ຄຽງຄູ່ກັບງານມະຫະກຳໂອລິມປິກລອນດອນນັບມື້ນັບຈໍ້ເຂົ້າມາ, ໃນຫຼາຍມື້ຜ່ານມາ, ຢູ່ຕາມເວັບໄຊຕ່າງໆກໍເລີ່ມມີຫົວຂໍ້ກ່ຽວກັບງານໂອລິມປິກລອນດອນເພີ່ມຂຶ້ນຊັກໃຊ້, ໃນນັ້ນມີຫຼາຍຂ່າວກໍມ່ວນແລະເປັນໜ້າສົນໃຈຫຼາຍ. ຂ່າວລາຍງານວ່າ, ຝົນຝອຍຕິດຕໍ່ກັນຫຼາຍມື້ ອາດຈະກາຍເປັນພາບພົດຂອງທົ່ວໂລກທີ່ມີຕໍ່ງານໂອລິມປິກລອນດອນ. ສື່ມວນຊົນຕ່າງປະເທດຄາດຄະເນວ່າ, ງານໂອລິມປິກລອນດອນ 2012 ອາດຈະກາຍເປັນງານໂອລິມປິກທີ່ປຽກຊຸ່ມທີ່ສຸດໃນປະຫວັດສາດ. ນ້ຳຝົນອາດຈະກາຍເປັນສິ່ງທີ່ເປັນອຸປະສັກໃຫຍ່ທີ່ສຸດສຳລັບຄະນະກຳມະການຈັດງານໂອລິມປິກລອນດອນ.
ທ່ານເຊບາສຕຽນ ໂຄ, ປະທານຄະນະກຳມະການຈັດງານໂອລິມປິກລອນດອນໄດ້ເວົ້າຢອກວ່າ: ຖ້າຄະນະກຳມະການໂອລິມປິກສາກົນຮູ້ໄດ້ວ່າດິນຟ້າອາກາດຂອງລອນດອນຈະເປັນຄືແນວນີ້ ໃນເວລາທີ່ພວກເຮົາຮ້ອງຂໍເປັນເຈົ້າພາບຈັດງານໂອລິມປິກນັ້ນ, ພວກເຂົາເຈົ້າກໍອາດຈະບໍ່ໃຫ້ງານໂອລິມປິກມາຈັດຢູ່ລອນດອນ.
ຂ່າວແຈ້ງວ່າ, ແຕ່ຕົ້ນປີມານີ້, ດິນຟ້າອາກາດຢູ່ອັງກິດຜິດປົກກະຕິຫຼາຍ, ທຳອິດແມ່ນໄດ້ປະສົບໄພແຫ້ງແລ້ງເປັນເວລາປະມານ 3 ເດືອນມາກ່ອນ, ແລະນັບແຕ່ທ້າຍ ເດືອນເມສາເປັນຕົ້ນມາ, ໄພແຫ້ງແລ້ງໄດ້ກາຍມາເປັນໄພນ້ຳຖ້ວມ. ໃນນັ້ນ, ເດືອນ ມິຖຸນາທີ່ຫາກໍ່ຜ່ານໄປແມ່ນເດືອນໜຶ່ງທີ່ມີຝົນຕົກຫຼາຍທີ່ສຸດໃນຮອບ 90 ປີຢູ່ອັງກິດ. ບໍລິສັດກະຈາຍສຽງອັງກິດ ຫຼື BBC ແຈ້ງວ່າ, ໃນຕະຫຼອດເດືອນມິຖຸນາ, ປະລິມານນ້ຳຝົນສະເລ່ຍທົ່ວປະເທດອັງກິດວັດແທກໄດ້ 145,3 ມີລີແມັດ, ໄດ້ສ້າງສະຖິຕິທີ່ມີຝົນຕົກຫຼາຍທີ່ສຸດນັບແຕ່ມີການບັນທຶກໄວ້ໃນປີ 1910 ເປັນຕົ້ນມາ. ໃນນັ້ນ, ບາງມື້ມີຝົນຕົກຫຼາຍປະລິມານນ້ຳຝົນເທົ່າກັບປະລິມານນ້ຳຝົນຂອງໄລຍະໜຶ່ງເດືອນໃນຍາມປົກກະຕິ. ຝົນຕົກໜັກຍັງເຮັດໃຫ້ການຂົນສົ່ງທາງບົກສ່ວນໜຶ່ງໃນອັງກິດຖືກຕັດຂາດໄປ.
ນັກວິຊາການດ້ານອຸຕຸນິຍົມເຕືອນວ່າ: ວັນເວລາທີ່ຟ້າສົດໃສອາກາດຮ້ອນທີ່ເຄີຍເຫັນໄດ້ໃນງານໂອລິມປິກທຸກຄັ້ງຜ່ານມານັ້ນ ບໍ່ອາດຈະໄດ້ເຫັນຕໍ່ໄປອີກແລ້ວໃນງານໂອລິມປິກລອນດອນຄັ້ງນີ້. ຍິ່ງໄປກວ່ານັ້ນ, ບໍລິສັດພະນັນວິລຽມຮິວອັງກິດຍັງໄດ້ອອກອັດຕາຕໍ່ລອງໜຶ່ງຕໍ່ໜຶ່ງສະເພາະວ່າໃນວັນຈັດພິທີໄຂງານໂອລິມປິກລອນດອນນັ້ນຈະມີຝົນຕົກຫຼືບໍ່.
© China Radio International.CRI. All Rights Reserved. 16A Shijingshan Road, Beijing, China. 100040 |