ສະພາບການຢ່າຮ້າງໃນສັງຄົມຈີນ
ສະບາຍດີມິດຮັກແຟນລາຍການເບິ່ງເມືອງຈີນ! 19ໂມງເວລາດີໆແນວນີ້ພົບກັນອີກແລ້ວກັບໜຸ່ມໃຫຍ່ອາລົມດີທາງ CRI FM 93Mhz ຢາກຮູ້ເລື່ອງເມືອງຈີນບໍ່ວ່າຈະເປັນແງ່ມຸມໃດ ຂະແໜງການໃດ ເລື່ອງໜັກເລື່ອງເບົາ ເລື່ອງດີ ເລື່ອງບໍ່ດີ ສະຫຼັບສັບປ່ຽນກັນ ມີໄວ້ລໍຖ້າທ່ານຟັງທຸກຄືນ 50ນາທີເຕັມໆ ເວົ້າລະໃນໂລກນີ້ບໍ່ແມ່ນຫຍັງຄືກັນຍ່ອມມີດ້ານບວກດ້ານລົບ ດ້ານດີດ້ານອອ່ນແມ່ນບໍ່ທ່ານຜູ້ຟັງ! ແບບຢ່າງກໍຄືກັນ ກໍຍ່ອມມີແບບຢ່າງທີ່ດີ ການພັດທະນາເສດຖະກິດ-ສັງຄົມຂອງແຕ່ລະປະເທດຄືກັນ ກໍຍ່ອມມີທັງອັນດີແລະອັນບໍ່ດີຄຽງຄູ່ກັນສຳຄັນວ່າຜູ້ບໍລິຫານປົກຄອງຊິສາມາດຈຳກັດຮັດແຄບອັນທີ່ບໍ່ດີນັ້ນໄດ້ຫຼາຍໜ້ອຍຊ່ຳໃດທໍ່ນັ້ນລະ ! ດ້ານສັງຄົມຂອງຈີນຄືກັນ, ການພັດທະນາເສດຖະກິດໄປໄວຫຼາຍ ດ້ານສັງຄົມກໍມີການຫຍໍ້ທໍ້ຄືກັນໄດ໋! ຊີວິດການເປັນຢູ່ດີຂື້ນຫຼາຍ ລາຍຮັບຍິງ-ຊາຍກໍເທົ່າທຽມກັນ ສິດຂອງຜູ້ຍິງກໍຫຼາຍຂື້ນ ອັນນີ້ແມ່ນດີ ແຕ່ອັນທີ່ບໍ່ຢາກຄັກຈະເອົາມາລົມສູ່ຟັງຄືນນີ້ກໍແມ່ນດຽວນີ້ອັດຕາການປະຮ້າງກັນຢູ່ຈີນເພີ່ມຫຼາຍຂື້ນ, ລາຍລະອຽດຫຼືເຫດຜົນເປັນຍ້ອນຫຍັງນັ້ນ ຟັງເພງກ່ອນແລ້ວຈະກັບມາລົມສູ່ຟັງ
ເພງ
2ເພງທຳອິດຈາກລາຍການຜ່ານໄປ ! ຢ່າລືມເດີມິດລາຍການຟັງລາຍການນີ້ກໍຄືລາຍການອື່ນໆຂອງ CRI ແລ້ວມີຄຳເຫັນເຂົ້າມາແດ່…………ບັດນີ້ມາເຂົ້າສູ່ເລຶ່ອງທີ່ໜຸ່ມໃຫຍ່ຈະລົມໃຫ້ຟັງຄືນນີ້ກໍຄືການຢ່າຮ້າງຢູ່ຈີນດຽວນີ້ເພີ່ມຂື້ນຫຼາຍ ປີກາຍນີ້ຄືປີ 2010 ມີຜົວ-ເມຍ ຈີນຢ່າຮ້າງກັນຕັ້ງວ່າ 2ລ້ານ 6ແສນ 8ໝື່ນຄູ່ ເພີ່ມຂື້ນຈາກປີໝໍ່ໆມານີ້ຕັ້ງວ່າ 8.5% ອັນນີ້ແມ່ນຕົວເລກຂອງກະຊວງວຽກງານພົນລະເຮືອນຂອງຈີນເອງໄດນີ! ປີກາຍນີ້ມີ 2ລ້ານ 6ໝື່ນຄູ່ໄປລົງທະບຽນແຍກທາງກັນຢູ່ກົມວຽກງານພົນລະເຮືອນ, ແລະ ອີກ 668.000ຄູ່ ຮ້ອງຟ້ອງແລະໄປຈົບຊີວິດຄູ່ຢູ່ສານ ບົດລາຍງານຂອງກະຊວງວຽກງານພົນລະເຮືອນທີ່ເຜີຍແຜ່ໃນກາງເດືອນມິຖຸນາປີ2011 ຍັງບອກວ່າ: ອັດຕາການຢ່າຮ້າງກັນຢູ່ຈີນໃນ 5ປີຫຼັງມານີ້ເພີ່ມຂື້ນຫຼາຍ ຄືປີໜື່ງເພີ່ມຂື້ນສະເລ່ຍປະມານ7% ມາເບິິ່ງການຈົດທະບຽນແຕ່ງງານໃນປີ 2010 ມີທັງໝົດ 12ລ້ານ 4ແສນກ່ວາຄູ່ ເພີ່ມຂື້ນ 2% ຖ້າທຽບໃສ່ປີກ່ອນ ໃນນີ້ 49.000ຄູ່ແມ່ນຄົນຈີນແຜ່ນດິນໃຫຍ່ແຕ່ງກັບຕ່າງປະເທດ. ສະເລ່ຍຕໍ່ມື້ແລ້ວການຢ່າຮ້າງໃນປີນີ້ກໍຄືປີຫຼັງໆມານີ້ແຮ່ງເປັນຕາຕົກໃຈ ຄືມື້ໜື່ງມີຫຼາຍກ່ວາ 1ໝື່ນຄູ່ທີ່ຢ່າຮ້າງກັນ. ໃນເມືອງໃຫຍ່ເທົ່າໃດຍິ່ງມີໂຕເລກໜ້າວິຕົກເທົ່ານັ້ນ ເຊັ່ນວ່າຢູ່ປັກກິ່ງກັບຊຽງໄຮ້ແຕ່ລະປີຢ່າຮ້າງເພີ່ມຂື້ນຕັ້ງວ່າ 30%ວ່າຊັ້ນ ! ທ່ານ ມ່າອີ້ໝານ ສາດສະດາຈານຝ່າຍກົດໝາຍຂອງມະຫາວິທະຍາໄລປັກກິ່ງບອກວ່າ: ການເພີ່ມຂື້ນຂອງການຢ່າຮ້າງແມ່ນເລີ່ມມາແຕ່ທ້າຍຊຸມປີ 1970ພຸ້ນ ເພາະວ່າໃນສະໄໝການປະຕິວັດວັດທະນະທຳ 10ປີ ຄືປິ 1966-1976 ການແຕ່ງງານກໍແບບບໍ່ມີຄວາມຮັກ ເອົາໄປຕາມການຈັດຕັ້ງລະດົມກໍມີຫຼາຍ. ບັດນີ້ພໍມາຮອດຍຸກທີ່ຈີນປະຕິຮູບແລະແກ້ໄຂປະຕູສູ່ພາຍນອກ ເສດຖະກິດຕະຫຼາດ ຄວາມທັນສະໄໝກໍເລີ່ມປ່ຽນແປງ ຮູບການດຳລົງຊີວິດຂອງຄົນຈີນແຜ່ນດິນໃຫຍ່ແລ້ວ,ລວມທັງຊີວິດຄູ່ກໍຄືກັນ ຄວາມສະດວກສະບາຍດ້ານວັດຖຸນິຍົມມີຫຼາຍຂື້ນ ລາຍຮັບກໍຫຼາຍຂື້ນເຮັດໃຫ້ຜູ້ຍິງກ້າຫຼາຍຂື້ນທີ່ຈະກ້າວອອກຈາກຊີວິດຄູ່ ! ຈົນມີຄຳເວົ້າບາງປະໂຫຍກທີ່ຜູ້ຍິງຈີນດຽວນີ້ມັກເວົ້າວ່າ: ການເງິນເຮັດໃຫ້ຂ້ອຍເປັນເອກະລາດ,ຂ້ອຍບໍ່ຕ້ອງການໃຜມາເບີ່ງແຍງດູແລຂ້ອຍ ຂ້ອຍຕ້ອງການຊອກຫາແຕ່ຄວາມຮັກເທົ່ານັ້ນ. ອື່,ນີ້ລະເນາະການພັດທະນາກ້າວໄປໄກ ຄວາມຈະເລີນສິວິໄລ ເຂົ້າມາແທນຄວາມທຸກຍາກຫຼ້າຫັງ ແຕ່ທຸກອັນຍ່ອມມີດ້ານບວກແລະດ້ານລົບ! ຟັງເພງກ່ອນເນາະແລ້ວຈຶ່ງມາລົມກັນກ່ຽວກັບເລື່ອງນີ້!
