ຕາມຂ່າວCRI,ພາຍຫລັງກອງປະຊຸມເທື່ອທີ5ຂອງສະພາປະຊາຊົນແຫ່ງຊາດຈີນຊຸດທີ11, ແລະກອງປະຊຸມເທື່ອທີ5ຂອງຄະນະກໍາມະການແຫ່ງຊາດຊຸດທີ11ຂອງສະພາປຶກສາການເມືອງປະຊາຊົນຈີນໄຂຂຶ້ນ, ສື່ສໍາຄັນຂອງລາວໄດ້ເອົາໃຈໃສ່ຕໍ່ພິທີໄຂຂອງກອງປະຊຸມສອງສະພາແລະບົດລາຍງານວຽກງານຂອງລັດຖະບານຈີນທີ່ສະເໜີໂດຍທ່ານເວີ່ນເຈ່ຍປາວ, ນາຍົກລັດຖະມົນຕີຈີນນັ້ນໃນລະດັບສູງ, ແລະໄດ້ລາຍງານກອງປະຊຸມສອງສະພາຂອງຈີນໃນວັນທີ6ມີນານີ້.
"ໜັງສືພິມປະຊາຊົນລາວ"ໄດ້ລາຍງານຢ່າງລະອຽດຕໍ່ "ບົດລາຍງານວຽກງານຂອງລັດຖະບານຈີນ"ທີ່ສະເໜີໂດຍທ່ານເວີ່ນເຈ່ຍປາວ, ນາຍົກລັດຖະມົນຕີຈີນ, ຢູ່ໜ້າຂ່າວຕ່າງປະເທດດ້ວຍຫົວຂໍ້ທີ່ວ່າ, "ລັດຖະບານຈີນໃຫ້ສັນຍາວ່າຈະເອົາໃຈໃສ່ຊີວິດການເປັນຢູ່ຂອງປະຊາຊົນຫລາຍຂຶ້ນກວ່າເກົ່າ.
"ໜັງສືພິມວຽງຈັນໃໝ່"ລາຍງານວ່າ, ຈີນໄດ້ຕັ້ງຄາດໝາຍການເຕີບໂຕຂອງGDPຢູ່ໃນລະດັບ7,5%ໃນປີ2012, ຕໍ່າກວ່າ8%ຂອງປີ2011,ນີ້ເປັນເທື່ອທໍາອິດທີ່ລັດຖະບານຈີນປັບຫລຸດຄາດໝາຍຄວາມເຕີບໂຕຂອງເສດຖະກິດຈີນລົງຫລັງຈາກທີ່ຮັກສາຢູ່ໃນລະດັບ8%ມາເປັນ7ປີຕິດຕໍ່ກັນ, ນີ້ໄດ້ສະແດງໃຫ້ເຫັນວ່າ, ລັດຖະບານຈີນຈະນໍາພາທຸກພາກສ່ວນຫັນຈຸດສຸມເຂົ້າໃສ່ວຽກງານເລັ່ງລັດປ່ຽນແປງຮູບການພັດທະນາຂອງເສດຖະກິດ, ແລະຍົກສູງຄຸນນະພາບແລະປະສິດທິຜົນຂອງການພັດທະນາດ້ານເສດຖະກິດ.
"ໜັງສືພິມລາວພັດທະນາ"ໄດ້ແນະນໍາສະພາບການໄຂກອງປະຊຸມເທື່ອທີ5ຂອງສະພາປະຊາຊົນແຫ່ງຊາດຈີນຊຸດທີ11.
ນອກນີ້, "ໜັງສືພິມເສດຖະກິດແລະສັງຄົມ"ຂອງລາວກໍໄດ້ວິເຄາະຕໍ່ຈີນປັບປຸງເປົ້າໝາຍດ້ານການເຕີບໂຕເສດຖະກິດ, ສະຖານີໂທລະພາບແຫ່ງຊາດລາວ, ວິທະຍຸກະຈາຍສຽງແຫ່ງຊາດລາວກໍໄດ້ລາຍງານພິທີໄຂກອງປະຊຸມສອງສະພາຂອງຈີນ.
© China Radio International.CRI. All Rights Reserved. 16A Shijingshan Road, Beijing, China. 100040 |