ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
"ຂ້າພະເຈົ້າແມ່ນໝູ່ຮ່ວມຮົບຂອງທ່ານເລີຍເຟີ່ງ, ຕ້ອງສ້າງກຽດຕິຍົດໃຫ້ເລີຍເຟີ່ງ, ເຮັດທຸກຢ່າງເໝືອນດັ່ງເລີຍເຟີ່ງ.” ນີ້ແມ່ນຄໍາໝັ້ນສັນຍາອັນເດັດດ່ຽວຂອງຄະນະສົ່ງທອດຈິດໃຈ ເລີຍເຟີ່ງ, ຍິ່ງເປັນຄຳຊີ້ທິດພາທາງການເຄື່ອນໄຫວຂອງຄ້າຍຊິ່ນໂຫ.
ສະມາຊິກໝົດທຸກຄົນຂອງຄ້າຍຊິ່ນໂຫ ຄະນະສົ່ງທອດຈິດໃຈເລີຍເຟີ່ງຂອງນະຄອນເຕີ້ງໂຈ່ວແຂວງເຮີນານ ລ້ວນແຕ່ແມ່ນທະຫານທີ່ຈົບພັນທະ, ເປັນໜຶ່ງໃນບັນດາຄ້າຍຕົ້ນຕໍຂອງຄະນະສົ່ງທອດຈິດໃຈເລີຍເຟີ່ງຂອງນະຄອນເຕີ້ງໂຈ່ວ. ໃນຫຼາຍປີມໍ່ໆມານີ້, ຄ້າຍດັ່ງກ່າວໄດ້ສືບທອດ ແລະ ເຜີຍແຜ່ຈິດໃຈເລີຍເຟີ່ງຢູ່ນະຄອນເຕີ້ງໂຈ່ວຢ່າງສະເໝີຕົ້ນສະເໝີປາຍ.
ວັນທີ 15 ສິງຫາ ປີ 2014, ເປັນວັນສ້າງຕັ້ງຄ້າຍຊິ່ນໂຫ. ທະຫານທີ່ຈົບພັນທະຈາກກອງທະຫານທີ່ທ່ານ ເລີຍເຟີ່ງເຄີຍຢູ່ນັ້ນ 108 ຄົນ ບໍ່ວ່າຈະເຮັດວຽກຢູ່ນາ, ສວນ, ໂຮງງານ ຫຼື ຕຶກອາຄານແລະອື່ນໆ ໄດ້ເຕົ້າໂຮມກັນເຂົ້າຮ່ວມຄ້າຍຊິ່ນໂຫ ຄະນະສົ່ງທອດຈິດໃຈເລີຍເຟີ່ງ.
ທ່ານ ເລີຍທ່ຽນໄຊ ທີ່ເປັນທະຫານ 5 ປີ, ເປັນທະຫານແບບຢ່າງທີ່ດີໃນການຮຽນນຳເລີຍເຟີ່ງ ໃນກອງທະຫານທີ່ທ່ານເລີຍເຟີ່ງເຄີຍຢູ່. ທ່ານ ເລີຍທ່ຽນໄຊເລົ່າຄືນວ່າ: “ເມື່ອໄດ້ຍິນວ່າຈະສ້າງຕັ້ງຄ້າຍຊິ່ນໂຫ, ຄົນທັງຫຼາຍກໍໄດ້ຟ້າວຮ້ອງຂໍເຂົ້າຮ່ວມ. ພວກເຮົາສ່ວນຫຼາຍກໍມີວຽກເຮັດຂອງໃຜມັນ ແຕ່ເຖິງວ່າຈະຄາວຽກແບບໃດ, ເມື່ອຍແນວໃດ, ເລື່ອງຂອງຄ້າຍກໍຕ້ອງເຮັດໃຫ້ທັນເວລາ”.