ເພງ
ຂະນະນີ້ທ່ານພວມຟັງລາຍການເບິ່ງເມືອງຈີນຂອງ CRI FM93Mhz ລາຍການນີ້ມີໃຫ້ທ່ານຟັງທຸກຄືນແຕ່ 19-19:50 ເອົາມາລົມກັນຕໍ່ເນາະກ່ຽວກັບບັນຫາສັງຄົມບັນຫາຄອບຄົວການຢ່າຮ້າງຢູ່ຈີນມີຫຼາຍຂື້ນດຽວນີ້! ສຳນັກຂ່າວສານ ຊິນີຮວາທີ່ເປັນສຳນັກຂ່າວທາງການທີ່ສຸດຂອງຈີນກໍໄດ້ພິມບົດໜຶ່ງອອກມາກ່ຽວກັບເລື່ອງນີ້ ມີຕອນໜື່ງຂຽນວ່າ: ການຢ່າຮ້າງຢູ່ຈີນດຽວນີ້ແມ່ນຜູ້ຍິງເປັນຜູ້ລິເລີ່ມນັ້ນມີຫຼາຍຂື້ນ ແລະ ດຽວນີ້ມີກາຍເຄິ່ງໜຶ່ງຂອງກໍລະນີການຢ່າຮ້າງແມ່ນຝ່າຍ ຍິງເປັນຜູ້ເລີ່ມກ່ອນ ບໍ່ວ່າຈະເປັນສະຖານທີ່ທີ່ໃກ້ກັນຫຼາຍເຊົ່ນປັກກິ່ງ ກັບຊິ່ນຈ່ຽງ ກໍ່ມີສະພາບຄ້າຍໆກັນວ່າຊັ້ນ ! ສັງຄົມເລີ່ມີການປ່ຽນແປງຫຼາຍຈາຄວາມອັບອາຍຂາຍໜ້າທີ່ຍ່າຮ່າງງກັນ ມາເປັນສິດໃນການທີ່ຈະເລືອກແລະເປັນເລື່ອງສ່ວນຕົວ! ອັນນີ້ແມ່ນຄໍາເວົ້າຂອງຜູ່ຊ່ຽວຊານດ້ານໃຫ້ຄໍາປຶກສາບັນຫາແຕ່ງງານຂອງໂຮງງໝໍຈິດຕະເພດໂອແລັມປິກປັກກິ່ງແຫ່ງຊາດ ! ຊ່ຽວຊານຜູ້ນີ້ເພິ່ນຍັງທົບທວນຄືນຄໍາສອນຂອງພໍ່ແມ່ສະໄໝຍັງນ້ອຍ ຄົນດີບບໍ່ຄວນຢ່າກນແລະການຢ່າຮ້າງກໍ່ບໍ່ແມ່ນສິ່ງທີ່ດີ ສະໄໝແຕ່ກີ້ຄົນຈີນຍືດຖືກັນຫຼາຍໃນການເຕົ້າໂຮມກັນໃນຄອບຄົວ ບໍ່ແທ້ບໍ່ວ່າກໍ່ອົດເອົາກັນ ບໍ່ປະບໍ່ຮ້າງກັນເພາະວ່າ: ສະຖາບັນຄອບຄົວຜົວເມຍສໍາຄັຫຼາຍດ້ານໜື່ງກໍ່ດີແຕ່ອີກດ້ານໜື່ງກໍ່ເປັນການບັງຄັບ ໃຫ້ຄູ່ຜົວເມຍຕົກຢູ່ໃນສະພາບຢູ່ນໍາກັນຢ່າງບໍ່ມີຄວາມສຸກ! ນະໂຍບາຍຂອງປະເທດຕອນນັ້ນກໍ່ເຄັ່ງຄັດຫຼາຍກ່ຽວກັບການຢ່າຮ້າງນິໃຜຊິປະຊິຮ້າງນິ ໃຜຊຊິປະຊິຮ້າງກັນຕໍ່ຕ້ອງໄດ້ຂຽນໃບສະເໜີ ເຖິງບ່ອນທີ່ຕົນເອງເຮັດວຽກຫຼືອໍານາດການປົກຄອງຊົ່ວຊິພິຈາລະນາຕົກລົງກັນໃຫ້ຢູ່ຫຼືໃຫ້ຢ່າຮ້າງກໍ່ກິນເວລາຢ່າງໜ້ອຍກໍ່ເດືອນໜື່ງພຸ້ນລະ! ສະພາບແນວນີ້ຢູ່ມາຈົນຮອດປີ 2003 ພີ້ໄດ໋ທ່ານຜູ້ຟັງ.