ການເປັນມາຂອງບ້ານໂອລິມປິກ
ບ້ານໂອລິມປິກກໍເອິ້ນເປັນບ້ານງານໂອລິມປິກຫຼືບ້ານນັກກິລາ, ແມ່ນບ່ອນພັກເຊົາທີ່ເຈົ້າພາບຈັດງານກິລາຈັດໄວ້ໃຫ້ນັກກິລາ ເຈົ້າໜ້າທີ່ແລະຜູ່ປະຕິບັດງານທີ່ເຂົ້າຮ່ວມງານກິລາໂອລິມປິກ. ໃນງານກິລາໂອລິມປິກໄລຍະຕົ້ນ, ນັກກິລາແລະເຈົ້າໜ້າທີ່ ທີ່ມາຈາກບັນດາປະເທດໄດ້ແຍກກັນພັກເຊົາຢູ່ຫໍພັກຕ່າງໆ, ບໍ່ສະດວກຕໍ່ວຽກຈັດຕັ້ງງານກິລາໂອລິມປິກແລະການແລກປ່ຽນຕິດຕໍ່ພົວພັນລະຫວ່າງນັກກິລາປະເທດຕ່າງໆ. ງານກິລາໂອລິມປິກຄັ້ງທີ 8 ໄດ້ຈັດຂຶ້ນຢູ່ປາຣີໃນປີ 1924, ເຈົ້າພາບຈັດງານເທື່ອນັ້ນໄດ້ໃຫ້ຜູ່ເຂົ້າຮ່ວມໂຮມກັນພັກເຊົາຢູ່ໃນເຮຶອນໄມ້ທີ່ປຸກຂຶ້ນໂດຍສະເພາະ, ນີ້ກໍແມ່ນບ້ານງານກິລາໂອລິມປິກທີ່ສ້າງຂຶ້ນກ່ອນໝູ່.
ໃນງານກິລາໂອລິມປິກລົອສແອນເຈີລິສ໌ປີ 1932, ອົງການປົກຄອງເມືອງໄດ້ປຸກເຮືອນໂດຍສະເພາະສຳລັບໃຫ້ນັກກິລາແລະຜູ່ປະຕິບັດທາງການພັກເຊົາຢູ່ບ່ອນມໍ່ສະໜາມກິລາກາງ. ແຕ່ນັ້ນມາ, ການປຸກສ້າງບ້ານນັກກິລາໄດ້ກາຍເປັນມູນເຊື້ອ, ແລະໄດ້ກຳນົດໄວ້ໃນກົດບັດໂອລິມປິກວ່າ, "ເພ່ືອໃຫ້ນັກກິລາ ເຈົ້າໜ້າທ່ີແລະຜູ່ປະຕິບັດງານອື່ນໆໄດ້ຢູ່ນຳກັນ, ຄະນະກຳມະການຈັດງານກິລາໂອລິມປິກຄວນຈັດໃຫ້ມີບ້ານໂອລິມປິກແຫ່ງໜຶ່ງ ທີ່ຢູ່ໄດ້ກ່ອນຈັດພິທີໄຂງານກິລາໂອລິມປິກ 2 ອາທິດຮອດ 3 ມື້ຫຼັງຈາກຈັດພິທີປິດງານ."
ບ້ານໂອລິມປິກຄວນສອດຄ່ອງກັບຄວາມຮຽກຮ້ອງໃນ " ຂໍ້ຄວນຮູ້ຂອງບ້ານໂອລິມປິກ " ທ່ີຄະນະບໍລິຫານງານຂອງຄະນະກຳມະການໂອລິມປິກສາກົນວາງອອກ. ຈຳນວນເຈົ້າຫນ້າທີ່ແລະຜູ່ປະຕິບັດງານອື່ນໆທີ່ຢູ່ບ້ານໂອລິມປິກຈະກຳນົດໂດຍຄະນະບໍລິຫານງານຂອງຄະນະກຳມະການໂອລິມປິກສາກົນ, ເຊິ່ງບໍ່ຄວນກາຍ 50% ຂອງຈຳນວນນັກກິລາທີ່ສະໝັກເຂົ້າຮ່ວມ.
ບ້ານໂອລິມປິກຄວນຕັ້ງຢູ່ບ່ອນມໍ່ສະຫນາມກິລາກາງແລະສະຫນາມເຝິກແອບ.ໃນບ້ານໂອລິມປິກ, ຕ້ອງມີຫ້ອງອາຫານ ຄຼິນນິກ ຮ້ານຄ້າແລະສູນວັດທະນະທຳລື້ນເລີງແລະອື່ນໆ.
ກົດບັດໂອລິມປິກຍັງກຳນົດວ່າ, ຄະນະກຳມະການຈັດຕັ້ງງານກິລາໂອລິມປິກຄວນຫາບແບກຄ່າໃຊ້ຈ່າຍທາງດ້ານອາຫານການກິນແລະທາງຄົມ ມະນາຄົມທັງຫມົດຢູ່ທ້ອງຖິ່ນນັ້ນຂອງນັກກິລາ ເຈົ້າຫນ້າທິ່ແລະຜູ່ປະຕິບັດງານທ່ີພັກເຊົາທີ່ຢູ່ບ້ານໂອລິມປິກ. ຄະນະຜູ່ແທນຂອງບັນດາປະເທດເຂົ້າຢູ່ບ້ານໂອລິມປິກລ້ວນແຕ່ຕ້ອງຈັດພິທີເຂົ້າປະຈຳແບບງ່າຍໆ. ກ່ອນອື່ນນາຍບ້ານຕ້ອງກ່າວຄຳຍິນດີຕ້ອນຮັບ, ແລະໃຫ້ຫົວຫນ້າຄະນະຜູ່ແທນກ່າວຄຳຂອບໃສ, ແລ້ວເສບເພງຊາດຂອງຄະນະຜູ່ແທນນັ້ນ,ສຸດທ້າຍຍັງຕ້ອງຊັກທຸງຊາດຂອງຄະນະຜູ່ແທນຂຶ້ນເສົາ.
ປີ 1952 ໃນເວລາຄະນະນັກກິລາຈີນເດີນທາງໄປຮອດແຮນຊິງກີນັ້ນ, ການແຂ່ງຂັນຂອງງານກິລາໂອລິມປິກມໍ່ຈະສ້ຽງສຸດລົງແລ້ວ, ແຕ່ກໍຍັງຈັດພິທີຊັກທຸງຊາດຢ່າງເຄັ່ງຂືມຢູ່ໃນບ້ານໂອລິມປິກ,ນີ້ແມ່ນທຸງແດງຫ້າດາວປະກົດຕົວຢູ່ໃນງານກິລາໂອລິມປິກເປັນຄັ້ງທຳອິດ.
