ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເມື່ອອອກຈາກນະຄອນຊີ່ຊ່າງແຂວງເສສວນ, ຂັບລົດເດີນທາງໄປຕາມເສັ້ນທາງອັນຄົດລ້ຽວຢູ່ເທິງພູປະມານ 70 ກິໂລແມັດ, ໃຊ້ເວລາປະມານ 2 ຊົ່ວໂມງ, ຂ້າມຈອມພູທີ່ປົກຄຸ້ມໄປດ້ວຍເມກໝອກ, ກໍໄດ້ໄປຮອດບ້ານສ່ານເຫີກິ່ງແຂວງປົກຄອງຕົນເອງເຜົ່າອີລຽງສ່ານ. ເມື່ອໄປຮອດຫົວບ້ານ, ຈະໄດ້ເຫັນສິ່ງກໍ່ສ້າງໃໝ່ຫຼາຍແຖວ.ຢູ່ໃນເດີ່ນບ້ານຂອງເຮືອນປະຊາຊົນຢູ່ຫົວບ້ານ ແມ່ນເຕັມໄປດ້ວຍສາລີສີເຫຼືອງຄ້າຍຄືຄຳ, ເຊິ່ງເຮືອນແຫ່ງນີ້ແມ່ນເຮືອນໃໝ່ຂອງທ້າວຈີຫາວເຢຊິວທີ່ເປັນຄົນຊົນເຜົ່າອີ.
ວັນທີ 11 ກຸມພາປີ 2018, ໃນໄລຍະກ່ອນບຸນກຸດຈີນ, ທ່ານສີຈິ້ນຜິງໄດ້ເດີນທາງໄປຮອດບ້ານສ່ານເຫີ ແລະ ເຂົ້າສູ່ເຮືອນເກົ່າຂອງທ້າວຈີຫາວເຢຊິວ. ເຮືອນເກົ່າທີ່ກໍ່ດ້ວຍດິນແມ່ນຕ່ຳຫຼາຍ, ບໍ່ມີປ່ອງຢ້ຽມ. ທ່ານສີຈິ້ນຜິງໄດ້ກົ້ມຫົວຍ່າງເຂົ້າເຮືອນ, ໂອ້ລົມກັບຄອບຄົວທ້າວຈີຫາວເຢຊິວຢ່າງສະໜິດສະໜົມ, ສົ່ງເສີມໃຫ້ເຂົາເຈົ້າຫຼຸດພົ້ນອອກຈາກຄວາມທຸກຍາກໂດຍໄວ.
ວັນທີ 11 ກຸມພາປີ 2018，ທ່ານສີຈິ້ນຜິງຢ້ັຽມຢາມເຮືອນຂອງທ້າວຈີຫາວເຢຊິວ
ກິ່ງແຂວງລຽງສ່ານທີ່ເຮືອນທ້າວຈີຫາວເຢຊິວຕັ້ງຢູ່ນັ້ນເປັນເຂດຊຸມຊົນເຜົ່າອີໃຫຍ່ທີ່ສຸດໃນທົ່ວປະເທດຈີນ, ປະຊາຊົນເຜົ່າອີກວມ 54,16% ເຄີຍເປັນໜຶ່ງໃນເຂດທຸກຍາກທີ່ສຸດ. ທ່ານສີຈິ້ນຜິງເພິ່ນເອົາໃຈໃສ່ຫຼາຍຕໍ່ວຽກງານລຶບລ້າງຄວາມທຸກຍາກຂອງກິ່ງແຂວງລຽງສ່ານ, ແລະ ຫ່ວງໃຍປະຊາຊົນຢູ່ແຫ່ງນັ້ນ.
ວັນທີ 8 ມີນາປີ 2017, ໃນເວລາເຂົ້າຮ່ວມການພິຈາລະນາຂອງຄະນະຜູ້ແທນແຂວງເສສວນໃນກອງປະຊຸມຄັ້ງທີ 5 ຂອງສະພາປະຊາຊົນແຫ່ງຊາດຈີນສະໄໝທີ 12, ແລະຊອກຮູ້ຄວາມຄືບໜ້າຂອງການລຶບລ້າງຄວາມທຸກຍາກນຳຜູ້ແທນຈາກກິ່ງແຂວງລຽງສ່ານ. ທ່ານສີຈິ້ນຜິງກ່າວວ່າ, ເຂດທຸກຍາກທີ່ສຸດທີ່ຕິດຈອດກັນໃນທົ່ວປະເທດສ່ວນໃຫຍ່ ແມ່ນຂ້າພະເຈົ້າເຄີຍໄດ້ໄປຢາມໝົດແລ້ວ, ສຳລັບລວີລຽງ ແລະ ລຽງສ່ານ, ຂ້າພະເຈົ້າຍັງບໍ່ທັນໄດ້ໄປເຖິງ ແລະ ຈະພະຍາຍາມໄປໃນໄວໆນີ້.
