ການໃຊ້ຄວາມຮຸນແຮງຕໍ່ແມ່ຍິງຈີນ
ສະບາຍດີມິດຮັກແຟນລາຍການເບິ່ງເມືອງຈີນທີ່ຮັກແພງທຸກໆທ່ານ! ພົບກັນອີກຕາມເຄີຍກັບໜຸ່ມໃຫຍ່ອາລົມດີທາງຄື້ນ CRI FM 93Mhz ທຸກຄືນໃນເວລາທີ່ສະບາຍໆແນວນີ້ 19-19:50 ນາທີ! ເປັນຈັ່ງໃດມະນຸດເງິນເດືອນຄືໄທເຮົາເຈົ້າຂ້ອຍໄດ້ພັກ 2 ມື້ແລ້ວຄືຊິມີແຮງເຕີບເນາະ! ມື້ອື່ນກໍ່ເຂົ້າສູ່ໜ້າວຽກໜ້າງານຕໍ່! ເວົ້າວ່າພັກເສົາ-ອາທິດແນວນີ້! ບາງຄົນແຮ່ງວຽກໜັກໄດ໋ເນາະທ່ານຜູ້ຟັງ! ອະນາໄມເຮືອນຊານ ບາງທ່ານກໍ່ສ້ອມແປງ ບາງທ່ານກໍ່ປຸກໃໝ່ເດ໋ ! ຫຼືບາງຄົນກໍ່ມີຮົ້ວມີສວນເດເນາະ! ສະພາບເສດຖະກິດແນວນີ້ເງິນດ້າມຊ້າມເດືອນແນວນີ້ກໍ່ຕ້ອງສ້າງເສດຖະກິດເສີມມັນກໍ່ຈັ່ງຊິຢູ່ລອດ, ຖ້າກິນແຕ່ເງິນເດືອນລ້ວນໆ ຄັນຄອບຄົວໃຫຍ່ບໍ່ໄຫວແທ້ໄດ໋ ຮັດສາຍ ຮັດແອວຈົນທ້ອງກິ່ວກະບໍ່ໄຫວນະຄັນເຮົາບໍ່ມີອາຊີບເສີມນະ! ເອົາ, ທຸກຄົນໃນຄອບຄົວຊ່ວຍກັນ ດຸໝັ່ນ ອົດທົນ ປະຢັດ ແລ້ວຄອບຄົວເຮົາບໍ່ເດືອນຮ້ອນແນ່ນອນ! ອັນໜຶ່ງອີກຂໍນຳຢ່າໄປໃກ້ແທ້ໆອັນເລື່ອງການພະນັນນິ! ເງິນໜ້ອຍຢູ່ແລ້ວແຮ່ງໄປຕິດການພະນັນ ຕິດໄພ້ ຕິດລົງບານ ກາຊີໂນຫຼືແມ່ນຫຍັງກໍແລ້ວແຕ່ລະ ຢ່າໄປຕິດ ຢ່າໄປໃກ້ ຢ່າໄປແອບມັນຊິຫຍ້າມ ຜີການພະນັນມັນແຮງແທ້ໆໄດນິຫຼາຍລາຍແລ້ວທີ່ເສດຖະກິດຫຼົ້ມທຸລະກິດເຈົ້າພັງໝົດຕົວ ຄອບຄົວແຕກແຍກກໍ່ມີ ເຮືອນຫຼັງບັກໃຫຍ່, ລົດບັກຫຼາຍໆຄັນກໍ່ໄດ້ຂາຍໄປໄຊ້ໜີ້ ບາງຄົນຕິດຮອດຄຸກຍ້ອນເອົາເງິນໄປຖິ້ມໃສ່ການພະນັນ ແລ້ວໝູນເງິນເຮັດທຸລະກິດບໍ່ທັນ ທັງໄປຢືມເງິນທະນາຄານ ຢືມເງິນນອກລະບົບອີກໄຊ້ບໍ່ທັນທະນາຄານຫຼືເຈົ້າໜີ້ກໍ່ມາທວງມາຍຶດຊັບຍຶດສິນແລ້ວບໍ່ແມ່ນເວົ້າລອຍລົມໄດ໋ນິ ໜຸ່ມໃຫຍ່ເຫັນຕົວຢ່າງມາກັບຕາ 2-3 ລາຍແລ້ວ ຈາກເສດຖີສຸດທ້າຍເຮືອນຫາຊິຢູ່ກໍ່ບໍ່ມີ! ຢ່າໄປໃຫ້ມັນແທ້ໆການພະນັນນິບໍ່ເຄີຍເຮັດໃຫ້ໃຜລວຍ ມີແຕ່ເຮັດໃຫ້ຈິບຫາຍ. ຄືນວານນີ້ໜຸ່ມໃຫຍ່ເວົ້າເຖິງສະພາບການໃຊ້ຄວາມຮຸນແຮງຕໍ່ຜູ້ຍິງຈີນສູ່ຟັງແລ້ວ ຄືນນີ້ກໍ່ຍັງບໍ່ມົ້ມເລື່ອງກ່ຽວກັບຜູ້ຍິງຈີນຢູ່ດີແຕ່ຊິເປັນເລື່ອງດີສຳລັບຜູ້ຍິງຈີນໂດຍສະເພາະຜູ້ຍິງຈີນທີ່ເຮັດການ ຮ່າງລະບຽບໃໝ່ຈະໃຫ້ພັກການຫຼາຍກ່ວາເກົ່າຈະປົກປ້ອງຜູ້ຍິງຮອບດ້ານກ່ວາເກົ່າ! ຈະປົກປ້ອງແນວໃດນັ້ນຈະໃຫ້ຟັງເພງກ່ອນແລ້ວຈັ່ງວ່າກັນ!
ເພງ
ທີ່ທ່ານພວມຟັງຢູ່ນີ້ແມ່ນລາຍການເບິ່ງເມືອງຈີນຂອງຄື້ນ CRI FM 93Mhz ທີ່ໜຸ່ມໃຫຍ່ອາລົມດີເປັນຜູ້ຈັດ! ຄືນນີ້ວັນອາທິດ, ທີ 27 ພະຈິກແລ້ວ, ອີກ 3 ມື້ເດືອນພະຈິກກໍ່ຈະໜີປະພວກເຮົາແລ້ວໄດ໋ ເພາະວ່າມີແຕ່ 30 ມື້ເດ໋! ເອົາ, ມີວຽກມີງານຫຍັງກໍ່ຂ້ຽວຊຳລະສະສາງທ້າຍປີແລ້ວເດ! ມາເຂົ້າສູ່ເລື່ອງທີ່ຈະມາເວົ້າສູ່ຟັງຄືນນີ້ວ່າຮ່າງລະບຽບໃໝ່ກ່ຽວກັບການປົກປ້ອງແຮງງານຜູ້ຍິງຢູ່ຈີນມີອັນຕ່າງຈາກອັນເກົ່າຄືແນວໃດແດ່? ເພາະວ່າລະບຽບແຮງງານຂອງຈີນສະບັບທີ່ພວມໃຊ້ຢູ່ນີ້ກໍ່ນຳໃຊ້ມາແຕ່ປີ 1988 ພຸ້ນລະ! ຢູ່ຈີນນິບໍ່ວ່າຈະເປັນຂໍ້ກຳນົດກົດລະບຽບກົດໝາຍທີ່ຈະອອກມາໃໝ່ທີ່ພວມເປັນຮ່າງຢູ່ນິເພິ່ນກໍ່ຜ່ານການຄົ້ນຄ້ວາພິຈາລະນາພາກສ່ວນກ່ຽວຂ້ອງຄັກເຕີບ ແລ້ວຍັງບໍ່ແລ້ວໄດ໋ຢູ່ຈີນຍຸກນີ້ຄົນເຂົ້າເຖິງອິນເຕີເນັດໄດ້ກ້ວາງຂວາງຫຼາຍສົມຄວນແລ້ວ ສະນັ້ນເພິ່ນກໍ່ເອົາຮ່າງກົດໝາຍ ຂໍ້ກຳນົດກົດລະບຽບຕ່າງໆຂື້ນເວບໄຊເພື່ອຂໍຄຳເຫັນມວນຊົນທົ່ວໄປເດ! ກະຄືຮ່າງລະບຽບໃໝ່ປົກປ້ອງຜູ້ຍິງຈີນຄືກັນເພິ່ນກໍ່ເອົາຂື້ນເວບໄຊມາວ່າງວັນຈັນຜ່ານມານິລະ! ແລ້ວເພິ່ນຈະປະໄວ້ 