​ບົດ​ລາຍ​ງານ​ວຽກ​ງານ​ຂອງ​ລັດ​ຖະ​ບານ(ໃນ​​ກອງ​ປະ​ຊຸມ​ຄັ້ງ​ທີ 4 ຂອງ​ສະ​ພາ​ຜູ້​ແທນ​ປະ​ຊາ​ຊົ​ນ​ແຫ່ງ​ຊາດ​ຈີນ​ຊຸດ​ທີ 12 ວັນ​ທີ 5 ມີ​ນາ 2016 )

ໂດຍ ທ່ານ ​ຫຼີ​ເຄີ້​ສຽງ ນາ​ຍົກ​ລັດ​ຖະ​ມົນ​ຕີຈີນ

ຜູ້​ແທນ​ທັງ​ຫຼາຍ:

ຂ້າ​ພະ​ເຈົ້າ​ຂໍ​ຕາງ​ໜ້າ​ຄະ​ນະ​ລັດ​ຖະ​ບາ​ນ​ຈີນ ຜ່ານ​ບົດ​ລາຍ​ງານ​ວຽກ​ງານ​ຂອງ​ລັດ​ຖະ​ບານ​ໂດຍ​ໃນ​ໂອກາດ​ນີ້ ຂໍ​ໃຫ້​ບັນ​ດາ​ຜູ້​ແທນຄົ້ນ​ຄວ້າພິຈາ​ລະ​ນາ​ ແລະ​ຂໍ​ໃຫ້​ບັນ​ດາ​ກຳ​ມະ​ການ​ຂອງ​ສະ​ພາ​ປຶກ​ສາ​ການ​ເມືອງ​ປະ​ຊາ​ຊົນ​ແຫ່ງ​ຊາດ​ປະ​ກອບ​ຄຳ​ຄິດ​ຄຳ​ເຫັນ.

ໜຶ່ງ: ຫວນ​ຄືນ​ວຽກ​ງານ​ໃນ​ປີ 2015

ໃນ​ໜຶ່ງ​ປີ​​ຜ່ານ​ມາ, ​ການ​ພັດ​ທະ​ນາ​ຂອງປະ​ເທດ​ພວກ​ເຮົາ ​ໄດ້​ຜະ​ເຊີນ​ກັບ​ຄວາ​ມ​ຫຍຸ້ງ​ຍາກ​ແລະ​ສິ່ງ​ທ້າ​ທາຍ​ທີ່​ໜັກໜ່ວງ​ຫຼາຍ​ປະການ, ​ແຕ່​ພາຍ​ໃຕ້​ການ​ນຳ​ພາ​ອັນ​ເຂັ້ມ​ແຂງ​ຂອງ​ສູນ​ກາງ​ພັກ​ທີ່​ມີ​ສະ​ຫາຍ​ສີ​ຈິ້ນ​ຜິງ​ເປັນ​ເລ​ຂາ​ທິ​ການ​ໃຫຍ່, ປະ​ຊາ​ຊົນ​ບັນ​ດາ​ເຜົ່າ​ໃນ​ທົ່ວ​ປະ​ເທດ​ໄດ້​​ບາກ​ບັ່ນ​ສູ້ຊົນ​ດ້ວຍ​ຄວາມ​ເຊື່ອ​ໝັ້ນທີ່​ໜັກ​ແໜ້ນ​ ແລະ​ຄວາມ​ກ້າ​ຫານ​ທີ່​​ຍິ່ງ​ໃຫຍ່, ເຮັດ​ໃຫ້​ເສດ​ຖະ​ກິດ​ສັງ​​ຄົມ​​ໄດ້​ຮັບ​ການພັດ​ທະ​ນາ​ຢ່າງ​ໜັກ​ແໜ້ນ ແລະ​ເປັນ​ຢ່າງ​ດີ ​ໂດຍ​​ໜ້າ​ທີ່​ເປົ້າ​ໝາຍ​ຕົ້ນ​ຕໍ​ຂອງ​​ປີຜ່ານ​ມາປະສົບ​ຜົນສຳ​​ເລັດ, ການ​ປະ​ຕິ​ຮູບ​ແລະ​ໄຂ​ປະ​ຕູ​ສູ່​ພາຍນອກ ແລະ​ການ​ສ້າງ​ສັງ​ຄົມ​ນິ​ຍົມ​ທີ່​ທັ​ນ​ສະ​ໄໝ​ໄດ້​ຮັບ​ຄ​ວາມ​ຄືບ​ໜ້າ​ທີ່​ສຳ​ຄັນ​ອັນ​ໃໝ່.

——​ການຂະຫຍາຍຕົວຂອງ​ເສດ​ຖະ​ກິດ​ໄດ້​ຮັກ​ສາ​ຢູ່​ໃນ​ລະ​ດັບ​ທີ່​ສົມ​ເຫດ​ສົມ​ຜົນ. ​ລວມຍອດ​​ຜະ​ລິດ​ຕະ​ພັນ​ພາຍ​ໃນ​ໄດ້​ບັນ​ລຸ​ເຖິງ 67700 ຕື້ຢວນ, ເພີ່ມ​ຂຶ້ນ 6,9% ຢູ່​ແຖວ​ໜ້າ​ຂອງ​ບັນ​ດາ​​ກຸ່ມ​ເສດ​ຖະ​ກິດ​ທີ່​ສຳ​ຄັນ​ໃນ​ໂລກ. ການ​ຜະ​ລິດ​ທັນ​ຍາ​ຫານ​ໄດ້ບັນ​​ລຸ​ການ​ເພີ່ມ​ຜົນ​ຜະ​ລິດ​ 12 ປີ​​ຕໍ່​ກັນ, ລລະດັບ​ຖີບ​ໂຕ​ສູງ​ຂຶ້ນ​ຂອງ​ດັດ​ຊະ​ນີ​ລາ​ຄາ​​ບໍ​ລິ​ໂພກ ຫຼື CPI ​​ຢູ່​ໃນ​ລະ​ດັບອ່າວ​ຕ່ຳ. ພິ​ເສດ​ແມ່ນ​ສະ​ພາບ​ການ​ປະ​ກອບ​ອາ​ຊີບ​ໄດ້​ມີ​ຄວາມ​ໝັ້ນ​ທ່ຽງ​ໂດຍ​ລວມ ແລະ ໃນ​ຕົວ​ເມືອງມີ​ຜູ້​ປະ​ກອບ​ອາ​ຊີບ​​ເພີ່ມໃໝ່​ 13 ລ້ານ 1 ແສນ 2 ໝື່ນ​ຄົນ ເຊິ່ງ​ລື່ນເປົ້າ​ໝາຍ​ທີ່​ຄາດ​ໄວ້​ຂອງປີຜ່ານ​ມາ ແລະເປັນຈຸດ​ຮຸ່ງ​ເຮືອງ​ອັນ​ໜຶ່ງ​ໃນ​ການ​ຂະຫຍາຍຕົວຂອງ​ເສດ​ຖະ​ກິດ.

——ການ​ປັບປຸງ​ອົງ​ປະ​ກອບເສດ​ຖະ​ກິດ​ໄດ້​ຮັບ​ຄວາມ​ຄືບ​ໜ້າ​ທີ່​ດີ. ​ອັດ​ຕາ​ສ່ວນ​ຂອງ​ຂະ​ແໜງ​ການ​ບໍ​ລິ​ການ​ໃນ​ລວ​ມ​ຍອດ​​ຜະ​ລິດ​ຕະ​ພັນ​ພາຍໃນ​ ໄດ້​ສູງ​ຂຶ້ນ​ເຖິງ 50,5%, ກວມ​ຫຼາຍກວ່າ​ເຄິ່ງ​ໜຶ່ງ​ເປັນ​ຄັ້ງ​ທຳ​ອິດ. ອັດ​ຕາການ​ປະ​ກອບ​ສ່ວນ​ຂອງ​ການ​ບໍ​ລິ​ໂພກ​ທີ່​ມີ​ຕໍ່​ການ​ເຕີບ​ໂຕ​ທາງ​ເສດ​ຖະ​​ກິດ​ນັ້ນ​ບັນ​ລຸ​ເຖິງ 66,4%. ຂະ​ແໜງ​ການ​ໄຮ​ເຕັກ ແລະ​ຂະ​ແໜງ​ການ​ຜະ​ລິດ​ອຸ​ປະ​ກອນ​ ​ໄດ້​ເຕີບ​ໂຕ​ໄວ​ກວ່າ​ຂະ​ແໜງ​ການ​ອຸດ​ສາ​ຫະ​ກຳ​ທົ່ວ​ໄປ. ປະ​ລິ​ມານ​​ການບໍລິ​ໂພ​ກພະ​ລັງ​ງານ​​ທີ່​ສະ​ເລ່ຍ​ຕາມລວມຍອດ​​ຜະ​ລິດ​ຕະ​ພັນ​ພາຍ​ໃນ​ໜຶ່ງ​ຫົວ​ໜ່ວຍ ​ໄດ້​ຫຼຸດ​ລົງ 5,6%.

——ທ່າ​ແຮງໃໝ່​ໃນ​ການ​ພັດ​ທະ​ນາ​ໄດ້​ເຕີບ​ໂຕ​ຢ່າງວ່ອງ​ໄວ. ພວກ​ເຮົາ​ໄດ້​ສືບ​ຕໍ່​ຊຸກ​ຍູ້​ການ​ຜັນ​ຂະ​ຫຍາຍ​ຍຸດ​ທະ​ສາດ​ພັດ​ທະ​ນາ​ດ້ວຍ​ການ​ປະ​ດິດ​ສ້າງ​ໃໝ່ ເຮັດ​ໃຫ້​ອິນ​ເຕີ​ແນັດ​ເຊື່ອມ​ໂຍງ​ກັບ​ຂະ​ແໜງ​ການ​ຕ່າງໆ​ຢ່າງ​ວ່ອງ​ໄວ​ກວ່າ​ເກົ່າ, ຂະ​ແໜງ​ການ​ທີ່​ເກີດ​ໃໝ່​ກໍ​ເຕີບ​ໂຕ​ຂຶ້ນ​ຢ່າງວ່ອງ​ໄວ. ປະ​ຊາ​ຊົນ​​ນັບ​ມື້​ລົງທຶນ​ປະ​ກອບ​ທຸ​ລະ​ກິດ​ຂອງ​ຕົນ​ເອງ​ແລະ​ປະ​ດິດ​ສ້າງ​ໃໝ່​ເພີ່ມ​ຂຶ້ນ. ຕະຫຼອດ​ປີ 2015 ວິ​ສາ​ຫະ​ກິດ​ທີ່​ຈົດ​ທະ​ບຽນ​ໃໝ່​ ​ເພີ່ມ​ຂຶ້ນ 21,6%, ສະ​ເລ່ຍ​ແລ້ວ​ເພີ່ມ​ຂຶ້ນ 1 ໝື່ນ 2 ພັນແຫ່ງ​ຕໍ່​ມື້. ທ່າ​ແຮງ​ໃໝ່​ດັ່ງ​ກ່າວ ​ໄດ້​ເສີມ​ຂະ​ຫຍາຍ​ບົດ​ບາດ​ທີ່​​ພົ້ນ​ເດັ່ນເຮັດ​ໃຫ້​ການ​ປະ​ກອບ​ອາ​ຊີບ​ໝັ້ນ​ທ່ຽງ​ແລະ​ຊຸກ​ຍູ້​ໃຫ້​ວິ​ສາ​ຫະ​ກິດ​ຕ່າງໆ​ຍົກ​ລະ​ດັບ​ສູ​ງ​ຂຶ້ນ ແລະ​ພວມຊຸກ​ຍູ້​ໃຫ້​ເສດ​ຖະ​ກິດ​ສັງ​ຄົມ​ເກີດ​ການ​ປ່ຽນ​ແປງ​ຢ່າງ​ເລິກ​ເຊິ່ງ.

——ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໄດ້​ຮັບ​ກາ​ນ​ປັບ​ປຸງ​ດີ​ຂຶ້ນ​ຕື່ມ​ອີກ. ສະ​ເລ່ຍ​ຕາມ​ຫົວ​ຄົນ ລາຍ​ຮັບ​ທີ່​​ໃຊ້​ຈ່າຍ​ໄດ້​ຂອງ​ປະ​ຊາ​ຊົນ​ທົ່ວ​ປະ​ເທດ​ໄດ້​ເພີ່ມ​ຂຶ້ນ 7,4% ເຊິ່ງ​ໄວ​ກວ່າ​ຈັງ​ຫວະ​ການ​ເຕີບ​ໂຕ​ຂອງ​ເສດ​ຖະ​ກິດ. ຮອດ​ທ້າຍ​ປີ​ 2015, ເງິນ​ຝາກ​ທະ​ນາ​ຄານ​ຂອງ​ປະ​ຊາ​ຊົນ​ໄດ້​ເພີ່ມ​ຂຶ້ນ 8,5% ຄືມີ​ເຖິງ 4 ພັນ​ກວ່າ​ຕື້ຢວນ. ສາມາດ​ແກ້​ໄຂ​ບັນ​ຫາ​ນ້ຳ​ດຶ່ມ​ຂອງ​ປະ​ຊ​າ​ຊົນຢູ່​ຊົນ​ນະ​ບົດ​ໄດ້ 64 ລ້ານ 3 ແສນ 4 ໝື່ນ​ຄົນ, ເພີ່ມ​ທະ​ວີ​ການ​ຫຼຸດ​ຜ່ອນ​ຄວາ​ມ​ທຸກ​ຍາກ​ເຮັດ​ໃຫ້ປະ​ຊາ​ຊົນ​ທຸກ​ຍາກ​ຢູ່​ຊົນ​ນະ​ບົດ​ຈີນ​ໄດ້​ຫຼຸດລົງ​ 14 ລ້ານ 4 ແສນ 2 ໝື່ນ​ຄົນ.

ໝາກ​ຜົນການ​​ປະ​ດິດ​ສ້າງໃໝ່​ໃນ​ຂົງ​ເຂດ​ວິ​ທະ​ຍາ​ສາດ​ເຕັກ​ນິກ​ຈຳ​ນວນ​ໜຶ່ງ​ໄດ້​ກ້າວ​​ໜ້າ​ທຽບ​ເທົ່າ​ລະດັບສາ​ກົນ, ເຕັກ​ນິກ​ຜະ​ລິດ​ໄຟ​ຟ້າ​ດ້ວຍ​ພະ​ລັງ​ງານ​ນິວ​ເຄ​ຣຍ​ຮຸ່ນ​ທີ​ສາມ ​ໄດ້​ຮັບ​ຄວາມ​ຄືບ​ໜ້າ​ທີ່​ສຳ​ຄັນ, ປະສົບ​ຜົນສຳ​ເລັດ​ໃນ​ການ​ຜະລິດຍົນ​ໂດຍ​ສານ​ຂະ​ໜາດ​ໃຫຍ່ C919, ທ່ານ​ນາງ ​ຖູ​ໂຢ​ໂຢ ​ໄດ້​ຮັບ​ລາງວັນ​ໂນ​ແບນ​ສາ​ຂາ​ສະລີ​ລະ​ສາດ​ແລະ​ແພດ​ສາດ. ​ຜົນ​ງານ​ທີ່​ປະ​ເທດ​ພວກ​ເຮົາ​ຍາດ​ມາໄດ້​​​ເຫຼົ່າ​ນີ້​ ເຮັດ​ໃຫ້​ປະ​ຊາ​ຊົນ​ບັນ​ດາ​ເຜົ່າ​ໃນ​ທົ່ວ​ປະ​ເທດ​ຈີນມີ​ກຳ​ລັງໃຈ​ແລະ​ພາກ​ພູ​ມ​ໃຈ​ທີ່​ສຸດ.

​ແນວ​ໃດ​ກໍ​ດີ​ໜຶ່ງ​ປີ​​ຜ່ານ​ມາ, ​ເຖິງ​ວ່າ​ສ້າງຜົນ​ງານໄດ້​ຮັບຄື​ດັ່ງກ່າວ​ແຕ່​ກໍ​ປະສົບ​ຄວາມ​ຫຍຸ້ງ​ຍາກ​ຈຳນວນ​ໜຶ່ງ​ ເຊິ່ງ​ເປັນ​ຜົນ​ມາ​ຈາກ​ໄດ້​ຮັບຜົນ​ສະທ້ອນ​ຈາກ​​ສະ​ພາບ​ແວດ​ລ້ອມ​ສາ​ກົນ​ທີ່​ສະຫຼັບ​ສັບ​ຊ້ອນ​ກັນ​ທີ່​ສຸດ. ປີ​ກາຍນີ້ ຄວາມ​ໄວຂອງ​ການ​ເຕີບ​ໂຕ​ທາງ​ເສດ​ຖະ​ກິດ​ໂລກຕ່ຳ​ທີ່​ສຸດ​ໃນຮອບ 6 ປີ​ມານີ້, ການ​ເຕີບ​ໂຕ​ຂອງ​ການ​ຄ້າຕ່າງປະ​ເທດ​ແຮ່ງ​ຕ່ຳ​, ລາ​ຄາ​​ສິນ​ຄ້າ​ລາຍ​ໃຫຍ່​ກໍ​ຫຼຸດ​ຕ່ຳ​ລົງ​ຢ່າງ​ຫຼວງຫຼາຍ,​ ຕະ​ຫຼາດ​ການ​ທະ​ນາ​ຄານ​ສາ​ກົນ​ປັ່ນ​ປ່ວນແຮງ​ຂຶ້ນ ເຊິ່ງ​ທັງ​ໝົດ​ເຫຼົ່າ​ນີ້​ໄດ້​ກະ​ທົບຕໍ່ສດ​ຖະ​ກິດ​ຈີນ​ໂດຍ​ກົງ. ຂະນະ​ທີ່ສະ​ພາບ​ການພາຍ​ໃນ​ປະ​ເທດ​ຈີນ​ເກີດ​ ​ຄວາ​ມ​ຂັດ​ແຍ່ງ​ເຖິງ​ຮາກ​ເຫງົ້າຢ່າງ​ພົ້ນ​ເດັ່ນ, ເສດ​ຖະ​ກິດ​​ຜະ​ເຊີນ​ກັບ​ແຮງ​ກົດ​ດັນ​ທີ່​ຮ້າຍ​ແຮງ​ຂຶ້ນ. ​ແນວ​ໃດ​ກໍ​ດີຜົນ​ງານ​ເຫຼົ່າ​ນີ້​ໄດ້​ຢືນຢັນ​ຢ່າງ​ຈະ​ແຈ້ງ​ໂດຍ​ເຫັນ​ໄດ້ຈາກ​ຕົວ​ເລກ​ພື້ນ​ຖານ​ທີ່​ສູງ​ຄື ​ລວມຍອດ​ເສດ​ຖະ​ກິດ​ຈີນບັນລຸ​ຫຼາຍກວ່າ 6 ໝື່ນ​ຕື້ຢວນ. ປັດ​ຈຸ​ບັນ ລວມຍອດ​ຜະ​ລິດ​ຕະ​ພັນ​ພາຍ​ໃນ​ຂອງ​ຈີນ​ເພີ່ມ​ຂຶ້ນ 1% ໃດ​​ເທົ່າ​ກັບ 1,5% ເມື່ອ ​5 ປີ​ກ່ອນ​​ແລະ​ເທົ່າ​ກັບ 2,5% ເມື່ອ 10 ປີ​ກ່ອນ. ຂະ​ໜາດ​ເສດ​ຖ​ະ​ກິດແຮ່ງ​ໃຫຍ່​ຂຶ້ນ​, ​ການ​ເຕີບ​ໂຕ​ກໍຈະ​​ແຮ່ງຍາກ​. ໂດຍ​ຢູ່​ຕໍ່​ໜ້າ​ຄວາມ​ຫຍຸ້ງ​ຍາກ​ແລະ​ແຮງ​ກົດ​ດັນ, ປະ​ຊາ​ຊົນ​ຈີນ​ທຸກ​ຖ້ວນ​ໜ້າ​ໄດ້ອອກ​ເຫື່ອ​ເທ​ແຮງ​ຢ່າງ​ຫຼວງ​ຫຼາຍ ແລະ​ຜ່ານ​ຜ່າ​ຄວາມ​ຫຍຸ້ງ​ຍາກ​ເທື່ອ​ລະ​ກ້າວ.

ໜຶ່ງ​ປີ​​ຜ່ານ​ມາ, ພວກ​ເຮົາ​ໄດ້​ປະຕິບັດໜ້າ​ທີ່​ທີ່​ສຳ​ຄັນ​ຄື​ດັ່ງ​ນີ້:

ໜຶ່ງ: ອອກ​ແຮງ​ເຮັດ​ໃຫ້​ການ​ເຕີບ​ໂຕ​ຢ່າງ​ໜັກ​ແໜ້ນ, ປັບ​ປຸງ​ອົງ​ປະ​ກອບ ແລະ​ປ້ອງ​ກັນ​ບໍ່​ໃຫ້​ເກີດ​ຄວາມ​ສ່ຽງ ​ແລະປະ​ດິດ​ສ້າງ​ຮູບ​ການ​​ໃໝ່​ໃນ​ການ​ດັດ​ສົມຄວບ​ຄຸມ​ມະ​ຫາ​ພາກ.

ສອງ: ເພີ່ມ​ທະ​ວີ​ການ​ປະ​ຕິ​ຮູບ​ແລະ​ໄຂ​ປະ​ຕູ​ສູ່​ພາຍນອກ​ໂດຍ​ປິ່ນ​ອ້ອມ​ການຍູ້​ດັນ​ໃຫ້​ຕະ​ຫຼາດ​ເພີ່ມ​ທະ​ວີ​ຄວາມມີ​ຊີ​ວິດ​ຊີ​ວາ​ຫຼາຍ​ຂຶ້ນ. ​ໄດ້​ຍົກ​ເລີກ​​ການພິ​ຈາ​ລະ​ນາກວດ​ກາ​ແບບບໍ່​ແມ່ນ​ການ​ບໍ​ລິ​ຫານ​ງານ​ຢ່າງ​ເຖິງ​ຖອງ. ​ໄດ້​ເຮັດ​ໃຫ້​ຂັ້ນ​ຕອນ​ການ​ບໍ​ລິ​ການ​ສາ​ທາ​ລະ​ນະ​ດີ​ຂຶ້ນ ເຮັດ​ໃຫ້​ປະ​ຊາ​ຊົນ ແລະ​ວິ​ສາ​ຫະ​ກິດ​ຕ່າງໆ​ມີ​ຄວາມ​ສະ​ດວກຫຼາຍກວ່າ​ເກົ່າ​ແລະທົ່ວ​ສັງ​ຄົມ​ມີ​ຄວາມ​ຫ້າວ​ຫັນປະ​ກອບ​ທຸລະ​ກິດ​​ແລະ​ປະ​ດິດ​ສ້າງ​ໃໝ່ຫຼາຍຂຶ້ນ.

ການ​ປະ​ຕິ​ຮູບ​ໃນ​ຂົງ​ເຂດ​ສຳ​ຄັນ​ຕ່າງ​ໆ​ເຊັ່ນ: ການ​ເງິນ, ສ່ວຍ​ສາ​ອາ​ກອນ​ແລະ​ການ​ທະ​ນາ​ຄານ ໄດ້​ກ້າວ​ສູ່​ລວງ​ເລິກ.

ໄດ້​ຫຼຸດ​ຂໍ້​ຈຳ​ກັດ​ການ​ລົງ​ທຶນ​ຂອງ​ນັກ​ທຸ​ລະ​ກິດ​ຕ່າງ​ປະ​ເທດ​ໃຫ້​ໜ້ອຍ​ລົງ​ເຖິງ​ເຄິ່ງ​ໜຶ່ງ, ດຶງ​ດູດ​ທຶນ​ຕ່າງ​ປະ​ເທດ​ໄດ້​ຕົວ​ຈິງ​ເຖິງ 126 ຕື້ 300 ລ້ານ​ໂດ​ລາ​ສະ​ຫະ​ລັດ ເພີ່ມ​ຂຶ້ນ 5,6%. ການ​ລົງ​ທຶນ​ໂດຍ​ກົງ​ທີ່ບໍ່​ແມ່ນ​ປະ​ເພດ​ການ​ທະ​ນາ​ຄານ​ບັນ​ລຸເຖິງ 118 ຕື້ໂດ​ລາ​ສະ​ຫະ​ລັດ, ເພີ່ມ​ຂຶ້ນ 14,7%. ເຜີຍ​ແຜ່​ບົດ​​ຮຽນ​ຂອງ​ເຂດ​ທົດ​ລອງ​ການ​ຄ້າ​ເສ​ລີ​ຊຽງ​ໄຮ, ສ້າງ​ເຂດ​ທົດ​ລອງ​ການ​ຄ້າ​ເສ​ລີ​ທີ່ແຂວງກວາງ​ຕຸ້ງ ນະ​ຄອນ​ທຽນ​ສິນ ແລະ​ແຂວງ​ຝູ​ຈ້ຽນ.  ​ຕະ​ກຸນ​ເງິນຢວນ​ຈີນ​ໄດ້​ຈັດ​ເຂົ້າ​ໃນສິດ​ຖອກ​ເງິນ​ພິ​ເສດ​ ( ຫຼື SDR) ຂອງ​ອົງ​ການກອງ​ທຶນ​ເງິນ​ຕາ​ສາ​ກົນ (IMF). ທະ​ນາ​ຄານ​ລົງ​ທຶນ​​ພື້ນ​ຖານ​ໂຄງ​ລ່າງ​ອາ​ຊີ​ໄດ້​ສ້າງ​ຕັ້ງ​ຂຶ້ນ​ຢ່າງ​ເປັນ​ທາງ​ການ, ກອງ​ທຶນ​ເສັ້ນ​ທາງ​ສາຍ​ໄໝ​ກໍ​ເລີ່ມ​ດຳ​ເນີນ​ງານ. ຈີນ​ໄດ້​ເຊັນ​ສັນ​ຍາ​ການ​ຄ້າ​ເສ​ລີກັບ​ຫຼາຍ​ປະ​ເທ​ດ​ເປັນ​ຕົ້ນ​ ​ຈີນ-ສ.ເກົາ​ຫຼີ ແລະ​ຈີນ-ອົ​ສ​ຕຼາ​ລີ ແລະ​ເຊັນ​ສັນ​ຍາ​ຍົກ​ລະ​ດັບ​ເຂດ​ການ​ຄ້າ​ເສ​ລີ​ຈີນ-ອາ​ຊຽນ. ການ​ສ້າງ​ "ແລວ​ທາງ​ເສດ​ຖະ​ກິດ​ເສັ້ນ​ທາງ​ສາຍ​ໄໝ​ ແລະ​ເສັ້ນ​ທາງ​ສາຍ​ໄໝ​ທາງ​ທະ​ເລ​ໃນ​ສະ​ຕະ​ວັດ​ທີ 21 " ຫຼື "ໜຶ່ງ​ແລວ​ທາງ ໜຶ່ງ​ເສັ້ນ​ທາງ"​ ປະສົບ​ຜົນສຳເລັດ​ເປັນ​ຢ່າງ​ດີ, ການ​ຮ່ວມ​ມື​ດ້ານ​ຄວາມ​ສາ​ມາດ​ການ​ຜະ​ລິດ​ກັບ​ສາ​ກົນ​ກໍ​ໄດ້​ເລັ່ງ​ລັດ​ໄວ​ຂຶ້ນ, ອຸ​ປະ​ກອນ​ທີ່​ຜະ​ລິດ​ໂດຍ​ຈີນ​ເຊັ່ນ: ທາງ​ລົດ​ໄຟ​ຄວາມ​ໄວ​ສູງ, ໄຟ​ຟ້າ​ນິວ​ເຄ​ຣຍ ແລະ​ອື່ນໆ​ໄດ້​ກ້າວ​ໄປ​ສູ່​ໂລກເຊິ່ງ​ເປັນ​ຄວາມ​ຄືບ​ໜ້າ​ແບບ​ບຸກ​ທະ​ລຸ.

ສາມ: ສຸມ​ໃ​ສ່​ຍົກ​ຄຸນ​ນະ​ພາບ ແລະ​ສະ​ມັດ​ຖະ​ພາບ​ໃຫ້​ສູງ​ຂຶ້ນ, ຊຸກ​ຍູ້​ໃຫ້​ຂະ​ແໜງ​ການ​ຕ່າງໆ​ຍົກ​ລະ​ດັບ​ດ້ວຍ​ການ​ປະ​ດິດ​ສ້າງ​ໃໝ່. ໄດ້​ວາງ​ນະ​ໂຍ​ບາຍ​ໃໝ່​ຕ່າງໆ​ເພື່ອ​ສົ່ງ​ເສີມ​ໃຫ້​ປະ​ຊາ​ຊົນປະ​ກອບ​ທຸ​​ລະ​ກິດ​ຂອງ​ຕົນ​ເອງ ແລະ​ມະ​ຫາ​ຊົນ​ປະ​ດິດ​ສ້າງ​ໃໝ່, ຜັນ​ຂະ​ຫຍາຍ​ແຜນ​​ການ​ເຄື່ອນ​ໄຫວ "ອິນ​ເຕີ​​ເນັດ+", ​ໃຫ້​ການ​ພັດ​ທະ​ນາ​ເສດ​ຖະ​ກິດມີ​ກຳລັງ​ແຮງ​ອັນ​ໃໝ່. ໄດ້​ຕັ້ງ​ໜ້າ​ແກ້​ໄຂ​ຄວາມ​ສາ​ມາດ​ການ​ຜະ​ລິດ​ທີ່​ເຫຼືອ​ເຟືອ, ຊຸກ​ຍູ້​ໃຫ້​ວິ​ສາ​ຫະ​ກິດ​ທີ່​ກ່ຽວ​ຂ້ອງ​ໂຮມ​ເຂົ້າ​ກັນ​ແລະປະ​ກອບ​ຄືນ​ໃໝ່.

ສີ່: ເລັງ​ໃສ່​ການ​ບຸກ​ເບີກ​ຊ່ອງ​ຫວ່າງ​ການ​ພັດ​ທະ​ນາ, ຊຸກ​ຍູ້​ໃຫ້​ພາກ​ພື້ນ​ຕ່າງໆ​ພັດ​ທະ​ນາຢ່າງ​ປະ​ສານ​​ກົມ​ກຽວ​ກັນ ແລະ​​ການ​ຫັນ​ເປັນ​ຕົວ​ເມືອງ​ແບບ​ໃໝ່.

ຫ້າ: ຊຸກ​ຍູ້​ການ​ປະ​ຕິ​ຮູບ ແລະ​ການ​ພັດ​ທະ​ນາ​ວຽກ​ງານ​ສັງ​ຄົມ ໂດຍ​​ປິ່ນ​ອ້ອມ​ການ​ເພີ່ມ​ຄວາມ​ສຸກ​ໃຫ້​ແກ່​ປະ​ຊາ​ຊົນ.

ຫົກ: ຊຸກ​ຍູ້​ໃຫ້​ສັງ​ຄົມ​ມີ​ຄວາມ​​ປອງດອງ​ກັນ​ແລະ​ຄວາມ​ໝັ້ນ​ຄົງ, ຊຸກ​ຍູ້​ການ​ບໍ​ລິ​ຫານ​ງານ​ຕາມ​ກົດ​ໝາຍ ແລະການ​ປະ​ດິດ​ສ້າງ​​ແບບ​ແຜນ​ວິທີ​ເຮັດ​ວຽກໃໝ່ໃນ​ການ​ປົກ​ຄອງ​​.

​ໜຶ່ງ​ປີ​ມານີ້, ວຽກ​ງານ​ການ​ຕ່າງ​ປະ​ເທດ​ຮອບ​ດ້ານ ໄດ້​ຮັບ​ໝາກ​ຜົນຢ່າງ​ອຸ​ດົມ​ສົມ​ບູນ. ການ​ພົວ​ພັນ​ລະ​ຫວ່າງ​ຈີນ​ກັບ​ບັນ​ດາ​ປະ​ເທດ​ໃຫຍ່​ທີ່ສຳ​ຄັນ​ ມີ​ຄວາມ​ຄືບ​ໜ້າ​ໃໝ່, ການ​ຮ່ວມ​ມື​ຢ່າງ​ແທ້​ຈິງ​ກັບ​ບັນ​ດາ​ປະ​ເທດ​ອ້ອມ​ຂ້າງ​ກ້າວ​ສູ່​ລວງ​ເລິກ, ມິດ​ຕະ​ພາບ​ແລະ​​ການ​ຮ່ວມ​ມື​​ກັບ​ບັນ​ດາ​ປະ​ເທດ​ທີ່​ພວມ​ພັດ​ທະ​ນາ​​ໄດ້​ເປີດກວ້າງ​ອອກ​ຕໍ​ເນື່ອງ, ການ​ພົວ​ພັນ​ກັບ​ອົງ​ການ​ສະ​ຫະ​ປະ​ຊາ​ຊາດ ກໍ​ຄື ອົງ​ການ​ຈັດ​ຕັ້ງ​ສາ​ກົນ​ອື່ນໆ​ແລະ​ກົນ​ໄກ​ສາ​ກົນ​ໄດ້​ຮັບ​ການ​ເພີ່ມ​ທະ​ວີ​ຂຶ້ນ, ການ​ຕ່າງ​ປະ​ເທດ​ທາງ​ເສດ​ຖະ​ກິດ ແລະ​ທາງວັດ​ທະ​ນະ​ທຳ​ ໄດ້​ຮັບ​ຜົນ​ສຳ​ເລັດ​ຢ່າງ​ພົ້ນ​ເດັ່ນ. ​ໃນ​ຖາ​ນະ​ເປັນ​ປະ​ເທດ​ໃຫຍ່, ຈີນໄດ້​ເສີມ​ຂະ​ຫຍາຍ​ບົດ​ບາດ​ຢ່າງສ້າງ​ສັນ​ທີ່​ສຳ​ຄັນ​ໃນ​ວຽກ​ງານ​ສາ​ກົນ​ແລະ​ພາກ​ພື້ນ.

ຈາກ​ຜົນ​ງານ​ທີ່​ໄດ້​ຮັບ​ໃນ​ປີ​​ຜ່ານ​ມາ, ພວກ​ເຮົາ​ຄວນ​ເຫັນ​ຢ່າງ​ຈະ​ແຈ້ງວ່າ, ໃນ​ການ​ພັດ​ທະ​ນາ​ຂອງ​ປະ​ເທດ​ພວກ​ເຮົາ ​ຍັງ​ມີ​ຄວາມ​ຫຍຸ້ງ​ຍາກ​ແລະ​ປະສົບບັນ​ຫາບໍ່​ໜ້ອຍ, ​ເປັນ​ຕົ້ນ​ໄດ້​ຮັບຜົນກະ​ທົບ​ຈາກ​ການ​ຄ້າ​ທົ່ວ​ໂລກທີ່​ຊຸດ​ໂຊມ​ລົງ​ແລະ​ປັດ​ໄຈ​ອື່ນໆ, ປີ​ກາຍນີ້ ຍອດ​ມູນ​ຄ່າ​ການ​ຄ້າ​ຂາ​ເຂົ້າ​ຂ​າອອກ​ຂອງ​ຈີນ​ໄດ້​ຫຼຸດ​ລົງ, ບໍ່​ບັນ​ລຸ​ເປົ້າ​ໝາຍການເຕີບ​ໂຕ​ທີ່​ຄາດ​ໄວ້. ການ​ລົງ​ທຶນ​ເພີ່ມ​ຂຶ້ນ​ຊັກ​ຊ້າ​ລົງ, ຂະ​ແໜງ​ການ​ຈຳ​ນວນ​ໜຶ່ງ​ມີ​ຄວາມ​ສາ​ມາດ​ການ​ຜະ​ລິດ​ເຫຼື​ອ​ເຟືອ​ເກີນ​ໄປ, ວິ​ສ​າ​ຫະ​ກິດ​ສ່ວນ​ໜຶ່ງ​ມີ​ຄວາມ​ຫຍຸ້ງ​ຍາກ​ໃນ​ການ​ຜະ​ລິດ​ແລະ​ດຳ​ເນີນທຸ​ລະ​ກິດ, ​ການ​ພັດ​ທະ​ນາ​ຂອງ​ທ້ອງ​ຖິ່ນ​ແລະ​ຂະ​ແໜງ​ການມີ​ຄວາມ​ແຕກ​ຕ່າງ​ກັນຫຼາຍ​ຂຶ້ນ, ລາຍ​ຈ່າຍ​ແລະ​ລາຍ​ຮັບ​ທາງ​ການ​ເງິນບໍ່​ສົມ​ດຸນ​ກັນ​ພົ້ນ​ເດັ່ນ​ຂຶ້ນ, ​ຂົງ​ເຂດ​ການ​ທະ​ນາ​ຄານ​ມີ​ຄວາມ​ສ່ຽງ​. ຂົງ​ເຂດ​ທີ່​ປະ​ຊາ​ຊົນ​ໃຫ້​ຄວາມ​ສົນ​ໃຈ​ຫຼາຍ​ເຊັ່ນ: ​ການ​ປິ່ນ​ປົວສຸຂະພາບ, ການ​ສຶກ​ສາ, ການ​ລ້ຽງດູ​ຜູ້​ເຖົ້າ, ຄວາມ​ປອດ​ໄພ​ດ້ານ​ອາ​ຫານ​ແລະ​ຢາ, ການກະຈາຍ​ລາຍ​ຮັບ, ການ​ຄຸ້​ມ​ຄອງ​ຕົວ​ເມືອງ​ແລະ​ອື່ນໆ ​ເກີດ​ມີ​ບັນ​ຫາ​ອ່າວ​ຫຼາຍ​, ສະ​ພາບ​ອາ​ກາດ​ຈາກ​ມົນ​ລະ​ພິດ​ຢ່າງ​ຮ້າຍ​ແຮງ​ຍັງ​ເກີດ​ຂຶ້ນ​ຢູ່​ບາງ​ທ້ອງຖິ່ນ​ຕໍ່​ເນື່ອງ. ການ​ທີ່​ເຮັດ​ໃຫ້​ພວກ​ເຮົາ​ຮູ້​ສຶກ​ເສຍ​ໃຈ​ນັ້ນ​ແມ່ນ ກຳ​ປັ່ນ​ໂດຍ​ສານ​ "ຕົ່ງຟ່າງຈື່​ຊິ່ງ" ຫຼົ້ມ​ ແລະ​ທ່າ​ກຳ​ປັ່ນ​ທຽນ​ສິນເກີດອັກ​ຄີ​ໄພ​ແລະ​ລະ​ເບີດ​ຢ່າງ​ຮ້າຍ​ແຮງ ເຮັດ​ໃຫ້​​ປະ​ຊາ​ຊົນ​ເສຍ​ຊີ​ວິດ​ແລະ​ບາດ​ເຈັບ​ຢ່າງໜັກໜ່ວງ, ຊັບ​ສິນ​ເສຍ​ຫາຍ​ຢ່າງ​ສາ​ຫັດ, ອັນ​ເປັນ​ບົດ​ຮຽນທາງ​ລົບ​ທີ່​ເລິກ​ເຊິ່ງ​ທີ່​ສຸດ​ຕໍ່ພວກ​ເຮົາ​ເຊິ່ງພວກ​ເຮົາ​ຕ້ອງ​ຖອດ​ຖອນ​ເປັນ​ບົດຮຽນ​ຢ່າງ​ຈິງ​ຈັງ. ວຽກ​ງານ​ຂອງ​ລັດ​ຖະ​ບານ​ແລະອົງ​ການ​ປົກ​ຄອງ​ທ້ອງ​ຖິ່ນ ​ຍັງ​ມີ​ຂໍ້​ຂາດ​ຕົກ​ບົກ​ພ່ອງ​ຫຼາຍ​ຢ່າງ, ມາດ​ຕະການ​ປະ​ຕິ​ຮູບ​ແລະ​ນະ​ໂບ​ບາຍ​ບາງ​ຢ່າງ ​ບໍ່​ສາ​ມາດ​ໄດ້​ຮັບ​ການ​ຈັດ​ຕັ້ງປະ​ຕິ​ບັດ​ຕົວ​ຈິງ, ພະ​ນັກ​ງານ​ຈຳ​ນວນ​ໜຶ່ງ​ບໍ່​ເຮັດ​​ວຽກ​ຕົວ​ຈິງ, ບໍ່​ມີ​ຄວາມ​ສາ​ມາດ​ເທົ່າ​ທີ່​ຄວນ ແລະ​ເຮັດ​ວຽກບໍ່​ຖືກ​ຕ້ອງ, ບັນ​ຫາ​ເສຍ​ທາດ​ຂາດ​ຄຸນ​ແລະ​ສໍ້​ລາດ​ບັງຫຼວງ ​ຍັງ​ເກີດ​ຂຶ້ນ​ຢູ່​ບາງ​ຂົງ​ເຂດ​ຢ່າງ​ຕໍ່​ເນື່ອງ. ພວກ​ເຮົາ​ຕ້ອງ​ເພີ່ມ​ທະ​ວີ​ຄວາມ​ຮັບຜິດຊອບໃນ​ການ​ແບກ​ຫາບ​ໜ້າ​ທີ່​ແລະອອກ​ແຮງ​ສຸດ​ຂີດ​ເພື່ອ​ແກ້​ໄຂ​ບັນ​ຫາ​ເຫຼົ່າ​ນີ້, ຕ້ອງ​ເອົາ​ຄວາມ​ມຸ່ງມາດປາ​ຖະ​ໜາ​ຂອງ​ປະ​ຊາ​ຊົນ​ເປັນ​ທິດ​ຊີ້ນຳ​ວຽກ​ງານ​ຂອງ​ລັດ, ເຮັດ​ວຽກລັດ​ໃຫ້ມີ​ປະສິດ​ທິຜົນ​ດີ​​ແລະ​ສຸດ​ຄວາມ​ສາ​ມາດ, ເດັດ​ຂາດບໍ່​​ໃຫ້​ປະ​ຊາ​ຊົນຂາດ​ຄວາມ​ເຊື່ອ​ໝັ້ນ.

ບັນ​ດາ​ຜູ້​ແທນ​!

