郑林

ຕາລາງລາຍການ FM93Mhz

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93

ທ່ານນາງ ຟັນຈິນຊື່ ລູກສາວເມືອງຕູ່ນຮວງ

2021-12-05 17:00:08 cri

ມີ​ສາວຄົນ​ໜຶ່ງ ລາວເປັນຄົນພາກ​ໃຕ້, ພັດໄດ້​ດຳ​ລົງ​ຊີ​ວິດ​ຢູ່​ທະ​ເລ​ຊາຍທີ່ເມືອງ​ຕູ່ນ​ຮ​ວ​ງ ທາງ​ພາກ​ຕາ​ເວັນ​ຕົກ​ສຽງ​ເໜືອ​ຂອງປະເທດ​ຈີນ​ເປັນເວລາເຖິງ 56 ປີ; ມີ​ນັກ​ປາດ​ຄົນ​ໜຶ່ງ, ໃນຕະ​ຫຼອດ​ຊີ​ວິດ​ຂອງເພິ່ນ ເຮັດ​ວຽກພຽງ​ແຕ່​ເລື່ອງ​ດຽວ ນັ້ນ​ກໍ​ຄື: ຄົ້ນ​ຄວ້າ, ປົກ​ປັກ​ຮັກ​ສາ​ແລະ​ໂຄສະນາເຜີຍແຜ່​ວັດ​ທະ​ນະ​ທຳ​ຕຸ່ນ​ຮ​ວງ; ມີ​ຜູ້​ເຖົ້າ​ຄົນ​ໜຶ່ງ, ຖືກຂະໜານນາມວ່າ ​ເປັນ​ລູກ​ສາວ​ຂອງ​ເມືອງຕູ່ນ​ຮວງ, ເພິ່ນຜູ້ນີ້ ​ກໍ​ແມ່ນ​ທ່ານ​ນາງ ຟັນ​ຈິນ​ຊື່ ອະ​ດີດ​ຫົວ​ໜ້າ​ສະ​ຖາ​​ບັນ​ຄົ້ນ​ຄວ້າ​ຕູ່ນ​ຮວງ.

ທ່ານນາງ ຟັນຈິນຊື່ ລູກສາວເມືອງຕູ່ນຮວງ_fororder_樊锦诗2

ເຖິງວ່າ​ໄດ້​ຮັບ​ກຽດ​ຕິ​ຍົດ​ຫຼາຍ​ຢ່າງ, ແຕ່​ເພິ່ນ​ພັດ​ໄດ້​ກ່າວ​ເນັ້ນ​ໜັກຫຼາຍ​ເທື່ອ​ວ່າ: “ຂ້າພະເຈົ້າ​ເປັນ​ຄົນ​ທຳ​ມະ​ດາ​ເທົ່າ​ນັ້ນ, ກຽດ​ຕິ​ຍົດ​ທີ່​ໄດ້​ຮັບ​ນັ້ນ ທີ່​ຈິງ​ແລ້ວ​ແມ່ນ​ຂອງກຸ່ມຄົນທີ່​ເຮັດ​ວຽກ​ອະນຸລັກ ວັດ​ຖຸ​ບູ​ຮານທັງໝົດ.”

ຍ້ອນ​ໄດ້​ຮັບ​ອິດທິພົນຈາກ​ພໍ່​ຜູ້​ມັກ​ສິ​ລະ​ປະ, ແຕ່​ຍາມ​ຍັງ​ນ້ອຍ ຟັນ​ຈິນ​ຊື່​ກໍ່​ມັກ​ໄປທ່ຽວ​ຊົມ​ຫໍ​ພິ​ພິ​ທະ​ພັນ ແລະ ຫໍ​ວິຈິດສິນຕ່າງໆແລ້ວ, ແນ່ນອນ​ທ່ານກໍ​ໄດ້​ຮູ້ເລື້ອງ​ຕູ່ນ​ຮ​ວງ ແລະ​ ເກີດມີ ຄວາມໃຝ່ຝັນຢາກເຫັນຢາກຮຽນຮູ້ໃນຄັງ​ສິ​ລະ​ປະ​ແຫ່​ງນີ້​ທີ່ສຸດ.​

