ງານມະໂຫລານໂອລິມປິກຄັ້ງທີ 30 ໄດ້ເປີດພິທີຢູ່ນະຄອນຫຼວງລອນດອນຂອງອັງກິດໃນວັນທີ 27 ກໍລະກົດຕາມເວລາອັງກິດ, ນັບມາຮອດວັນນີ້ ຄື ວັນອັງຄານ ທີ 31 ກໍລະກົດນີ້ໄດ້ດຳເນີນເປັນມື້ທີ 5 ແລ້ວ. ເຊື່ອວ່າໃນໄລຍະນີ້ ເພື່ອນມິດທ່ານຜູ້ຟັງກໍຄົງຈະກຳລັງສົນໃຈນຳງານໂອລິມປິກຢູ່ເນາະ. ສ່ວນຫົວຂໍ້ຂ່າວກ່ຽວກັບງານໂອລິມປິກທີ່ອະລຸນຈະນຳສະເໜີສູ່ທ່ານຟັງໃນລາຍການມື້ນີ້ແມ່ນ: ການຈັດງານໂອລິມປິກຕ້ອງໃຊ້ກຳລັງຄົນ, ກຳລັງທາງດ້ານວັດຖຸສິ່ງຂອງ ແລະ ກຳລັງຊັບສິນເປັນຈຳນວນຫຼວງຫຼາຍ, ເປັນຫຍັງປະເທດຕ່າງໆຍັງພະຍາຍາມແຂ່ງຂັນກັນເພື່ອເປັນເຈົ້າພາບຈັດງານໂອລິມປິກ? ສາເຫດແມ່ນຫຍັງ? ສື່ມວນຊົນຫຼາຍແຫ່ງໄດ້ລາຍງານວ່າ, ສາເຫດອາດຈະແມ່ນຄືດັ່ງນີ້: ໜຶ່ງ, ຍົກຄຸນນະພາບຂອງຕົວເມືອງໃຫ້ສູງຂຶ້ນ. ເວົ້າສຳລັບຕົວເມືອງທີ່ເປັນເຈົ້າພາບຈັດງານໂອລິມປິກແລ້ວ, ຜ່ານການດຳເນີນໂຄງການຕ່າງໆຈະສາມາດຍົກ ລະດັບພື້ນຖານໂຄງລ່າງແລະລະດັບທັນສະໄໝຂອງທົ່ວຕົວເມືອງເຈົ້າພາບໃຫ້ສູງຂຶ້ນ ຢ່າງໃຫຍ່ຫຼວງ. ສອງ, ເພີ່ມລາຍຮັບການເງິນແຫ່ງລັດ. ໃນໄລຍະຈັດງານໂອລິມປິກ, ຄົນປະເທດຕ່າງໆຈະເຂົ້າໄປໃນປະເທດເຈົ້າພາບຢ່າງຫຼວງຫຼາຍ, ໃນນັ້ນ, ມີນັກທ່ອງທ່ຽວ, ມີຜູ້ໄປເບິ່ງໄປຊົມການແຂ່ງຂັນ, ມີນັກກິລາ, ກໍມີຄົນໄປວຽກງານທາງລັດຖະການ ຫຼື ທາງການຄ້າ, ດັ່ງນັ້ນ, ຈະມີຄວາມຕ້ອງການຕໍ່ເຄື່ອງອຸປະໂພກບໍລິໂພກ ແລະ ດ້ານການບໍລິການເພີ່ມຂຶ້ນຢ່າງຫຼວງຫຼາຍ, ໂດຍສະເພາະແມ່ນໃນຕົວເມືອງເຈົ້າພາບ, ເຮັດໃຫ້ຕະຫຼາດການບໍລິໂພກມີການພັດທະນາຢ່າງວ່ອງໄວ, ແນ່ນອນແຫຼະ, ກໍເປັນໂອກາດທີ່ດີສຳລັບການພັດທະນາຂະແໜງການທ່ອງທ່ຽວ. ຂະນະດຽວກັນ, ເສດຖະກິດໂອລິມປິກກໍຈະສ້າງໂອກາດການຄ້າອັນມະຫາສານ ແລະ ດຶງດູດນັກລົງທຶນຈຳນວນຫຼວງຫຼາຍໄປສະແຫວງຫາໂອກາດຮ່ວມມື, ແລ້ວເຮັດໃຫ້ກາຍເປັນຕະຫຼາດການລົງທຶນທີ່ໃຫຍ່ຫຼວງ. ທັງໝົດນີ້ລ້ວນແຕ່ຈະສ້າງລາຍຮັບໃຫ້ແກ່ການເງິນຂອງລັດຢ່າງຫຼວງຫຼາຍ. ສາມ, ຊຸກຍູ້ໃຫ້ເສດຖະກິດພັດທະນາ. ຜົນຄາດຄະເນປະກົດວ່າ, ນັບຕັ້ງແຕ່ການໄດ້ຮັບຜົນສຳເລັດໃນການຮ້ອງຂໍເປັນເຈົ້າພາບຈັດງານໂອລິມປິກ ຕະຫຼອດຮອດການແຂ່ງຂັນຂອງງານໂອລິມປິກສິ້ນສຸດລົງ, ແຕ່ລະປີ, ປັດໄຈໂອລິມປິກກໍໄດ້ນຳມາປະສິດທິຜົນດ້ານເສດຖະກິດອັນມະຫາສານ, ແລະຊຸກຍູ້ໃຫ້ເສດຖະກິດພັດທະນາ. ງານມະໂຫລານໂອລິມປິກແມ່ນກິດຈະກຳລັກສະນະທົ່ວໂລກທີ່ມີຂະໜາດໃຫຍ່ທີ່ສຸດໃນປັດຈຸບັນ, ເພື່ອຮັບປະກັນການໄດ້ຮັບຜົນສຳເລັດຢ່າງສົມບູນໃນການຈັດງານໂອລິມປິກ, ຕ້ອງນຳໃຊ້ເຄື່ອງອຸປະກອນເຕັກນິກ ແລະ ຜະລິດຕະພັນທີ່ຄຸນນະພາບດີທີ່ສຸດແລະກ້າວໜ້າທີ່ສຸດ, ສະນັ້ນກໍສາມາດຊຸກຍູ້ການຍົກລະດັບເຕັກນິກແລະປ່ຽນຮຸ້ນຜະລິດຕະພັນທີ່ກ່ຽວຂ້ອງ, ຊຸກຍູ້ໃຫ້ອົງປະກອບອຸດສາຫະກຳແລະອົງປະກອບເຕັກນິກພັດທະນາໄປສູ່ລະດັບສູງຕື່ມອີກ. ການປັບປຸງອົງປະກອບອຸດສາຫະກຳໃຫ້ແທດເໝາະ, ເສດຖະກິດພັດທະນາກ້າວເດີນເປັນຢ່າງດີແລ້ວ ກໍຈະຊຸກຍູ້ໃຫ້ສະພາບເສດຖະກິດແຫ່ງຊາດຂອງປະເທດເຈົ້າພາບພັດທະນາຢ່າງວ່ອງໄວຕື່ມອີກ. ສີ່, ສາມາດສະແດງໃຫ້ເຫັນເຖິງກຳລັງແຫ່ງຊາດ. ຢາກເປັນເຈົ້າພາບຈັດງານໂອລິມປິກ, ກ່ອນອື່ນຕ້ອງມີກຳລັງຊັບສິນອັນມະຫາສານເປັນສິ່ງສະໜັບສະໜູນ. ຫ້າ, ເພີ່ມໂອກາດຫາວຽກເຮັດງານທຳ. ໂຄງການໂອລິມປິກຕ່າງໆຈະຊຸກຍູ້ການກໍ່ສ້າງຕົວເມືອງໂດຍກົງແລະຮອບດ້ານ, ແລະຊຸກຍູ້ການປັບປຸງອົງປະກອບອຸດສາຫະກຳຢ່າງແຂງແຮງ, ເພີ່ມຄວາມແຮງເຂົ້າໃສ່ການພັດທະນາເສດຖະກິດຕົວເມືອງເປັນໄລຍະຍາວນານ, ສ້າງຕຳແໜ່ງປະກອບອາຊີບຫຼາຍກວ່າເກົ່າ. ຫົກ, ສາມາດຍົກລະດັບວັດທະນະທຳ ແລະ ການກິລາຂອງປະຊາຊົນໃຫ້ສູງຂຶ້ນ. ບັນຫານີ້ບໍ່ຕ້ອງເວົ້າຫຍັງຫຼາຍເນາະ ທ່ານຜູ້ຟັງ, ຖືໂອກາດຈັດງານໂອລິມປິກ, ສາມາດພັດທະນາພາລະກິດດ້ານການກິລາຂອງປະເທດຕົນໃຫ້ເຂັ້ມແຂງຂຶ້ນ. ເຈັດ, ຊຸກຍູ້ການໄປມາຫາສູ່ກັນລະຫວ່າງປະເທດເຈົ້າພາບກັບບັນດາປະເທດຕ່າງໆຂອງໂລກ. ບໍ່ຕ້ອງສົງໄສເລີຍວ່າ, ການຈັດງານໂອລິມປິກສາມາດເສີມຂະຫຍາຍບົດບາດອັນຕັ້ງໜ້າໃນການຊຸກຍູ້ການແລກປ່ຽນແລະໄປມາຫາສູ່ກັນ ລະຫວ່າງປະເທດເຈົ້າພາບກັບບັນດາປະເທດຕ່າງໆຂອງໂລກ, ເພີ່ມຄວາມເຂົ້າໃຈເຊິ່ງກັນແລະກັນ. ແປດ, ເປັນໂອກາດ ໂຄສະນາໂສມໜ້າຂອງປະເທດເຈົ້າພາບໃນເວທີສາກົນ. ໃນໄລຍະຈັດງານໂອລິມປິກ, ໃນທົ່ວໂລກຈະມີຄົນຈຳນວນນັບເປັນຕື້ຄົນເບິ່ງການແຂ່ງຂັນໂດຍຜ່ານທາງໂທລະພາບ, ນີ້ຈະເຮັດໃຫ້ປະເທດກໍຄືຕົວເມືອງເຈົ້າພາບກາຍເປັນຈຸດສຸມທີ່ດຶງດູດສາຍຕາຂອງຊາວໂລກ, ແລະສ້າງໂສມໜ້າພາບພົດທີ່ດີຂອງປະເທດຕົນໃນເວທີສາກົນ.
