ເຮືອນແລະເຮືອນເຊົ່າສຳລັບຜູ້ມີລາຍໄດ້ຕ່ຳແລະປານກາງ
ສະບາຍດີມິດລາຍການທີ່ຮັກແພງແລະຄິດຮອດຄິດເຖິງທຸກໆທ່ານ! ພົບກັນອີກແລ້້ວກັບລາຍການເບິ່ງເມືອງຈີນທາງ CRI FM 93Mhz ທີ່ໜຸ່ມໃຫຍ່ດຳເນີນລາຍການໃຫ້ຟັງທຸກມື້ບໍ່ໄດ້ຂາດ! ມີເພງຈີນມ່ວນໆເປີດໃຫ້ຟັງ! ມີເລື່ອງລາວຕ່າງໆກ່ຽວກັບເມືອງຈີນເວົ້າສູ່ຟັງພ້ອມ! ຮັບປະກັນໂລດວ່າຄັນຢາກຮູ້ເລື່ອງຈີນດ້ານຕ່າງໆໃຫ້ດີຂື້ນ ຊອກຟັງ, ຊອກເບິ່ງ, ຊອກອ່ານຢູ່ໃສກໍ່ບໍ່ມີຫຼາຍມີຄົບເຄື່ອງຄືກັບລາຍການເບິ່ງເມືອງຈີນຂອງ CRI ດັອກຂອບໃຈຫຼາຍໆເດີ້ມິດລາຍການຫຼາຍທ່ານທີ່ໂທມາ ສົ່ງຂໍ້ຄວາມສັ້ນມາຖາມ, ມາລົມເລື່ອງນັ້ນເລື່ອງນີ້ກ່ຽວກັບຈີນ! ບາງຄົນກໍ່ໂທມາມີຄຳເຫັນ ບາງຄົນກໍ່ຂໍຟັງເພງ. ພົບກັນຄືນນີ້ແມ່ນວັນພະຫັດ,ທີ 2 ກຸມພາ! ຄືນນີ້ເລື່ອງທີ່ໜຸ່ມໃຫຍ່ຈະມາລົມສູ່ຟັງແມ່ນເລື່ອງເຮືອນໆຊານໆນິລະ! ບໍ່ວ່າຄົນຈີນ ຄົນລາວບໍ່ມີໃຜດອກຕິທີ່ຈະບໍ່ມີເຮືອນເປັນຂອງຕົນເອງເນາະ! ຫຼາຍຄົນຢາກໄດ້ຢາກມີແຕ່ຍັງບໍ່ພ້ອມເທື່ອ ພວມທ້ອນພວມຫອມເງິນໄວ້ຊື້ດິນຊື້ເຮືອນ, ບໍ່ທັນພ້ອມກໍ່ເຊົ່າຢູ່ໄປກ່ອນເນາະຊຳຊາພໍມີ. ແຕ່ວ່າໃນໄລຍະສະສົມນີ້ຜົວ-ເມຍຕ້ອງຊ່ວຍກັນຫາ ຊ່ວຍກັນປະຢັດມັດທະຍັດແທ້ໄດ໋ມັນຈັ່ງຊິເກີດເປັນຈິງ ຊິໃຊ້ຊິຈ່າຍແຕ່ລະກີບແຕ່ລະອັນມັນກໍ່ຕ້ອງມີການຄິດໄລ່ຢ່າງຄັກແນ່ລະເນາະ! ຄັນບໍ່ເຮັດແນວນັ້ນຜົວກໍ່ກິນແຕ່ເຫຼົ້າເຂົ້າແຕ່ສາວ ເມຍກໍ່ພໍເມຍກິນເຫຼົ້າຊຸມແຊວເບິ່ງບັກຫຼັກລາຍຕະຫຼອດ ຄັນເປັນແນວນີ້ມັນກໍ່ຊິໄດ້ຢູ່ເຮືອນເຊົ່າເຂົ້າຊື້ໄປຕະຫຼອດແທ້ໄດ໋! ຜູ້ເຖົ້າເພິ່ນຍັງວ່າ: "ສູ້ຊົນໝົ້ນທຸກ ມີສຸກພາຍຫຼັງ ຫຼື ເກົ້າອົດເກົ້າເຍື້ອນຫາກຊິໄດ້ທ່ອນຄຳ" ເພິ່ນຍັງວ່າເດ! ເອົາ, ຂໍເປັນກຳລັງໃຈໃຫ້! ຄືນນີ້ຟັງເພງຈັກສອງເພງກ່ອນແລ້ວຈະເວົ້າສູ່ຟັງວ່າ ການແກ້ໄຂເຮືອນຢູ່ໃຫ້ປະຊາຊົນຜູ້ມີລາຍຮັບຕ່ຳຫຼືລາຍຮັບປານກາງຢູ່ຈີນພຸ້ນລັດຖະບານເຮັດແນວໃດ?
