ອາກາດໜາວທີ່ປັກກິ່ງ
ສະບາຍດີມິດລາຍການທຸກທ່ານ! 19ໂມງພົບກັນອີກແລ້ວກັບລາຍການເບິ່ງເມືອງຈີນຂອງ CRI ທີ່ໜຸ່ມໃຫຍ່ເປັນຜູ້ຈັດສູ່ຟັງທຸກຄືນ! ເວົ້າແລ້ວເດືອນ ທັນວາ, ມັງກອນແນວນີ້ຢູ່ວຽງຈັນບາງໄລຍະກໍໜາວຫຼາຍຢູ່ ແຕ່ສ່ວນຫຼາຍກໍໜາວໜ້ອຍ ຫຼືບາງໄລຍະຍັງອຸ່ນ ຍັງຮ້ອນອີກຊ້ຳ ແຕ່ວ່າຄັນໃຜຊິໄປປັກກິ່ງໄລຍະນີ້ຂໍບອກເລີຍວ່າ ທັນວາ ມັງກອນ ກຸມພາ ມີນາ ບໍ່ມີມື້ອຸ່ນແນ່ນອນ ມີແຕ່ໜາວກັບໜາວແລ້ວ ບາງມື້ຕ່ຳສຸດຮອດລົບ10ອົງສາກໍມີ ບາງມືກໍມີຫິມະຕົກອີກ ອຸນຫະພູມສູງສຸດກໍມີແຕ່ 0-2ອົງສາປະມານນີ້ລະ ກໍຄຶດເບິ່ງເນາະວ່າມັນໜາວສ່ຳໃດ? ຂັ້ນວ່າວຽງຈັນມື້ໜາວຫຼາຍໆກໍມີແຕ່ 14-15 ອົງສາກໍຍັງໜາວຂະໜາດນີ້ ແລະ ອາກາດຕິດລົບຢູ່ປັກກິ່ງມັນຈະໜາວຂະໜາດໃດ? ຜ່ານມາບາງມື້ໜຸ່ມໃຫຍ່ກໍເວົ້າສູ່ຟັງກ່ຽວກັບອາກາດໜາວຢູ່ປັກກິ່ງສູ່ຟັງເລັກໆໜ້ອຍໆ ແຕ່ຄືນນີ້ຈະເວົ້າໃຫ້ຟັງລະອຽດສົມຄວນ ວ່າທ່ານໄປປັກກິ່ງໃນໄລຍະທີ່ໜາວໆແນວນີ້ຈະພົບຫຍັງແດ່? ຄວນກຽມຕົວຮັບມືແນວໃດ? ແລະ ຈະເຮັດແນວໃດຈື່ງຈະມີຄວາມສຸກ ຈະມ່ວນ ເວລາໄປປັກກິ່ງໃນຍາມໜາວໆແນວນີ້! ຟັງເພງຊຸດທຳອິດກ່ອນເນາະ ແລ້ວຈະເວົ້າສູ່ຟັງລະອຽດຕື່ມ!
ເພງ
2ເພງທຳອິດຈາກລາຍການຜ່ານໄປ! ຢ່າລືມມີຄຳເຫັນຫຍັງ? ຢາກຮູ້...........ໂທ 711477 SMS 9300 ເອົາບັດນີ້ຈະລົມສູ່ຟັງວ່າຖ້າທ່ານໄປປັກກິ່ງນະຄອນຫຼວງຂອງຈີນໃນຍາມໜາວໆແນວນີ້ຈະພົບພໍ້ຫຍັງແດ່? ລົງຍົນໄປປັບອັນທີ່ຈະພົບຕາມແຄມຖະໜົນຫົນທາງ ກໍແມ່ນຕົ້ນໄມ້ໃບຫຍ້າທີ່ຫ່ຽວແຫ້ງໂລດແລ້ວ ຕົ້ນໄມ້ກໍເຫຼືອແຕ່ຕົ້ນ ແຕ່ກິ່ງ ແຕ່ກ້ານຫັ້ນແລ້ວ ຍາມນີ້ຈະໄປເບິ່ງດອກໄມ້ງາມໆ ຕົ້ນໄມ້ຂຽວໆ ຫຼື ຫຍ້າຂຽວໆບໍ່ເຫັນແລ້ວຢູ່ປັກກິ່ງນະ ທ້ອງຟ້າສ່ວນຫຼາຍກໍບົດອື້ມຄື້ມຢູ່ລະ ດົນໆ 2-3ມື້ກໍຈຶ່ງເຫັນແສງແດດສົດໃສເທື່ອໜື່ງເປັນແນວນັ້ນລະ! ເອົາ ຂໍຢ້ຳອີກເດີວ່າຜູ້ທີ່ຈະໄປ ໂດຍສະເພາະໄປໄລຍະສັ້ນ ອາທິດ 2ອາທິດ ເດືອນໜື່ງ 2ເດືອນແນວນີ້ນະ ຄັນບໍ່ຢາກຊື້ເຄື່ອງກັນໜາວແພງຢູ່ປັກກິ່ງ ກໍເອົາເຄື່ອງກັນໜາວໄປແຕ່ວຽງພີ້ຫຼາຍໆໂລດ ບໍ່ວ່າຈະເປັນໝວກໜາ ຫຼືຈະເປັນໝວກໜັງແຮ່ງດີ ຜ້າພັນຄໍ ຖົງມື ຖົງຕີນ ເສື້ອກັນໜາວໜາໆ ໂສ້ງຢີນ ເອົາໄປຫຼາຍໆໂລດ! ອອກເຮືອນ ອອກໂຮງແຮມ ອອກໄປນອກ ຄັນບໍ່ນຸ່ງໜາໆ ອຸ່ນໆຄືເວົ້າມາຫັນອອກໄປບໍ່ຮອດ 10ກ້າວດອກ ຊິໄດ້ແລ່ນກັບເຂົ້າເຮືອນໄວບໍ່ຄ້ານໂລດແລ້ວ ! ຢູ່ໃນຕຶກ ອາຄານ ມີອາຍອຸ່ນຢູ່ ແຕ່ອອກໄປນອກບໍ່ມີໄດ ! ຖົງຕີນຄວນເອົາລຸ້ນໜາໆເດີ ເພາະວ່າຕີນນີ້ສຳຄັນຫຼາຍໄດ ເພາະວ່າເປັນສູນລວມຂອງເສັ້ນປະສາດເດ ! ຄັນບໍ່ຮັກສາໃຫ້ອົບອຸ່ນດີແທ້ໆ ສຸຂະພາບມີບັນຫາໂລດແລ້ວ ໄຂ້ແຕກໂລດແລ້ວຄັນປ່ອຍໃຫ້ຕີນເຢັນນະ ! ແຕ່ວ່າຍາມໜາວໆແນວນີ້ໄປປັກກິ່ງກໍໄດ້ບັນຍາກາດດີໆອີກແບບໜື່ງໄດ໋ ອອກໄປນອກເຫັນໜຸ່ມສາວນຸ່ງເຄື່ອງໜາໆງາມໆ ໂດຍສະເພາະຜູ້ສາວຈີນນຸ່ງເຄື່ອງແຟຊັ່ນຍາມໜາວງາມຂະໜາດ ທາສົບແດງໆ ນຸ່ງເສື້ອໜັງ ເສື້ອຂົນສັດ ນຸ່ງໂສ້ງຢີນ ຫຼືໂສ້ງຮັດເນື້ອຟິດໆຮັດຫຸ່ນໃສ່ເກີບໂບກໜັງດຳສົ້ນສູງໆຍ່າງດ້ວຍຄວາມໝັ້ນໃຈ ສະງ່າງາມຂະໜາດ ! ເຊັກຊີ້ດີຂະໜາດ ເອົາ,ຟັງເພງອີກກ່ອນເນາະແລ້ວຈະລົມບັນຍາກາດຍາມໜາວໆແບບນີ້ຢູ່ປັກກິ່ງສູ່ຟັງຕໍ່
ເພງ