ປີ 2015 ຄື​ປີ​ສຸດ​ທ້າຍ​ຂອງ​ແຜນ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ 5 ປີ​ຄັ້ງ​ທີ 12  ເຊິ່ງ​ກໍປະສົບ​ຜົນສຳ​ເລັດ​ໃນ​ການ​ປະຕິບັດ​ໜ້າ​ທີ່​ຕາມເປົ້າ​ໝາຍ​ສຳ​ຄັນ​ຕ່າງໆ​ທີ່​ກຳ​ນົດ​ໄວ້​ໃນ​ແຜນ​ການ​ດັ່ງ​ກ່າວຢ່າງ​ຮອບ​ດ້ານ​ເປັນຕົ້ນ ໜຶ່ງ​ ​ເສດ​ຖະ​ກິດ​ໄດ້​ພັດ​ທະ​ນາ​ຢ່າງ​ຕໍ່​ເນື່ອງ​ດ້ວຍ​ຄວາມ​ໄວ​ອ່າວ​ສູງ. ​​ສະ​ເລ່ຍ​ແລ້ວ ລວມຍອດ​ຜະ​ລິດ​ຕະ​ພັນ​ພາຍ​ໃນ ​ເພີ່ມ​ຂຶ້ນ 7,8% ຕໍ່​ປີ, ຍອດ​ປະ​ລິ​ມານ​ເສດ​ຖະ​ກິດ​ເປັນ​ອັນ​ດັບ​ທີ 2 ຂອງ​ໂລກ ກາຍ​ເປັນ​ປະ​ເທດ​ໃຫຍ່​ດ້ານ​ການ​ຄ້າ​ສ���ນ​ຄ້າ​ອັນ​ດັບ​ໜຶ່ງ​ຂອງ​ໂລກ ແລະ​ເປັນ​ປະ​ເທດ​ໃຫຍ່​ຕົ້ນ​ຕໍທີ່​ລົງ​ທຶນ​ຢູ່​ຕ່າງ​ປະ​ເທດ. ສອງ ​ການ​ປັບ​ປຸງ​ໂຄງ​ປະ​ກອບ​ເສດ​ຖະ​ກິດ​ໄດ້​ຮັບ​ຄວາມ​ຄືບ​ໜ້າ​ທີ່​ມີ​ລັກ​ສະ​ນະ​ເປັນ​ສັນ​ຍະ​ລັກ. ຂະ​ແໜງ​ການ​​ບໍ​ລິ​ການ​ກາຍ​ເປັນ​ຂະ​ແໜງ​ການ​ໃຫຍ່ອັນ​ດັບ​ໜຶ່ງ, ອຸດ​ສາ​ຫະ​ກຳ​​ກັບ​ຂໍ້​ມູນ​ຂ່າ​ວ​ສານເຊື່ອມ​ໂຍງ​ເຂົ້າ​ກັນ​ຢ່າງ​ເລິກ​ເຊິ່ງ, ຄວາມ​ສາ​ມາດ​ການ​ຜະ​ລິດກະສິກຳ​ໂດຍ​ລວມ​ໄດ້​ເພີ່ມ​ທະ​ວີ​ຂຶ້ນ​ຢ່າງ​ເດັ່ນ​ຊັດ. ການ​ບໍ​ລິ​ໂພກ​ກາຍ​ເປັນ​ກຳ​ລັງ​ທີ່​ສຳ​ຄັນ​ໃນ​ການ​ຄ້ຳ​ຊູ​ການ​ເຕີບ​ໂຕ​ຂອງ​ເສດ​ຖະ​ກິດ. ປະ​ຊາ​ຊົນ​ຫຼາຍກວ່າ​ເຄິ່ງ​ໜຶ່ງ​ອາ​​ໄສ​ຢູ່​ໃນ​ຕົວ​ເມືອງ, ຍອດ​ການ​ບໍລິ​ໂພ​ກ​ພະ​ລັງ​ງານ​​ທີ່ສະ​ເລ່ຍ​ຕາມ​ລວມຍອດ​​ຜ​ະ​ລິດ​ຕະ​ພັນ​ພາຍ​ໃນ​ ​ຫຼຸດ​ລົງ 18,2%, ​ມົນ​ລະ​ພິດໄດ້ຫຼຸດ​ລົງ​ຫຼາຍກວ່າ 12%. ສາມ​ ລະ​ດັບ​ພື້ນ​ຖານ​ໂຄງ​ລ່າງ​ໄດ້​ຮັບ​ການ​ຍົກ​ສູງ​ຂຶ້​ນ​ຢ່າງ​ຮອບ​ດ້ານ. ​ທາງ​ລົດ​ໄຟ​ຄວາມ​ໄວ​ສູງຍາວ​ຫຼາຍກວ່າ 1 ໝື່ນ 9 ພັນ​ກິ​ໂລ​ແມັດ ກວມຫຼາຍກວ່າ 60% ຂອງ​ທົ່ວ​ໂລກ. ທາງ​ດ່ວນ​ທີ່​ເປີດ​ບໍ​ລິ​ການ​ແລ້ວຍາວກວ່າ 1 ແສນ 2 ໝື່ນ​ກິ​ໂລ​ແມັດ. ໂຄງ​ການ​ສົ່ງ​ນ້ຳ​​ຈາກພາກ​ໃຕ້​​ສູ່​ພາກ​ເໜືອ​ສາຍ​ຕາ​ເວັນ​ອອກ ແລະ​ສາຍ​ກາງ​ໄດ້​ເລີ່ມ​ສົ່ງ​ນ້ຳ​ແລ້ວ. ໄດ້​ສ້າງ​ເຄືອ​ຂ່າຍ​ໂທ​ລະ​ຄົມ​ມະ​ນາ​ຄົມ​ເຄື່ອນ​ທີ່ 4G ທີ່​ມີ​ຂະ​ໜາດ​ໃຫຍ່​ທີ່​ສຸດ​ໃນ​ໂລກ. ສີ່​ ​ການ​ປະ​ດິດ​ສ້າງ​ດ້ານ​ວິ​ທະ​ຍາ​ສາດ​ເຕັກ​ນິກ​ໄດ້​ຮັບ​ການ​ບຸກ​ທະ​ລຸ​ທີ່​ສຳ​ຄັນ. ການ​ຄົ້ນ​ຄວ້າ​ເຕັກ​ນິກ​ພື້ນ​ຖານ​ຈຳ​ນວນ​ໜຶ່ງ​ໄດ້ຮັບ​​ໝາກ​ຜົນ​ອັນ​ໃໝ່, ໂຄງ​ການ​ການບິນ​ອະ​ວະ​ກາດ​ບັນ​ທຸກ​ຄົນ, ໂຄງ​ການ​ສຳ​ຫຼວດດວງ​ຈັນ ແລະ​ສຳ​ຫຼວດ​ທະ​ເລ​ທາງ​ເລິກ​ລ້ວນ​ແຕ່​ກ້າວສູ່ລະ​ດັບ​ຄວາມກ້າວ​ໜ້າ​ຂອງ​ໂລກ. ຫ້າ ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໄດ້​​ຍົກ​ລະ​ດັບ​ສູງ​ຂຶ້ນ​ຢ່າງ​ເດັ່ນ​ຊັດ. ລາຍ​ຮັບ​ຂອງ​ປະ​ຊາ​ຊົນ​ເພີ່ມ​ຂຶ້ນ​ໄວ​ກວ່າ​ການ​ເຕີບ​ໂຕ​ຂອງ​ເສດ​ຖະ​ກິດ, ລາຍ​ຮັບ​ຂອງ​ຕົວ​ເມືອງ​ແລະ​ຊົ​ນ​ນະ​ບົດ​ແຕກ​ໂຕນ​ກັນ​ໜ້ອຍ​ລົງ​ຢ່າງ​ຕໍ່​ເນື່ອງ. ຈຳ​ນວ​ນ​ປະ​ຊາ​ຊົນ​ທີ່​ປະ​ກອບ​ອາ​ຊີ​ບຄືນໃໝ່​ໃນ​ຕົວ​ເມືອງ​ມີຫຼາຍກວ່າ 64 ລ້ານ​ຄົນ. ໄດ້​ສ້າງ​ເຮືອນ​ນະ​ໂຍ​ບາຍ​ໃນຕົວ​ເມືອງ​ 40 ລ້ານ 1 ແສນ 3 ໝື່ນ​ຊຸດ, ປະ​ຊາ​ຊົນ​ນັບ​ເປັນ 100 ລ້ານ​ຄົນ​ໄດ້​ເຂົ້າມາ​ອາ​ໄສ​ຢູ່​ເຮືອນໃໝ່. ​ປະ​ຊາ​ຊົນທຸກ​ຍາກຢູ່ຊົນ​ນະ​ບົດ​ຫຼຸດ​ລົງ 100 ລ້ານກວ່າ​ຄົນ, ໄດ້​ແກ້​ໄຂ​ບັນ​ຫາ​ນ້ຳດື່ມ​ໃຫ້​ແກ່​ປະ​ຊາ​ຊົນ​ຢູ່ຊົນ​ນະ​ບົດ​ໄດ້​ເຖິງ​ 300 ລ້ານກວ່າ​ຄົນ. ຫົກ​ ການ​ພັດ​ທະ​ນາ​ສັງ​ຄົມ​ໄດ້​ຮັບ​ຜົນ​ງານ​​ດີ. ຄວາມ​ຍຸ​ຕິ​ທຳ ແລະ​ຄຸນ​ນະ​ພາບ​ຂອງ​ການ​ສຶກ​ສາ​ຍົກ​ສູງ​ຂຶ້ນ​ຢ່າງ​ເດັ່ນ​ຊັດ. ການ​ປະ​ກັນ​ໄພ​ດ້ານ​ປິ່ນ​ປົວສຸຂະພາບ​ຂັ້ນ​ພື້ນ​ຖານ​ຂະຫຍາຍ​ອອກ​ໃນ​ທົ່ວ​ປະ​ເທດ​, ອັດ​ຕາ​ເຂົ້າ​ຮ່ວມ​ການ​ປະ​ກັນ​ໄພ​ບຳ​ນານຂັ້ນ​ພື້ນ​ຖານບັນລຸ​ຫຼາຍກວ່າ 80%.

ສອງ: ໜ້າ​ທີ່, ​ເປົ້າ​ໝາຍ ແລະ​ມາດ​ຕະ​ການ​ທີ່​ສຳ​ຄັນ​ໃນ​ໄລ​ຍະ​ປະ​ຕິ​ບັດ​ແຜນ​ການ 5 ປີ ຄັ້ງ​ທີ 13

ອີງ​ຕາມ ຂໍ້​ສ​ະ​ເໜີຂອງ​ສູນ​ກາງ​ພັກ​ກອມ​ມູ​ນິດ​ຈິນກ່ຽວ​ກັບ​ການ​ວາງ​ແຜນແມ່​ບົດ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ແຫ່ງ​ຊາດ​ຈີນ 5 ປີ​ຄັ້ງ​ທີ 13, ​ລັດ​ຖະ​ບານ​ຈີນ​ໄດ້​ວາງ ໂຄງ​​ຮ່າງ​ແຜນແມ່​ບົດ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ແຫ່​ງ​ຊາດ​ຈີນ 5 ປີ​ຄັ້ງ​ທີ 13 ອອກ​ມາ ແລະ​ໄດ້​ນຳ​ສະ​ເໜີ​ໃຫ້​ກອງ​ປະ​ຊຸມ​ຄັ້ງ​ນີ້​ຄົ້ນ​ຄວ້າພິ​ຈາ​ລະ​ນາ.

ໂຄງ​ຮ່າງແຜນ​ແມ່​ບົດດັ່ງ​ກ່າວ​ໄດ້​ເນັ້ນ​ໃສ່ 6 ດ້ານ​ດັ່ງ​ນີ້

——ຮັກ​ສາ​ໃຫ້​ເສດ​ຖະ​ກິດ​ພັດ​ທະ​ນາ​ດ້ວຍ​ຄວມ​ໄວ​ສູງ​ແລະ​ປານ​ກາງ, ຊຸກ​ຍູ້​ໃຫ້​ຂະ​ແຫນງ​ການ​ຕ່າງໆກ້​າວ​ໄປ​ສູ່​ລະ​ດັບປານ​ກາງ​ແລະ​ສູງ​. ບັນ​ລຸ​ເປົ້າ​ໝາຍ​ສ້າງສັງ​ຄົມ​ທີ່​ອີ່ມ​ໜຳ​ສຳ​ລານ​ຢ່າງ​ຮອບ​ດ້ານ​ໃຫ້​ສຳ​ເລັດ, ຮອດ​ປີ 2020 ​ເຮັດໃຫ້ລວ​ມ​ຍອດຜະ​ລິດ​ຕະ​ພັນ​ພາຍ​ໃນ ແລະ​ລາຍ​ຮັບ​ຂອງ​ປະ​ຊາ​ຊົນ​ໃນ​ຕົວ​ເມືອງ​ແລະ​ຊົນ​ນະ​ບົດ​ສະ​ເລ່ຍ​ຕໍ່​ຫົວ​ຄົນ ເພີ່​ມຂຶ້ນ​ທົບ​ເທົ່າ​ທຽບ​ໃສ່​ປີ 2010, ໃນ​ໄລ​ຍະ​ປະ​ຕິ​ບັດ​ແຜນ​ການ 5 ປີ ຄັ້ງ​ທີ 13 ໃຫ້​ເສດ​ຖະ​ກິດ​ຮັກ​ສາ​ຄວາມ​ໄວ​ເຕີບ​ໂຕໄວ​ກວ່າ 6,5% ຕໍ່​ປີ, ເລັ່ງ​ລັດ​ຊຸກ​ຍູ້​ການ​ປັບ​ປຸງ​ໂຄງ​ປະ​ກອບ​ເສດ​ຖະ​ກິດ​ໃຫ້​ດີ​ຂຶ້ນ​ແລະ ຍົກ​ລະ​ດັບ​ໃຫ້​ສູງ​ຂຶ້ນ.

——ເພີ່ມ​ທະ​ວີ​ບົດ​ບາດ​ນຳ​ພາ​ດ້ວຍ​ການ​ປະ​ດິດ​ສ້າງ​ໃໝ່, ເພີ່ມ​ພະ​ລັງ​ແຮງ​ອັນ​ແຂງ​ແຮງ​ເຂົ້າ​​ໃສ່​ການ​ພັດ​ທະ​ນາ. ການ​ປະ​ດິດ​ສ້າງ​ໃໝ່ ແມ່ນ​ພະ​ລັງ​ແຮງ​ສຳ​ຄັນ​ອັນ​ດັບ​ໜຶ່ງ​ໃນ​ການ​ນຳ​ພາ​ການ​ພັດ​ທະ​ນາ, ສະ​ນັ້ນ​ຕ້ອງຍົກ​ໄວ້​ໃຫ້​ເປັນ​ໃຈ​ກາງ​ທີ່​ສຸດ​ໃນສະ​ພາບ​ການ​ລວມ​ແຫ່ງ​ການ​ພັດ​ທະ​ນາ​ຂອງ​ປະ​ເທດ ແລະ​ຕ້ອງ​ປະ​ຕິ​ບັດ​ຍຸດ​ທະ​ສາດ​ພັດ​ທະ​ນາ​ດ້ວຍ​ການ​ປະ​ດິດ​ສ້າງ​ໃໝ່​ໃຫ້​ກ້າວ​ສູ່​ລວງ​ເລິກ. ຮອດ​ປີ 2020 ​ຈະ​ພະ​ຍາ​ຍາມບຸກ​ທະ​ລຸ​ທີ່​ສຳ​ຄັນ​ໃນ​ຂົງ​ເຂດ​ຄົ້ນ​ຄວ້າ​ພື້ນ​ຖານ, ການ​ຄົ້ນ​ຄວ້າປະຍຸກ ແລະ​ຂົງ​ເຂດ​ກ້າວ​ໜ້າ​ດ້ານ​ຍຸດ​ທະ​ສາດ, ສະ​ໜອງ​ງົບ​ປະ​ມານ​ການ​ຄົ້ນ​ຄວ້າ​ຂອງ​ທົ່ວ​ສັງ​ຄົມ​ໃຫ້​ບັນ​ລຸ​ເຖິງ 2,5%, ​​ເຮັດໃຫ້ອັດ​ຕາ​ປະ​ກອບ​ສ່ວນ​ຂອງ​ຄວາມ​​ກ້າວໜ້າ​ດ້ານ​ວິ​ທະ​ຍາ​ສາດ​ເຕັກ​ນິກ​ຕໍ່​ການ​ເຕີບ​ໂຕ​ຂອງ​ເສດ​ຖະ​ກິດ​ບັນ​ລຸ​ເຖິງ 60%, ກ້າວ​ເຂົ້າ​ສູ່​ຖັນ​ແຖວ​ປະ​ເທດ​ແບບ​ປະ​ດິດ​ສ້າງ​ໃໝ່ ແລະ​ປະ​ເທດ​ເຂັ້ມ​ແຂງຂອງ​ການ​ມີ​ຜູ້​ມີ​ຄວາມ​ຮູ້​ຄວາມ​ສາ​ມາດ.

——ຊຸກ​ຍູ້​ການ​ຫັນ​ເປັນ​ຕົວ​ເມືອງ​ແບບ​ໃໝ່ ແລະ​ສ້າງ​ກະ​ສິ​ກຳ​ທີ່​ທັນ​ສະ​ໄໝ, ຊຸກ​ຍູ້​ໃຫ້​ຕົວ​ເມືອງ​ແລະ​ຊົນ​ນະ​ບົດ​ພັດ​ທະ​ນາ​ຢ່າງ​ກົມ​ກຽວ​ກັນ. ຕ້ອງ​ລົງ​ເລິກ​ຊຸກ​ຍູ້​ການ​ຫັນ​ເປັນ​ຕົວ​ເມືອງ​ທີ່​ຖື​ຄົນ​ເປັນ​ຈຸດ​ສຸມ, ຍົກຍ້າຍ​ປະ​ຊາ​ຊົນ​ທີ່​ຢູ່​ຊົນ​ນະ​ບົດ​ຈຳ​ນວນ 100 ລ້ານ​ຄົນ​ເຂົ້າ​ໄປ​ຢູ່​ໃນ​ຕົວ​ເມືອງ​ໃຫ້​ສຳ​ເລັດ, ການສ້ອມ​ແປງ​ເຮືອນ​ຢູ່​ຊົ່ວ​ຄາວ​ແລະຄຸ້ມ​ເຮືອນ​ຢູ່​ແບບ​ເກົ່າ​ໃນ​ຕົວ​ເມືອງ​ໃຫ້​ປະ​ຊາ​ຊົນ​ຈຳ​ນວນ 100 ລ້ານ​ຄົນ​ໃຫ້​ສຳ​ເລັດ, ​ຊີ້​ນຳ​ປະ​ຊາ​ຊົນ​ປະ​ມານ 100 ລ້ານ​ຄົນ​ທີ່​ຢູ່​ເຂດ​ພາກ​ກາງ​ແລະ​ພາກ​ຕາ​ເວັນ​ຕົກ​ໃຫ້​ສ້າງ​ທ້ອງຖິ່ນ​ຕົນ​​ເປັນ​ຕົວ​ເມືອງ. ເມື່ອຮອດປີ 2020, ເຮັດ​ໃຫ້​ອັດ​ຕາ​ຫັນ​ເປັນ​ຕົວ​ເມືອງ​ຂອງ​ຈີນ​ບັນ​ລຸ​ເຖິງ 60%. ເພີ່ມ​ທະ​ວີ​ການ​ກໍ່ສ້າງ​ພື້ນ​ຖານ​ໂຄງ​ລ່າງ​ທີ່​ສຳ​ຄັ​ນ​ໂດຍ​ເພີ່ມໄລ​ຍະ​ທາງ​ລົດ​ໄຟ​ຄວາມ​ໄວ​ສູງ​ໃຫ້​ບັນ​ລຸ​ເຖິງ 3 ໝື່ນ​ກິ​ໂລ​ແມັດ ແລະກວມ​ຕົວ​ເມືອງ​ໃຫຍ່​​ໃນ​ທົ່ວ​ປະ​ເທດ 80% ຂຶ້ນ​ໄປ, ສຸມ​ໃສ່​ເຮັດໃຫ້​​ໄລ​​ຍະທາງ​ດ່ວນ​ທີ່​ສ້າງ​ໃໝ່​ແລະ ດັດ​ປັບປຸງ​ນັ້ນ​ບັນ​ລຸ​ປະ​ມານ 3 ໝື່ນ​ກິ​ໂລ​ແມັດ, ເຮັດໃຫ້​ຕົວ​ເມືອງ​ແລະ​ຊົນ​ນະ​ບົດ​ມີ​ອິນ​ເຕີ​ເນັດ​​ສາຍ​ດ່ວນໃຊ້​ຢ່າງ​ຮອບ​ດ້ານ.

——ຊຸກ​ຍູ້​ໃຫ້​​ການດຳ​ລົງ​ຊີ​ວິດ​​ແລະ​ການ​ຜະ​ລິດ​ສີ​ຂຽວເປັນຮູບປະທຳ, ເລັ່ງ​ລັດ​ປັບ​ປຸງ​ສະ​ພາບ​ແວດ​ລ້ອມ​ທຳ​ມະ​ຊາດ​ໃຫ້​ດີ​ຂຶ້ນ. ໃນ 5 ປີ​ຕໍ່​ໜ້ານີ້ ​ເຮັດ​ໃຫ້ປະລິ​ມານ​ໃຊ້ນ້ຳ, ພະ​ລັງ​ງານ ແລະ​ລະ​ບາຍ​ກາກບອນ​ດີ​ອອກ​ຊິດ​ຕໍ່ລວມຍອດ​​ຜະ​ລິດ​ຕະ​ພັນ​ພາຍ​ໃນ​ແຕ່​ລະ​ຫົວ​ໜ່ວຍ​ຫຼຸດ​ລົງ 23%, 15% ແລະ​ 18% ຕາມ​ລຳ​ດັບ, ອັດ​ຕາ​ປົກ​ຫຸ້ມຂອງ​ປ່າ​ໄມ້ໃຫ້​ບັນ​ລຸ​ເຖິງ 23,04%, ການ​ປັບ​ປຸງ​ອາ​ກາດ​ມົນ​ລະ​ພິດ​ໃຫ້​ໄດ້​ຮັບ​ຄວາມ​ຄືບ​ໜ້າ​ຢ່າງ​ເດັ່ນ​ຊັດ ​ເຮັດໃຫ້​​ອັດ​ຕາຈຳ​ນວນມື້​ທີ່​ມີ​ອາ​ກາດ​ປອດ​ໂປ່ງ​ດີ​ຂອງ​ຕົວ​ເມືອງ​ໃຫຍ່ ​ຫຼາຍກວ່າ 80%. ພວກ​ເຮົາ​ຕ້ອງ​ມີ​ມະ​ນາ​ຈິດ​ອັນໜັກແໜ້ນໃນ​ການສ້າງ​ຈີນ​ທີ່​ສວຍ​ງາມ​ທີ່​ມີ​ທ້ອງ​ຟ້າ​ປອດ​ໂປ່ງ​ດີ, ດິນ​ແດນ​ຂຽວ​ງາມ​ແລະ​ແມ່​ນ້ຳ​ໃສ.

——ລົງ​ເລິກ​ການ​ປະ​ຕິ​ຮູບ​ແລະ​ໄຂ​ປະ​ຕູ​ສູ່​ພາຍນອກ, ສ້າງ​ໂຄງ​ປະ​ກອບ​ການ​ພັດ​ທະ​ນາ​ອັນ​ໃໝ່ ເຮັດ​ໃຫ້​ຕະ​ຫຼາດ​ເສີມ​ຂະ​ຫຍາຍ​ບົບບາດ​ຕັດ​ສິນ​ໃນ​ການ​ຈັດ​ສັນ​ຊັບ​ພະ​ຍາ​ກອນ​ຕ່າງໆ ແລະ​ເສີມ​ຂະ​ຫຍາຍ​ບົດ​ບາດ​ຂອງ​ລັດ​ຖະ​ບານ​ໃຫ້​ດີກວ່າ​ເກົ່າ, ເລັ່ງ​ລັດສ້າງ​ເປັນໂຄງ​ປະ​ກອບ, ​ກົນ​ໄກ ແລະ​ຮູບ​ການ​ໃໝ່​ທີ່ຊີ້ນຳ​ສະ​ພາບ​ປົກ​ກະ​ຕິ​ໃໝ່​ໃນ​ການພັດ​ທະ​ນາ​.

——ສືບ​ຕໍ່​ສ້າງຄວາມ​ສຸກ​ໃຫ້​ແກ່​ປະ​ຊາ​ຊົນ ເຮັດ​ໃຫ້​ປະ​ຊາ​ຊົນ​ທຸກ​ຖ້ວນ​ໜ້າ​ສາ​ມາດນຳໃຊ້ຜົນປະໂຫຍດຈາກ​​ໝາກ​ຜົນຂອງ​ການ​ພັດ​ທະ​ນາ​ຮ່ວມ​ກັນ. ຍຶດ​ໝັ້ນ​ແນວ​ຄິດ​ພັດ​ທະ​ນາ​ທີ່​ຖື​ປະ​ຊາ​ຊົນ​ເປັນ​ໃຈ​ກາງ, ພະ​ຍາ​ຍາມ​ແກ້​ໄຂ​ຂໍ້​ຂາດ​​ບົກພ່ອງໃນ​ດ້ານ​ການ​ຄ້ຳ​ປະ​ກັນ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ ເພື່ອ​ກ້າວ​ໄປ​ຕາມ​ທິດ​ທີ່​ຮັ່ງ​ມີ​ຂຶ້ນ​ຮ່ວມ​ກັນ.

