ທິມບານເຕະຍິງສ.ປ.ປ.ເກົາຫຼີນັດຢຸດເຂົ້າຮ່ວມການແຂ່ງຂັນ
(GMT+08:00) 2012-07-26 15:46:39 cri
ເຖິງວ່າຍັງອີກ 2 ວັນຈິ່ງຈະຮອດພິທີໄຂງານກິລາໂອລິມປິກລອນດອນຢ່າງເປັນທາງການ, ແຕ່ວ່າກິລາບາງປະເພດເປັນຕົ້ນແມ່ນກິລາບານເຕະເພດຍິງໄດ້ເລີ່ມຕົ້ນແຂ່ງຂັນແລ້ວ. ຕອນຄ່ຳວັນທີ 25 ກໍລະກົດນີ້ 23 ໂມງຕາມເວລາປັກກິ່ງ, ທິມບານເຕະຍິງອັງກິດເຊິ່ງເປັນເຈົ້າພາບໄດ້ລົງແຂ່ງຂັນພົບກັບທິມບານເຕະຍິງນູແວນເຊລັງ, ຖືວ່າການແຂ່ງຂັນຂອງຄູ່ນີ້ເປັນການເປີດສະນາມແຂ່ງຂັນຂອງງານກິລາໂອລິມປິກເທື່ອນີ້. ແຕ່ວ່າໃນການແຂ່ງຂັນລະຫວ່າງທິມບານເຕະຍິງສ.ປ.ປ.ເກົາຫຼີກັບທິມບານເຕະຍິງໂກລົມບີນັ້ນ, ພັດເກີດເຫດການຜິດພາດທາງດ້ານເຕັກນິກໜຶ່ງຂຶ້ນຄື: ໃນເວລາແນະນຳນັກກິລາຂອງທິມບານເຕະສ.ປ.ປ.ເກົາຫຼີ, ໃນໜ້າຈໍໂທລະພາບໃຫຍ່ໃນສະໜາມກິລາໄດ້ສະແດງອອກທຸງຊາດສ.ເກົາຫຼີຢ່າງຜິດພາດ. ສ້າງຄວາມບໍ່ພໍໃຈເປັນຢ່າງຍິ່ງຕໍ່ນັກກິລາກໍ່ຄືຄະນະນຳ, ທັກທ້ວງຕໍ່ຄະນະກຳມະການຈັດງານແລະກ່າວວ່າຈະບໍ່ເຂົ້າຮ່ວມການແຂ່ງຂັນ, ເຮັດໃຫ້ການແຂ່ງຂັນນັດນີ້ຕ້ອງເລື່ອນເວລາອອກໄປເຖິງ 1 ຊົ່ວໂມງ. ພາຍຫຼັງເຫດການສະຫງົບລົງ, ຄະນະກຳມະການຈັດງານໂອລິມປິກໄດ້ກ່າວຂໍອະໄພຢ່າງເປີດເຜີຍ. ຫຼັງຈາກນັ້ນຈຶ່ງເລີ່ມຕົ້ນດຳເນີນການແຂ່ງຂັນຄືນໃໝ່, ຜ່ານການແຂ່ງຂັນໃນທີ່ສຸດທິມເຕະບານຍິງຈາກສ.ປ.ປ.ເກົາຫຼີສາມາດເອົາຊະນະໂກລົມບີໄປ 2 ປະຕູຕໍ່ 0.
