ບັນຫາລົດແລະພົນລະເມືອງຫຼາຍໃນເມືອງໃຫຍ່
ສະບາຍດີມິດລາຍການເບິ່ງເມືອງຈີນທຸກທ່ານ! ພໍຮອດເວລານີ້ໜຸ່ມໃຫຍ່ອາລົມດີກໍນຳເອົາລາຍການນີ້ມາພົບກັບທ່ານທາງ CRI ແຫ່ງນີ້ເປັນປະຈຳບໍ່ໄດ້ຂາດ! ເພື່ອນຳເອົາເລື່ອງລາວຕ່າງໆກ່ຽວກັບປະເທດຈີນ ແລະ ເພງຈີນມ່ວນໆມາເວົ້າໃຫ້ຟັງ!ຄືນນີ້ໜຸ່ມໃຫຍ່ຈະເອົາຂໍ້ຂ້ອງໃຈຂອງມິດລາຍການທີ່ຊື່ວ່າຈິດ, ຢູ່ບ້ານວັດໄຕນ້ອຍ, ເມືອງສີໂຄດຕະບອງ, ເພິ່ນໂທມາລົມກັບໜຸ່ມໃຫຍ່ລະບາຍກ່ຽວກັບຈຳນວນລົດໂດຍສະເພາະລົດເກັງທັງເກົ່າທັງໃໝ່ຢູ່ນະຄອນຫຼວງວຽງຈັນ ຈັ່ງແມ່ນເພີ່ມຂື້ນໄວພິລຶກ. ຖະໜົນຫຼາຍສາຍກໍແຄບແລະຮູ້ສຶກວ່າຖະໜົນຢູ່ວຽງຈັນດຽວນີ້ຈະບໍ່ພໍບໍລິການລົດໃຫຍ່ ລົດຈັກທີ່ເພີ່ມຂື້ນໄວຫຼາຍແລ້ວວ່າຊັ້ນ! ການຈະລາຈອນກໍຕິດຂັດນັບມື້ນັບແຮງ ໂດຍສະເພາະຕອນເຊົ້າແຕ່ 7:30 – 8:30 ຕອນແລງແຕ່ 16-18ໂມງ ຈັ່ງແມ່ນທໍລະມານແທ້ໆ ລາງເທື່ອມີນັດວຽກທາງການຫຼືວຽກສ່ວນຕົວບາງເທື່ອໄປບໍ່ທັນກໍມີວ່າຊັ້ນ! ອື!ກໍແມ່ນຄວາມເພິ່ນໄດເນາະທ່ານຜູ້ຟັງ ເພາະວ່າເວລາທີ່ເພິ່ນເວົ້າມາຫັ້ນເປັນເວລາທີ່ໄປໂຮງຮຽນ ໄປການແລະເລີກເດເນາະ! ເພິ່ນວ່າໜຸ່ມໃຫຍ່ເວົ້າສູ່ຟັງເບິ່ງດູວ່າຢູ່ຈີນພຸ້ນໂດຍສະເພາະຢູ່ຕາມຕົວເມືອງໃຫຍ່ກໍມີບັນຫາລົດເພີ່ມຂື້ນໄວຫຼາຍຄືກັນເບາະ? ຄັນມີເພິ່ນແກ້ແນວໃດ? ເພື່ອບໍ່ໃຫ້ການຈະລາຈອນຕິດຂັດນິ! ອື່,ກໍເປັນຄຳເຫັນແລະຄຳຖາມທີ່ໜ້າສົນໃຈດີເນາະ ແລະກໍຄິດວ່າຜູ້ຟັງຫຼາຍທ່ານຄົງຈະມີບັນຫາດຽວກັນ ແລະຢາກຮູ້ຄືກັນວ່າເລື່ອງນີ້ຢູ່ຈີນເປັນແນວໃດ! ຄັນຊັ້ນຟັງເພງກ່ອນຊຸດໜຶ່ງແລ້ວຈະມາເວົ້າສູ່ຟັງ!
