ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ມີຜູ້ຊາຍຄົນໜຶ່ງ, ລາວໄດ້ອອກຈາກເຂດພູດອຍໃນຍາມອາຍຸ 13 ປີ, ຕໍ່ມາສ້າງລາຍຮັບມາໄດ້ຫຼາຍສິບລ້ານຢວນ; ເມື່ອອາຍຸໄດ້ 41 ປີ ລາວໄດ້ຕັດສິນໃຈກັບເມືອບ້ານເກີດເພື່ອສ້າງທາງຫຼວງທີ່ເຊື່ອມຕໍ່ກັບພາຍນອກ, ທັງໄດ້ສ້າງເຂດທ່ອງທ່ອງລະດັບ 4A ເຊິ່ງປຽບເໝືອນເສັ້ນທາງດຳລົງຊີວິດ ແລະ ເສັ້ນທາງສ້າງຄວາມຮັ່ງມີໃຫ້ແກ່ຊາວບ້ານ, ເຮັດໃຫ້ບ້ານພູດອຍທີ່ທຸກຍາກ ກາຍເປັນບ້ານຮັ່ງມີ ເຊິ່ງແຕ່ລະຄອບຄົວມີລາຍໄດ້ຫຼາຍກວ່າ 1 ແສນຢວນຕໍ່ປີ. ຄົນຜູ້ນີ້ກໍ່ແມ່ນທ່ານ ຊືນາຕິງໂຈ ຊາວເຜົ່າຕິເບດທີ່ມີປະສົບການທີ່ອັດສະຈັນ.
ທ່ານ ຊືນາຕິງໂຈ ພັກອາໄສຢູ່ບ້ານບາລອກ ບ້ານນ້ອຍໆແຫ່ງໜຶ່ງຕາມ ເຂດ ພູດອຍທີ່ຢູ່ທາງພາກຕາເວັນຕົກສຽງໃຕ້ຂອງຈີນ, ຊາວບ້ານນີ້ ເປັນຊົນເຜົ່າຕິເບດໝົດ.
ບ້ານນີ້ ຕັ້ງຢູ່ໂນນພູ, ສາມດ້ານແມ່ນພູຫິມະທີ່ສູງພຽງເມກ, ຢູ່ທາງໜ້າແມ່ນເຫວເລິກໆ. ຈາກບ້ານນີ້ໄປພາຍນອກ ມີແຕ່ທາງທີ່ຄົດໆລ້ຽວໆ ແລະ ກວ້າງພຽງແຕ່ 30 ຊັງຕິແມັດເທົ່ານັ້ນ, ເຮັດໃຫ້ຊາວບ້ານທັງຫຼາຍຕິດຕໍ່ພົວພັນກັບໂລກ ພາຍນອກໄດ້ຍາກທີ່ສຸດ.
ໃນຍາມຊືນາຕິງໂຈມີອາຍຸໄດ້ 10 ປີ, ລາວໄປຊ່ວຍເຮັດວຽກຢູ່ຮ້ານຕີເຫຼັກ ຄື ນັ່ງຢູ່ທາງຂ້າງເຕົາໄຟເພື່ອດຶງບັ້ງສູບລົມ, ແຕ່ບໍ່ນຶກບໍ່ຝັນວ່າ ເສດເຫຼັກທີ່ຖືກເຜົາ ແດງ ທີ່ຊ່າງຕີເຫຼັກຕີອອກມານັ້ນ ໄດ້ປິວເຂົ້າຕາຂອງລາວໂດຍບັງເອີນ.
ຄົນໝົດຄອບຄົວ ໃຜກໍບໍ່ຮູ້ວ່າຊິເຮັດແນວໃດ, ຕະຫຼອດຮອດເວລາຜ່ານໄປສອງມື້ແລ້ວ ທີ່ພໍ່ຂອງລາວກັບເມືອບ້ານ ຈຶ່ງພາລາວເຂົ້າໄປໃນເມືອງ. ພໍ່ ແລະລູກຍ່າງຕາມທາງນ້ອຍເສັ້ນນັ້ນ 4 ມື້ ຈຶ່ງໄປຮອດໂຮງໝໍໃນເມືອງ. ແຕ່ຍ້ອນວ່າໄປຊ້າໂພດ ຈຶ່ງໄດ້ພາດໂອກາດທີ່ດີໃນການປິ່ນປົວ.
