ອັງເປົ່າປະຈຸບັນ
ສະບາຍດີທ່ານຜູ້ຟັງທຸກໆທ່ານ! ເດືອນໃໝ່ເດືອນເກົ່າກໍພົບກັນຄືເກົ່າກັບລາຍການເບິ່ງເມືອງຈີນຂອງ CRI FM 93Mhz ໃນເວລາ 19 ໂມງຂອງທຸກມື້ບໍ່ໄດ້ຂາດ! ມື້ນີ້ແມ່ນວັນພຸດ, ທີ 1 ກຸມພາ 2012, ຄັນແມ່ນເດືອນລາວປະຕິທິນລາວກໍ່ແມ່ນມື້ຂື້ນ 9 ຄ່ຳ ເດືອນ 3 ລະໄດ໋ນິ! ແຕ່ວ່າສຳລັບໄລຍະຫຼິ້ນບຸນກຸດຈີນຂອງຄົນຈີນຫຼືຄົນລາວເຊື້ອສາຍຈີນກໍຍັງບໍ່ໝົດສິ້ນສຸດແທ້ເທື່ອ! ພຸ້ນລະວັນທີ 6 ວັນຈັນທີ່ຈະມາຮອດພຸ້ນລະຈຶ່ງຈະໝົດແທ້ໆ! ສະນັ້ນໃນໄລຍະນີ້ໜຸ່ມໃຫຍ່ກໍເລີຍຖືເອົາໂອກາດຮີດຄອງປະເພນີບູຮານຕ່າງໆຂອງຄົນຈີນທີ່ກ່ຽວພັນກັບປະເພນີບຸນກຸດຈີນມາເວົ້າສູ່ຟັງເພື່ອທ່ານຜູ້ຟັງລາວຈະໄດ້ຮູ້ປະເພນີກຸດຈີນຫຼາຍຂື້ນ! ໄລຍະບຸນກຸດຈີນນີ້ຜູ້ທີ່ໜ້າບານທີ່ສຸດກໍແມ່ນເດັກນ້ອຍຫຼືຜູ້ບ່າວຜູ້ສາວນິລະ ເພາະວ່າໄດ້ຊອງອັ່ງເປົ່າສີແດງຫຼາຍເດ! ການໃຫ້ຊອງອັ່ງເປົ່າແກ່ເດັກນ້ອຍ ແກ່ຜູ້ບ່າວ ຜູ້ສາວຈີນຕາມປະເພນີແລ້ວກໍແມ່ນເພື່ອຂັບໄລ່ຜີສາງນາງຮ້າຍ ຄວາມໂຊກບໍ່ດີບໍ່ໃຫ້ມາໄກ້ເຂົາເຈົ້າ, ແລ້ວຄອບຄົວຄົນຈີນກໍມັກເອົາໃຫ້ລູກຫຼານຍາດພີ່ນ້ອງທີ່ຍັງໜຸ່ມຍັງນ້ອຍໃນມື້ສົ່ງທ້າຍປີເກົ່າແລະມື້ທຳອິດຂອງປີໃຫມ່ຫັ້ນລະ! ເອົາ, ຄັນຊັ້ນເພື່ອໃຫ້ເຂົ້າກັບບັນຍາກາດຄືນວັນທີ 1 ກຸມພານີ້ໜຸ່ມໃຫຍ່ຈະເອົາສະພາບການໃຫ້ ແລະ ຮັບຊອງແດງອັ່ງເປົ່າຫຼືຄົນຈີນເອີ້ນວ່າ: " ຢ່າຊຸ້ຍສຽນ " ມາເວົ້າສູ່ຟັງ!