ປີ 1962, ຟັນ​ຈິນ​ຊື່ ​ແລະ ​ໝູ່​ຮ່ວມ​ຮຽນ 3 ຄົນ​ໄດ້ໄປ​ຝຶກງານ​ຢູ່​ຕູ່ນ​ຮວງ, ເທື່ອນັ້ນ​ແມ່ນ​ເທື່​ອ​ທຳ​ອິດທີ່​ເພິ່ນໄດ້​ເຫັນ​ຕູ່ນ​ຮ​ວງ. ນາງ​ກັບ​ໝູ່​ຮ່ວມ​ຮຽນຫາກໍແລ່ນ​ເຂົ້າ​ໄປໃນຖ້ຳ​ ກໍ​ຮູ້ສຶກປະທັບ​ໃຈຫຼາຍຕໍ່ກັບ​ພະ​ພຸດ​ທະ​ຮູບນ້ອຍໃຫຍ່​ແລະ​ ຮູບຝາຜະໜັງ​ນາງ​ຟ້າ​ທີ່ສວຍສົດງົດງາມ, ນາງຈົນ​ອຸ​ທານຂຶ້ນ​ວ່າ: “ໂອ, ດີ​ແທ້ໆ! ງາມ​ຫຼາຍ!”

ແຕ່​ວ່າ ຊີ​ວິດ​ການ​ເປັນ​ຢູ່​ຢູ່ນອກ​ຖ້ຳ​ພັດ​ຫຍຸ້ງ​ຍາກ​ລຳ​ບາກ​ທີ່ສຸດ​.

ຖ້ຳ​ໂມ້​ກ່າວຕັ້ງ​ຢູ່​ພາກ​ຕາ​ເວັນ​ຕົກ​​ຂອງ​ແຂວງ​ກັ່ນ​ຊູ້, ອາ​ກາດ​ແຫ້ງ​ຫຼາຍ, ມີ​ດິນ​ຊາຍ​ເຫຼືອງພັດປິວ​ເຕັມ​ທ້ອ​ງ​ຟ້າ, ສະນັ້ນ ຈຶ່ງບໍ່ມີຜູ້ໃດຕັ້ງ​ຖິ່ນ​ຖານ​ຢູ່​ຫັ້ນ. ເຖິງວ່າໃຈ​ກຽມພ້ອມ​ແລ້ວ​​ກໍ​ຕາມ, ແຕ່ຍ້ອນວ່າ​ບໍ່​ລຶ້ງ​ກັບສະພາບ​ດິນ​ຟ້າ​ອາ​ກາດ ​ແລະ ​ອາ​ຫານ​ການ​ກິນ, ທັງມັກເຫັນ​​ໜູ​ແລ່ນ​ໄປ​ມາ​ໃນ​ຫ້ອງ ລ້ວນ​ແຕ່​ເຮັດ​ໃຫ້​ນາງ​ທົນ​ບໍ່​ໄຫວ. ໄລ​ຍະ​ຝຶກ​ງານ​ບໍ່​ທັນໝົດເວ​ລາກຳນົດ ນາງ​ຟັນ​ຈິນ​ຊື່​ກໍ​ກັບ​ຄືນ​ໂຮງ​ຮຽນ​ຍ້ອນ​ເປັນ​ພະ​ຍາດ, ແລະ ​ກໍ​ບໍ່​ຄຶດ​ວ່າ​ຈະກັບ​ຄືນ​ໄປ​ຖ້ຳ​ໂມ້​ກ່າວ​ອີກ.

