ຄຽງຄູ່ກັບງານກິລາໂອລິມປິກລອນດອນນັບມື້ນັບຈໍ້ເຂົ້າມາ, ທີມນັກກິລາໂອລິມປິກຂອງປະເທດຕ່າງໆກໍພວມທຳການກະກຽມເພື່ອໄປເຂົ້າຮ່ວມງານມະໂຫລານໂອລິມ ປິກທີ່ລອນດອນ. ແຕ່ຫວ່າງບໍ່ດົນມານີ້, ຢູ່ອາເມລິກາທີ່ເປັນປະເທດຊຸກຍູ້ເສດຖະກິດໂລກາພິວັດມາໂດຍຕະຫຼອດ ພັດໄດ້ເກີດເລື່ອງໃນບັນຫາຊຸດທີມຊາດຂອງອາເມລິກາ. ໃນກອງປະຊຸມຂ່າວທີ່ຈັດຂຶ້ນໃນຫວ່າງບໍ່ດົນມານີ້, ມີເທື່ອໜຶ່ງ, ທ່ານຮາຣີ ແຣັດ, ຜູ້ນຳພັກທີ່ໄດ້ບ່ອນນັ່ງຫຼາຍທີ່ສຸດໃນສະພາສູງອາເມລິກາ ໄດ້ສະແດງຄວາມຜິດຫວັງທີ່ສຸດຕໍ່ທີມຊາດອາເມລິກາໃສ່ຊຸດໂອລິມປິກທີ່ຜະລິດຢູ່ຈີນ, ຈົນກະທັ້ງຮຽກຮ້ອງໃຫ້ເຈົ້າໜ້າທີ່ທີ່ກ່ຽວຂ້ອງເຜົາຖິ້ມເຄື່ອງແບບຂອງນັກກິລາທີມໂອລິມປິກອາເມລິກາທີ່ຈະເຂົ້າຮ່ວມງານກິລາໂອລິມປິກລອນດອນ, ເຊິ່ງໃຫ້ເຜົາຖິ້ມໃນທ້າຍເດືອນນີ້, ເພາະວ່າເຄື່ອງແບບເຫຼົ່ານີ້ລ້ວນແຕ່ແມ່ນຈີນເປັນຜູ້ຜະລິດ. ທ່ານແຣັດ ກ່າວວ່າ:"ຂ້າພະເຈົ້າເຫັນວ່າ ຄວນກອງເຄື່ອງແບບເຫຼົ່ານີ້ເປັນກອງແລ້ວເຜົາຖິ້ມ, ແລະຜະລິດເຄື່ອງແບບຊຸດໃໝ່."
ໂດຍແນໃສ່ເລື່ອງທີ່ທ່ານແຣັດແລະນັກການເມືອງທ່ານອື່ນໆຂອງອາເມລິກາກ່າວ ວ່າ ທີມໂອລິມປິກອາເມລິກາຄວນໃສ່ເຄື່ອງແບບທີ່ອາເມລິກາເປັນຜູ້ຜະລິດ ໄປເຂົ້າຮ່ວມງານກິລາໂອລິມປິກລອນດອນ, ທ່ານເຊບາສຕຽນ ໂຄ, ປະທານຄະນະກຳມະການຈັດງານໂອລິມປິກລອນດອນ ກ່າວວ່າ, ທ່ານບໍ່ເຫັນດີນຳຄວາມຄິດເຫັນຂອງອາເມລິກາ, ນັກການເມືອງຂອງອາເມລິກາຄວນເຫັນໄດ້ຜົນປະໂຫຍດຕ່າງໆຈາກໂລກາພິວັດທີ່ນຳມາແກ່ປະເທດຕ່າງໆຂອງໂລກ.
ໃນເວລາໃຫ້ສຳພາດຕໍ່ນັກຂ່າວຢູ່ທີ່ລອນດອນຫວ່າງມໍ່ໆມານີ້, ທ່ານເຊບາສຕຽນ ໂຄ ກ່າວວ່າ, ງານມະໂຫລານໂອລິມປິກລອນດອນ 2012 ຈະສາມາດຈັດຂຶ້ນຢ່າງໄດ້ຮັບຜົນສໍາເລັດຫຼືບໍ່, ຂໍກະແຈສຳຄັນແມ່ນບັນດາປະເທດຕ່າງໆຕ້ອງສະໜັບສະໜູນເຊິ່ງກັນແລະກັນ. ໃນເວລານັກຂ່າວຖາມວ່າ: ທ່ານມີຄວາມຄິດເຫັນແນວໃດຕໍ່ທ່ານແຣັດ, ນັກການເມືອງອາວຸໂສຂອງພັກເດໂມກະເລັດ ແລະ ທ່ານແປໂລຊີ, ນັກການເມືອງອາວຸໂສຂອງພັກລີພັບບຼີກັນອາເມລິກາ ທັງສອງຄົນກ່າວວ່າ ນັກກິລາອາເມລິກາຄວນໃສ່ຊຸດປະຈຳທີມຊາດທີ່ອາເມລິກາເປັນຜູ້ຜະລິດນັ້ນໄປເຂົ້າຮ່ວມງານໂອລິມປິກລອນດອນ ແລະເຜົາຖິ້ມຊຸດປະຈຳທີມທີ່ຈີນເປັນຜູ້ຜະລິດນັ້ນໄປໝົດ. ທ່ານ ເຊບາສຕຽນ ໂຄ ກ່າວວ່າ, ຄວາມຄິດເຫັນຂອງອາເມລິກາແມ່ນໃຈຄັບແຄບທີ່ສຸດ. ທ່ານກ່າວວ່າ:"ລັກສະນະທາດແທຂອງເສດຖະກິດໂລກາພິວັດແມ່ນພວກເຮົາສາມາດຊື້ການບໍລິການທີ່ດີທີ່ສຸດຈາກແຫ່ງຕ່າງໆທົ່ວໂລກ. ສູ່ມື້ນີ້, ມີຫຼາຍປະເທດກໍມາຊື້ຜະລິດຕະພັນຄຸນນະພາບດີຂອງອັງກິດ, ຊຸດປະຈຳທີມຊາດອັງກິດແມ່ນບໍລິສັດອາດີດາສຂອງເຢຍລະມັນເປັນຜູ້ຜະລິດ, ເຊິ່ງເປັນບໍລິສັດແຫ່ງໜຶ່ງທີ່ມີຫຼາຍສາຂາຢູ່ຫຼາຍໆປະເທດໃນໂລກ. ຂ້າພະເຈົ້າຄິດວ່າ ນີ້ແຫຼະກໍແມ່ນລັກສະນະທາດແທ້ຂອງເສດຖະກິດໂລກາພິວັດ."
© China Radio International.CRI. All Rights Reserved. 16A Shijingshan Road, Beijing, China. 100040 |