1 ເດືອນເພື່ອເຕົ້າໂຮມຄຳເຫັນຂອງມວນຊົນ ເພື່ອໄປປັບປຸງດັດແປງຮ່າງລະບຽບໃໝ່ນີ້ກ່ອນຈະປະກາດໃຊ້ຢ່າງເປັນທາງການນີ້ລະຄືປະຊາຊົນເປັນເຈົ້າແທ້ໆ ບໍ່ແມ່ນເວົ້າແຕ່ປາກ ແຕ່ວ່າມາເບິ່ງຮ່າງເນື້ອໃນຂອງລະບຽບໃໝ່ນີ້ໂອ, ກໍ່ຖືວ່າຄຸ້ມຄອງປົກປ້ອງສິດທິຂອງແຮງງານຜູ້ຍິງໄດ້ຮອບດ້ານຫຼາຍຂື້ນກ່ວາເກົ່າໄດ໋! ດຽວນີ້ທົ່ວປະເທດຈີນມີແຮງງານຜູ້ຍິງຕັ້ງວ່າ 137 ລ້ານຄົນພຸ້ນໄດ໋! ຮ່າງລະບຽບໃໝ່ນີ້ຈະເພີ່ມມື້ພັກໃຫ້ຜູ້ຍິງຈີນຈາກ 90 ມື້ໃນປະຈຸບັນຂື້ນເປັນ 98 ມື້ ທັງຈະຕັດລະບຽບທີ່ວ່າຖ້າຜູ້ຍິງໃດຝ່າຝືນນະໂຍບາຍວາງແຜນຄອບຄົວທີ່ໃຫ້ມີລູກຜູ້ດຽວຂອງລັດຖະບານຈີນຈະບໍ່ຮັບເຮັດວຽກເພາະວ່າດຽວນີ້ອັດຕາການເກີດຢູ່ຕາມຕົວເມືອງໃຫຍ່ບໍ່ວ່າຢູ່ປັກກິ່ງຫຼືຊຽງໄຮກໍ່ຫຼາຍແລ້ວ! ທັງລັດຖະບານກໍ່ອະນຸຍາດໃຫ້ຄູ່ຜົວເມຍທີ່ເປັນລູກໂທນທັງຄູ່ສາມາດມີລູກ 2 ຄົນໄດ້! ແຕ່ປານນັ້ນກໍ່ຍັງຫຼາຍຢູ່ເມືອງໃຫຍ່ກໍ່ບໍ່ກ້າເອົາລູກຜູ້ທີ 2 ເພາະຄ່າໃຊ້ຈ່າຍ, ລ້ຽງດູ, ຄ່າຮຽນໜັກໂພດ! ເອົາ, ຟັງເພງກ່ອນແລ້ວຈຶ່ງຊິເວົ້າຜົນປະໂຫຍດອື່ນໆທີ່ຜູ້ຍິງຈີນຈະໄດ້ຮັບໃນລະບຽບໃໝ່ນີ້ຕໍ່
ເພງ
ຂໍຂອບໃຈ……………… ຄຳເຫັນ, ຢາກຟັງເພງກະຂໍມາໂລດທີ່ໝາຍເລກ 711477 ຫຼືຂໍ້ຄວາມສັ້ນກໍ່ແມ່ນ 9300 ມາລົມກ່ຽວກັບລະບຽບເພື່ອປົກປ້ອງສິດຂອງຜູ້ໃຊ້ແຮງງານຍິງຂອງຈີນຕໍ່ວ່າຈະໄດ້ຮັບຜົນປະໂຫຍດຫຍັງແດ່? ແມ່ຍິງທີ່ຫຼຸລູກແທ້ງລູກກໍ່ຊິໃຫ້ພັກຢ່າງໜ້ອຍ 2 ອາທິດເພື່ອຟື້ນຟູສຸຂະພາບຖ້າວ່າລາວຖືພາມາໄດ້ຕ່ຳກ່ວາ 4 ເດືອນແຕ່ຖືພາໄດ້ຫຼາຍກ່ວາ 4 