ລົດທີ່ລົງທະບຽນຢູ່ປັກກິ່ງ ແລະ ລົງບັນຊີດຳບໍລິສັດບໍ່ດີເທິງເວັບໄຊ
(GMT+08:00) 2012-04-26 15:00:00 cri
ສະບາຍດີມິດລາຍການທີ່ຮັກແພງ! ມາອີກແລ້ວໜຸ່ມໃຫຍ່ກັບລາຍການເບິ່ງເມືອງຈີນ! 19 ໂມງທຸກມື້ທາງ CRI FM 93Mhz ແຫ່ງນີ້ບໍ່ເຄີຍຂາດ! ມື້ນີ້ວັນອັງຄານ ທີ 21 ກຸມພາແລ້ວໄດ໋ທ່ານຜູ້ຟັງ! ອີກ 6 ມື້ເດືອນກຸມພາກໍ່ໝົດແລ້ວໄດ໋ນິບຶດດຽວໜຶ່ງ ປີ 2012 ກໍ່ຊິໝົດໄປສອງເດືອນແລ້ວ! ອັນເວລານິຕັ້ງວ່ອງໄວ ແລ່ນໄປແບບບໍ່ຖ້າໃຜອີ່ຫຼີ! ບຸນຊ້າງໄຊຍະບຸລີກໍ່ຫາກໍ່ຜ່ານໄປໄດ້ດ້ວຍຄວາມເບີກບານມ່ວນຊື່ນເນາະທ່ານຜູ້ຟັງ! ທັງນັກທ່ອງທ່ຽວພາຍໃນແລະຕ່າງປະເທດກໍ່ບັກຫຼາຍໆໃນວັນສຸກຜ່ານມານີ້ ມີຊ້າງເຂົ້າຮ່ວມງານເຂົ້າຮ່ວມສະແດງຕັ້ງວ່າ 63 ໂຕພຸ້ນນະ! ແຕ່ວ່າມັນເປັນຕາໜ່າຍຫັ້ນລະແມ່ນ ມີຄົນບໍ່ດີສ້າງຂ່າວລືອະກຸສົນຂື້ນມາວ່າມີຊ້າງຢຽບເດັກນ້ອຍ 5 ປິຕາຍໃນງານວ່າຊັ້ນ! ລະກະຊ່າກັນຂື້ນບັກໄວໆໃນວັນເສົາວັນທິດຜ່ານມານີ້ນ່າ! ບາງຄົນກໍ່ໂທຖາມກັນອຶກກະທຶກ! ໜຸ່ມໃຫຍ່ບໍ່ຮູ້ຫຍັງດັອກ ວັນອາທິດຜ່ານມານີ້ກໍ່ພັກຜ່ອນຢູ່ເຮືອນນຳຄອບນຳຄົວ, ລະມີໝູ່ຢູ່ໄຊຍະພຸ້ນໂທມາຫາ ເພິ່ນກໍ່ເປັນຜູ້ໜຶ່ງທີ່ຮັບຜິດຊອບໃນງານ ລະກະຮັບຜິດຊອບເລື່ອງຊ້າງໂດຍສະເພາະ ເພິ່ນກໍ່ວ່າຊ່ວຍແກ້ຂ່າວອະກຸສົນໃຫ້ແດ່ເດີ້ ມີພວກບໍ່ດີປ່າວຂ່າວວ່າ ມີຊ້າງຢຽບເດັກນ້ອຍຕາຍໃນງານຊ້າງມັນບໍ່ມີເດີ້ວ່າຊັ້ນ! ພວກເຮົາຜູ້ເຮັດວຽກສື່ມວນຊົນກໍ່ມາແກ້ຂ່າວຊ່ວຍກັນແນວນີ້ລະ! ລາຍການຂ່າວຍາມເຊົ້າໂທລະພາບເພິ່ນກໍ່ແກ້ໄປແລ້ວ! ຈາກເຫດການນີ້ນິ ມັນບອກໃຫ້ພວກເຮົາຮູ້ວ່າໃນສັງຄົມລາວຍັງມີກຸ່ມຄົນບໍ່ດີຈຳນວນໜຶ່ງລີ້ຊ່ອນປ່ອນຕົວຢູ່ໄດ໋ທ່ານຜູ້ຟັງ! ມີງານບຸນມີໂອກາດໃດສຳຄັນມັນພະຍາຍາມສ້າງຂ່າວລືທີ່ບໍ່ມີມູນຖານຄວາມຈິງຂື້ນມາໂລດ ເພື່ອໃຫ້ຄົນແຕກຕື່ນລະກະເວົ້າປາກຕໍ່ປາກກັນໄປແບບບໍ່ຮູ້ຄວາມຈິງຫັ້ນນະ! ສະນັ້ນລະປີນີ້ເປັນປີສຳຄັນເປັນປີທ່ອງທ່ຽວລາວ ເປັນປີທີ່ລາວເປັນເຈົ້າພາບຈັດກອງປະຊຸມອາຊີ-ເອີຣົບ! ທຸກຄົນຊ່ວຍກັນເປັນຫູເປັນຕາຊ່ວຍເຈົ້າໜ້າທີ່ບ້ານເມືອງເດີ້! ໄດ້ເຫັນ ໄດ້ຍິນ ແນວບໍ່ດີບໍ່ຄັກທີ່ຄົນບໍ່ດີມັກຈະທຳລາຍຄວາມສະຫງົບສຸກ ຂ້ຽວແຈ້ງເຈົ້າໜ້າທີ່ບ້ານເມືອງຜູ້ຢູ່ໃກ້ທີ່ສຸດໂລດ ເພື່ອຈັດການມັນ! ບໍ່ຊ່ວຍກັນແທ້ລະວັງພາດໄດ໋ ເພາະວ່າພວກນີ້ມັນພະຍາຍາມຫາທຸກຊ່ອງຫ່ວາງ ຫາຍາມເຮົາເຜີຕົວ ກໍ່ຄວາມວຸ້ນວາຍຂື້ື້ນໄດ໋! ເອົາ, ທຸກຄົນເປັນເຈົ້າຊ່ວຍກັນເພາະວ່າບ້ານເມືອງສະຫງົບ ເຮົາທຸກຄົນນີ້ກໍ່ມີຄວາມສຸກ, ແມ່ນບໍ່ລະ! ເອົາ, ບັດນີ້ມາຟັງເພງຊຸດທຳອິດຈາກລາຍການເບິ່ງເມືອງຈີນເນາະ! ເພງຈົບແລ້ວຈະກັບມາເວົ້າສູ່ຟັງວ່າດຽວນີ້ຢູ່ນະຄອນຫຼວງປັກກິ່ງດຽວນີ້ມີລົດມາລົງທະບຽນໜ້ອຍຫຼາຍຊ່ຳໃດ? ຫຼັງຈາກນັ້ນຈະເອົາເລື່ອງເຈົ້າໜ້າທີ່ຈີນເພິ່ນເອົາຊື່ຂອງບັນດາບໍລິສັດທີ່ບໍ່ໂປ່ງໃສບໍ່ຈະແຈ້ງເຂົ້າໃນບັນຊີດຳ ແລ້ວເຜີຍແຜ່ຂື້ນໃນເວັບໄຊໃຫ້ທົ່ວປະເທດຮູ້! ເລື່ອງລາວຈະເປັນແນວໃດຈັກໜ້ອຍໜຸ່ມໃຫຍ່ກັບມາ!