ເພງ
ຜ່ານໄປແລ້ວສອງເພງມ່ວນໆຈາກລາຍການເບິ່ງເມືອງຈີນ, ຢາກຟັງລາຍການນີ້ 19 ໂມງທຸກມື້ປັບຄື້ນວິທະຍຸຂອງທ່ານມາ FM 93Mhz ໂລດເດີ້ທ່ານຜູ້ຟັງ! ຄັນຢາກມີຄຳເຫັນຫຍັງກໍ່ໂທເຂົ້າມາທີ່ 711477, 9300 ເອົາ, ບັດນີ້ກໍ່ຈະມາເວົ້າເລື່ອງເຮືອນເລື່ອງຊານຢູ່ຈີນສູ່ຟັງວ່າ ຢູ່ຈີນພຸ້ນລັດຖະບານເພິ່ນຊ່ວຍຜູ້ມີລາຍຮັບຕ່ຳແລະລາຍຮັບປານກາງໃຫ້ມີເຮືອນຢູ່ແນວໃດ? ກໍ່ຄືເຄີຍເວົ້າສູ່ຟັງວ່າເຮືອນຢູ່ຈີນໂດຍສະເພາະຢູ່ຕາມຕົວເມືອງໃຫຍ່ ມັນບໍ່ແມ່ນເຮືອນເປັນຫຼັງຄືຢູ່ລາວໄດ໋ທ່ານຜູ້ຟັງ! ມັນເປັນເຮືອນຊຸດໃນຕຶກໃຫຍ່ 20-30 ຊັ້ນກໍ່ມີ ພາສາອັງກິດເພິ່ນເອີ້ນວ່າ: Apartment ຫຼື Flat ຫັ້ນລະ! ຄົນຢູ່ຈີນທົ່ວໄປຊິມາມີເງິນຊື້ດິນປຸກເຮືອນເປັນຫຼັງ ມີສວນຫຼັງເຮືອນໜ້າເຮືອນຄືຢູ່ລາວນິມັນເກືອບວ່າເປັນໄປບໍ່ໄດ້ພຸ້ນລະ! ນອກຈາກເສດຖີຜູ້ມີລາຍຮັບສູງແທ້ໆກໍ່ພໍມີຢູ່! ລາຄາຫ້ອງຊຸດໃນປີສອງປີຜ່ານມານີ້ແຫ່ງລາຄາຂື້ນປານຈະຫຼວດຈົນລັດຖະບານເກືອບຄຸມບໍ່ຢູ່! ແຕ່ເລື່ອງຫຍັງກໍ່ຢ່າລັດຖະບານຈີນຈະບໍ່ນິ້ງນອນເສີຍຈັກເທື່ອ ຄັນມັນເລີ່ມເກີດເລື່ອງຫຍັງຂື້ນ, ບັນຫາຫຍັງຂື້ນທີ່ເປັນເລື່ອງເດືອດເນື້ອຮ້ອນໃຈໃຫ້ປະຊາຊົນເພິ່ນຂ້ຽວຫາວິທີມຫາມາດຕະການອອກມາແກ້ມາຄວບຄຸມໂລດ! ບໍ່ໄດ້ປ່ອຍໃຫ້ພວກພໍ່ຄ້ານາຍທຶນ ນັກທຸລະກິດສະໜຸກເຮັດຟ້າເຮັດໄຟແບບວ່າມີເງິນແລ້ວເຮັດຫຍັງໄດ້ໝົດບໍ່ແມ່ນໄດ໋! ປີສອງປີຜ່ານມານີ້ພວກພໍ່ຄ້ານາຍທຶນດ້ານອະສັງຫາລິມະຊັບຫົວໃສທັງຫຼາຍ ພະຍາຍາມເຮັດໃຫ້ລາຄາເຮືອນສູງຂື້ນຫຼາຍປານຈະຫຼວດຄືວ່າຫັ້ນລະ! ແຕ່ໃນທີ່ສຸດລັດຖະບານຈີນກໍ່ຫາວິທີສະກັດກັ້ນໄວ້ໄດ້ ດຽວນີ້ເຮືອນຊຸດຢູ່ຕາມຕົວເມືອງໃຫຍ່ຂອງຈີນເລີ່ມຫຼຸດລົງແລ້ວ ຫຼາຍຝ່າຍຍັງຄາດວ່າປີ 2012 ນີ້ເປັນປີທີ່ແມ່ນປີຄຳຂອງພໍ່ຄ້າອະສັງຫາລິມະຊັບໂດຍການກໍ່ສ້າງເຮືອນເພື່ອຂາຍແລ້ວ! ລັດຖະບານຈີນຄຸມຢູ່ແລ້ວ! ເພາະວ່າປີສອງປີຜ່ານມານີ້ຫາງສຽງສັງຄົມຟົດຫຼາຍໂດຍສະເພາະຜູ້ມີລາຍຮັບປານກາງແລະຕ່ຳ ບໍ່ມີປັນຍາທ້ອນເງິນຊື້ເຮືອນໄດ້ແລ້ວ ເພາະວ່າທ້ອນເງິນໃກ້ຊິຮອດລາຄາເຮືອນໂດດຂື້ນໄປໜ້າເຕັກໆ ມັນກໍ່ຄ້ວາຝັນບໍ່ໄດ້ຈັກເທື່ອແລ້ວ ສຳລັບຜູ້ມີລາຍຮັບປານກາງແລະຕ່ຳນິນະ! ເອົາ, ຟັງເພງອີກກ່ອນແລ້ວຈະເວົ້າສູ່ຟັງວ່າລັດຖະບານຈີນເພິ່ນແກ້ເລື່ອງນີ້ແນວໃດ? ແລະໄດ້ຜົນໜ້ອຍຫຼາຍຊ່ຳໃດແລ້ວ?
ເພງ
ເວົ້າເຖິງເລື່ອງແກ້ໄຂເຮືອນຢູ່ໃຫ້ຜູ້ມີລາຍຮັບປານກາງແລະຕ່ຳຢູ່ຈີນນີ້ ລັດຖະບານໄດ້ປະຕິບັດນະໂຍບາຍປ່ອຍເງິນກູ້ໃຫ້ນັກລົງທຶນທີ່ປຸກເຮືອນຊຸດໃຫ້ປະຊາຊົນທີ່ມີລາຍຮັບປານກາງແລະຕ່ຳສາມາດເຊົ່ງຢູ່ໄດ້! ສ່ວນຫຼາຍພວກນາຍທຶນປຸກເຮືອນແພງໆນັ້ນຫຼຸດການໃຫ້ກູ້ຢືມລົງ. ວັນຈັນຜ່ານມານີ້ ທະນາຄານປະຊາຊົນຈີນເພິ່ນແຈ້ງໃຫ້ຮູ້ວ່າ: ປີກາຍນີ້ໄດ້ປ່ອຍເງິນກູ້ເພື່ອສະໜັບສະໜຸນການກໍ່ສ້າງເຮືອນລາຄາຕ່ຳ 175 ຕື້ກ່ວາຢວນ. ຖືວ່າກວມ 50.1% ຂອງການກູ້ຢືມທັງໝົດຂອງໂຄງການອະສັງຫາລິມະຊັບເລີຍ. ເພີ່ມຂື້ນຈາກປີ 2010 ເຖິງ 31.7% ຕາມແຜນການແລ້ວຢູ່ຈີນເພິ່ນຕັ້ງເປົ້າສ້າງເຮືອນໃຫ້ຜູ້ມີລາຍຮັບຕ່ຳ 36 ລ້ານຊຸດພາຍໃນປີ 2015 ແລະປີກາຍນີ້ຈີນກໍ່ເລີ່ມປະສົບຜົນສຳເລັດໃນການປະຕິບັດເປົ້າໝາຍນີ້ແລ້ວ ຄືມາຮອດເດືອນຕຸລາປີກາຍນີ້ກໍ່ສ້າງເຮືອນໄດ້ແລ້ວ 10 ລ້ານຊຸດ. ເປັນຈັ່ງໃດໄວບໍ່ທ່ານຜູ້ຟັງ? ຄັນລັດຖະບານຈີນມີເງິນຫຼາຍມັນກໍ່ເປັນຈັ່ງຊີ້ແລ້ວ ສັ່ງເຮັດປັບ ຕຶກອາຄານກໍ່ແຂ່ງຂັນກັນຜຸດຂື້ນປານດອກເຫັດຍາມເດືອນ 6 ພຸ້ນແລ້ວ! ເຮັດທັງເວັນເຮັດທັງຄືນກຳມະກອນກໍ່ປ່ຽນກັນເຂົ້າມັນຊິບໍ່ແລ້ວໄວແນວໃດເນາະ! ຕາມທີ່ໜຸ່ມໃຫຍ່ຢູ່ເມືອງຈີນຫັ້ນເຂົາເຈົ້າປຸກຕຶກອາຄານປະມານ 10 ຊັ້ນ ເຮືອນຫຼືຫ້ອງການຫຼືວ່າສູນການຄ້າກໍ່ຄືກັນ! ໂອ່, ແລ້ວໄວອີ່ຫຼີໄດທ່ານຜູ້ຟັງ 6 ເດືອນຫຼື 1 ປີກໍ່ແລ້ວວລະເດ! ຄົນລາວຫຼາຍຄົນໄດ໋ທີ່ໄປພົບກັບໜຸ່ມໃຫຍ່ຢູ່ປັກກິ່ງ ຜູ້ເພິ່ນມີໂອກາດໄປປັກກິ່ງແບບໜຶ່ງປີຫຼືສອງປີໄປເທື່ອໜຶ່ງແນວນີ້ນະ, ເພິ່ນວ່າໂອ່, ໃບໜ້າປັກກິ່ງປ່ຽນໄປແບບເບິ່ງບໍ່ທັນອີ່ຫຼີລະກະໃຫຍ່ອອກໃຫຍ່ອອກ ຕຶກອາຄານກໍ່ອອກແບບທັນສະໄໝລ້ຳຍຸກປອດໄພງາມແບບສາກົນເລີຍ ບໍ່ແມ່ນຕຶກໃດກໍ່ຮູບຊົງດຽວກັນ ຝາແບບຕາກາໂລຂາວນ້ອຍໆຄືແຕ່ກີ້ໄດ໋! ແຕ່ກີ້ປຸກຢູ່ຈີນ ປຸກຢູ່ລາວກໍ່ຮູ້ໂລດແລ້ວວ່າຕຶກນີ້ແມ່ນຂອງຈີນຂອງລາວ ດຽວນີ້ບໍ່ແມ່ນແນວນັ້ນແລ້ວ ທັນສະໄໝປານເອີຣົບ, ອາເມລິກາແລ້ວ ຕຶກບາງຕຶກຍັງທັນສະໄໝໜ້າງຶດງໍ້ກ່ວາອີກຊ້ຳ! ຊິບໍ່ທັນສະໄໝລ້ຳຍຸກແນວໃດທ່ານຜູ້ຟັງ! ລັດຖະບານຮັ່ງ ບໍລິສັດຮັ່ງເວລາຈະສ້າງຕຶກອາຄານໃໝ່ກໍ່ຈ້າງທັງນາຍຊ່າງອອກແບບທີ່ດັງໆຂອງຈີນທັງທົ່ວໂລກມາອອກແບບສ້າງໃຫ້ ດຽວນີ້ຍ່າງຢູ່ປັກກິ່ງ, ຊຽງໄຮ, ຈຸ່ງກິ່ງ, ເສິນເຈີ້ນ ຫຼື ເມືອງໃຫຍ່ອື່ນໆມັນກໍ່ປານຢູ່ຮົງກົງຫຼືປະເທດທີ່ພັດທະນາແລ້ວບໍ່ຜິດ! ຟັງເພງກ່ອນເນາະແລ້ວຈະລົມສູ່ຟັງກ່ຽວກັບຄວາມຮູ້ສຶກຂອງຜູ້ທີ່ໄດ້ມາຢູ່ເຮືອນເຊົ່າ ເຮືອນລາຄາຖືກທີ່ລັດຖະບານສ້າງໃຫ້ຢູ່ບາງນະຄອນຂອງຈີ
ເພງ
ນະໂຍບາຍຂອງລັດຖະບານຈີນນອກຈາກສ້າງເຮືອນຊຸດລາຄາຖືກໃຫ້ຜູ້ມີລາຍຮັບປານກາງຫຼືຕ່ຳຊື້ໄດ້ແລ້ວ ຢູ່ບາງນະຄອນລັດຍັງປຸກເຮືອນເຊົ່າໃຫ້ຜູ້ມີລາຍຮັບຕ່ຳອີກ, ຍັງມີເງື່ອນໄຂອີກວ່າຄັນຢູ່ຮອດ 5 ປີແລ້ວສາມາດຊື້ໄດ້ເລີຍຕາມລາຄາຕົ້ນທຶນຂອງລາຄາກໍ່ສ້າງ! ອື່, ດີເນາະ! ຄັນບໍ່ເຮັດແນວນີ້ຄົນມີລາຍຮັບປານກາງ-ຕ່ຳ ກໍ່ຈະບໍ່ມີໂອກາດໄດ້ຢູ່ເຮືອນດີໆງາມໆນຳໝູ່ແລ້ວ! ຊິເອົາຕົວຢ່າງຂອງ ທ້າວ ກາວ ຈຽນຫົວ ແລະຄອບຄົວຂອງລາວມາເວົ້າສູ່ຟັງ! ລາວຢູ່ກຳແພງນະຄອນ ຈຸ່ງກິ່ງ ຫຼືພາກຕາເວັນອອກສຽງໃຕ້ຂອງຈີນຫຼືສຽງແທ້ໆຂອງຈີນອອກສຽງວ່າ: " ສົງສິ່ງ " ແຕ່ກີ້ລາວເຊົ່າເຮືອນເອກະຊົນຢູ່ ທັງແພງ ທັງເກົ່າ ທັງເປື້ອນເປິ ແຕ່ວ່າບຸນກຸດຈີນປີນີ້ລາວມີເຮືອນເຊົ່າໃໝ່ຢູ່ຊຸມຊົນເຮືອນເຊົ່າສາທາລະນະ " ມິ່ນຊີ້ນ ເຈ່ຍຢວນ " ຮ່ວມກັບອີກຫຼາຍກ່ວາ 7 ພັນຄອບຄົວ. ຫ້ອງຊຸດທີ່ລາວເຊົ່າໃນລາຄາຖືກພຽງເດືອນລະ 800 ຢວນປະມານ ລ້ານກີບນິລະ! ມີ 4 ຫ້ອງນອນ, ເຮືອນຄົວແລະຫ້ອງນ້ຳຄົບຊຸດ. ກ້ວາງຂວາງພໍສຳລັບ 6 ຄົນ ປີໃໝ່ປີນີ້ລາວມີຄວາມສຸກຫຼາຍທີ່ໄດ້ສະຫຼອງຢູ່ເຮືອນໃໝ່ເພາະວ່າແຕ່ກ່ອນເຮືອນເຊົ່າເອກະຊົນທັງເກົ່າ ທັງເປື້ອນ ເພດານຂຸ ຝາກໍ່ເກົ່າ ໄຟກໍ່ບໍ່ແຈ້ງ ສະນັ້ນເວລາສະຫຼອງປີໃໝ່ໄດ້ພາກັນໄປສະຫຼອງຢູ່ນອກເມືອງບ່ອນມັນຖືກພຸ້ນ, ແຕ່ກໍ່ບໍ່ຖືກປານໃດແລ້ວໝູ່ຄູ່ຍາດພີ່ນ້ອງ! ບ່ອນລາວໄປກໍ່ແມ່ນເຮືອນພໍ່ແມ່ລາວ ເຖິງວ່ານ້ອຍແຕ່ສະພາບກໍ່ອ່າວດີກ່ວາໃນເມືອງ ການສະຫຼອງກໍ່ຈັກອາຫານການກິນ ຂອງຕ້ອນຂອງຝາກ ຂອງຂັວນອັ່ງເປົ່າ ຄ່າລົດໄປ-ກັບບໍ່ແມ່ນໜ້ອຍ. ຍ້ອນເຮືອນເກົ່າໂພດລາວເຮັດວຽກໃນເມືອງກໍ່ຈຳເປັນໄດ້ປະລູກໄວ້ໃຫ້ພໍ່ແມ່ເບິ່ງແຍງລ້ຽງດູໃຫ້ ເພິ່ນກໍ່ເຖົ້າຫຼາຍແລ້ວກໍ່ບໍ່ສາມາດລ້ຽງດູໄດ້ດີປານໃດ? ແຕ່ບັດນີ້ເອົາລູກຄືນມາຢູ່ນຳແລ້ວ ມີໝູ່ມີຄູ່ເຕັມໃນຊຸມຊົນດຽວກັນ ຍາມບຸນກຸດຈີນນີ້ຜູ້ຮັບຜິດຊອບຊຸມຊົນກໍ່ຈັດກິດຈະກຳຫຼາຍອັນມ່ວນຫຼາຍ ບໍ່ວ່າຈະເປັນແຂ່ງຟ້ອນ, ແຂ່ງຮ້ອງເພງ ງານລ້ຽງກິລາ ໂອ່, ທັງສະດວກສະບາຍທັງມ່ວນ ທັງສາມັກຄືກັນດີ! ລາວໄດ້ເຂົ້າມາເຊົ່າເຮືອນເຊົ່າທີ່ລັດສ້າງໃນລາຄາຕ່ຳນີ້ມາແຕ່ເດືອນມີນາປີກາຍນີ້ ຫຼັງຈາກທີ່ຂຽນໃບສະເໜີໄດ້ໜຶ່ງເດືອນ. ແມ່ລາວກໍ່ມາຢູ່ນຳດີໃຈຫຼາຍ. ຈັກໜ້ອຍຊິເວົ້າເຖິງອີກຜູ້ໜຶ່ງທີ່ເຂົ້າມາເຊົ່າເຮືອນລັດລາຄາຖືກນີ້ຢູ່ກຳແພງນະຄອນຈຸ່ງກິ່ງສູ່ຟັງ
ເພງ
ອີກຜູ້ໜຶ່ງກໍ່ແມ່ນ ທ້າວ ເຊິງ ອານຊິ່ງ ອາຍຸ 37 ປີ, ລາວກໍ່ສະຫຼອງກຸດຈີນປີນີ້ໃນເຮືອນເຊົ່າໃໝ່ລາຄາຖືກທີ່ລັດປຸກໃຫ້ຄືກັນ. ມີສະມາຊິກຄອບຄົວ 5 ຄົນ. ລາວວ່າລາຍຮັບຄອບຄົວລາວຕໍ່ເດືອນແມ່ນປະມານ 5 ພັນຢວນ ກໍ່ປະມານ 6 ລ້ານກີບນີ້ລະ! ແຕ່ລາວເຊົ່າພຽງ 800 ຢວນຕໍ່ເດືອນ, ດີກ່ວາເຮືອນເຊົ່າເອກະຊົນຫຼາຍເທົ່າ, ນະຄອນຈຸ່ງກິ່ງແມ່ນນະຄອນໜຶ່ງໃນຈຳນວນບໍ່ພໍ່ທໍ່ໃດນະຄອນເຮັດວາງນະໂຍບາຍເຮືອນເຊົ່າສາທາລະນະອອກມາກ່ອນໝູ່ຢູ່ຈີນ ເພື່ອຊ່ວຍຄົນມີລາຍໄດ້ຕ່ຳໄດ້ມີເຮືອນດີເຮືອນງາມຢູ່, ປີກາຍນີ້ປຸກໄປແລ້ວ 110.000 ຊຸດ ເພື່ອໃຫ້ປະຊາຊົນ 300.000 ຄົນໄດ້ພັກພາອາໄສ. ນະຄອນຈຸ່ງກິ່ງເລີ່ມລົງມືສ້າງມາແຕ່ປີ 2010 ຕາມແຜນຈາກ 2011 ຮອດ 2013 ຈະສ້າງເຮືອນເຊົ່າລາຄາຖືກໃຫ້ໄດ້ 40 ຕາແມັດ ເພື່ອໃຫ້ປະຊາຊົນ 2 ລ້ານຄົນທີ່ມີລາຍຮັບປານກາງ-ຕ່ຳໄດ້ຢູ່ຢ່າງສະບາຍ! ເປັນນະໂຍບາຍທີ່ດີຫຼາຍ
ເພງ
ຈົບ