ເດືອນແລ້ວເພິ່ນກໍ່ຈະໃຫ້ພັກຢ່າງຕ່ຳ 6 ອາທິດກໍ່ເດືອນເຄິ່ງເກືອບ 2 ເດືອນພຸ້ນລະເນາະ! ຮ່າງລະບຽບໃໝ່ນີ້ຍັງສັ່ງໃຫ້ລູກຈ້າງທີ່ເປັນແມ່ລູກອອ່ນຢ່າງໜ້ອຍມື້ລະ 1 ຊົ່ວໂມງເພື່ອໃຫ້ເອົານົມໃຫ້ລູກກິນອັນນີ້ກໍ່ແມ່ນສະໜັບສະໜຸນການລ້ຽງລູກດ້ວຍນົມແມ່ເພື່ອໃຫ້ລູກນ້ອຍແຂງແຮງດີ, ໃນໄລຍະທີ່ແມ່ລູກອອ່ນນັ້ນລ້ຽງລູກດ້ວຍຕົນເອງຢູ່ນາຍຈ້າງກໍ່ຈະບໍ່ມີສິດເພີ່ມເວລາເຮັດວຽກໃຫ້ລາວ ຫຼືໃຫ້ລາວມາເຮັດວຽກຕອນກາງຄືນອີກ! ເງິນເດືອນຄ່າລູກຫຼືຫຼຸລູກກໍ່ຕ້ອງແມ່ນເງິນປະກັນໄພສຸຂະພາບເປັນຄົນຈ່າຍ ຄັນນາຍຈ້າງບໍ່ໄດ້ຊື້ປະກັນໄພໃຫ້ລູກຈ້າງ ນາຍຈ້າງກໍ່ຕ້ອງຈ່າຍເອງ! ຮ່າງລະບຽບໃໝ່ກໍ່ບໍ່ອະນຸຍາດໃຫ້ແຮງງານຍິງເຮັດວຽກຕາມບໍ່ແຮ່ໃຕ້ດິນຕ່າງໆ ທັງບໍ່ໃຫ້ເຂົາເຈົ້າ ຍົກ ແບກ ຫາບ ຫາມສິ່ງທີ່ໜັກກ່ວາ 20 ກິໂລ ຫຼາຍກ່ວາ 6 ເທື່ອຕໍ່ໍຊົ່ວໂມງ. ເອີ່! ປົກປ້ອງໄດ້ຮອບຄອບດີເນາະ! ຮ່າງລະບຽບໃໝ່ປົກປ້ອງລົງໄປຮອດວ່າ ຂໍໂທດເດີ້ທ່ານຜູ້ຟັງ ຖ້າແຮງງານຍິງເວລາເປັນປະຈຳເດືອນນາຍຈ້າງຈະບໍ່ມີສິດສັ່ງໃຫ້ນາງເຮັດວຽກບ່ອນເຢັນໆຫຼືແບກຫາບໜັກ, ແມ່ຍິງທີ່ຖືພາກໍ່ບໍ່ໃຫ້ເຮັດວຽກກ່ຽວກກັບສານພິດເຄມີຕ່າງໆ ລະກະບໍ່ໃຫ້ເຮັດວຽກທີ່ກົ້ມໆເງີຍໆຕະຫຼອດເພາະມັນເປັນອັນຕະລາຍຕໍ່ລູກໃນທ້ອງເດ! ນາງ ຕິ່ງ ຕ້າຈຽນ ຫົວໜ້າກົມວຽກງານກຳມະກອນຍິງຂອງສະຫະພັນກຳມະບານຈີນເວົ້າວ່າ: " ພວກເຮົາຫວັງວ່າຮ່າງລະບຽບໃໝ່ນີ້ຈະຊ່ວຍປົກປ້ອງແຮງງານຍິງໄດ້ດີຂື້ນແລະເປັນການເຕຶອນສະຕິກ່ຽວກັບການປົກປ້ອງສິດຂອງຜູ້ຍິງໃນການເຮັດວຽກໄດ້ຫຼາຍຂື້ນ " ຮ່າງລະບຽບໃໝ່ນີ້ກໍ່ແມ່ນກະຊວງຊັບພະຍາກອນມະນຸດແລະຄວາມປອດໄພຂອງສັງຄົມສົມທົບກັບສະຫະພັນກຳມະບານຈີນຮ່າງແລະສະເໜີອອກມາ. ກົມຂອງນາງ ຕິ່ງ ຕ້າຈຽນ ກໍ່ຈະຮ່ວມມືຢ່າງໃກ້ຊິດກັບກະຊວງແຮງງານ ເພື່ອຕິດຕາມເຂັ້ມງວດໃນການຈັດຕັ້ງປະຕິບັດ ພ້ອມທັງຊຸກຍູ້ ວິສະຫະກິດ, ບໍລິສັດ, ຫ້າງຮ້ານ ໂຮງຈັກໂຮງງານໃຫ້ເຊັນສັນຍາສະເພາະກັບແຮງງານຍິງທັງຂຽນສິດຜົນປະໂຫຍດຕ່າງໆເຫຼົ່ານີ້ລົງໄປໃນສັນຍາໃຫ້ຈະແຈ້ງເພື່ອປົກປ້ອງແຮງງານຍິງ! ກໍ່ຖືວ່າຮ່າງລະບຽບໃໝ່ແລະການກະກຽມຈັດຕັ້ງປະຕິບັດທີ່ດີຮັດກຸມຫຼາຍເພາະວ່າຢາກບໍ່ຢາກໂດຍທຳມະຊາດແລ້ວນາຍຈ້າງສ່ວນຫຼາຍຫາວິທີເອົາລັດເອົາປຽບລູກຈ້າງຢູ່ແລ້ວ ເງິນເດືອນຫຼືເງິນຕ່າງໆກໍ່ພະຍາຍາມຫຼີກລ້ຽງຕະຫຼອດເພື່ອໃຫ້ເພິ່ນໄດ້ຈ່າຍໜ້ອຍໆແລ້ວຊິກຳໄລສ້າງຮັ່ງຄູນມີໃຫ້ຕົນເອງຫຼາຍໆ ລາງເທື່ອເຈົ້າຂອງບໍລິສັດເຈົ້າຂອງໂຮງງານເປັນຜູ້ຍິງແຕ່ກໍ່ຍັງກົດຂີ່ຂູດຮີດຂົ່ມເຫັງລູກຈ້າງທີ່ເປັນຜູ້ຍິງດ້ວຍກັນກໍ່ມີ ເງິນນີ້ເຮັດໃຫ້ສິນລະທຳຄວາມເອື້ອເຟື້ອເຜື່ອແຜ່ເມດຕາປານີຜູ້ອື່ນມັນຫຼຸດລົງ ຄວາມເຫັນແກ່ຕົວເອົາລັດເອົາປຽບຄົນອື່ນເພີ່ມຂື້ນຊັ້ນໄດ໋! ເຮັດວຽກເມື່ອຍເກືອບຕາຍໝົດມື້ໝົດຄືນອົດຕາຫຼັບຂັບຕານອນ ເງິນເດືອນພື້ນຖານກໍ່ຕ່ຳຢູ່ແລ້ວເງິນ OT ເງິນນອກໂມງກໍ່ໜ້ອຍໆອີກ! ເຫັນວ່າມີເງິນມີອຳນາດໃຫຍ່ແລ້ວຢ່າເພີດເພີນຫຼາຍຢ່າລືມກົດເກນໜຶ່ງຂອງລັດທິມາກເລນິນໄດ໋ " ມີຄວາມບໍ່ຍຸດຕິທຳ ມີການກົດຂີ່ຂູດຮີດຢູ່ບ່ອນໃດ ຍ່ອມເກີດມີການຕໍ່ສູ້ຂື້ນຢູ່ບ່ອນນັ້ນ " ຖ້າເຫຼືອອົດແລ້ວບັ້ງອົດກໍ່ແຕກເປັນຄືກັນ! ເອົາ, ຟັງເພງຊຸດໜຶ່ງກ່ອນແລ້ວໜຸ່ມໃຫຍ່ຊິເອົາຄຳເຫັນຂອງມວນຊົນໂດຍສະເພາະກຳມະກອນຍິງບາງຄົນຢູ່ຈີນທີ່ສະແດງຄຳເຫັນຕໍ່ຮ່າງລະບຽບໃໝ່ນີ້ມາເວົ້າສູ່ຟັງ!
