ພະຍາດທີ່ເປັນໃນຍາມໜາວຕ້ອງປົວໃນຍາມຮ້ອນ
ແພດສາດພື້ນເມືອງຈີນຖືວ່າພະຍາດທີ່ເປັນໃນຍາມໜາວນັ້ນຕ້ອງປົວໃນຍາມຮ້ອນ, ນີ້ແມ່ນວິທີປິ່ນປົວທີ່ມີຈຸດພິເສດຂອງແພດສາດຈີນຄືພະຍາດບາງຢ່າງທີ່ມັກເປັນຫຼືໜັກເຂົ້າໃນຍາມໜາວນັ້ນ,ຕ້ອງປົວໃນເວລາອາການພະຍາດຜ່ອນຄາຍລົງແດ່ໃນຍາມຮ້ອນ,ໃຊ້ວິທີປິ່ນປົວບາງຢາງ,ເພື່ອປ້ອງກັນບໍ່ໃຫ້ມັນເປັນຄືນໃນຍາມໜາວຫຼືຜ່ອນຄາຍອາການໃນເວລາພະຍາດກຳເລີບ.
ການປິ່ນປົວພະຍາດແບບນີ້ແມ່ນອີງໃສ່ຫັຼກມູນຂອງແພດສາດຈີນ. ແພດສາດຈີນຖືວ່າ,ໃນຮ່າງກາຍຂອງຄົນ,ມີອາຍລົບແລະອາຍບວກ,ມີແຕ່ອາຍສອງຢ່າງນີ້ດີສະໝໍ່າສະເໝີກັນ,ຄົນເຮົາຈຶ່ງຈະມີສຸຂະພາບແຂງແຮງ. ຍາມຮ້ອນແມ່ນຍາມທີ່ອາຍບວກແຮງ,ສ່ວນຍາມໜາວພັດແມ່ນຍາມທີ່ອາຍລົບແຮງກວ່າ,ສະນັ້ນພະຍາດບາງຢາງທີ່ເປັນໃນຍາມໜາວມາຮອດຍາມຮ້ອນພັດຮູ້ສຶກໄຄແດ່,ກໍ່ແມ່ນຍ້ອນອາຍລົບໃນຮ່າງກາຍຖືກອາຍຮ້ອນເຕັງລົງ. ຖ້າຖືເວລາຍາມຮ້ອນ ອາຍບວກໃນຮ່າງກາຍແຮງແລ້ວ,ໃຊ້ຢາມາປັບໃຫ້ອາຍບວກກັບອາຍລົບໃນຮ່າງກາຍໃຫ້ສຳໝ່ຳສະເໝີກັນກໍ່ສາມາດເຮັດໃຫ້ພະຍາດຫາຍໄປໄດ້. ນອກນີ້ ໃນຍາມຮ້ອນເຫື່ອອອກຫຼາຍ,ຈຸດປັກເຂັມແລະເສັ້ນເລືອດລົມໃນຮ່າງກາຍກໍ່ແຮ່ງສະດຸ້ງໄວ. ການເລືອກເອົາຍາມນີ້ປົວດ້ວຍວິທີຕິດຢາງກາວ,ພອກຢາຈີນຫຼືປັກເຂັມຮ່າງກາຍຈະຮັບເອົາລິດຢາໄດ້ດີກວ່າ. ທ່ານໝໍ ຫຼີກົວະຊິນ ຫົວໜ້າພະແນກລະບົບຫາຍໃຈຂອງໂຮງໝໍແພດສາດຈີນກວາງອ່ານເມິນປັກກິ່ງແນະນຳວ່າ: "ຍາມຮ້ອນປົວພະຍາດຍາມໜາວສາມາດຍົກພູມຕ້ານທານຂອງຮ່າງກາຍໃຫ້ສູງຂື້ນໄດ້,ເມື່ອປົວແບບນີ້ແລ້ວ,ອັດຕາພະຍາດເປັນຄືນຈະຫຼຸດລົງປະມານ 80%"
