ຮັກໃນການອ່ານ ສ້າງໄດ້ຕັ້ງແຕ່ໄວເດັກນ້ອຍ
"ຫາກຈະປັບໃຫ້ສັງຄົມເປັນແຫ່ງປັນຍາ ຈຳເປັນຕ້ອງເລັ່ງສ້າງວັດທະນະທຳການອ່ານໃຫ້ເປັນວັດທະນະທຳຂອງຊາດ ແລະເຮັດໃຫ້ເກີດທົ່ວແຜ່ນດິນ" ສ. ນົບ. ປະເວດ ວະສີ
ການອ່ານປຽບເຫມືອນປະຕູບານໃຫຍ່ ທີ່ເປີດອອກໄປສູ່ການຮຽນຮູ້ໂລກກວ້າງ, ສູ່ການສ້າງຈິນຕະນາການ ແລະຄວາມຄິດສ້າງສັນ. ຊຶ່ງຈຳເປັນຢ່າງຍິ່ງຕໍ່ການພັດທະນາສະຕິປັນຍາເດັກນ້ອຍ, ດັ່ງນັ້ນບໍ່ຄວນເບິ່ງຂ້າມຄວາມສຳຄັນຂອງການອ່ານແລະບໍ່ຄວນທີ່ຈະຊັກຊ້າໃນການປູກຈິດສຳນຶກຮັກໃນການອ່ານໃຫ້ກັບເລັກນ້ອຍ, ເພື່ອໃຫ້ເດັກນ້ອຍຮູ້ຮັກການອ່ານແຕ່ມື້ນີ້ເປັນຕົ້ນໄປ.
ເລີ່ມສ້າງນິໃສການອ່ານແຕ່ເດັກນ້ອຍໄດ້ຜົນແທ້ຫຼືບໍ່?
ປະສາດສຳຜັດດີ: ເມື່ອໄດ້ເຫັນຮູບພາບ, ລັກສະນະຮູບຊົງ ໄດ້ຍິນສຽງເວົ້າໄດ້ສຳຜັດຜິວນິທານ, ໄດ້ຝຶກມືຫຍິບຈັບຫລືອື່ນໆ, ນອກຈາກຈະໄດ້ພັດທະນາປະສາດສຳຜັດແລ້ວຍັງຊ່ວຍໃຫ້ລູກໃກ້ຊິດຄຸ້ນເຄີຍກັບຫນັງສື ກາຍເປັນຄວາມມັກໃນທີ່ສຸດ.
ສະຫມອງດີ: ເມື່ອໄດ້ຝຶກການຟັງສຽງອ່ານຂອງພໍ່ແມ່ ໄດ້ຮຽນຮູ້ຄຳ, ເມື່ອເວົ້າໄດ້ ກໍສອນຫັດອ່ານອອກສຽງພ້ອມກັບໄດ້ເຫັນຕົວອັກສອນເຖິງຍັງບໍ່ຮູ້ຄວາມຫມາຍ, ແຕ່ກໍຖືວ່າໄດ້ຝຶກອອກສຽງເວົ້າ, ໄດ້ຮຽນຮູ້ຄຳສັບ ຈຶ່ງຊ່ວຍພັດທະນາສະຫມອງໄດ້ດີດ້ວຍ.