ແຕ່​ບໍ່​ນຶກ​ບໍ່​ຝັນ​ວ່າ, ເມື່ອຮອດ​ປີ 1963 ເຊິ່ງເປັນປີທີ່ນາງຮຽນຈົບ, ຟັນ​ຈິນ​ຊື່​ໄດ້ຖືກ​ສັບຊ້ອນ​ໄປເຮັດວຽກ​ຢູ່​​ຕູ່ນ​ຮວງ​. ພໍ່ຂອງນາງ​ເປັນ​ຫ່ວງສຸ​ຂະ​ພາບ​ຂອງ​ລູກ​ສາວຫລາຍ ຈຶ່ງ​ຂຽນ​ຈົດ​ໝາຍ​ສະບັບ​ໜຶ່ງໄປເຖິງໂຮງຮຽນໂດຍສະເພາະ​, ເພື່ອຂໍໃຫ້​ທາງໂຮງ​ຮຽນ​ພິ​ຈາ​ລະ​ນາ​ວຽກ​ງານ​ຂອງ​ລູກ​ສາວ​ຄືນ​ໃໝ່. ເວ​ລານັ້ນ​ທົ່ວ​ປະ​ເທດ​ຈີນ​ກຳ​ລັງ​ສົ່ງເສີມໃຫ້ຮຽນນຳ​ທ່ານ​ເລີຍ​ເຟີ່ງ. ຟັນ​ຈິນ​ຊື່​ຄຶດ​ວ່າ “ຄວາມ​ຕ້ອງ​ການ​ຂອງ​ລັດ​ກໍ່​ເປັນ​ຄວາມ​ປາ​ຖະ​ໜາ​ຂອງ​ພວກ​ເຮົາ.” ສະ​ນັ້ນ ຟັນ​ຈິນ​ຊື່​ຈຶ່ງໄດ້ “ເກັບມ້ຽນ” ​ຈົດ​ໝາຍ​ສະ​ບັບ​ນີ້ເອົາໄວ້ ​ໂດຍ​ບໍ່​ສົ່ງໄປໃຫ້ທາງໂຮງ​ຮຽນ. ຈາກນັ້ນ​ເປັນ​ຕົ້ນ​ມາ, ຊາ​ຕາ​ກຳ​ຂອງ​ນາງ​ກໍ່ຕິດພັນ​ກັບ​ຕູ່ນ​ຮ​ວງ​ເລີຍ.

ທ່ານນາງ ຟັນຈິນຊື່ ລູກສາວເມືອງຕູ່ນຮວງ_fororder_樊锦诗3

ປີ 1998, ທ່ານນາງ ຟັນ​ຈິນ​ຊື່ ໄດ້​ຂຶ້ນ​ຮັບ​ຕຳ​ແໜ່ງ​ເປັນ​ຫົວ​ໜ້າ​ສະ​ຖາ​ບັນ​ຄົ້​ນ​ຄວ້າ​ຕູ່ນ​ຮວງ​ຊຸດ​ທີ 3. ເວ​ລານັ້ນ ​ນາງ​ໄດ້ພົບກັບ​ບັນ​ຫາ​ຮີບ​ດ່ວນ​ອັນ​ໜຶ່ງ ກໍ​ຄື: ເມື່ອ​ຜະ​ເຊີນ​ໜ້າກັບ​ສິ່ງ​ທ້າ​ທາຍ 3 ຢ່າງພ້ອມກັນ ​ຄື: ການທຳລາຍ​ຈາກ​ສິ່ງ​ແວ​ດ​ລ້ອມ​ທຳ​ມະ​ຊາດ, ສະພາບຖ້ຳ​​ເກົ່າ​ຂຶ້ນຫລາຍ ແລະ ມີ​ນັກ​ທ່ອງ​ທ່ຽວເຂົ້າມາຊົມຫລາຍໂພດ, ຄັນຊັ້ນຈະ​ເຮັດ​ແນວ​ໃດ​ຈຶ່ງຈະ​ສາ​ມາດ​ປົກປັກຮັກ​ສາ ມິ່ງຂວັນ​ດ້ານ​ສິ​ລະ​ປະ​ທີ່ມີອາຍຸພັນກວ່າປີທີ່ກຳລັງຊຸດໂຊມລົງໃຫ້ສາມາດ​ຄົງ​ຕົວ​ໄດ້​ຍາວ​ນານ ກວ່າ​ເກົ່າ​? ໃນ​ທີ່​ສຸດ, ຟັນ​ຈິນ​ຊື່​ຈຶ່ງຕົກ​ລົງ​ໃຊ້​ເຕັກ​ນິກດິຈິຕອນ​ເພື່ອ​ໃຫ້​ຖ້ຳ​ໂມ້​ກ່າວ​ “ມີ​ຄວາມ ສວຍງາມ​ຕະ​ຫຼອດ”.

