ງານກິລາໂອແລັມປິກລອນດອນຕ້ານສານກະຕຸ້ນຢ່າງແຂງແຮງທີ່ສຸດໃນປະຫວັດສາດ
(GMT+08:00) 2012-07-19 15:55:27 cri
ບໍລິສັດ BBC ຂອງອັງກິດລາຍງານວ່າ, ງານກິລາໂອແລັມປິກລອນດອນປີ 2012 ຈະກາຍເປັນງານໂອແລັມປິກຄັ້ງໜຶ່ງທີ່ຕ້ານສານກະຕຸ້ນຢ່າງແຂງແຂງທີ່ສຸດໃນປະຫວັດສາດ.
ຂ່າວແຈ້ງວ່າ, ນັກກິລາຫຼາຍກວ່າເຄິ່ງໜຶ່ງຈະຖືກກວດກາສານກະຕຸ້ນ, ນັບແຕ່ປັດຈຸບັນໄປຈົນຮອດງານກິລາໂອແລັມປິກຄົນພິການສິ້ນສຸດລົງ, ມີນັກວິທະຍາສາດ 150 ຄົນຈະກວດກາຕົວຢ່າງ 6 ພັນຕົວຢ່າງ. ສິ່ງທີ່ຕ້ອງກ່າວເຖິງເປັນພິເສດນັ້ນແມ່ນ, ນັກກິລາທຸກຄົນທີ່ໄດ້ຮັບຫຼຽນລ້ວນແຕ່ຕ້ອງຮັບເອົາການກວດກາ.
ນັກກິລາຜູ້ມີຊື່ສຽງຫຼາຍຄົນຂອງປະເທດອັງກິດກໍຈະເປັນຕົວຢ່າງໃນການຕ້ານສານກະຕຸ້ນ. ທ່ານເດີເວັນນິສ, ນັກກິລາທີ່ເຄີຍໄດ້ເປັນແຊັມໃນການແຂ່ງຂັນແລ່ນປ່ຽນໄມ້ 4 ຄູນ 100 ແມັດໃນງານກິລາໂອແລັມປິກອາແຕນເມື່ອປີ 2004 ກ່າວວ່າ,"ການທີ່ໄດ້ຮັບຫຼຽນຂອງງານກິລາໂອແລັມປິກແມ່ນມີຄວາມຮູ້ສຶກພາກພູມໃຈທີ່ຫາອັນປຽບບໍ່ໄດ້, ສະນັ້ນ ຕ້ອງຮູ້ຈະແຈ້ງວ່ານັກກິລາທຸກຄົນທີ່ຂຶ້ນຢືນຢູ່ເທິງແທ່ນຮັບລາງວັນນັ້ນ ໄດ້ທຸ່ມເທເຫື່ອແຮງແລະຄວາມຕັດສິນໃຈຫຼືບໍ່, ຫາກບໍ່ແມ່ນອາໃສສານກະຕຸ້ນ."
ນອກນີ້, ໃນງານໂອແລັມປິກຄັ້ງນີ້, ມີຫຼາຍກວ່າ 1 ພັນຄົນເຮັດວຽກຢູ່ຫ້ອງທົດລອງຕ້ານສານກະຕຸ້ນ, ແຕ່ລະມື້ ຈະກວດກາຕົວຢ່າງ 400 ຕົວຢ່າງເພື່ອຢືນຢັນວ່າມີສານກະຕຸ້ນທີ່ເກືອດຫ້າມຫຼືບໍ່. ປັດຈຸບັນ ສານກະຕຸ້ນທີ່ຫ້າມໃຊ້ມີຫຼາຍກວ່າ 240 ຊະນິດ.
ທ້າວແອມົງເດ, ນັກກິລາລອຍນ້ຳຄົນພິການທີ່ເຄີຍໄດ້ຮັບຫຼຽນຄຳໃນການແຂ່ງຂັນລອຍນ້ຳແບບຟຼິສະໄຕ 4 ຄູນ 100 ແມັດຢູ່ງານກິລາໂອແລັມປິກອາແຕນແລະປັກກິ່ງກ່າວວ່າ:"ການທີ່ໄດ້ຮັບຫຼຽນກໍຄືການເສບຢາເສບຕິດ, ໄດ້ຮັບຫຼຽນໜຶ່ງແລ້ວ ກໍຢາກໄດ້ອີກຫຼຽນໜຶ່ງ, ນີ້ແມ່ນກຳລັງແຮງໃຫຍ່ທີ່ສຸດສຳລັບຂ້ອຍ. ໃນເວລາຢືນຢູ່ເທິງແທ່ນຮັບລາງວັນ ຮູ້ສຶກວ່າທຸກສິ່ງທຸກຢ່າງທີ່ທຸ່ມເທອອກມານັ້ນແມ່ນຄຸ້ມຄ່າໝົດ. ຂ້ອຍຝຶກແອບອາທິດລະ 9 ເທື່ອ, ເທື່ອລະ 2 ຊົ່ວໂມງເຄິ່ງ, ຝຶກແອບມາ 4 ປີແລ້ວ, ຂ້ອຍເຊື່ອໝັ້ນວ່າ, ພວກເຮົາໄດ້ມີມາດຕະການທຸກຢ່າງເພື່ອຕ້ານສານກະຕຸ້ນ, ນີ້ຈະນຳມາເຊິ່ງງານກິລາໂອແລັມປິກທີ່ພິເສດຄັ້ງໜຶ່ງ."