ທ້າວ ລີວເພີງ ສະມາຊິກຄ້າຍທີ່ມີອາຍຸໜຸ່ມນ້ອຍກວ່າໝູ່ໄດ້ເວົ້າວ່າ: “ຂ້າພະເຈົ້າເຄີຍເປັນທະຫານຢູ່ກອງທະຫານທີ່ທ່ານເລີຍເຟີ່ງເຄີຍຢູ່, ຫຼັງຈາກຈົບພັນທະແລ້ວກໍໄດ້ເຂົ້າຮ່ວມຄ້າຍຊິ່ນໂຫ ແລະຮູ້ສຶກວ່າ ໄດ້ກັບຄືນຄອບຄົວຂອງຕົນ”. ແຕ່ຍາມຍັງນ້ອຍ, ລີວເພີງກໍໄດ້ຮຽນແຕ່ງກິນ ແລະໄດ້ເປີດຮ້ານອາຫານນ້ອຍແຫ່ງໜຶ່ງຫຼັງຈາກຈົບພັນທະເປັນທະຫານແລ້ວ. ຫຼັງຈາກເຂົ້າຮ່ວມຄ້າຍຊິ່ນໂຫແລ້ວ, ລາວຖືຄຳເວົ້າທີ່ວ່າ “ໝູ່ຮ່ວມຮົບຂອງເລີຍເຟີ່ງຕ້ອງສ້າງກຽດຕິຍົດ ໃຫ້ ເລີຍເຟີ່ງ” ເປັນຄະຕິເຕືອນໃຈ. ໂດຍໄດ້ບໍລິຈາກອາຫານໃຫ້ຜູ້ພະເນຈອນ ແລະຜູ້ເຖົ້າທີ່ໂດດດ່ຽວເລື້ອຍໆ.
“ຂ້າພະເຈົ້າບໍ່ຄ່ອຍຢູ່ເຮືອນ, ແຕ່ເມື່ອຮອດເວລາຈັດກິດຈະກຳໃນຄ້າຍເມື່ອໃດ, ຕາບໃດເມື່ອນັ້ນ, ສິ່ງທີ່ຂ້າພະເຈົ້າຊ່ວຍເຮັດໄດ້ ຂ້າພະເຈົ້າກໍຕ້ອງປະກອບສ່ວນຕາມຄວາມສາມາດຂອງຕົນ”. ທ່ານ ເຊີນຫຢີວຮ້ານ ໄປຫາວຽກເຮັດງານທຳຢູ່ນະຄອນເຊີ່ນເຈີ້ນເລື້ອຍໆ ແຕ່ລາວບໍ່ເຄີຍລືມຄວາມເປັນສະມາຊິກຄ້າຍຊິ່ນໂຫຂອງຕົນເອງ, ທ່ານໄດ້ເຂົ້າຮ່ວມກິດຈະກໍາບໍລິຈາກຂອງຄ້າຍຊິ່ນໂຫ 5 ຄັ້ງ.
ຄຽງຄູ່ກັບການເຂົ້າຮ່ວມຂອງທະຫານທີ່ຈົບພັນທະເປັນກຸ່ມໆ, ສະມາຊິກຂອງຄ້າຍຊິ່ນໂຫ ກໍໄດ້ເພີ່ມຂຶ້ນຕາມລຳດັບ; ຈາກຈໍານວນສະມາຊິກເບື້ອງຕົ້ນ 108 ຄົນ ເພີ່ມຂຶ້ນເຖິງ 600 ກວ່າຄົນ. ເຂົາເຈົ້າໄດ້ປະຕິບັດຕາມຈິດໃຈ “ຕະປູ” ຂອງທ່ານເລີຍເຟີ່ງ, ຄືເປັນຜູ້ປະຕິບັດຕົວຈິງ ທັງເປັນຜູ້ຊຸກຍູ້ ແລະສ້າງສາຢູ່ຂັ້ນຮາກຖານ.