ທ້າຍ​ປີ 2008,​ ວຽກງານການ​ອະນຸລັກຖ້ຳ​ໂມ້​ກ່າວແບບ​ສັງ​ລວມທີ່​ມີ​ຂະ​ໜາດ​ໃຫຍ່​ທີ່ສຸດ ແລະ ຮອບດ້ານທີ່ສຸດໃນປະຫວັດສາດໄດ້ເລີ່ມຂຶ້ນ, ໃນນີ້ ​ລວມ​ທັງ​ການປັບປຸງຜາຫີນໃຫ້ມີ ຄວາມ ແຂງທົນກວ່າເກົ່າ, ການປັບປຸງ​ແກ້​ໄຂພາຍຸ​ຊາຍ,​ ການ​ຖ່າຍ​ຮູບ​ ແລະ ຖ່າຍວິດີໂອວັດ​ຖຸ​ບູ​ຮານ​ຢູ່ໃນ 149 ຖ້ຳ​ລະ​ດັບ A  ພ້ອມດ້ວຍການ​ຈັດແຈງ ​ແລະ ​ການ​ສ້າງຖານ​ຂໍ້​ມູນ​ເປັນຕົ້ນ. ຂະ​ບວນການນີ້ຫຍຸ້ງຍາກ​ລຳ​ບາກ​ຫຼາຍ, ແຕ່​ຟັນ​ຈິນ​ຊື່​ໄດ້​ກັດ​ແຂ້ວ​ຍຶດ​ໝັ້ນ​ເຮັດຕະ​ຫຼອດມາ.

ເດືອນ​ສິງ​ຫາ​ປີ 2014, ສູນ​ສະ​ແດງ​ແບບດິຈິຕອນຂອງ​ຖ້ຳ​ໂມ້​ກ່າວໄດ້​ເລີ່ມເປີດ​ບໍ​ລິ​ການ, ​ຮູບ​ການ​ທ່ອງ​ທ່ຽວ​ແບບ​ໃໝ່ທີ່ “​ຄວບ​ຄຸມ​ຈຳ​ນວນ​ນັກ​ທ່ອງ​ທ່ຽວ, ຈອງ​ການທ່ອງທ່ຽວລ່ວງ​ໜ້າ​ຜ່ານທາງ​ອິນເຕີເນັດ, ຈ່າຍ​ຄ່າ​ບໍລິການຜ່ານທາງ​ອິນເຕີເນັດ, ທ່ຽວຊົມຖ້ຳຜ່ານທາງວີ​ດີ​ໂອ ແລະ ​ທ່ຽວຊົມຢູ່​ໃນຖ້ຳຕົວຈິງ” ກໍໄດ້ເລີ່ມຈັດຕັ້ງປະຕິບັດ. ວັນ​ທີ 1 ພຶດ​ສະ​ພາ​ປີ 2016, “ຕູ່ນ​ຮວງ​ດິຈິຕອນ” ໄດ້ເປີດ​​ບໍ​ລິ​ການ​ທາງ​ເນັດ​ຢ່າງ​ເປັນ​ທາງ​ການ. ຊາວ​ເນັດໃນທົ່ວໂລກ ​ມີ​ແຕ່​​ເຂົ້າເນັດເທົ່ານັ້ນ ກໍ​ສາ​ມາດ​ຊົມ​ຂໍ້​ມູນ​ດິຈິຕອນແບບ HD (ຄວາມຊັດເຈນທີ່ສຸດ) ແລະ ຮູບ ສາມມິຕິໃນ ​30 ຖ້ຳ​ໂມ້​ກ່າວ​ໄດ້ໂດຍ​ບໍ່ເສຍຄ່າ​. ພ້ອມ​ດຽວກັນ​ນັ້ນ, ຫໍ​ຮັບແຂກ ແລະ ໂຮງ​ຮູບ​ເງົາ​ດິຈິຕອນ ຂອງຖ້ຳໂມ້ກ່າວ ກໍໄດ້ເປີດ​ບໍ​ລິ​ການ, ນັກທ່ອງທ່ຽວກໍສາມາດຊົມ “ຕູ່ນຮວງດິຈິຕອນ” ຢູ່ສອງແຫ່ງນີ້ໄດ້ເຊັ່ນກັນ.

ທ່ານນາງ ຟັນຈິນຊື່ ລູກສາວເມືອງຕູ່ນຮວງ_fororder_樊锦诗

ປັດ​ຈຸ​ບັນ, ພາຍ​ໃຕ້​ການ​ຊຸກ​ຍູ້​ຂອງ​ທ່ານ​ນາງ​ຟັນ​ຈີນ​ຊື່, ສະ​ຖາ​ບັນ​ຄົ້ນ​ຄວ້າ​ຕູ່ນ​ຮວງ​ໄດ້​ມີ​ເຕັກ​ນິກດິຈິຕອນສຳລັບການເກັບ​ຮັກ​ສາຮູບ​ຝາຜະໜັງ​ຕູ່​ນ​ຮວງ ເຊິ່ງເປັນເຕັກນິກ ທີ່ກ້າວໜ້າ ຊຸດໜຶ່ງ, ໄດ້ກຳ​ນົດ​ມາດ​ຕະຖານກ່ຽວກັບການອະນຸລັກວັດຖຸບູຮານ ດ້ວຍເຕັກນິກດິຈິຕອນ ຢ່າງເປັນລະບົບ, ແລະ​ຄ່ອຍໆເຮັດໃຫ້​ທົ່ວໂລກ​ສາມາດຊົມ​ໃຊ້​ຮູບ​ພາບ ​ແລະ​ ວີ​ດີ​ໂອ​ຂອງ 30 ຖ້ຳ​ໂມ້​ກ່າວທີ່ມີຄວາມຊັດເຈນສູງ ​ໄດ້ຮ່ວມກັນ. ມາຮອດ​ປັດ​ຈຸ​ບັນນີ້,​​ ຈຳ​ນວນຜູ້​ເຂົ້າ​ຊົມເວັບ​ໄຊ​ຊັບ​ພະ​ຍາ​ກອນ “​ຕູ່ນ​ຮວງດິຈິຕອນ” ໃນທົ່ວໂລກໄດ້ມີ​ຫຼາຍກວ່າ 7 ລ້ານ​ເທື່ອ​ຄົນ.

