ຫວຍຊ່ວຍປະຊາຊົນແລະເອດຈີນ 2011
ສະບາຍດີມິດລາຍການທີ່ຮັກແພງ! ເວລານີ້ 19 ໂມງຄືເວລາຂອງລາຍການເບິ່ງເມືອງຈີນທີ່ໜຸ່ມໃຫຍ່ອາລົມດີຈັດໃຫ້ຟັງທຸກມື້! ພົບກັນຄືນນີ້ແມ່ນຄືນວັນເສົາ ທີ 4 ກຸມພາ! ເປັນແນວໃດຝົນຕົກໝົດຄືນໝົດມື້ວານນີ້, ມື້ນີ້ເຢັນສະບາຍບໍ່? ຜູ້ລຳຄານກັບຝົນຕົກບໍ່ຖືກຍາມກໍ່ແນ່ນອນຕ້ອງແມ່ນປະຊາຊົນ, ແມ່ຄ້າຊາວຂາຍ, ພະນັກງານທະຫານຕຳຫຼວດ ນັກຮຽນນັກສຶກສາທີ່ໄປຊື້-ຂາຍ ໄປລ້າໄປການໄປໂຮງຮຽນໃນຕອນເຊົ້າຫຼືແລງວານນີ້ເນາະ! ໂດຍສະເພາະຜູ້ຂີ່ລົດຈັກລົດຖີບຫຼາຍຄົນໄດຫັນເນາະຕອນເຊົ້າວານນີ້ໄດ້ຈົກເງິນຊື້ເສື້ອກັນຝົນ 2-3 ໝື່ນກີບ, ເອົາກໍ່ຢ່າມັນເນາະເກັບມ້ຽນຮັກສາໄວ້ໃຊ້ ຈັກໜ້ອຍຍາມຝົນກະຊິມາຮອດລະເດບໍ່ໄດ້ດົນໄດນິ! ແຕ່ວ່າຜູ້ດີໃຈກໍ່ແມ່ນຜູ້ເຮືອນແຄມທາງດິນແດງທັງຫຼາຍນິລະເນາະ. ຝົນມາໄລ່ຂີ້ຝຸ່ນໃຫ້ມາລ້າງດິນແດງຕາມຫຼັງຄາເຮືອນອອກໃຫ້ ສວນຫຍ້າ ສວນດອກໄມ້ ໝາກໄມ້ ດິນຫຍ້າຕາມໜ້າເຮືອນຫຼັງເຮືອນກໍ່ຄືຊິສົດຊື່ນໄປຕາມໆກັນລະບໍ່ໄດ້ເປືອງນ້ຳປະປາຫົດ. ອັນນີ້ລະທ່ານຜູ້ຟັງດິນຟ້າອາກາດຄູ່ມື້ນີ້ເອົາແນ່ນອນບໍ່ໄດ້ແລ້ວ! ສີມືມະນຸດເຮັດໃຫ້ປ່ຽນໄປໝົດແລ້ວ ບາງປີກໍ່ແຫ້ງແລ້ງໂພດ ບາງປີກໍ່ຕົກໜັກໂພດຈົນນ້ຳຖ້ວມ ບາງບ່ອນກໍ່ໜາວໂພດຮ້ອນໂພດ ບາງປະເທດກໍ່ປະເຊີນກັບຄື້ນຊິນາມິ, ແຜ່ນດິນໄຫວ, ລົມພະຍຸ, ແຜ່ນດິນເຈື່ອນແລະອື່ນໆນັບມື້ນັບຫຼາຍຂື້ນ! ມີທາງດຽວທີ່ຈະບັນເທົາໄພພິບັດໃຫ້ຫຼຸດໜ້ອຍລົງໄດ້ກໍ່ມີແຕ່ຄົນອະນຸລັກສິ່ງແວດລ້ອມເທົ່ານັ້ນລະ! ທຸກຄົນຊ່ວຍກັນເຮັດລົງມືແຕ່ມື້ນີ້ຢ່າມີແຕ່ເວົ້າ ຖ້າບໍ່ຢາກໃຫ້ທຳມະຊາດທຳຮ້າຍພວກເຮົາແລະລູກຫຼານຂອງເຮົາຫຼາຍກ່ວານີ້! ເນື້ອໃນຂອງລາຍການເບິ່ງເມືອງຈີນມື້ນີ້ໜຸ່ມໃຫຍ່ຈະຍົກເອົາເລື່ອງຫວຍລັດຖະບານ ຫວຍກິລາຂອງຈີນທີ່ຊ່ວຍເຫຼືອສັງຄົມ ຊ່ວຍຄົນທຸກຍາກໄດ້ແນວໃດ? ຄັນມີເວລາພໍກໍ່ຊິເວົ້າເລື່ອງພະຍາດເອດຢູ່ຈີນປີກາຍນີ້ສູ່ຟັງ!