ການ​ທີ່​ຈະເຣັດໃຫ້ແຜນ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ໃນ​ໄລ​ຍະ 5 ປີ ຄັ້ງ​ທີ 13 ສຳເລັດຜົນແລະເຮັດໃຫ້​ດີ, ສຳ​ເລັດ​ໜ້າ​ທີ່​ສ້າງ​ເປັນ​ສັງ​ຄົມ​ທີ່​ອີ່ມ​ໜຳ​ສຳ​ລານ​ຢ່າງ​ຮອບ​ດ້ານນັ້ນ ​ຕ້ອງ​ອອກ​ແຮງ​ຄຸ້ມຄອງ 3 ຈຸດ​ໃຫ້​ດີ ຄື ຈຸດທີ 1 ​ແມ່ນ ກຳ​ແໜ້ນ​ການ​ພັດ​ທະ​ນາ​ໃຫ້​ເປັນ​ວຽກ​ງານ​ສຳ​ຄັນ​ອັນ​ດັບ​ໜຶ່ງ​ຕະ​ຫຼອດ. ການ​ພັດ​ທະ​ນາ​ຄື​ເຫດ​ຜົນ​ທີ່​ແຂງ​ແ​ຮງ, ແມ່ນ​ຂໍ​ກະ​ແຈ​​ຂອງ​ການ​ແກ້​ໄຂ​ທຸກ​ບັນ​ຫາ​ຂອງ​ປະ​ເທດ​ພວກ​ເ​ຮົາທັງໝົດ. 5 ປີ​ຕໍ່​ໜ້ານີ້​ແມ່ນ​ໄລ​ຍະ​ສຳ​ຄັນ​ທີ່​ສຸດ​ໃນ​ການ​ຂ້າມ​ຜ່ານຂຸມ​​ລາຍ​ຮັບ​ລະ​ດັບ​ປານ​​ກາງ, ຄວາ​ມ​ຂັດ​ແຍ່ງ​ກັນ ແລະ​ຄວາມ​ສ່ຽງ​ທຸກໆ​ປະ​ການ​​ຈະ​ເພີ່ມ​ຂຶ້ນ​ຢ່າງ​ເດັ່ນ​ຊັດ, ສະ​ນັ້ນ ພວກ​ເຮົາຕ້ອງ​ຍຶດ​ໝັ້ນ​ຖືເອົາ​ການ​ພັດ​ທະ​ນາ​ເ​ສດ​ຖະ​ກິດ​ເປັນ​ໃຈ​ກາງ​ຢ່າງ​ໝັ້ນ​ໜຽວບໍ່​ປ່ຽນ​ແປງ, ຊຸກ​ຍູ້​ການ​ພັດ​ທະ​ນາ​ຕາມ​ຫຼັກ​ວິ​ທະ​ຍາ​ສາດ, ຮັບ​ມື​ກັບ​ສິ່​ງ​ທ້າ​ທາຍ​ຕ່າງໆ​ຢ່າງ​ເໝາະ​ສົມ, ເຮັດ​ໃຫ້​ເສດ​ຖະ​ກິດ​ຈີນ​ພັດ​ທະ​ນາ​ຕະຫຼອດ​ໄປ. ຈຸດ​ທີ 2 ແມ່ນ ອອກ​ແຮງ​ຊຸກ​ຍູ້​ການ​ປະ​ຕິ​ຮູບ​ໂຄງປະ​ກອບ​ເສດ​ຖະ​ກິດ. ຈຸດທີ 3 ແມ່ນ ເລັ່ງ​ລັດ​ການ​ຫັນ​ປ່ຽນ​ກັນ​ລະ​ຫວ່າງ​ພະ​ລັງ​ແຮງ​ເກົ່າ​ແລະ​ໃໝ່​ໃນ​ການ​ຊຸກ​ຍູ້​ການ​ພັດ​ທະ​ນາ. ໂດຍພື້ນ​ຖານ​ແລ້ວ​ເຫັນ​ວ່າ, ກຳ​ລັງ​ທີ່​ຊຸກ​ຍູ້​ການ​ພັດ​ທ​ະນານັ້ນແມ່ນ​ບົ່ມຊ້ອນ​ຢູ່​ນຳປະ​ຊາ​ຊົນ, ແຮງ​ງານ​ຈຳ​ນວນ 900 ລ້ານກວ່າ​ຄົນ, ຜູ້​ມີ​ຄວາມ​ຮູ້​ຄວາມ​ສາ​ມາດ​ທີ່​ໄດ້​ຮັບ​ການ​ສຶກ​ສາ​ລະ​ດັບ​ສູງ ແລະ​ການ​ຝຶກ​ອົບ​ຮົມ​​ວິ​ຊາ​ຊີບ​ຈຳ​ນວນ 100 ​ລ້ານກວ່າ​ຄົນ ແມ່ນ​ຊັບ​ພະ​ຍາ​ກອນ​ ແລະ​ທ່າ​ແຮງ​ທີ່​ໃຫຍ່​ທີ່​ສຸດ​ຂອງ​ພວກ​ເຮົາ. ການ​ບັນ​ລຸ​ການ​ຫັນ​ປ່ຽນ​ກັນ​ລະ​ຫວ່າງ​ພະ​ລັງ​ແຮງ​ໃໝ່​ແລະ​ເກົ່າ, ຊຸກ​ຍູ້​ໃຫ້​ການ​ພັດ​ທະ​ນາຕ້ອງໄດ້ອາໄສ​ຊັບ​ພະ​ຍາ​ກອນ​ມະ​ນຸດ ແລະ​ການ​ປະ​ດິດ​ສ້າງ​ວິ​ທະ​ຍາ​ສາດ​ເຕັກ​ນິກ​ຫຼາຍກວ່າ​ເກົ່າ.

ເມື່ອ​ເບິ່ງ 5 ປີ​ຕໍ່​ໜ້ານີ້, ພວກ​ເຮົາລ້ວນແຕ່ມີ​ຄວາມ​ໝັ້ນ​ໃຈ​ທີ່​ຈະ​ຍາດໄດ້​​ໄຊ​ຊະ​ນະ.

ສາມ: ວຽກ​ງານ​ຈຸດ​​ສຸມ​ໃນ​ປີ 2016

 ປີນີ້ ແມ່ນ​ປີ​ທຳ​​ອິດ​ໃນ​ໄລ​ຍະ​ສຳ​ຄັນ​ທີ່​ສ້າງ​ສັງ​ຄົມ​ທີ່​ອີ່ມ​ໜຳ​ສຳ​ລານ​ຢ່າງ​ຮອບ​ດ້ານສຳເລັດແລະ​ກໍ​ແມ່ນ​ປີ​ໜຶ່ງ​ທີ່​ຕ້ອງ​ແກ້​ໄຂ​ຂໍ້ຫຍຸ້ງ​ຍາກ​ຕ່າງໆ​ຂອງ​ການ​ຊຸກ​ຍູ້​ການ​ປະ​ຕິ​ຮູບໂຄງ​​ປະ​ກອບ.

ເປົ້າ​ໝາຍ​ການ​ພັດ​ທະ​ນາ​ທີ່​ສຳ​ຄັນ​ຕ່າງໆ​ທີ່​ຄາດ​ໄວ້​ໃນ​ປີນີ້ມີ​ຄື: ​ລວມຍອດ​​ຜະ​ລິດ​ຕະ​ພັນ​ພາຍ​ໃນ​​ເພີ່ມ​ຂຶ້​ໜ 6,5-7%, ດັດ​ຊະ​ນີລາ​ຄາ​​ຜູ້​ບໍ​ລິ​ໂພກ (CPI) ​ສູງ​ຂຶ້ນ​ປະ​ມານ 3%, ການ​ປະ​ກອບ​ອາ​ຊີບ​ໃໝ່​ໃນ​ຕົວ​ເມືອງ​ໃຫ້ໄດ້​ຫຼາຍກວ່າ 10 ລ້ານ​ຄົນ, ອັດ​ຕາ​ຫວ່າງ​ງານ​ທີ່​ລົງ​ທະ​ບຽນ​ໃນ​ຕົວ​ເມືອງ​ໃຫ້ຄວບ​ຄຸມ​ຢູ່​ໃນລະດັບ 4,5%, ການ​ຄ້າ​ຂາ​ເຂົ້າ​ຂາ​ອອກ​ໃຫ້​ມີ​ຄວາມ​ໝັ້ນ​ຄົງ ແລະ​ດີ​ຂຶ້ນ, ລາຍ​ຈ່າຍ​ລາຍ​ຮັບສາ​ກົນ​ມີ​ຄວາມ​ດຸນ​ດ່ຽງ​ກັນໂດຍ​ພື້ນ​ຖານ, ​ລາຍ​ຮັບ​ຂອງ​ປະ​ຊາ​ຊົນເພີ່ມຂຶ້ນ ກັບ ການ​ເຕີບ​ໂຕ​ທາງ​ເສດ​ຖະ​ກິດ​​ໃຫ້​ຢູ່​ໃນ​ຈັງ​ຫວະ​ດຽວ​ກັນ​ໂດຍ​ພື້ນ​ຖານ, ຍອດການບໍລິໂພກພະ​ລັງ​ງານ​​ທີ່​ຄິດສະ​ເລ່ຍ​ຕໍ່​ລວມຍອດ​ຜະ​ລິດ​ຕະ​ພັນ​ພາຍ​ໃນ​​ແຕ່​ລະ​ຫົວ​ໜ່ວຍ ຫຼຸດ 3,4% ລົງ​ໄປ, ສືບຕໍ່ເຮັດໃຫ້​ມົນ​ລະ​ພິດຫຼຸດ​ໜ້ອຍ​ລົງ.

ການ​ຕັ້ງ​ເປົ້າ​ໝາຍ​ເຕີບ​ໂຕ​ຂອງ​ເສດ​ຖະ​ກິດ​​ຢູ່​ໃນ​ລະ​ດັບ 6,5-7% ນັ້ນໄດ້​ພິ​ຈາ​ລະ​ນາ​ການ​ເຊື່ອມ​ຕໍ່​ກັບ​ເປົ້າ​ໝາຍ​ສ້າງ​​ສັງ​ຄົມ​ທີ່​ອີ່ມ​ໜຳ​ສຳ​ລານ​ຢ່າງຮອບ​ດ້ານສຳເລັດ, ແລະ​ໄດ້​ພິ​ຈາ​ລະ​ນາ​ເຖິງ​ຄວາມ​ຕ້ອງ​ການ​ຂອງ​ການ​ປະ​ຕິ​ຮູບໂຄງປະ​ກອບ ເຊິ່ງ​ເປັນຜົນ​ດີ​ຕໍ່​ການ​ນຳ​ພາ​ຕະ​ຫຼາດ ແລະ​ໃຫ້​ຕະ​ຫຼາດ​ມີ​ຄວາມ​ໝັ້ນ​ທ່ຽງ. ການ​ເຮັດ​ໃຫ້​ການ​ເຕີບ​ໂຕ​ມີ​ຄວາມ​ໝັ້ນ​ທ່ຽງ ຕົ້ນ​ຕໍ​ກໍ​​ເພື່ອ​ຮັບ​ປະ​ກັນ​ການ​ປະ​ກອບ​ອາ​ຊີບ ແລະ​ສົ່ງ​ຜົນ​ປະ​ໂຫຍດ​ໃຫ້​ປະ​ຊາ​ຊົນ, ຄວາມ​ໄວ​ເຕີບ​ໂຕ​ບັນ​ລຸ 6,5-7% ກໍສາ​ມາດ​ບັນ​ລຸ​ການ​ປະ​ກອບ​ອາ​ຊີບ​ຢ່າງ​​ເຕັມ​ທີ່​​ໄດ້.

ເມື່ອ​ວິ​ເຄາະ​ສະ​ພາບ​ການ​​ດ້ານ​ຕ່າງໆ​ໂດຍ​ລວມ​ແລ້ວ​ເຫັນ​ວ່າ, ປີນີ້ ການ​ພັດ​ທະ​ນາ​​ປະ​ເທດວຂອງພ​ວກ​ເຮົາ​ ຈະ​ຜະ​ເຊີນ​ກັບ​ຄວາມ​ຫຍຸ້ງຍ​າກ​​ລຳ​ບາກ​ຫຼາຍກວ່າ​ເກົ່າ ພ້ອມ​ທັງ​ຈະ​ຜະ​ເຊີນ​ກັບ​ສິ່ງ​ທ້າ​ທາຍ​ທີ່ໜັກໜ່ວງກວ່າ​ເກົ່າ, ພວກ​ເຮົາ​ຕ້ອງ​​ກະ​ກຽມ​ເປັນ​ຢ່າງ​ດີ. ເບິ່ງ​ຈາກ​​ສາ​ກົນ​ແລ້ວກໍ​ເຫັນ​ວ່າ, ເສດ​ຖະ​ກິດ​ໂລກ​​ຢູ່​ໃນ​ສະ​ພາບ​ທີ່​ປັບ​ປຸງ​ຈາກ​ດ້ານ​ເລິກ, ຂາດ​ພະ​ລັງ​ແຮງ​ໃນ​ການ​ຟື້​ນ​ຕົວ​ຄືນ, ການ​ຄ້າ​ສາ​���ົນ​ຕົກ​ຕ່ຳ​ລົງ, ຕະ​ຫຼາດ​ການ​ທະ​ນາ​ຄານ ແລະ​ຕະ​ຫຼາດສິນ​ຄ້າ​ລ​າຍ​ໃຫຍ່​ປັ່ນ​ປ່ວນບໍ່​ແນ່ນອນ, ການ​ເມືອງ​ພາກ​ພື້ນ​ມີຄວາມ​ສ່ຽງ​ສູງ​ຂຶ້ນ, ສະ​ພາບ​ແວດ​ລ້ອມ​ພາ​ຍນອກ​​ມີ​ປັດ​ໄຈ​ບໍ່​ແນ່ນອນ​ແລະ​ບໍ່​​ຄັກ​ແນ່​ຫຼາຍ​ຂຶ້ນ ເຊິ່ງ​ຈະ​ສົ່ງ​ຜົນ​ກະ​ທົບ​ແລະເປັນສິ່ງທີ່​ປະ​ໝາດບໍ່​ໄດ້​​ຕໍ່ການ​ພັດ​ທະ​ນາ​ຂອງ​ຈີນ. ເບິ່ງ​ຈາກ​ພາຍ​ໃນ​ປະ​ເທດ​ແລ້ວ​ເຫັນ​ວ່າ, ຄວາມ​ຂັດ​ແ​ຍ່ງກັນ ແລະ​ຄວາມ​ສ່ຽງ​ທີ່​ສະ​ສົມ​ໄວ້​ເປັນ​ເວ​ລາ​ດົນ​ນານ​ນັ້ນ​ຈະ​ພົ້ນ​ເດັ່ນ​ອອກ​ຕື່ມ​ອີກ, ການ​ເຕີບ​ໂຕ​ຂອງ​ເສດ​ຖະ​ກິດ​ເກີດ​​ການ​ປ່ຽນ​ແປງ, ການ​ປັບ​ປຸງ​​ໂຄງກອບ​​ແມ່ນ​ໄລ​ຍະ​ຫຍຸ້ງຍ​າກທີ່​ຕ້ອງ​ຜ່ານ, ພະ​ລັງ​ແ​ຮງ​ເກົ່າ ແລະ​ໃໝ່​ຢູ່​ໃນ​​ໄລ​ຍະຜັດ​ປ່ຽນ​ກັນ, ເສດ​ຖະ​ກິດ​ປະ​ສົບ​ແຮງ​ກົດ​ດັນ​ຂອງ​ການ​ຊຸດ​ໂຊມ​ລົງ ແຕ່ຄວາມ​ຫຍຸ້ງ​ຍາກ​ແລະ​ການ​ທ້າ​ທາຍ​ເຫຼົ່າ​ນີ້ບໍ່​ໜ້າເປັນຫ່ວງ, ເພາະ​ວ່າ ເມື່ອ​ຜ່ານ​ການ​ພັດ​ທະ​ນາ​ຢ່າງວ່ອງ​ໄວ​ເປັນ​ເວ​ລາ​ຫຼາຍ​ປີ​ແລ້ວ, ປະ​ເທດ​ພວກ​ເຮົາ​ມີ​ພື້ນ​ຖານວັດ​ຖຸ​ຢ່າງ​ໜາ​ແໜ້ນ, ເສດ​ຖະ​ກິດ​ມີ​ຄວາມ​ໜຽວ​ແໜ້ນ, ກຳ​ລັງ​ບົ່ມ​ຊ້ອນ​ກໍ​ພຽງ​ພໍ, ມີ​ຊ່ອງ​ທາງ​ການ​ພັດ​ທະ​ນາ​ຢ່າງ​ຫຼວງ​ຫຼາຍ, ການ​ປະ​ຕິ​ຮູບ​ແລະ​ໄຂ​ປະ​ຕູ​ສູ່​ພາຍນອກ​ໄດ້​ຮັບ​ພະ​ລັງ​​ແຮງ​ອັນ​ໃໝ່​ຢ່າງ​ຕໍ່​ເນື່ອງ, ​ການ​ດັດ​ສົມຄວບ​ຄຸມ​ດ້ານ​ມະ​ຫາ​ພາກ​​ຢ່າງ​ມີ​ຫົວ​ຄິດ​ປະ​ດິດ​ສ້າງ​​ໄດ້​ສະ​ສົມ​ບົດ​ຮຽນ​ຢ່າງ​ອຸ​ດົ​ມ​ສົມ​ບູນ.

​ປີນີ້ ພວກ​ເຮົາ​ຕ້ອງ​ເຮັດ​ວຽກ​ງານ​ 8 ດ້ານ​ໃຫ້​ດີ ຄື:

ໜຶ່ງ: ເຮັດ​ໃຫ້​ນະ​ໂຍ​ບາຍ​ເສດ​ຖະ​ກິດ​ມະ​ຫາ​ພາກ​ໝັ້ນ​ທ່ຽງ ແລະ​ສົມ​​ບູນ​ຂຶ້ນ​ຕື່ມ, ໃຫ້​ເສດ​ຖະ​ກິດ​ຂະຫຍາຍຕົວຢູ່​ໃນ​ລະ​​ດັບ​ທີ່​ສົມ​ເຫດ​ສົມ​ຜົນ. ສືບ​ຕໍ່​ປະ​ຕິ​ບັດ​ນະ​ໂຍ​ບາຍ​ການ​ເງິນ​ທີ່​ຕັ້ງ​ໜ້າ ແ​ລະ​ໝັ້ນ​ທ່ຽງ, ປະ​ດິດ​ສ້າງ​ຮູບ​ການ​​ໃໝ່​ໃນ​ການ​ດັດ​ສົມຄວບ​ຄຸມ​ມະ​ຫາ​ພາກ​, ປະ​ຕິ​ບັດ​ການ​ປະ​ຕິ​ຮູບ​ໂຄງ​ປະ​ກອບ ໂດຍ​ສະ​ເພາະ​ແມ່ນ​ມາດ​ຕະ​ການ​ປະ​ຕິ​ຮູບ​​​ອົງ​ປະ​ກອບ​ໃນ​ດ້ານ​ສະຕຕິ​ປັນຍາ ເພື່ອ​ສ້າງ​ສະ​ພາບ​ແວດ​ລ້ອມ​ທີ່​ດີ​ໃຫ້​ແກ່​ການ​ພັດ​ທະ​ນາ​ເສດ​ຖະ​ກິດ.

ຕ້ອງ​ເພີ່ມ​ທະ​ວີ​ນະ​ໂຍ​ບາຍ​ການ​ເງິນ​ທີ່​ຕັ້ງ​ໜ້າ. ປີນີ້ ມີ​ແຜນ​ການ​ຈັດ​ໃຫ້���ມີຂຸມ​ການ​ເງິນ 2180 ຕື້ຢວນ ເພີ່ມ​ຂຶ້ນ​ຫຼາຍກວ່າ​ປີ​ຜ່ານ​ມາ 560 ຕື້ຢວນ, ອັດ​ຕາ​ຂຸມ​ການ​ເງິນ​ສູງ​ຂຶ້ນ 3%. ຈັດ​ວາງ​ພັນ​ທະ​ບັດ​​ສະ​ເພາະຂອງ​ທ້ອງ​ຖິ່ນ 400 ຕື້ຢວນ. ອັດ​ຕາ​ຂຸມ​ການ​ເງິນ ແລະ​ອັດ​ຕາ​ຕິດ​ໜີ້​ຂອງ​ລັດ​ຖະ​ບານອ່າວ​ຕ່ຳ​ແດ່​ເມື່ອ​ທຽບ​​ໃສ່​ກຸ່ມເສດ​ຖະ​ກິດ​ທີ່​ສຳ​ຄັນ​ຕ່າງໆ​ໃນ​ໂລກ ເຊິ່ງ​ການ​ຈັດ​ວາງ​ແນວນີ້​ແມ່ນ​ສິ່ງຈຳ​ເປັນ​​ແລະປະ​ຕິ​ບັດ​ໄດ້ ທັງ​ມີ​ຄວາມ​ປອດ​ໄພ.

ການ​ເພີ່ມ​ຂຸມ​ການ​ເງິນ​ໃຫ້​ຫຼາຍ​ຢ່າງ​ສົມ​ເຫດ​ສົມ​ຜົນ ຕົ້ນ​ຕໍ​ແມ່ນ​ໃຊ້​ໃນ​ການ​ຫຼຸດ​ສ່ວຍ​ສາ​ອາ​ກອນ ແລະ​ຫຼຸດ​ຄວາມ​ແບກ​ຫາບ​ຂອງວິ​ສາ​ຫະ​ກິດ​ໃຫ້​ໜ້ອຍ​ລົງຕື່ມ​ອີກ. ປີນີ້ ຈະ​ຫຼຸດ​ການ​ເກັບ​ສ່ວຍ​ສາ​ອາ​ກອນ​ຈາກວິ​ສ​າ​ຫະ​ກິດ ແລະ​ສ່ວນ​ບຸກ​ຄົນ​ໃຫ້​ໜ້ອຍ​ລົງ​ 500 ຕື້ກວ່າ​ຢວນ​ເມື່ອ​ທຽບ​​ໃສ່​ໄລ​ຍະ​​ທີ່ບໍ່​ໄດ້​ດຳ​ເນີນ​ການ​ປະ​ຕິ​ຮູບ. ພ້ອມ​ກັນ​ນັ້ນ, ຈະ​ເພີ່ມ​ລາຍ​ຈ່າຍ​​ການ​ເງິນ ແລະ​ການ​ລົງ​ທຶນ​ຂອງ​ລັດ​ຖະ​ບານ​ທີ່​ຈຳ​ເປັນ​​ຢ່າງ​ເໝາະສົມ​, ເພີ່ມ​ການ​ສະ​ໜັບ​ສະ​ໜູນ​ແກ້​ໄຂ​ດ້ານ​ອ່ອນ​​ໃນຂົງ​ເຂດ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ.

ເລັ່ງ​ລັດ​ການ​ປະ​ຕິ​ຮູບ​ໂຄງ​ປະ​ກອບ​ສ່ວຍ​ສາ​ອາ​ກອນ, ສ້າງ​ກົນ​ໄກ​ລະ​ດົມ​ທຶນ​ຂອງ​ອົງ​ການ​ປົກ​ຄອງ​ທ້ອງ​ຖີ່ນ​ທີ່​ເປັນ​ແບບຢ່າງ. ອົງ​ການ​ປົກ​ຄອງ​ທ້ອງ​ຖີ່ນ​ທຸກ​ຂັ້ນ​ຕ້ອງ​ຍຶດ​ໝັ້ນ​ດຳ​ເນີນ​ງານ​ແບບ​ປະ​ຢັດ ເພື່ອ​ໃຫ້​ງົບ​ປະມານທຸກ​ງວດ​​​ໄດ້​ນຳ​ໃຊ້ຕາມ​ເປົ້າ​ໝາຍ​ຢ່າງ​ຖືກ​ຕ້ອງ​ແລະ​ເໝາະ​ສົມ.

ນະ​ໂຍ​ບາຍ​ເງິນ​ຕາ​ທີ່​ໝັ້ນ​ທ່ຽງ​ຕ້ອງ​ມີ​ຄວາມ​ຄ່ອງ​ແຄ້ວ​ແລະ​ສົມ​ເຫດ​ສົມ​ຜົນ.  ປີນີ້ ເງິນ​ຕາ​ໃນ​ຄວາມ​ໝາຍກວ້າງ (M2) ຄາດ​ວ່າ​ຈະ​ເພີ່ມ​ຂຶ້ນ 13%, ຍອດ​ມູນ​ຄ່າ​ຂອງ​ການ​ລະ​ດົມ​ທຶນ​ໃນສັງ​ຄົມ​ຈະ​ເພີ່ມ​ຂຶ້ນ​ປະ​ມານ 13%. ຕ້ອງ​ນຳ​ໃຊ້​ນະ​ໂຍ​ບາຍ​ເງິນ​ຕາ​ປະ​ເພດ​ຕ່າງໆ, ຫຼຸດ​ຕົ້ນ​ທຶນ​ຂອງ​ການ​ລະ​ດົມ​ທຶນ​ໃຫ້​ໜ້ອຍ​ລົງ, ເພີ່ມ​ທະ​ວີ​ການ​ສະ​ໜັບ​ສະ​ໜູນ​ຕົວ​ຈິງ​ໃຫ້ແກ່​ເສດ​ຖະ​ກິດ​ໂດຍ​ສະ​ເພາະ​ແມ່ນ​ວິ​ສາ​ຫະ​ກິດ​ຂະ​ໜາດ​ນ້ອຍ​ ແລະ​ກະ​ສິ​ກຳ, ​ກະ​ສິ​ກອນ ແລະ​ຊົນ​ນະ​ບົດ.