ຈິນຕະນາການດີ: ຮູບພາບສວຍງາມ ທີ່ເຫັນ ເນື້ອຫາສະໜຸກສະໜານ, ທີ່ໄດ້ຟັງຈັງຫວະສຽງໜ້າຟັງທີ່ພໍ່ແມ່ອ່ານນ້ຳສຽງຂຶ້ນລົງ, ໄດ້ຍິນເຫລົ່ານີ້ຈະຊ່ວຍກະຕຸ້ນຈິນຕະນາການໄດ້ດີ, ຍິ່ງໄດ້ຟັງເລື້ອຍໆ ຍິ່ງຊ່ວຍໃຫ້ຮຽນຮູ້ສິ່ງຕ່າງໆ ແລະຈິນຕະນາການເພີ່ມຂຶ້ນ
ເຄື່ອງຫລິ້ນທີດີ: ປື້ມນິທານເປັນເຫມືອນຂອງຫລິ້ນຊັ້ນຢ້ຽມອີກອັນໜຶ່ງຂອງລູກ,ທົດລອງໃຊ້ນິທານເຊື່ອມໂຍງໄປກັບການຫລິ້ນເຊັ່ນ: ອຸ້ມລູກນັ່ງຕັກເປີດນິທານເລົ່າເລື່ອງ ພ້ອມກັບຊວນລູກຫລິ້ນໄປເລົ່ານິທານໄປນຳ, ລູກກໍຈະຮູ້ສຶກດີ ຮູ້ຈັກເຊື່ອມໂຍງສິ່ງຕ່າງໆ ກັບນິທານໄດ້ດີ.
ສະມາທິດີ: ໄວເດັກນ້ອຍ, ສຽງທີ່ໜ້າຟັງທີ່ສຸດຄື: ສຽງພໍ່ແມ່ ເມື່ອໄດ້ຍິນສຽງພໍ່ແມ່ ລູກຈະຕັ້ງໃຈຟັງ ຊຶ່ງເປັນການສ້າງສະມາທິໃຫ້ຈິດໃຈຈົດຈໍ່ຢູ່ກັບການຟັງ, ສະມາທິທີ່ເພີ່ມຂຶ້ນເລື່ອຍໆນີ້, ຈະຊ່ວຍໃຫ້ລູກເຮັດກິດຈະກຳອື່ນສຳເລັດລຸລ່ວງໄປໄດ້ເຊັ່ນກັນ.
ໄດ້ທ່ອງໂລກກວ້າງ: ເມື່ອໄດ້ຍິນໄດ້ຟັງເລື່ອງຕ່າງໆ ໄດ້ພົບເຫັນພາບທີ່ລູກບໍ່ເຄີຍເຫັນ, ບໍ່ເຄີຍໄປ ຖືເປັນການເປີດໂລກຮຽນຮູ້ຂອງສະຫມອງ ຈຶ່ງຊ່ວຍເພີ່ມປະສົບການ ໃໝ່ໆ ໃຫ້ລູກເປັນເດັກນ້ອຍທີ່ຮອບຮູ້ມີວິທີຄິດທີ່ດີ, ເບິ່ງໂລກທີ່ກວ້າງໄກຂຶ້ນ.
ເລືອກຫນັງສືອ່ານທີ່ດີ
ຫນັງສືສຳລັບເດັກນ້ອຍຄວນມີຮູບຮ່າງໂຄ້ງມົນ, ບໍ່ມີມຸມແຫລມຄົມ ບໍ່ວ່າຈະເປັນປື້ມເຫຼັ້ມນ້ອຍຫລືເຫຼັ້ມໃຫຍ່, ເຮັດຈາກວັດສະດຸທີ່ທົນທານແຂງແຮງ, ເປັນວັດດຸ Non-Toxic, ຖ້າລູກນຳເຂົ້າປາກກໍບໍ່ເປັນອັນຕະລາຍ, ເໝາະສົມກັບໄວໂດຍເລືອກເຫຼັ້ມທີ່ດຶງດູດຄວາມສົນໃຈລູກ, ມີສີສັນສົດໃສມີເນື້ອຫາບໍ່ຍາວເກີນໄປ, ເພາະຄວາມສົນໃຈຂອງລູກຍັງຢູ່ໃນໄລຍະສັ້ນໆ ຫາກເລື່ອງຍາວ ແຖມຄົນເລົ່າບໍ່ໄດ້ສອດແຊກຄວາມມ່ວນຊື່ນໄປນຳ, ກໍຈະເຮັດໃຫ້ລູກເບື່ອການອ່ານໄດ້ງ່າຍໆຄືກັນ.
