ສີລະປະມວຍລາຍລາວສືບທອດແຕ່ອາດີດຮອດປັດຈຸບັນ
ຖ້າເມື່ອເວົ້າເຖິງສີລະປະມວຍລາຍລາວ ຫຼາຍທ່ານກໍຄົງຈະຮູ້ແລ້ວຕິເນາະ, ໂດຍສະເພາະຄົນຮຸ້ນໃໝ່ກໍອາດຈະເຄີຍໄດ້ເຫັນໃນງານກິລາຊີເກມຄັ້ງທີ່ 25 ທີ່ລາວເປັນເຈົ້າພາບ ໃນປີ 2009 ໄດ້ມີການສະແດງຢ່າງຄຶກຄື້ນ, ໃນໂອກາດງານມະຫາກິກຳກິລາແຫ່ງຊາດຄັ້ງທີ 9 ທີ່ແຂວງຫຼວງພະບາງນີ້ກໍໄດ້ມີການຈັດເຂົ້າໃນການສະແດງເຊັ່ນກັນ, ສະນັ້ນຈຶ່ງໄດ້ນຳເອົາຂໍ້ມູນເບື້ອງຫຼັງມາໃຫ້ບັນດາທ່ານຮັບຮູ້ນຳກັນ.
ສີລະປະການສະແດງມວຍລາຍລາວໃນງານຫຼວງພະບາງເກມນີ້ປະດິດໂດຍ ທ່ານ ຂັນທະລີ ໂພທິລານ ແລະສະແດງໂດຍ ນັກຮຽນຊາຍຈຳນວນ 400 ຄົນ. ສີລະປະມວຍລາຍລາວແມ່ນວິຊາການຕໍ່ສູ້ປ້ອງກັນຕົວດ້ວຍມືເປົ່າຂອງຄົນບູຮານລາວ, ບັນພະບຸລຸດລາວທຸກຍຸກ ທຸກສະໄໝ ໄດ້ນຳໃຊ້ວິຊາມວຍລາຍລາວເຂົ້າໃນການຝຶກແບບປະກອບອາວຸດບູ ຮານຄື: ງ້າວ, ຫຼາວ ເພື່ອປ້ອງກັນຕົວແລະປົກປັກສາເຂດນ້ຳແດນດິນຂອງຊາດລາວໄວ້.
ທ່າທາງ - ລີລາ ໃນການສະແດງທັງໝົດນີ້ແມ່ນມີຕົ້ນກຳເນີດຢູ່ແຂວງຫຼວງພະບາງ, ເປັນຕຳລາຕົ້ນສະບັບຂອງອາຈານ ວັນເພງ ເພຍພົນອາສາ, ບ້ານພັນຫຼວງເພີ່ນໄດ້ຖ່າຍທອດໃຫ້ເລົ່າລູກສິດທັງຫຼາຍຈຳນວນ 10.000 ຄົນລະຫວ່າງປີ ຄ.ສ 1865 – 1951.
ໃນນັ້ນຄື: ມີລຸງທິດແພງ, ບ້ານພັນຫຼວງ, ລຸງຈານພັນ ບ້ານວັດແສນ, ລຸງທິດຜຸຍ ອຸໄຮ ບ້ານຫຼັກຄຳ ແລະລຸງອອ່ນຈັນ ສຸຂະພົນ ບ້ານ ວັດທາດ. ຜູ້ຖ່າຍທອດສືບຕໍ່ກັນມາຄື: ອາຈານສີສຸພັນ ວັນຮະຈິດ ບ້ານວັດແສນເປັນຜູ້ບັນທຶກຕຳລາມວຍລາຍລາວຄືນ, ຖ່າຍທອດໃຫ້ອາຈານສິງຄຳ ພົງປະຈິດ ແລ້ວນຳເຂົ້າໄປສອນຢູ່ວິທະຍາໄລຄູພາລະສຶກສາທີ່ວຽງຈັນຢ່າງເປັນທາງການແຕ່ປີ 1978 ເປັນຕົ້ນມາເຖິງປັດຈຸບັນ.