ເພງ
ຜ່ານໄປ 2 ເພງ………………….. 711477 / 9300 ບັດນີ້ເຂົ້າເລື່ອງທີ່ຈະລົມຄືນນີ້ດີກ່ວາ! ຄືເລື່ອງກ່ຽວກັບຊອງອັ່ງເປົ່າແດງໃນໂອກາດບຸນກຸດຈີນທີ່ຜູ້ໃຫຍ່ມັກເອົາໃຫ້ເດັກນ້ອຍຫຼືຜູ້ບ່າວຜູ້ສາວນິລະ! ສຳລັບເດັກແລະບ່າວສາວຈີນແລ້ວ ກຸດຈີນບໍ່ແມ່ນແຕ່ການເຕົ້າໂຮມຄອບຄົວຢູ່ພ້ອມໜ້າພ້ອມຕາທໍ່ນັ້ນໄດ໋໋ ແຕ່ຍັງແມ່ນເວລາທີ່ເຂົາເຈົ້າຄອງຄອຍຢາກໄດ້ເງິນຫຼາຍຈາກຊອງອັ່ງເປົ່າອີກ! ຜູ້ໃຫ້ກໍແມ່ນ ພໍ່-ແມ່, ພໍ່ຕູ້-ແມ່ຕູ້ ລຸງ ປ້າ ນ້າ ບ່າວ ໝູ່ຄູ່ເພື່ອນຝູງຂອງ ພໍ່-ແມ່ໄປຊັ້ນແລ້ວ! ທ້າວ ໂຈ່ວຕຽນ ອາຍຸ 29 ປີ ເຮັດວຽກຢູ່ວິສະຫະກິດແຫ່ງໜຶ່ງຢູ່ປັກກິ່ງບອກວ່າ ປີນີ້ຈ່າຍເງິນໄປແລ້ວ 4000 ຢວນ ປະມານເກືອບ 5 ລ້ານກີບນິລະ: ເພື່ອໃສ່ຊອງອັ່ງເປົ່າໃຫ້ລູກຫຼານ ນ້ອງນຸ່ງ. ລາວຮູ້ສຶກວ່າເງິນທີ່ໃສ່ຊອງອັ່ງເປົ່າໃນ 2-3 ປີມານີ້ກໍຕ້ອງໃສ່ໃຫ້ຫຼາຍຂື້ນໃນປີນີ້ລາວວ່າເອົາອັ່ງເປົ່າໃຫ້ຫຼານສາວແລະລູກເອື້ອຍອ້າຍນ້ອງ ຊອງໜຶ່ງກໍ 600 ຢວນ ປະມານ 7ແສນ ກີບແລ້ວ ເຊີ່ງມັນສູງກ່ວາ 2 ປີຜ່ານມາຕັ້ງວ່າເຄີ່ງໜຶ່ງ. ທັງເປັນຈຳນວນເງິນທີ່ເພີ່ມຂື້ນຫຼາຍກ່ວາເງິນເດືອນຂອງລາວຢ່າງວ່ອງໄວ. ທ້າວ ໂຈ່ວຕຽນ ມາຈາກຄອບຄົວອ່າວມີຢູ່ແຂວງເສສວນ ທາງພາກຕາເວັນຕົກສ່ຽວໃຕ້ຂອງຈີນ, ໃນຄວາມຊົງຈຳຂອງລາວຕອນຍັງນ້ອຍແລ້ວລາວໄດ້ອັ່ງເປົ່າຈາກຜູ້ໃຫຍ່ພຽງແຕ່ຊອງລະ 20 ຢວນ ໃນເວລາລາວຮຽນປະຖົມໃນຊຸມປີ 1990 ຫຼັງຈາກຂື້ນວິທະຍາໄລແລ້ວລາວກໍໄດ້ຊອງອັ່ງເປົ່າປະມານຊອງລະ 200 ຢວນ ພຸ້ນໄດ໋! ແຕ່ວ່າຍ້ອນດຽວນີ້ຄົນຈີນມີລາຍຮັບສູງຂື້ນການເອົາເງິນໃສ່ຊອງອັ່ງເປົ່າໃຫ້ເດັກກໍຫຼາຍຂື້ນໄປນຳ. ທ້າວໂຈ່ວ ວ່າ: ບໍ່ມີທາງເລືອກແລ້ວເພາະວ່າເບິ່ງຄົນທົ່ວໄປກໍຄືໃຫ້ຫຼາຍຄືກັນ ຄັນໃຫ້ໜ້ອຍກ່ວາຜູ້ອື່ນກໍຮູ້ສຶກອາຍເຂົາເຈົ້າວ່າຊັ້ນ! ບັດນີ້ມາຟັງ ທ້າວ ຈາວຈ່ວນ ອາຍຸ 24 ປີ ທີ່ຫາກໍເລີ່ມເຮັດວຽກໃນອົງການສື່ມວນຊົນຢູ່ປັກກິ່ງໃນເດືອນຕຸລາປີກາຍນີ້ ເບິ່ງລາວຮູ້ສຶກແນວໃດຕໍ່ເລື່ອງນີ້? ລາວວ່າເງິນທີ່ກຽມໃສ່ຊອງອັ່ງເປົ່າເກືອບເຮັດໃຫ້ລາວໝົດຕົວ ເພາະວ່າເງິນເດືອນລາວກໍມີແຕ່ 4000 ຢວນ, ໃນຫັ້ນຍັງຈ່າຍຄ່າເຊົ່າເຮືອນເດືອນລະ 1000ປາຍຢວນອີກ. ບ້ານເກີດຂອງ ທ້າວ ຈາວຈ່ວນ ຢູ່ຈຸ່ງກິ່ງ ປີນີ້ຄົນທົ່ວໄປມັກໃສ່ຊອງອັ່ງເປົ່າຕ່ຳສຸດ 500 ຢວນ ຊ່ຳໆກັບຢູ່ປັກກິງຫັ້ນລະ! ລາວວ່າລາວມີລູກຫຼານຫຼາຍຄົນຕ້ອງໄດ້ຈ່າຍເງິນທີ່ສະສົມໄວ້ຈົນໝົດວ່າຊັ້ນ! ຟັງລະເປັນຕາອີຕົນເນາະທ່ານຜູ້ຟັງ! ຄົນແຮ່ງເຮັດການໃໝ່! ປານຄົນລາວໃສ່ຊອງດອງໄລຍະນີ້ນິລະເນາະ! ບາງທ້າຍອາທິດຜູ້ດຽວ 5-6 ຊອງ ຫຼືເກືອບ 10 ຊອງກະມີ! ໜ້າມືດແທ້ໄດເນາະ! ຊ້ຳພັດແມ່ນຍາດພີ່ນ້ອງໝູ່ຄູ່ມິດສະຫາຍອີກ! ຟັງເພງກ່ອນເນາະ!
ເພງ
ມື້ກີ້ຊາວໜຸ່ມຜູ້ສະໝັກໃຈກັບຊອງອັງເປົ່າແດງໃນໂອກາດປີໃໝ່ກຸດຈີນໄປແລ້ວຈຳນວນໜຶ່ງ, ບັດນີ້ມາຟັງຕໍ່ຢູ່ຈີນປະເພນີບາງບ່ອນເດັກນ້ອຍຊາວໜຸ່ມຈະບໍ່ໄດ້ຮັບຊອງອັ່ງເປົ່າໃນຕອນທີ່ເຂົາເຈົ້າຈົບ ມຊ ຫຼືເລີ່ມເຮັດວຽກແລ້ວ! ຈາກຜູ້ຮັບກາຍເປັນຜູ້ໃຫ້ໄດບາດນິນະ! ແຕ່ວ່າຢູ່ບາງຄອບຄົວຫຼືບາງບ່ອນຊາວໜຸ່ມຈີນຈະສືບຕໍ່ໄດ້ຮັບຊອງອັ່ງເປົ່າຈົນກ່ວາຮອດມື້ເຂົາເຈົ້າແຕ່ງງານພຸ້ນລະ! ອາຍຸຊ່ຳໃດຂໍແຕ່ຍັງເປັນໂສດກໍຍັງໄດ້ຮັບຊອງອັ່ງເປົ່າຢູ່ວ່າຊັ້ນສະ! ບັນຫາມັນກໍມີຢູ່ວ່າຜູ້ທີ່ມີລາຍຮັບຕ່ຳກ່ວາໜັກໃຈກ່ຽວກັບເລື່ອງນີ້ແລ້ວບາດນີ້ ບາງຄົນຈົນພະຍາຍາມຫຼີກບໍ່ໄປພົບປະສັງສັນມີແຕ່ລີ້ຢູ່ເຮືອນຕົວເອງ ເພາະວ່າຄັນໄປຢາມໝູ່ຄູ່ຍາດຕິພີ່ນ້ອງກໍຕ້ອງໄດ້ແຈກຊອງອັ່ງເປົ່າໃຫ້ລູກໃຫ້ຫຼານເຂົາເຈົ້າເດ໋! ບາງຄົນກໍຫຼຸດການໄປຢ້ຽມຢາມໝູ່ຄູ່ລົງຫຼືບາງຄົນຈົນບໍ່ເມືອຢາມບ້ານເກີດຕາມປະເພນີໃນໂອກາດບຸນກຸດຈີນເລີຍ ຍ້ອນຫຼີກການເອົາເງິນໃສ່ຊອງອັ່ງເປົ່ານິລະ! ໜັງສືພິມຈຸ່ງກິ່ງຍາມແລງລາຍງານຂ່າວໜຶ່ງວ່າ: ມີຜູ້ຍິງຜູ້ໜຶ່ງນາມສະກຸນ ຫວາງ ບໍ່ກັບບ້ານເກີດແຕ່ເລືອກໄປທ່ຽວຢູນນານດີກ່ວາ ເພື່ອຫຼີກການໃຊ້ຈ່າຍເງິນໃນຊອງອັ່ງເປົ່າ, ລາວວ່າ: ມີແຕ່ໂທລະສັບໄປອວຍພອນພໍ່ແມ່ ຍາດພີ່ນ້ອງ ໝູ່ເພື່ອນຢູ່ບ້ານເກີດກໍໄດ້ແລ້ວ! ລາວວ່າໄປທ່ຽວຢູນນານເທື່ອນີ້ໃຊ້ຈ່າຍໄປປະມານ 4000 ຢວນ ກໍປະມານເກືອບ 5ລ້ານກີບ ເງິນນີ້ທໍ່ກັບເງິນໃສ່ຊອງໃຫ້ເດັກນ້ອຍຊາວໜຸ່ມຢູ່ບ້ານເກີດໃນບຸນກຸດຈີນປີກາຍນີ້ ແຕ່ວ່າໄປທ່ຽວຢູນນານປີນີ້ມີປະໂຫຍດ ມ່ວນ ແລະ ກຸ້ມຄ່າກ່ວາ! ວ່າຊັ້ນ! ໄປຢູນານໄປໃສນໍ້? ປ່າຫີນບໍ່? ຫຼືວ່າໄປເມືອງຮຸ້ຍລີ້ ເມືອງແຫ່ງຍົກແທ້ຊາຍແດນຈີນ-ມຽນມາບໍ່? ຫຼືວ່າໄປຊຽງຮຸ່ງ 12 ພັນນານໍ້! ຫຼືວ່າລົງມາຊາຍແດນລາວ-ຈີນ ພີ້ບໍ່? ອັນນີ້ແມ່ນຄວາມກັງວົນຂອງຜູ້ໃຫຍ່, ຈັກໜ້ອຍຟັງເພງແລ້ວຈະເວົ້າເລື່ອງຄວາມກັງວົນຂອງເດັກນ້ອຍຕໍ່ອັ່ງເປົ່າສູ່ຟັງ!
ເພງ
ຂະນະນີ້……….. 19-19:50 50ນາທີ. ມີຄຳເຫັນຫຼືຢາກຟັງເລື່ອງຈີນ 711411/ 9300 ບັດນີ້ຈະລົມສູ່ຟັງກ່ຽວກັບເດັກນ້ອຍຫຼືວ່າຜູ້ບ່າວ-ຜູ້ສາວຈີນ ທີ່ໄດ້ຊອງອັ່ງເປົ່າຫຼາຍໃນໄລຍະກຸດຈີນ, ໂດຍສະເພາະແມ່ນເດັກນ້ອຍນິລະ! ບໍ່ວ່າຄອບຄົວໃດໃນໄລຍະກຸດຈີນ ສ່ວນຫຼາຍເງິນຈາກຊອງອັ່ງເປົ່າກໍຢູ່ໃນກຳມືຂອງເດັກນ້ອຍຊາວໜຸ່ມນິລະ ກ່ອນທີ່ພໍ່-ແມ່ ຈະທ້ອນໂຮມຮັກສາໄວ້ໃຫ້ເພື່ອຄວາມປອດໄພ. ພໍ່ແມ່ບາງຄົນກໍມີແຜນການຮັກສາເງິນຂອງລູກໄດ້ດີໄດ໋, ພໍ່ຜູ້ໜຶ່ງທີ່ມີນາມສະກຸນ ເຫີ ຢູ່ປັກກິ່ງ, ເປັນພໍ່ຂອງລູກຫາກໍ່ 2 ປີ ບອກໜັງສືພິມ Global Times ທີ່ເປັນໜັງສືພິມພາສາອັງກິດຂອງຈີນບອກວ່າ: ລາວເປີດບັນຊີທະນາຄານໃຫ້ລູກເພື່ອເກັບຮັກສາເງິນຈາກຊອງອັ່ງເປົ່າ ຫຼື ໄດ້ຈາກໂອກາດຕ່າງໆໄວ້ໃຫ້ລູກ ນັບແຕ່ລາວເກີດມາພຸ້ນລະ ແລະ ຈະທ້ອນໃຫ້ລູກຕໍ່ໆໄປ. ລາວວ່າປີໃໝ່ 2 ປີ ມານີ້ລູກລາວໄດ້ເງິນຈາກຊອງອັ່ງເປົ່າຫຼາຍກ່ວາ 40.000 ຢວນແລ້ວ, ໂອ່! ເກືອບ 50 ລ້ານກີບລະເດນິ! ລາວວ່າຊອງອັ່ງເປົ່າທີ່ລູກຊາຍໄດ້ຮັບກໍມີແຕ່ 200 ຢວນ ຂື້ນໄປຈົນຮອດ 1000 ຢວນກໍມີ, ລາວຈະເອົາເງິນນີ້ຮັກສາໄວ້ຈ່າຍໃນເວລາຈົດທະບຽນເຂົ້າໂຮງຮຽນອະນຸບານແລະເວລາທີ່ລູກຊາຍໃຫຍ່ຂື້ນມາ ກໍຈະສອນໃຫ້ລູກຮູ້ໃຊ້ເງິນທີ່ຖືກຕ້ອງຮູ້ຄຸນຄ່າຂອງເງິນ ລວມທັງຈະສອນລູກວ່າຈະຈ່າຍເງິນແນວໃດເພື່ອ shopping ທັງຈະຊຸກຍູ້ໃຫ້ລູກມັກບໍລິຈາກເພື່ອສັງຄົມແລະຜູ້ທີ່ດ້ອຍໂອກາດກ່ວາ ອື່, ຟັງແລ້ວເປັນພໍ່ທີ່ມີແນວຄິດດີຫຼາຍຢາກໃຫ້ພໍ່-ແມ່ ທຸກຄູ່ເປັນແນວນີ້ເດເນາະ ສັງຄົມຈຶ່ງຈະມີແຕ່ຄວາມອົບອຸ່ນ ເອື້ອເຟື້ອເພື່ອແຜ່ ບໍ່ເປັນສັງຄົມທີ່ເຫັນແກ່ຕົວ ເບິ່ງຕ່ຳຜູ້ດ້ອຍກ່ວາໂຕຫຼືບໍ່ເປັນສັງຄົມທີ່ບ້າວັດຖຸນິຍົມ ຈົນເກີດການຈຳແນກກັນໃນສັງຄົມ. ຟັງເພງກ່ອນແລ້ວຈັ່ງມາຟັງ ພໍ່-ແມ່ ຜູ້ອື່ນວ່າຈັດການກັບເງິນຈາກຊອງອັ່ງເປົ່າຂອງລູກໃນໂອກາດບຸນກຸດຈີນແນວໃດ?
