ທ່າທີຕັດສິນອະນາຄົດ
(GMT+08:00) 2012-05-29 17:31:44 cri
ກຳມະກອນຜູ້ທີໜຶ່ງເວົ້າດ້ວຍຄວາມໃຈຮ້າຍວ່າ: "ເຈົ້າບໍ່ເຫັນຫວະ, ພວກເຮົາກຳລັງຂົນເອົາກ້ອນຫີນມາກໍ່ຝາເຮືອນ! ກ້ອນຫີນເຫຼົ່ານີ້ໜັກຊິຕາຍ, ເມື່ອຍຊິຕາຍ!"
ກຳມະກອນຜູ້ທີສອງຕອບວ່າ: "ພວກເຮົາພວມປຸກຕຶກ, ແຕ່ວ່າຊິປຸກໃຫ້ແລ້ວບໍ່ແມ່ນງ່າຍໄດ໋!"
ກຳມະກອນຜູ້ທີສາມທັງຍີ້ມທັງເວົ້າວ່າ: "ພວກເຮົາພວມປຸກຕຶກຫຼັງໜຶ່ງ, ມັນຈະກາຍເປັນສິ່ງກໍ່ສ້າງທີ່ເປັນສັນຍະລັກໃຫ້ແກ່ເມືອງນີ້, ໄດ້ເຂົ້າຮ່ວມກິດຈະການທີ່ມີຂະໜາດໃຫຍ່ຄືແນວນີ້, ຂ້ອຍຮູ້ສຶກຕື່ນເຕັ້ນຫຼາຍ!"
10 ປີຕໍ່ມາ, ກຳມະກອນຜູ້ທີໜຶ່ງຍັງກໍ່ຝາເຮືອນຢູ່ຄືເກົ່າ, ກຳມະກອນຜູ້ທີສອງໄດ້ນັ່ງແຕ້ມຜັງເຮືອນຢູ່ໃນຫ້ອງການ, ກາຍເປັນນັກວິສະວະກອນ, ສ່ວນຜູ້ທີສາມ, ໄດ້ກາຍເປັນເຖົ້າແກ່ຂອງສອງຄົນທີ່ກ່າວມານັ້ນ.
ກຳມະກອນສາມຄົນທີ່ກໍ່ຝາເຮືອນນຳກັນ, ພັດມີທ່າທີຕ່າງກັນໝົດຕໍ່ວຽກງານຂອງຕົນ, ຜູ້ທີໜຶ່ງມີແຕ່ເຮັດດ້ວຍຄວາມຈຳເປັນ, ຈົ່ມວ່າບໍ່ພໍໃຈນຳວຽກທີ່ຕົນເຮັດ, ຜູ້ທີສອງໄດ້ເຫັນຈຸດໝາຍຂອງວຽກງານ, ເຖິງວ່າໄດ້ຈົ່ມຄືກັນ, ແຕ່ໄດ້ຖືການເຮັດສຳເລັດໜ້າທີ່ວຽກງານໄວ້ໃນຖານະສຳຄັນທີ່ສຸດ, ຜູ້ທີສາມສາມາດປະກົດເຫັນຄວາມມ່ວນຊື່ນຂອງວຽກງານ, ແຕ່ບໍ່ແມ່ນໃຊ້ທ່າທີຈົ່ມວ່າມາແກ້ໄຂບັນຫາ. ອາດເຫັນໄດ້ວ່າ, ທ່າທີໃນການເຮັດວຽກຂອງສາມຄົນນີ້, ພາໃຫ້ເຂົາເຈົ້າມີຖານະຕ່າງກັນໃນພາຍລຸນມາແມ່ນເລື່ອງທີ່ສົມເຫດສົມຜົນທີ່ສຸດ.