ຂະນະນີ້.........ຄືນນັ້ນໜຸ່ມໃຫຍ່ພວມລົມບັນຍາກາດຍາມໜາວໆຢູ່ປັກກິ່ງສູ່ຟັງຢູ່ ເພື່ຶອຈະເປັນປະໂຫຍດແກ່ຜູ້ທີ່ເພິ່ນມີແຜນຈະເດີນທາງໄປວຽກໃດກໍແລ້ວແຕ່ລະ! ໄປປັກກິ່ງໄລຍະນີ້ຈະໄດ້ເຫັນໜອງນ້ຳຢູ່ໃນທີ່ຕ່າງໆກາຍເປັນນ້ຳກ້ອນລະ! ຊາວໜຸ່ມຫຼາຍຄົນກໍໄດ້ໂອກາດຫຼິ້ນສະເກັດຢູ່ເທິງໜ້າໜອງນ້ຳຍ້ອນໜ້ານ້ຳມັນກ້າມໜາຈື່ງຫຼິ້ນໄດ້, ບາງຄົນກໍເອົາຕັ່ງໄປນັ່ງຕຶກເບັດ ເຈາະນ້ຳກ້ອນເປັນຮູພໍປ່ອນຮູເບັດລົງແລ້ວກໍ່ນັ່ງຖ້າປາກິນເບັດຢູ່ຫັ້ນງຽບໆ ! ໄປປັກກິ່ງຕອນນີ້ຈະເຫັນຄົນຈີນຕຸ້ຍຂື້ນເພາະວ່າໄປອອກກຳລັງກາຍທາງນອກບໍ່ໄດ້ເດ່! ມີແຕ່ເຮັດວຽກ ກິນ ນອນ ຍາວໜາວແນວນີ້ກໍ່ນອນແຊບແທ້ໆ. ຄັນຍ່າງໄປຕາມຖະໜົນກໍ່ອາດາຈະເຫັນຄົນຈີນຈີ່ມັນດ້າງຫົວໃຫຍ່ໆໃສ່ຟຸຍ ຫອມດີຂະໜາດ ! ໜາວໆຊື້ມັນດ້າງຈີ່ກິນຮ້ອນໆ ທັງແຊບ ທັງຫອມ ໄດ້ພະລັງງານສູ້ຄວາມໜາວໄດ້ດີໄດ ! ໜາວໆນີ້ຮ່າງກາຍຄົນເຮົາກໍຕ້ອງການພະລັຳງານເພີ່ມຂື້ນ ເພື່ອສູ້ກັບອາກາດໜາວ, ສະນັ້ນໄປປັກກິ່ງອອກໄປນອກກໍ່ຊຶ້ຂອງກິນຫຼິ້ນຫຼາຍອັນຕິດໄມ້ຕິດມືບໍ່ອຶດ ບໍ່ວ່າຊິເປັນແກ່ນດອກຕາເວັນບໍ່, ແກ່ນໝາກອຶບໍ່, ແກ່ນໝາກໂມບໍ່ ຫຼື ແກ່ນພືດປະເພດມັນໃຫ້ພະລັງງານຕ່າງໆຍ່າງໄປ ກິນໄປເພີນດີໄດ້ພະລັງງານອີກ ! ຄັນໄປຫຼິ້ນຕາມສູນຊັອບປິ້ງຫຼືແຫຼ່ງທ່ອງທ່ຽວທ່ານກໍຈະເຫັນໄມ້ສຽບໝາກກະທັນຈຸບນ້ຳຕານ ຜູ້ສາວຈີນມັກຂະໜາດ ຍາມໜາວແນວນີ້! ແຕ່ວ່າໜຸ່ມໃຫຍ່ເຫັນແລ້ວບໍ່ກ້າກິນ ຢ້ານຕຸ້ຍຍ້ອນນ້ຳຕານ ! ສຽບໜື່ງກໍມີເກືອບ 10ໜ່ວຍພຸ້ນລະ ເບິ່ງຜູ້ສາວຈີນ ເດັກນ້ອຍຈີນ ກິນເປັນຕາແຊບເອົາແທ້ເອົາວ່າ ! ສຽບໜື່ງກໍບໍ່ແພງ 2-3ຢວນນິລະ !ປະມານ 2-3ພັນກີບນິລະ ! ເອົາ,ຟັງເພງອີກກ່ອນເນາະແລ້ວຈະເວົ້າສູ່ຟັງວ່າເຄື່ອງດື່ມສຳຄັນຫຼາຍປານໃດໃນຍາມໜາວຫຼາຍໆຢູ່ປັກກິ່ງແນວນີ້!