ເພງ
2ເພງມ່ວນໆຈາກລາຍການຜ່ານໄປ! ຢ່າລືມເນາະຖ້າທ່ານສົນໃຈຢາກຮູ້ເລື່ອງໃດກ່ຽວກັບປະເທດຈີນບໍ່ວ່າຈະເປັນດ້ານໃດກໍແລ້ວແຕ່ໂທ 711477 ຂໍ້ຄວາມສັ້ນກໍແມ່ນ 9300 ໜຸ່ມໃຫຍ່ກັບທີມງານ CRI ຈະໄປຊອກຫາມາເວົ້າສູ່ຟັງ! ກໍຄືຄືນນີ້ລະທີ່ມີມິດລາຍການຜູ້ຊື່ວ່າ ວິຈິດ ຢູ່ບ້ານວັດໄຕນ້ອຍ ສົນໃຈວ່າຢູ່ຕາມຕົວເມືອງໃຫຍ່ຂອງຈີນມີບັນຫາລົດເພີ່ມຂື້ນໄວຫຼືບໍ່? ການຈະລາຈອນຕິດຂັດບໍ່ ແລະ ແກ້ແນວໃດ? ເວົ້າເລື່ອງນີ້ບໍ່ວ່າປະເທດໃດຄືກັນລະຄັນປະເທດພັດທະນາໄປດີປະຊາຊົນມີຊີວິດການເປັນຢູ່ທີ່ດີຂື້ນລາຍຮັບຫຼາຍຂື້ນພໍຊື້ລົດເກັງໄດ້ກໍຢາກຊື້ແລ້ວ ບໍ່ຢາກຕາກແດດ ຕາກຝົນ ຕາກລົມເດເນາະ! ທັງປອດໄພກ່ວາລົດຈັກ ລົດຖີບອີກວ່າຊັ້ນເດ! ແຕ່ບັນຫາມັນກໍຄືວ່າ ຄັນການພັດທະນາໂຄງລ່າງດ້ານຖະໜົນຫົນທາງໄປບໍ່ທັນການເພີ່ມຂື້ນຂອງລົດແລະລະບົບຂົນສົ່ງສາທາລະນະເປັນຕົ້ນວ່າລົດເມ ລົດໄຟ ລົດລາງຂີ້ຮ້າຍມັນກໍຫຍຸ້ງໂລດແຫຼະ! ປະເທດໃດຄືກັນ ບັດນີ້ຈະເວົ້າເຖິງເມືອງຈີນສູ່ຟັງວ່າດຽວນີ້ມີລົດໜ້ອຍຫຼາຍຊ່ຳໃດ? ຕົວເລກທີ່ກະຊວງຕຳຫຼວດຈີນເຜີຍແຜ່ໃນຕົ້ນເດືອນມັງກອນປີນີ້ເພິ່ນວ່າທົ່ວປະເທດຈີນມີລົດໃຫຍ່ຂື້ນທະບຽນນຳກົມຂົນສົ່ງສູງເຖິງ 100ລ້ານຄັນໃນປີກາຍນີ້ໄດ! ສະເພາະປີກາຍນີ້ປີດຽວຍັງມີລົດໃຫຍ່ເພີ່ມຂື້ນເກືອບ 15 ລ້ານຄັນແລ້ວຖືວ່າເປັນປີທຳອິດທີ່ຈຳນວນລົດໃຫຍ່ຫຼາຍກ່ວາຈຳນວນລົດຈັກ! ໃນປີນີ້ລົດເກງສ່ວນນຕົວກວມເຖິງ 58% ຂອງລົດໃຫຍ່ທັງໝົດຄືມ່ີ 61 ລ້ານຄັນ. 14 ນະຄອນຂອງຈີນທີ່ມີລົດໃຫຍ່ຫຼາຍກ່ວາ 1ລ້ານຄັນຫັ້ນແມ່ນນະຄອນຫຼວງປັກກິ່ງນຳໜ້າໝູ່ ດຽວນີ້ມີຮອດ 4 ລ້ານ 9 ແສນກ່ວາຄັນ! ສະເພາະປັກກິ່ງໄດນິ! ສະນັ້ນບັນຫາລົດຕິດ ບັນຫາມົນລະພິດທາງອາກາດຫຼີກຍາກແນ່ນອນ! ດຽວນີ້ຢູ່ຈີນຄັນລວມເອົາລົດໃຫຍ່ລົດຈັກແລ້ວທົ່ວປະເທດກໍມີ 225ລ້ານຄັນພຸ້ນແລ້ວ. ເປັນຈັ່ງໃດຟັງຕົວເລກລ່າສຸດແລ້ວບໍ່ແມ່ນທຳມະດາເນາະ! ຄົນຈີນດຽວນີ້ແຫ່ງມີລາຍຮັບສູງຂື້ນເລື້ອຍໆໂດຍສະເພາະຄົນຢູ່ໃນເມືອງບໍ່ຢາກຂີ່ລົດຖີບ ລົດຈັກລະໄດ໋! ລົດເມ ລົດໄຟໃຕ້ດິນລົດລາງກໍບໍ່ຢາກຂີ່ວ່າມັນບໍ່ເປັນສ່ວນຕົວຄົນກໍແຍ້ກັນຫຼາຍແດ່ວ່າຊັ້ນເດ! ເອົາ,ຟັງເພງກ່ອນແລ້ວຈຶ່ງຈະມາລົງເລິກກ່ຽວກັບສະພາບລົດຢູ່ນະຄອນຫຼວງປັກກິ່ງສູ່ຟັງ
ເພງ
ຢ່າລືມເດີທ່ານຜູ້ຟັງຄວາມສຸກຂອງທ່ານຄືບໍລິການຂອງພວກເຮົາ.ສະນັ້ນແລ້ວມີຫຍັງຍັງບໍ່ຄັກຕຳນິຕິຊົມເຂົ້າມາໂລດ ໂຄສົກ CRI ທຸກຄົນຍິນດີຕ້ອນຮັບບໍ່ວ່າຕິຫຼືຊົມ! ຄັນໃຜຖືກຕຳນິຈາກຜູ້ຟັງແລ້ວໄປຖຽງໄປສະແດງອາລົມຕອບໂຕ້ກັບຜູ້ຟັງອອກອາກາດຜູ້ນັ້ນບໍ່ແມ່ນນັກຈັດລາຍການຂອງ CRI ແນ່ນອນ. ເພາະພວກເຮົາຄິດວ່າມີຄວາມເຫັນມີ Feed Back ຈາກຜູ້ຟັງນັ້ນປະເສີດທີ່ສຸດແລ້ວແລະຄັນຜູ້ຟັງບໍ່ຫວັງດີເພິ່ນກໍບໍ່ຊ່ວຍແນະນຳຕິຊົມເຂົ້າມາດັອກ! 711477 ຂໍ້ຄວາມສັ້ນ 9300 ຄັນໂຄສົກຜູ້ໃດສະຖານີໃດທີ່ບໍ່ຍອມຟັງຄຳຕຳນິຕິຊົມຂອງຜູ້ຟັງແລ້ວຍັງໄປໃຊ້ອາລົມຕອບໂຕ້ກັບຜູ້ຟັງອອກອາກາດກໍແຈ້ງໂລດວ່າໂຄສົກຜູ້ນັ້ນບໍ່ມີຈັນຍາບັນໃນອາຊີບ, ບໍ່ເຄົາລົບຜູ້ຟັງອວດດີຫຼົງໂຕເອງ ຄຶດວ່າຕົນເອງຮູ້ຕົນເອງເກັ່ງໝົດບໍ່ຕ້ອງຄຳຕຳນິຈາກໃຜ! ຄັນໂຄສົກແນວນີ້ຍັງມີສະຖານີໃດຈ້າງຢູ່ກໍບໍ່ຈັກຊິວ່າລະເນາະ! ເອົາ, ບັດນີ້ມາເຂັ້າເລື່ອງທີ່ພວມລົມກັນຄືນນີ້ດີກ່ວາ !