ບໍລິສັດ G4S ບໍ່ມີກຳລັງທີ່ພຽງພໍໃນການຮັບເໝົາວຽກງານປ້ອງກັນຄວາມປອດໄພຂອງງານໂອແລັມປິກທັງໝົດແຕ່ຝ່າຍດຽວ
(GMT+08:00) 2012-07-19 16:05:39 cri
ກ່ຽວກັບວຽກງານປ້ອງກັນຄວາມປອດໄພຂອງງານໂອແລັມປິກຍັງມີອີກຂ່າວໜຶ່ງຂອງໜັງສືພິມເອກະລາດຂອງປະເທດອັງກິດ, ເຊິ່ງໄດ້ແຈ້ງວ່າ, ກ່ອນນ້ານີ້ໜຶ່ງປີ, ຜູ້ຮັບຜິດຊອບຂອງສະມາຄົມຕຳຫຼວດຂອງອັງກິດທີ່ອອກກິນເບ້ຍບຳນານແລ້ວ ກໍໄດ້ເຕືອນເຈົ້າໜ້າທີ່ກະຊວງພາຍໃນຂອງປະເທດອັງກິດວ່າ, ບໍລິສັດ G4S ບໍ່ມີກຳລັງທີ່ພຽງພໍໃນການຮັບເໝົາວຽກງານປ້ອງກັນຄວາມປອດໄພຂອງງານໂອແລັມປິກທັງໝົດແຕ່ຝ່າຍດຽວ, ແຕ່ວ່າ ລັດຖະບານອັງກິດຄືຊິບໍ່ໄດ້ປະຕິບັດຕໍ່ຄຳເຕືອນດັ່ງກ່າວຢ່າງເຄັ່ງຄັດ.
ໜັງສືພິມເອກະລາດເຜີຍໃຫ້ຮູ້ວ່າ, ເມື່ອ 1 ປີກ່ອນ, ຜູ້ຮັບຜິດຊອບຂອງສະມາຄົມຕຳຫຼວດທີ່ອອກກິນເບ້ຍບຳນານແລ້ວຂອງອັງກິດກໍໄດ້ມີຂໍ້ສະເໜີຕໍ່ລັດຖະບານອັງກິດວ່າ, ຖັນແຖວຂອງຕົນສາມາດຊ່ອຍລັດຖະບານເຮັດວຽກງານປ້ອງກັນຄວາມປອດໄພໃນໄລຍະງານກິລາໂອແລັມປິກໄດ້, ແລະເພີ່ນກໍເຊື່ອວ່າ, ອາໃສແຕ່ບໍລິສັດ G4S ຝ່າຍດຽວແມ່ນບໍ່ພຽງພໍ. ແຕ່ວ່າລັດຖະບານບໍ່ໄດ້ໃຊ້ມາດຕະການຫຍັງ.
ທາງດ້ານລັດຖະມົນຕີວັດທະນະທຳຂອງອັງກິດເວົ້າວ່າ, ຈົນມາຮອດອາທິດແລ້ວນີ້ ລັດຖະບານຈຶ່ງສັງເກດເຫັນວ່າ, ບໍລິສັດ G4S ບໍ່ສາມາດປະຕິບັດຕາມຄຳໝັ້ນສັນຍາຂອງຕົນ, ແລ້ວຈຶ່ງໄດ້ປະຕິບັດແຜນການສຸກເສີນໃນທັນທີ. ລັດຖະມົນຕີວັດທະນະທຳຜູ້ນີ້ກ່າວວ່າ, "ພວກຂ້າພະເຈົ້າມີແຜນການສຸກເສີນຕໍ່ແຜນການແຕ່ລະສະບັບ, ການປະຕິບັດແຜນການສຸກເສີນແມ່ນເລື່ອງທຳມະດາ."
ກ່ອນໜ້ານີ້ ມີສື່ມວນຊົນລາຍງານວ່າ, ເພື່ອແກ້ໄຂບັນຫາແຮງງານບໍ່ພຽງພໍ, ບໍລິສັດ G4S ໄດ້ຈ້າງຄົນຕ່າງປະເທດຈຳນວນໜຶ່ງ, ແຕ່ຄົນຕ່າງປະເທດເຫຼົ່ານີ້ ພຽງແຕ່ຜ່ານການອົບຮົມອາທິດໜຶ່ງເທົ່ານັ້ນກໍໄດ້ເລີ່ມເຮັດວຽກ, ສິ່ງທີ່ແຮ່ງເປັນຕາຢ້ານນັ້ນແມ່ນຄົນຕ່າງປະເທດຫຼາຍຄົນຍັງເວົ້າພາສາອັງກິດບໍ່ຄ່ອຍເປັນປານໃດ.