ລົງ​ເລິກ​ການ​ປະ​ຕິ​ຮູບ​ໂຄງ​ປະ​ກອບ​ການ​ທະ​ນາ​ຄານ. ສືບ​ຕໍ່​ບູ​ລະ​ນະ​ກົນ​ໄກ​ການກໍ່​ຕົວ​ອັດ​ຕາ​ແລກ​ປ່ຽນ​ເງິນຢວນ​ຈີນ​ເປັນ​ແບບ​ຕະ​ຫຼາດ, ​ເຮັດໃຫ້​ອັດ​ຕາ​ແລກ​ປ່ຽນ​ເງິນຢວນ​ຈີນ​ຮັກ​ສາ​ຄວາມ​ໝັ້ນ​ທ່ຽງ​​ໂດຍ​ພື້ນ​ຖານໃນ​ລະ​ດັບ​ສົມ​ເຫດ​ສົມ​ຜົນ​ແລະ​ດຸນ​ດ່ຽງ​ກັນ. ສ້າງ​ລະ​ບຽບ​ການ​ຕ່າງໆ​ໃຫ້​​ເຂັ້ມ​ງວດ, ປັບ​ປຸງ​ລະ​ບຽບ​ການ​ການ​​ທະ​ນາ​ຄານ​ໃຫ້​ເປັນ​ແບບ​ສະ​ບັບ, ຕໍ່​ຕ້ານ​​ການ​ຫຼອກລວງ​ທາງ​ການ​​ທະ​ນາ​ຄານ, ການ​ລະ​ດົມ​ທຶນ​ແບບ​ຜິດ​ກົດ​ໝາຍ ​ແລະການ​ກະ​ທຳ​ຜິດ​ກົດ​ໝາຍ​ໃນ​ຂົງ​ເຂດ​​ຫຼັກ​ຊັບແລະ​ສິນ​ຄ້າ​ທີ່​ຊື້​ຂາຍ​ລ່ວງ​ໜ້າ, ຕ້ອງ​ຍຶດ​ໝັ້ນ​ບໍ່​ໃຫ້​ເກີດ​ຄວາມ​ສ່ຽງທີ່​ມີ​ລັກ​ສະ​ນະ​ລະ​ບົບ​ແລະ​ລັກ​ສະ​ນະ​ພາກ​ພື້ນ.

ສອງ: ເພີ່ມ​ທະ​ວີ​ການ​ປະ​ຕິ​ຮູບ​​ອົງປະ​ກອບ​ດ້ານສະຕິ​ປັນຍາ, ເພີ່ມ​ພະ​ລັງ​ແຮງ​ໃຫ້​ແກ່​ການ​ເຕີບ​ໂຕ​ຢ່າງ​ຕໍ່​ເນື່ອງ. ຊຸ​ກ​ຍູ້​ການ​ເຮັດ​ໃຫ້​ລະ​ບຽບ​ການ​ບໍ​ລິ​ຫານ​ງານ​ງ່າຍຂຶ້ນ, ​ຍານສິດຄວບ​ຄຸມ, ໃຫ້​ການ​ມອບສິດ​ກັບ​ການ​ຄວບ​ຄຸມ​ປະ​ສານ​ກົມກຽວ​ກັນ, ໃຫ້​ກາ​ນປະ​ຕິ​ຮູບ​​ການ​ບໍ​ລິ​ການ​ກ້າວສູ່​ລ​ວງ​ເລິກ. ຫັນ​ປ່ຽນ​ພາ​ລະ​ບົດ​ບາດ​ຂອງ​ລັດ​ຖະ​ບານ​ຢ່າງ​ແທ້​ຈິງ​ດ້ວຍ​ນ້ຳ​ໃຈ​ເຄົາ​ລົບ​ປະ​ຊາ​ຊົນ​ແລະ​ເດີນ​ຕາມ​ເສັ້ນ​ທາງ​ຕາມ​ລະ​ບຽບ​ການ​ບໍ​ລິ​ຫານ​ງານ​ງ່າຍ​ຂຶ້ນ, ຍົກ​ປະສິດທິ​ພາບ​ໃຫ້​ສູງ. ສືບ​ຕໍ່​ອອກ​ແຮງ​ຍົກ​ເລີກ​ນະ​ໂຍ​ບາຍກວດ​ກາ​ພິ​ຈາ​ລະ​ນາ​ດ້ານ​ບໍ​ລິ​ຫານ​ງານ. ປະ​ກາດ​ລາຍ​ຊື່​ສິດ​ແລະ​ພັນ​ທະ​ຂອງ​ອົງ​ການ​ປົກ​ຄອງ​ທ້ອງຖິ່ນ​ຢ່າງ​ຮອບ​ດ້ານ. ດັດ​ແກ້ ຫຼື ຍົກ​ເລີກ​ຂໍ້​ກຳ​ນົດ ແລະ​ເອ​ກະ​ສານ​ດ້ານ​ບໍ​ລິ​ຫານ​ງານ​ທີ່​ຈຳ​ກັດ​ການ​ພັດ​ທະ​ນາ. ອອກ​ແຮງ​ຊຸກ​ຍູ້ "ອິນ​ເຕີ​​ເນັດ+​ການ​ບໍ​ລິ​ການ​ດ້ານ​ບໍ​ລິ​ຫານ​ງານ", ໃຫ້​ພາກ​ສ່ວນ​ຕ່າງໆ​ຊົມ​ໃຊ້​ຂໍ້​ມູນ​ຮ່ວມ​ກັນ ເພື່ອ​ສ້າງ​ຄວາມ​ສະ​ດວກ​ໃຫ້​ແກ່​ປະ​ຊາ​ຊົນ​ແລະ​ວິ​ສາ​ຫະ​ກິດ​ໃນ​ການພົວພັນວຽກ​ນຳພ​າກ​ສ່ວນ​ຕ່າງໆ.

ນຳໃຊ້ພະ​ລັງ​ແຮງ​ທີ່​ບົ່ມ​ຊ້ອນ​ຂອງ​ທົ່ວ​ສັງ​ຄົມ​ໃນ​ການ​​ປະ​ກອບ​ທຸ​ລະ​ກິດ​ແລະ​ປະ​ດິດ​ສ້າງ​ໃໝ່. ອອກ​ແຮງ​ປ​ະ​ຕິ​ບັດ​ນະ​ໂຍ​ບາຍ​ພັດ​ທະ​ນາ​ດ້ວຍ​ການ​ປະ​ດິດ​ສ້າງ​ໃໝ່, ຊຸກ​ຍູ້​ໃຫ້​ວິ​ທະ​ຍ​ສາດ​ເຕັກ​ນິກ​ເຊື່ອມ​ໂຍງ​ເຂົ້າ​ກັບ​ເສດ​ຖະ​ກິດ​ຢ່າງ​ເລິກ​ເຊິ່ງ, ຍົກ​ສູງ​ຄຸນ​​ນະ​ພາບ​ລວ​ມ​ແລະ​ກຳ​ລັງ​ແຂ່ງ​ຂັນ​ຂອງ​ເສດ​ຖະ​ກິດ​ຕົວ​ຈິງ. ໜຶ່ງ​ ​​ເພີ່ມ​ທະ​ວີ​ຖານະຂອງວິ​ສາ​ຫະ​ກິດ​​ທີ່​ເປັນ​​ຕົ້ນ​ແບບ​​ໃນ​ການ​ປະ​ດິດ​ສ້າງ​ໃໝ່. ສອງ​ ​ເສີມ​ຂະ​ຫຍາຍ​ບົດ​ບາດ​ອັນ​ໃຫຍ່​ຫຼວງ​ຂອງປະ​ຊາ​ຊົນ​ທັງ​ໝົດ​ໃນ​ການ​ປະ​ກອບ​ທຸ​ລະ​ກິດ​ແລະ​ປະ​ດິດ​ສ້າງ​ໃໝ່ ແລະ​ໂຮ​ມ​ພູມ​ປັນ​ຍາ​ຂອງ​ປະ​ຊາ​ຊົນ​ຈາກ "ອິນ​ເຕີ​​ເນັດ+". ສາມ​ ​ລົງ​ເລິກ​ກາ​ນ​ປະ​ຕິ​ຮູບ​​ໂຄງ​ປະ​ກອບ​ການ​ຄຸ້ມ​ຄອງວິ​ທະ​ຍາ​ສາດ​ເຕັກ​ນິກ, ປຸກ​ລະ​ດົມ​ຄວາມ​ຫ້າວ​ຫັນ​ຂອງ​ທົ່ວ​ສັງ​ຄົມ​ໃນ​ການ​ປະ​ກອບ​ທຸ​ລະ​ກິດ ແລະ​ປະ​ດິດ​ສ້າງ​ໃໝ່ ​ເພື່ອ​ເຕົ້າໂຮມ​​ເປັນກຳ​ລັງ​ອັນ​ແຂງ​ແ​ຮງ​ໃນ​ການ​ຊຸກ​ຍູ້​ການ​ພັດ​ທະ​ນາ.

ອອກ​ແຮງ​ແກ້​ໄຂ​ຄວາມ​ສາ​ມາດທີ່​ເຫຼືອ​ເຟືອ​ໃນ​ການ​ຜະ​ລິດ​ ແລະ​ຫຼຸດ​ຕົ້ນ​ທຶນ​ໃຫ້​ໜ້ອຍ​ລົງ ເພີ່ມ​ສະ​ມັດ​ຖະ​ພາບ​ໃຫ້​ສູງ​ຂຶ້ນ. ຈຸດ​ສຸມ​​ຕ້ອງ​ເນັ້ນ​ໃສ່​ຂະ​ແໜງ​ການ​ເຫຼັກ​ກ້າ ແລະ​ຖ່ານ​ຫີນ, ຄວບ​ຄຸມບໍ່​ໃຫ້​ເກີດ​ມີ​ຄວາມ​ສາ​ມາດ​ການ​ຜະ​ລິດ​ທີ່​ເຫຼືອ​ເຟືອ​ໃໝ່, ເດັດ​ຂາດ​ປະ​ລະ​ຄວາມ​ສາ​ມາດ​ການ​ຜະ​ລິດ​ທີ່​ຫຼ້າ​ຫຼັງ ແລະ​ຖອນ​ຄວາມ​ສາ​ມາດ​ການ​ຜະ​ລິດ​ທີ່​ເຫຼື​ອເຟືອຢ່າງ​ມີ​ລະ​ບຽບ​ຮຽບ​ຮ້ອຍ. ການ​ເງິນ​ສູນ​ກາງ​ຈະ​ຈັດ​ວາງ​ງົບປະ​ມານ​​ສະ​ເພາະ​ທີ່​ມີ​ມູນ​ຄ���າ 100 ຕື້ຢວນ ​ໃນ​ການ​ຈັດ​ສັນ​ພະ​ນັກ​ງານກຳ​ມະ​ກອນ​ໃນ​ວິ​ສາ​ຫະ​ກິດ​ທີ່​ມີ​ຄວາມ​ສາ​ມາດ​ການ​ຜະ​ລິດ​ເຫຼືອ​ເຟືອ​ນັ້ນ​ໄປ​ເຮັດ​ວຽກ​ອື່ນ.

ພະ​ຍາ​ຍາມ​ປັບ​ປຸງ​ການ​ສະ​ໜອງ​ຜະ​ລິດ​ຕະ​ພັນ ແລະ​ການ​ບໍ​ລິ​ການ. ສຳ​ຄັນ​ແມ່ນ​ຕ້ອງ​ກຳ​ແໜ້ນ 3 ດ້ານ​ຄື ດ້ານ​ທີ 1 ​ຍົກ​ຄຸນ​ນະ​ພາບ​ຂອງ​ເຄື່ອງ​ອຸ​ປະ​ໂພກ​ບໍ​ລິ​ໂ​ພກ​ໃຫ້​ດີ​ຂຶ້ນ. ເລັ່ງ​ລັດ​ໃຫ້​ມາດ​ຖານ​ຄວາມ​ປອດ​ໄພ​ແລະ​ຄຸນ​ນະ​ພາບ​ເຊື່ອມ​ເຂົ້າ​ກັບ​ມາດ​ຖານ​ສາ​ກົນ, ສ້າງ​ລະ​ບຽບ​ການ​ໄຊ້​ແທນ​ແບບ​ປັບ​ໄໝ​ໃນ​ດ້ານ​ຄຸນ​ນະ​ພາບ​ຂອງ​ສິນ​ຄ້າ. ດ້າ​ນ​ທີ​ 2 ​ຊຸກ​ຍູ້​ໃຫ້​ຂະ​ແໜງ​ການ​ຜະ​ລິດ​ຍົກ​ລະ​ດັບ​ໃຫ້​ສູງ​ຂຶ້ນ. ລົງ​ເລິກ​ຊຸກ​ຍູ້ "ການ​ຜະ​ລິດ​ໂດຍ​ຈີນ+ອິນ​ເຕີ​​ເນັດ", ສ້າງ​ເວ​ທີ​ປະ​ດິດ​ສ້າງໃໝ່ລະ​ດັບ​ຊາດ​ໃນ​ຂະ​ແໜງ​ການ​ການ​ຜະ​ລິດ​ຫຼາຍ​ແຫ່ງ. ດ້ານ​ທີ 3 ເລັ່ງ​ລັດ​ພັດ​ທະ​ນາ​ຂະ​ແໜງ​ການ​ບໍ​ລິ​ການ​​ທີ່ທັນ​ສະ​ໄໝ.

ອອກ​ແຮງ​ຊຸກ​ຍູ້​ການ​ປະ​ຕິ​ຮູບ​ຂອງ​ລັດ​ວິ​ສາ​ຫະ​ກິດ. ຊຸກ​ຍູ້​​ການ​ປັບ​ປຸງ​​ໂຄງປະ​ກອບ​ຂອງ​ລັດ​ວິ​ສາ​ຫະ​ກິດ ໂດຍ​ສະ​ເພາະ​ແມ່ນ​ລັດ​ວິ​ສາ​ຫະ​ກິດ​ສູນ​ກາງ, ຊຸກ​ຍູ້ການ​ປະ​ຕິ​ຮູບ​ໃຫ້​ສິດ​​ຫຸ້ນສ່ວນ​ຫັນ​ເປັນ​ຫຼາຍ​ເຄົ້າ, ລົງ​ເລິກ​ການ​ປະ​ຕິ​ຮູບ​​ລະ​ບຽບ​ການ​ນຳ​ໃຊ້​ບຸກ​ຄະ​ລາ​ກອນ​ຂອງວິ​ສ​າຫະ​ກິດ, ເລັ່ງ​ລັດ​ປັບ​ປຸງແລະ​ສ້າງ​ບໍ​ລິ​ສັດ​ລົງ​ທຶນ​ແລະ​ທຸ​ລະ​ກິດ​ທຶນ​ລັດ, ຊຸກ​ຍູ້​ການ​ຫັນ​ປ່ຽນ​ພາ​ລະ​ບົດ​ບາດ​ຂອງ​ອົງ​ການ​ຕິດ​ຕາມ​ຄວບ​ຄຸມ​ຊັບ​ສິນ​ແຫ່ງ​ລັດ​ດ້ວຍ​ການ​ຄວບ​ຄຸມ​ທຶນ. ມອບ​ສິດ​ເປັນ​ເຈົ້າ​ຕົນ​ເອງ​ໃຫ້ແກ່​ທ້ອ​ງ​ຖິ່ນ​ໃນ​ການ​ປະ​ຕິ​ຮູບ​ລັດ​ວິ​ສາ​ຫະ​ກິດຫຼາຍ​ກວ່າ​ເກົ່າ, ໃຫ້​ລັດ​ວິ​ສາ​ຫະ​ກິດ​ມີ​ການ​ຈັດ​ຕັ້ງ​ງ່າຍ​ຂຶ້ນ, ປອດ​ໃສ​ຂຶ້ນ ແລະ​ມີ​ກຳ​ລັງ​​ແຂ່ງ​ຂັນ​ເຂັ້ມ​ແຂງ​ຂຶ້ນ.

ກະ​ຕຸກ​ຊຸກ​ຍູ​ເສດ​ຖະ​ກິດ​ທີ່ບໍ່​ແມ່ນ​ລະ​ບອບ​ກຳ​ມະ​ສິດ​ສ່ວນ​ລວມ​ນັ້ນ​ເສີມ​ຂະ​ຫຍາຍ​ພະ​ລັງ​ຊີ​ວິດ​​ໃຫ້​ດີກວ່າ​ເກົ່າ. ​ຫຼຸດຜ່ອນ​​ການ​ອະ​ນຸ​ມັດ​ເຂົ້າ​ຕະ​ຫຼາດ​ຂອງ​ຂົງ​ເຂດ​ພະ​ລັງ​ງານ​ໄຟ​ຟ້າ, ໂທ​ລະ​ຄົມ​, ຄົມ​ມະ​ນາ​ຄົມ​ຂົນ​ສົ່ງ, ນ້ຳ​ມັນ​ເຊື້ອ​ໄຟ, ອາຍ​ແກ​ສ​ທຳ​ມະ​ຊາດ, ​ສາ​ທາ​ລະ​ນູ​ປະ​ໂພກແລະຂົງ​ເຂດ​ອື່ນໆ, ສົ່ງ​ເສີມ​ໃຫ້​ວິ​ສາ​ຫະ​ກິດ​ເອ​ກະ​ຊົນ​ເພີ່ມ​ການ​ລົງ​ທຶນ​ເຂົ້າ​ຮ່ວມ​ການ​ປະ​ຕິ​ຮູບ​ຂອງ​ລັດ​ວິ​ສາ​ຫະ​ກິດ.

ສາມ: ຂຸດ​ຄົ້ນ​ກຳ​ລັງ​​ແຮງບົ່ມ​ຊ້ອນ​ດ້ານ​ຄວາມ​ຕ້ອງ​ການ​ພາຍ​ໃນ​ປະ​ເທດ, ບຸກ​ເບີກ​ຊ່ອງ​ທາງ​ການ​ພັດ​ທະ​ນາ​ທີ່​ໃຫຍ່ກວ່າ​ເກົ່າ.

ເພີ່​ມ​ທະ​ວີ​ບົດ​ບາດ​ພື້ນ​ຖານຂອງ​ການ​ບໍ​ລິ​ໂພກ​ໃນການ​ຊຸກ​ຍູ້​ການ​ເຕີບ​ໂຕ​ຂອງ​ເສດ​ຖະ​ກິດ.

ເສີ​ມຂະ​​ຫຍາຍ​ບົດ​ບາດ​ຂໍ​ກະ​ແຈ​ຂອງ​ການ​ລົງ​ທຶນ​​ໃຫ້ ​ທີ່​ມີ​ຕໍ່​ການເຮັດ​ໃຫ້​ການ​ເຕີບ​ໂຕ​ມີ​ຄວາມ​ໝັ້ນ​ທ່ຽງ​ແລະ​ປັບ​ປຸງ​​ອົງ​ປະ​ກອບ​ເສດ​ຖະ​ກິດ​ໃຫ້​ບັງ​ເກີດ​ຜົນ. ປີນີ້​ຈະ​ເລີ່ມ​ສ້າງ​ໂ​ຄງ​ການ​ສຳ​ຄັນ​ຈຳ​ນວນ​ໜຶ່ງ​ໃນ​ແຜນ​ການ 5 ປີ​ຄັ້ງ​ທີ 13. ຈະ​ສຳ​ເລັດ​ການ​ລົງ​ທຶນ​ໃນໂຄງ​ການ​ທາງ​ລົດ​ໄຟ​ 800 ຕື້ຢວນ​ຂຶ້ນ​ໄປ, ​ທາງ​ຫຼວງ​ 1650 ຕື້ຢວນ, ສ້າງ​ໂຄງ​ການ​ຊົນ​ລະ​ປະ​ທານ​ທີ່​ສຳ​ຄັນອີກ 20 ໂຄງ​ການ​ ​ແລະ​ມີ​ໂຄງ​ການ​ສຳ​ຄັນ​ຕ່າງໆ​ເຊັ່ນ: ສ້າງ​​ໂຮງ​ໄຟ​ຟ້າ​​ນ້ຳ​ຕົກ, ໂຮງ​ໄຟ​ຟ້າ​ນິວ​ເຄ​ລຍ, ​ຕາ​ໜ່າງ​ໄຟ​ຟ້າແບບ​ສະ​ມາດ, ຕາ​ໜ່າງ​ທໍ່​ສົ່ງ​ນ້ຳ​ມັນ​ແລະ​ອາຍ​ແກ​ສ, ​ລາງ​​ລົດ​ໄຟໃນ​ຕົວ​ເມືອງ​ແລະ​ອື່ນໆ ເຊິ່ງຈະ​ໃຊ້​ງົບ​​ປະ​ມານສູນ​ກາງລົງທຶນ​ເພີ່ມ​ຂຶ້ນ​ເຖິງ 500 ຕື້ຢວນ. ຈະ​ບູ​ລະ​ນະ​ຮູບ​ການ​ຮ່ວມ​ມື​ລະ​ຫວ່າງ​ທຶນ​ລັດ​ຖະ​ບານ​ກັບ​ທຶນ​ສັງ​ຄົມໃຫ້​ສົມ​ບູນ, ນຳ​ໃຊ້​ກອງ​ທຶນ​ນຳ​ພາ​ 180 ຕື້ຢວນ​ໃຫ້​ດີ, ປະ​ຕິ​ບັດ​ຕາມ​ສັນ​ຍາ​ກົດ​ໝາຍ​ຢ່າງ​ເຂັ້ມ​ງວດ, ລະ​ດົມການ​ມີ​ສ່ວນ​ຮ່ວມ​ລົງ​ທຶນ​ຂອງສັງຄົມ​ໃນໂຄງ​ການ​ເຫຼົ່າ​ນີ້.

