10 ຈຸດໝາຍປາຍທາງທີ່ນິຍົມທີ່ສຸດໃນອາຊີ
(GMT+08:00) 2012-05-24 11:06:35 cri
ໜື່ງ: ເມືອງລາຊາ ທິເບດ ຂອງຈີນ (Lhasa, Tibet china) ເມືອງລາຊາ ຕັ້ງຢູ່ເທິງທົ່ງພຽງສູງໃນແຖບຫຸບພວກເຂົາຂອງພູເຂົາຫິມາໄລ, ມີສະຖານທີ່ທ່ອງທ່ຽວຊຶ່ງເປັນນິຍົມຫລາຍທີ່ສຸດຄື: ພະລາດຊະວັັງໂປຕາລາ (Potala Palace) ພະລາດຊະວັັງຊຶ່ງເຄີຍເປັນທີ່ປະທັບຂອງອົງດາໄລລາມະອົງກ່ອນ, ທ່ຽວຊົມຄວາມງົດງາມຂອງທັດສະນິຍະພາບຕະຫລອດ 2 ຂ້າງທາງໃນລະຫວ່າງການເດີນທາງມາບ່ອນນີ້ອີກດ້ວຍ ແລະ ອີກສະຖານທີ່ໜຶ່ງທີ່ມີຄວາມງົດງາມໜ້າມາທ່ຽວຄື: ວັດໂຈຄັງ (Jokhang Temple) ໂດຍວັດແຫ່ງນີ້ໄດ້ຮັບການປະກາດຈາກອົງການຍູເນດສໂກໃຫ້ເປັນ " ເມືອງມໍລະດົກໂລກ " ເພາະມີປະຫວັດສາດ ແລະ ຄວາມໜ້າຫລົງໄຫຼຫຼວງຫຼາຍໃຫ້ຜູ້ຄົນຈາກທົ່ວທຸກມຸມໂລກໄດ້ເດີນທາງມາຢ້ຽມຊົມ.
ສອງ: ນະຄອນຫຼວງບາງກອກປະເທດໄທ ນະຄອນຫຼວງບາງກອກ, ເມືອງຫລວງຂອງປະເທດໄທຖືເປັນອີກຈຸດໝາຍປາຍທາງໜຶ່ງທີ່ຜູ້ຄົນຈາກທົ່ວທຸກມຸມໂລກຕ່າງກໍຕ້ອງການເດີນທາງມາທ່ອງທ່ຽວ ບໍ່ວ່າຈະເປັນດ້ານຄວາມງົດງາມຂອງສະຖາປັດຍະກຳປະເພນີ, ແຫລ່ງຊັອບປິ້ງທີ່ລາຄາສະບາຍກະເປົ໋າ ແລະ ຄວາມບັນເທີງໃນຍາມຄໍ່າຄືນທີ່ຕ້ອນຮັບນັກທ່ອງທ່ຽວຢ່າງສະໝໍ່າສະເໝີ ລວມໄປເຖິງຮອຍຍິ້ມຂອງຄົນພາຍໃນທ້ອງຖິ່ນເຫລົ່ານີ້ຖືເປັນສະເນດຶງດູດຄວາມສົນໃຈຂອງນັກທ່ອງທ່ຽວໄດ້ເປັນຢ່າງດີ ແລະ ສະຖານທີ່ສຳຄັນອີກແຫ່ງໜຶ່ງທີ່ນັກທ່ອງທ່ຽວຈາກທົ່ວທຸກມຸມໂລກຕ້ອງໄປສຳຜັດກັບຄວາມງົດງາມອັນວິຈິດຕະການຕາໃຫ້ໄດ້ກໍຄືວັດອະຫລຸນລາດວະລາລາມຫລືທີ່ເອີ້ນກັນວ່າ " ວັດແຈ້ງ " ນັ້ນເອງ.
ສາມ: ເມືອງກາດມານດູ ປະເທດເນປານ (Kathmandu, Nepal) ທີ່ເມືອງແຫ່ງນີ້ມີສະໜາມຫຼວງ (Durbar Square) ຊຶ່ງໄດ້ຮັບການຍົກຍ້ອງໃຫ້ເປັນໜຶ່ງໃນມໍລະດົກໂລກຈາກອົງການຍູເນດສໂກ ແລະ ເປັນອະດີດພະລາດຊະວັັງເກົ່າອີກດ້ວຍ, ມີສະຖາປັດຍະກຳທີ່ມີຄວາມງົດງາມທັງວັດແລະສະຖາປັດຍະກຳຕ່າງໆ ຫຼວງຫຼາຍ, ສິ່ງສຳຄັນເມື່ອເດິນທາງມາບ່ອນນີ້ແລ້ວ ທ່ານຕ້ອງບໍ່ພາດທີ່ຈະຕັ້ງແຄມພັກຄ້າງຢູ່ທີ່ຈອມພູເຂົາເຂົາ ມັດສາປູດເລ (Machhapuchhre) ສະຖານທີ່ທີ່ສາມາດສຳຜັດກັບວັດທະນະທຳທ້ອງຖິ່ນໄດ້ຢ່າງໃກ້ຊິດ.