ຕໍ່ເລື່ອງນີ້ ບໍລິສັດ G4S ອະທິບາຍວ່າ, ບໍ່ແມ່ນກໍລະນີທັງໝົດລ້ວນແຕ່ຕ້ອງໃຊ້ພາສາອັງກິດ. ແຕ່ປະຊາຊົນອັງກິດຊ້ຳພັດຮູ້ສຶກບໍ່ພໍໃຈຫຼາຍຕໍ່ຄຳອະທິບາຍດັ່ງກ່າວ, ເຂົາເຈົ້າເວົ້າວ່າ, ສິ່ງຂັດຂວາງທາງດ້ານພາສາຈະພາໃຫ້ເກີດບັນຫາໃນດ້ານທຳຄວາມເຂົ້າໃຈກັນ, ແລະເກີດຂໍ້ຂັດແຍ່ງທີ່ບໍ່ຈຳເປັນ.
ທ່ານເຊບາສະຕຽນ ໂຄ, ປະທານຄະນະກຳມະການຈັດງານກິລາໂອແລັມປິກລອນດອນມີຄວາມເຫັນໃຈຫຼາຍຕໍ່ບໍລິສັດ G4S, ທ່ານເວົ້າວ່າ:"ເລື່ອງຈິງແມ່ນ, ມີແຕ່ລໍ້ລົດຢຽບໜ້າດິນແລ້ວ, ພວກເຮົາຈຶ່ງຮູ້ວ່າ, ຢູ່ຕໍ່ໜ້າມີຂຸມ, ປັດຈຸບັນ ບໍລິສັດ G4S ກໍເປັນສະພາບແນວນີ້ຄືກັນ."
ຍ້ອນບໍລິສັດ G4S ປະຕິບັດໜ້າທີ່ບໍ່ໄດ້ດີ, ສະນັ້ນ ທະຫານຫຼາຍຄົນຈຶ່ງຈຳເປັນຕ້ອງຍົກເລີກການພັກຜ່ອນ, ແລ້ວຖືກສັບຊ້ອນມາຊ່ວຍເຫຼືອການປ້ອງກັນຄວາມປອດໄພ, ເຂົາເຈົ້າກໍມີຄວາມບໍ່ພໍໃຈຕໍ່ບໍລິສັດ G4S.
ທ່ານຜູ້ຟັງ, ພວກເຮົາເວົ້າບໍລິສັດ G4S ມາດົນແລ້ວ, ຄັນຊັ້ນ ບໍລິສັດນີ້ແມ່ນບໍລິສັດຫຍັງ? ຕາມຂ່າວແຈ້ງວ່າ, ບໍລິສັດ G4S ແມ່ນບໍລິສັດຮັກສາຄວາມປອດໄພໃຫຍ່ອັນດັບທີໜຶ່ງໃນໂລກ, ສ້າງຕັ້ງຂຶ້ນຢູ່ໂກເປັນຮາກໃນປີ 1901, ພາຍຫຼັງມາໄດ້ ຍ້າຍໄປປະເທດອັງກິດ, ທຸລະການຂອງບໍລິສັດສ່ວນຫຼາຍແມ່ນປ້ອງກັນຄວາມປອດໄພຂອງເຂດຊຸມຊົນ, ຮ້ານຄ້າລະດັບສູງ, ທະນາຄານ, ນອກນີ້ ຍັງປ້ອງກັນຄວາມປອດໄພຂອງບຸກຄົນຜູ້ມີຊື່ສຽງ, ເງິນສົດ, ເພັດນິນຈິນດາ. ສ່ວນຢູ່ທະວີບ ອາຊີພວກເຮົາ, ບໍລິສັດນີ້ມີລົດຍົນຫຼາຍກວ່າ 800 ຄັນ, ມີທຸລະການຢູ່ປະເທດໄທ, ມາເລເຊຍແລະປະເທດອື່ນໆ. ໃນເວລາຮັບເໝົາວຽກງານປ້ອງກັນຄວາມປອດໄພຂອງງານກິລາໂອແລັມປິກ, ບໍລິສັດນີ້ໃຫ້ຄຳໝັ້ນສັນຍາວ່າສາມາດສະໜອງເຈົ້າໜ້າທີ່ປ້ອງກັນຄວາມປອດໄພ 1 ໝື່ນ 400 ຄົນ, ນອກນັ້ນຍັງສາມາດຄຸ້ມຄອງທະຫານ 7500 ຄົນແລະອາສາສະໝັກ 2500 ຄົນ. ແຕ່ຖືກສື່ມວນຊົນເປີດເຜີຍວ່າ ບໍ່ສາມາດສະໜອງກຳລັງປ້ອງກັນຄວາມປອດໄພເຖິງຂະໜາດນັ້ນ.