ຫຼັງຈາກນັ້ນບໍ່ຮອດ 1 ປີ, ທ່ານສີຈິ້ນຜິງກໍໄດ້ເດີນທາງໄປສ່ວນເລິກຂອງພູລຽງສ່ານ, ແລະ ເຂົ້າໄປບ້ານສ່ານເຫີ.
ວັນທີ 11 ກຸມພາປີ 2018，ທ່ານສີຈິ້ນຜິງຢ້ຽມຢາມບ້ານສ່ານເຫີ
ເມື່ອຫວນຄືນເຖິງສະພາບການທີ່ທ່ານສີຈິ້ນຜິງຈັບມືກັບຕົນຢ່າງສະໜິດສະໜົມກັນເມື່ອກ່ອນນີ້ 3 ປີປາຍ, ທ້າວຈີຫາວເຢຊິວຍັງຄົງຮູ້ສຶກຕື່ນເຕັ້ນໃຈທີ່ສຸດ, ລາວເວົ້າວ່າ: “ໃນມື້ນັ້ນ, ຫຼັງຈາກຫິມະຕົກແລ້ວແມ່ນມີແສງແດດປອດໂປ່ງສົດໃສຫຼາຍ, ທ່ານສີຈິ້ນຜິງໄດ້ຍ່າງໄປຕາມທາງທີ່ເຕັມດ້ວຍດິນຕົມຫຼັງຈາກຫິມະຕົກ. ທ່ານໄດ້ຈັບມື ແລະລົມເລື່ອງຊີວິດປະຈຳວັນກັບພວກເຮົາຢ່າງສະໜິດສະໜົມກັນ, ແລະໄດ້ກວດເບິ່ງເດີ່ນບ້ານ, ເອົາໃຈໃສ່ພວກເຮົາວ່າມີນ້ຳປະປາໃຊ້ບໍ່, ເພິ່ນເປີດ ແລະ ຈັບເບິ່ງຜ້າຫົ່ມ, ແລ້ວຖາມວ່າ ຜ້າຫົ່ມອົບອຸ່ນບໍ່? ແລະຖາມພວກເຮົາວ່າ ການກິນ ການນຸ່ງຖືເປັນແນວໃດ, ລູກໄດ້ເຂົ້າໂຮງຮຽນແລ້ວບໍ່?”
ທ້າວຈີຫາວເຢຊິວເລົ່າສູ່ຟັງວ່າ: “ທ່ານສີຈິ້ນຜິງບອກຄອບຄົວຂອງຂ້ອຍວ່າ: ທ່ານໄດ້ເປັນຫ່ວງເປັນໃຍນຳປະຊາຊົນເຜົ່າອີມາໂດຍຕະຫຼອດ, ເມື່ອເຫັນພວກສະຫາຍມີຊີວິດການເປັນຢູ່ທີ່ນັບມື້ນັບດີຂຶ້ນ, ທ່ານກໍຮູ້ສຶກດີໃຈຫຼາຍ, ຫວັງວ່າພວກເດັກນ້ອຍຈະໄດ້ດຳລົງຊີວິດຢ່າງມີຄວາມສຸກ.”
ທ່ານສີຈິ້ນຜິງຖ່າຍຮູບຮ່ວມກັບຄອບຄົວທ້າວຈີຫາວເຢຊິວ
ໃນເວລາອຳລາໄປ, ທ່ານສີຈິ້ນຜິງຍັງເປັນເຈົ້າການສະເໜີວ່າຖ່າຍຮູບຮ່ວມກັບຄອບຄົວຂອງທ້າວຈີຫາວເຢຊິວເພື່ອເປັນທີ່ລະນຶກ, ພ້ອມທັງທັງບອກໃຫ້ພະນັກງານວ່າ ຕ້ອງສົ່ງຮູບຖ່າຍນີ້ໃຫ້ທ້າວຈີຫາວເຢຊິວ. ທ້າວຈີຫາວເຢຊິວເວົ້າວ່າ “ເມື່ອຟັງຄວາມເວົ້າຂອງທ່ານສີຈິ້ນຜິງແລ້ວ, ຮູ້ສຶກປະທັບໃຈຫຼາຍ.”