ເພງ
ຢ່າລືມເດີ້ມິດລາຍການ! ຢາກຕິດຕໍ່ກັບ CRI ບໍ່ວ່າຈະເປັນລາຍການໃດກໍ່ແລ້ວແຕ່ 7114747 / 9300 ບັດນີ້ກໍ່ຈະລົມເລື່ອງຫວຍພັດທະນາຢູ່ຈີນຊ່ວຍສັງຄົມແນວໃດແດ່? ກະຊວງສຶກສາທິການຂອງຈີນເພິ່ນບອກວ່າ: ປີກາຍນີ້ໃນລາຍໄດ້ທັງໝົດຂອງຫວຍພັດທະນາຂອງຈີນນັ້ນເພິ່ນຫັກເອົາ 500 ລ້ານຢວນຫຼືປະມານ 75 ລ້ານໂດລາ ໄປຊ່ວຍສະໜັບສະໜຸນໃຫ້ນັກສຶກສາມັດທະຍົມຕອນປາຍກັບຄູ-ອາຈານຜູ້ທຸກຍາກຢູ່ຊົນນະບົດ. ໃນຫັ້ນ 200 ລ້ານຢວນເພິ່ນໃຊ້ເຂົ້າໃນການທົດລອງທີ່ເອີ້ນເປັນພາສາຈີນວ່າ: " ສືຮຸ່ຍ " ຄືເພິ່ນຊ່ວຍນັກຮຽນມັດທະຍົມຕອນປາຍທີ່ມາຈາກຄອບຄົວທຸກຍາກ 1 ແສນ ຄົນຢູ່ແຂວງຢູນນານ, ກຸ້ຍໂຈ່ວ, ກ່ານຊູ່ແລະເຫີໝານ ຜູ້ລະ 2000 ຢວນໃນປີກາຍນີ້! 2000 ຢວນກໍ່ປະມານ 2.4 ລ້ານກີບ. ອີກໂຄງການທົດລອງໜຶ່ງກໍ່ເອີ້ນວ່າ: " ຫຼີເກີ່ງ " ທີ່ຊ່ວຍເຫຼືອຄູມັດທະຍົມຕອນປາຍທີ່ທຸກຍາກຈຳນວນ 3 ໝື່ນຄົນຜູ້ລະໝື່ນຢວນປະມານ 12 ລ້ານກີບໃນ 7 ເຂດແຂວງ, ໃນຫັນກໍ່ມີເຂດປົກຄອງຕົນເອງຊິ່ນຈ່ຽງ ແລະ ເຂດປົກຄອງຕົນເອງໜິງເຊ້ຍລວມຢູ່ນຳ. ໂຄງການທົດລອງນີ້ຖືວ່າເປັນໂຄງການທົດລອງຮ່ວມກັນລະຫ່ວາງກະຊວງສຶກສາທິການກັບກະຊວງການເງິນຂອງຈີນ! ພວມວາງແຜນແລະຈະລົງມືປະຕິບັດໃນການແກ້ໄຂພາກຮຽນໃໝ່ໃນລະດູບານໃໝ່ປີນີ້ລະ! ເວົ້າເລື່ອງສະໜັບສະໜູນການສຶກສາ ໂດຍສະເພາະນັກຮຽນຫຼືຄູຜູ້ທຸກຍາກດ້ອຍໂອກາດຢູ່ຊົນນະບົດທີ່ຮຽນດີຮຽນເກັ່ງຄຸນສົມບັດດີ ປະຕິບັດໜ້າທີ່ຫ້າວຫັນແລະລັດຖະບານຈີນເຮັດຢ່າງຈິງຈັງອີ່ຫຼີເພາະວ່າການພັດທະນາຊັບພະຍາກອນມະນຸດນີ້ສຳຄັນຫຼາຍແລະນັກຮຽນທີ່ຮຽນດີຮຽນເກັ່ງມີພອນສະຫວັນ ສະຫຼາດຫຼັກແຫຼມຢາກຮຽນກໍ່ບໍ່ອຶດບໍ່ຢາກແຕ່ຄອບຄົວທຸກຍາກຂາດເຂີນ! ເວົ້າແທ້ຄັນເຮັດອັນນີ້ຊ່ວຍເລື່ອງນີ້ໄດ້ດີກໍ່ຊ່ຳກັບຊອກຊ້າງເຜືອກຢູ່ໃນປ່າຫຼືຊອກດາວທີ່ປະກາຍແສງແທ້ຫັ້ນລະ! ຄັນພັກ-ລັດບໍ່ຊ່ວຍເຂົາເຈົ້າກໍ່ບໍ່ມີໂອກາດມາໃຊ້ຄວາມສະຫຼາດຊ່ວຍສ້າງປະເທດຊາດແທ້ໄດ໋ຄັນຄາແຕ່ຫຼິ້ນເສັ້ນຫຼິ້ນສາຍ ລູກເຈົ້າຫຼານຂ້ອຍຈັ່ງໄດ້ຮຽນບ່ອນດີຫຼືຕ່າງປະເທດ ບາດສຸດທ້າຍກໍ່ໄດ້ພວກທີ່ໄປຮຽນແຕ່ເກືອບບໍ່ລອດ ຟາງເມົາມົວນຳສັງຄົມຫຼິ້ນກິນຟຸມເຟືອຍຍ້ອນພໍ່ແມ່ເງິນຫຼາຍເດ ຝາກໃຫ້ ຝາກໃຫ້ ແລ້ວກໍ່ໄດ້ແຕ່ພະນັກງານນັກວິຊາການທີ່ມີຄຸນນະພາບຕ່ຳດີບໍ່ດີຄຸນສົມບັດໃຊ້ການບໍ່ໄດ້ອີກ ແລ້ວຊາດຈະພັດທະນາໄດ້ແນວໃດເນາະ? ຟັັງເພງກ່ອນເນາະແລ້ວຈະມາເວົ້າສູ່ຟັງວ່າປີກາຍນີ້ພຽງປີດຽວລັດຖະບານຈີນໃຊ້ງົບສະໜັບສະໜຸນການສຶກສາທຸກລະດັບໜ້ອຍຫຼາຍຊ່ຳໃດ?
