ພໍ່ແມ່ຮູ້ຫລືບໍ່ວ່າ ການອ່ານນິທານກ່ອນນອນໃຫ້ລູກຟັງນັ້ນຈະຊ່ວຍສົ່ງເສີມພັດທະນາການທາງພາສາຂອງລູກໄດ້
ຈາກການວິໄຈຂອງຕ່າງປະເທດເປີດເຜີຍວ່າ: ພໍ່ແມ່ຕັ້ງໃຈຢາກຈະອ່ານຫນັງສືໃຫ້ລູກຟັງແຕ່ສຸດທ້າຍພວກເຂົາກໍເຮັດບໍ່ໄດ້ເພາະບໍ່ມີເວລາພໍ, ເຖິງວ່າໃນໄວເດັກຂອງພໍ່ແມ່ເອງ 60 % ຈະເຄີຍຟັງນິທານທຸກຄົນ ແຕ່ສະໄໝນີ້ພໍເຖິງເວລານອນຕ່າງຄົນຕ່າງປິດໄຟ, ປິດປະຕູຫ້ອງນອນກັນໝົດແລ້ວ
ດ້ວຍກຸ່ມຕົວຢ່າງພໍ່ແມ່ 2,000 ຄົ ພົບວ່າ ມີການອ່ານນິທານກ່ອນນອນໃຫ້ລູກຟັງ 52%, ໃນຂະນະທີ່ອີກ 48% ບອກວ່າຊີວິດຂອງພວກເຂົາວຸ້ນວາຍເກີນກວ່າຈະອ່ານນິທານໃຫ້ລູກຟັງໄດ້, ທັງໆທີ່ທຸກຄົນຕ່າງຮູ້ດີວ່າການອ່ານນິທານຈະຊ່ວຍສົ່ງເສີມພັດທະ ນາການໃຫ້ກັບລູກນ້ອຍ.
ໂດຍສະຖິຕິພົບວ່າເດັກນ້ອຍທີ່ພໍ່ແມ່ບໍ່ເລົ່ານິທານໃຫ້ຟັງຈະມີພັດທະນາການທາງການເວົ້າທີ່ດ້ອຍກວ່າເດັກຄົນອື່ນໆ ແລະສາເຫດຫລັກກໍມາຈາກການທີ່ພໍ່ແມ່ໃຊ້ການເລົ່ານິທານເພື່ອຝຶກທັກສະທາງພາສາໃຫ້ລູກນັ້ນເອງ
ຮູ້ນຳກັນຢ່າງນີ້ແລ້ວພໍ່ແມ່ທັງຫລາຍກໍຢ່າລືມແບ່ງເວລາມາອ່ານນິທານໃຫ້ລູກນ້ອຍ ນອກຈາກຈະໄດ້ໃກ້ຊິດຕິດແທດສ້າງຄວາມອົບອຸ່ນແລ້ວ, ລູກຂອງທ່າກໍຈະມີພັດທະນາການທີ່ຢ້ຽມຍອດອີກດ້ວຍ.
ລູກສະຫມອງດີດ້ວຍປື້ມນິທານທີ່ແມ່ອ່ານ
ປື້ມນິທານເປັນທາງເລືອກໜຶ່ງທີ່ມີຂໍ້ມູນວິຊາການຢືນຢັນເຖິງຂໍ້ດີທີ່ມີຕໍ່ຕົວລູກນ້ອຍ ທີ່ຍັງບໍ່ຮູ້ພາສາຫລືຈະນັບຍ້ອນໄປຕັ້ງແຕ່ໃນທ້ອງກໍໄດ້ ຖ້າພໍ່ແມ່ໃຊ້ຫນັງສືນິທານກັບລູກຢ່າງສະໝໍ່າສະເໝີແລະໃຊ້ຢ່າງຖືກວິທີ