ຈະປົວພະຍາດຍາມໜາວຕ້ອງເລືອກຍາມທີ່ຮ້ອນທີ່ສຸດໃນປີໜຶ່ງ.ໃນໄລຍະນີ້,ຕ້ອງປົວສາມເທື່ອ,ແຕ່ລະເທື່ອບາກັນ 7ມື້ຮອດ 10ມື້,ຍຶດໝັ້ນປົວແບບນີ້ສາມປີລຽນຕິດ.ວິທີປິ່ນປົວແມ່ນປ່ຽນແປງຕາມອາການພະຍາດ,ສຳຄັນແມ່ນຕິດຢາຈີນແລະປັກເຂັມ,ບາງທີນາຍໝໍກໍ່ຈະໃຫ້ຄົນເຈັບກິນຢາບາງຢາງແຕ່ກໍ່ບໍ່ແມ່ນພະຍາດທຸກຊະນິດທີ່ມັກເປັນໃນຍາມໜາວ,ຈະປົວໃນຍາມຮ້ອນໄດ້ໝົດ. ປັດຈຸບັນ,ວິທີນິ້ສ່ວນຫຼາຍແມ່ນໃຊ້ໃນການປົວພະຍາດລະບົບຫາຍໃຈເຊັ່ນ:ພະຍາດເປັນຫືດ,ປະດົງຄໍ່ແລະດັງອັກເສບເປັນຕົ້ນ,ໄດ້ຮັບຜົນຢ່າງເດັ່ນຊັດແລະຖາວອນ. ຕໍ່ໄປນີ້ພວກເຮົາຂໍຍົກຕົວຢ່າງ ປົວພະຍາດເປັນຫືດໃນຍາມຮ້ອນແມ່ນປົວແນວໃດ.
ພະຍາດຫືດແມ່ນພະຍາດຫຼອດລົມຫາຍໃຈຊຳເຮື້ອຊະນິດໜຶ່ງ,ເມື່ອຄົນເຈັບຖືກອາກາດພາຍນອກກະຕຸກຫຼືເປັນຫວັດ,ຫຼອດລົມຫາຍໃຈກໍ່ຈະອັກເສບ,ບວມ, ຕີບເຂົ້າ,ແລະພາໃຫ້ຫາຍໃຈຝືດ. ທ່ານຕູ້ເຄີ້ເຊິ່ງ ປີນີ້ອາຍຸ 40 ປີ,ກໍ່ເປັນຫືດ,ທ່ານແນະນຳໃຫ້ນັກຂ່າວຮູ້ວ່າ
ແຕ່ກ່ອນ,ຖ້າຂ້າພະເຈົ້າເປັນຫວັດເທື່ອໃດກໍ່ຫາຍໃຈຟືດໂລດ,ໃນເວລາຫາຍໃຈ,ທ້ອງເບັງຫຼາຍ,ໃນຮູຄໍຄືວ່າເອົາຫຍັງມາຍັດໃສ່,ຫາຍໃຈຍາກຫຼາຍຢູ່ຍາກທີ່ສຸດມີຄວາມຣູ້ສຶກຄືວ່າໃກ້ຈະຕາຍນີ້ແຫຼະ.