ໃນບັ້ນການລຶບລ້າງຄວາມທຸກຍາກ, ທ່ານຮວງຈື້ ສະມາຊິກຄ້າຍຊິ່ນໂຫໄດ້ສ້າງນິຄົມລ້ຽງສັດ ໂດຍໄດ້ນຳພາປະຊາຊົນ 3000 ກວ່າຄອບຄົວ ຫຼຸດພົ້ນອອກຈາກຄວາມທຸກຍາກ ແລະຮັ່ງມີຂຶ້ນ. ທ່ານ ຮວງຈື້ ກ່າວວ່າ: “ໃນການສ້າງຄວາມຜາສຸກໃຫ້ແກ່ພີ່ນ້ອງທັງຫຼາຍໃນບ້ານເກີດເມືອງ ນອນ, ການອອກແຮງສຸດຂີດເພື່ອຊ່ວຍເຫຼືອຄອບຄົວທີ່ທຸກຍາກແຕ່ລະຄອບຄົວ ແລະສະໜັບສະໜູນຊາວບ້ານຜູ້ມີຄວາມຕ້ອງການ... ສິ່ງເຫຼົ່ານີ້ ຂ້າພະເຈົ້າຈະເຂົ້າຮ່ວມຢ່າງແນ່ນອນ.”
ໃນການຊຸກຍູ້ສ້າງຊົນນະບົດໃຫ້ຈະເລີນຮຸ່ງເຮືອງຢ່າງຮອບດ້ານ, ສະມາຊິກ 600 ກວ່າຄົນ ໄດ້ລະດົມເງິນທຶນດຳເນີນໂຄງການປຸງແຕ່ງ ຫຼືປູກເຂົ້າ ແລະ ລ້ຽງກຸ້ງຮ່ວມກັນ ຫຼື ປູກພືດພິເສດ. ໃນນັ້ນ, ມີເກືອບ 300 ຄົນ ໄດ້ຖືເອົາການປູກພືດ, ລ້ຽງສັດ ແລະ ປຸງແຕ່ງ ເປັນອາຊີບຕົ້ນຕໍ.
ທ່ານ ຈ້າວຜູລິນ ທີ່ເປັນສະມາຊິກຄ້າຍຊິ່ນໂຫ ໄດ້ຄ່ອຍໆຊອກຄົ້ນ ແລະສະສົມບົດຮຽນ ໂດຍໄດ້ສ້າງຕັ້ງບໍລິສັດບໍລິການຮ້ານອາຫານ, ເຮັດໃຫ້ຈຳນວນທະຫານທີ່ຈົບພັນທະ 62 ຄົນມີວຽກເຮັດງານທຳ; ສ່ວນທ່ານ ຕີ່ງເຊີ້ງຈວີ່ນ ໄດ້ສ້າງຕັ້ງໂຮງຮຽນສອນຂັບລົດ ແລະສວນສາທາລະນະຊີວະພາບດ້ານວັດທະນະທຳລົດ ໂດຍໄດ້ຊ່ວຍໃຫ້ທະຫານທີ່ຈົບພັນທະ 860 ຄົນໄດ້ປະກອບອາຊີບຄືນໃໝ່.
ສະມາຊິກຄ້າຍຊິ່ນໂຫມາຈາກຂະແໜງການຕ່າງໆ, ເຂົາເຈົ້າໄດ້ປະກອບສ່ວນແບບງຽບໆຕາມ ອາຊີບຂອງຕົນ, ໄດ້ປະຕິບັດຕາມຈິດໃຈເລີຍເຟີ່ງຕະຫຼອດມາ, ໃຊ້ການກະທຳຕົວຈິງສ້າງແຮງ ບັນດານໃຈແກ່ຄົນອື່ນ. ເສີມຂະຫຍາຍຈິດໃຈເລີຍເຟີ່ງໄປຮອດທຸກແຈທຸກຈໍໃນທົ່ວສັງຄົມ.
ໃນລະດູໃບໄມ້ປົ່ງຂອງປີ 2020, ເມື່ອພະຍາດໂຄວິດ-19 ແຜ່ລະບາດຢູ່ຈີນ, ຄ້າຍຊິ່ນໂຫໄດ້ບຸກບືນສູ້ຮົບຢູ່ແນວໜ້າຕ້ານພະຍາດ. ມີສະມາຊິກ 20 ກວ່າຄົນ ໄດ້ຊ່ວຍເຫຼືອຊາວສວນເກັບພືດຜັກ ແລະ ຫໍ່ເອົາພືດຜັກ ໄດ້ 5-6 ໂຕນ ແລ້ວສົ່ງໄປໃຫ້ນະຄອນອູຮັ້ນຢ່າງທັນການ.