ເຮົາມາກຽມພ້ອມກັບການໃຊ້ຫນັງສືເປັນສື່ກາງເພື່ອອ່ານ ເລົ່າ ແລະຫລິ້ນໄປກັບລູກນ້ອຍດ້ວຍວິທີງ່າຍ ໆ ແລະຮັບຮູ້ເຖິງຄວາມມະຫັດສະຈັນຂອງນິທານກັນດີກວ່າຫນັງສືນິທານດີຕໍ່ສະຫມອງຢ່າງໃດ
ຂະນະທີ່ເຈົ້າອ່ານນິທານໃຫ້ລູກຟັງຈະຊ່ວຍສ້າງຄວາມສຸກໃຫ້ລູກສົ່ງຜົນຕໍ່ສະພາວະອາລົມທາງບວກແລະເມື່ອລູກມີຄວາມສຸກສະຫມອງກໍເຮັດວຽກໄດ້ດີແລະມີປະສິດທິພາບຍິ່ງຂຶ້ນເລື່ອຍໆ
ເມື່ອລູກໄດ້ຟັງນິທານເລື້ອຍໆ ຈະຊ່ວຍໃຫ້ລູກຈົດຈຳຄຳສັບໄວຂຶ້ນເພາະເສັ້ນໃຍປະສາດໃນສະຫມອງທີ່ກ່ຽວກັບການຈົດຈຳຈະພັດທະນາໄປພ້ອມກັບຄວາມຊົງຈຳ
ການສຳຜັດຫນັງສືພາບ ຜ່ານການເບິ່ງຕັ້ງແຕ່ຍັງນ້ອຍເປັນການສ້າງສັກກະຍະພາບແລະຈິນຕະນາການໃນຕົວເດັກ, ເພາະມີອິດທິພົນຕໍ່ຄວາມຮູ້ສຶກນຶກຄິດຂອງເດັກຢ່າງສູງ
ເນື້ອຫາເລື່ອງລາວຈາກປື້ມນິທານເປັນເຫມືອນປະສົບການການຮຽນຮູ້ທີ່ບາງເທື່ອເປັນເໝືອນສິ່ງສົ່ງເສີມໃຫ້ລູກຢາກຮູ້ ຢາກເຮັດຫລືເຫັນເຖິງຜົນເສຍຂອງພຶດຕິກຳບາງຢ່າງທີ່ລູກຈະບໍ່ຮຽນແບບ
ປື້ມຍັງເປັນຂອງຫລິ້ນອັນໜຶ່ງ ທີ່ຊ່ວຍໃຫ້ລູກສະໜຸກສະໜານແລະຮຽນຮູ້ຜ່ານປະ ສາດສຳຜັດທັງ 5 ຄື ຜ່ານທາງຕາ ຫູ ດັງ ລິ້ນ ສຳຜັດຜິວກາຍ, ລູກນ້ອຍຈະຄ່ອຍໆ ຊຶມຊັບຮູບຮ່າງ, ທ່າທາງ ແລະນ້ຳສຽງມີຄວາມຮູ້ສຶກຮ່ວມໄປກັບການຟັງ, ນ້ຳສຽງທີ່ພໍ່ແມ່ເລົ່າກໍສື່ສານໄປເຖິງລູກ ແລະເມື່ອຈຸລັງສະຫມອງໄດ້ຮັບຂໍ້ມູນມີການສົ່ງຜ່ານຂໍ້ມູນໄປຫາສາຍໃຍປະສາດຮັບຂໍ້ມູນໂດຍມີຈຸດເຊື່ອມຕໍ່ລະຫວ່າງກັນ, ຂໍ້ມູນທີ່ມີສົ່ງຜ່ານມາເລື້ອຍໆ, ຈະເຮັດໃຫ້ຈຸດເຊື່ອມໃຍປະສາດມີຄວາມແຂງແຮງແລະແຕກຕົວຫລາຍຂຶ້ນ ເປັນການກະຕຸ້ນພັດທະນາການທາງສະຫມອງ, ເປັນທີ່ມາຂອງຄຳຕອບດ້ານຄວາມສະຫລາດຂອງລູກຕົວນ້ອຍໆ ນັ້ນເອງ.