ເພງ
ຜ່ານໄປແລ້ວສອງເພງຈາກລາຍການ. ຢ່າລືມ 711477, 9300! 2-3 ມື້ກ່ອນໜຸ່ມໃຫຍ່ກໍ່ເວົ້າເລື່ອງລົດຕິດແທ້ຕິດວ່າຢູ່ວຽງຈັນນິເນາະ! ແຕ່ວ່າຢູ່ນະຄອນຫຼວງປັກກິ່ງຂອງຈີນພຸ້ນເລື່ອງນີ້ກໍ່ບໍ່ແມ່ນທຳມະດາເລີຍເປັນໜຶ່ງໃນນະຄອນໃຫຍ່ໆຂອງໂລກທີ່ລົດຕິດຫຼາຍເລີຍລະ! ອັນນີ້ກໍ່ຍ້ອນລົດນັບມື້ນັບຫຼາຍຂື້ນ ຄົນມີເງິນຊື້ລົດຫຼາຍເລີຍລະ! ຂະໜາດວ່າມີມາດຕະການຈຳກັດຈຳນວນລົດໃຫມ່ແລ້ວໄດນິຍັງຫຼາຍຢູ່! ຫຼ້າສຸດມາຮອດວັນທີ 15 ເດືອນນີ້ຫຼືວ່າວັນພຸດຜ່ານມານີ້ນ່າ! ລົດໃຫຍ່ທີ່ຂື້ນທະບຽນນະຄອນຫຼວງປັກກິ່ງມີຮອດ 5 ລ້ານ ກັບ 1ໝື່ນ 7 ພັນກ່ວາຄັນແລ້ວທ່ານຜູ້ຟັງ! ໃນນີ້ເພີ່ມຂື້ນໃນປີ 2011 ຜ່ານມານີ້ 173.000 ຄັນ. ຄືເວົ້າຫັ້ນລະວ່າຄັນບໍ່ມີມາດຕະການກຳຈັດຈຳນວນລົດໃຫຍ່ທີ່ເພິ່ນເລີ່ມນຳໃຊ້ມາແຕ່ປີກາຍນີ້ແຮ່ງຊິເພີ່ມຂື້ນໄວກ່ວານີ້! ມາດຕະການນັ້ນແມ່ນຫຍັງ? ກໍ່ແມ່ນການຈັບສະຫຼາກເອົາປ້າຍທະບຽນລົດໄດ້ກ່ອນແລ້ວເຈົ້າຈັ່ງມີສິດໄປຊື້ລົດ! ມາເບິ່ງຕົວເລກປີ 2010 ທີ່ເພິ່ນຍັງບໍ່ທັນນຳໃຊ້ມາດຕະການນີ້ ແຕ່ລະເດືອນລົດເພີ່ມຂື້ນສະເລ່ຍ 66.000 ຄັນຕໍ່ເດືອນໄດ໋ທ່ານຜູ້ຟັງ! ສະນັ້ນລະຄັນບໍ່ມີມາດຕະການໃໝ່ນີ້ ແລະລົດໃໝ່ຢູ່ປັກກິ່ງກໍ່ຈະເພີ່ມຂື້ນທຸກເດືອນໃນຈຳນວນ 66.000ຄັນນີ້! ລົດຢູ່ປັກກິ່ງຂື້ນເປັນ 5 ລ້ານຄັນມາແຕ່ເດືອນມີນາປີກາຍນີ້ແລ້ວ! ກະຖືວ່າມາດຕະການໃໝ່ນີ້ເພີ່ມຂື້ນຊ້າລົງຫຼາຍເຕີບ ມາດຕະການໃໝ່ນີ້ເພິ່ນເລີ່ມໃຊ້ແຕ່ເດືອນມັງກອນປີກາຍນີ້ພຸ້ນລະມານະ! ຄືເພິ່ນວາງໂຄຕ້າອອກວ່າເດືອນໜຶ່ງອະນຸຍາດໃຫ້ຄົນປັກກິ່ງຊື້ລົດໃໝ່ຈັກຄັນ? ປີກາຍນີ້ໝົດປີເພິ່ນອະນຸຍາດແຕ່ 240.000 ຄັນທໍ່ນັ້ນ ຄືເພິ່ນເຮັດແນວນີ້! ຄອບຄົວໜຶ່ງອະນຸຍາດໃຫ້ມີລົດເກງແຕ່ຄັນດຽວ! ພວກມີແລ້ວບໍ່ໃຫ້ຮ່ວມຈັບສະຫຼາກ! ໃຜບໍ່ທັນມີກໍ່ໄປເຂົ້າຮ່ວມຈັບສະຫຼາກ ຄັນໂຊກດີຈົກໄດ້ປ້າຍທະບຽນລົດແລ້ວກໍ່ສາມາດໄປຊື້ລົດໃໝ່ໄດ້! ຄັນໂຊກບໍ່ດີກໍ່ລໍຖ້າຈົກເດືອນຕໍ່ໄປເລື້ອຍໆຈົນກ່ວາຈະໂຊກດີພຸ້ນແລ້ວ! ໄລຍະໂຊກບໍ່ທັນດີມີເງິນກໍ່ຊື້ບໍ່ໄດ້! ກໍ່ອົດໃຈຂີ່ລົດໄຟໃຕ້ດິນ, ລົດເມ, ລົດແທັກຊີ ຫຼື ລົດຖີບໄປກ່ອນ! ເຫັນບໍ່ຢູ່ເມືອງຈີນບໍ່ແມ່ນວ່າມີເງິນແລ້ວຊິເຮັດໄດ້ທຸກຢ່າງໄດທ່ານຜູ້ຟັງ! ຍ້ອນມາດຕະການກຳຈັດຈຳນວນໂຄຕ້າລົດໃໝ່ໃນປັກກິ່ງຕໍ່ປີນີ້ລະ! ເຈົ້າໜ້າທີ່ກ່ຽວຂ້ອງກໍ່ຄາດວ່າຮອດປີ 2016 ຈຳນວນລົດຢູ່ປັກກິ່ງຈັ່ງຊິຂື້ນຮອດ 6 ລ້ານຄັນ. ເປັນຈັ່ງໃດດີບໍ່? ຄັນດີທາງນະຄອນຫຼວງວຽງຈັນຈະເອົາມາໃຊ້ ເພິ່ນກໍ່ບໍ່ໄດ້ຫວງລິຂະສິດດັອກ ເພິ່ນແກ້ໄຂການຈະລາຈອນຕິດຂັດໜັກ ແລະມົນລະພິດທາງອາກາດຊ່ວຍກັນ! ເອົາ, ມາມ່ວນກັບເພງອີກສອງເພງກ່ອນແລ້ວຈັ່ງຊິກັບມາເວົ້າສູ່ຟັງວ່າ ເຈົ້າໜ້າທີ່ຈີນເພິ່ນນຳເອົາລາຍຊື່ຂອງບໍລິສັດທີ່ຢູ່ໃນບັນຊີດຳ Black List ຂື້ນເວັບໄຊນັ້ນເພິ່ນເຮັດແນວໃດ? ເພື່ອຫັຍງ?
ເພງ
ຂະນະນີ້…….. ບັດນີ້ຈະລົມເລື່ອງກ່ຽວກັບມາດຕະການອີກອັນໜຶ່ງຂອງຈີນໃນການຕ້ານການສໍ້ລາດບັງຫຼວງ ແລະ ການໃຫ້-ຮັບສິນບົນ! ໄອຍະການປະຊາຊົນຈີນແຈ້ງໃຫ້ຊາບໃນວັນພະຫັນຜ່ານມານີ້ລະວ່າ! ສ້າງຂໍ້ມູນການອອນລາຍແຫ່ງຊາດທີ່ຮັກສາຂໍ້ມູນຂອງບຸກຄົນແລະບໍລິສັດເອກກະຊົນທີ່ມັກມີພຶດຕິກຳໃຫ້ສິນບົນແກ່ເຈົ້າໜ້າທີ່ເພື່ອໃຫ້ໄດ້ໂຄງການ ແມ່ນຖືກບັນຈຸເຂົ້າໃນບັນຊີດຳແລ້ວ! ອັນນີ້ກໍ່ເພື່ອເພີ່ມກົນໄກໃນການສໍ້ລາດບັນຫຼວງໃຫ້ໄດ້ດີຂື້ນຕື່ມອີກບາດກ້າວໜຶ່ງ! ສ້າງຂໍ້ມູນນີ້ສາມາດເຊື່ອມຕໍ່ກັບທຸກທ່ານຂໍ້ມູນທຸກທ້ອງຖິ່ນ ແຕ່ຕົວເມືອງຈົນຮອດຊົນນະບົດ ເພື່ອຈະໄດ້ສອດສ່ອງຈັບຕາ ພວກນັກທຸລະກິດທີ່ມັກໃຫ້ສິນບົນແກ່ເຈົ້າໜ້າທີ່ລັດ! ເປີດອອນລາຍຂື້ນມາປັບກໍ່ເຫັນຊື່ປະຫວັດຂອງບໍລິສັດນັ້ນໆໂລດລະເພື່ອຈະໄດ້ລະວັງ! ທ່ານ ຫູ ເຈີ້ຈຸນ ທີ່ຮັກສາການໄອຍະການໃຫຍ່ບອກວ່າ: ລະບົບອອນລາຍແຫ່ງຊາດໃໝ່ນີ້ ມັນຈະຊ່ວຍໃຫ້ເຈົ້າໜ້າທີ່ສືບສວນ ສອບສວນ ຜູ້ພິພາກສາ ທະນາຍຄວາມສຳຫຼວດ ສາມາດເອົາໄປເປັນຂໍ້ມູນໃນການສືບສວນຄະດີກ່ຽວກັບການໃຫ້ແລະຮັບສິນບົນໄດ້, ໃຜຢາກໄດ້ຂໍ້ມູນດ້ານນີ້ກໍ່ຈະສະດວກວ່ອງໄວຂື້ນກ່ວາເກົ່າ ເຂົ້າໄປຫາລະບົບກໍ່ຊອກໄດ້ໂລດແລ້ວ, ສົມມຸດບໍລິສັດໜຶ່ງເພິ່ນເຮັດທຸລະກິດບໍ່ໂປ່ງໃສ ໃຫ້ສິນບົນແກ່ເຈົ້າໜ້າທີ່ຢູ່ເຂດແຂວງທາງເໜືອທີ່ຕິດກັບມົງໂກນ, ຣັດເຊຍ ຫຼື ເກົາຫຼີພຸ້ນ! ເຮັດຜິດແລ້ວກໍ່ຫອບຈ້ອງມາຊອກໃຫ້ສິນບົນເພື່ອໃຫ້ໄດ້ໂຄງການຢູ່ທາງໃຕ້ແຂວງຢູນນານ ຊານແດນ ລາວ-ມຽນມາ ພີ້, ຫຼືເຂດກວາງຊີທີ່ຕິດກັບຫວຽດນາມພຸ້ນ! ເຈົ້າໜ້າທີ່ເຂດແຂວງເຫຼົ່ານີ້ ຫຼື ຜູ້ທີ່ຈະຮ່ວມມືຮ່ວມຫຸ້ນ ຫຼືຄູ່ທຸລະກິດກໍ່ເຂົ້າໄປໃນລະບົບຂອງອະທິໄອຍະການແຫ່ງຊາດໂລດ ກໍ່ຮູ້ໂລດວ່າ ໂອ່, ນັກທຸລະກິດຜູ້ນີ້ ບໍລິສັດນີ້ ບໍ່ໜ້າຄົບ ເພາະມັນອາດຈະທຳລາຍຊື່ສຽງຖານະຕຳແໜ່ງເຮົາໃນອະນາຄົດ ເປັນຈັ່ງຊັ້ນໄດ໋! ເອົາ, ປ່ຽນບັນຍາກາດຟັງເພງມ່ວນໆແລ້ວຈັ່ງມາລົມກັນຕໍ່!