ເພາະວ່າປີນັ້ນສະພາແຫ່ງຊາດຕົກລົງຍົກເລີກລະບຽບການນີ້ໃຜຢາກປະກັນແຍກທາງກັນກໍ່ຈົດທະບຽນຢ່າຮ້າງໄດ້ໂລດ ພໍປະກາດຍົກເລີກລະບຽບນີ້ເປັນປີທໍາອິດ ເລີຍກໍ່ມີຄູ່ຜົວເມຍປະກັນຢ່າງຖືກຕ້ອງຕາມກົດໝາຍເຖິງ 1 ລ້ານ 3 ແສນຄູ່ ທີ່ເປັນຕົວເລກສູງສຸດນັບແຕ່ປີ 1949 ເປັນຕົ້ນມາ! ຕົວເລກນີ້ກໍ່ສະແດງໃຫ້ເຫັນຢ່າງຈະແຈ້ງເລີຍວ່າ: ຮີດຄອງປະເພນີບາງອັນແລະລະບຽບກົດໝາຍບາງງອັນກ່ຽວກັບການແຕ່ງງານກົດຂີ່ຂົ່ມເຫງກ່ຽວກັບຈິດໃຈຂອງຄູ່ຜົວເມຍ ຫຼາຍຕູ່ໂດຍສະເພາະຝ່າຍຍິງບາງເທື່ອຜົວບໍ່ດີຂີ້ເຫຼົ້າເມົາຢາມາແລ້ວກໍ່ຕົບຕີໃຊ້ຄວາມຮຸນແຮງກັບເມຍກັບລູກແຕ່ກໍ່ຍອມເພາະຍ້ອນຖ້າປິກັນກໍ່ຍ້ານອາຍບ້ານອາຍເມືອງຫຼືຕົນເອງກໍ່ລ້ຽງຕົນເອງບໍ່ໄດ້ອັນໃດກໍ່ຂື້ນກັບຜົວໝົດ ອັນນີ້ກໍ່ທໍລະມານຈິດໃຈຜູ້ຍິງແທ້ໄດ໋ເນາະ! ເອົາຟັງເພງກ່ອນແລ້ວຈື່ງມາລົມກັນຕໍ່!
ເພງ
ຂະນະນີ້ມິດລາຍການພວມຢູ່ໃນບັນຍາກາດຂອງລາຍການເບິ່ງເມືອງຈີນຂອງ…….ຢາກຟັງລາຍການນີ້ທີ່ອຸດົມສົມບູນໄປດ້ວຍເລື່ອງລາວຕ່າງໆກ່ຽວກັບປະເທດຈີນແລະເພງຈີນມ່ວນໆກໍປັບຄື້ນວິທະຍຸຂອງທ່ານມາທີ່ CRI ໃນເວລາ19ໂມງໂລດ, ວັນເສົາ-ອາທິດ ກໍມີປົກະຕິບໍ່ເຄີຍຂາດ.ມາລົມກັນຕໍ່ເນາະກ່ຽວກັບສະພາບຂອງສັງຄົມຈີນທີ່ປ່ຽນໄປກ່ຽວກັບການຢ່າຮ້າງທີ່ມີເພີ່ມຂື້ນແລະກໍແມ່ນຝ່າຍຍິງເປັນຜູ້ຂໍຢ່າສ່ວນຫຼາຍ ຜູ້ຊ່ຽວຊານຈີນເວົ້າວ່າ: ແຕ່ກີ້ຍ້ອນມີລະບຽບເຄັ່ງຄັດໃນການປະຮ້າງກັນ ແລະ ຄວາມອາຍຕໍ່ສັງຄົມແຕ່ມັນກໍບໍ່ໄດ້ຮັບປະກັນຊີວິດຄູ່ມີຄວາມສຸກ ສະນັ້ນມາເບິ່ງອັດຕາການຢ່າຮ້າງທີ່ສູງຂື້ນດຽວນີ້ດ້ານໜື່ງມັນກໍສະແດງເຫັນຄວາມປ່ຽນແປງໃນສັງຄົມຈີນຫຼາຍ ເມື່ອບັນຫາປາກທ້ອງ ບັນຫາຄວາມທຸກຍາກ ຈົນໄດ້ແບ່ງໜານໂວງກັນມັນໄດ້ໝົດຍຸກໄປແລ້ວ ຄົນເຮົາກໍສະແຫວງຫາຄວາມສຸກ ຄວາມພໍໃຈ ດ້ານຈິດໃຈ ແລະ ຄວາມຮູ້ສືກຫຼາຍຂື້ນ ການຢ່າຮ້າງແມ່ນຢູ່ວ່າເປັນການນຳເອົາຄວາມເຈັບປວດມາໃຫ້ຫຼາຍຄົນ ແຕ່ຄົນຈີນຍຸກໃໝ່ບໍ່ຄ່ອຍສົນໃຈເລື່ອງນີ້ປານໃດ ! ຜູ້ຊ່ຽວຊານຈີນດ້ານຄອບຄົວຜູ້ໜຶ່ງບອກວ່າ: ລຸ້ນຄົນທີ່ເກີດຫຼັງຊຸມປີ 1980 ມັກເຂົ້າໃຈຜິດຂອງຄຳວ່າແຕ່ງງານ ສະນັ້ນຈຶ່ງເຮັດໃຫ້ອັດຕາການຢ່າຮ້າງສູງຫຼາຍ. ການບໍ່ຮັກກັນແທ້ ການບໍ່ແຄກັນ ການບໍ່ມີເວລາໃຫ້ກັນ ຄວາມບໍ່ປັບຕົວເຂົ້າຫາກັນ ຖືວຽກເປັນໃຫຍ່ເກີນໄປ ມັກແຟຊັ່ນ ມັກຫຼິ້ນມັກທ່ຽວ ບໍ່ສົນນຳຄວາມຮູ້ສຶກຄຸູ່ສົມຣົດຂອງຕົນເອງ ແລະ ຄັນເກີດບັນຫາກໍແກ້ງ່າຍໆ ແຍກທາງກັນໂລດ ອັນນີ້ອັນຕະລາຍຫຼາຍ ໂດຍສະເພາະແມ່ນໄລຍະ 2ປີ ທຳອິດຂອງການແຕ່ງງານເຫດຜົນຂອງຄົນລຸ້ນໃໝ່ມັກປະກັນສ່ວນຫຼາຍສູ່ມື້ນີ້ຢູ່ຈີນແມ່ນຕ່າງຝ່າຍຕ່າງເອົາໃຈໂຕເອງ ບໍ່ສົນຄວາມຮູ້ສຶກຂອງຝ່າຍກົງກັນຂ້າມວ່າຕ້ອງການຫຍັງ ຢາກເຮັດຫຍັງ ການມີລູກຄົນດຽວກໍແນ່ນອນວ່າຖືກລ້ຽງດູເອົາໃຈຈາກຄົນຢ່າງໜ້ອຍ 6ຄົນ ແລ້ວກໍເລີຍກາຍເປັນຄົນເຫັນແກ່ຕົວ ເອົາໃຈໂຕເອງ ເມື່ອມາແຕ່ງງານກັນນິໄສນັ້ນກໍຍັງຕິດມາຢູ່ ກໍເລີຍບໍ່ສົນ ບໍ່ແຄກັນ ຊີວິດຄູ່ເຮັດແນວນັ້ນມັນກໍບໍ່ໄປລອດແທ້ໄດເນາະທ່ານຜູ້ຟັງ ບໍ່ແມ່ນວ່າໄດ້ເມຍແລ້ວຍັງອອກເຮືອນຕະຫຼອດມົ້ວສຸມກັບໝູ່ ກັບເຫຼົ້າຢາປາປີ້ງໜັກຄືເກົ່າ ຫຼືຝ່າຍເມຍກໍເປັນນັກແຕ່ງ ນັກຫຼິ້ນນັກທ່ຽວ ມັນກໍບໍ່ລອດແທ້ໄດເນາະ ! ເອົາ,ປ່ຽນບັນຍາກາດ…………
ເພງ