ດຽວນີ້ຢູ່ນະຄອນປັກກິ່ງກໍຄືເວົ້າມາຫັນລະວ່າມີລົດໃຫຍ່ຕັ້ງວ່າ 4 ລ້ານ 9 ແສນ 8 ໝື່ນຄັນ. ແລ້ວຍັງຈະເພີ່ມຂື້ນຕື່ມຢູ່ໄດນີ! ບັນຫາລົດຕິດກໍໜັກຢູ່ໃນແຖວໜ້າຂອງໂລກພຸ້ນລະ! ບັນຫາມົນລະພິດທາງອາກາດກໍໜັກສົມຄວນຄືກັນ! ແຕ່ພາກສ່ວນກຽວຂ້ອງຂອງປັກກິ່ງເພິ່ນກໍຫາວິທີແກ້ໃໝ່ໆອອກມາເລື້ອຍໆ! ມີວິທີໃດແດ່? ອັນສຳຄັນເພິ່ນກໍເພີ່ມຈຳນວນລົດເມແລ່ນຕາມສາຍທາງຕ່າງໆຂື້ນເລື້ອຍໆທັງໃຫຍ່ ທັງສະອາດ ທັງບໍລິການດີ ຜູ້ຂັບກໍເວົ້າມ່ວນຫູກັບລູກຄ້າ ການເຂົ້າການອອກກໍຖືກໂມງຖືກຍາມ ລູກຄ້າໄວ້ໃຈໄດ້ແຕ່ປານນັ້ນກໍຍັງບໍ່ພໍຢູ່ດີ; ອີກອັນໜຶ່ງກໍແມ່ນລົດໄຟໃຕ້ດິນເພິ່ນພວມຂະຫຍາຍສ້າງຂື້ນໃໝ່ຢູ່ຕະຫຼອດເດືອນທັນວາປີກາຍນີ້ເປີດໃໝ່ 3ສາຍ ລວມ 15 ສາຍ 372km ປີນີ້ຈະເປີດໃໝ່ 4 ສາຍ ທັງລົດເມ ທັງລົດໄຟໃຕ້ດິນ ລາຄາກໍຖືກໆ, ລົດເມໄປເທື່ອໜື່ງກໍບໍ່ຮອດ 1 ຢວນຊ້ຳ ປະມານ 5-6 ພັນກີບນິລະ, ຄັນລົດໄຟໃຕ້ດິນກໍມີແຕ່ 2ຢວນກໍປະມານ 2400 ກີບ ໄປໄດ້ໝົດທຸກສາຍຄັນບໍ່ຂື້ນຈາກຮູ ຊິຫຼິ້ນຢູ່ຫັ້ນໝົດມື້ກະໄດ້! ອັນນີ້ກໍແມ່ນເພື່ອແກ້ບັນຫາຈາລະຈອນຕິດຂັດນິລະ ແຕ່ປານນັ້ນກໍຍັງບໍ່ຢາກສຳເລັດ ຍ້ອນຄົນຍ້ອນລົດຢູ່ປັກກິ່ງຫຼາຍໂພດ, ສະເພາະຄົນກໍ 20 ລ້ານລະເດ! ເອົາ,ຄັນຊັ້ນເພິ່ນມີວິທີໃດຕື່ມຈັກນ່ອຍຈະກັບມາເວົ້າສູ່ຟັງ
ເພງ
ຂະນະນີ້................ເອົາ, ບັດນີ້ຈະເວົ້າເຖິງວິທີການແກ້ໄຂການຈະລາຈອນຕິດຂັດຢູ່ນະຄອນຫຼວງປັກກິ່ງຂອງຈີນສູ່ຟັງຕື່ມວ່ານອກຈາກພັດທະນາລະບົບຂົນສົ່ງສາທາລະນະຄືລົດໄຟໃຕ້ດິນໃຫ້ເພີ່ມຂື້ນເລື້ອຍໆ ຫຼຸດລາຄາຄ່າໂດຍສານເພື່ອດືງດູດຄົນໃຫ້ມາໃຊ້ບໍລິການ ທັງມີວິທີຊຸກຍູ້ໃຫ້ຄົນປັກກິ່ງຂີ່ລົດຖີບເພີ່ມຂື້ນແລ້ວເພິ່ນຍັງມີວິທີໃດຕື່ມ? ອັນທີ 1 ແມ່ນເພິ່ນຈຳກັດທັງລົດລັດທັງລົດສ່ວນຕົວບໍລິສັດຫ້າງຮ້ານບໍ່ໃຫ້ແລ່ນໄດ້ຕາມປ້າຍລົດຄືປ່ຽນກັນວ່າມື້ໃດໃຫ້ລົດລົງທ້າຍດວ້ຍເລກຄູ່ອອກແລ່ນໄດ້ ມື້ໃດເລກຄີກອອກແລ່ນໄດ້! ກໍຖືວ່າຈຳກັດບໍ່ໃຫ້ມີລົດໃຫຍ່ອອກແລ່ນໃນແຕ່ລະມື້ໄດ້ຮອດ 1/5ພຸ້ນໄດທ່ານຜູ້ຟັງ! ມາດຕະການນີ້ເພິ່ນເລີ່ມໃຊ້ມາແຕ່ກ່ອນໄລຍະໂອເລັມປິກປັກກິ່ງ 2008 ພຸ້ນລະມານະ!