ກຽມຕົວກ່ອນການອ່ານ
ກຽມອາລົມຂອງແມ່ໃຫ້ຜ່ອນຄາຍມີຄວາມສຸກ ແລະສະໜຸກກັບການໄດ້ອ່ານໄດ້ເລົ່າໃຫ້ລູກຟັງ
ສ້າງບັນຍາກາດທີ່ອຳນວຍຄວາມສະດວກຕໍ່ໄລຍະເວລາຂອງຄອບຄົວເປັນເວລາທີ່ພໍ່ແມ່ໄດ້ອຸ້ມລູກນັ່ງຕັກສື່ຮັກດ້ວຍຫນັງສື
ເລືອກປື້ມທີ່ເໝາະກັບໄວຂອງລູກແລະກຽມນ້ຳສຽງທີ່ອົບອຸ່ນຊວນລູກເບິ່ງແລະຟັງກໍລ້ວນສົ່ງຜົນເຮັດໃຫ້ຈຸລັງສະຫມອງຂອງລູກເຮັດຫນ້າທີ່ໄດ້ສົມບູນຜ່ານການເບິ່ງເຫັນ ແລະໄດ້ຍິນນຳໄປສູ່ຈິນຕະນາການແລະຄວາມຄິດທີ່ສ້າງສັນ
ວິທີໃຊ້ປື້ມນິທານກັບລູກນ້ອຍ
ຊວນລູກຟັງນິທານດ້ວຍການອອກສຽງຮຽກຄວາມສົນໃຈພ້ອມໆ ກັບອຸ້ມລູກນັ່ງຕັກແລ້ວເລົ່ານິທານໃຫ້ລູກຟັງ ເວົ້າຄຸຍກັບລູກເຖິງພາບທີ່ເຫັນໃນຫນັງສືນິທານ
ການໃຊ້ນ້ຳສຽງຄຳເວົ້າທີ່ສື່ຄວາມຫມາຍໃຫ້ເຂົ້າໃຈງ່າຍໆ ແລະອອກສຽງຊັດເຈນ ເຊັ່ນ ສຽງສູງສຽງຕ່ຳໆ ຫລືໃຊ້ສຽງທຳມະຊາດຂອງພໍ່ແມ່ເລົ່າເລື່ອງກໍສາມາດເຮັດໃຫ້ລູກມ່ວນຊື່ນແລະສະໜຸກສະໜານໄດ້ຄືກັນ
ໄນຄະນະທີ່ອ່ານຄວນສົ່ງສາຍຕາໃຫ້ກັບລູກ ເພື່ອຊ່ວຍສື່ໃຫ້ລູກຮັກຮູ້ເຖິງຄວາມຮັກ ຄວາມອົບອຸ່ນ, ໄປກັບຄວາມສະໜຸກສະໜານແລະການຮຽນຮູ້ທີ່ດີໄດ້
ທ່າທາງທີ່ມີຄວາມສຸກ ສະໜຸກສະໜານ, ມ່ວນຊື່ນຂອງແມ່ປະກອບການເລົ່າເຊັ່ນ: ຮອຍຍິ້ມ, ສຽງຫົວ. ໂດຍສຳພັນກັບເນື້ອເລື່ອງຫລືມີອຸປະກອນກອບເປັນຕົ້ນເອົາມີເຮັດຫຸ່ນ, ຫຼີ້ນສີໜ້າຫຼືເອົາຜ້າເຮັດເປັນຕຸກກະຕາປະກອບ, ກໍສາມາດເຮັດໃຫ້ການເລົ່ານິທານຂອງແມ່ມີສີສັນ ເພີ່ມຈິນຕະນາການຂອງລູກໄດ້ຫລາຍຂຶ້ນ.
ຄວນສັງເກດທ່າທີຂອງລູກ ວ່າຕ້ອງການຟັງຫລືຕ້ອງການເຮັດກິດຈະກຳອື່ນ ໆ ຫລືບໍ່ ເພາະບໍ່ຄວນຝືນອ່ານຈົນລູກຮູ້ສຶກຫງຸດຫງິດບໍ່ປະທັບໃຈກັບການຟັງເຈົ້າເລົ່ານິທານ.
ຖ້າຢາກໃຫ້ລູກເກີດຄວາມເຄີຍຊິນກໍຕ້ອງອ່ານໃຫ້ຟັງເປັນປະຈຳເທົ່າທີ່ເຈົ້າແລະລູກນ້ອຍສະດວກເຊັ່ນ: ເວລາເວລາກ່ອນນອນ ເປັນຕົ້ນເລີ່ມຕົ້ນອ່ານໄດ້ໄວເທົ່າໃດກໍຍິ່ງສົ່ງຜົນດີຕໍ່ລູກນ້ອຍ.
ຖ້າລູກນ້ອຍຂອງເຈົ້າແກະປື້ມຫລືຈີກປື້ມໄປນຳ ກໍບໍ່ຄວນກ່າວຫລືເຖິງກັບລົງໂທດລູກ ເພາະຄວາມສົນໃຈຂອງລູກເປັນພຽງໄລຍະເວລາສັ້ນໆ ເປັນເລື່ອງປົກກະຕິສຳລັບເດັກນ້ອຍ, ດັ່ງນັ້ນ ຄວນເລືອກຫນັງສືທີ່ເໝາະກັບໄວຂອງລູກທັງເນື້ອໃນ, ຄຸນນະພາບ ຂອງປື້ມ ແລະວັດຖຸດິບໃນການນຳມາຜະລິດ.
ເລົ່ານິທານຢ່າງສະໝໍ່າສະເໝີເປັນປະຈຳຈົນລູກເກີດຄວາມເຄີຍຊິນແລະຮັກການອ່ານ.
