ, ສະເໝີພາບ ແລະດຸນດ່ຽງຂອງທົ່ວໂລກ, ອົງການສະຫະປະຊາຊາດສະໜັບສະໜູນຢ່າງເຕັມປ່ຽມ, ຍິນດີຮ່ວມກັບປະເທດຈີນເພີ່ມທະວີການຮ່ວມມືກ່ຽວກັບຂໍ້ລິເລີ່ມດັ່ງກ່າວ. ເດືອນຕຸລາປີນີ້, ຖະແຫລງການຮ່ວມຂອງກອງປະຊຸມລັດຖະມົນຕີກະຊວງການຕ່າງປະເທດຈີນ-ປະເທດເກາະດອນໃນມະຫາສະໝຸດປາຊີຟິກໄດ້ລະບຸວ່າ: ປະເທດເກາະດອນໃນມະຫາສະໝຸດປາຊີຟິກຊົມເຊີຍຂໍ້ລິເລີ່ມພັດທະນາທົ່ວໂລກ, ຍິນດີສະໜັບສະໜູນ ແລະເຂົ້າຮ່ວມຂໍ້ລິເລີ່ມສຳຄັນນີ້, ທັງຈະເຮັດໃຫ້ຂໍ້ລິເລີ່ມດັ່ງກ່າວເຊື່ອມຕໍ່ກັບແລວພັດທະນາແບບຍືນຍົງໃນມະຫາສະໝຸດປາຊີຟິກ ແລະຍຸດທະສາດມະຫາສະໝຸດປາຊີຟິກສີຟ້າປີ 2050. ກອງປະຊຸມສຸດຍອດເພື່ອສະເຫລີມສະຫລອງການສ້າງຕັ້ງສາຍພົວພັນຄູ່ເຈລະຈາຈີນ-ອາຊຽນຄົບຮອບ 30 ປີກໍໄດ້ຈັດເອົາຂໍ້ລິເລີ່ມພັດທະນາທົ່ວໂລກເຂົ້າໃນເອກະສານໝາກຜົນຂອງກອງປະຊຸມອີກຄັ້ງໜຶ່ງ, ເຊິ່ງໄດ້ສະແດງໃຫ້ເຫັນວ່າຂໍ້ລິເລີ່ມພັດທະນາທົ່ວໂລກສອດຄ່ອງກັບທ່າອ່ຽງການພັດທະນາຂອງບັນດາປະເທດໃນໂລກ, ສອດຄ່ອງກັບຄວາມຕ້ອງການຂອງປະເທດພວມພັດທະນາທັງຫລາຍ, ທັງໄດ້ສະແດງໃຫ້ເຫັນເຖິງຄວາມຊີວິດຊີວາ ແລະຄວາມສາມາດດຶງດູດຄວາມສົນໃຈອັນເຂັ້ມແຂງຂອງຂໍ້ລິເລີ່ມດັ່ງກ່າວ, ໂດຍໄດ້ຮັບການຮັບຮອງຈາກປະຊາໂຄມໂລກຢ່າງສູງ.
ຄຳເຫັນ
0