ແລ້ວກໍເຊົາໃຊ້ມົນລະພິດໝອກຄັວນຢູ່ປັກກິ່ງກໍເພີ່ມຂື້ນຄືເກົ່າ, ຄືມາດຕະການນີ້ເພິ່ນອະນຸຍາດໃຫ້ລົດລົງທ້າຍດ້ວຍເລກຄູ່ເລກຄີກປ່ຽນກັນແລ່ນໃນວັນຈັນເຖິງວັນສຸກ ແຕ່ເວລາ 7 ໂມງຈົນຮອດ 20 ໂມງ! ເມື່ອເຫັນສະພາບອາກາດຢູ່ປັກກິ່ງຄືນມາຂີ້ຮ້າຍອີກ ລົດກະຕິດຫຼາຍຄືເກົ່າຫຼັງໂອເລັມປິກເພິ່ນກໍເລີຍເອົາມານຳໃຊ້ອີກໃນປີ 2010 ເປັນເວລາ 2 ປີ ໝົດກຳນົດໃນວັນທີ 10 ເມສາທີ່ຈະມາຮອດນີ້ໄດນິ! ສະນັ້ນເພື່ອປ້ອງກັນບໍ່ໃຫ້ເກີດ ເພິ່ນຈຶ່ງປະຕິບັດມາດຕະການນີ້ເລີ່ມແຕ່ວັນທີ 11ເມສາປີນີ້ໄປຈົນໝົດປີນີ້ລະ! ແລ້ວຄ່ອຍເບິ່ງວ່າສະພາບເປັນແນວໃດຕໍ່ໄປ? ອັນນັ້ນກໍແມ່ນວິທີໜຶ່ງ ແລະອີກວິທີໜຶ່ງຢູ່ປັກກິ່ງເພິ່ນຈຳກັດການຊື້ລົດໃໝ່ບໍ່ແມ່ນວ່າໃຜມີເງິນກໍໄປຊື້ໂລດຄືຢູ່ວຽງຈັນນິໄດ! ຢູ່ປັກກິ່ງຖ້າເຈົ້າຢາກຊື້ລົດໃໝ່ຕ້ອງໄປຈັບສະຫຼາກວ່າໄດ້ປ້າຍລົດໃນຈຳນວນທີ່ອະນຸຍາດໃນແຕ່ລະເດືອນບໍ່? ບໍ່ໄດ້ເດືອນນີ້ເດືອນໜ້າກໍໄປຈັບສະຫຼາກໃໝ່ຈົນກ່ວາຈະໄດ້ປ້າຍລົດພຸ້ນລະຈັ່ງໄປຊື້ລົດໄດ້! ມາດຕະການນີ້ເພິ່ນເລີ່ມໃຊ້ມາແຕ່ປີກາຍນີ້, ສະນັ້ນປີກາຍນີ້ຢູ່ປັກກິ່ງມີລົດລົງທະບຽນໃໝ່ແຕ່ 173,000 ຄັນເທົ່ານັ້ນ! ໜ້ອຍກ່ວາປີ 2010 ຕັ້ງວ່າ 617,000 ຄັນ. ດຽວນີ້ເດືອນໜຶ່ງເພິ່ນຈະອະນຸຍາດໃຫ້ຄົນປັກກິ່ງຊື້ລົດໃໝ່ໄດ້ແຕ່ 240,000ຄັນທໍ່ນັ້ນ ແລະກໍຕ້ອງໄປຈັບສະຫຼາກເອົາຄືເວົ້າມາຫັ້ນລະ! ອັນນີ້ກໍຄືມາດຕະການຕ່າງໆທີ່ປັກກິ່ງເພິ່ນວາງອອກມາເພື່ອຈຳກັດຈຳນວນລົດທີ່ແລ່ນຕາມທ້ອງຖະໜົນ ແລະເຮັດໃຫ້ອາກາດຢູ່ປັກກິ່ງດີຂື້ນ! ຈັກໜ້ອຍຈະເວົ້າເຖິງການລະດົມໃຫ້ຄົນປັກກິ່ງຫັນມາໃຊ້ລົດຖີບ!