ວິທີປົວພະຍາດຫືດໃນຍາມຮ້ອນສຳຄັນແມ່ນຕິດຢາຈີນ,ນາຍໜໍຈະໃຊ້ຫວ້ານຢາຈີນຂ້ຽວເປັນຢາງກາວຕິດໃສ່ຕາມຮູປັກເຂັມ 6 ບ່ອນ ຢູ່ຫຼັງຄົນເຈັບບັດນັ້ນຄົນເຈັບກໍ່ຈະມີຄຄວາມຮູ້ສຶກຄັນຄາຍ,ຢູ່ບ່ອນຕິດຢາ,ບາງຄົນອາດຈະມີປະກົດການແດງແລະບວມເປັນຕົ້ນ,ທັງໝົດເຫົ່ຼານີ້ລ້ວນແຕ່ແມ່ນອາການປົກກະຕິ. ຕິດຢາຈີນແຕ່ລະເທື່ອຕ້ອງຕິດ 3 ຊົ່ວໂມງຮອດ 10 ຊົ່ວໂມງ,ໃນໄລຍະຕິດຢາຕ້ອງຄະລຳອາຫານທະເລ,ເຄື່ອງດື່ມເຢັນ,ອາຫານເຜັດແລະຊີ້ນມັນເປັນຕົ້ນ.
ເມື່ອທ່ານຕູ້ເຄີ້ເຊິ່ງໄດ້ປົວໄລຍະໜຶ່ງແລ້ວ,ຄືປົວໃນຍາມຮ້ອນ 3 ປີ ອາການກໍທຸເລົາລົງຫຼາຍທີ່ສຸດ.ທ່ານເວົ້າວ່າ:
"ເມື່ອຕິດຢາຈີນນີ້ແລ້ວ,ໃນສາມປີມານີ້ ຂ້າພະເຈົ້າຮູ້ສຶກດີເຕີບ. ແຕ່ກ່ອນແລ່ນບໍ່ຮອດ 10,20 ແມັດກໍ່ບໍ່ໄຫວແລ້ວຄືໃຈສິຂາດດຽວນີ້ໄຄແລ້ວ,ຍັງເຮັດວຽກໜັກບາງຢ່າງໄດ້,ຫິ້ຼນກິລາບາງຢ່າງກໍ່ໄດ້, ນັບວ່າເປັນປົກກະຕິແລ້ວ"
ມີຂໍ້ໜຶ່ງຕ້ອງອະທິບາຍພິເສດຄື,ຢາທີ່ຕິດສຳລັບປົວເປັນຫືດນັ້ນ,ແພດຈີນຈະແບ່ງອອກເປັນຫຼາຍປະເພດຕ່າງກັນ,ອາການຕ່າງກັນ,ຕ້ອງໃຊ້ຕຳລາຢາຕ່າງກັນ. ທ່ານທູຈີ້ນເວີນ ນາຍໝໍແພດສາດຈີນແຂວງຫູໄປເວົ້າວ່າ:"ເວົ້າສຳລັບຜູ້ເປັນຫືດແລ້ວ,ທາດຮ່າງກາຍຕ່າງກັນ,ອາການກໍຕ່າງກັນ,ມູນເຫດທີ່ພາໃຫ້ເປັນພະຍາດຕ່າງກັນແລະອະໄວຍະວະທີ່ຖືກລ່ວງລໍ້າກໍບໍ່ຄືກັນ,ສະນັ້ນ ຈຶ່ງບໍ່ແມ່ນວ່າຢາຊະນິດດຽວ,ຈະໃຊ້ປົວຫືດໄດ້ໝົດຊູ່ຢ່າງ. ຖ້າເຮັດແບບນັ້ນມັນກໍ່ລະເມີດຫຼັກການສັດຈະວິພາກຂອງແພດສາດຈີນ"
ຕາມຊາບວ່າ,ປັດຈຸບັນ, ບັນດາຜູ້ຊ່ຽວຊານດ້ານຢາຈີນແລະແພດສາດຈີນພວມປະສານກັບຄວາມຮູ້ແພດສາດຍຸກປະຈຸບັນ,ຄົ້ນຄົ້ວຢ່າງບໍ່ຢຸດຢັ້ງ,ເພື່ອເປີດກ້ວາງຂອບເຂດໃຊ້ວິທີປິ່ນປົວພະຍາດຍາມໜາວໃນຍາມຮ້ອນ,ແລະເຮັດໃຫ້ໄດ້ຮັບຜົນດີຂື້ນເລື້ອຍໆ