ລົງ​ເລິກ​ຊຸກ​ຍູ້​ການ​ຫັນ​ເປັນ​ຕົວ​ເມືອງ​ແບບ​ໃໝ່. ການ​ຫັນ​ເປັນ​ຕົວ​ເມືອງ ແມ່ນ​ເສັ້ນ​ທາງ​ທີ່​ຕ້ອງກ້າວໄປ​ຂອງ​ຈີນ​ໃນ​ການ​ຫັນ​ເປັນທັນ​ສະ​ໄໝ, ແມ່ນ​ກຳ​ລັງ​ບົ່ມ​ຊ້ອນ​ດ້ານ​ຄວາມ​ຕ້ອງ​ການ​ພາຍ​ໃນ ແລະ​ພະ​ລັງ​ແຮງ​ຊຸກ​ຍູ້​ການ​ພັດ​ທະ​ນາ​ທີ່​ໃຫຍ່​ທີ່​ສຸດ​ຂອງ​ຈີນ ​ເຊິ່ງ​ສິ່ງສຳ​ຄັນ​ໃນ​ປີ​ນີ້​​ຈະ​ເຮັດ​ວຽກ​ 3 ດ້ານ​ຕໍ່​ໄປ​ນີ້​ໃຫ້​ດີ ຄື: ດ້ານ​ທີ 1 ເລັ່ງ​ລັດ​ໃຫ້​ຫັນ​ປະ​ຊາ​ຊົນຢູ່​​​ຊົນ​ນະ​ບົດທີ່​ເຄື່ອນ​ຍ້າຍນັ້ນ​ໃຫ້​ເປັນ​ປະ​ຊາ​ຊົນ​ໃນ​ຕົວ​ເມືອງ. ລົງ​ເລິກ​ການ​ປະ​ຕິ​ຮູບ​ລະ​ບຽບ​ການຂຶ້ນ​ສຳ​ມະ​ໂນ​ຄົວ, ຫຼຸດຜ່ອນ​​ເງື່ອນ​ໄຂ​ຂຶ້ນ​ສຳ​ມະ​ໂນ​ຄົວ​ຢູ່​ຕົວ​ເມືອງ. ເປີດກວ້າງ​ຂອບ​ເຂດ​ທົດ​ລອງ​ການ​ຫັນ​ເປັນ​ຕົວ​ເມືອງ​ແບບ​ໃໝ່. ບັດ​ຕັ້ງ​ພູມ​ລຳ​ເນົາ​ມີ​ບົດ​ບາດ​ຫຼາຍ, ຕ້ອງ​ເລັ່ງ​ລັດ​​​ການອອກບັດ​ຕັ້ງພູມ​ລຳ​ເນົາ​ໃຫ້​ແກ່​ປະ​ຊາ​ຊົນ​​ທີ່​ຍັງ​ບໍ່​ມີ​ບັດ​ດັ່ງ​ກ່າວ​ຢູ່​ໃນ​ຕົວ​ເມືອງ ເຮັດ​ໃຫ້​ຄົນ​ເຫຼົ່າ​ນີ້​ສາ​ມາດ​ຊົມ​ໃຊ້​ການ​ບໍ​ລິ​ການ​ສາ​ທາ​ລະ​ນະ​​ພື້ນ​ຖານ​ຢູ່​ບ່ອນ​ເພິ່ງ​ພາ​ອາ​​ໄສ​ຕາມ​ກົດ​ໝາຍ​ເຊັ່ນ: ​ການ​ສຶກ​ສາ​ພາກ​ບັງ​ຄັບ, ການ​ປະ​ກອບ​ອາ​ຊີບ, ການ​ປິ່ນ​ປົວ​ສຸ​ຂະພາບ​ແລະ​ອື່ນໆ. ພັດ​ທະ​ນາ​ຕົວ​ເມືອງ​ປານກາງ​ແລະ​ນ້ອຍ​ຢູ່​ພາກ​ກາງ​ແລະ​ພາກ​ຕາ​ເວັນ​ຕົກ ເພື່ອ​ໃຫ້​ກຳ​ມະ​ກອນ​ເຄື່ອນ​ຍ້າຍ​ປະ​ກອບ​ອາ​ຊີບ ຫຼື​ປະ​ກອບ​ທຸ​ລະ​ກິດ​ຢູ່​ບ່ອນທີ່​ໃກ້​​ບ້ານ​ເກີດ​ຂອງ​ຕົນ ໃຫ້​ເຂົາ​ເຈົ້າ​ສາ​ມາດ​ທຳ​ມາ​ຫາ​ກິນ ແລະ​ດູ​ແລ​ຄອບ​ຄົວ​ໄປ​ພ້ອມ​ກັນ. ດ້ານ​ທີ 2 ຄື ຊຸກ​ຍູ້​ການ​ສ້າງ​ເຮືອນ​​ນະ​ໂຍ​ບາຍ​ໃນ​ຕົວ​ເມືອງ ແລະ​​ເຮັດໃຫ້​ຕະ​ຫຼາດ​​ເຮືອນ​​ແລະ​ທີ່​ດິນ​ພັດ​ທະ​ນາ​ຢ່າງ​ມີ​ຄວາມ​ໝັ້ນ​ທ່ຽງ​ແລະ​ປອດ​ໃສ. ປີນີ້ ຈະສ້ອມ​ແປງເຂດ​ເຮືອນ​ຜາງ​ໄຊ 6 ລ້ານ​ຊຸດ. ສ້າງ​ລະ​ບຽບ​ການ​ເຮືອນ​ຢູ່​​ທີ່ກວມ​ທັງ​ການ​ເຊົ່າ​ແລະ​ຊື້​, ​ນຳເອົາ​ປະ​ຊາ​ຊົນ​ທີ່ຍົກ​ຍ້າຍ​ຈາກ​ທ້ອ​ງ​ຖິ່ນ​ອື່ນ​ນັ້ນ​ເຂົ້າ​ມາຢູ່​ໃນ​ຂອບ​ເຂດ​ທີ່​ມີ​ເງື່ອນ​ໄຂ​ເຊົ່າ​ເຮືອນ​ນະ​ໂຍ​ບາຍ. ດ້ານ​ທີ 3 ເພີ່ມ​ທະ​ວີ​ການ​ຄຸ້ມ​ຄອງ​ການ​ວາງ​ແຜນ ແລະ​ກໍ່​ສ້າງ​ຕົວ​ເມືອງ ​​ເຮັດໃຫ້​ການ​ວາງ​ແຜນ​ກໍ່​ສ້າງ​ຕົວ​ເມືອງຕາມ​ຫຼັກ​ວິ​ທະ​ຍາ​ສາດ, ມີ​​ອິດ​ທິ​ພົນ​ແລະ​ເປີດ​ເຜີຍກວ່າ​ເກົ່າ.

ສ້າງ​ສ​ະ​ຖາ​ນະ​ພາບ​ການ​ພັດ​ທະ​ນາ​ຂອງ​ທ້ອງ​ຖິ່ນ​ໃຫ້​ດີ​ຂຶ້ນກວ່າ​ເກົ່າ.

ສີ່: ເລັ່ງ​ລັດ​ພັ​ດ​ທະ​ນາ​ກະ​ສິ​ກຳ​ທັນ​ສະ​ໄໝ, ຊຸກ​ຍູ້​ໃຫ້​​ກະ​ສິ​ກອນ​ມີ​ລາຍ​ຮັບເພີ່ມ​ຂຶ້ນ​ຢ່າງ​ຕໍ່​ເນື່ອງ. ສືບ​ຕໍ່​​ກຳ​​ແໜ້ນວຽກ​ງານ ກະ​ສິ​ກຳ, ​ກະ​ສິ​ກອນ ແລະ​ຊົນ​ນະ​ບົດ​ໃຫ້​ດີ​ຢ່າງຕໍ່​ເນື່ອງ, ​ບູ​ລະ​ນະນະ​ໂຍ​ບາຍ​ໃຫ້​ກະ​ສິ​ກຳ​ເຂັ້ມ​ແຂງ ສ້າງ​ຜົນ​ປະ​ໂຫຍດ​ໃຫ້​​ກະ​ສິກອນ ແລະ​ໃຫ້​ກະ​ສິ​ກອນ​ມີ​ລາຍ​ຮັບເພີ່ມ​ຂຶ້ນນັ້ນ​ໃຫ້​ສົມ​ບູນ​ຂຶ້ນ​ຕື່ມ, ລົງ​ເລິ​ກ​ການ​ປະ​ຕິ​ຮູບ​ຊົນ​ນະ​ບົດ, ເປີດກວ້າງ​ຊ່ອງ​ທາງ​ປະ​ກອບ​ອາ​ຊີບ ແລະ​ເພີ່ມ​ລາຍຮັບ​ຂອງ​ຊາວ​ກະ​ສິ​ກອນ, ອອກ​ແຮງ​ຍົກ​ຄຸນ​ນະ​ພາບ,​ ສະ​ມັດ​ຖະ​ພາບ​ແລະ​ກຳ​ລັງ​​ແຂ່ງ​ຂັນຂອງ​ກະ​ສິ​ກຳ​ໃຫ້​ສູງ​ຂຶ້ນ.

ເລັ່ງ​ລັດ​ການ​ປັບ​ປຸງ​​ໂຄງປະ​ກອບ​​ກະ​ສິ​ກຳ. ຕ້ອງ​ນຳ​ພາ​ກະ​ສິກອ​ນ​ປັບ​ປຸງ​​ໂຄງ​ປະ​ກອບການ​ປູກ​ຝັງ​ແລະ​ລ້ຽງ​ສັດ​​ໂດຍ​ອີງ​ຕາມ​ຄວາມ​ຕ້ອງ​ການ​ຂອງ​ຕະ​ຫຼາດ, ຫຼຸດ​ເນື້ອ​ທີ່​ປູກ​​ສາ​ລີ​ໃຫ້​ໜ້ອຍ​ລົງ​ຢ່າງ​ສົມ​ເຫດ​ສົມ​ຜົນ. ​ນຳໃຊ້​ຫຼາຍ​ມາດ​ຕະ​ການ​ເພື່ອ​ຫຼຸດ​ປະ​ລິ​ມານ​ອາ​ຫານ​ທີ່​ເກັບ​ໄວ້​ໃນ​ສາງ, ອອກ​ແຮງ​ສະ​ໜັບ​ສະ​ໜູນ​ການ​ປຸງ​ແຕ່ງ​ຜົນ​ຜະ​ລິດ​ກະ​ສິ​ກຳ​ຢ່າງ​ເລິກ​ເຊິ່ງ, ແກ່​ຍາວ​ຕ່ອງ​ໂສ້​ຂອງ​ຂະ​ແໜງ​ການ​ກະ​ສິ​ກຳ; ວາງ​ແຜນ​ການ​ປູກ​ຕົ້ນ​ໄມ້​ໃບ​ຫຍ້າ​ໃສ່​ນາ​ສວນ​ຄືນ​ໃໝ່​ອີກ ເຊິ່ງປີນີ້ ຈະ​​ມີ​ເນື້ອ​ທີ່ 1 ລ້ານ​ເຮັກ​ຕາ ເຊິ່ງນີ້​ແມ່ນ​ວຽກ​ທີ່​ຈະ​ສ້າງ​ຜົນ​ປະ​ໂຫຍດ​ຫຼາຍ​ດ້ານ, ສະ​ນັ້ນ​ຕ້ອງ​ເຮັດ​ໃຫ້​ດີ.

​ເພີ່ມ​ທະ​ວີ​ບົດ​ບາດ​ທີ່​ເປັນ​ສິ່ງ​ຄ້ຳ​ຊູ​ອັນ​ພື້ນ​ຖານ​ຂອງ​ກະ​ສິ​ກຳ. ສຳ​ເລັດ​ການ​ຈັດ​ສັນ​ດິນ​ນາ​ກະ​ສິ​ກຳ​ພື້ນ​ຖານ​​ໃຫ້ຖາ​ວອນ​ຢ່າງ​ຮອບ​ດ້ານ ແລະ​ດຳ​ເນີນ​ການ​ປົກ​ປ້ອງ​ເປັນ​ພິ​ເສດ, ເພີ່ມ​ທະ​ວີ​ການພັດທະນາ​ນາ​ສວນ​ທີ່​ມີ​ມາດ​ຖານ​ສູງ. ດຳ​ເນີນ​ການທົດ​ລອງ​ລະ​ບຽບ​ການ​ປູກ​ຝູງ​ຢູ່​ດິນ​ນາ​ຕ່າງໆ​ແບບ​ຜັດ​ປ່ຽນ​ກັນ. ສຸມ​ໃສ່​ຫຼຸດຜ່ອນ​ການ​ໃຊ້​ຝຸ່ນ​ເຄ​ມີ​​ໃຫ້​ໜ້ອຍ​ລົງ. ຮັບ​ປະ​ກັນ​ງົບ​ປະ​ມານ​ການ​ເງິນ​ໃນ​ດ້ານ​ກະ​ສິ​ກຳ ເພື່ອ​​ນຳ​​ເອົາທຶນ​ລົງ​ໄປ​ສູ່​ການພັດທະນາກະ​ສິ​ກຳ​ທັນ​ສະ​ໄໝຫຼາຍກວ່າ​ເກົ່າ​.

ປັບ​ປຸງ​ການ​ບໍ​ລິ​ການ​ສາ​ທາ​ລະ​ນະຢູ່​ຊົນ​ນະ​ບົດ​ໃຫ້​ດີ​ຂຶ້ນ, ຈະ​ສ້າງ​ທາງ​ຫຼວງ​ໃໝ່ ​ແລະ​ປົວ​ແ​ປງ​ທາງຫຼວງ​ເກົ່າຢູ່ຊົນ​ນະ​ບົດ​ 2 ແສນ​ກິ​ໂລ​ແມັດ, ເລັ່ງ​ລັດ​ການກໍ່ສ້າງ​ແລະ​ຍົກ​ລະ​ດັບ​ຕາ​ໜ່າງ​ໄຟ​ຟ້າ​ຢູ່​ຊົນ​ນະ​ບົດ​ຮອບ​ໃໝ່, ຊຸກ​ຍູ້​ໃຫ້​ການ​ຄ້າ​ເອ​ເລັກ​ໂຕຼນິກ​ເຂົ້າ​ສູ່​ຊົນ​ນະ​ບົດ.
ດຳ​ເນີນ​ໂຄງ​ການ​ຫຼຸດ​ຜ່ອນ​ຄວາມ​ທຸກ​ຍາກ​ໃນ​ຮູບ​ແບບ​ແກ້​ຂໍ້​ຍາກ. ປີນີ້​ຕ້ອງ​ສຳ​ເລັດ​ໜ້າ​ທີ່​ຫຼຸດ​ຈຳ​ນວນ​ປະ​ຊາ​ຊົນ​ຜູ້​ທຸກ​ຍາກຢູ່ຊົນ​ນະ​ບົດ​ໃຫ້​ຫຼາຍກວ່າ 10 ລ້ານ​ຄົນ, ໃນ​ນັ້ນ ຫຼາຍກວ່າ 2 ລ້ານ​ຄົນ​ຈະ​ໃຫ້ຫຼຸດ​ພົ້ນ​ອອກ​ຈາກ​ຄວາມ​ທຸກ​ຍາກ​ດ້ວຍ​ການຍົກ​ຍ້າຍ​ໄປ​ບ່ອນ​ຢູ່​ໃໝ່. ​ຈະ​ຈັດ​ສັນງົບ​ປະ​ມານຫຼຸດ​ຜ່ອນ​ຄວາມ​ທຸກ​ຍາກ​ຂອງ​ບ້ວງ​ເງິນ​ສູນ​ກາງ​ຈີນ​ເພີ່ມ​ຂຶ້ນ 43,4%. ຍຶດ​ໝັ້ນ​ການ​ຊ່ວຍ​ເຫຼືອຫຼຸດ​ຜ່ອນ​ຄວາມ​ທຸກ​ຍາກ​ຢ່າງ​​ແນ່ນອນ ໂດຍ​ຈະ​ປະ​ຕິ​ບັດນະ​ໂຍນ​ບາຍຕາມ​​ເງື່ອນ​ໄຂ​ທີ່​ຕ່າງ​ກັນ. ການ​ຫຼຸດ​ຜ່ອນ​ຄວາມ​ທຸກ​ຍາກ​ແມ່ນ​ໜ້າ​ທີ່​ທີ່​​ຕ້ອງ​​ເຮັດ​ໃຫ້ສຳ​ເລັດຕາມ​ກຳນົດເວ​ລາ, ຄຸນ​ນະ​ພາບ​ແລະ​ຈຳ​ນວນ​ທີ່​ວາງໄວ້.

ຫ້າ: ຊຸກ​ຍູ້​ການ​ໄຂ​ປະ​ຕູ​ສູ່​ພາຍນອກ​ທີ່​ມີ​ລະ​ດັບ​ສູງ​ຮອບ​ໃໝ່, ອອກ​ແຮງ​ບັນ​ລຸ​ການ​ຮ່ວມ​ມື​ແລະ​ໄດ້​ຮັບ​ຜົນ​ປະ​ໂຫຍດ​ຮ່ວມ​ກັນ.

ຊຸກ​ຍູ້​ການ​ສ້າງ "ແລວ​ທາງ​ເສດ​ຖະ​ກິດ​ເສັ້ນ​ທາງ​ສາຍ​ໄໝ ແລະ​ເສັ້ນ​ທາງ​ສາຍ​ໄໝ​ທາງ​ທະ​ເລ​ໃນ​ສະຕະ​ວັດ​ທີ 21 " ຫຼື "ໜຶ່ງ​ແລວ​ທາງ ໜຶ່ງ​ເສັ້ນ​ທາງ" ຢ່າງ​ໜັກ​ແໜ້ນ. ຈັດ​ຕັ້ງ​​ປະ​ຕິ​ບັດການ​ພັດ​ທະ​ນາ​ແລະ​ໄຂ​ປະ​ຕູ​ສູ່​ພາຍນອກ​ຂອງ​ທ້ອງຖິ່ນ​ພາຍ​ໃນ​ປະ​ເທດ​​ກັບ​ການຮ່ວມ​ມື​​ເສດ​ຖະ​ກິດ​ສາ​ກົນຢ່າງ​ເປັນ​ເອ​ກະ​ພາບ​ກັນ, ຮ່ວມ​ກັນ​ສ້າງ​ແລວ​ທາງ​ເສດ​ຖະ​ກິດ​ທາງ​ບົກ​ແລະບ່ອນ​ຄ້ຳ​ຊູ​ການ​ຮ່ວມ​ມື​ທາງ​ທະ​ເລ, ຊຸກ​ຍູ້​ການ​ເຊື່ອມ​ຈອດ​ກັນ, ການ​ຮ່ວມ​ມື​ທາງ​ເສດ​ຖະ​ກິດ​ການ​ຄ້າ, ການ​ແລກ​ປ່ຽນວັດ​ທະ​ນະ​ທຳ. ສ້າງ​ກົນ​ໄກ​ຮ່ວມ​ມື​ການ​ຜ່ານ​ດ່ານ​ຢູ່​ຕາມ​ແລວ​ທາງ, ສ້າງ​ຊ່ອງ​ທາງ​ຈໍ​ລະ​ຈອນ​ສິນ​ຄ້າ​ສາ​ກົນ. ຊຸກ​ຍູ້​ການ​ສ້າງ​ເຂດ​ຮ່ວມ​ມື​ເສດ​ຖະ​ກິດ​ຢູ່ຊາຍ​ແດນ, ເຂດ​ຮ່ວມ​ມື​ເສດ​ຖະ​ກິດ​ຂ້າມ​​ຊາດ, ແລະເຂດ​ຮ່ວມ​ມື​ເສດ​ຖະ​ກິດ​ການ​ຄ້າ​ຢູ່​ຕ່າງ​ປະ​ເທດ. ຍຶດ​ຫ​ມັ້ນ​ການ​ປຶກ​ສາ​ຫາ​ລື​ຮ່ວມ​ກັນ, ສ້າງ​ສາ​ຮ່ວມ​ກັນ ແລະ​ຊົມ​ໃຊ້​ຜົນ​ປະ​ໂຫຍດ​ຮ່ວມ​ກັນ ເຮັດ​ໃຫ້  "ໜຶ່ງ​ແລວ​ທາງ ໜຶ່ງ​ເສັ້ນ​ທາງ" ກາຍ​ເປັນ​ສາຍ​ພານ​ແຫ່ງ​ສັນ​ຕິ​ພາບ​ແລະ​ມິດ​ຕະ​ພາບ, ກາຍ​ເປັນ​ເສັ້ນ​ທາງ​ແຫ່ງ​ຄວາມ​ຈະ​ເລີນ​ຮຸ່ງ​​ເຮືອງ​ຮ່ວມ​ກັນ.

ເປີດກວ້າງ​ການ​ຮ່ວມ​ມື​ດ້ານ​ຄວາມ​ສາ​ມາດ​ການ​ຜະ​ລິດ​ສາ​ກົນ. ຍຶດ​​ຫມັ້ນ​ໃຫ້​ວິ​ສາ​ຫະ​ກິດ​ເປັນ​ອັດ​ຕະ​ພາບ, ລັດ​ຖະ​ບານ​ເປັນ​ຜູ້​ຊຸກ​ຍູ້ ແລະ​ດຳ​ເນີນ​ງານແບບ​ຕະ​ຫຼາດ, ປະ​ຕິ​ບັດ​ໂຄງ​ການ​​ສາ​ທິດ​ທີ່​ສຳ​ຄັນ​ຈຳ​ນວນໜຶ່ງ, ຊຸກ​ຍູ້​ໃຫ້​ອຸ​ປະ​ກອນ, ເຕັກ​ນິກ, ມາດ​ຖານ ແລະ​ການ​ບໍ​ລິ​ການ​ຂອງ​ຈີນ​ກ້າວ​ໄປ​ສູ່​ໂລກ ແລະ​ສ້າງ​ຍີ່​ຫໍ້​ທີ່​ດີ​ໃຫ້​ແກ່​ການ​ຜະ​ລິດ​ໂດຍ​ຈີນ.

ຊຸກ​ຍູ້​ການ​ຄ້າຕ່າງ​ປະ​ເທດ​​ໃຫ້​ໄດ້​ຮັບມີ​ກາ​ນ​ພັດ​ທະ​ນາ​ແບບ​ປະ​ດິດ​ສ້າງ​ໃໝ່. ຈາກ​ການ​ຜະ​ເຊີນ​ກັບ​ສະ​ຖາ​ນະ​ການ​ທີ່​ຂ້ຽວ​ຂາດ​ໂດຍ​ທີ່​ຄວາມ​ຕ້ອງ​ການ​ພາຍນອກ​ສືບ​ຕໍ່​ຫຼຸດ​ໜ້ອຍ​ລົງນັ້ນ, ຕ້ອງ​ໃຊ້​ຫຼາຍ​ມາດ​ຕະ​ການ​, ສະ​ກັດ​ກັ້ນ​ບໍ່​ໃຫ້​ການ​ຄ້າ​ຂາ​ເຂົ້າ​ຂາ​ອອກ​ຕົກ​ຕ່ຳ​ລົງ. ໜຶ່ງ​ຕ້ອງ​ເລັ່ງ​ລັດ​ຜັນ​ຂະ​ຫຍາຍ​ແລະ​​ບູ​ລະ​ນະ​ນະ​ໂບ​ບາຍ​ໃຫ້​ສົມ​ບູນ. ສອງ​ຕ້ອງ​ສົ່ງ​ເສີມ​ການ​ປະ​ຕິ​ສ້າງ​ໃໝ່​ ​ຮູບ​ແບບ​ການ​ຄ້າ. ສາມ​​ຕ້ອງ​ປັບ​ປຸງ​​ໂຄງ​ປະ​ກອບ​ການ​ຄ້າ​ໃຫ້​ດີ. ສີ່​ ​ຕ້ອງ​ຊຸກ​ຍູ້​ໃຫ້​ການ​ຄ້າ​ສະ​ດວກ​ຂຶ້ນ. ຫ້າ​ຕ້ອງ​ປະ​ຕິ​ບັດ​ນະ​ໂຍ​ບາຍ​ນຳ​ເຂົ້າ​ທີ່​ຕັ້ງ​​ຫນ້າກວ່າ​ເກົ່າ, ​ເພີ່ມ​ການ​ນຳ​ເຂົ້າອຸ​ປະ​ກອນແລະ​ເຕັກ​ນິກ​ທີ່​ກ້າວ​ໜ້າ, ເຄື່ອງ​ອາ​ໄຫຼ່​​​ແລະ​ຊິ້ນ​ສ່ວນ​ທີ່​ສຳ​ຄັນ ກໍ​ຄື ວັດ​ຖຸ​ດິບ​ແລະ​ພະ​ລັງ​ງານທີ່​ຂາດ​ເຂີນ.