ໃນນິທານດັ່ງກ່າວ, ທ່າທີສາມຢ່າງຂອງສາມຄົນໄດ້ພາໃຫ້ເຂົາເຈົ້າໄດ້ຮັບຜົນທີ່ຕ່າງກັນຫຼາຍ. ໃນຊີວິດຕົວຈິງ, ພວກເຮົາກໍອາດຈະໄດ້ສັງເກດເຫັນວ່າ, ຄົນທີ່ເຮັດວຽກປະເພດດຽວກັນຢູ່ໃນສິ່ງແວດລ້ອມທີ່ຄືກັນ, ພໍເລີ່ມຕົ້ນ, ຄວາມສາມາດຂອງໃຜລາວກໍ່ພໍປານກັນ, ແຕ່ຜົນສຸດທ້າຍ, ພັດໄກກັນຫຼາຍ.
ທ່ານນາໂປລີອົງ ເຄີຍເວົ້າວ່າ, "ຄົນກັບຄົນບໍ່ມີຫຍັງຕ່າງກັນຫຼາຍ, ຕ່າງກັນເລັກນ້ອຍກໍມີແຕ່ຈິດໃຈຕັ້ງໜ້າກັບຈິດໃຈຫຍໍ້ທໍ້ທໍ່ນັ້ນ, ແຕ່ກໍແມ່ນຄວາມຕ່າງກັນໜ້ອຍດຽວນັ້ນໄດ້ຕັດສິນຊີ້ຂາດຄວາມແຕກຕ່າງກັນຫຼາຍໃນດ້ານຊີວິດ ໃນພາຍຫຼັງ." ທ່າທີ, ໝາຍເຖິງວິທີທີ່ພວກເຮົາໃຊ້ມາເບິ່ງໂລກແລະຕົນເອງດ້ວຍມະໂນຄະຕິແລະຄວາມມຸ່ງຫວັງທີ່ຕ່າງກັນ. ຍ້ອນມີທ່າທີຕ່າງກັນ, ເມື່ອພົບພໍ້ເລື່ອງລາວແລ້ວ, ວິທີແກ້ໄຂບັນຫາກໍຈະຕ່າງກັນ, ແລະອັນນີ້ແຫຼະພາໃຫ້ມີຜົນສຸດທ້າຍຕ່າງກັນ. ບໍ່ວ່າເລື່ອງໃດ, ລ້ວນແຕ່ແມ່ນຊີ້ຂາດດ້ວຍອັດຕະວິໄສກັບພາວະວິໄສ, ພວກເຮົາຄວບຄຸມພາວະວິໄສບໍ່ໄດ້, ທຸກຄົນຍ່ອມຈະມີຍາມໂຊກດີແລະຍາມໂຊກບໍ່ດີ, ແຕ່ບໍ່ວ່າໂຊກດີຫຼືບໍ່ດີ, ສະພາບຈິດໃຈທີ່ດີມັກຈະພາຄົນໄປສູ່ຜົນສຳເລັດທີ່ດີ, ສະພາບຈິດໃຈບໍ່ດີພັດກົງກັນຂ້າມ. ສະນັ້ນ, ອາດເວົ້າໄດ້ວ່າ, ທ່າທີສຳຄັນກວ່າສະຕິປັນຍາ.
ໃນຊາດນີ້, ພວກເຮົາຈະໄດ້ພໍ້ກັບຄົນແນວໃດແລະເລື່ອງແບບໃດແມ່ນ ຄາດຄະເນບໍ່ໄດ້, ແຕ່ພວກເຮົາສາມາດປັບປ່ຽນທ່າທີຂອງຕົນເອງໄດ້, ສະນັ້ນ, ພວກເຮົາຈົ່ງໃຊ້ທ່າທີທີ່ຕັ້ງໜ້າກວ່າເກົ່າ, ເພື່ອຮັບມືກັບທຸກສິ່ງທຸກຢ່າງໃນຊີວິດ, ບໍ່ວ່າດີຫຼືບໍ່ດີ, ຖ້າໃຊ້ທ່າທີຕັ້ງໜ້າ, ກໍ່ຈະພາທ່ານໄປສູ່ບ່ອນສະຫວ່າງແຈ້ງແລະສວຍງາມກວ່າເກົ່າ.