ເພງ
ຂະນະນີ້………………. ເວົ້າເລື່ອງການສະໜັບສະໜຸນການສຶກສາແລ້ວລັດຖະບານຈີນຖືການສ້າງຊັບພະຍາກອນມະນຸດທີ່ມີຄຸນນະພາບເປັນວຽກງານບຸລິມະສິດເລີຍລະ! ເພາະວ່າຄັນສ້າງຄົນດີ ຄົນເກັ່ງບໍ່ໄດ້ ການພັດທະນາຊາດມີບັນຫາແນ່ນອນ! ຕົວຈິງກໍ່ພິສູດລະເດວ່າດຽວນີ້ພັດທະນາຊາດໄປໄດ້ໄວຊ່ຳໃດໃຜກໍ່ຮູ້ເນາະ! ປີກາຍນີ້ປີດຽວລັດຖະບານຈີນໃຊ້ງົບຫຼາຍກ່ວາ 30 ຕື້ຢວນ ເພື່ອຊ່ວຍເຫຼືອສະໜັບສະໜຸນນັກສຶກສາລະດັບວິທະຍາໄລ 4 ລ້ານ ຄົນ ແລະນັກຮຽນສາຍໂຮງຮຽນວິຊາຊີບຕ່າງໆ 16 ລ້ານຄົນທີ່ຂາດທຶນການສຶກສາ. ເວົ້າເລື່ອງການແບ່ງລາຍຮັບຈາກການຂາຍຫວຍພັດທະນາມາພັດທະນາການສຶກສາແລ້ວແຕ່ປີ 2007 ມາຈີນໄດ້ຫັນເອົາ 300 ລ້ານຢວນມາຊ່ວຍເຫຼືອນັກຮຽນມັດທະຍົມຕອນປາຍຈາກຄອບຄົວທຸກຍາກນຳ 3 ແສນ ຄົນໃນ 22 ເຂດແຂວງທີ່ຢູ່ເຂດທີ່ທຸກຍາກດ້ອຍພັດທະນາຢູ່ພາກຕາເວັນຕົກແລະພາກກາງຂອງປະເທດ! ລາຍໄດ້ຈາກການຂາຍຫວຍລັດຖະບານນີ້ມັນກໍ່ມະຫາສານສົມຄວນໄດ໋ເນາະທ່ານຜູ້ຟັງ! ຄັນຜັນມັນມາຊ່ວຍວຽກງານທີ່ຈະເປັນປະໂຫຍດແກ່ສ່ວນລວມໄດ້ຫຼາຍທໍ່ໃດກໍ່ແຫ່ງດີລະເນາະ! ດີກ່ວາມັນຈະໄປເຂົ້າຖົງ ໄປຊື້ລົດໃຫ້ໃຜກຸ່ມຄົນໃດຂີ່ຫັ້ນລະເນາະ! ຄັນເວົ້າເລື່ອງຫວຍແລ້ວຢູ່ຈີນກໍ່ມີຫຼາຍພາກສ່ວນເຮັດຄືກັນ ມູນນິທິກາແດງຈີນກໍ່ເຮັດແລ້ວເອົາເງິນລາຍໄດ້ຈາກຫວຍນີ້ 150 ລ້ານ ຢວນໄປຊ່ວຍເດັກນ້ອຍທີ່ເປັນພະຍາດເລືອດຈາງແລະພະຍາດຫົວໃຈໄດ້ຕັ້ງ 4.646 ຄົນ ພຸ້ນໄດ໋ໃນໄລຍະ 3 ປີມານີ້. ຍ້ອນໂຄງການຊ່ວຍເດັກເລືອດຈາງນີ້ດີກະຊວງການເງິນຈີນຈຶ່ງອະນຸຍາດໃຫ້ກອງທຶນກາແດງຈີນອອກຫວຍນີ້ໄດ້ໃນປີ 2009, ສ່ວນພະຍາດຫົວໃຈອະນຸຍາດໃຫ້ເຮັດປີກາຍນີ້ເອງ. ຢູ່ຈີນທຸກການອອກຫວຍຈະເພື່ອກິດຈະການ ກິດຈະກຳຫັຍງ? ຂອງພາກສ່ວນໃດກໍ່ແລ້ວແຕ່ຕ້ອງແມ່ນກະຊວງການເງິນເປັນຜູ້ອະນຸຍາດ. ເອົາ, ຟັງເພງກ່ອນເນາະແລ້ວຈະເວົ້າສະພາບພະຍາດເອດຢູ່ຈີນໃນປີກາຍນີ້ສູ່ຟັງ!