ຍົກ​ລະ​ດັບ​ການ​ນຳ​ໃຊ້​ທຶນ​ຕ່າງ​ປະ​ເທດໃຫ້​ສູງ​ຂຶ້ນ. ສືບ​ຕໍ່ຫຼຸດ​ຜ່ອນ​ນະ​ໂຍ​ບາຍ​​ການອະ​ນຸ​ມັດ​ການ​ລົງ​ທຶນ​, ​ເປີດກວ້າງ​ການ​ໄຂ​ປະ​ຕູ​ສູ່​ພາຍນອກ​ຂອງ​ຂະ​ແໜງ​ການ​ບໍ​ລິ​ການ​ແລະ​ຂະ​ແໜງ​ການ​ຜະ​ລິດ​ທົ່ວ​ໄປ ​ເຮັດ​ໃຫ້​ຂັ້ນ​ຕອນ​​ການ​ສ້າງ​ຕັ້ງ​ວິ​ສາ​ຫະ​ກິດ​ທຶນ​ຕ່າງ​ປະ​ເທດ​ງ່າຍຂຶ້ນ, ເພີ່ມ​ທະ​ວີ​ການ​ລະ​ດົມ​ທຶນ​ຕ່າງ​ປະ​ເທດ. ຈີນ​ຕ້ອງ​ສືບ​ຕໍ່​ເປັນ​ດິນ​ແດນ​ທີ່​ມີ​ສະ​ເໜ່​ທີ່​ສຸດ​ໃນ​ການ​ດຶງ​ດູດ​ການ​ລົງ​ທຶນ​ຂອງ​ຕ່າງ​ປະ​ເທດ.

ເລັ່ງ​ລັດ​ປະ​ຕິ​ບັດ​ຍຸ​ດທະ​ສາດ​ເຂດ​ການ​ຄ້າ​ເສ​ລີ. ເລັ່ງ​ລັດ​ການ​ເຈ​ລະ​ຈາ​ເຂດ​ການ​ຄ້າ​ເສ​ລີ​ລະ​ຫວ່າງ​ຈີນ-ຍີ່​ປຸ່ນ-ສ.ເກົາ​ຫຼີ, ຊຸກ​ຍູ້​ການ​ເຈ​ລະ​ຈາ​ສັນ​ຍາ​ການ​ລົງ​ທຶນ​ລະ​ຫວ່າງ​ຈີນ-ອາ​ເມ​ລິ​ກາ ແລະ​ຈີນ-ເອີ​ລົບ, ເພີ່ມ​​ທະ​ວີການ​ຄົ້ນ​ຄວ້າ​ຍຸດ​ທະ​ສາດ​ຮ່ວ​ມ​ໃນ​ການ​ສ້າງ​ເຂດ​ການ​ຄ້າ​ເສ​ລີ​ອາ​ຊີ​ປາ​ຊີ​ຟິກ. ພວກ​ເຮົາ​ຍິນ​ດີ​ຮ່ວມ​ກັບ​ຝ່າຍ​ຕ່າງໆ, ຊຸກ​ຍູ້​ການ​ຄ້າ​ການ​ລົງ​ທຶນ​ມີ​ເສ​ລີ​ພາບ​ຫຼາຍ​ຂຶ້ນ, ຮ່ວມ​ກັນ​ສ້າງ​ລະ​ບົບ​ເສດ​ຖະ​ກິດ​ການ​ຄ້າ​ສາ​ກົນ​ທີ່​ກ້ຳ​ເກິ່ງ​ກັນ, ໄດ້​ຮັບ​ຜົນ​ປະ​ໂຫຍດ​ຮ່ວມ​ກັນ ແລະ​ມີ​ຄວາມ​ໂອບ​ອ້ອມ​ອາ​ລີ​ຕໍ່​ກັນ.

ຫົກ: ອອກ​ແຮງ​ປັບ​ປຸງ​ສິ່ງ​ແວດ​ລ້ອມ, ຊຸກ​ຍູ້​ໃຫ້​ການ​ພັດ​ທະ​ນາ​ແບບ​ສີ​ຂຽວໄດ້​ຮັບ​ຄວາມ​ຄືບ​ໜ້າ​ໃໝ່.

​ແກ້​ໄຂການ​ມົນ​ລະ​ພິດ​ທາງ​ອາ​ກາດ ແລະ​ນ້ຳ​ດ້ວຍ​ນະ​ໂຍ​ບາຍ​ທີ່​ເຂັ້ມ​ງວດ. ປີນີ້ ຕ້ອງ​ໃຫ້​ປະ​ລິ​ມານ​ຕ້ອງ​ການ​ອົກ​ຊີ​ດ້ານ​ເຄ​ມີ ແລະ​ປະ​ລິ​ມານ​ລະ​ບາຍ​ສານ​ອາ​ໂມ​ນຽມ ແລະ​ນີ​ໂຕຼ​ເກີນ ລ້ວນ​ແຕ່​ຫຼຸດ​ລົງ 2%, ການ​ລະ​ບາຍ​ຊຸນ​ເຊີ​ດີ​ອອກ​ຊິດ ແລະ​ສານ​ນີ​ໂຕຼ​ເກີນ​ອອກ​ຊີດ​ຕ້ອງ​ຫຼຸດ​ລົງ 3%, ຕ້ອງ​ໃຫ້​ຄວາມ​ຂຸ້ນ​ຂອງ​​ວັດ​ຖຸ​ເມັດ​ນ້ອຍ (PM2,5) ໃນ​ອາ​ກາດຢູ່​ບາງ​ທ້ອງ​ຖີ່ນ​ສືບ​ຕໍ່​ຫຼຸດ​ລົງ.

ອອກ​ແຮງ​ພັດ​ທະ​ນາ​ຂະ​ແໜງ​ການ​ປະ​ຢັດ​ພະ​ລັງ​ງານ​ແລະ​ອະ​ນຸ​ລັກ​ສິ່ງ​ແວດ​ລ້ອມ. ເປີດກວ້າງ​ຂອບ​ເຂດ​ປະ​ຕິ​ບັດ​ມາດ​ຖານ​ອະ​ນຸ​ລັກ​ສິ່ງ​ແວດ​ລ້ອມ. ​ສ້າງ​ຂະ​ແໜງ​ການ​ປະ​ຢັດ​ພະ​ລັງ​ງານ​ແລະ​ອະ​ນຸ​ລັກ​ສິ່ງ​ແວດ​ລ້ອມ​ໃຫ້​ເປັນ​ຂະ​ແໜງ​ການ​ເສົາ​ຄ້ຳ​ຂອງ​ການ​ພັດ​ທະ​ນາ​ຂອງ​ຈີນ.
ເພີ່ມ​ທະ​ວີ​ການ​ກໍ່​ສ້າງ​​ການ​ປົກ​ປ້ອງ​ຄວາມ​ປອດ​ໄພ​ດ້ານ​ຊີ​ວະ​ພາບ.

ເຈັດ: ຮັບ​ປະ​ກັນການ​ປັບ​ປຸງ​ຊີ​ວິດ​ການ​ເປັນ​ຢູ່​​ຂອງ​ປະ​ຊາ​ຊົນໃຫ້​ດີ, ເພີ່ມ​ທະ​ວີ​ການ​ສ້າງ​ ​ສັງ​ຄົມ. ລາຍ​ຮັບ​ການ​ເງິນ​ເຖິງວ່າ​ຈະ​ເພີ່​ມ​ຂຶ້ນ​ຊ້າ​ລົງ​ກໍ​ຕາມ, ແຕ່​ວຽກ​ງານ​ຕົວ​ຈິງ​ເພື່ອ​ປະ​ຊາ​ຊົນ​ທີ່​ຕ້ອງ​ເຮັດ​ໄປນັ້ນຕ້ອງເດັດ​ຂາດບໍ່​ໃຫ້​ໜ້ອຍ​ລົງ.

ອອກ​ແຮງ​ເພີ່ມ​ຕຳ​ແໜ່ງ​ການປະ​ກອບ​ອາ​ຊີບ ແລະ​ການ​ປະ​ກອບ​ທຸ​ລະ​ກິດ. ປະ​ຕິ​ບັດ​ນະ​ໂຍ​ບາຍ​ປະ​ກອບ​ອາ​ຊີບ​ທີ່​ຕັ້ງ​ໜ້າກວ່າ​ເກົ່າ, ສົ່ງ​ເສີມ​ໃຫ້​​ການ​ປະ​ກອບ​ອາ​ຊີບ​ດ້ວຍ​ການ​ປະ​ກອບ​ທຸລະ​ກິດ. ປີນີ້ ນັກ​ສຶກ​ສາ​ທີ່​ຮຽນ​ຈົບຊັ້ນ​ສູງ ​ຈະ​ມີ​ເຖິງ 7 ລ້ານ 6 ແສນ 5 ໝື່ນ​ຄົນ, ສະ​ນັ້ນ ຕ້ອງ​ຜັນ​ຂະ​ຫຍາຍ​ແຜນ​ການ​ຊຸກ​ຍູ້​ການ​ປະ​ກອບ​ອາ​ຊີບ​ແລະ​ແຜນ​ການ​ຊັກ​ນຳ​ການປະ​ກອບ​ທຸ​ລະ​ກິດ​ໃຫ້​ດີ, ຊຸກ​ຍູ້​ການ​ປະ​ກອບ​ອາ​ຊີບ​ແລະ​ການ​ປະ​ກອບ​ທຸ​ລະ​ກິດ​ຈາກ​ຫຼາຍ​ຊ່ອງ​ທາງ.

ພັດ​ທະ​ນາ​ການ​ສຶກ​ສາ​ທີ່​ມີ​ຄຸນ​ນະ​ພາບ​ສູງ ແລະ​ມີ​ຄວມ​ຍຸ​ຕິ​ທຳ​ກວ່າ​ເກົ່າ. ​ງົບ​ປະ​ມານການ​ສຶກ​ສາ​ທາ​ລະ​ນະ​ຕ້ອງຫັນ​ໄປ​ຫາ​ເຂດ​ພາກ​ກາງ, ພາກ​ຕ​າ​ເວັນ​ຕົກ, ​ບ່ອນ​ຫ່າງ​ໄກ​ສອກ​ຫຼີກ ແລະເຂດ​ທຸກ​ຍາກ.

ຊຸກ​ຍູ້​ການ​ປະ​ຕິ​ຮູບ​ການ​ປິ່ນ​ປົວສຸຂະພາບ, ການ​ປະ​ກັນ​ໄພ​ດ້ານ​ປິ່ນ​ປົວສຸຂະພາບ ແລະ​ຢຸກ​ຢາ​ໄປ​ພ້ອມ​ກັນ. ປີນີ້ ຕ້ອງບັນ​ລຸ​ການໃຫ້​ທຸກ​ຄົນ​ມີ​ການ​ປະ​ກັນ​ໄພ​ດ້ານ​ປິ່ນ​ປົວສຸຂະພາບ​ຈາກ​ພະ​ຍາດ​ຮ້າຍ​ແຮງ, ລັດ​ຖະ​ບານ​ຕ້ອງ​ເພີ່ມ​ງົບປະ​ມານ​ເຮັດໃຫ້​ຜູ້​​ເປັນ​ພະ​ຍາດ​ຮ້າຍ​ແຮງ​ສາ​ມາດ​ຫຼຸດ​ຜ່ອນຕາມ​ແບກ​ຫາບ​ຫຼາຍກວ່າ​ເກົ່າ. ຈະ​ປັບ​ປຸງ​ລະ​ບຽບ​ການ​ປະ​ກັນ​ໄພ​ປິ່ນ​ປົວສຸຂະພາບຂອງ​ປະ​ຊາ​ຊົນ​ຢູ່​ຕົວ​ເມືອງ​ແລະ​ຊົນ​ນະ​ບົດ, ການ​​ອຸດ​ໜູນ​ການ​ເງິນ​ຈາກ​ຄົນລະ 380 ຢວນ​ຕໍ່​ປີ ຂຶ້ນ​ເປັນ 420 ຢວນ. ດຳ​ເນີນ​ການ​ທົດ​ລອງ​ປິ່ນ​ປົວສຸຂະພາບ​ໂດຍກະຈາຍ​​ລະ​ດັບຢູ່​ທ້ອງ​ຖີ່ນ 70%. ການ​ອຸດ​ໜູນ​ການ​ເງິນ​ໃນ​ດ້ານ​ບໍ​ລິ​ການ​ສາ​ທາ​ລະ​ນະ​ສຸກ​ພື້ນ​ຖານ​​ຈາກ 40 ຢວນ​ຕໍ່​ຄົນ​ເພີ່ມ​ຂຶ້ນ​ເປັນ 45 ຢວນ​ຕໍ່​ຄົນ, ຊຸກ​ຍູ້​ບຸກຄະລາ​ກອນ​ສາຄະລະນະ​ສຸກເຄື່ອນ​ໄຫວລົງສູ່​ຂັ້ນ​ຮາກ​ຖານ​ແລະຊົນ​ນະ​ບົດ. ເພື່ອ​ສຸ​ຂະ​ພາບ​ຂອງ​ປະ​ຊາ​ຊົນ, ຕ້ອງ​ເລັ່ງ​ລັດ​ສ້າງ​ໂຄງ​ປະ​ກອບ​ການ​ຕິດ​ຕາມກວດ​ກາ​ຄວາມ​ປອດ​ໄພ​ດ້ານ​ອາ​ຫານ​ແລະ​ຢາ​ທີ່​ເປັນ​ເອ​ກະ​ພາບ​ກັນ​ແລະ​ມີ​ອິດ​ທິ​ພົນ​ຢ່າງວ່ອງ​ໄວ, ກວດ​ກາ​ທຸກ​ຂັ້ນ​ຕອນ​ທີ່​ສົ່ງ​ອາ​ຫານ​ຈາກ​ນາ​ສວນ​ຈົນ​ໄປ​ຮອດ​ໂຕະ​ອາ​ຫານ​ຂອງ​ປະ​ຊາ​ຊົນ, ແລະ​ສົ່ງ​ຢາ​ຈາກ​ຫ້ອງ​ທົດ​ລອງ​ໄປ​ຮອດ​ໂຮງ​ໝໍ ເພື່ອ​ໃຫ້​ປະ​ຊາ​ຊົນ​ໄວ້​ເນື້ອ​ເຊື່ອໃຈ​ຕໍ່​ອາ​ຫານ​ແລະ​ຢາ.

ສ້າງ​ຕາ​ໜ່າງ​​ປະ​ກັນ​​ສັງ​ຄົມ​ໃຫ້​ໜາ​ແໜ້ນ. ສືບ​ຕໍ່ຍົກ​ສູງ​ມາດ​ຖານ​ເງິນ​ບຳ​ນານ​ຂອງ​ຜູ້​ອອກ​ກິນ​ເບ້ຍ​ບຳ​ນານ. ​ດຳ​ເນີນ​ການ​ທົດ​ລອງ​ປະ​ຕິ​ຮູບ​ການ​ບໍ​ລິ​ການ​ລ້ຽງ​ຜູ້​ເຖົ້າ​ໂດຍ​ລວມ, ​ຊຸກ​ຍູ້​ການ​ປິ່ນ​ປົວສຸຂະພາບ​ກັບ​ການ​ລ້ຽງ​ຜູ້​ເຖົ້າ​ປະ​ສານ​ສົມ​ທົບ​ກັນ​ດ້ວຍ​ຫຼາຍ​ຮູບ​ການ. ຍົກ​ມາດ​ຖານ​ອຸດ​ໜູນ​ໃຫ້​ປະ​ຊາ​ຊົນ​ຜູ້​ທີ່​ໄດ້​ຮັບ​ຄ່າ​ຄອງ​ຊີບ​ຕ່ຳ​ສຸດ​ໃນ​ຕົວ​ເມືອງ​ນັ້ນ​ໃຫ້​ສູງ​ຂຶ້ນ 5%, ສ່ວນ​ຢູ່​ຊົນ​ນະ​ບົດ​ຈະ​ໃຫ້​ສູງ​ 8%.

ຊຸກ​ຍູ້​ການ​ປະ​ຕິ​ຮູບ​ແລະ​ພັດ​ທະ​ນາ​ວັດ​ທະ​ນະ​ທຳ. ​ເຕົ້າໂຮມ​​ຄວາມ​ຮູ້​ທີ່​ເປັນ​ເອ​ກະ​ພາບ​ກັນ ໂຮມ​ສູນ​ກຳ​ລັງ​ແຮງ​ດ້ວຍ​ຄວາມ​ໃຝ່​ຝັນ​ຂອງ​ຈີນ ແລະ​ສັງ​ຄົມ​ນິ​ຍົມ​ທີ່​ມີ​ສີ​ສັນ​ພິ​ເສດ​ຂອງ​ຈີນ, ສ້າງແລະ​ຜັນ​ຂະ​ຫຍາຍ​ທັດ​ສະ​ນະ​ຄຸນ​ຄ່າ​ໃຈ​ກາງ​ສັງ​ຄົມ​ນິ​ຍົມ. ນຳ​ເອົາ​ຊັບ​ພະ​ຍາ​ກອນ​ວັດ​ທະ​ນະ​ທຳ​ມະຫາຊົນ​ລົງ​​ໄປ​ສູ່​ຂັ້ນ​ຮາກ​ຖານ​ຂອງ​ຕົວ​ເມືອງ​ແລະ​ຊົນ​ນະ​ບົດ, ຊຸກ​ຍູ້​ຂະ​ແໜງ​ການ​ວັ​ດ​ທະ​ນະ​ທຳ​ພັດ​ທະ​ນາ​ດ້ວຍ​ຫົວ​ຄິດ​ປະ​ດິດ​ສ້າງ.

ເພີ່ມ​ທະ​ວີ ແລະປະ​ດິດ​ສ້າງ​ການ​ຄຸ້ມ​ຄອງ​ບໍ​ລິ​ຫານ​ສັງ​ຄົມ. ຊຸກ​ຍູ້​ການ​ກໍ່​ສ້າງ​ເຂດ​ຊຸມ​ຊົນ​ໃນ​ຕົ​ວ​ເມືອງ ແລະ​ຊົ​ນ​ນະ​ບົດ, ຊຸກ​ຍູ້​ການ​ປຶກ​ສາ​​ຫາ​ລືຢ່າງ​ມີ​ປະ​ຊ​າ​ທິ​ປະ​ໄຕ​ຂອງ​ຂັ້ນ​ຮາກ​ຖານ. ​ບູ​ລະ​ນະລະ​ບົບ​ຄ້ຳ​ປະ​ກັນ​ຄວາມ​ປອດ​ໄພ​ດ້ານ​ອິນ​ເຕີ​​ເນັດ​ລະ​ດັບ​ຊາດ. ປະ​ດິດ​ສ້າງ​ກົນ​ໄກ​ປັບ​ປຸງ​ຄວາມ​ສະ​ຫງົບ​ທາງ​ສັງ​ຄົມ​ໂດຍ​ລວມ, ຊຸກ​ຍູ້​ການ​ສ້າງ​ລະ​ບົບ​ປ້ອງ​ກັນ​ແລະ​ຄວບ​ຄຸມ​ຄວາມ​ສະ​ຫ​ງົບ​ທາງ​ສັງ​ຄົມ​ດ້ວຍ​ການ​ຫັນ​ເປັນ​ຂໍ້​ມູນ​ຂ່າວ​ສານ, ລົງ​ໂທດ​ການ​ກະ​ທຳ​ຜິດ​ກົດ​ໝາຍ​ຕາມ​ກົດ​ໝາຍ​ຢ່າງ​ເຂັ້ມ​ງວດ, ​ປາບ​ປາມ​ການ​ເຄື່ອນ​ໄຫວ​ກໍ່​ການ​ຮ້າຍ​ຢ່າງ​ເຂັ້​ມງວດ​ເພື່ອໃຫ້​ປະ​ຊາ​ຊົນ​ມີ​ຄວາ​ມ​ຮູ້​ສຶກ​ປອດ​ໄພ​ຫຼາຍ​ຂຶ້ນ.

​ກຳ​ແໜ້ນ​ວຽກ​ງານການ​ຜະ​ລິດ​ຢ່າງປອ​ດ​ໄພ​ແລະ​ຄວາມ​ປອດ​ໄພ​ສາ​ທາ​ລະ​ນະ, ເພີ່ມ​ທະ​ວີ​ການ​ກໍ່​ສ້າງ​​ພື້ນ​ຖານ​ໂຄງ​ລ່າງ​ດ້ານ​ຄວາ​ມປ​ອດ​ໄພ ແລະ​ຄວາມ​ສາ​ມາດ​ໃນ​ການ​ປ້ອງ​ກັນ​ແລະ​ຫຼຸດ​ຜ່ອນໄພ. ​ດຳ​ເນີນ​ການ​ຕິດ​ຕາມກວດ​ກາ ແລະ​ປະ​ຕິ​ບັດ​ກົດ​ໝາຍ​​ຢ່າງ​ເຂັ້ມ​ງວດ​, ເດັດ​ຂາດບໍ່​ໃຫ້​ເກີດ​ອຸ​ບັດ​ເຫດ​ດ້ານ​ຄວາມ​ປອດ​ໄພ​ຂະ​ໜາດ​ໃຫຍ່​ຂຶ້ນ.

ແປດ: ເພີ່​ທະ​ວີ​ການ​ກໍ່​ສ້າ​ງ​ອົງ​ການ​ລັດ, ຍົກ​ຄວາມ​ສາ​ມາດ​ການ​ປະ​ຕິ​ບັດ​ງານ ແລະ​ລະ​ດັບ​ບໍ​ລິ​ການ​ໃຫ້​ສູງ​ຂຶ້ນ. ອົງ​ການ​ປົກ​ຄອງ​ທຸກ​ຂັ້​ນ​ຕ້ອງ​ຜັນ​ຂະ​ຫຍາຍ​ທັດ​ສະ​ນະ​ພັດ​ທະ​ນາ​ອັນ​ໃໝ່​ຢ່າງ​ເລິກ​ເຊິ່ງ, ສ້າງ​ເປັນ​ອົງ​ການ​ປົກ​ຄອງ​ຕາມ​ກົດ​ໝາຍ, ອົງ​ການ​ປົກ​ຄອງ​ແບບ​ປະ​ດິດ​ສ້າງ, ອົງ​ການ​ປົກ​ຄອງ​ທີ່​ປອ​ດ​ໃສ​​ຂາວ​ສະ​ອາດ ແລະ​ອົງ​ການ​ປົກ​ຄອງ​ແບບ​ບໍ​ລິ​ການ​ທີ່​ປະ​ຊາ​ຊົນ​ພໍ​ໃຈ.

ຍຶດ​ໝັ້ນ​ປະ​ຕິ​ບັດ​ໜ້າ​ທີ່​​ພັນ​ທະ​ຕາມ​ກົດ​ໝາຍ, ຈັດ​ເອົາ​ການ​ເຄື່ອນ​ໄຫວ​ຂອງ​ອົງ​ການ​ລັດ​ໃຫ້​ເຂົ້າ​ສູ່ລະບຽບ​ກົດ​ໝາຍ​ຢ່າງຮອບ​ດ້ານ.

ອົງ​ການ​ປົກ​ຄອງ​ທຸກ​ຂັ້ນ ກໍ​ຄື ພະ​ນັກ​ງານ​ໃນ​ອົງ​ການ​ເຫຼົ່າ​ນີ້​ຕ້ອງ​ປະ​ຕິ​ບັດ​ຕາມ​ລັດ​ຖະ​ທຳ​ມະ​ນູນ ແລະ​ກົດ​ໝາຍ​ຕ່າງໆ​ຢ່າງ​ເຂັ້ມ​ງວດ, ເປັນ​ເຈົ້າ​ການຊຸກ​ຍູ້​ວຽກ​ງານ​ຂອງ​ຕົນ​ເອງ​ດ້ວຍ​ແນວ​ຄິດ​ປົກ​ຄອງ​ຕາມ​ກົດໝາຍ ແລະ​ວິ​ທີ​ປົກ​ຄອງ​ຕາມ​ກົດ​ໝາຍ, ຕ້ອງ​ປະ​ຕິ​ບັດ​ຕາມ​ພັນ​ທະ​ຂອງ​ຕົນ​ເອ​ງ​ທີ່​ກຳ​ນົດ​ຢູ່​ໃນ​ກົດ​ໝາຍ ແລະ​ເດັດ​ຂາດບໍ່​ໃຫ້​ກະ​ທຳທີ່​ເປັນ​ການ​ຝ່າຝືນ​ກົດ​ໝາຍ.

