ງ່ຽງຫູຟັງສຽງປະຊາຊົນ
ສະບາຍດີທ່ານຜູ້ຟັງຂອງ CRI FM 93Mhz ທຸກທ່ານ! ຫຼັງຈາກຟັງ ເອກະສັນ ກັບ ກະຕ່າຍເວົ້າຂ່າວກິລາສູ່ຟັງແລ້ວຮອດ 19 ໂມງປັບກໍ່ແມ່ນໜ້າທີ່ຂອງໜຸ່ມໃຫຍ່ອາລົມດີທີ່ຈະນຳເອົາເລື່ອງຕ່າງໆທີ່ໜ້າສົນໃຈຂອງຈີນມາເວົ້າສູ່ຟັງພ້ອມທັງເພງຈີນມ່ວນໆທຸກມື້ເພາະວ່າແຕ່ເວລາ 19 ໂມງເຖິງ 19:50 ແມ່ນເວລາຂອງລາຍການເບິ່ງເມືອງຈີນ! ພົບກັນແລງນີ້ກະແມ່ນແລງທີ່ມະນຸດເງິນເດືອນທັງຫຼາຍຄອງຄອຍລະເນາະ! ແມ່ນແລງວັນສຸກ, ທີ 3 ກຸມພາ ແມ່ນແລງທີ່ທຸກຄົນຈະໄດ້ພັກມີເວລາພັກຜ່ອນຢູ່ກັບຄອບຄົວຢູ່ກັບຄົນທີ່ຕົນເອງຮັກສອງມື້ເສົາກັບອາທິດ! ເອົາ, ຈັ່ງໃດກະໃຊ້ເວລາທ້າຍສັບປະດາທ້າຍອາທິດແນວນີ້ຢູ່ນຳຄອບຄົວ ສ້າງຄວາມຮັກ ສ້າງຄວາມອົບອຸ່ນແກ້ໄຂວຽກງານຄອບຄົວ ແບບວຽກລັດບໍ່ໃຫ້ຂາດວຽກລາດບໍ່ໃຫ້ເສຍຢ່າງກຸ້ມຄ່າກໍ່ແລ້ວກັນເນາະ! ເພາະວ່າຄອບຄົວກໍ່ສຳຄັນຫຼາຍເຖິງທ່ານຈະມີໜ້າທີ່ການງານປະສົບຜົນສຳເລັດສູງ ບາດຫຼຽວມາເບິ່ງຄອບຄົວຂີ້ແມວເຕັມກະດົ້ງມີແຕ່ຄວາມສັບສົນວຸ້ນວາຍພໍ່-ແມ່-ລູກຫັນຫຼັງໃສ່ກັນ ເບິ່ງໜ້າກັນບໍ່ອອກແນວນີ້ທ່ານຈະສະບາຍໃຈຢູ່ບໍ່ລະເນາະ! ສະນັ້ນລະຈຶ່ງວ່າວຽກລາດກັບວຽກຫຼວງຄວນໃຫ້ມັນສົມດຸນດ່ຽງກັນ ສຳຄັນທັງສອງຄວນປະສົບຜົນສຳເລັດໄປພ້ອມໆກັນ! ບາງຄົນກໍ່ເອົາຄອບຄົວໜັກເກີນໄປການສວາຍເລີກໄວ ຫຼື ສວຍໂອກາດເອົາເວລາລັດຖະການໄປເຮັດວຽກສ່ວນຕົວ ເຮັດວຽກຄອບຄົວຕະຫຼອດແລ້ວມັນສິເປັນແບບຢ່າງທີ່ດີໃຫ້ພະນັກງານລຸ້ນໃໝ່ໜຸ່ມນ້ອຍໄດ້ແນວໃດ? ບາງຄົນຊ້ຳພັດເອົາວຽກລັດໜັກໂພດຈົນບໍ່ມີເວລາໃຫ້ຄອບຄົວລູກເຕົ້າເລີຍ ອັນນີ້ກໍ່ອັນຕະລາຍຄືກັນ, ໜຸ່ມໃຫຍ່ຄິດວ່າຖ້າທ່ານຮູ້ຊັບຊ້ອນວຽກງານ, ຊັບຊ້ອນເວລາເຮັດຢ່າງມີແຜນການ ເຖິງວຽກຈະຫຼາຍປານໃດ? ເຖິງການພັບປະສັງສັນກັບແຂກ, ກັບໝູ່ເພື່ອນຈະຫຼາຍປານໃດ? ທ່ານກໍ່ພໍມີເວລາໃຫ້ຄອບຄົວຢູ່ດັອກ! ເອົາ, ວັນສຸກກໍ່ໃຫ້ທ່ານທຸກຄົນ ທຸກຄອບຄົວຈົ່ງມີຄວາມສຸກເນາະ! ສຳລັບຄືນນີ້ເລື່ອງທີ່ໜຸ່ມໃຫຍ່ຈະເອົາມາເລົ່າໃຫ້ຟັງແທ້ໆກໍ່ແມ່ນເລື່ອງລັດຖະບານຈີນກໍ່ຄືອຳນາດການປົກຄອງທ້ອງຖິ່ນເຂດແຂວງເມືອງຕ່າງໆເພິ່ນງ່ຽງຫູຟັງປະຊາຊົນ ແລະ ຊອກຫາຊ່ອງທາງແກ້ໄຂຄວາມທຸກຄວາມເດືອດຮ້ອນຂອງເຂົາເຈົ້າແນວໃດ? ແຕ່ວ່າຕອນນີ້ຟັງເພງມ່ວນໆສອງເພງກ່ອນເນາະ!
ເພງ
ຜ່ານໄປສອງເພງຈາກລາຍການເບິ່ງເມືອງຈີນຂອງ CRI FM 93Mhz ທີ່ມີໃຫ້ທ່ານຟັງທຸກຄືນໃນເວລາດຽວກັນນີ້! ເວົ້າເລື່ອງການງ່ຽງຫູຟັງຄຳຄິດຄຳເຫັນ ຄວາມມຸ່ງມາດປາຖະໜາ ຄວາມທຸກເດືອດຮ້ອນຂອງປະຊາຊົນແລ້ວຢູ່ປະເທດຈີນຜູ້ນຳພັກຄອມມູນິດຈີນ, ຄະນະລັດຖະບານຈີນທຸກຊຸດຈະແນະນຳໃຫ້ເຈົ້າໜ້າທີ່ທຸກລະດັບທັງສູນກາງແລະທ້ອງຖິ່ນເຮັດໃຫ້ດີ ໃຫ້ເຂົ້າເຖິງປະຊາຊົນໃຫ້ໄດ້ເພື່ອຊ່ວຍແກ້ໄຂຄວາມເດືອດເນື້ອຮ້ອນໃຈຂອງເຂົາເຈົ້າ ເພາະວ່າພັກ-ລັດຖະບານຈີນຮູ້ດີວ່າ ຖ້າເຮົາຮັກປະຊາຊົນ ປະຊາຊົນກໍ່ຈະຮັກເຮົາ ສັດທາເຮົາ ເປັນໃຈເຮົາເລື່ອງນີ້ສຳຄັນຫຼາຍ, ປົກຄອງປະຊາຊົນບໍ່ຈຳເປັນໃຊ້ອຳນາດບາດໃຫຍ່ໄປຂົ່ມຂູ່ ຂົ່ມເຫງເພື່ອໃຫ້ປະຊາຊົນເຮັດຕາມດັອກ, ຖ້າລັດເຮົາເຮັດດີກັບປະຊາຊົນ ຮັບໃຊ້ປະຊາຊົນດ້ວຍການລົງມືເຮັດຕົວຈິງ ບໍ່ແມ່ນເວົ້າແຕ່ປາກແລ້ວປະຊາຊົນເຂົາຈະຕືນຕົວປະຕິບັດເອງ ນີ້ຄືຄຳແນະນຳຂອງພັກ-ລັດຈີນ ທີ່ເນັ້ນໃຫ້ເຈົ້າໜ້າທີ່ທຸກຂັ້ນທຸກລະດັບຕ້ອງພະຍາຍາມເຮັດໃຫ້ໄດ້! ຄືນນີ້ໜຸ່ມໃຫຍ່ຂໍນຳເອົາກໍລະນີໜຶ່ງທີ່ອຳນາດການປົກຄອງທ້ອງຖິ່ນເຂົ້າໃຈ ເຂົ້າເຖິງປະຊາຊົນໄດ້ຢ່າງໃກ້ຊິດຕິດແທດອີ່ຫຼີຈົນສ້າງຄວາມຮັກແພງສັດທາໃຫ້ປະຊາຊົນໄດ້ດີຫຼາຍ! ຄືຢູ່ນະຄອນ ຈູ່ໂຈ່ວ ຂອງແຂວງ ອ່ານຮຸ່ຍ ທາງພາກຕາເວັນອອກຂອງຈີນ ແຂວງນີ້ແມ່ນບ້ານເກີດຂອງ ເປົາບຸ້ນຈີ້ນໄດ໋ນິທ່ານຜູ້ຟັງ! ເມືອງເອກຂອງແຂວງນີ້ແມ່ນນະຄອນ ເຫີເຟ່, ໜຸ່ມໃຫຍ່ຫາກໍ່ໄປມາຫວ່າງເດືອນກັນຍາປີກາຍນີ້ລະ! ງາມຫຼາຍໄດ໋ ໄດ້ໄປຢາມສຸສານທ່ານ ເປົາບຸ້ນຈີ້ນ ກັບເສນາຜູ້ຊື່ສັດຂອງເພິ່ນສີ່ຄົນພ້ອມ! ເປັນສຸສານສວນສາທາລະນະທີ່ກ້ວາງໃຫຍ່ໄພສານ ສະອາດງາມຕາ ສະຫງົບງຽບຜູ້ຄົນໄປທ່ຽວຫຼິ້ນຫຼາຍອີ່ຫຼີ! ກັບເຂົ້າເລື່ອງເນາະ! ຄືໃນມື້ກ່ອນຈະຮອດມື້ບຸນກຸດຈີນໃນວັນທີ 22-23 ເດືອນແລ້ວນີ້ ລຸງ ຈຽນຫົວເຈິ່ງ ອາຍຸ 67 ປີໄດ້ຮັບຂອງຂັວນປີໃໝ່ທີ່ພິເສດທີ່ສຸດສອງອັນທີ່ເຮັດໃຫ້ລາວເຊົາກັງວົນກັບບັນຫາການເງິນໃນຄອບຄົວ ແລະກໍ່ເຮັດໃຫ້ລາວມີຈິດໃຈມ່ວນຊື່ນຫຼິ້ນບຸນປີໃໝ່! ລຸງຈຽງ ກັບ ເມຍບໍ່ມີວຽກເຮັດທັງສອງແຕ່ຕ້ອງມີພາລະລ້ຽງຫຼານສາວນ້ອຍຕາມລຳພັງ ລາຍຮັບກໍ່ໜ້ອຍດຽວ ໄດ້ຈາກໂຄງການເງິນລ້ຽງດູຄ່າຄອງຊີບຂັ້ນຕ່ຳໃຫ້ຜູ້ເຖົ້າຂອງລະບອບນັ້ນເອງ. ລຸງຈຽງ ເລົ່າທຸກວ່າ: "ເລື່ອງທີ່ສອງຜົວເມຍເຖົ້າພວກຂ້ອຍຍັງກັງວົນທີ່ສຸດກໍ່ແມ່ນຄ່າຮຽນມັດທະຍົມຂອງຫຼານສາວນິລະ" ນັ້ນຄືຄວາມທຸກໃຈຂອງສອງຜົວເມຍເຖົ້າ! ເອົາ, ຟັງເພງກ່ອນແລ້ວຈະກັບມາເວົ້າໃຫ້ຟັງວ່າຂອງຂັວນປີໃໝ່ສອງອັນທີ່ພິເສດສຸດໆແລະເຮັດໃຫ້ສອງເຖົ້າໜ້າຊື່ນຕາບານປີນີ້ແມ່ນຫັຍງແລະໄດ້ຈາກໃຜ?