ສຳ​ລັບ​ຄວາມ​ພະ​ຍາ​ຍາມ​ຂອງ​ຕົນ​ເປັນ​ເວ​ລາ​ຫຼາຍ​ປີ, ທ່ານ​ນາງ​ຟັນ​ຈິນ​ຊື່​ ກ່າວວ່າ: ຕົນເອງ “ພ​ຽງ​ແຕ່​ເປັນຜູ້ສືບທອດແລະຖ່າຍທອດຄົນໜຶ່ງເທົ່ານັ້ນ, ການອະນຸລັກມໍລະດົກວັດທະນະທຳ ຍັງຕ້ອງການການຊຸກຍູ້ຈາກຫຼາຍເຊັ່ນຄົນ”. ຫຼັງ​ຈາກ​ໝົດ​ອາ​ຍຸການ ​ການ​ເປັນຫົວ​ໜ້າ​ສະ​ຖາ​ບັນ​ແລ້ວ, ເພິ່ນ​ໄດ້​ເຂົ້າ​ຮ່ວມ​ວຽກ​ງານ​ຮຽບ​ຮຽງ​ບົດ​ລາຍງານ​ກ່ຽວກັບບູຮານນະຄະດີ​ຖ້ຳ​ຕູ່ນ​ຮວງທີ່ມີ ຈຳນວນ 100 ເຫຼັ້ມ. ປີ 2011, ບົດ​ລາຍ​ງານກ່ຽວກັບບູຮານນະຄະດີ​ຖ້ຳຕຸ່ນຮວງເລກທີ 266-275​ ເຫຼັ້ມ​ທີ 1 ໄດ້ຖືກ​ພິມ​ຈຳ​ໜ່າຍ, ນີ້ເປັນ​ເອ​ກະ​ສານ​ທີ່ລະ​ອຽດ​ທີ່​ສຸດ​ກ່ຽວ​ກັບ​ຖ້ຳ​ໂມ້​ກ່າວ.

ທ່ານ​ນາງ​ຟັນ​ຈິນ​ຊື່​ເວົ້າ​ວ່າ: ເມື່ອ “ຮອດ​ອາ​ຍຸ​ຄື​ກັບຂ້າພະເຈົ້ານີ້, ກໍ​ຈະ​ຮູ້​ສຶກວ່າ ຊີ​ວິດ ຄົນເຮົານີ້​ມັນ​ສັ້ນ​ແທ້ໆ. ຖ້າທຸກຄົນ​ລ້ວນ​ແຕ່​ພະ​ຍາ​ຍາມ​ເຮັດ​ເລື່ອງ​ນ້ອຍເລື້ອງ​ໜຶ່ງ​ ສັງ​ຄົມ​ກໍ່ຈະ​ກ້າວ​ໜ້າ​ໄດ້, ຕົນ​ເອງ​ກໍ​ບໍ່​ແມ່ນເກີດ​ມາ​ໃນໂລກນີ້ແບບໄຮ້ປະໂຫຍດ. ຕະ​ຫຼອດ​ຊີ​ວິດຂອງ ຂ້າພະເຈົ້າ ​ພຽງແຕ່​ເຮັດ​ວຽກ​ເລື່ອງ​ດຽວເທົ່ານັ້ນ, ນັ້ນ​ກໍ່​ຄື: ​ເຝົ້າ​ຮັກ​ສາ, ຄົ້ນ​ຄວ້າ ​ແລະ ໂຄສະນາ ເຜີຍແຜ່​ມໍ​ລະ​ດົກ​ວັດ​ທະ​ນະ​ທຳ​ໂລກ ຄື: ຖ້ຳ​ໂມ້​ກ່າວ​ທີ່ເມືອງ​ຕູ່ນ​ຮວງເທົ່ານັ້ນ, ນີ້​ກໍ່ເປັນ​ຄວາມ​ສຸກ​ອັນໃຫຍ່ຫລວງສຳລັບຂ້າພະເຈົ້າ. ຂ້າພະເຈົ້າໄດ້ອຸທິດຕະ​ຫຼອດ​ຊີ​ວິ​ດ​ຂອງຕົນໃຫ້ກັບຕູ່ນ​ຮວງນັ້ນ ແມ່ນຄຸ້ມຄ່າທີ່ສຸດແລ້ວ, ຂ້າພະເຈົ້າ​ບໍ່​ກິນ​ແໜງແຄງໃຈທີ່ໄດ້ເຮັດວຽກນີ້​.”

ທ່ານນາງ ຟັນຈິນຊື່ ລູກສາວເມືອງຕູ່ນຮວງ_fororder_樊锦诗1

 

ຄຳ​ເຫັນ

0