ຍຶດ​ໝັ້ນ​ປະ​ຕິ​ບັດ​ໜ້າ​ທີ່ຢ່າງ​ບໍ​ລິ​ສຸດຜຸດ​ຜ່ອງ, ຊຸກ​ຍູ້​ການ​ຕ້ານການ​ສໍ້​ລາດ​ບັງຫຼວງ​ໃຫ​ກ້າວ​ສູ່​ລວງ​ເລິກ.

ຍຶດ​ໝັ້ນ​ປະ​ຕິ​ບັດ​​ໜ້າ​ທີ່​ຢ່າງ​ດຸ​ໝັ່ນ​ຂະ​ຫຍັນ​ພຽນ, ຍົກ​ສູງ​ຄວາມ​ສາ​ມາດ​ໃນ​ການ​ປະ​ຕິ​ບັດ​ໜ້າ​ທີ່ ແລະ​ຄວາມ​ໜ້າ​ເຊື່ອ​ຖື. ເຈົ້າ​ໜ້າ​ທີ່​ອົງ​ການ​ລັດ​ຕ້ອງ​ເພີ່ມມທະ​ວີ​ການ​ກໍ່​ສ້າງ​ແບບ​ແຜນ ແລະ​ຄວາມ​ສາ​ມາດ​ຂອງ​ຕົນ​ເອງ, ສ້າງ​ຖັນ​ແຖວ​ລັດ​ຖະ​ກອນ​ທີ່​ມີ​ຄຸນ​ທາດ​ ແລະ​ວິ​ຊາ​ການ​ສູງ.
​ສຳ​ລັບ​ທ້ອງ​ຖິ່ນ​ທີ່​ເຮັດ​ແທ້​ທຳ​ຈິງ ແລະ​ໄດ້​ຮັບ​​ໝາ​ກ​ຜົນ​ຢ່າງ​ພົ້ນເດັ່ນ, ຈະ​ເພີ່ມ​ທະ​ວີ​ການ​ສະ​ໜັບ​ສະ​ໜູນງົບ​ປະ​ມານ, ເພີ່ມ​ເນື້ອ​ທີ່​ດິນ​ກໍ່​ສ້າງ, ການ​ຈັດ​ສັນ​ໃຊ້​ທຶນ​ການ​ເງິນ. ສົ່ງ​ເສີມ​ໃຫ້​ທ້ອງຖິ່ນ​ຕ່າງໆ ເຮັດ​ວຽກຕາມ​ສະ​ພາບ​ຕົວ​ຈິງ ເພື່ອ​ສ້າງ​ເປັນຂະ​ບວນການ​ແຂ່ງ​ຂັນ​ກັນ​ແລະ​ພັດ​ທະ​ນາ​ຮ່ວມ​ກັນ.

​ຜູ້​ແທນ​ທັງ​ຫຼາຍ!

ປະ​ຊາ​ຊາດ​ຈີນ​ແມ່ນ​​ຄອບ​ຄົວໃຫຍ່, ການ​ຊຸກ​ຍູ້​ໃຫ້​ບັນ​ດາ​ເຜົ່າ​ຢູ່​ຮ່ວມ​ກັນ​ຢ່າງ​ຖືກ​ຕ້ອງ​ປອງດອງ​ກັນ, ຮ່ວມ​ທຸກ​ຮ່ວມ​ສຸກ​ນຳ​ກັນ ແລະ​ພັດ​ທະ​ນາ​ຢ່າງ​ກົມ​ກຽວ​ກັນນັ້ນ ແມ່ນ​ຜົນ​ປະ​ໂຫຍດພື້ນ​ຖານ​ແລະ ​ໜ້າ​ທີ່​ຮ່ວມ​ກັນ​ຂອງ​ປະ​ຊາ​ຊົນ​ບັນ​ດາ​ເຜົ່າ. ສະ​ນັ້ນ ຕ້ອງ​ຍຶດ​ໝັ້ນ​ເສັ້ນ​ທາງ​ທີ່​ຖືກ​ຕ້ອງ​ໃນ​ການ​ແກ້​ໄຂ​ບັນ​ຫາ​ຊົນ​ເຜົ່າ​ຢ່າງ​ມີ​ສີ​ສັນ​ພິ​ເສດ​ຂອງ​ຈີນ, ຊຸກ​ຍູ້​ການ​ສ້າງ​ອົງ​ປະ​ກອບ​ສັງ​ຄົມ ແລະ​ສະ​ພາບ​ແວດ​ລ້ອມເຂດ​ຊຸມ​ຊົນ​ທີ່​ມີ​ຫຼາຍ​ຊົນ​ເຜົ່າ​ຢູ່​ຮ່ວມ​ກັນ, ຊຸກ​ຍູ້​ໃຫ້​ບັນ​ດາ​ເຜົ່າ​ໄປ​ມາ​ຫາ​ສູ່​ກັນ, ແລກ​ປ່ຽນ​ກັນ​ແລະ​ເຊື່ອມ​ໂຍງ​ເຂົ້າ​ກັນ.

ຍຶດ​ໝັ້ນ​ຄຸ້ມ​ຄອງວຽກ​ງານ​ສາ​ສະ​ໜາ​ຕາມ​ກົດ​ໝາຍ, ຊຸກ​ຍູ້​ການ​ພົວ​ພັນ​ລະ​ຫວ່າງ​ສາ​ສະ​ໜາ​ໃຫ້​ມີ​ຄວາມ​ກົມ​ກຽວ​ກັນ, ເສີມ​ຂະ​ຫຍາຍ​ບົດ​ບາດ​ອັນ​ຕັ້ງ​ໜ້າ​​ຂອງ​ບຸກ​ຄົນ​ວົງ​ການ​ສາ​ສະ​ໜາ ແລະປະ​ຊາ​ຊົນ​ທີ່​ເຊື່​ອ​ຖື​ສາ​ສະ​ໜາ​ໃນ​ການ​ຊຸກ​ຍູ້​ການ​ພັດ​ທະ​ນາ​ຂອງ​ເສດ​ຖະ​ກິດ​ສັງ​ຄົມ.
​ພວກ​ເຮົາ​ຕ້ອງປົກ​ປົກ​ຮັກ​ສາ​ສິດ​ທິ​ຜົນ​ປະ​ໂຫຍດ​ທີ່​ຊອບ​ດ້ວຍ​ກົດ​ໝາຍ​ຂອງ​ຊາວ​ຈີນ​​ຕ່າງ​ດ້າວ​ຢູ່​ຕ່າງ​ປະ​ເທດ ກໍ​ຄື​ຊາວ​ຈີນ​ທີ່​ກັບ​ມາ​ປະ​ເທດ​ຊາດ​ພ້ອມ​ດ້ວຍ​ຄອບ​ຄົວ, ເສີມ​ຂະ​ຫຍາຍ​ທ່າ​ແຮງ​ພິ​ເສດ ແລະ​ບົດ​ບາດ​ທີ່​ສຳ​ຄັນ​ຂອງ​ເຂົາ​ເຈົ້າ​ຢ່າງ​ເຕັມ​ສ່ວນ ເພື່ອ​ໃຫ້​ລູກ​ຫຼານ​ປະ​ຊາ​ຊາດ​ຈີນ​ຢູ່​ພາຍ​ໃນ​ແລະ​ຕ່າງ​ປະ​ເທດ​ມີ​​ຈິດ​ໜຶ່ງ​ໃຈ​ດຽວ​ຕໍ່​ປະ​ເທດ​ຊາດ​ໃຫ້​ຫຼາຍ​ຂຶ້ນ.

ຜູ້​ແທນ​ທັງ​ຫຼາຍ!

ພວກ​ເຮົາ​ຕ້ອງ​ເພີ່ມ​ທະ​ວີ​ການ​ກໍ່​ສ້າງກອງ​ທັບ​ໃຫ້​ເປັນ​ແບບ​ທັນ​ສະ​ໄຫມ ແລະເປັນຕົ້ນ​ແບບ​ຢ່າງ​ຮອບ​ດ້ານ, ເດັດ​ດ່ຽວ​ປົກ​ປັກ​ຮັກ​ສາ​ຄວາມ​ໝັ້ນ​ຄົງ​ແຫ່ງ​ຊາດ. ຍຶດ​ໝັ້ນ​ຫຼັກ​ການ ແລະ​ລະ​ບຽບ​​ການ​ພື້ນ​ຖານ​ທີ່​ພັກນຳ​ພາ​ກອງ​ທັບ​ຢ່າງ​ເດັດ​ຖານ. ຈັດ​ຕັ້ງ​ປະ​ຕິ​ບັດ​ການ​ກຽມພ້ອມ​ສູ້​ຮົບ​ທຸກ​ເວລາ ແລະ​ການ​ປ້ອງ​ກັນ ຄວບ​ຄຸມ​​ເຂດ​ຊາຍ​ແດນ, ທາງ​ທະ​ເລ ແລະ​ທາງ​ອາ​ກາດ.

​ຜູ້​ແທນ​ທັງ​ຫຼາຍ!

ພວກ​ເຮົາ​ຈະ​ປະ​ຕິ​ບັດ​​ທິດທາງ  "ປະ​ເທດ​ດຽວສອງ​ລະ​ບອບ" "ໃຫ້​ຊາວ​ຮົງ​ກົງ​ປົກ​ຄອງ​ຮົງ​ກົງ" "ໃຫ້​ຊາວ​ມາ​ກາວ​ປົກ​ຄອງ​ມາ​ກາວ" ແລະ​ປົກ​ຄອງ​ຕົນ​ເອງ​ໃນ​ລະ​ດັບ​ສູງ​ຢ່າງ​ຮອບ​ດ້ານ​ແລະ​​ຖືກ​ຕ້ອງ, ປະຕິບັດ​ຕາມ​ລັດ​ຖະ​ທຳ​ມະ​ນູນ​ແລະ​ກົດ​ໝາຍ​ພື້ນ​ຖານ​ຢ່າງ​��ຂັ້ມ​ງວດ, ພວກ​ເຮົາ​ເຊື່ອ​ໝັ້ນ​ວ່າ ​ຮົງ​ກົງ​ແລະ​ມາ​ກາວຍ່ອມ​ຈະ​​ມີ​ຄວາມ​ໝັ້ນ​ທ່ຽງ ແລະ​ຈະ​ເລີນ​ຮຸ່ງ​ເຮືອງ​ເປັນ​ໄລ​ຍະ​ຍາວ​ນານ. ​ພວກ​ເຮົາ​ຈະອອກ​ແຮງ​ສະ​ໜັບ​ສະ​ໜູນ ຜູ້​ບໍ​ລິ​ຫານ​ງານ​ແລະ​ອົງ​ການ​ປົກ​ຄອງ​ເຂດ​ບໍ​ລິ​ຫານ​ງານ​ພິ​ເສດ​ຮົງ​ກົງ ແລະ​ມາ​ກາວ​ປະ​ຕິ​ບັດ​ໜ້າທີ່ຕາມ​ກົດ​ໝາຍ. ​ຕ້ອງລົງ​ເລິກ​ການ​ຮ່ວມ​ມື​ລະ​ຫວ່າງ​ແຜ່ນ​ດິ​ນ​ໃ��ຍ່​​ກັບ​ຮົງ​ກົງ​ແລະ​ມາ​ກາວ, ຊຸກ​ຍູ້​ຮົງ​ກົງ​ແລະ​ມາ​ກາວ​ຍົກ​ກຳ​ລັງ​​ແຂ່ງ​ຂັນ​ຂອງ​ຕົນ​ເອງ​ໃຫ້​ສູງ​ຂຶ້ນ.

ພວກ​ເຮົາ​ຕ້ອງ​ສືບ​ຕໍ່​ຍຶດ​ໝັ້ນ​ນະ​ໂຍບາຍ​ແລະທິດ​ທາງ​ໃຫຍ່​ໃນ​ການ​ເຮັດ​ວຽກ​ຕໍ່​ໄຕ້​ຫວັນ, ຍຶດ​ໝັ້ນ​ພື້ນ​ຖານ​ທາງ​ການ​ເມືອງ​ຂອງ "​ຄວາມ​ຮັບ​ຮູ້​ຄື​ກັນ​ໃນ​ປີ 1992", ເດັດ​ດ່ຽວ​ຄັດ​ຄ້ານ​ກາ​ນ​ເຄື່ອນ​ໄຫວ​ແບ່ງ​ແຍກ​ຊາດ​ທີ່​ໃຫ້​ໄຕ້​ຫວັນ​ເປັນ​ເອ​ກະ​ລາດ, ປົກ​ປັກ​ຮັກ​ສາ​ອະ​ທິ​ປະ​ໄຕ ແລະ​ຜືນ​ແຜ່ນ​ດິນ​ອັນ​ຄົບ​ຖ້ວນ​ຂອງ​ຊາດ, ປົກ​ປັກ​ຮັກ​ສາ​ການ​ພົວ​ພັນ​ລະ​ຫວ່ງ​ສອງ​ຝັ່ງ​ຊ່ອງ​ແຄບ​ໄຕ້​ຫວັນ​ໃຫ້​ພັດ​ທະ​ນາຢ່າງ​ສັນ​ຕິ ແລະ​​ເພື່ອສັນ​ຕິ​ພາບ​ຄວາມ​ໝັ້ນ​​ຄົງ​ຂອງ​ເຂດ​ທະ​ເລ​ໄຕ້​ຫວັນ. ພວກ​ເຮົາ​ຈະ​ຍຶດ​ຖື​ທັດ​ສະ​ນະ​ທີ່ "ສອງ​ຝັ່ງ​ຊ່ອງ​ແຄບ​ໄຕ້​ຫວັນ​​ເປັນ​ຄອບ​ຄົວ​ດຽວ​ກັນ", ຮ່ວມ​ກັບ​ພີ່​ນ້ອງ​ຮ່ວ​ມ​ຊາດ​ໄຕ້​ຫວັນ​ຖື​ຫຼັກ​ທຳ​ໃຫຍ່​ຂອງປະ​ຊາ​ຊາດ​ຈີນ, ຮ່ວມ​ກັນ​ຊົມ​ໃຊ້​ໂອ​ກາດ​ການ​ພັດ​ທະ​ນາ, ຮ່ວມ​ມື​ກັນ​ສ້າງ​ປະ​ຊາ​ຄົມ​ຮ່ວມ​ຊະ​ຕາ​ກຳ​ລະ​ຫວ່າງ​ສອງ​ຝັ່ງ​ຊ່ອງ​ແຄບ​ໄຕ້​ຫວັນ.

​ຜູ້​ແທນ​ທັງ​ຫຼາຍ!

ພວກ​ເຮົາ​ຈະ​ສືບ​ຕໍ່​ຊູ​ຄັນທຸງ​ແຫ່ງ​ສັນ​ຕິ​ພາບ, ​ພັດ​ທະ​ນາ, ຮ່ວມ​ມື​ກັນ ແລະ​ໄດ້​ຮັບ​ຜົນ​ປະ​ໂຫຍດ​ຮ່ວມ​ກັນ, ປະ​ຕິ​ບັດ​ຕາມ​ທັດ​ສະ​ນະ​ການ​ຕ່າງ​ປະ​ເທດ​ຂອງ​ປະ​ເທດ​ໃຫຍ່​ທີ່​ມີ​ສີ​ສັນ​ພິ​ເສດ​ຂອງ​ຈີນ, ປົກ​ປັກຮັກ​ສາ​ອະ​ທິ​ປະ​ໄຕ,​ ຄວາມ​ໝັ້ນ​ຄົງ ແລະ​ຜົນ​ປະ​ໂຫຍດ​​ໃນ​ການ​ພັດ​ທະ​ນາຂອງ​ປະ​ເທດຊາດ​ໃຫ້​ດີ. ຈັດ​ກອງ​ປະ​ຊຸມ​ສຸດຍອດ​ຂອງ​ກຸ່ມ G20 ໃຫ້​ດີ, ຊຸກ​ຍູ້​ໃຫ້​ເສດ​ຖະ​ກິດ​ໂລກ​ເຕີບ​ໂຕ​ດ້ວຍ​​ຫົວ​ຄິດ​ປະ​ດິດ​ສ້າງ​, ບູ​ລະ​ນະການ​ຄຸ້ມ​ຄອງ​ເສດ​ຖະ​ກິດ​ການ​ເງິນ​ທົ່ວ​ໂລກ​ໃຫ້ຄົບ​ຖ້ວນ​ສົມ​ບູນ. ເພີ່ມ​ທະ​ວີ​ການ​ຮ່ວມ​ມື​ແບບ​ປະ​ສານ​ງານ​​ກັບ​ປະ​ເທດ​ໃຫຍ່​ທີ່​ສຳ​ຄັນ​ຕ່າງໆ, ສ້າງ​ການ​ພົວ​ພັນ​ລະ​ຫວ່າງ​ປະ​ເທດ​ໃຫຍ່​ທີ່​ໄປ​ມາ​ຫາ​ສູ່​ກັນ​ເປັນ​ຢ່າງ​ດີ ແລະ​ຮ່ວມ​ມື​ກັນ​ແບບ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ​ໂຫຍດ. ຍຶດ​ຖື​ທັດ​ສະ​ນະ​ການ​ຕ່າງ​ປະ​ເທດ​ຕໍ່​ບັນ​ດາ​ປະ​ເທດ​ອ້ອມ​ຂ້າງ​ທີ່ ຖືກ​ຕ້ອງ​ປອງດອງ​ກັນ, ມີ​ຄວາມ​ສັດ​ຊື່​ຕໍ່​ກັນ, ສ້າງ​ຜົນ​ປະ​ໂຫຍດ​ໃຫ້​ຕໍ່​ກັນ ແລະ​ມີ​ຄວາມ​ໂອບ​ອ້ອມ​ອາ​ລີ​ແກ່​ກັນ, ຢູ່​ຮ່ວມ​ກັນ​ໂດຍ​ສັນ​ຕິ​ກັບ​ບັນ​ດາ​ປະ​ເທດ​ຢູ່​ພາກ​ພື້ນ​ດຽວ​ກັນ, ພັດ​ທະ​ນາ​ແບບ​ເຊື່ອມ​ໂຍງ​ເຂົ້າ​ກັນ. ລົງ​ເລິກ​ການ​ຮ່ວມ​ມື​ໃຕ້ໆ, ຊຸກ​ຍູ້​ການ​ພັດ​ທະ​ນາ​ຮ່ວມ​ກັນ, ປົກ​ປັກ​ຮັກ​ສາ​ສິດ​​ຜົນ​ປະ​ໂຫຍດ​ທີ່​ຊອບ​ດ້ວຍ​ກົດ​ໝາຍ​ຂອງ​ບັນ​ດາ​ປະ​ເທດ​ທີ່​ພວມ​ພັດ​ທະ​ນາ. ເຂົ້າ​ຮ່ວມ​ການ​ແກ້​ໄຂ​ບັນ​ຫາ​ທົ່ວ​ໂລກ ແລະ​ບັນ​ຫາ​ຈຸດ​ສຸມ​ຢ່າງ​ສ້າງ​ສັນ. ເລັ່ງ​ລັດ​ການ​ສ້າງ​ຄວາມ​ສາ​ມາດ​ປົກ​ປັກ​ຮັກ​ສາ​ຜົນ​ປະ​ໂຫຍດ​ຂອງ​ຕົນ​ເອງ​ທີ່​ຢູ່​ຕ່າງ​ປະ​ເທດ, ປົກ​ປ້ອງຄວາມ​ປອດ​ໄພຂອງ​ພົນ​ລະ​ເມືອງ ແລະ​ນິ​ຕິ​ບຸກ​ຄົນ​ຈີນ​ທີ່​ຢູ່​ຕ່າງ​ປະ​ເທດ​ຢ່າງ​ແທ້​ຈິງ. ຈີນ​ຍິນ​ດີ​ຮ່ວມ​ກັບ​ປະ​ຊາ​ຄົມ​ໂລກ, ສ້າງຄວາມ​ພະ​ຍາ​ຍາມ​ຢ່າງບໍ່ຢຸດ​ຢັ້ງເພື່ອ​ພາ​ລະ​ກິດ​ແຫ່ງ​ສັນ​ຕິ​ພາບ​ກັບ​ການ​ພັດ​ທະ​ນາຂອງມວນ​ມະ​ນຸດ.

​ຜູ້​ແທນ​ທັງ​ຫຼາຍ!

ມີ​ແຕ່​ບຸກບືນ​ສູ້​ຊົນ ຈິ່ງ​ສາ​ມາດ​ບັນ​ລຸ​ອະ​ນາ​ຄົດ​ທີ່​ສວຍ​ງາມ​ໄດ້. ພວກ​ເຮົາ​ຈົ່ງ​ສາ​ມັກ​ຄີກັນ​ຢ່າງ​ແໜ້ນ​ແຟ້ນ​ຢູ່ອ້ອມ​ຂ້າງ​ສູນ​ກາງ​ພັກ​ທີ່​ມີ​ສະ​ຫາຍ​ສີ​ຈິ້ນ​ຜິງ​ເປັນ​ເລ​ຂາ​ທິ​ການ​ໃຫຍ່, ຮ່ວມ​ແຮງຮ່ວມ​​ໃຈກັນ ສູ້​ຊົນ​ກ້າວ​ໄປ​ໜ້າ, ພະ​ຍາ​ຍາມ​​ເຮັດສຳ​ເລັດ​ໜ້າ​ທີ່​ເປົ້າ​ໝາຍ​ພັດ​ທະ​ນາ​ເສດ​ຖະ​ກິດ​ສັງ​ຄົມ​​ໃນ​ປີນີ້​​, ຮັບ​ປະ​ກັນ​ໃຫ້​ມີ​ໄລ​ຍະ​ເລີ່ມ​ຕົ້ນ​ທີ່​ດີ​ໃນ​ການຍາດ​ເອົາ​ໄຊ​ຊະ​ນະ​​ຂອງ​ການ​ສ້າງ​ສຳ​ເລັດ​ສັງ​ຄົມ​ທີ່​ອີ່ມ​ໜຳ​ສຳ​ລານ​ຢ່າງ​ຮອບ​ດ້ານ​ ເພື່ອ​ປະ​ກອບ​ສ່ວນ​ອັນ​ໃໝ່​ໃຫ້​ແກ່​ການ​ສ້າງ​ສ້າ​ປະ​ເທດ​ສັງ​ຄົມ​ນິ​ຍົມ​ທີ່​ທັນ​ສະ​ໄໝ​ມັ່ງ​ຄັ່ງ​ເຂັ້ມ​ແຂງ, ປະ​ຊາ​ທິ​ປະ​ໄຕ, ສີ​ວິ​ໄລ ແລະ​ກົມ​ກຽວ​ກັນ, ບັນ​ລຸ​ຄວາມໃຝ່​ຝັນ​ຂອງ​ຈີນ​ທີ່​ໃຫ້​ປະ​ຊາ​ຊາດ​ຈີນ​ຟື້ນ​ຕົວ​ຄວາມ​ຈະ​ເລີນ​ຮຸ່ງ​ເຮືອງ​ຄືນໃໝ່​ຢ່າງ​ຍິ່ງ​ໃຫຍ່!