ເພງ
ກັບເຂົ້າມາສູ່ບັນຍາກາດຂອງລາຍການເບິ່ງເມືອງຈີນຂອງ CRI FM 93Mhz ກໍ່ຢ່າລືມຢາກຟັງລາຍການນີ້ມີທຸກຄືນເວລາກ 19 ໂມງມີເພງຈີນມ່ວນໆເປີດໃຫ້ຟັງພ້ອມ! ບັດນີ້ມາເບິ່ງສະພາບເອດຢູ່ຈີນໃນປະຈຸບັນນີ້ເປັນແນວໃດ? ມີຫຼາຍມີໜ້ອຍປານໃດ? ບົດລາຍງານລ່າສຸດທີ່ກະຊວງສາທາຂອງຈີນຮ່ວມກັບອົງການ ສປຊ ຕ້ານເອດແລະອົງການຕ້ານເອກໂລກຮ່ວມກັນເຮັດອອກມາພົບວ່າດຽວນີ້ຢູ່ຈີນມີຜູ້ຕິດເຊື້ອ HIV ແລະເປັນເອດທັງໝົດປະມານ 780.000 ຄົນ, ໃນນີ້ເປັນເອດ 154.000 ຄົນ, ປີກາຍນີ້ຕາຍໄປແລ້ວ 28.000 ຄົນ, ຜູ້ຕິດເຊື້ອໃໝ່ປີກາຍນີ້ມີ 48.000 ຄົນ ໃນ 2 ປີມານີ້ແຕ່ວ່າອັດຕາການຕິດເຊື້ອຍັງຮັກສາໄດ້ຕ່ຳຢູ່. ສາເຫດທີ່ໂຕເລກຜູ້ຕິດເຊື້ອເອດແລະເປັນເອດຢູ່ຈີນຍັງເພີ່ມຂື້ນແຕ່ຢູ່ໃນລະດັບຕ່ຳນີ້ຍ້ອນວ່າ: ລັດຖະບານຈີນເພີ່ມຄວາມພະຍາຍາມໃນການປ້ອງກັນແລະປິ່ນປົວທີ່ເຮັດໃຫ້ຈຳນວນຜູ້ຕາຍຈາກເອດຫຼຸດລົງ. ມາຮອດເດືອນກັນຍາປີກາຍນີ້ມີຄົນເຈັບແລະຕິດເຊື້ອເອດໄດ້ຮັບຢາຕ້ານເຊື້ອໄວຣັສຫຼາຍກ່ວາ 136.000 ຄົນ. ເຊິ່ງຖືວ່າກວມເຖິງ 73.5% ທີ່ສາມາດເຂົ້າເຖິງການປິ່ນປົວ. ຢູ່ຈີນການຕິດເຊື້ອເອດຜ່ານການມີເພດສຳພັນຍັງນຳໜ້າຢູ່, ສະນັ້ນພາກສ່ວນທີ່ກ່ຽວຂ້ອງກໍ່ຮຽກຮ້ອງໃຫ້ເພີ່ມການກວດເລືອດຂອງກຸ່ມຄົນສ່ຽງສູງ ພ້ອມທັງເພີ່ມການເຂົ້າເຖິງຢາຕ້ານເຊື້ອໄວຣັສແລະເພີ່ມການໂຄສະນາໃຫ້ປະຊາຊົນເຂົ້າໃຈກ່ຽວກັບພະຍາດເອດໃຫ້ຫຼາຍຂື້ນ! ເອົາ, ຟັງເພງກ່ອນເນາະແລ້ວຄ່ອຍລົມກັນຕື່ີມອີກຈັກໜ້ອຍ!