ຟັງເພງຜ່ານໄປແລ້ວ ມາຟັງເຫດຜົນການອະທິບາຍຂອງຊ່ຽວຊານຈີນກ່ຽວກັບສາເຫດຂອງການຢ່າຮ້າງທີ່ເພີ່ມຂື້ນຢູ່ຈີນໃນປະຈຸບັນ! ເພິ່ນວ່າ: ຄວາມຈິງແລ້ວດຽວນີ້ຄົນເຫັນແກ່ຕົວຫຼາຍຂື້ນອີ່ຫຼີ ບໍ່ແຄບໍ່ສົນຄວາມຮູ້ສຶກຂອງຜູ້ອື່ນ. ເລື່ອງຜົນປະໂຫຍດດ້ານການເງິນກໍເປັນສາເຫດໜຶ່ງທີ່ສຳຄັນ ທີ່ກໍ່ໃຫ້ເກີດການຢ່າຮ້າງ ລາງເທື່ອປະກັນເພື່ອຫວັງແບ່ງສິນສົມສ້າງກໍມີ ບໍ່ວ່າຊິເປັນເຮືອນ,ດິນ,ລົດ,ບ້ານແລະຊັບສິນອື່ນໆ ໂດຍສະເພາະຢູ່ຈີນແມ່ນເຮືອນນິລະ ເພາະດຽວນີ້ຢູ່ຕາມຕົວເມືອງໃຫຍ່ເຮືອນແພງພິລຶກ ຫຼາຍຄູ່ຜິດຖຽງກັນຂື້ນໂຮງຂື້ນສານຕັດສິນເລຶ່ອງແບ່ງສິນສົມສ້າງ ໂດຍສະເພາະເຮືອນ. ອີກເລື່ອງໜຶ່ງທີ່ຢ່າຮ້າງກັນແມ່ນຜົວເປັນຄົນມີເງິນ ແລ້ວໄປລັກມີກິກ ຫຼື ມີເມຍນ້ອຍຢ່າງບັງອາດເປີດເຜີຍ ກໍເປັນອີກສາເຫດໜຶ່ງຂອງການປະຮ້າງ! ເສດຖີໃໝ່ຈີນຫຼາຍຄົນມັກປະເມຍເກົ່າໄປແຕ່ງງານກັບສາວໃໝ່ທີ່ງາມ ເຊັກຊີ້ກ່ວາເມຍເກົ່າ ! ອັນນີ້ແມ່ນທ່ານ ຢາງ ສຽວຫຼິນ ນັກກົດໝາຍການຢ່າຮ້າງຢູ່ປັກກິ່ງເວົ້າໄດນິ ! ຜູ້ຊາຍທີ່ມີເງິນຫຼາຍ ຫຼາຍຄົນມັກມີແຟນເກັບ ຊ່ຽວຊານຈີນແນະນຳວ່າ: ພື້ນຖານຂອງຊີວິດຄູ່ມັນແມ່ນຄວາມຮັກ ຄວາມເຂົ້າໃຈ ແລະ ຮູ້ໃຫ້ອາະໄພ ຄົນລຸ້ນໃໝ່ຄວນໃຊ້ເວລາຕື່ມໃນການເບິ່ງກັນໃຫ້ຄັກກ່ອນແຕ່ງ ! ຫຼາຍຄົນໄດ໋ທີ່ປະຮ້າງເທື່ອທຳອິດ ໄດ້ບົດຮຽນທີ່ເຈັບແສບແລ້ວກໍຄ່ອຍເບິ່ງ ຄ່ອຍເລືອກ ດ້ວຍຄວາມລະມັດລະວັງ ສຸດທ້າຍກໍໄດ້ ຜົວດີ ເມຍດີ ມີຄວາມສຸກ. ນາງ ຫວາງ ທີ່ມີຄວາມສຸກໃນການແຕ່ງງານເທື່ອທີ 2 ບອກວ່າ: ຢ່າມົວເມົານຳແຕ່ຄວາມງາມ ຄວາມເຈົ້າຊູ້ ບໍ່ມີຊາຍໃດ ຍິງໃດສົມບູນແບບດັອກ ! ເບິ່ງຄວາມດີ ຄວາມອົດທົນ ຄວາມຮັກຈິງ ຄວາມຊື່ສັດ ຄວາມເປັນຜູ້ໃຫຍ່ຂອງລາວດີກ່ວາ ! ໃຊ້ເວລາເພື່ອເຂົ້າໃຈລາວ ແລະ ທັງເຂົ້າໃຈໂຕເອງພ້ອມ.
ເພງ
ຈົບ