ເພງ
ຂໍຂອບໃຈ…………….. ຄືນນີ້ໜຸ່ມໃຫຍ່ພວມລົມສູ່ຟັງກ່ຽວກັບຊອງອັ່ງເປົ່າແດງທີ່ເດັກນ້ອຍຊາວໜຸ່ມຈີນໄດ້ຮັບໃນໂອກາດບຸນກຸດຈີນ! ພໍ່-ແມ່ຈີນບາງຄົນກໍອະນຸຍາດໃຫ້ລູກໃຊ້ເງິນທີ່ໄດ້ຈາກຊອງອັ່ງເປົ່າເລີຍກໍມີໄດ໋! ເງິນລູກກະໃຫ້ລູກຈ່າຍວ່າຊັ້ນ! ເຮັດແນວນີ້ລະວັງລູກຈະໄປຈ່າຍຊະຊາຍແຕ່ນ້ອຍເດີ! ບັນຫາທີ່ເກີດຂື້ນຢູ່ຈີນດຽວນີ້ກໍແມ່ນເລື່ອງການເອົາຂອງຂັວນທີ່ເປັນເງິນຫຼາຍຂື້ນໃຫ້ກັນນິລະ! ຢູ່ໃນລາຍການທີ່ລົມກັນຂອງໂທລະພາບຊຽງໄຮ ທີ່ລົມກັບເດັກນ້ອຍເລື່ອງຊອງອັ່ງເປົ່າປິິນີ້, ເດັກນ້ອຍຈຳນວນໜຶ່ງບອກວ່າປີນີ້ໄດ້ເງິນຈາກຊອງອັ່ງເປົ່າຫຼາຍກ່ວາ 8 ໝື່ນຢວນກໍມີ! ບາງຄົນກໍວ່າໄດ້ແຕ່ 2 ພັນຢວນ ລະກະບໍ່ສົນໃຈວ່າໄດ້ຫຼາຍຫຼືໜ້ອຍ! ແຕ່ວ່າການປຽບທຽບການໄດ້ເງິນຈາກຊອງອັ່ງເປົ່າຜູ້ໄດ້ຫຼາຍຜູ້ໄດ້ໜ້ອຍ ເປັນເລື່ອງທີ່ບໍ່ຄ່ອຍດີສຳລັບເດັກ. ທ່ານ ຊ່ອງ ຫັ່ນຈົ່ງ ຫົວໜ້າສູນແກ້ໄຂຄວາມກົດດັນຂອງຊາວໜຸ່ມປັກກິ່ງ ຂອງມະຫາວິທະຍາໄລປັກກິ່ງບອກວ່າ: ພໍ່-ແມ່ ຄວນແນະນຳໃຫ້ລູກເຂົ້າໃຈເຖິງເງິນທີ່ໄດ້ແລະຄວາມໝາຍທີ່ດີທີ່ຢູ່ເບື້ອງຫຼັງຂອງເງິນນັ້ນຕາມປະເພນີການເຊື່ອຖືຂອງຈີນ! ເນັ້ນຄວາມໝາຍຂອງການໃຫ້ບໍ່ແມ່ນຈະປ່ອຍໃຫ້ລູກແລ່ນນຳເງິນ ແລະ ຢາກໄດ້ແຕ່ເງິນຫຼາຍໆ ທ່ານ ໂຈ່ວ ສຽວເຊີ່ງ ນັກຈິດຕະວິທະຍາຂອງວິທະຍາໄລປະຊາຊົນຈີນເຊື່ອວ່າ: ກິດຈະກຳໃຫ້ເງິນຫຼາຍໆແກ່ເດັກເປັນການປູພື້ນຖານໃຫ້ເກີດບັນຫາທາງສັງຄົມຢູ່ຈີນຫຼາຍຂື້ນມັກເງິນ ໜ້າເງິນ ກໍຕ້ອງເປັນຄົນເຫັນແກ່ຕົວເປັນຂອງທຳມະດາ ທ່ານ ໂຈ່ວ ຍັງເປັນຫ່ວງອີກກ່ຽວກັບຊ່ອງວ່າງລະຫ່ວາງຄວາມຮັ່ງກັບຄວາມທຸກທີ່ສະແດງອອກໃນຊອງອັ່ງເປົ່າທີ່ເດັກໄດ້ຮັບທີ່ແຕກຕ່າງກັນ! ທ່ານ ໂຈ່ວ ກໍ່ຝາກຂໍ້ຄິດໄວ້ອີກໄດ໋ວ່າ: ໃນຂະນະທີ່ເດັກນ້ອຍລຸ້ນທີ 2 ທີ 3 ຂອງປະເທດຈີນໃນຄອບຄົວຮັ່ງມີທີ່ໄດ້ຮັບຊອງອັ່ງເປົ່າເປັນກ້ອນໃຫຍ່ຈາກຜູ້ໃຫຍ່ນັ້ນ ກໍບໍ່ຄວນລືມວ່າ ຄົນຈີນອີກຫຼາຍລ້ານຄົນຍັງດຳລົງຊີວິດຢູ່ຢ່າງທຸກຍາກປາກໝອງຢູກໍ່ມີ.
ເພງ