ເທື່ອນີ້ກໍແມ່ນເທື່ອທຳອິດທີ່ ຊືນາຕິງໂຈ ໄດ້ເຫັນລົດຍົນໃນເມືອງ.
ໝົດວິທີ, ພໍ່ ແລະລູກ ຈຳເປັນຕ້ອງເດີນທາງກັບເມືອບ້ານທີ່ຕ້ອງໃຊ້ເວລາ 4 ມື້. ຊືນາຕິງໂຈຍ່າງຕາມຫຼັງພໍ່ ທັງຍ່າງທັງຄຶດ. ເມື່ອຍ່າງໄປໄດ້ຫຼາຍກວ່າເຄິ່ງທາງ, ຊືນາຕິງໂຈ ໄດ້ຢຸດຈຶ້ງ ແລະ ເວົ້າກັບພໍ່ວ່າ: ລູກຢາກສ້າງທາງເສັ້ນໜຶ່ງ!
ຮອດອາຍຸ 13 ປີແລ້ວ, ຊືນາຕິງໂຈໄດ້ບອກຄວາມຕັດສິນໃຈຂອງຕົນໃຫ້ຄອບຄົວຊາບວ່າ ລາວຢາກໄປເຮັດວຽກຢູ່ນອກພູດອຍ ແຕ່ໝົດຄອບຄົວພັດປະຕິເສດ, ພໍ່ໄດ້ຫ້າມລາວຫຼາຍເທື່ອ. ແຕ່ສຸດທ້າຍກໍບໍ່ມີໃຜສາມາດຫ້າມລາວໄດ້. ຮອດມື້ທີ່ ຊືນາຕິງໂຈ ອອກເຮືອນ, ພໍ່ໄດ້ເອົາເງິນ 35 ຢວນມອບໃຫ້ແກ່ລາວ, ເງິນກ້ອນນີ້ເປັນເງິນຂອງຄອບຄົວທີ່ສະສົມມາທັງໝົດ.
ແຕ່ນັ້ນມາ 28 ປີ, ຊືນາຕິງໂຈ ໄດ້ເຮັດວຽກຕ່າງໆ ເຊັ່ນ ເປັນຜູ້ອອກແຮງງານທາງກາຍທີ່ໜັກ, ເຂົ້າຮ່ວມກຸ່ມຂົນສົ່ງດ້ວຍຝູງມ້າ, ຂາຍເຄື່ອງຕາມຖະໜົນ, ເປີດຮ້ານຂາຍເຄື່ອງໃຊ້ໂລຫະ, ເປີດຮ້ານຊີ້ນຈຸ່ມ ແລະອື່ນໆ. ຍ້ອນວ່າລາວມີນິດໄສໃຈກວ້າງ, ເປັນຄົນຊື່ສັດ, ທັງມັກຊ່ວຍຄົນອື່ນ, ການດຳເນີນທຸລະກິດຂອງ ຊືນາຕິງໂຈ ຈຶ່ງນັບມື້ນັບໃຫຍ່ຂຶ້ນ, ໃນເມືອງໄດ້ເປີດຮ້ານຫຼາຍແຫ່ງ ທັງໄດ້ຊື້ເຮືອນຢູ່ ແລະລົດໃຫຍ່, ຢູ່ໃນທະນາຄານກໍມີເງິນອອມສິນຈຳນວນຫຼວງຫຼາຍ. ແຕ່ສິ່ງທີ່ລາວຄຶດໃນໃຈຕະຫຼອດມາ ຍັງແມ່ນຄວາມຫວັງທີ່ຢາກສ້າງທາງເສັ້ນໜຶ່ງໃຫ້ບ້ານເກີດ ທີ່ຕັ້ງໄວ້ໃນຍາມອາຍຸ 10 ປີ.
ດັ່ງນັ້ນ ອີກຄັ້ງໜຶ່ງ, ຊືນາຕິງໂຈ ບໍ່ເອົາຫົວຊານຳຄວາມຄັດຄ້ານຂອງຄອບຄົວ, ລາວໄດ້ຂາຍຮ້ານຄ້າຂອງຕົນໝົດ, ຈົນກະທັ້ງເອົາລົດໃຫຍ່ ແລະເຮືອນຢູ່ຂອງຕົນເປັນສິ່ງມັດຈຳໃຫ້ທະນາຄານ ໂດຍລະດົມເງິນທຶນມາໄດ້ 40 ລ້ານຢວນ ເພື່ອສ້າງທາງຫຼວງເສັ້ນໜຶ່ງຈາກບ້ານບາລອກໄປສູ່ນອກພູ.
ຊືນາຕິງໂຈ ໄດ້ໄປນະຄອນຄຸນມິງເພື່ອເຊີນຜູ້ຊ່ຽວຊານທີ່ກ່ຽວຂ້ອງລົງໄປສຳຫຼວດຢູ່ບ້ານເກີດ, ເມື່ອຜູ້ຊ່ຽວຊານໄປສຳຫຼວດແລ້ວບອກວ່າ ສ້າງທາງເສັ້ນນີ້ ຢ່າງໜ້ອຍຕ້ອງການຫຼາຍຮ້ອຍລ້ານຢວນ, ສ່ວນ 40 ລ້ານຢວນມັນບໍ່ພໍດອກ. ຊືນາຕິງໂຈ ຈຶ່ງເລີ່ມກູ້ຢືມເງິນຈາກແຫ່ງຕ່າງໆ. ເພື່ອໃຫ້ໄດ້ເງິນກູ້, ທະນາຄານບາງແຫ່ງເຄີຍໄປຮອດ 50 ກວ່າເທື່ອກໍມີ.
ມີເທື່ອໜຶ່ງ, ກອງປະຊຸມຂອງໂຄງການດັ່ງກ່າວໄດ້ຈັດຂຶ້ນຢູ່ຄຸນມິງ, ຫຼັງຈາກຄົ້ນຄວ້າພິຈາລະນາສະພາບການຂອງບ້ານບາລອກແລ້ວ ຜູ້ຊ່ຽວຊານທັງຫຼາຍໄດ້ໃຫ້ຂໍ້ສະຫຼຸບວ່າ ໂຄງການນີ້ເຮັດບໍ່ໄດ້. ຊືນາຕິງໂຈ ເວົ້າກັບຜູ້ຊ່ຽວຊານທັງຫຼາຍ ດ້ວຍຄວາມດູດດື່ມວ່າ: “ໃນບ່ອນຢູ່ຂອງພວກທ່ານ ມີນ້ຳປະປາ ມີໄຟຟ້າ ແລະ ມີທາງຫຼວງ, ແຕ່ພວກເຮົາພັດບໍ່ມີທາງຫຼວງຊ້ຳ, ບໍ່ຕ້ອງເວົ້າເຖິງນ້ຳປະປາ ແລະ ໄຟຟ້າ.”
ເພື່ອສຳຫຼວດ ແລະ ຊອກແລວທາງດັ່ງກ່າວ, ຊືນາຕິງໂຈ ມັກຈະຍ່າງຢູ່ຮ່ອມພູຫຼາຍມື້ຕິດຕໍ່ກັນເລື້ອຍໆ, ທັງລະດົມທຶນ, ທັງອອກແບບ, ທັງກໍ່ສ້າງ, ເຮັດຢູ່ຈັ່ງຊີ້ເປັນເວລາ 4 ປີ ໂດຍໃຊ້ເງິນລວມທັງໝົດ 850 ລ້ານຢວນແລ້ວ, ຈຶ່ງໄດ້ສ້າງທາງປູຢາງທີ່ກວ້າງ 6,5 ແມັດ ແລະ ຍາວ 58 ກິໂລແມັດຕາມຫີນພູຊັນສາຍໜຶ່ງໃຫ້ແກ່ບ້ານເກີດ. ເຮັດໃຫ້ຄວາມຝັນ ທີ່ຍ່າງອອກຈາກພູສູງຂອງບ້ານເກີດເມືອງນອນປາກົດຜົນເປັນຈິງ.