ເພງ
ຂອງຂັວນປີໃໝ່ກຸດຈີນທີ່ ລຸງຈຽງຫົວເຈິ່ງກັບເມຍລາວໄດ້ຮັບກ່ອນມື້ປີໃໝ່ໜ້ອຍໜຶ່ງທີ່ເຮັດໃຫ້ລາວດີໃຈຫາຍກັງວົນເລື່ອງການເງິນກໍ່ແມ່ນ ອັນໜຶ່ງນັບແຕ່ເດືອນມັງກອນຜ່ານມານີ້ເປັນຕົ້ນໄປ ເງິນລ້ຽງດູຜູ້ເຖົ້າຈະໄດ້ເພີ່ມຂື້ນແລະອັນທີສອງຄ່າຮຽນມັດທະຍົມຕອນປາຍຂອງຫຼານສາວຈະມີອົງການມຸນນິທິເພື່ອການກຸສົນຈະຈ່າຍໃຫ້! ໂອ! ເປັນຂອງຂັວນປີໃໝ່ສອງອັນທີ່ວິເສດສຳລັບສອງເຖົ້າແທ້ໄດ໋ເນາະທ່ານຜູ້ຟັງ! ເຂົາເຈົ້າໄດ້ມາຈັ່ງໃດ? ຕົກມາຈາກຟ້າເບາະ? ບໍ່ແມ່ນຈັກດີ້ລຸງຈຽງເວົ້າວ່າ: ພວກຂ້ອຍສອງຜົວເມຍຂໍຂອບໃຈທ່ານເຈົ້າຄອງນະຄອນ ຈູໂຈ່ວ ແທ້ໆ, ຄັນເພິ່ນບໍ່ຊ່ວຍເທື່ອນີ້ພວກເຮົາກໍ່ບໍ່ມີປັນຍາແກ້ບັນຫາທຸກໃຈສອງອັນນີ້ໄດ້ໄວໆແນວນີ້ດັອກ! ທ່ານຜູ້ຟັງອາດຈະສົງໄສເນາະວ່າແລ້ວທ່ານເຈົ້າຄອງນະຄອນໃຫຍ່ປານນີ້ຮູ້ຄວາມເດືອນຮ້ອນຂອງປະຊາຊົນຄົນທຳມະດາແບບນີ້ໄດ້ແນວໃດ? ມັນກໍ່ຍ້ອນນະໂຍບາຍທີ່ໃຫ້ເຈົ້າໜ້າທີ່ລັດທຸກຄົນທຸກລະດັບລົງໃກ້ຊິດຕິດແທດກັບປະຊາຊົນຂັ້ນຮາກຖານນິລະ! ໃຫ້ຕິດຕາມຕິດຕໍ່ຊອກຮູ້ສາລະທຸກສຸກດິບຂອງປະຊາຊົນ ບໍ່ແມ່ນຊິນັ່ງຢູ່ແຕ່ຫ້ອງແອເຢັນໆ ນັ່ງລົດຄັນແພງໆງາມໆ ຕີກັອຟ ຕຳຕິວິສກີ ວາຍຕ່າງປະເທດລາຄາແພງໆກັບບັນດານັກທຸລະກິດຢາສູບຊອງລະຮ້ອຍປາຍຢວນຢູ່ຫັ້ນ! ທ່ານ ຈ່ຽງຊ່ານ ເຈົ້າຄອງນະຄອນຈູ່ໂຈ່ວຂອງແຂວງ ອ່ານຮຸ່ຍບອກວ່າ: " ຫຼັງຈາກການສຳຫຼວດກວດກາຂ້ອຍກໍ່ພົບການເດືອດຮ້ອນຂອງເມຍລຸງຈ່ຽງ ທີ່ຂໍຂື້ນເງິນເບິ່ງແຍງຜູ້ເຖົ້າຍ້ອນວ່າ: ຂາຂອງລາວໄດ້ຮັບບາດເຈັບສາຫັດຈາກອຸປະຕິເຫດທາງຖະໜົນຈົນບໍ່ສາມາດຟື້ນຄືນປົກກະຕິໄດ້ " ຄັນເວົ້າເຖິງນະໂຍບາຍທີ່ນະຄອນ ຈູ່ໂຈ່ວ ວາງອອກໃຫ້ເຈົ້າໜ້າທີ່ທຸກລະດັບລົງໃກ້ຊິດຕິດແທດຊອກຮູ້ຄວາມມຸ້ງມາດປາຖະໜາຂອງປະຊາຊົນແມ່ນເພິ່ນເລີ່ມໃຊ້ມາແຕ່ເດືອນກັນຍາປີ 