ຕາມຂ່າວCRI:ວັນທີ1ສິງຫານີ້,ການແຂ່ງຂັນກິລາໂອລິມປິກລອນດອນໄດ້ເຂົ້າສູ່ມື້ທີ່5ແລ້ວ,ມີການຊີງໄຊທັງໝົດ20ຫຼຽນຄຳ.ໃນນັ້ນ,ຄະນະນັກກິລາຈີນໄດ້4ຫຼຽນຄຳຈາກກິລາ ໂດດນ້ຳ,ປິ໋ງປ໋ອງ,ຍົກນ້ຳໜັກແລະລອຍນ້ຳ,ສືບຕໍ່ຢູ່ອັນດັບ1ໃນຕາຕະລາງສະຫຼຸບຫຼຽນດ້ວຍຫຼຽນຄຳ17ຫຼຽນ,ຫຼຽນເງິນ9ຫຼຽນແລະຫຼຽນທອງ4ຫຼຽນ.
ທ້າວຫຼູສຽວຈຸ່ນ
ໃນການແຂ່ງຂັນຍົກນ້ຳໜັກລຸ່ນ77ກິໂລເພດຊາຍ,ທ້າວຫຼູສຽວຈຸ່ນ,ນັກກິລາຈີນຊິງໄດ້ຫຼຽນຄຳດ້ວຍນ້ຳ ໜັກລວມ379ກິໂລ,ໃນນັ້ນ,ໃນທ່າ"ສະແນັດທ໌"ຍົກໄດ້175ກິໂລ,ແລະທ່າ"ຄລີນແອນເຈີກ"ຍົກໄດ້204ກິໂລ,ໃນທ່າສະແນັດທ໌ແລະຄະແນນລວມໄດ້ສ້າງສະຖິຕິໂລກໃໝ່.ທ້າວລູ້ຮ້າວເຈທີ່ເປັນເພື່ອນຮ່ວມທີມໄດ້ຫຼຽນເງິນ,ສ່ວນຫຼຽນທອງຕົກເປັນຂອງອີວານ ແຊມບາ,ນັກກິລາຈາກກຸຍບາ.
ນາງຈ່ຽວລິວຢາງ
ໃນການແຂ່ງຂັນຮອບຊີງຊະນະເລີດຂອງການແຂ່ງຂັນລອຍທ່າແມງກະເບື້ອ200ແມັດເພດຍິງ,ນາງຈ່ຽວລິວຢາງ,ນັກກິລາຈີນແຊງໜ້າຄູ່ແຂ່ງໃນໄລຍະສຸດທ້າຍ,ຊິງໄດ້ຫຼຽນຄຳແລະໄດ້ສ້າງສະຖິຕິໃໝ່ຂອງງານກິລາໂອລິມປິກ.
ນາງຫຼີສຽວເຊຍ
ສ່ວນການແຂ່ງຂັນປິ໋ງປ໋ອງຮອບຊີງຊະນະເລີດເພດຍິງ,ເປັນການພົບກັນເອງຂອງນັກກິລາຈີນ.ໃນທີ່ສຸດ,ຜົນການແຂ່ງຂັນແມ່ນນາງຫຼີສຽວເຊຍເອົາຊະນະນາງຕີ່ງນີງ,ໄດ້ຫຼຽນຄຳ,ຊຶ່ງເປັນຫຼຽນຄຳຫຼຽນທຳອິດຂອງກິລາປະເພດນີ້ໃນງານກິລາໂອລິມປິກຄັ້ງນີ້.
1 2 