ເພງ
ທ່ານພວມຟັງລາຍການເບິ່ງເມືອງຈີນທີ່ໜຸ່ມໃຫຍ່ຈັດຢູ່! ຄືນນີ້ໜຸ່ມໃຫຍ່ພວມລົມເລື່ອງຈີນເອົາລາຍຍຊື່ນັກທຸລະກິດແລະບໍລິສັດທີ່ມັກໃຫ້ສິນບົນຈົດເຂົ້າບັນຊີດຳ ແລ້ວເອົາຂື້ນລະບົບ ເຄືອຂ່າຍອອນລາຍ ທີ່ສາມາດໄດ້ກວດກາໄດ້ໃນທົ່ວປະເທດ! ພາກສ່ວນກ່ຽວຂ້ອງຂອງຈີນເພິ່ນບອກວ່າ: ສະຖາບັນ, ໜ່ວຍງານ, ອົງການ ຫຼື ບຸກຄົນຕ້ອງການຂໍ້ມູນພວກນີ້ ສາມາດຂໍຮູ້ຂໍ້ມູນຂອງນັກທຸລະກິດ ແລະ ບໍລິສັດທີ່ກຳລັງດຳເນີນທຸລະກິດແບບບໍ່ຈະບໍ່ແຈ້ງພວກນີ້ໄດ້! ພວກທີ່ມັກໃຫ້ສິນບົນແກ່ເຈົ້າໜ້າທີ່ໃນການເປີດຊອງປະມູນໂຄງການໃຫຍ່ໆກໍ່ຢູ່ໃນບັນຊີນີ້ລະ! ຂໍ້ມູນນີ້ອອກແບບມາເພື່ອໃຫ້ຄວາມສະດວກແກ່ເຈົ້າໜ້າທີ່ສືບສວນ ສອບສວນ ເພາະວ່າໃນຫຼາຍປີຫຼັງໆມານີ້ ກໍລະນີຄະດີໃຫ້ແລະຮັບສິນບົນມັນເພີ່ມຂື້ນຫຼາຍ! ການໃຫ້ສິນບົນເຂົາກໍ່ມີການປັບຫຼາຍຮູບຫຼາຍແບບ ສະຫຼັບສັບຊ້ອນກ່ວາເກົ່າ! ໂດຍສະເພາະແມ່ນເຂດທີ່ມີການພັດທະນາຫຼາຍ ເຂດຈະເລີນໄວ! ພວກບໍລິສັດທີ່ຢູ່ໃນບັນຊີດຳນີ້ໄປໃສກໍ່ຈະຖືກເຈົ້າໜ້າທີ່ ຫຼື ຄູ່ຮ່ວມຈັບຕາໄດບາດນີ້ນະ ໄປໃສກໍ່ຊິໄດ້ຈອບໄປປານແມວຊິລັກກິນປາຢ້າງພຸ້ນແລ້ວ! ນອກນັ້ນກໍ່ຍັງຖືກກີດກັ້ນບໍ່ໃຫ້ເຂົ້າຮ່ວມການປະມູນໂຄງການ ລະກະຈະບໍ່ໄດ້ຮັບການຮ່ວມມື ແລະອຳນວຍຄວາມສະດວກໄດບາດນີ້ນະ! ນັບແຕ່ປີ 2006 ມານີ້ ອະທິໄອຍະການທຸກລະດັບຂອງຈີນໄດ້ຂໍ້ມູນທັງໝົດ 1 ລ້ານ 3 ແສນ 9 ໝືື່ນຂໍ້ມູນຂອງບໍລິສັດ ແລະນັກທຸລະກິດ 3.075 ຄົນ ຖືກຈັດເຂົ້າໃນບັນຊີດຳ. ໂອ່, ຄັນຖືກຈັດເຂົ້າແລ້ວກໍ່ຫາກິນຍາກ ດຳເນີນທຸລະກິດຍາກລະເນາະບາດນີ້! ແຕ່ກໍ່ດີ! ຄັນບໍ່ເຮັດແນວນີ້ ນັກທຸລະກິດທີ່ບໍ່ດີ ບໍ່ຊື່ສັດປອດໂປ່ງໃສພວກນີ້ລະ ທີ່ໄປເຮັດໃຫ້ເຈົ້າໜ້າທີ່ລັດທີ່ມີຖານະຕຳແໜ່ງມີປະຫວັດດີໆເສຍຄົນຍ້ອນທົນຕໍ່ອຳນາດເງິນມາຫຼາຍລາຍແລ້ວ! ຄົນພັກຄົນລັດສ້າງອອກມາ ປັ້ນອອກມາເພື່ອຮັບໃຊ້ຊາດ ຮັບໃຊ້ປະຊາຊົນ ຢ່າງບໍລິສຸດຜຸດຜ່ອງ ແລ້ວມາເສຍທາດຂາດຄຸນຍ້ອນນັກທຸລະກິດພວກນີ້ຕະຫຼອດ ແລ້ວເຮັດແນວໃດມັນຊິສ້າງທັນເນາະ?
ເພງ
ຈົບ