“ໃນຖານະທີ່ເປັນສະມາຊິກຄ້າຍຊິ່ນໂຫ ແລະເປັນສະມາຊິກຂອງຄະນະສົ່ງທອດຈິດໃຈເລີຍເຟີ່ງ, ການຊ່ວຍເຫຼືອແກ້ໄຂຄວາມຫຍຸ້ງຍາກຂອງມະຫາຊົນເປັນໜ້າທີ່ຮັບຜິດຊອບຂອງພວກເຮົາ.” ທ່ານຕູ້ເຮີງ ຜູ້ຊີ້ນຳຂອງຄ້າຍຊິ່ນໂຫແນະນຳໃຫ້ຮູ້ວ່າ: “ໃນລະດູຮ້ອນປີນີ້ ຢູ່ປະເທດຈີນມີຫຼາຍໆແຫ່ງໄດ້ມີຝົນຕົກໜັກ, ສະມາຊິກຄ້າຍຊິ່ນໂຫ 200 ກວ່າຄົນ ໄດ້ຂົນສົ່ງວັດຖຸກູ້ຊີບ ເດີນທາງໄປຮອດເຈີ້ງໂຈ່ວ ແລະຊິ່ນຊ່ຽງ. ເຂົາເຈົ້າໄດ້ຍ່າງຕາມທາງຂີ້ຕົມ 10 ກວ່າກິໂລ ເພື່ອຊອກຫາ ແລະຊ່ວຍກອບກູ້ຕາມຄອບຄົວຕ່າງໆ; ທັງຂັບເຮືອໄວຂົນສົ່ງປະຊາຊົນໄປ-ກັບ ມື້ລະ 30 ກວ່າຖ້ຽວ. ໃນ 6 ວັນ 6 ຄືນ, ຄ້າຍຊິ່ນໂຫໄດ້ຊ່ວຍກອບກູ້ ແລະຍົກຍ້າຍປະຊາຊົນຜູ້ປະສົບໄພ ໄດ້ 2 ພັນກວ່າຄົນ.”
ຕັ້ງແຕ່ສ້າງຕັ້ງຄ້າຍຊິ່ນໂຫມານີ້ ເຂົາເຈົ້າໄດ້ບໍລິຈາກເງິນໃຫ້ຄອບຄົວຜູ້ທຸກຍາກ, ປະຊາຊົນເຂດປະສົບໄພ ແລະຄົນເຈັບຜູ້ທຸກຍາກເກືອບ 2 ລ້ານຢວນ, ບໍລິຈາກເຄື່ອງໃຊ້ 2 ໝື່ນກວ່າຢ່າງ, ເຮັດເລື່ອງທີ່ດີ 1 ໝື່ນກວ່າເທື່ອ. ໃນສະມາຊິກຄົນເຫຼົ່ານີ້ ມີ 50 ກວ່າຄົນໄດ້ຮັບຕຳແໜ່ງເປັນເຈົ້າໜ້າທີ່ປະຈຳບ້ານ, ເຄີຍໄດ້ນຳພາບ້ານທຸກຍາກ 20 ກວ່າບ້ານ ຫຼຸດພົ້ນອອກຈາກຄວາມທຸກຍາກ ແລະຮັ່ງມີຂຶ້ນ. ມີ 100 ກວ່າຄົນ ຖືກອົງການປົກຄອງນະຄອນເຕີ້ງໂຈ່ວປະເມີນເປັນ “ສະມາຊິກພັກກອມມູນິດຈີນຜູ້ດີເດັ່ນ”. ເຂົາເຈົ້າໄດ້ເດີນຕາມອຸດົມຄະຕິຂອງເລີຍເຟີ່ງ ໂດຍໄດ້ສ້າງໂສມໜ້າໃໝ່ແຫ່ງຈິດໃຈເລີຍເຟີ່ງໃນຍຸກສະໄໝໃໝ່.
ຄຳເຫັນ
0