ເພງ
ຂະນະນີ້ທ່ານພວມຟັງ CRI FM 93Mhz ນີ້ແມ່ນລາຍການເບິ່ງເມືອງຈີນທີ່ໜຸ່ມໃຫຍ່ຈັດໃຫ້ຟັງທຸກຄືນ! ຄືນວັນອາທິດແນວນີ້ກະບໍ່ເວັ້ນ, ເພງຈີນມ່ວນໆເລື່ອງລາວກ່ຽວກັບຈີນດ້ານຕ່າງໆທີ່ໜ້າສົນໃຈມີລໍຄອຍທ່ານທຸກຄືນແຕ່ 19-19:50 ນາທີ ບັດນີ້ມາຟັງຄຳເຫັນຂອງມວນຊົນກ່ຽວກັບຮ່າງກົດໝາຍນີ້ເຂົາເຈົ້າຮູ້ສຶກແນວໃດ? ເພາະວ່າດຽວນີ້ເພິ່ນພວມເອົາຂື້ນເວບໄຊເພື່ອຂໍຄຳເຫັນຈາກມວນຊົນທົ່ວປະເທດຈີນເດ! ສຽງມວນຊົນເປັນສຽງທີ່ດັງທີ່ສຸດ ພະລັງຂອງມວນຊົນເປັນພະລັງທີ່ຍິ່ງໃຫຍ່ທີ່ສຸດສະນັ້ນກ່ອນຊິເຮັດຫຍັງກະທຳຫຍັງລົງໄປໂຄງການວຽກງານໃດກໍ່ແລ້ວແຕ່ ງ່ຽງຫູຟັງມວນຊົນແດ່ຈະເປັນການດີ ເພື່ອທ່ານຈະບໍ່ໄດ້ຕົກເປັນຈຳເລີຍຂອງປະຊາຊົນ! ກຳມະກອນຍິງຂອງຈີນຫຼາຍຄົນເຂົາເຈົ້າເວົ້າວ່າ: ເປັນລະບຽບໃໝ່ທີ່ດີຫຼາຍ! ນາງ ຫວາງສຽວ ອາຍຸ 29 ປີ ພວມຖືພາ 6 ເດືອນເຄິ່ງເຮັດວຽກຢູ່ບໍລິສັດຄົມະນາຄົມຂອງນະຄອນຟູໂຈ່ວ, ເມືອງເອກຂອງແຂວງ ຟູຈ້ຽນ ທາງພາກຕາເວັນອອກຂອງຈີນບອກວ່າ: ດີໃຈຫຼາຍທີ່ຈະໄດ້ມີມື້ພັກເພີ່ມຂື້ນເພື່ອເບິ່ງແຍງດູແລແລະໃຫ້ນົມລູກນ້ອຍເພາະວ່າມັນເປັນເວລາທີ່ສຳຄັນຕໍ່ສຸຂະພາບຂອງລູກ. ນາງ ເສິນເຫວີຍ ທີ່ເປັນນັກກົດໝາຍຂອງບໍລິສັດທີ່ປຶກສາກົດໝາຍ ຢິງເກ ກໍ່ວ່າ: ອ່ານເບິ່ງແລ້ວລະບຽບໃໝ່ນີ້ຄຳນຶງເຖິງສິດທິຂັ້ນພື້ນຖານຂອງມະນຸດຫຼາຍຂື້ນແລະປົກປ້ອງແຮງງານຍິງຮອບດ້ານຫຼາຍຂື້ນ, ແຕ່ວ່ານາງ ເສິນເຫວີຍ ກໍ່ໃຫ້ຄຳແນະນຳວ່າລັດຖະບານກໍ່ຕ້ອງໄດ້ສະໜັບສະໜຸນທາງດ້ານການເງິນແກ່ທຸລະກິດຂະໜາດນ້ອຍຕື່ມ ເພາະວ່າຄັນປະຕິບັດລະບຽບໃໝ່ນີ້ບໍລິສັດນ້ອຍກໍ່ຕ້ອງໄດ້ຈ່າຍຄ່າແຮງງານແລະສະຫວັດດີການໃຫ້ພະນັກງານຫຼາຍຂື້ນ; ຄັນບໍ່ຊ່ວຍກໍ່ຢ້ານເຂົາເຈົ້າໄປບໍ່ລອດ ແລະບໍ່ຢາກປະຕິບັດຕາມລະບຽບໃໝ່ນີ້, ອື່, ກໍ່ມີເຫດມີຜົນເນາະ!
ເພງ
ຈົບ