2010 ພຸ້ນໄດ໋ທ່ານຜູ້ຟັງ! ຈຸດປະສົງກໍ່ເພື່ອສ້າງການຕິດຕໍ່ພົວພັນກັນລະຫ່ວາງເຈົ້າໜ້າທີ່ລັດກັບປະຊາຊົນທຳມະດາສາມັນໃຫ້ໃກ້ຊິດກ່ວາເກົ່າ ດ້ວຍການລົງໄປຢື້ຢາມຖາມຂ່າວປະຊາຊົນຢ່າງເປັນປົກກະຕິ. ໃນໄລຍະ 15 ເດືອນຜ່ານມານີ້ເຈົ້າໜ້າທີ່ລັດທ້ອນໂຮມຄຳຮ້ອງທຸກຈາກປະຊາຊົນຢູ່ນະຄອນຈູ່ໂຈ່ວໄດ້ຕັ້ງວ່າຫຼາຍກ່ວາ 12.000 ກໍລະນີ, ບາງອັນກໍ່ແມ່ນຄວາມເດືອດຮ້ອນສ່ວນຕົວຄືຄອບຄົວລຸງຈຽງນິລະ! ຫຼາຍອັນກໍ່ຮ້ອງທຸກເລື່ອງມົນລະພິດດ້ານສິ່ງແວດລ້ອມແລະອື່ນໆ! ນະໂຍບາຍຕິດຕໍ່ກັບປະຊາຊົນຂອງນະຄອນຈູ່ໂຈ່ວນີ້ໄດ້ຮັບຜົນສຳເລັດດີຫຼາຍ ເປັນແບບຢ່າງທີ່ດີຫຼາຍ; ຫຼາຍພາກສ່ວນກໍ່ຮຽກຮ້ອງໃຫ້ເອົາໄປນຳໃຊ້ຢູ່ນະຄອນຢູ່ເມືອງອື່ນໆໃນທົ່ວປະເທດ, ເພາະວ່າແມ່ນຢູ່ວ່າດຽວນີ້ມາດຕະຖານການດຳລົງຊີວິດຂອງຄົນຈີນດີຂື້ນຫຼາຍການພັດທະນາປະເທດກໍ່ຈົນກາຍເປັນປະເທດເສດຖະກິດໃຫຍ່ເປັນອັນດັບ 2 ຂອງໂລກແລ້ວ! ແຕ່ມາເບິ່ງການຕີລາຄາຂອງປະຊາຊົນຕໍ່ລະບຽບຂັ້ນຕ່າງໆມັນຍັງບໍ່ໄປສົມຄູ່ກັນ. ຫຼາຍບັນຫາທີ່ໜັກໜ່ວງໜ້າເປັນຫ່ວງຍັງມີຢູ່ທີ່ປະຊາຊົນກັງວົນ ບໍ່ວ່າຈະເປັນຊ່ອງຫວ່າງ ລະຫວ່າງ ຄວາມຮັ່ງກັບຄວາມທຸກນັບມື້ນັບຫ່າງນັບກ້ວາງອອກ ກຸ່ມຄົນຮັ່ງມີໜ້ອຍແຕ່ຍຶດຄອງຜົນປະໂຫຍດ ເງິນຄຳ ຊັບພະຍາກອນຄວາມອຸດົມສົມບູນສ່ວນໃຫຍ່ຂອງປະເທດ ປະຊາຊົນທີ່ຍັງທຸກຍາກຫຼາຍຍັງມີຫຼາຍຢູ່, ບັນຫາການບໍລິການປະຊາຊົນບໍ່ດີຂອງເຈົ້າໜ້າທີ່ລັດ, ບັນຫາສໍ້ລາດບັງຫຼວງຂອງເຈົ້າໜ້າທີ່ລັດ ແລະ ການສວຍໃຊ້ອຳນາດໜ້າທີ່ບໍ່ຖືກຕ້ອງເໝາະສົມ ລ້ວນແຕ່ເປັນເລື່ອງທີ່ປະຊາຊົນຈີນຢາກໃຫ້ແກ້ໄຂໄວ. ເອົາ, ຟັງເພງກ່ອນແລ້ວຈັ່ງມາຟັງເລຂາພັກນະຄອນ ຈູໂຈ່ວ ຂອງແຂວງ ອ່ານຮຸ່ຍ ເພິ່ນມີຄວາມເຫັນແນວໃດຕໍ່ກັບບັນຫາຕ່າງໆເຫຼົ່ານີ້