ສີ່: ເມືອງເລ ປະເທດອິນເດຍ (Leh, India)
ເມືອງເລເປັນເມືອງສູນກາງຂອງການທ່ອງທ່ຽວຂອງລາດັກ (Ladakh) ເມືອງນ້ອຍ ໆ ທີ່ງົດງາມໄປດ້ວຍສິ່ງປຸກສ້າງຈາກຫີນ " Whitewash " ຕັ້ງຢູ່ທີ່ສີ່ແຍກປະຫວັດ ສາດຢ່າງ" Silk Route " ນອກຈາກນີ້ ຍັງມີຫຸບພູເຂົານູບລາ (Nubra Valley) ສະຖານທີ່ຊຶ່ງມີຄວາມງາມຕາມທຳມະຊາດທັງຟາມຂະໜາດນ້ອຍ ແລະ ມີເຮືອນພັກໄວ້ພ້ອມໃຫ້ບໍລິການອີກດ້ວຍ.
ຫ້າ: ປະເທດສິງກະໂປ (Singapore) ຫາກມາສິງກະໂປແລ້ວບໍ່ໄດ້ແວ່ທີ່ Marina Bay ຖືວ່າຍັງເດີນທາງມາບໍ່ເຖິງສິງ ກະໂປຢ່າງແທ້ຈິງ, ເພາະບ່ອນນີ້ຖືເປັນຈຸດໝາຍສຳຄັນທີ່ຕ້ອງແວ່ມາຊົມ, ຈັບຈ່າຍຊື້ເຄື່ອງຂອງໃຫ້ໄດ້, ນອກຈາກນັ້ນແລ້ວຍັງມີສິ່ງໃໝ່ໆ ຢ່າງໂຮງແຮມມາລີນາເບ່ແຊນ (Marina Bay Sands), ພິພິດພັນສິລະປະວິທະຍາສາດ (ArtScience Museum) ຂົວເຮລິກ (The Helix Bridge), ຊິງຊ້າສະຫວັນຂະໜາດຍັກ (The Singapore Flyer) ແລະ ໂຮງແຮມ ຟູນເລີຕັນເບ່ (Fullerton Bay) ທີ່ຄອຍຖ້າດຶງດູດນັກທ່ອງທ່ຽວເພີ່ມຂຶ້ນອີກດ້ວຍ, ຢ່າງໃດກໍຕາມສິງກະໂປຍັງມີສ່ວນອື່ນໆ ທີ່ບໍ່ຄວນເບິ່ງຂ້າມໃນການທ່ອງທ່ຽວເຊັ່ນດຽວກັນບໍ່ວ່າຈະເປັນເຂດໄຊນາທາວ ຫລື ລິດເຕີ້ນອິນເດຍສະຖານທີ່ຊຶ່ງເຕັມໄປດ້ວຍປະຫວັດສາດແລະຄວາມງົດງາມທາງວັດທະນະທຳ.
ຫົກ: ເມືອງຫລວງພະບາງ ປະເທດລາວ (Luang Prabang, Laos) ເມືອງຫລວງພະບາງຕັ້ງຢູ່ທາງເຫນືອຂອງປະເທດລາວ ໄດ້ຮັບການປະກາດຈາກອົງການຍູເນດສໂກໃຫ້ເປັນເມືອງມໍລະດົກໂລກທາງວັດທະນະທຳ, ເຊິ່ງເປັນມໍລະດົກໂລກແຫ່ງທຳອິດຂອງປະເທດລາວ (ປີ 1998, ວັດພູຈຳປາສັກແມ່ນ 2002) ສິ່ງທີ່ພາດບໍ່ໄດ້ເລີຍຄືການນັ່ງເຮືອຈາກປາກອູ (Pak OU) ຊົມທັດສະນີຍະພາບຂອງທັງສອງຝັ່ງແມ່ນ້ຳໂຂງ ນອກຈາກນັ້ນແລ້ວ, ອີກໜຶ່ງກິດຈະກຳທີ່ພວກເຮົາຢາກແນະນຳໃຫ້ເຮັດກໍຄືການໃສ່ບາດກັບພະສົງ ແລະ ສາມະເນນໃນຕອນເຊົ້າເວລາປະມານ 05.30 ນາທີ ເພາະນອກຈາກຈະໄດ້ບຸນໄດ້ກຸສົນກັນແລ້ວເຈົ້າຍັງໄດ້ສຳຜັດກັບບັນຢາກາດຍາມເຊົ້າທີ່ແສນຈະສົດຊື່ນອີກດ້ວຍ.