ເພງ
ເວົ້າເລື່ອງສະພາບເອດຢູ່ຈີນແລ້ວກໍ່ມີອັນໜ້າສັງເກດຢູ່ຫຼາຍອັນໄດທ່ານຜູ້ຟັງ! ແຕ່ກ່ອນການຕິດເຊື້ອເອດສ່ວນຫຼາຍແມ່ນຜ່ານການເສບຢາເສບຕິດ ບາດ 2-3 ປີຫຼັງມານີ້ຕິດຍ້ອນການມີເພດສຳພັນທີ່ບໍ່ປອດໄພຂື້ນມາຄອງແຊັມບໍ່ວ່າຈະເປັນລະຫ່ວາງຊາຍກັບຍິງຫຼືກຸ່ມຄົນຮັກຮ່ວມເພດ, ໂດຍສະເພາະກຸ່ມຊາຍຮັກຊາຍເພດນີ້ມີອັດຕາເພີ່ມການຕິດເຊື້ອຂື້ນໄວຫຼາຍກ່ວາຄົນກຸ່ມອື່ນ. ອັນນີ້ບໍ່ແມ່ແຕ່ຢູ່ຈີນເດີ້ ໝົດທຸກທະວີບອາຊີຂອງເຮົານິກໍ່ມີສະພາບນີ້ຄືກັນ ສາເຫດມັນກໍ່ແມ່ນການເຂົ້າເຖິງຄົນກຸ່ມຊາຍຮັກຊາຍຮັກຮ່ວມເພດເພື່ອໃຫ້ຂໍ້ມູນທີ່ຖືກຕ້ອງແກ່ເຂົາເຈົ້າຍາກຫຼາຍ. ເກຫຼາຍຄົນກໍ່ປິດບັງຕົວເອງເພື່ອໜ້າຕາ ສັງຄົມແລະໜ້າທີ່ວຽກງານ, ພຶດຕິກຳການຮ່ວມເພດຂອງຄົນກຸ່ມນີ້ກໍ່ມີຄວາມສ່ຽງສູງທີ່ຈະຕິດເຊື້ອ HIV ແຕ່ອັນທີ່ມັນອັນຕະລາຍກ່ວານັ້ນແມ່ນຫຍັງ? ຖ້າຊາຍຝ່າຍໜຶ່ງທີ່ເປັນເກຄິງຫຼືເກຝ່າຍຊາຍນັ້ນລະມີແຟນເປັນເກນຳກັນຕິດເຊື້ອຮຽບຮ້ອຍແຕ່ລາວກໍ່ສາມາດໄປມີເພດສຳພັນກັບແຟນຫຼືເມຍທີ່ເປັນຜູ້ຍິງແທ້ໆໄດ້ອີກ! ຄິດເບິ່ງແລ້ວມັນແມ່ນຫຍັງຈະເກີດຂື້ນທ່ານຜູ້ຟັງ! ສະນັ້ນລະບໍ່ວ່າຄົນກຸ່ມໃດ ຊາຍຮັກຮ່ວມເພດຫຼືບໍ່ກໍ່ຕາມ ຢູ່ໃນຕົວເມືອງຫຼືຊົນນະບົດກໍ່ຕາມມີໂອກາດຕິດເອດໄດ້ໝົດ ເຖົ້າໜຸ່ມກໍ່ຢ່າ ຖ້າບໍ່ມີຄວາມສື່ສັດຕໍ່ຄູ່ຮັກຫຼືຕໍ່ຜົວເມຍແລະເວລາມີເພດສຳພັນທີ່ມີຄວາມສ່ຽງກໍ່ບໍ່ໃສ່ຖົງອີກ ຄັນເຮັດແນວນີ້ທຸກຄົນມີສິດຕິດ ບໍ່ວ່າຄົນທຸກ ຄົນ-ຮັ່ງ, ນາຍ-ລູກນ້ອງ ! ຢ່າລືມເອດປົວບໍ່ໄດ້ແຕ່ປ້ອງກັນໄດ້
ເພງ
ຈົບ