ຢູ່ບ້ານສ່ານເຫີ, ທ່ານສີຈິ້ນຜິງຊີ້ອອກວ່າ, ພວກເຮົາພັດທະນາສັງຄົມນິຍົມ, ກໍແມ່ນເພື່ອໃຫ້ປະຊາຊົນບັນດາເຜົ່າດຳລົງຊີວິດຢ່າງມີຄວາມສຸກ. ໜ້າທີ່ທີ່ລຳບາກທີ່ສຸດ ແລະໜັກໜ່ວງທີ່ສຸດໃນການສ້າງສັງຄົມອີ່ມໜຳສຳລານໃຫ້ສຳເລັດຜົນຢ່າງຮອບດ້ານ ນັ້ນ ແມ່ນຂຶ້ນຢູ່ກັບເຂດທຸກຍາກ, ໂດຍສະເພາະແມ່ນເຂດທຸກຍາກທີ່ສຸດ, ບໍ່ວ່າຈະເປັນບັນຫາຫຍຸ້ງຍາກຫຼາຍເທົ່າໃດກໍຕ້ອງແກ້ໄຂໃຫ້ໄດ້, ບໍ່ວ່າບັ້ນບຸກທະລຸຄັ້ງນີ້ຈະລຳບາກຫຼາຍເທົ່າໃດ ກໍຕ້ອງສູ້ໃຫ້ໄດ້ຮັບໄຊຊະນະ, ຢູ່ບົນເສັ້ນທາງທີ່ກ້າວໄປສູ່ຄວາມອີ່ມໜຳສຳລານຢ່າງຮອບດ້ານ ຈະບໍ່ຄວນລືມທຸກຊົນເຜົ່າ ແລະ ທຸກຄອບຄົວ. ທ່ານສີຈິ້ນຜິງຍັງກ່າວເນັ້ນໜັກຕື່ມອີກວ່າ, ຕ້ອງສືບຕໍ່ເພີ່ມຄວາມເຂັ້ມແຂງທີ່ຍົກຍ້າຍປະຊາຊົນໄປອາໄສຢູ່ບ່ອນທີ່ເໝາະສົມກວ່າເພື່ອຫຼຸດພົ້ນອອກຈາກຄວາມທຸກຍາກ, ເຮັດໃຫ້ພີ່ນ້ອງຮ່ວມຊາດເຜົ່າອີທີ່ຢູ່ໃນສ່ວນເລິກຂອງເຂດພູດອຍຍ້າຍເຂົ້າໄປສູ່ເຮືອນໃໝ່ທີ່ປອດໄພ ແລະ ສະດວກສະບາຍ, ພ້ອມທັງແກ້ໄຂຄວາມຫຍຸ້ງຍາກໃນດ້ານການເດີນທາງໃຫ້ເຂົາເຈົ້າ.
ປັດຈຸບັນນີ້, ຢູ່ຈຸດຈັດສັນປະຊາຊົນຜູ້ຍົກຍ້າຍທີ່ສ້າງຂຶ້ນໃໝ່ຂອງບ້ານສ່ານເຫີ, 253 ຄອບຄົວ ລວມທັງໝົດ 1294 ຄົນໄດ້ຍ້າຍເຂົ້າສູ່ເຮືອນໃໝ່. ທ້າວຈີຫາວເຢຊິວກໍໄດ້ຍ້າຍເຂົ້າສູ່ເຮືອນໃໝ່ທີ່ມີເນື້ອທີ່ 100 ຕາແມັດ, ເຊິ່ງເຮືອນໃໝ່ແມ່ນກໍ່ດ້ວຍດິນຈີ່, ສະອາດ ເປັນລະບຽບກວ້າງຂວາງ ແລະ ແຈ້ງສະຫວ່າງ, ອົບອຸ່ນ ແລະ ສະດວກສະບາຍ. ພາຍໃນເຮືອນມີຫ້ອງຮັບແຂກ ຫ້ອງນອນ ຫ້ອງຄົວ ແລະ ຫ້ອງນ້ຳຢ່າງຄົບຊຸດ, ທາງລັດຖະບານໄດ້ປະກອບໂທລະພາບ, ຕູ້ເຢັນ, ຈັກຊັກເຄື່ອງ ແລະອື່ນໆໃຫ້ຢ່າງຄົບຖ້ວນ, ທ້າວຈີຫາວເຢຊິວຍັງໄດ້ເປີດຫ້ອງໜຶ່ງເປັນຮ້ານຂາຍເຄື່ອງ, ຊີວິດການເປັນຢູ່ໄດ້ມີຊີວິດຊີວາຂຶ້ນຢ່າງບໍ່ຢຸດຢັ້ງ.
ນອກນີ້, ຢູ່ຕາແສງ ແລະ ບ້ານບໍລິຫານທັງໝົດຂອງກິ່ງແຂວງລຽງສ່ານໄດ້ສ້າງທາງປູຢາງ ແລະເບຕົ້ງ 100%ແລ້ວ, ເມື່ອອອກຈາກປະຕູເຮືອນກໍສາມາດຍ່າງໄປຕາມທາງເບຕົ້ງ ແລະ ຂີ່ລົດໄດ້, ເສັ້ນທາງທີ່ຮາບພຽງໄດ້ຜ່ານໜ້າປະຕູເຮືອນຂອງທ້າວຈີຫາວເຢຊິວ. ທາງດິນຕົມທີ່ທ່ານສີຈິ້ນຜິງເຄີຍຍ່າງຜ່ານນັ້ນໄດ້ຮາບພຽງ, ເຮືອນດິນທີ່ຕ້ອງກົ້ມຫົວຍ່າງເຂົ້ານັ້ນກໍໄດ້ກາຍມາເປັນເຮືອນໃໝ່ທີ່ກວ້າງຂວາງ ແລະ ແຈ້ງສະຫວ່າງ.
ທ້າວຈີຫາວເຢຊິວພ້ອມຄອບຄົວຖ່າຍຮູບຢູ່ໜ້າເຮືອນໃໝ່
ໃນເວລາທີ່ເດີນທາງໄປສຳຫຼວດກວດກາຢູ່ບ້ານສ່ານເຫີ, ທ່ານສີຈິ້ນຜິງກ່າວເນັ້ນໜັກວ່າ, ການພັດທະນາອຸດສາຫະກຳທີ່ເປັນເອກະລັກ ແລະ ສ້າງຄວາມຮັ່ງມີຢ່າງໝັ້ນທ່ຽງເປັນໄລຍະຍາວ, ລ້ວນແຕ່ຕ້ອງການຜູ້ທີ່ມີຄວາມຮູ້ຄວາມສາມາດ. ຕ້ອງບຳລຸງສ້າງຜູ້ທີ່ມີຄວາມຮູ້ຄວາມສາມາດຂອງທ້ອງຖິ່ນຕົນ, ຊຸກຍູ້ໃຫ້ຊາວບ້ານຈຳນວນມະຫາສານຮຽນຄວາມຮູ້ ແລະ ຝຶກສີມືແຮງງານ, ຍົກລະດັບຄວາມສາມາດຂອງຕົນໃຫ້ສູງຂຶ້ນ, ພ້ອມທັງຍັງຕ້ອງປັບປຸງຮີດຄອງປະເພນີ, ອອກແຮງງານຢ່າງດຸໝັ່ນເພື່ອຫຼຸດພົ້ນອອກຈາກຄວາມທຸກຍາກ ແລະ ສ້າງຄວາມຮັ່ງມີຂຶ້ນ.
ທ້າວຈີຫາວເຢຊິວຢູ່ໃນຮ້ານຂ້າຍເຄື່ອງຍ່ອຍຂອງຕົນ
ທ້າວຈີຫາວເຢຊິວກໍໄດ້ຕັ້ງໜ້າຮ່ຳຮຽນຝຶກສີມືໃໝ່, ລາວເວົ້າວ່າ “ຕ້ອງໃຫ້ສະໝອງອຸດົມສົມບູນຂຶ້ນ”. ລາວຍັງໄດ້ຄິດໄລ່ບັນຊີວ່າ, “ຫຼັງຈາກເຂົ້າຮ່ວມການອົບຮົມກຳມະກອນກໍ່ສ້າງເປັນເວລາ 10 ມື້ແລ້ວ, ໄປເຮັດວຽກຢູ່ສະໜາມກໍ່ສ້າງຢູ່ຈຸດຈັດສັນປະຊາຊົນຜູ້ຍົກຍ້າຍ, ໄດ້ຄ່າແຮງງານ 200 ຢວນຕໍ່ມື້; ຫຼັງຈາກເປີດຮ້ານຂາຍເຄື່ອງແລ້ວ ແຕ່ລະເດືອນຈະມີລາຍຮັບ 2000 ກວ່າຢວນ; ເຊົ່າທີ່ດິນ20 ມູ ເຊິ່ງເປັນຫົວໜ່ວຍວັດແທກເນື້ອທີ່ຂອງຈີນ ຫຼື ປະມານ1,3 ເຮັກຕາ ເພື່ອປູກໝາກຄາຍ, ໃນແຕ່ລະປີຈະມີລາຍຮັບ 1 ໝື່ນຢວນ. ການເຮັດວຽກຢູ່ສວນໝາກໄມ້, ທຸກມື້ຈະມີຄ່າແຮງງານ 120 ຢວນ. ປັດຈຸບັນຄອບຄົວຂ້ອຍສາມາດມີລາຍຮັບສະເລ່ຍ 1ໝື່ນ 2 ພັນຢວນຕໍ່ຄົນຕໍ່ປີ.” ເມື່ອເວົ້າມາເຖິງຈຸດນີ້, ທ້າວຈີຫາວເຢຊິວອົດມີຮອຍຍິ້ມບໍ່ໄດ້, ຢູ່ເທິງໃບໜ້າກໍເຕັມໄປດ້ວຍຄວາມເບີກບານມ່ວນຊື່ນແຫ່ງຄວາມສຸກ.
ຄຳເຫັນ
0