ໃນເມື່ອການຈັດງານໂອລິມປິກຈະເຮັດໃຫ້ປະເທດທີ່ເປັນເຈົ້າພາບໄດ້ຮັບຜົນປະໂຫຍດອັນມະຫາສານ, ດັ່ງນັ້ນແຫຼະ, ເຖິງວ່າຈະຕ້ອງໃຊ້ກຳລັງຄົນ, ກຳລັງວັດຖຸສິ່ງຂອງແລະກຳລັງຊັບສິນຫຼາຍເທົ່າໃດກໍຕາມ, ກໍຈະມີຫຼາຍໆປະເທດແຂ່ງຂັນກັນຮ້ອງຂໍເປັນເຈົ້າພາບຈັດງານໂອລິມປິກ. ນັບມາຮອດປັດຈຸບັນ, ງານມະໂຫລານໂອລິມປິກໄດ້ກາຍເປັນກາໝາຍທີ່ມີຊື່ສຽງໂດ່ງດັງທີ່ສຸດໃນຂອບເຂດທົ່ວໂລກແລ້ວ. ແຂ່ວແຈ້ງວ່າ, ຫວ່າງມໍ່ໆມານີ້, ບໍລິສັດເບຣນຟາຍເນນສ໌, ເຊິ່ງເປັນບໍລິສັດໃຫ້ຄຳປຶກສາກ່ຽວກັບມູນຄ່າກາໝາຍສິນຄ້າທີ່ມີຊື່ສຽງອັງກິດ ໄດ້ເປີດເຜີຍບົດລາຍງານ ໂດຍປະກາດວ່າ: ມູນຄ່າກາໝາຍສັນຍາລັກງານໂອລິມປິກໄດ້ເພີ່ມຂຶ້ນເລື້ອຍໆ, ນັບມາຮອດປັດຈຸບັນໄດ້ເພີ່ມຂຶ້ນຮອດ 47 ຕື້ 500 ລ້ານໂດລາແລ້ວ, ເຊິ່ງພຽງຖັດລົງມາຈາກມູນຄ່າ 70 ຕື້ 600 ລ້ານໂດລາຂອງບໍລິສັດແອັບເປີນອາເມລິກາເທົ່ານັ້ນ, ຄອງອັນດັບສອງຂອງໂລກ. ແຕ່ມີມູນຄ່າສູງກວ່າກາໝາຍບໍລິສັດກູໂກວ(Google), ເຊິ່ງເປັນບໍລິສັດຊອກຫາທາງເຄືອຂ່າຍອິນເຕີເນັດ ທີ່ມີມູນຄ່າ 47 ຕື້ 400 ລ້ານໂດລາ.
ບົດລາຍງານຂຽນວ່າ, ນັບແຕ່ງານມະໂຫລານໂອລິມປິກປັກກິ່ງ 2008 ເປັນຕົ້ນມາ, ລາຍຮັບລວມຈາກງານໂອລິມປິກໄດ້ເພີ່ມຂຶ້ນ 38% ໃນເວລາອັນສັ້ນ, ບັນລຸ 5 ຕື້ 100 ລ້ານໂດລາ, ໃນນັ້ນລາຍຮັບຈາກການຖ່າຍທອດງານແຂ່ງຂັນເພີ່ມຂຶ້ນ 51%, ບັນລຸ 3 ຕື້ 900 ລ້ານໂດລາ.
ບົດລາຍງານໄດ້ຄາດຄະເນວ່າ, ຮອດງານໂອລິມປິກທີ່ນະຄອນລີໂອເດີຈາເນໂລ 2016, ຕົວເລກດັ່ງກ່າວຍັງຈະເພີ່ມຂຶ້ນອີກ, ລາຍຮັບລວມຈະບັນລຸ 6 ຕື້ກວ່າໂດລາ. ທ່ານເຮກ, CEO ຂອງບໍລິສັດເບຣນຟາຍເນນສ໌ ກ່າວວ່າ, ຄາດວ່າງານໂອລິມປິກຄັ້ງນີ້ຈະສາມາດສ້າງລາຍຮັບສຸດທິໃຫ້ແກ່ອັງກິດຫຼາຍກວ່າ 25 ຕື້ໂດລາ.
© China Radio International.CRI. All Rights Reserved. 16A Shijingshan Road, Beijing, China. 100040 |