ເພງ
ຂໍຂອບໃຈ………….. ບັດນີ້ກໍ່ມາຟັງຄຳເຫັນຂອງທ່ານ ຮັ່ນຊ່ຽນກົງ ເລຂາພັກນະຄອນ ຈູ່ໂຈ່ວ ທີ່ມີບັນຫາຕ່າງໆທີ່ປະຊາຊົນທຳມະດາຂ້ອງໃຈ. ເພິ່ນວ່າ: " ແນ່ນອນພວກເຮົາເອົາໃຈໃສ່ເລື່ອງເຫຼົ່ານັ້ນ, ຄັນພວກເຮົາບໍ່ເຂົ້າໃຈປະຊາຊົນ ແລະ ບໍ່ຊອກພົບຄວາມຕ້ອງການຂອງປະຊາຊົນ ການເຕີບໂຕຂອງ ເສດຖະກິດຂອງເສດຖະກິດກໍ່ຈະບໍ່ປະກອບສ່ວນຄວາມສຳເລັດໃຫ້ການບໍລິຫານດັອກ " ຢູ່ໃນພິທີສະເຫຼີມສະຫຼອງການສ້າງຕັ້ງພັກຄອມມູນິດຈີນຄົບຮອບ 90 ປີ, ໃນວັນທີ 1 ກໍລະກົດ 2011 ຜ່ານມານີ້, ທ່ານ ຫູຈີນທາວ, ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດອິນດູຈີນ, ປະທານປະເທດຈີນ ກໍ່ຍັງຢ້ຳເຖິງການໃກ້ຊິດຕິດແທດກັບປະຊາຊົນ ມັນແມ່ນໜ້າທີ່ການເມືອງທີ່ສະມາຊິກພັກ-ພະນັກງານທຸກຄົນຕ້ອງເຮັດ, ທ່ານ ຫູຈີນທາວ ຍັງເຕືອນໃຫ້ລະວັງດີໆເຈົ້າໜ້າທີ່ລັດຜູ້ໃດ ທີ່ໄດ້ອຳນາດໄດ້ຖານະຕຳແໜ່ງແລ້ວໄປໃຊ້ໃນທາງທີ່ບໍ່ຖືກຕ້ອງແລ້ວຖືກປະຊາຊົນວິພາກວິຈານ ເພາະມັນສ້າງຄວາມເສື່ອມເສຍພາບພົດລວມຂອງພັກ ສ້າງຄວາມສ່ຽງໃຫ້ພັກ! ດຽວນີ້ຢູ່ຈີນການສະແດງຄຳຄິດເຫັນ ການສະແດງຄວາມມຸ້ງມາດປາຖະໜາຂອງປະຊາຊົນຈີນຕໍ່ຂັ້ນເທິງກໍ່ຍັງມີຫຼາຍຊ່ອງທາງ ບໍ່ວ່າຜ່ານຊື່ມວນຊົນ, ຜ່ານເວັບໄຊ, ຜ່ານໂທລະພາບ, ຈົດໝາຍ ແຕ່ມັນກໍ່ຍັງບໍ່ພໍ ສະນັນພະນັກງານລັດຕ້ອງລົງໄປຫາປະຊາຊົນຜູ້ທຸກຍາກຢູ່ຮາກຖານ. ສາດສະດາຈານ ຫວາງ ກາຍອູ ຂອງສະຖາບັນວິທະຍາສາດສັງຄົມຂອງແຂວງ ອ່ານຮຸ່ຍ ບອກສຳນັກຂ່າວຊິນຮວາ ວ່າ: " ຄວາມຄິດແລະການກະທຳທີ່ລິເລີ່ມສ້າງສັນ ຄວນສ້າງຂົວຕໍ່ລະຫ່ວາງເຈົ້າໜ້າທີ່ລັດທຸກລະດັບກັບປະຊາຊົນ ເຮັດໄດ້ຈັ່ງຊັ້ນບັນດານັກການເມືອງຈຶ່ງຈະສາມາດວາງນະໂຍບາຍທີ່ຖືກກັບຄວາມຕ້ອງການຂອງປະຊາຊົນແທ້ໆ ບໍ່ແມ່ນມີແຕ່ນັ່ງຂຽນວາດຂຽນຢູ່ໂຕະຢູ່ຫ້ອງການເຮັດວຽກຫັ້ນ, ຄັນວາງນະໂຍບາຍຖືກແລະຈັດຕັ້ງປະຕິບັດໄດ້ດີ ຄວາມຮູ້ສຶກໃນທາງສັງຄົມຂອງປະຊາຊົນທີ່ເປັນໄປທາງລົບມັນກໍ່ສາມາດແກ້ໄຂໄປໄດ້ເອງ. ນີ້ຄືແບບຢ່າງທີ່ດີຫຼາຍຂອງການງ່ຽງຫູຟັງປະຊາຊົນຂອງເຈົ້າໜ້າທີ່ລັດຢູ່ນະຄອນ ຈູໂຈ່ວ ແຂວງ ອ່ານຮຸ້ຍ! ສ່ວນຢູ່ເມືອງ ຣຸຍຈີ້ນ ຂອງແຂວງຈຽງຊີ ທາງພາກຕາເວັນອອກຂອງຈີນ ເຈົ້າໜ້າທີ່ລັດຖະບານທຸກຄົນໄດ້ສ້າງກຸ່ມປະຊາກອນຮາກຖານປະກອບດ້ວຍ 20 ຄອບຄົວຊົນນະບົດ. ສະມາຊິກຂອງກຸ່ມທຸກຄົນສາມາດຕິດຕໍ່ກັບເຈົ້າໜ້າທີ່ຜູ້ນັ້ນໄດ້ໂດຍກົງທຸກເວລາເມື່ອມີບັນຫາ. ທ່ານ ເສີນ ສຽວຈຸ້ນ ທີ່ເປັນເລຂາພັກເມືອງ ຣຸຍຈີ້ນ ກໍ່ແຈ້ງເບີມືຖືຂອງທ່ານໃຫ້ປະຊາຊົນຮູ້ ເພື່ອມີບັນຫາຫຍັງຈະໄດ້ສົ່ງຂໍ້ຄວາມສັ້ນຫາໄດ້ໂລດ! ສ່ວນຢູ່ນະຄອນ ກຸຍຢ້າງ ເມືອງເອກຂອງແຂວງ ກຸ້ຍໂຈ່ວ ເມືອງນີ້ງາມຫຼາຍຂຽວງາມທຳມະຊາດດີ ປ່າໄມ້ກັບຕົວເມືອງຢູ່ຮ່ວມກັນ ໜຸ່ມໃຫຍ່ໄປມາແລ້ວໃນປີ 2009 ເປັນບ່ອນຕັ້ງຂອງໂຮງງານເຫຼົ້າຂາວ " ເໜົາຖາຍ " ທີ່ມີຊື່ສຽງໄປທົ່ວໂລກ ເປັນເຫຼົ້າແພງສຳລັບຮັບແຂກບ້ານແຂກເມືອງຂອງຈີນເລີຍລະ! ຢູ່ນະຄອນ ກຸ້ຍຢ້າງ ເຈົ້າໜ້າທີ່ລະດັບສູງຂອງອົງການປົກຄອງມີກອງປະຊຸມກັບຜູ້ຕາງໜ້າປະຊາຊົນເປັນປະຈຳ ແລະ ຍັງມີລາຍການໂທລະພາບແລະອິນເຕີເນັດລົມກັບປະຊາຊົນໂດຍກົງອອກສົດໃສອີກ. ອັນນີ້ກໍ່ແມ່ນເພື່ອເຂົ້າເຖິງປະຊາຊົນຢ່າງແທ້ຈິງ ຢາກຮູ້ຢາກເຮັດໄດ້ແນວນີ້ກໍມີແຕ່ຊ່ອງທາງດຽວຄື ສື່ສານກັບປະຊາຊົນ ແລະບໍລິການປະຊາຊົນດີໆ ບໍ່ແມ່ນເວົ້າແຕ່ປາກ! ນີ້ແມ່ນຄຳເວົ້າສົ່ງທ້າຍຂອງສາດສະດາຈານ ຮານຊ່ຽນກົ່ງ, ເລຂາພັກນະຄອນ ຈູ່ໂຈ່ວ.