ຫຼັງຈາກສ້າງທາງຫຼວງສຳເລັດແລ້ວ, ຊືນາຕິງໂຈ ໄດ້ສືບຕໍ່ລະດົມທຶນເພື່ອແກ້ໄຂບັນຫາໄຟຟ້າຂອງບ້ານບາລອກ. ແລະມາຮອດປີ 2008 ໄດ້ບັນລຸເປົ້າໝາຍ ທີ່ມີໄຟຟ້າໃຊ້, ມີທາງຫຼວງ ແລະສື່ສານກັບພາຍນອກ ເຊິ່ງເປັນການປ່ຽນແປງສະພາບການຂອງບ້ານບາລອກ ທີ່ຕິດຕໍ່ພົວພັນກັບພາຍນອກໄດ້ຍາກນັ້ນ ໄດ້ຢ່າງເຖິງຖອງ.
ທ່ານ ຊືນາຕິງໂຈ ມັກເວົ້າຄຳສຸພາສິດຈີນຄຳໜຶ່ງເລື້ອຍໆວ່າ: “ມອບປາໃຫ້ ບໍ່ທໍ່ມອບແຫໃຫ້.” ເພື່ອປ່ຽນແປງສະພາບຫຼ້າຫຼັງທຸກຍາກຂອງບ້ານບາລອກຢ່າງເຖິງຖອງ ໂດຍພາຍໃຕ້ການສະໜັບສະໜູນຈາກຄະນະພັກ ອົງການປົກຄອງຂັ້ນຕ່າງໆ ແລະ ພາກສ່ວນທີ່ກ່ຽວຂ້ອງ, ທ່ານ ຊືນາຕິງໂຈ ໄດ້ລະດົມທຶນ 1,6 ຕື້ຢວນເພື່ອກໍ່ສ້າງເຂດທ່ອງທ່ຽວລະດັບຊາດ 4A ຢູ່ຮ່ອມພູຊຽງເກີລີລາ-ບາລອກ ຈົນເຮັດໃຫ້ພວກຊາວບ້ານເຂົ້າຮ່ວມການກໍ່ສ້າງ ແລະ ການດຳເນີນທຸລະກິດຂອງເຂດ ທ່ອງທ່ຽວ ໂດຍສາມາດມີລາຍໄດ້ຈາກຫຼາຍຊ່ອງທາງ ໂດຍໄດ້ແກ້ໄຂບັນຫາປະກອບອາຊີບ ແລະ ບັນຫາລຶບລ້າງຄວາມທຸກຍາກຂອງຊາວບ້ານ 500 ກວ່າຄົນຢູ່ບ້ານທີ່ຢູ່ອ້ອມຂ້າງເຂດທ່ອງທ່ຽວ, ໄດ້ຊ່ວຍຊາວບ້ານທັງຫຼາຍເດີນໄປສູ່ເສັ້ນທາງສ້າງຄວາມຮັ່ງມີ ແລະ ເສັ້ນທາງພັດທະນາແບບຍືນຍົງ ໂດຍຜ່ານການທ່ອງທ່ຽວ. ເຮັດໃຫ້ລາຍໄດ້ຂອງຊາວບ້ານແຕ່ລະຄອບຄົວທີ່ສະເລ່ຍຕໍ່ປີ ເພີ່ມຂຶ້ນຈາກສອງສາມພັນຢວນ ເປັນໜຶ່ງແສນກວ່າຢວນ. ພ້ອມກັນນັ້ນ ກໍເປັນການປະກອບສ່ວນທີ່ສຳຄັນເຂົ້າໃນວຽກງານຮັກສາຄວາມໝັ້ນທ່ຽງຂອງເຂດຕິເບດນຳອີກ.
ຄຳເຫັນ
0