ເພງ
ເພງຈີນມ່ວນໆຜ່ານໄປແລ້ວ ບັດນີ້ກໍມາຟັງຕໍ່ຄັນໃຜຈະໄປປັກິ່ງຍາມໜາວທີ່ສຸດແນວນີ້ ຄວນກຽມຕົວແນວໃດ? ປັກກິ່ງຍາມນີ້ອາກາດແຫ້ງອີ່ຫຼີໄດທ່ານຜູ້ຟັງ ສະນັ້ນ ຊາ ກາເຟ ນ້ຳເຕົ້າຮູ້ຫຼືນົມອຸ່ນໆຈະມີປະໂຫຍດຫຼາຍຕໍ່ສຸຂະພາບ ຕອນໜຸ່ມໃຫຍ່ເຮັດວຽກຢູ່ປັກກິ່ງ ຍາມໜາວໆແນວນີ້ທັງຢູ່ເຮືອນ ທັງຢູ່ຫ້ອງການດື່ມນ້ຳຊາອຸ່ນຕະຫຼອດມື້ເລີຍ ກາງຄືນກໍອຸ່ນນົມສົດກິນ ນ້ຳເຕົ້າຮູ້ຮ້ອນກິນ ມັນຈຳເປັນຫຼາຍຕໍ່ຮ່າງກາຍ ມັນສາມາດເພີ່ມຄວາມຊຸ່ມຊື່ນຂອງຮ່າງກາຍໄດ້ເດ ! ໃນຫ້ອງນອນຄືກັນກໍໄດ້ເອົາຊາມນ້ອຍໃສ່ນ້ຳເຢັນມາວາງໄວ້ແຈໃດແຈໜຶ່ງຂອງຫ້ອງນອນພຸ້ນໄດ! ອັນຄວາມມັນອາກາດແຫ້ງຫັນ ຄັນບໍ່ເຮັດແນວນີ້ເລືອດດັງອາດອອກໄດ້ ! ອາກາດໜາວໆແບບນີ້ອາຫານທີ່ຄົນປັກກິ່ງມັກໄປກິນກໍແມ່ນ ໝໍ້ຮ້ອນຊີ້ນແກະ ຊີ້ນງົວ ຊີ້ນໝູລະ, ໂດຍສະເພາະຈຸ່ມຊີ້ນແກະ ມີຜັກມີເຫັດແລະຫຼາຍໆອັນງັບເຫຼົ້າຂາວຈີນລົງໄປເລັກນ້ອຍອົບອຸ່ນດີຂະໜາດ! ເຫັນບໍ່ຄົນຢູ່ເຂດໜາວມັກກິນຊີ້ນແກະໄດທ່ານຜູ້ຟັງ ເພາະວ່າມັນໃຫ້ພະລັງງານຄວາມຮ້ອນແກ່ຮ່າງກາຍໄດ້ດີ! ເອົາ,ຂໍກັບມາລົມເລື່ອງໜ້າຕາຜິວພັນຕື່ມ ເພາະວ່າປັກກິ່ງຕອນໜາວໆແນວນີ້ ນອກຈາກຈະນຸ່ງເຄື່ອງໜາໆແຕ່ຫົວຮອດຕີນແລ້ວປານນັ້ນຜິວພັນບໍ່ວ່າຈະເປັນຕົນໂຕ ໜ້າ ສົບ ໝູ່ນີ້ກໍແຫ້ງໆ! ຕ້ອງມີໂລຊັ່ນຫຼັງອາບນ້ຳແລ້ວກໍທາໝົດໂຕເດີ້ ຄັນຊັ້ນນອນບໍ່ໄດ້ ຊິໄດ້ເກົາຂ້າງ ເກົາທ້ອງ ເກົາຂາໂຕ້ ບີແຂ່ງຕວດໆໝົດຄືນໄດ .! ໜ້າກໍຕ້ອງທາໂລຊັ່ນ ສົບກໍຕ້ອງທາລິບສະຕິກມັນ ຄັນຊັ້ນແຕກຈົນເລືອດຊຶມພຸ້ນແລ້ວ ! ຖືເບົາບໍ່ໄດ້ເດີເລື່ອງນີ້ທ່ານຜູ້ຟັງເອີຍ! ທ່ານຜູ້ຟັງບາງທ່ານໂດຍສະເພາະທ່ານຊາຍຊ້ຳວ່າໂອຍ ! ຂ້ອຍຜູ້ຊາຍເອິກສາມສອກຜູ້ຊາຍແທ້ບໍ່ແມ່ນຜູ້ຊາຍທຽມ ຈັກນ່ອຍເຂົາຊິວ່າປ່ຽນແປງພຶດຕິກຳທາງເພດແລ້ວບໍ? ໜຸ່ມໃຫຍ່ທຳອິດກໍຄິດແນວນີ້ລະ ຢູ່ວຽງກໍບໍ່ເຮັດແນວນັ້ນ ດຽວນີ້ກັບມາຢູ່ວຽງແລ້ວກໍບໍ່ເຮັດແນວນັ້ນ ບໍ່ຢາກເປັນເຈົ້າສຳອາງເກີນໄປ! ແຕ່ວ່າຢູ່ປັກກິ່ງຍາມໜາວບໍ່ເຮັດບໍ່ໄດ້ຂໍບອກ! ມັນອັນຕະລາຍຕໍ່ສຸຂະພາບແທ້ໄດ ! ໂລຊັ່ນທາໜ້າກໍຕ້ອງໄດ້ທາທັ້ງໆທີ່ບໍ່ມັກແທ້ໆ ! ອັນໃດກໍຢ່າລະຊິຢືນເປັນກະຕ່າຍຂາດຽວ ຫຼື ເປັນຄົນຊ້າຍຈັດຂວາໂພດບໍ່ໄດ້ ສະພາບແວດລ້ອມຕົວຈິງຢູ່ແຕ່ລະບ່ອນມັນຕ່າງກັນຕ້ອງປັບຕົວເຂົ້າໃຫ້ມັນໄດ້ ໃຫ້ເປັນ Flaxible man ຫັນລະເນາະ ເອົາຟັງເພງອີກກ່ອນ
ເພງ
ຂໍຂອບ…………… ຕຳນິ………… ເອົາມາລົມເລື່ອງອາກາດໜາວຢູ່ປັກກິ່ງຕໍ່ເນາະ ! ເວລາຢູ່ລາວອາກາດຮ້ອນເລື່ອງອາບນ້ຳບາງເທື່ອມື້ໜຶ່ງ 3ເທື່ອກໍມີໄດເນາະທ່ານຜູ້ຟັງ ຢ້ານໝູ່ເໝັນເດ ເພື່ອຄວາມສະອາດແດ່ ! ບາດໄປຢູ່ຈີນແລ້ວຍາມໜາວແນວນີ້ໜຸ່ມໃຫຍ່ອາບນ້ຳມື້ລະເທື່ອ ຍັງມີໝູ່ຄົນຈີນເຕືອນວ່າ: ຢ່າອາບດຸຫຼາຍໃນຍາມໜາວແນວນີ້ ເພາະວ່າມັນໜາວແຮງ ກິ່ນໂຕກໍບໍ່ມີດັອກ ນ້ຳທີ່ອາບກໍເປັນນ້ຳອຸ່ນ ແຮ່ງເຮັດໃຫ້ຜິວແຫ້ງຕື່ມອີກ ຄົນຈີນບາງເທື່ອ 2-3 ມື້ຈຶ່ງອາບເທື່ອໜື່ງກໍມີຍາມໜາວໆແນວນີ້ນະ ມີແຕ່ສະຜົມ ສ່ວາຍໜ້າ ທຳຄວາມສະອາດບ່ອນລີ້ບ່ອນລັບຂອງຮ່າງກາຍກໍໄດ້ແລ້ວວ່າຊັ້ນ ! ເຄື່ອງນຸ່ງກໍບໍ່ຈຳເປັນຊັກດັອກຍາມນີ້ ເພາະເຫື່ອບໍ່ມີ ຢູ່ປັກກິ່ງອອກໄປນອກກໍບໍ່ມີຂີ້ຝຸ່ນ ! ມັນກະແມ່ນຄວາມຂະເຈົ້າແທ້ໄດທ່ານຜູ້ຟັງ! ເສື້ອໜັງໜາໆທາງນອກນີ້ໃກ້ຊິເຂົ້າຍາມໜາວຊັກແລ້ວກໍຈົນຮອດຫວິດໜາວພຸ້ນລະຈັ່ງຊັກອີກ ມັນກະບໍ່ເປື້ອນຄືຂະເຈົ້າເວົ້າແທ້ກໍ໋! ຢູ່ປັກກິ່ງຍາມໜາວໆແນວນີ້ມື້ໃດເຫັນແສງແດດສົດໃສທ້ອງຟ້າປອດປົ່ງ ຢ່າຟ້າວດີໃຈແລ້ວນຸ່ງເຄື່ອງໜ້ອຍກ່ວາເກົ່າອອກໄປຫຼີ້ນນອກເດີ ບໍ່ຄືຢູ່ວຽງໄດ! ຢູ່ປັກກິ່ງແສງແດດມັນບໍ່ກ້າໄດທ່ານຜູ້ຟັງຊ່ວຍໃຫ້ອົບອຸ່ນບໍ່ໄດ້ດອກ! ແຮ່ງມີລົມພັດອີກ, ໂອຍ! ຈັ່ງແມ່ນມັນໜາວຢາກເອົາຜ້າຫົ່ມປົກຫົວນອນຂົດຢູ່ເທິງຕຽງໝົດມື້ພູ້ນແລ້ວ! ເອົາ,ກະຫວັງວ່າລາຍການເບິ່ງເມືອງຈີນຄືນນີ້ຊິເປັນປະໂຫຍດກັບທ່ານບໍ່ຫຼາຍກໍ່ໜ້ອຍເນາະ ! ຜູ້ໃດຈະໄປປັກກິ່ງຍາມນີ້ຫຼືມີໝູ່ຄູ່ຍາດພີ່ນ້ອງຈະໄປຍາມນີ້ກໍບອກເຕືອນເພິ່ນແດ່ວ່າໜຸ່ມໃຫຍ່ແນະນຳມາຊັ້ນດັອກ
ເພງ
