ຕອນເຊົ້າວັນທີ5ມີນານີ້, ກອງປະຊຸມເທື່ອທີ5ຂອງສະພາປະຊາຊົນແຫ່ງຊາດຈີນຊຸດທີ11ໄດ້ໄຂຂຶ້ນຢູ່ນະຄອນຫຼວງປັກກິ່ງ. ຜູ້ນຳປະເທດຈີນ ເຊັ່ນທ່ານຫູຈິນທ່າວ, ທ່ານອູປາງກົວ, ທ່ານເວີ່ນເຈ່ຍປາວ, ທ່ານເຈຍຊີ້ງລິນ, ທ່ານຫຼີສາງຊຸ່ນ, ທ່ານຊີ ຈີ້ນພິງ, ທ່ານຫຼີເຄີ້ຊຽງ, ທ່ານເຮີ້ກົວຊຽງ, ທ່ານໂຈ່ວຢົງຄ່າງແລະທ່ານອື່ນໆພ້ອມດ້ວຍຜູ້ແທນສະພາປະຊາຊົນແຫ່ງຊາດຈີນເກືອບ3000ຄົນໄດ້ເຂົ້າຮ່ວມກອງປະຊຸມ.
ທ່ານເວີ່ນເຈ່ຍປາວ, ນາຍົກລັດຖະມົນຕີໄດ້ລາຍງານວຽກງານຂອງລັດຖະບານຕໍ່ກອງປະຊຸມ. ທ່ານກ່າວວ່າ: "ປີນີ້ແມ່ນປີທີ່ສຳຄັນສຳລັບແຜນການ5ປີຄັ້ງທີ12, ທັງແມ່ນປີສຸດທ້າຍທີ່ລັດຖະບານຊຸດນີ້ດຳລົງຕຳແໜ່ງ, ລັດຖະບານຈະໃຫ້ຄຳໝັ້ນສັນຍາທີ່ສ້າງຄວາມພໍໃຈໃຫ້ປະຊາຊົນ."
ທ່ານເວີ່ນເຈ່ຍປາວກ່າວວ່າ, ຕ້ອງຖືເອົາການຮັບປະກັນແລະປັບປຸງຊີວິການເປັນຢູ່ຂອງປະຊາຊົນໃຫ້ດີຂຶ້ນເປັນໜ້າທີ່ສຳຄັນຂອງວຽກງານລັດຖະບານ. ລັດຖະບານຈະປັບປຸງໂຄງປະກອບລາຍຈ່າຍການເງິນໃຫ້ດີຂຶ້ນ, ແລະເອົາໃຈໃສ່ຕໍ່ຊີວິດການເປັນຢູ່ຂອງປະຊາຊົນໃຫ້ຫຼາຍກວ່າເກົ່າ. ເປົ້າໝາຍຕົ້ນຕໍຂອງການພັດ ທະນາເສດຖະກິດສັງຄົມຂອງຈີນໃນປີນີ້ແມ່ນ: ລວມຍອດຜະລິດຕະພັນພາຍໃນຫຼືGDPເພີ່ມຂຶ້ນ 7,5%, ເພີ່ມການປະກອບອາຊີບໃໝ່ໃນຕົວເມືອງ 9ລ້ານຄົນຂຶ້ນໄປ, ຄວບຄຸມໃຫ້ອັດຕາວ່າງງານໃນຕົວເມືອງພາຍໃນ 4,6%, ຄວບຄຸມໃຫ້ຈັງຫວະເຕີບໂຕຂອງດັດຊະນີລາຄາຜູ້ບໍລິໂພກຫຼືCPIຢູ່ປະມານ 4%. ລາຍຮັບປະຊາຊົນໃນຕົວເມືອງແລະຊົນນະບົດໃຫ້ເຕີບໂຕໄປພ້ອມໆກັບການເຕີບໂຕຂອງເສດຖະ ກິດ.
ໜ້າທີ່ສຳຄັນຂອງການປະຕິຮູບໃນປີນີ້ແມ່ນ: ລົງເລິກການປະຕິຮູບລະບຽບການເງິນດ້ານພາສີ, ຊຸກຍູ້ໃຫ້ເສດຖະກິດທີ່ມີລະບອບກຳມະສິດຫຼາຍປະເພດພັດທະນາຮ່ວມກັນ, ລົງເລິກການປະຕິຮູບລາຄາສິນຄ້າ, ລົງເລິກການປະຕິຮູບລະບອບແບ່ງປັນລາຍຮັບ, ຊຸກຍູ້ການປະຕິຮູບຫົວຫນ່ວຍວິຊາການທີ່ບໍ່ສາມາດສ້າງກຳໄລດ້ວຍຕົນເອງໂດຍແບ່ງເປັນປະເພດແລະເລັ່ງລັດການປະຕິຮູບຂອງລັດຖະບານ ຢ່າງຕັ້ງຫນ້າແລະໝັ້ນທ່ຽງ.
© China Radio International.CRI. All Rights Reserved. 16A Shijingshan Road, Beijing, China. 100040 |