ວັດທະນະທຳສີແດງກັບບຸນກຸດຈີນ
(GMT+08:00) 2012-02-09 15:17:10 cri
ສະບາຍດີມິດລາຍການທີ່ຮັກແພງ !19ໂມງໜຸ່ມໃຫຍ່ນຳເອົາລາຍການເບິ່ງເມືອງຈີນມາພົບກັບທ່ານອີກແລ້ວທາງ CRI ອີກບໍ່ດົນກຸດຈີນກໍ່ຈະຮອດລະໄດທ່ານຜູ້ຟັງ ! ຄືນວັນທີ 22 ຕໍ່ໃສ່ວັນທີ 23 ເດືອນນີ້ແມ່ນຄືນທີ່ຄົນຈີນເຕົ້າໂຮມຄອບຄົວກິນເຂົ້າກິນນ້ຳຮ່ວມກັນ ເວົ້າລົມກັນ ແນວເວົ້າແນວລົມກໍຈະມີແຕ່ເລື່ອງດີໆງາມໆບໍ່ມີຄວາມຂັດແຍ່ງບໍ່ຜິດຂ້ອງຕ້ອງຖຽງກັນລະ !ເພາະວ່າປີໃໝ່ໃຜກໍຢາກເລີ່ມຕົ້ນດ້ວຍສິ່ງທີ່ດີໆເດ ! ໃນໄລຍະບຸນກຸດຈີນນີ້ຄັນທ່ານຜູ້ຟັງໄດ້ກາຍໄປເຮືອນຫຼືໄປຮ້ານຈີນແລ້ວຈະເຫັນສີແດງເຕັມໄປໝົດລະ !ເປັນຫຍັງຄົນຈີນຄືມັກສີແດງແທ້ ? ທ່ານຜູ້ຟັງຢາກຮູ້ບໍ່ ? ຄັນຢາກຮູ້ຟັງເພງແລ້ວໜຸ່ມໃຫຍ່ຈະກັບມາເວົ້າສູ່ຟັງ
ເພງ
ຜ່ານໄປເພງຈີນມ່ວນໆຈາກລາຍການ !ບັດນີ້ບໍ່ຊັກຊ້າເສຍເວລາ ໜຸ່ມໃຫຍ່ຈະເວົ້າສາເຫດທີ່ວ່າເປັນຫຍັງຄົນຈີນຄືມັກສີແດງແທ້ໂດຍສະເພາະໃນການສະເຫຼີມສະຫຼອງປີໃໝ່ ! ໃນໄລຍະບຸນກຸດຈີນຫຼືບຸນປີໃໝ່ນີ້ ຄົນຈີນຈະມັກນຸ່ງເສື້ອຜ້າໃໝ່ໆທີ່ເປັນສີແດງ ! ເຄື່ອງຂອງຕ່າງໆກໍຈະເປັນສີແດງ ປະເພດວ່າຖືກຫຼືແພງໃຫ້ແດງໄວ້ກ່ອນວ່າຊັ້ນສະ ! ໄລຍະກຸດຈີນນອກຈາກຄົນຈີນມັກນຸ່ງເຄື່ອງທີ່ເປັນສີແດງແລ້ວ ປ້າຍຄະຕິຄູ່ທີ່ເປັນສິຣິມຸງຄຸນທີ່ຕິດໃສ່ຂອບສອງຟາກຂ້າງປະຕູເຂົ້າເຮືອນ; ໂຄມໄຟເຈ້ຍໜ່ວຍມົນໆນ້ອຍໃຫຍ່ ທີ່ຫ້ອຍຢູ່ໜ້າເຮືອນ, ເຊືອກຖັກແບບວັດທະນະທຳຈີນ, ໝາກກະໂພກ, ທຽນຫຼືຊອງອັ່ງເປົ່າກໍລ້ວນແຕ່ເປັນສີແດງໝົດ ຍ້ອນຫຍັງ ? ກໍຍ້ອນວ່າຄົນຈີນເຊື່ອວ່າສີແດງ ເປັນສີແຫ່ງມຸງຄຸນ, ຜູ້ເຖົ້າຜູ້ແກ່ຄົນຈີນບອກວ່າ ນຸ່ງສີແດງໃຊ້ເຄື່ອງສີແດງແລ້ວຈະເຮັງຮັ່ງມີລ້ຳລວຍມີແຕ່ໂຊກດີວ່າຊັ້ນໄດ ! ປະເທດຈີນເປັນປະເທດທີ່ກ້ວາງໃຫຍ່ໄພສານ ໃຫຍ່ເປັນອັນດັບ 3 ຂອງໂລກພຸ້ນແລ້ວເວົ້າເລື່ອງເນື້ອທີ່ນະ ກໍ່ຮອງພຽງແຕ່ຍຣັດເຊຍກັບການາດາທໍ່ນັ້ນແລ້ວ ບ່ອນປະເທດຈີນຕັ້ງຢູ່ອາກາດສ່ວນຫຼາຍກໍ່ໜາວ ຫຼື ເຢັນຫຼາຍກ່ວາຮ້ອນ ສະນັ້ນລະຄົນຈີນຈຶ່ງມັກມື້ອາກາດທີ່ທ້ອງຟ້າແຈ່ມໃສປອດໂປ່ງ ມີແສງແດດ ບັດນີ້ຄັນເວົ້າເຖິງສີທີ່ເປັນຕົວແທນຂອງແສງແດດ ຄວາມອົບອຸ່ນກໍແມ່ນ ສີແດງໂລດແລ້ວເນາະ ! ນອກນັ້ນໃນທາດທັງ 5 ທີ່ປະກອບດ້ວຍທາດທອງ ທາດໄມ້ ທາດນ້ຳ ທາດໄຟ ແລະທາດດິນ, ສີແດງກໍເປັນສັນຍາລັກໃຫ້ທາດໄຟ ແລະທາດໄຟໃນວັດທະນະທຳຈີນກໍ່ໝາຍເຖິງແສງສະຫວ່າງຄວາມອົບອຸ່ນພະລະກຳລັງ ແລະຄວາມຮຸ່ງເຮືອງເຫຼືອງເຫຼື້ອມຊັ້ນເດ ! ເອົາ, ຟັງເພງອີກຊຸດໜຶ່ງກ່ອນເນາະແລ້ວຈຶ່ງລົມກັນຕໍ່
ເພງ
ຂະນະນີ້.......................ມີຄຳເຫັນກະໂທມາໄດ້ທີ່ເບີ 711477 ຄັນຂໍ້ຄວາມສັ້ນກະແມ່ນ 9300. ບັດນີ້ໜຸ່ມໃຫຍ່ກໍຈະລົມສູ່ຟັງຕໍ່ວ່າສີແດງມີຄວາມສຳຄັນແນວໃດຕໍ່ຄົນຈີນ ? ຄັນເວົ້າແລ້ວສີແດງປຽບເໝືອນຈິດວິນຍານຂອງຄົນຈີນເລີຍລະແລະຢູ່ຮ່ວມກັບວັດທະນະທຳປະເພນີຈີນມາຫຼາຍພັນປີແລ້ວ ! ນອກຈາກເປັນສີແຮ່ງສິຣິມຸງຄຸນແລ້ວຄົນຈີນກໍຍັງຂະຫຍາຍຄວາມອອກໄປຕື່ມວ່າ ສີແດງໝາຍເຖີງຄວາມຮັກນ້ຳໃຈ ອຳນາດບາລະມີ ຄວາມກ້າຫານແລະອື່ນໆອີກ. ສິ່ງໜຶ່ງມທີ່ຄວນຮູ້ໄວ້ກໍຄືສີສາມາດໃຊ້ແທນພາສາໄດ້ ໃຊ້ສື່ສານກັນໄດ້, ສະນັ້ນຄົນເຮົາຈະໃຊ້ສີຫຍັງ ? ໃຫ້ເຂົ້າກັບເລື່ອງລາວເຫດການໃດ ? ມັນກໍຕ້ອງໄດ້ຄິດຫາເຫດຫາຜົນທີ່ເໝາະສົມ ຫຼື ທີ່ມາຂອງສິ່ງນັ້ນໆ ເພື່ອໃຫ້ການສື່ສານເຂົ້າໃຈກັນເດ ! ຮ່ອງເຕ້ສະໄໝກ່ອນທີ່ໃຊ້ນ້ຳມຶກປະທັບຕາ ກໍແມ່ນສີແດງ ເພາະຖືວ່າເປັນສີແຫ່ງຄວາມເຊື່ອໝັ້ນແລະພະລັງອຳນາດ, ໂດຍສະເພາະນັບແຕ່ຫຼັງສັດຕະວັດທີ 19 ເປັນຕົ້ນມາ ຈີນກໍໃຊ້ສີແດງເປັນສັນຍາລັກແຫ່ງເລືອດຮັກຊາດ ແລະ ການປະຕິບັດ ສະນັ້ນສີແດງຈຶ່ງເປັນສີຂອງທຸງທະຫານ ທຸງຊາດ ທຸງພັກຄອມມູນິດ ຫຼື ໜ່ວຍປ້ອງກັນແດງແລະອື່ນໆອີກ !
ເມື່ອຮອດກຸດຈີນກໍຄືເວົ້າມາຫັນລະວ່າເຄື່ຶອງນຸ່ງ ເຄື່ອງປະດັບຂອງຂັວນ ເຄື່ອງໃຊ້ສອຍໃນງານບຸນທຸກອັນເກືອບວ່າເປັນສີແດງໝົດ ນັ້ນຍ້ອນວ່າສີແດງເປັນສີແຫ່ງໄຟ ສີແຫ່ງແສງສະຫ່ວາງ ຄົນຈີນຈຶ່ງເຊື່ອວ່າເປັນສີແຫ່ງພະລັງອຳນາດໃນການຂັບໄລ່ສິ່ງທີ່ບໍ່ເປັນມຸງຄຸນ ຜີມານທັງຫຼາຍໃຫ້ອອກໄປ ດັ່ງນັ້ນເຮືອນທີ່ຕິດສີແດງນຸ່ງເຄື່ອງສີແດງຫຼືເດັກນ້ອຍຜູ້ບ່າວ-ຜູ້ສາວ ທີ່ມີຊອງອັ່ງເປົ່າແດງຕິດຕົວ ຈຶ່ງສາມາດປອດໄພຈາກເຫດຮ້າຍທັງປວງ ແລະດ້ວຍເຫດຜົນດຽວກັນນິລະ ສີແດງຈຶ່ງກາຍເປັນສີທີ່ມີຄວາມໝາຍແຫ່ງຄວາມສັກສິດອີກ; ໂດຍຈະເຫັນຕາມວັດວາອາຮາມ ລາຊະວັງ ຕຶກອາຄານ ເຮືອນຊານບ້ານຊ່ອງສະໄໝບູຮານຂອງຈີນກໍ່ຈະມີເສົາ ຫຼັງຄາ ຫຼືວ່າສ່ວນປະກອບຕ່າງໆທີ່ເປັນສີແດງ, ຕົວຢ່າງວ່າກຳແພງຂອງພະລາຊະວັງຫວງຫ້າມ ຫຼືຕຶກຂອງ ທຽນອັນເໝິນ ກໍ່ແມ່ນສີແດງ !
ເພງ
ຂະນະນີ້...................ຄືນນີ້ໜຸ່ມໃຫຍ່ພວມເວົ້າສູ່ຟັງກ່ຽວກັບຄວາມສຳຄັນຂອງສີແດງຕໍ່ກັບຄົນຈີນວັດທະນະທຳຈີນ ໂດຍສະເພາະໃນໂອກາດກຸດຈີນທີ່ໃກ້ຈະມາຮອດນີ້ ! ໃນພິທີກຳ ພິທີການ ກິດຈະກຳຕ່າງໆ ສີແດງກໍຖືກນຳໃຊ້ຫຼາຍຢູ່ຈີນເພື່ອສະແດງເຖິງຄວາມເປັນສິຣິມຸງຄຸນ. ເຊັ່ນ: ເປີດຮ້ານໃໝ່, ບໍລິສັດໃໝ່, ໂຄງການໃໝ່ກໍມັກຈະເຫັນເຈ້ຍສີແດງ, ໂບແດງ, ແຖບຜ້າແດງ, ຜ້າປົກປ້າຍແດງ, ຜ້າປູໂຕະແດງ ໄປຈັ່ງຊັ້ນລະ ຄັນເປັນສະໄໝແຕ່ກີ້ກໍນຸ່ງຊຸດແດງນຳພຸ້ນລະ ! ໃນພິທີແຕ່ງງານຂອງຄົນຈີນແຫ່ງເຫັນສີແດງຫຼາຍ ທັງເປັນສັນຍາລັກຄວາມເປັນສິຣິມຸງຄຸນ ທັງເປັນສັນຍາລັກຄວາມຮັກຂອງຄູ່ບ່າວ-ສາວ ຕົວໜັງສືທີ່ໃຊ້ປະດັບໃນງານ ໝວກດອກໄມ້ ລວມໄປຮອດຄານຫາມເຈົ້າສາວ ເຈ້ຍຫໍ່ຂອງຂັວນແລະອື່ນໆກໍລ້ວນແຕ່ເປັນສີແດງ. ດຽວນີ້ສີແດງເຂົ້າໄປຮອດຕະຫຼາດຫຸ້ນພຸ້ນລະທ່ານຜູ້ຟັງ ! ກະດານຫຸ້ນຂື້ນຫຸ້ນລົງຂອງປະເທດຕາເວັນນຕົກຫຼືໃນຫຼາຍໆປະເທດ ຖ້າເປັນສີແດງໝາຍເຖິງຫຸ້ນໂຕນັ້ນຕົກ ແຕ່ວ່າສຳລັບຈີນແຜ່ນດິນໃຫຍ່ຫຼືໃຕ້ຫວັນ, ຮົງກົງ, ມາເກົາ ຖ້າວ່າຫຸ້ນໂຕນັ້ນເປັນສີແດງ ຊ້ຳພັດໝາຍຄວາມວ່າຫຸ້ນໂຕນັ້ນກຳລັງຂື້ນ ! ສະນັ້ນໃນພາສາຫຸ້ນຂອງຈີນຈຶ່ງມີຄຳວ່າ " ເປີດຕະຫຼາດແດງ " ທີ່ໝາຍເຖິງຫຸ້ນຂື້ນສູງດີຕັ້ງແຕ່ເວລາເປີດຕະຫຼາດ ! ເອົາ, ຟັງເພງມ່ວນໆອີກກ່ອນເນາະ
ເພງ
ຂະນະນີ້................... ຖ້າມີຄຳຄິດເຫັນກໍໂທເຂົ້າມາທີ່ເບີ 711477 ຫຼືຂໍ້ຄວາມສັ້ນກໍແມ່ນ 9300 ເວົ້າເລື່ອງວັດທະນະທຳຂອງຈີນແລ້ວ ຍັງມີອີກຫຼາຍອັນທີ່ປະຍຸກສີແດງອອກໄປໃຊ້ເພື່ອສື່ຄວາມໝາຍຕ່າງໆ ຈະເອົາມາເວົ້າໃຫ້ໝົດແທ້ໆໃນລາຍການບໍ່ຮອດ 1ຊົ່ວໂມງນີ້ເປັນໄປບໍ່ໄດ້ແນ່ນອນທ່ານຜູ້ຟັງ ! ເພາະວ່າສຳລັບຄົນຈີນແລ້ວສີແດງເກືອບຈະກາຍເປັນສີແຫ່ງວັດທະນະທຳໄປແລ້ວ ບາງຄົນກໍຍັງເອີ້ນວ່າ:ວັດທະນະທຳສີແດງ ເພາະວ່າມັນບໍ່ໄດ້ຫຼໍ່ຫຼອມກົມກຽວເປັນອັນດຽວກັນກັບຮູບແບບການດຳລົງຊີວິດຂອງຄົນຈີນທີ່ມີຫຼາກຫຼາຍ ລວມໄປເຖິງພາສາທີ່ໃຊ້ເຊັ່ນຄຳວ່າ: " ຄົນແດງ " ທີ່ໝາຍເຖິງຄົນທີ່ມີຊື່ສຽງໂດ່ງດັງທີ່ໄດ້ຮັບຄວາມນິຍົມຊົມຊອບ. ຫຼືຄຳວ່າ " ດວງແດງ " ກໍມີຄວາມໝາຍວ່າດວງດີ ສ່ວນຄຳວ່າ " ກະດານແດງ " ກໍໃຊ້ເພື່ອຄວາມໝາຍຂອງຊື່ທີ່ມີກຽດຕິຍົດ ແລະ ຄຳເວົ້າອື່ນໆອີກ ! ເອົາ, ກໍຫວັງວ່າຄືນນີ້ມິດລາຍການລາວຄົງຈະເຂົ້າໃຈກ່ຽວກັບຄວາມສຳຄັນຂອງສີແດງຕໍ່ຄົນຈີນວັດທະນະທຳຈີນຂື້ນລະເນາະ ! ເອົາມາເວົ້າສູ່ຟັງກໍໃນໂອກາດທີ່ກຸດຈີນໃກ້ຈະມາຮອດແລ້ວຄືວັນທີ 23 ເດືອນນີ້ເອງ ! ແຕ່ແນວໃດກໍຢ່າເດີ້ ຄົນຈີນທີ່ມາເຮັດທຸລະກິດ, ເຮັດວຽກຫຼືຮ່ຳຮຽນຢູ່ລາວ ຫຼືຄົນລາວເຊື້ອສາຍຈີນ ໝາກກະໂພກສີແດງຫັ້ນຢ່າເອົາມາຈູດເດີ້ ສີຫຍັງເຈົ້າໜ້າທີ່ເພິ່ນກໍບໍ່ໃຫ້ຈູດ ໂດຍສະເພາະໜ່ວຍໃຫຍ່ໆ ສຽງປານປືນປານລະເບີດຫັ້ນນະ !ອັນນີ້ຢູ່ໜີ້ແມ່ນເມືອງລາວ ບໍ່ແມ່ນເມືອງຈີນ ເພິ່ນຫ້າມຈູດເພື່ອຮັກສາຄວາມສະຫງົບປອດໄພ ແລະປ້ອງກັນພວກຄົນບໍ່ດີຈະສວຍໃຊ້ເພື່ອສ້າງຄວາມບໍ່ສະຫງົບໃຫ້ແກ່ສັງຄົມລາວ ! ຢູ່ບ້ານເພິ່ນເມືອງທ່ານຕ້ອງໄດ້ເຄົາລົບປະຕິບັດຕາມມະຕິຄຳສັ່ງລະບຽບກົດໝາຍຂອງເພິ່ນໄດ ! ຄັນໃຜຝ່າຝືນກໍຢູ່ບ້ານເພິ່ນຍາກໄດ !
ເພງ