ເພງ
ຂະນະນີ້...............ເວົ້າເຖິງລົດຖີບແລ້ວໃນອະດີດປະມານ 30-40 ປີກ່ອນປະເທດຈີນຖືວ່າສັນຍາລັກໜຶ່ງທີ່ຄົນທົ່ວໂລກຮູ້ດີກໍແມ່ນປະເທດແຫ່ງລົດຖີບ ເພາະວ່າຕອນນັ້ນປະເທດຍັງບໍ່ທັນໃຊ້ນະໂຍບາຍປະຕິຮູບແລະໄຂປະຕູສູ່ພາຍນອກເທື່ອ ຫຼື ຫາກໍໃຊ້ໃໝ່ໆປະຊາຊົນຍັງທຸກຈຶ່ງມີແຕ່ລົດຖີບເຕັມຖະໜົນ ແຕ່ຕອນນັ້ນອາກາດຢູ່ຈີນ ຢູ່ປັກກິ່ງ ຢູ່ເມືອງໃຫຍ່ໃດກໍແລ້ວແຕ່ດີຂະໜາດ ມົນລະພິດທາງອາກາດກໍເກືອບວ່າບໍ່ມີເລີຍ ຄົນກໍແຂງແຮງສຸຂະພາບດີໄດ້ອອກກຳລັງກາຍທຸກມື້ເດ໋! ບາດຫຼັງປະເທດປະຕິຮູບມາໄດ້ 20-30ປີ ຊີວິດການເປັນຢູ່ດີຂື້ນດີຂື້ນຄືໃນຊູ່ມື້ນິລະ! ໂດຍສະເພາະປັກກິ່ງອາກາດກໍບໍ່ດີ ລົດກະຕິດ, ໃຊ້ມາດຕະການແກ້ໄຂຫຼາຍອັນແລ້ວກໍຍັງຕິດຫຼາຍຢູ່ !ກໍເລີຍຫັນມາຊຸກຍູ້ປະຊາຊົນປັກກກິ່ງໃຫ້ຫັນມາຂີ່ລົດຖີບຄືນ ຄັນຢາກໃຫ້ເຂົາເຈົ້າຂີ່ມັນກໍຕ້ອງມີສິ່ງອຳນວຍຄວາມສະດວກ! ສະນັ້ນລະຄະນະກຳມະການປະຕິຮູບແລະພັດທະນາປັກກິ່ງກໍຈຶ່ງວາງແຜນແຕ່ 2011-2015 ເພື່ອຊຸກຍູ້ໃຫ້ຄົນຫັນມາຂີ່ລົດຖີບຄືນ !ປີນີ້ເພິ່ນຈະມີລົດຖີບ 2ໝື່ນຄັນໃຫ້ປະຊາຊົນຢືມຂີ່ ແລະຈັດບ່ອນຈອດບ່ອນຢືມ 500ບ່ອນ ໃນທົ່ວປັກກິ່ງ ໂດຍສະເພາະເພິ່ນຈະເນັ້ນເສັ້ນທາງສຳລັບລົດຖີບໃນບາງເຂດສຳຄັນ ເປັນຕົ້ນວ່າຖະໜົນສາຍສຳຄັນ, ເຂດອະນຸລັກປະຫວັດສາດ-ວັດທະນະທຳ ຫຼືບາງເຂດສູນກາງທຸລະກິດເພື່ອແກ້ສະພາບລົດຕິດ! ດຽວນີ້ທາງລົດຖີບຫຼາຍບ່ອນກໍມີຢູ່ແຕ່ວ່າພວກລົດເກັງຫັນຕິມາເອົາຊ່ອງທາງລົດຖີບເປັນບ່ອນຈອດລົດເລີຍ ກໍເລີຍເປັນການໃຊ້ຊ່ອງນີ້ຮ່ວມກັບລົດຖີບ ຫຼາຍຄົນຈຶ່ງຢ້ານວ່າບໍ່ມີຄວາມປອດໄພ, ແຕ່ວ່າຕໍ່ໄປທາງອົງການເຮັດຈິງຈັງຂື້ນເພື່ອອຳນວຍຄວາມສະດວກໃຫ້ຜູ້ໃຊ້ລົດຖີບ
ເພງ