ເຈັດ: ເກາະພີພີ ປະເທດໄທ ເກາະພີພີ ຢູ່ໃນເຂດອຸດທະຍານແຫ່ງຊາດທາງທະເລອ່າວພັດນະທາລາແຂວງກະບີ່ຄອບຄຸມພື້ນທີ່ສ່ວນໃຫຍ່ໃນທະເລອັນດາມັນ, ດ້ານທິດຕະເວັນຕົກຂອງພາກໃຕ້ມີນ້ຳທະເລສະອາດງາມໃສ, ຫາດຊາຍຂາວລະອຽດ ສິງສຳຄັນຍັງເປັນສະຖານທີ່ຊຶ່ງໃຊ້ໃນການຖ່າຍຮູບເງົາເລື່ອງ " The Beach " ອີກດ້ວຍ, ຍັງມີກິດຈະກຳທາງນ້ຳຫຼວງຫຼາຍບໍ່ວ່າຈະເປັນການດຳນ້ຳເລິກ, ການດຳນ້ຳຕື້ນ ແລະ ການຊົມຄວາມງາມຂອງຖ້ຳຕ່າງໆ ອີກຫລວງຫລາຍ.
ແປດ: ເມືອງສຽມລຽບ ປະເທດກຳປູເຈຍ (Siem Reap, Cambodia) ຂຶ້ນຊື່ວ່າເປັນສິ່ງມະຫັດສະຈັນຂອງໂລກຈຶ່ງບໍ່ແປກທີ່ໃຜໆກໍຕ່າງຢາກໄປຊື່ນຊົມກັບຄວາມສວຍງາມແລະຕື່ນຕາຕື່ນໃຈຂອງ " ນະຄອນວັດ " (Ankor Wat) ຊຶ່ງຕັ້ງຢູ່ໃນເມືອງສຽມລຽບ ປະເທດກຳປູເຈຍ ລວມເຖິງເກັບພາບບັນຍາກາດຍາມພະອາທິດຂຶ້ນໃນຕອນເຊົ້າໆ ທີ່ງົດງາມຈັບໃຈຂອງຜູ້ໄດ້ເບິ່ງໄດ້ເຫັນ, ອີກທັງເມືອງສຽມລຽບຖືເປັນເມືອງທີ່ມີຄວາມຈະເລີນເຕີບໃຫຍ່ຢ່າງວ່ອງໄວໃນດ້ານຂອງສິ່ງປຸກສ້າງ. ບໍ່ວ່າຈະເປັນໂຮງແຮມໃໝ່ໆ, ຮ້ານອາຫານ ແລະ ແຫລ່ງທ່ອງທ່ຽວຍາມຄໍ່າຄືນຈຶ່ງເຮັດໃຫ້ສະດວກສະບາຍສຳລັບນັກທ່ອງທ່ຽວເປັນຢ່າງຫລາຍ.
ເກົ້າ: ນະຄອນກຽວໂຕ ປະເທດຍີ່ປຸ່ນ (Kyoto, Japan) ເມືອງທີ່ອຸດົມໄປດ້ວຍປະຫວັດສາດ ແລະ ວັດທະນະທຳທັງວັດວາອາຮາມແລະສານເຈົ້າຕ່າງໆ, ແຖມຍັງເປັນທີ່ພາກພູມໃຈຂອງຊາວເມືອງໃນຖານະທີ່ເຄີຍເປັນອະດີດເມືອງຫລວງຂອງປະເທດອີກດ້ວຍ, ໂດຍສິ່ງທີ່ດຶງດູດນັກທ່ອງທ່ຽວຈຳນວນບໍ່ນ້ອຍຄື: ການທີ່ໄດ້ເຫັນຍິງສາວຊາວໆຍີ່ປຸ່ນອານຸລັກວັດທະນະທຳດັ້ງເດີມ, ດ້ວຍການນຸ່ງຖືຊຸດກິໂມໂນ ຊຶ່ງເປັນຊຸດປະຈຳຊາດຂອງຍີ່ປຸ່ນນັ້ນເອງ ແລະ ຍ່າງຕາມທ້ອງຖະໜົນຢ່າງົດງ່າງາມໜ້າຍົກຍ້ອງຊົມເຊີຍ.
ສິບ: ເກາະຮ່ອງກົງ ປະເທດຈີນ (Hong Kong, China) ເມືອງແຫ່ງນີ້ ຖືເປັນເມືອງສຳຄັນທີ່ອຸດົມໄປດ້ວຍຮ້ານຄ້າຕ່າງໆຢ່າງຫລວງຫລາຍ, ທັງອາຫານການກິນ, ເຄື່ອງໃຊ້ສອຍຕ່າງໆ, ເສື້ອຜ້າ, ກະເປົ໋າແລະ ອື່ນໆ, ຍັງມີຕະຫຼາດກາງຄືນເອົາໃຈຜູ້ມັກໃນການຊອ້ບປິງຢ່າງເຕັມທີ່, ແຕ່ທີ່ພາດບໍ່ໄດ້ເລີຍກໍຄືອາຫານຮູບແບບຮ່ອງກົງ, ໂດຍສະເພາະ " Kong Chai Meen " ຫລືໝີ່ເຄິ່ງສຳເລັດຮູບແບບຮ່ອງກົງ, ຊຶ່ງມີຂາຍທົ່ວໄປຕາມຮ້ານຂ້າງທາງ ແລະ ອາຫານປະເພດອື່ນທີ່ເປັນເອກະລັກຂອງຮົງກົງ.
