ວັນທີ6ມີນານີ້, ຢູ່ທີ່ປັກກິ່ງ, ທ່ານຢາງເຈສື,ລັດຖະມົນຕີວ່າການກະຊວງການຕ່າງປະເທດຈີນກ່າວວ່າ, ຈີນແລະປະເທດທີ່ກ່ຽວຂ້ອງມີຄວາມສາມາດແລະສະຕິປັນຍາໃນການແກ້ໄຂບັນຫາທະເລຈີນໃຕ້ໃຫ້ດີ.
ໃນກອງປະຊຸມຂ່າວຂອງກອງປະຊຸມເທື່ອທີ5ຂອງສະພາປະຊາຊົນແຫ່ງຊາດຈີນຊຸດທີ່11ທີ່ຈັດຂຶ້ນໃນມື້ດຽວກັນ, ທ່ານຢາງເຈສືກ່າວວ່າ, ຈີນມີຈຸດຢືນມາໂດຍຕະຫລອດວ່າ, ຖືຄວາມຈິງເປັນພື້ນຖານ, ອີງຕາມຫລັກການພື້ນຖານຂອງການພົວພັນລະຫວ່າງຊາດ, ໃຫ້ປະເທດທີ່ກ່ຽວຂ້ອງໂດຍກົງຜ່ານຈາກການເຈລະຈາມາແກ້ໄຂຄວາມຂັດແຍ່ງກັນກ່ຽວກັບທະເລຈີນໃຕ້ໃຫ້ດີ. ກ່ອນແກ້ໄຂບັນຫາຄວາມຂັດແຍ່ງກັນ, ຄວນ "ໂຈະຄວາມຂັດແຍ່ງໄວ້ເສຍກ່ອນ, ແລ້ວພັດທະນາຮ່ວມກັນ" . ຈີນແລະປະເທດທີ່ກ່ຽວຂ້ອງໄດ້ມີຄວາມເຫັນເປັນເອກະສັນກັນອັນສໍາຄັນກ່ຽວກັບການແກ້ໄຂຄວາມຂັດແຍ່ງກັນໂດຍສັນຕິ, ຊຸກຍູ້ການຮ່ວມມືທີ່ມີການປະຕິບັດຕົວຈິງໃນເທລະຈີນໃຕ້, ແຕ່ຍັງມີວຽກງານສໍາຄັນຫລາຍຢ່າງທີ່ຕ້ອງເຮັດ.
ພ້ອມກັນນັ້ນ, ທ່ານຢາງເຈສືຍັງກ່າວວ່າ, ຈີນປະຕິບັດນະໂຍບາຍການຕ່າງປະເທດທີ່ເປັນມິດຕໍ່ປະເທດທີ່ຢູ່ອ້ອມຂ້າງແລະຖືປະເທດອ້ອມຂ້າງເປັນໝູ່ເພື່ອນ,ສຸມກໍາລັງເຂົ້າໃນການລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບປະເທດໃນອາຊີ. ປະຈຸບັນ, ການພົວພັນລະຫວ່າງຈີນກັບປະເທດອາຊີມີທ່າອຽງພັດທະນາທີ່ດີ, ມີປັດໄຈຕັ້ງໜ້າທີ່ຫລາກຫລາຍ, ຕົວຢ່າງຄື, ເຈົ້າໜ້າທີ່ລະດັບສູງມີການໄປມາຫາສູ່ກັນຫລາຍຂຶ້ນ, ຜົນປະໂຫຍດຂອງປະເທດຕ່າງເຊື່ອມໂຍງເຂົ້າກັນຢ່າງເລິກເຊິ່ງ, ມີການປະສານງານກັນຫລາຍຂຶ້ນ, ມີການແລກປ່ຽນດ້ານວັດທະນະທໍາຢ່າງໃກ້ຊິດ.
ທ່ານຍັງກ່າວວ່າ, ຈີນສຸມກໍາລັງເຂົ້າໃນການຜ່ານຈາກການສົນທະນາແລະປຶກສາຫາລືມາແກ້ໄຂຄວາມຂັດແຍ່ງກັນລະຫວ່າງຈີນກັບປະເທດທີ່ຢູ່ອ້ອມຂ້າງໂດຍສັນຕິ, ພ້ອມກັນນັ້ນ, ຍັງຫວັງວ່າຝ່າຍຕ່າງໆທີ່ກ່ຽວຂ້ອງຄວນເຄົາລົບຜົນປະໂຫຍດທີ່ຊອບທໍາຂອງຈີນ, ພະຍາຍາມຫລີກເວັ້ນບໍ່ໃຫ້ມີຄໍາເວົ້າແລະການກະທໍາທີ່ອາດຈະເຮັດໃຫ້ສະຖານະການຮ້າຍແຮງຂຶ້ນກວ່າເກົ່າ, ຮ່ວມກັນຊຸກຍູ້ໃຫ້ອາຊີມີສະຖຽນລະພາບ, ການພັດທະນາແລະຄວາມກ້າວໜ້າ.
© China Radio International.CRI. All Rights Reserved. 16A Shijingshan Road, Beijing, China. 100040 |